Глава 20 26 И бысть минувшу лету тому, и сочте сын Адеров Сирию, и взыде во Афеку на брань на Израиля. 27 И сынове Израилевы сочислишася и изыдоша во сретение им. И ополчишася Израилтяне противу им, аки два стада коз: Сириане же наполниша землю. 28 И прииде человек Божий и рече к царю Израилеву: сице глаголет Господь: понеже рече Сириа: Бог гор Господь Бог Израилев, и не Бог юдолий той, и дам силу великую сию в руку твою, и уразумееши, яко Аз Господь. 29 И ополчишася тии противу им седмь дний. И бысть в день седмый, и приближися брань, и порази Израиль Сириан, сто и двадесять тысящ пешцев во един день. 30 И бежаша оставшиися во Афеку град, и паде стена на двадесять седмь тысящ мужей оставшихся: сын же Адеров бежа и вниде в дом ложа, в чертог. 31 И реша к нему отроцы его: се, ныне вемы, яко царие дому Израилева милостиви суть: да возложим ныне вретища на чресла наша и ужа на выи нашя, и изыдем ко царю Израилеву, да негли оживит душы нашя. 32 И препоясашася во вретища по чреслом своим, и возложиша ужя на выи своя, и приидоша к царю Израилеву и реша: раб твой сын Адеров глаголет: да живет душа моя. И рече: аще есть еще жив, брат ми есть. 33 И мужие за знак и в залог прияша слово от уст его, и реша: брат твой сын Адеров. И рече: идите и приведите его. И изыде к нему сын Адеров. И возведоша его к нему на колесницу. 34 И рече к нему: грады, яже взя отец мой от отца твоего, отдам тебе: и на исход сотвориши я себе в Дамасце, якоже положи отец мой в Самарии, и аз в завете пущу тя. И положи ему завет и отпусти его.
Регистрационный номер СМИ Эл № ФС77-81077 зарегистрировано Федеральной службой Роскомнадзор 25 мая 2021 г.
Го́споди Иису́се Христе́, Сы́не Бо́жий, Ты бо ре́кл еси́ пречи́стыми усты́ Твои́ми: "Ами́нь глагóлю вáм, я́ко áще двá от вáс совещáета на земли́ о вся́цей вéщи, ея́же áще прóсита, бýдет и́ма от Отцá моегó, и́же на небесе́х: иде́же бо естá двá или́ триé сóбрани во и́мя моé, тý éсмь посреде́ и́х". Непрело́жны словеса́ Твоя́, Го́споди, милосе́рдие Твое́ безприкла́дно и человеколю́бию Твоему́ не́сть конца́. Сего́ ра́ди мо́лим Тя, да́руй на́м, рабóм Твои́м [И́мярек] [Та́же: Ми́лостиво про́сим до́брых моли́тв твоего́ боголю́бия, дорого́й чита́тель, о Генна́дии, Серге́е, Андре́е, Кири́лле, Варва́ре] [Или́: Са́м помяни́, Бо́же, ве́дый коего́ждо во́зраст и именова́ние], согласи́вшимся проси́ть Тя: О Це́ркви Твое́й святе́й под зна́мением Креста́ во́инствующей, согла́сии в ве́ре и единому́дрии, суему́дрия же и раско́лов истребле́ние; О ми́ре, тишине́ и благоустрое́нии во все́й богопросвеще́нной держа́ве Росси́йстей; О долгоде́нствии, душе́вном и теле́сном здра́вии правосла́внаго Госуда́ря Росси́йскаго [И́мярек], на враги́ же его́ побе́ду и одоле́ние; О младе́нцев воспита́нии и благода́тном охране́нии; О да́ре, все́м и коему́ждо благопотре́бнем, душе́вном и теле́сном здра́вии, да поживе́м в ве́це се́м в покая́нии, чистоте́, в творе́нии богоуго́дных де́л и да сподо́бимся ви́дети блага́я на земли́ живы́х; Об избавле́нии от тру́са, пото́па, огня́, меча́ и вся́каго пра́веднаго гне́ва и преще́ния, благовре́менне подвиза́я нас к очисти́тельному и умилостиви́тельному во гресе́х на́ших покая́нию, ра́ди мно́жества щедро́т Твои́х; О христиа́нския кончи́ны живота́ на́шего, безболе́знены, непосты́дны, ми́рны и до́браго отве́та на Стра́шнем Суди́щи Твое́м исполне́ния на́шего проше́ния. [Та́же: Отврати́, Го́споди, от на́с все́х вра́г ви́димых и неви́димых да сохрани́ши на́с благода́тию Твое́ю и непобеди́мым ополче́нием а́нгел Твои́х, и́ми же огражда́еми и наставля́еми]. Но оба́че не я́коже мы хоти́м, но я́коже Ты. Да бу́дет во ве́ки во́ля Твоя́. Ами́нь.