Ежедневные чтения Псалтири

Все тексты на сегодня представлены в соответствии с указаниями Типикона. Специальные чтения обозначены только для Великих и бденных праздников.

Порядок чтений Псалтири святого пророка и царя Давида
Суббота, 28 мая 2022 г. (15 мая ст.ст.)
Седмица 5-я по Пасхе
Свт. Исаии, еп. Ростовского, чудотворца (1090)
Блгв. царевича Димитрия, Угличского и Московского (1591)
Прп. Пахомия Великого (ок. 348)

Богослужебные указания для священно- и церковнослужителей

Пс.109:1 Рече Господь Господеви моему: седи одесную Мене, дондеже положу враги Твоя подножие ног Твоих.
Пс.109:2 Жезл силы послет Ти Господь от Сиона, и господствуй посреде врагов Твоих.
Пс.109:3 С Тобою начало в день силы Твоея, во светлостех святых твоих: из чрева прежде денницы родих Тя.
Пс.109:4 Клятся Господь и не раскается: Ты иерей во век по чину Мелхиседекову.
Пс.109:5 Господь одесную Тебе сокрушил есть в день гнева Своего цари:
Пс.109:6 судит во языцех, исполнит падения, сокрушит главы на земли многих.
Пс.109:7 От потока на пути пиет: сего ради вознесет главу.
Пс.110:1 Исповемся Тебе, Господи, всем сердцем моим в совете правых и сонме.
Пс.110:2 Велия дела Господня, изыскана во всех волях его:
Пс.110:3 исповедание и великолепие дело Его, и правда Его пребывает в век века.
Пс.110:4 Память сотворил есть чудес Своих: милостив и щедр Господь.
Пс.110:5 Пищу даде боящымся Его: помянет в век завет Свой.
Пс.110:6 Крепость дел Своих возвести людем Своим, дати им достояние язык.
Пс.110:7 Дела рук Его истина и суд, верны вся заповеди Его,
Пс.110:8 утвержены в век века, сотворены во истине и правоте.
Пс.110:9 Избавление посла людем Своим: заповеда в век завет Свой: свято и страшно имя Его.
Пс.110:10 Начало премудрости страх Господень, разум же благ всем творящым и: хвала Его пребывает в век века.
Пс.111:1 Блажен муж бояйся Господа, в заповедех Его восхощет зело.
Пс.111:2 Сильно на земли будет семя его, род правых благословится:
Пс.111:3 слава и богатство в дому его, и правда его пребывает в век века.
Пс.111:4 Возсия во тме свет правым: милостив и щедр и праведен.
Пс.111:5 Благ муж щедря и дая: устроит словеса своя на суде, яко в век не подвижится.
Пс.111:6 В память вечную будет праведник.
Пс.111:7 От слуха зла не убоится:
Пс.111:8 готово сердце его уповати на Господа: утвердися сердце его, не убоится, дондеже воззрит на враги своя.
Пс.111:9 Расточи, даде убогим: правда его пребывает во век века: рог его вознесется в славе.
Пс.111:10 Грешник узрит и прогневается зубы своими поскрежещет и растает: желание грешника погибнет.

Пс.118:1 Блажени непорочнии в путь, ходящии в законе Господни.
Пс.118:2 Блажени испытающии свидения Его, всем сердцем взыщут Его.
Пс.118:3 Не делающии бо беззакония в путех Его ходиша.
Пс.118:4 Ты заповедал еси заповеди Твоя сохранити зело:
Пс.118:5 дабы исправилися путие мои, сохранити оправдания Твоя.
Пс.118:6 Тогда не постыжуся, внегда призрети ми на вся заповеди Твоя.
Пс.118:7 Исповемся Тебе в правости сердца, внегда научитимися судьбам правды Твоея.
Пс.118:8 Оправдания Твоя сохраню: не остави мене до зела.
Пс.118:9 В чесом исправит юнейший путь свой? Внегда сохранити словеса Твоя.
Пс.118:10 Всем сердцем моим взысках Тебе: не отрини мене от заповедий Твоих.
Пс.118:11 В сердцы моем скрых словеса Твоя, яко да не согрешу Тебе.
Пс.118:12 Благословен еси, Господи: научи мя оправданием Твоим.
Пс.118:13 Устнама моима возвестих вся судьбы уст Твоих.
Пс.118:14 На пути свидений Твоих насладихся, яко о всяком богатстве.
Пс.118:15 В заповедех Твоих поглумлюся, и уразумею пути Твоя.
Пс.118:16 Во оправданиих Твоих поучуся: не забуду словес Твоих.
Пс.118:17 Воздаждь рабу Твоему: живи мя, и сохраню словеса Твоя.
Пс.118:18 Открый очи мои, и уразумею чудеса от закона Твоего.
Пс.118:19 Пришлец аз есмь на земли: не скрый от мене заповеди Твоя.
Пс.118:20 Возлюби душа моя возжелати судьбы Твоя на всякое время.
Пс.118:21 Запретил еси гордым: прокляти уклоняющиися от заповедий Твоих.
Пс.118:22 Отыми от мене понос и уничижение, яко свидений Твоих взысках.
Пс.118:23 Ибо седоша князи и на мя клеветаху, раб же Твой глумляшеся во оправданиих Твоих:
Пс.118:24 ибо свидения Твоя поучение мое есть, и совети мои оправдания Твоя.
Пс.118:25 Прильпе земли душа моя: живи мя по словеси Твоему.
Пс.118:26 Пути моя возвестих, и услышал мя еси: научи мя оправданием Твоим.
Пс.118:27 Путь оправданий Твоих вразуми ми, и поглумлюся в чудесех Твоих.
Пс.118:28 Воздрема душа моя от уныния: утверди мя в словесех Твоих.
Пс.118:29 Путь неправды отстави от мене и законом Твоим помилуй мя.
Пс.118:30 Путь истины изволих и судьбы Твоя не забых.
Пс.118:31 Прилепихся свидением Твоим, Господи, не посрами мене.
Пс.118:32 Путь заповедий Твоих текох, егда разширил еси сердце мое.
Пс.118:33 Законоположи мне, Господи, путь оправданий Твоих, и взыщу и выну:
Пс.118:34 вразуми мя, и испытаю закон Твой и сохраню и всем сердцем моим.
Пс.118:35 Настави мя на стезю заповедий Твоих, яко тую восхотех.
Пс.118:36 Приклони сердце мое во свидения Твоя, а не в лихоимство.
Пс.118:37 Отврати очи мои еже не видети суеты: в пути Твоем живи мя.
Пс.118:38 Постави рабу Твоему слово Твое в страх Твой.
Пс.118:39 Отыми поношение мое, еже непщевах: яко судьбы Твоя благи.
Пс.118:40 Се, возжелах заповеди Твоя: в правде Твоей живи мя.
Пс.118:41 И да приидет на мя милость Твоя, Господи, спасение Твое по словеси Твоему:
Пс.118:42 и отвещаю поношающым ми слово, яко уповах на словеса Твоя.
Пс.118:43 И не отыми от уст моих словесе истинна до зела, яко на судьбы Твоя уповах:
Пс.118:44 и сохраню закон Твой выну, в век и в век века.
Пс.118:45 И хождах в широте, яко заповеди Твоя взысках:
Пс.118:46 и глаголах о свидениих Твоих пред цари и не стыдяхся:
Пс.118:47 и поучахся в заповедех Твоих, яже возлюбих зело:
Пс.118:48 и воздвигох руце мои к заповедем Твоим, яже возлюбих, и глумляхся во оправданиих Твоих.
Пс.118:49 Помяни словеса Твоя рабу Твоему, ихже упование дал ми еси.
Пс.118:50 То мя утеши во смирении моем, яко слово Твое живи мя.
Пс.118:51 Гордии законопреступоваху до зела: от закона же Твоего не уклонихся.
Пс.118:52 Помянух судьбы Твоя от века, Господи, и утешихся.
Пс.118:53 Печаль прият мя от грешник, оставляющих закон Твой.
Пс.118:54 Пета бяху мне оправдания Твоя на месте пришелствия моего.
Пс.118:55 Помянух в нощи имя Твое, Господи, и сохраних закон Твой.
Пс.118:56 Сей бысть мне, яко оправданий Твоих взысках.
Пс.118:57 Часть моя еси, Господи: рех сохранити закон Твой.
Пс.118:58 Помолихся лицу Твоему всем сердцем моим: помилуй мя по словеси Твоему.
Пс.118:59 Помыслих пути Твоя и возвратих нозе мои во свидения Твоя.
Пс.118:60 Уготовихся и не смутихся сохранити заповеди Твоя.
Пс.118:61 Ужя грешник обязашася мне, и закона Твоего не забых.
Пс.118:62 Полунощи востах исповедатися Тебе о судьбах правды Твоея.
Пс.118:63 Причастник аз есмь всем боящымся Тебе и хранящым заповеди Твоя.
Пс.118:64 Милости Твоея, Господи, исполнь земля: оправданием Твоим научи мя.
Пс.118:65 Благость сотворил еси с рабом Твоим, Господи, по словеси Твоему:
Пс.118:66 благости и наказанию и разуму научи мя, яко заповедем Твоим веровах.
Пс.118:67 Прежде даже не смиритимися, аз прегреших: сего ради слово Твое сохраних.
Пс.118:68 Благ еси Ты, Господи: и благостию Твоею научи мя оправданием Твоим.
Пс.118:69 Умножися на мя неправда гордых: аз же всем сердцем моим испытаю заповеди Твоя.
Пс.118:70 Усырися яко млеко сердце их: аз же закону Твоему поучихся.
Пс.118:71 Благо мне, яко смирил мя еси, яко да научуся оправданием Твоим.
Пс.118:72 Благ мне закон уст Твоих паче тысящ злата и сребра.
Пс.118:73 Руце Твои сотвористе мя и создасте мя: вразуми мя, и научуся заповедем Твоим.
Пс.118:74 Боящиися Тебе узрят мя и возвеселятся, яко на словеса Твоя уповах.
Пс.118:75 Разумех, Господи, яко правда судьбы Твоя, и воистинну смирил мя еси.
Пс.118:76 Буди же милость Твоя, да утешит мя, по словеси Твоему рабу Твоему:
Пс.118:77 да приидут мне щедроты Твоя, и жив буду, яко закон Твой поучение мое есть:
Пс.118:78 да постыдятся гордии, яко неправедно беззаконноваша на мя: аз же поглумлюся в заповедех Твоих.
Пс.118:79 Да обратят мя боящиися Тебе и ведящии свидения Твоя.
Пс.118:80 Буди сердце мое непорочно во оправданиих Твоих, яко да не постыжуся.
Пс.118:81 Изчезает во спасение Твое душа моя, на словеса Твоя уповах:
Пс.118:82 изчезоша очи мои в слово Твое, глаголюще: когда утешиши мя?
Пс.118:83 Зане бых яко мех на слане: оправданий Твоих не забых.
Пс.118:84 Колико есть дний раба Твоего? Когда сотвориши ми от гонящих мя суд?
Пс.118:85 Поведаша мне законопреступницы глумления, но не яко закон Твой, Господи.
Пс.118:86 Вся заповеди Твоя истина: неправедно погнаша мя, помози ми.
Пс.118:87 Вмале не скончаша мене на земли: аз же не оставих заповедий Твоих.
Пс.118:88 По милости Твоей живи мя, и сохраню свидения уст Твоих.
Пс.118:89 Во век, Господи, слово Твое пребывает на небеси.
Пс.118:90 В род и род истина Твоя: основал еси землю, и пребывает.
Пс.118:91 Учинением Твоим пребывает день: яко всяческая работна Тебе.
Пс.118:92 Яко аще бы не закон Твой поучение мое был, тогда убо погибл бых во смирении моем:
Пс.118:93 во век не забуду оправданий Твоих, яко в них оживил мя еси.
Пс.118:94 Твой есмь аз, спаси мя: яко оправданий Твоих взысках.
Пс.118:95 Мене ждаша грешницы погубити мя: свидения Твоя разумех.
Пс.118:96 Всякия кончины видех конец: широка заповедь Твоя зело.
Пс.118:97 Коль возлюбих закон Твой, Господи: весь день поучение мое есть.
Пс.118:98 Паче враг моих умудрил мя еси заповедию Твоею, яко в век моя есть.
Пс.118:99 Паче всех учащих мя разумех, яко свидения Твоя поучение мое есть.
Пс.118:100 Паче старец разумех, яко заповеди Твоя взысках.
Пс.118:101 От всякаго пути лукава возбраних ногам моим, яко да сохраню словеса Твоя:
Пс.118:102 от судеб Твоих не уклонихся, яко Ты законоположил ми еси.
Пс.118:103 Коль сладка гортани моему словеса Твоя: паче меда устом моим.
Пс.118:104 От заповедий Твоих разумех: сего ради возненавидех всяк путь неправды.
Пс.118:105 Светилник ногама моима закон Твой, и свет стезям моим.
Пс.118:106 Кляхся и поставих сохранити судьбы правды Твоея.
Пс.118:107 Смирихся до зела: Господи, живи мя по словеси Твоему.
Пс.118:108 Вольная уст моих благоволи же, Господи, и судьбам Твоим научи мя.
Пс.118:109 Душа моя в руку Твоею выну, и закона Твоего не забых.
Пс.118:110 Положиша грешницы сеть мне: и от заповедий Твоих не заблудих.
Пс.118:111 Наследовах свидения Твоя во век, яко радование сердца моего суть:
Пс.118:112 приклоних сердце мое сотворити оправдания Твоя в век за воздаяние.
Пс.118:113 Законопреступныя возненавидех, закон же Твой возлюбих.
Пс.118:114 Помощник мой и заступник мой еси Ты: на словеса Твоя уповах.
Пс.118:115 Уклонитеся от мене, лукавнующии, и испытаю заповеди Бога моего.
Пс.118:116 Заступи мя по словеси Твоему, и жив буду: и не посрами мене от чаяния моего:
Пс.118:117 помози ми, и спасуся, и поучуся во оправданиих Твоих выну.
Пс.118:118 Уничижил еси вся отступающыя от оправданий Твоих: яко неправедно помышление их.
Пс.118:119 Преступающыя непщевах вся грешныя земли: сего ради возлюбих свидения Твоя.
Пс.118:120 Пригвозди страху Твоему плоти моя: от судеб бо Твоих убояхся.
Пс.118:121 Сотворих суд и правду: не предаждь мене обидящым мя.
Пс.118:122 Восприими раба Твоего во благо, да не оклеветают мене гордии.
Пс.118:123 Очи мои изчезосте во спасение Твое и в слово правды Твоея:
Пс.118:124 сотвори с рабом Твоим по милости Твоей, и оправданием Твоим научи мя.
Пс.118:125 Раб Твой есмь аз: вразуми мя, и увем свидения Твоя.
Пс.118:126 Время сотворити Господеви: разориша закон Твой.
Пс.118:127 Сего ради возлюбих заповеди Твоя паче злата и топазиа.
Пс.118:128 Сего ради ко всем заповедем Твоим направляхся, всяк путь неправды возненавидех.
Пс.118:129 Дивна свидения Твоя: сего ради испыта я душа моя.
Пс.118:130 Явление словес Твоих просвещает и вразумляет младенцы.
Пс.118:131 Уста моя отверзох и привлекох дух, яко заповедий Твоих желах.
Пс.118:132 Призри на мя и помилуй мя, по суду любящих имя Твое.
Пс.118:133 Стопы моя направи по словеси Твоему, и да не обладает мною всякое беззаконие:
Пс.118:134 избави мя от клеветы человеческия, и сохраню заповеди Твоя.
Пс.118:135 Лице Твое просвети на раба Твоего и научи мя оправданием Твоим.
Пс.118:136 Исходища водная изведосте очи мои, понеже не сохраних закона Твоего.
Пс.118:137 Праведен еси, Господи, и прави суди Твои:
Пс.118:138 заповедал еси правду свидения Твоя, и истину зело.
Пс.118:139 Истаяла мя есть ревность Твоя: яко забыша словеса Твоя врази мои.
Пс.118:140 Разжжено слово Твое зело, и раб Твой возлюби е.
Пс.118:141 Юнейший аз есмь и уничижен: оправданий Твоих не забых.
Пс.118:142 Правда Твоя правда во век, и закон Твой истина.
Пс.118:143 Скорби и нужди обретоша мя: заповеди Твоя поучение мое.
Пс.118:144 Правда свидения Твоя в век: вразуми мя, и жив буду.
Пс.118:145 Воззвах всем сердцем моим, услыши мя, Господи: оправдания Твоя взыщу.
Пс.118:146 Воззвах Ти, спаси мя, и сохраню свидения Твоя.
Пс.118:147 Предварих в безгодии и воззвах: на словеса Твоя уповах.
Пс.118:148 Предваристе очи мои ко утру, поучитися словесем Твоим.
Пс.118:149 Глас мой услыши, Господи, по милости Твоей: по судьбе Твоей живи мя.
Пс.118:150 Приближишася гонящии мя беззаконием: от закона же Твоего удалишася.
Пс.118:151 Близ еси Ты, Господи, и вси путие Твои истина.
Пс.118:152 Исперва познах от свидений Твоих, яко в век основал я еси.
Пс.118:153 Виждь смирение мое и изми мя: яко закона Твоего не забых.
Пс.118:154 Суди суд мой и избави мя: словесе ради Твоего живи мя.
Пс.118:155 Далече от грешник спасение, яко оправданий Твоих не взыскаша.
Пс.118:156 Щедроты Твоя многи, Господи: по судьбе Твоей живи мя.
Пс.118:157 Мнози изгонящии мя и стужающии ми: от свидений Твоих не уклонихся.
Пс.118:158 Видех неразумевающыя и истаях: яко словес Твоих не сохраниша.
Пс.118:159 Виждь, яко заповеди Твоя возлюбих: Господи, по милости Твоей живи мя.
Пс.118:160 Начало словес Твоих истина, и во век вся судьбы правды Твоея.
Пс.118:161 Князи погнаша мя туне: и от словес Твоих убояся сердце мое.
Пс.118:162 Возрадуюся аз о словесех Твоих, яко обретаяй корысть многу.
Пс.118:163 Неправду возненавидех и омерзих: закон же Твой возлюбих.
Пс.118:164 Седмерицею днем хвалих Тя о судьбах правды Твоея.
Пс.118:165 Мир мног любящым закон Твой, и несть им соблазна.
Пс.118:166 Чаях спасения Твоего, Господи, и заповеди Твоя возлюбих.
Пс.118:167 Сохрани душа моя свидения Твоя и возлюби я зело.
Пс.118:168 Сохраних заповеди Твоя и свидения Твоя, яко вси путие мои пред Тобою, Господи.
Пс.118:169 Да приближится моление мое пред Тя, Господи: по словеси Твоему вразуми мя.
Пс.118:170 Да внидет прошение мое пред Тя: Господи, по словеси Твоему избави мя.
Пс.118:171 Отрыгнут устне мои пение, егда научиши мя оправданием Твоим.
Пс.118:172 Провещает язык мой словеса Твоя, яко вся заповеди Твоя правда.
Пс.118:173 Да будет рука Твоя еже спасти мя, яко заповеди Твоя изволих.
Пс.118:174 Возжелах спасение Твое, Господи, и закон Твой поучение мое есть.
Пс.118:175 Жива будет душа моя и восхвалит Тя: и судьбы Твоя помогут мне.
Пс.118:176 Заблудих яко овча погибшее: взыщи раба Твоего, яко заповедий Твоих не забых.

Пс.1:1 Блажен муж, иже не иде на совет нечестивых, и на пути грешных не ста, и на седалищи губителей не седе:
Пс.1:2 но в законе Господни воля его, и в законе Его поучится день и нощь.
Пс.1:3 И будет яко древо насажденое при исходищих вод, еже плод свой даст во время свое, и лист его не отпадет: и вся, елика аще творит, успеет.
Пс.1:4 Не тако нечестивии, не тако: но яко прах, егоже возметает ветр от лица земли.
Пс.1:5 Сего ради не воскреснут нечестивии на суд, ниже грешницы в совет праведных.
Пс.1:6 Яко весть Господь путь праведных, и путь нечестивых погибнет.
Пс.2:1 Вскую шаташася языцы, и людие поучишася тщетным?
Пс.2:2 Предсташа царие земстии, и князи собрашася вкупе на Господа и на Христа Его.
Пс.2:3 Расторгнем узы их и отвержем от нас иго их.
Пс.2:4 Живый на небесех посмеется им, и Господь поругается им.
Пс.2:5 Тогда возглаголет к ним гневом Своим и яростию Своею смятет я:
Пс.2:6 Аз же поставлен есмь Царь от Него над Сионом, горою святою Его,
Пс.2:7 возвещаяй повеление Господне. Господь рече ко Мне: Сын Мой еси Ты, Аз днесь родих Тя:
Пс.2:8 проси от Мене, и дам ти языки достояние Твое, и одержание Твое концы земли:
Пс.2:9 упасеши я жезлом железным, яко сосуды скудельничи сокрушиши я.
Пс.2:10 И ныне, царие, разумейте, накажитеся вси судящии земли.
Пс.2:11 Работайте Господеви со страхом, и радуйтеся Ему со трепетом.
Пс.2:12 Приимите наказание, да не когда прогневается Господь, и погибнете от пути праведнаго, егда возгорится вскоре ярость Его: блажени вси надеющиися Нань.
Пс.3:1 Псалом Давиду, внегда отбегаше от лица Авессалома сына своего.
Пс.3:2 Господи, что ся умножиша стужающии ми? Мнози востают на мя,
Пс.3:3 мнози глаголют души моей: несть спасения ему в Бозе его.
Пс.3:4 Ты же, Господи, заступник мой еси, слава моя, и возносяй главу мою.
Пс.3:5 Гласом моим ко Господу воззвах, и услыша мя от горы святыя Своея.
Пс.3:6 Аз уснух, и спах, востах, яко Господь заступит мя.
Пс.3:7 Не убоюся от тем людий, окрест нападающих на мя.
Пс.3:8 Воскресни, Господи, спаси мя, Боже мой: яко Ты поразил еси вся враждующыя ми всуе, зубы грешников сокрушил еси.
Пс.3:9 Господне есть спасение, и на людех Твоих благословение Твое.
Пс.4:1 В конец, в песнех, Псалом Давиду.
Пс.4:2 Внегда призвати ми, услыша мя Бог правды моея: в скорби распространил мя еси: ущедри мя и услыши молитву мою.
Пс.4:3 Сынове человечестии, доколе тяжкосердии? Вскую любите суету и ищете лжи?
Пс.4:4 И уведите, яко удиви Господь преподобнаго Своего. Господь услышит мя, внегда воззвати ми к Нему.
Пс.4:5 Гневайтеся, и не согрешайте, яже глаголете в сердцах ваших, на ложах ваших умилитеся:
Пс.4:6 пожрите жертву правды и уповайте на Господа.
Пс.4:7 Мнози глаголют: кто явит нам благая? Знаменася на нас свет лица Твоего, Господи.
Пс.4:8 Дал еси веселие в сердцы моем: от плода пшеницы, вина и елеа своего умножишася:
Пс.4:9 в мире вкупе усну и почию, яко Ты, Господи, единаго на уповании вселил мя еси.
Пс.5:1 О наследствующем, Псалом Давиду.
Пс.5:2 Глаголы моя внуши, Господи, разумей звание мое.
Пс.5:3 Вонми гласу моления моего, Царю мой и Боже мой: яко к Тебе помолюся, Господи.
Пс.5:4 Заутра услыши глас мой: заутра предстану Ти, и узриши мя:
Пс.5:5 яко Бог не хотяй беззакония Ты еси: не приселится к Тебе лукавнуяй,
Пс.5:6 ниже пребудут беззаконницы пред очима Твоима: возненавидел еси вся делающыя беззаконие,
Пс.5:7 погубиши вся глаголющыя лжу: мужа кровей и льстива гнушается Господь.
Пс.5:8 Аз же множеством милости Твоея вниду в дом Твой, поклонюся ко храму святому Твоему, в страсе Твоем.
Пс.5:9 Господи, настави мя правдою Твоею, враг моих ради исправи пред Тобою путь мой.
Пс.5:10 Яко несть во устех их истины, сердце их суетно, гроб отверст гортань их, языки своими льщаху.
Пс.5:11 Суди им, Боже, да отпадут от мыслей своих: по множеству нечестия их изрини я, яко преогорчиша Тя, Господи.
Пс.5:12 И да возвеселятся вси уповающии на Тя, во век возрадуются, и вселишися в них: и похвалятся о Тебе любящии имя Твое.
Пс.5:13 Яко Ты благословиши праведника, Господи, яко оружием благоволения венчал еси нас.
Пс.6:1 В конец, в песнех о осмем, псалом Давиду.
Пс.6:2 Господи, да не яростию Твоею обличиши мене, ниже гневом Твоим накажеши мене.
Пс.6:3 Помилуй мя, Господи, яко немощен есмь: изцели мя, Господи, яко смятошася кости моя,
Пс.6:4 и душа моя смятеся зело: и Ты, Господи, доколе?
Пс.6:5 Обратися, Господи, избави душу мою, спаси мя ради милости Твоея:
Пс.6:6 яко несть в смерти поминаяй Тебе, во аде же кто исповестся Тебе?
Пс.6:7 Утрудихся воздыханием моим, измыю на всяку нощь ложе мое, слезами моими постелю мою омочу.
Пс.6:8 Смятеся от ярости око мое, обетшах во всех вразех моих.
Пс.6:9 Отступите от мене, вси делающии беззаконие, яко услыша Господь глас плача моего,
Пс.6:10 услыша Господь моление мое, Господь молитву мою прият.
Пс.6:11 Да постыдятся и смятутся вси врази мои, да возвратятся и устыдятся зело вскоре.
Пс.7:1 Псалом Давиду, егоже воспет Господеви о словесех Хусиевых, сына Иемениина.
Пс.7:2 Господи Боже мой, на Тя уповах, спаси мя от всех гонящих мя и избави мя:
Пс.7:3 да не когда похитит яко лев душу мою, не сущу избавляющу, ниже спасающу.
Пс.7:4 Господи Боже мой, аще сотворих сие, аще есть неправда в руку моею,
Пс.7:5 аще воздах воздающым ми зла, да отпаду убо от враг моих тощ:
Пс.7:6 да поженет убо враг душу мою, и да постигнет, и поперет в землю живот мой, и славу мою в персть вселит.
Пс.7:7 Воскресни, Господи, гневом Твоим, вознесися в концах враг Твоих, и востани, Господи Боже мой, повелением, имже заповедал еси,
Пс.7:8 и сонм людий обыдет Тя: и о том на высоту обратися.
Пс.7:9 Господь судит людем: суди ми, Господи, по правде моей и по незлобе моей на мя.
Пс.7:10 Да скончается злоба грешных, и исправиши праведнаго, испытаяй сердца и утробы, Боже, праведно.
Пс.7:11 Помощь моя от Бога, спасающаго правыя сердцем.
Пс.7:12 Бог судитель праведен, и крепок, и долготерпелив, и не гнев наводяй на всяк день.
Пс.7:13 Аще не обратитеся, оружие Свое очистит, лук Свой напряже, и уготова и,
Пс.7:14 и в нем уготова сосуды смертныя, стрелы Своя сгараемым содела.
Пс.7:15 Се, боле неправдою, зачат болезнь и роди беззаконие:
Пс.7:16 ров изры и ископа и, и падет в яму, юже содела.
Пс.7:17 Обратится болезнь его на главу его, и на верх его неправда его снидет.
Пс.7:18 Исповемся Господеви по правде Его и пою имени Господа Вышняго.
Пс.8:1 В конец, о точилех, Псалом Давиду.
Пс.8:2 Господи Господь наш, яко чудно имя Твое по всей земли, яко взятся великолепие Твое превыше небес.
Пс.8:3 Из уст младенец и ссущих совершил еси хвалу, враг Твоих ради, еже разрушити врага и местника.
Пс.8:4 Яко узрю небеса, дела перст Твоих, луну и звезды, яже Ты основал еси:
Пс.8:5 что есть человек, яко помниши его? Или сын человечь, яко посещаеши его?
Пс.8:6 Умалил еси его малым чим от Ангел, славою и честию венчал еси его:
Пс.8:7 и поставил еси его над делы руку Твоею, вся покорил еси под нозе его:
Пс.8:8 овцы и волы вся, еще же и скоты польския,
Пс.8:9 птицы небесныя и рыбы морския, преходящыя стези морския.
Пс.8:10 Господи Господь наш, яко чудно имя Твое по всей земли.