Конда́къ 1

Возбра́нному Воево́дѣ, разруши́телю сме́рти и а́да, побѣ́дную пѣ́снь Тебѣ́, Всецарю́ Христе́, прино́симъ, я́ко воста́лъ еси́, Всеси́льне, со сла́вою тридне́венъ отъ гро́ба и вся́ уме́ршія отъ вѣ́ка совоскреси́лъ еси́; мы́ же, страда́ніемъ Твои́мъ вѣ́чныя тли́ изба́вльшеся, къ са́мому мѣ́сту погребе́нія Твоего́ съ весе́ліемъ и ра́достію зове́мъ:

Ра́дуйся, живоно́сный гро́бе, изъ него́же Христо́съ воскре́се!

Икосъ 1

Ангелъ предста́тель съ небесе́ низше́дъ, ка́мень отъ гро́ба Твоего́ отвали́, Христе́ Бо́же, и мѵроно́сицамъ благовѣсти́ воста́ніе Твое́, глаго́ля: "ше́дше, рцы́те ученико́мъ Его́, я́ко воста́ отъ ме́ртвыхъ"; они́ же, вразумле́нные чу́днымъ явле́ніемъ, зря́ще ко гро́бу Твоему́, съ вѣ́рою и любо́вію возглаша́ху:

Ра́дуйся, живоно́сный гро́бе, въ не́мже Христо́съ, я́ко человѣ́къ, почи́, и я́ко Бо́гъ, воскре́се тридне́венъ! Ра́дуйся, я́ко изъ тебе́ Спа́съ мíра, я́ко Жени́хъ изъ черто́га изше́дъ, сме́рть попра́ и а́да плѣни́лъ е́сть! Ра́дуйся, я́ко воста́ніемъ Того́, отъ вѣ́ка уме́ршіи, въ жи́знь нестарѣ́емую воста́ша! Ра́дуйся, я́ко въ тебѣ́ Христу́ возле́гшу, прокля́тая въ дѣ́лѣхъ человѣ́ка земля́ освяти́ся! Ра́дуйся, я́ко тобо́ю первозда́нный Ада́мъ па́ки въ ри́зу безсме́ртія облека́ется! Ра́дуйся, я́ко въ тебѣ́ о́бразъ всемíрнаго воскресе́нія начертава́ется!

Ра́дуйся, живоно́сный гро́бе, изъ него́же Христо́съ воскре́се!

Конда́къ 2

Яко пріи́де на гро́бъ Марíя Магдали́на и друга́я Марíя пома́зати Тѣ́ло Твое́, Христе́ Бо́же, обрѣто́ша а́нгела на ка́мени сѣдя́ща, и глаго́люща къ ни́мъ: "не бо́йтеся! вѣ́мъ бо, я́ко Іису́са распя́таго и́щете; нѣ́сть здѣ́, но воста́, я́коже рече́ ва́мъ". Сія́ у́бо слы́шавше святы́я же́ны, те́кше вспя́ть, благовѣсти́ша ученико́мъ о воста́ніи Твое́мъ, да вси́, я́ко Творцу́ и воскре́сшему Влады́цѣ а́нгельское пѣ́ніе воспою́тъ, глаго́люще: Аллилу́ія!

Икосъ 2

Бу́рю вну́трь имѣ́яху сумни́тельныхъ помышле́ній ученицы́ Твои́, Христе́, въ ча́съ сме́рти Твоея́, не вѣ́дуще Писа́нія, я́ко подоба́етъ Тебѣ́ изъ ме́ртвыхъ воскре́снути; тѣ́мже Пе́тръ, вѣ́сть пріе́мъ о воста́ніи Твое́мъ, тече́ ко гро́бу, хотя́ ви́дѣти бы́вшее, прини́къ же и ви́дѣвъ еди́ны ри́зы Твоя́ въ не́мъ лежа́ща, съ вѣ́рою возгласи́:

Ра́дуйся, живоно́сный гро́бе, я́ко въ тебѣ́, посредѣ́ земли́, всемíрное спасе́ніе содѣ́яся! Ра́дуйся, я́ко Царю́ царе́й о́дръ, и Влады́кѣ влады́къ поко́ище бы́лъ еси́! Ра́дуйся, я́ко тобо́ю беззако́нное со́нмище іуде́йское всеконе́чнѣ посрами́ся! Ра́дуйся, я́ко предъ тобо́ю е́ресь саддуке́евъ, глаго́лющихъ не бы́ти воскресе́нію, низложи́ся! Ра́дуйся, гро́бе, па́че хра́ма Соломо́нова честнѣ́йшій! Ра́дуйся, па́че ски́ніи свидѣ́нія и ковче́га завѣ́та святѣ́йшій!

Ра́дуйся, живоно́сный гро́бе, изъ него́же Христо́съ воскре́се!

Конда́къ 3

Слы́шавше, и́же отъ кустодíи, су́етніи стра́жи гро́ба Твоего́, Христе́, тру́съ ве́лій бы́вшій, и ка́мень отвале́нъ и гро́бъ пра́зденъ ви́дяще, отъ стра́ха бы́ша я́ко ме́ртвы, и те́кше во гра́дъ, возвѣща́ху архіере́емъ и ста́рцемъ вся́ бы́вшая; они́ же, пребеззако́нніи, а́ще и умы́слиша утаи́ти ве́ліе чу́до, но не возмого́ша сокры́ти и́стины, ниже́ воспяти́ти вѣ́рующимъ пѣ́ти Тебѣ́: Аллилу́ія!

Икосъ 3

Иже иногда́ стра́ха ра́ди іуде́йска потае́нъ сы́й учени́къ Тво́й, Христе́, Іо́сифъ, и́же отъ Аримаѳе́я, испроси́ у Пила́та Боже́ственное Тѣ́ло Твое́ и съ Никоди́момъ, смѣше́ніемъ смѵ́рны и ало́я пома́завъ е́ и плащани́цею чи́стою обви́въ, во гро́бѣ но́вѣ положи́, въ не́мже никто́же отъ человѣ́къ погребе́нъ бы́сть, то́кмо Ты́ еди́нъ, да освяти́ши земно́е естество́; увѣ́дѣвъ же по си́хъ Твое́ изъ ме́ртвыхъ воскресе́ніе, прише́дъ ко гро́бу Твоему́, со умиле́ніемъ возгласи́:

Ра́дуйся, живоно́сный гро́бе, не кустодíею, па́че же арха́нгелами и а́нгелами стрего́мый! Ра́дуйся, я́ко отъ тебе́ Христо́съ со сла́вою изше́дъ, безу́мныя стра́жи Пила́товы недоумѣ́ніемъ и у́жасомъ порази́! Ра́дуйся, я́ко печа́тей гро́бныхъ не вреди́въ, богопроти́внаго Каіа́фу посрами́! Ра́дуйся, я́ко изъ тебе́ воскре́сшу Христу́, свѣ́тлый де́нь всемíрнаго Боговѣ́дѣнія наста́! Ра́дуйся, я́ко тобо́ю и́долы и куми́ры по всѣ́мъ конце́мъ земли́ сокруша́тся! Ра́дуйся, я́ко на тебѣ́ хра́мы Бо́га и́стиннаго по все́й вселе́ннѣй утвердя́тся!

Ра́дуйся, живоно́сный гро́бе, изъ него́же Христо́съ воскре́се!

Конда́къ 4

Воспомина́юще ученицы́ Твои́ пресла́дкое обѣтова́ніе, е́же, гряды́й на во́льную стра́сть, провѣща́лъ еси́ предъ ни́ми, варя́ти и́хъ по воскресе́ніи въ Галиле́и, поспѣ́шшеся, идо́ша въ Галиле́ю, въ го́ру, а́може повелѣ́лъ еси́, и ви́дѣвше Тя́ та́мо, Его́же пре́жде обыко́ша зрѣ́ти, и́стинна Человѣ́ка, не привидѣ́ніемъ, но са́мою ве́щію пло́ть на́шу нося́ща, съ вѣ́рою и любо́вію, я́ко Бо́гу, поклони́шася, зову́ще: Аллилу́ія!

Икосъ 4

Ра́зумъ неуразумѣ́нный бы́лъ еси́ іуде́омъ, неразумѣ́вшимъ проро́ческихъ о Тебѣ́ сказа́ній, ниже́ иска́вшимъ позна́ти и́стину воскресе́нія Твоего́, ка́ко печа́ти не ру́шивъ, изъ гро́ба изше́лъ еси́? Тѣ́мже безу́мнѣ науща́ху кустодíю возвѣсти́ти лю́демъ, Пречи́стое Тѣ́ло Твое́ укра́дено бы́ти. Мы́ же, пресла́вному Воскресе́нію Твоему́ дивя́щеся, похва́льная живоно́сному гро́бу Твоему́ воспису́емъ, глаго́люще:

Ра́дуйся, всебога́тый гро́бе, я́ко имѣ́лъ еси́ въ тебѣ́ всѣ́мъ жи́знь Подаю́щаго! Ра́дуйся, я́ко оскверне́нная беззако́ніями человѣ́ческими земля́ пречи́стою Пло́тію Христо́вою, въ тебѣ́ возлежа́вшею, освяща́ется! Ра́дуйся, я́ко Воскре́сшій изъ тебе́ прія́ вся́ку вла́сть на небеси́ и на земли́, да всѣ́хъ и вся́ къ Бо́гу Отцу́ приведе́тъ! Ра́дуйся, я́ко ка́меню отъ тебе́ а́нгеломъ отвале́ну бы́вшу, святы́я же́ны мѵроно́сицы уразумѣ́ша Христо́во воскресе́ніе! Ра́дуйся, я́ко Спа́су мíра изъ тебе́ воста́вшу, во всю́ зе́млю изы́де апо́стольское вѣща́ніе! Ра́дуйся, въ не́мже благода́ть воскре́сшаго Жизнода́вца до дне́сь неви́димо почíетъ!

Ра́дуйся, живоно́сный гро́бе, изъ него́же Христо́съ воскре́се!

Конда́къ 5

По дне́хъ осми́хъ отъ воста́нія Твоего́, Го́споди, прише́лъ еси́ ко ученико́мъ Твои́мъ, две́ремъ заключе́ннымъ, дарова́ніе Свята́го Ду́ха подая́ и́мъ. Тогда́ у́бо и Ѳомѣ́ ре́клъ еси́: "пріиди́, осяжи́ я́звы Моя́, и не бу́ди невѣ́ренъ, но вѣ́ренъ". Тѣ́мже позна́въ Тебе́ и́стинно воскре́сша бы́ти, съ про́чими ученики́ ра́достнѣ возопи́: Аллилу́ія!

Икосъ 5

Вѣ́тія суему́дренныя, кни́жники іуде́йстіи, я́коже ры́бы безгла́сныя ви́димъ, недоумѣ́ющія глаго́лати о пресла́вномъ воста́ніи Твое́мъ, Христе́, и неразумѣ́ющія, я́ко подоба́ше Тебѣ́ пострада́ти за ро́дъ человѣ́чь и изъ ме́ртвыхъ воскре́снути. Мы́ же, совоскре́сшіе Тебѣ́ вѣ́рою и любо́вію, съ весе́ліемъ са́мому гро́бу Твоему́ зове́мъ:

Ра́дуйся, живоно́сный гро́бе, я́ко тобо́ю жи́знь вѣ́чная всѣ́мъ конце́мъ земли́ позна́ся! Ра́дуйся, я́ко въ тебѣ́ сме́ртію Нача́льника жи́зни сме́рти жа́ло и держа́ва сокруши́ся! Ра́дуйся, я́ко отъ сѣ́вера и мо́ря къ тебѣ́ приходя́ще, воскре́сшаго Жизнода́вца прославля́ютъ! Ра́дуйся, я́ко отъ за́пада и восто́ка теку́ще, вси́ въ тебѣ́ зало́гъ безсме́ртія обрѣта́ютъ! Ра́дуйся, я́ко по о́бразу Твоему́ всѣ́ гро́бы издаду́тъ свои́хъ мертвеце́въ въ де́нь послѣ́дній! Ра́дуйся, вѣ́ры христіа́нскія утвержде́ніе и проро́ческихъ сказа́ній печа́те!

Ра́дуйся, живоно́сный гро́бе, изъ него́же Христо́съ воскре́се!

Конда́къ 6

Егда́ по воскресе́ніи Твое́мъ, Христе́, яви́лся еси́ ученико́мъ Твои́мъ на мо́ри Тиверіа́дстѣмъ, повелѣва́я воврещи́ мре́жу одесну́ю корабля́, тогда́ возлю́бленный учени́къ Тво́й, позна́въ Тя́ отъ лови́твы ры́бъ, Петро́ви глаго́лаше: "Госпо́дь е́сть!" Изше́дше у́бо на зе́млю, обрѣто́ша о́гнь и ры́бу лежа́щу и хлѣ́бъ, отъ ни́хже вкуси́вше и позна́вше въ Тебѣ́ своего́ Учи́теля и Го́спода, еди́нѣми усты́ и еди́нѣмъ се́рдцемъ возопи́ша: Аллилу́ія!

Икосъ 6

Утру су́щу глубоку́, же́ны пріидо́ша на гро́бъ Тво́й, Іису́се, но жела́емаго Тѣ́ла Твоего́ не обрѣ́тше, недоумѣ́ніемъ и печа́лію одержи́ми бя́ху. Ты́ же, Утѣ́шителю скорбя́щихъ, я́влься и́мъ посреди́ вертогра́да, еди́нымъ гла́сомъ: "Марíе!" пла́чь и́хъ на ра́дость преложи́лъ еси́, тѣ́мже позна́вше воскресе́ніе Твое́, съ весе́ліемъ восклица́ху:

Ра́дуйся, живоно́сный гро́бе, въ не́мже Христу́ все́льшуся, а́дова оскудѣ́ша ца́рствія! Ра́дуйся, я́ко тебѣ́ отъ первосвяще́нниковъ запечатлѣ́ну бы́вшу, влады́ка сѣ́ни сме́ртныя съ тре́петомъ издаде́ у́зники, я́же отъ вѣ́ка содержа́лъ е́сть! Ра́дуйся, я́ко въ тру́сѣ, при воста́ніи изъ тебе́ со сла́вою Искупи́теля человѣ́ковъ, вся́ тва́рь обрѣ́те вѣ́чное успокое́ніе! Ра́дуйся, я́ко въ тебѣ́ о́бразъ всемíрнаго воскресе́нія Боголѣ́пно предъизобрази́ся! Ра́дуйся, я́ко тобо́ю ли́къ апо́стольскій въ вѣ́рѣ и любви́ утверди́ся! Ра́дуйся, и ты́, Іо́сифе, толи́кое сокро́вище въ твое́мъ вертогра́дѣ стяжа́вый!

Ра́дуйся, живоно́сный гро́бе, изъ него́же Христо́съ воскре́се!

Конда́къ 7

Въ страда́ніи Твое́мъ, Христе́, не терпя́ со́лнце беззако́нныхъ неи́стовства, свѣ́тъ сво́й скры́, и завѣ́са церко́вная раздра́ся; въ живоно́сномъ же гро́бѣ Тебѣ́ положе́ну бы́вшу, земля́ потрясе́ся, а́ки хотя́ поглоти́ти законопресту́пныхъ; но Ты́, я́ко Бо́гъ, воскре́съ еси́ со сла́вою, и всеро́днаго Ада́ма воздви́глъ еси́ съ Тобо́ю, тѣ́мже досто́йно и пра́ведно воскресе́нію Твоему́ зове́мъ: Аллилу́ія!

Икосъ 7

По пресла́вномъ воста́ніи Твое́мъ, Христе́, Луцѣ́ и Клео́пѣ яви́лся еси́, я́ко стра́нникъ, на пути́ въ Еммау́съ, и бесѣ́дующимъ и́мъ о приклю́чшихся въ Іерусали́мѣ, зазира́емъ бы́лъ еси́ отъ ни́хъ, я́ко еди́нъ невѣ́дый бы́вшаго. Ты́ же, я́ко Всевѣ́дущій, проро́чествія откры́въ и невѣ́рствіе и́хъ обличи́въ, позна́лся еси́ и́ма въ преломле́ніи хлѣ́ба; тѣ́мже у́бо съ ра́достію вели́кою возврати́вшеся во Іерусали́мъ, и узрѣ́вше вертогра́дъ Іо́сифовъ, возгласи́ша:

Ра́дуйся, живоно́сный гро́бе, изъ него́же, я́ко Іо́на изъ чре́ва ки́това, Христо́съ тридне́венъ произы́де! Ра́дуйся, я́ко послѣ́днее вита́лище бы́лъ еси́ Тому́, Иже на земли́ не имѣ́ гдѣ́ главу́ подклони́ти! Ра́дуйся, я́ко тобо́ю положи́ся предѣ́лъ во́льному уничиже́нію на́съ ра́ди Спаси́теля мíру! Ра́дуйся, я́ко въ тебѣ́ преднача́ся торжество́ Побѣди́теля а́да и сме́рти! Ра́дуйся, я́ко не ктому́ мо́гутъ законопресту́пніи оклевета́ти лже́ю воста́ніе изъ гро́ба Сы́на Человѣ́ческаго! Ра́дуйся, я́ко тобо́ю не́бо и земля́ и преиспо́дняя обрѣто́ша ра́дость!

Ра́дуйся, живоно́сный гро́бе, изъ него́же Христо́съ воскре́се!

Конда́къ 8

Все́ естество́ а́нгельское и человѣ́ческое удиви́ся вели́кому Твоему́, е́же о на́съ, смотре́нію: непристу́пнаго бо, я́ко Бо́га, зря́ще всѣ́мъ присту́пна Человѣ́ка, зра́къ раба́ пріи́мша, распя́та же и погребе́нна, но воскре́сша въ тре́тій де́нь во сла́вѣ и возне́сшася съ пло́тію на не́бо, тѣ́мъ у́бо я́ко Спаси́телю и Влады́цѣ воспѣва́емъ: Аллилу́ія!

Икосъ 8

Но́вое и пресла́вное чу́до показа́лъ еси́ воскресе́ніемъ Твои́мъ, Христе́ Бо́же на́шъ, печа́ти гро́ба не вреди́въ, я́коже и Дѣ́вы въ рождествѣ́ Твое́мъ, тѣ́мже почита́емъ во́льная страда́нія Твоя́, славосло́вимъ Кре́стъ и погребе́ніе, и пресла́вному Воскресе́нію Твоему́ покланя́ющеся, къ живоно́сному гро́бу Твоему́ съ весе́ліемъ зове́мъ:

Ра́дуйся, всесвяты́й гро́бе, изъ него́же Христо́съ, я́коже прорече́, воскре́се и Собо́ю ве́сь мíръ обнови́! Ра́дуйся, отъ него́же всезло́бный вра́гъ ро́да человѣ́ческаго лютѣ́йшій уда́ръ во главу́ прія́! Ра́дуйся, я́ко отъ тебе́ отвале́нный ка́мень а́дова врата́ сокруши́ и ве́реи желѣ́зныя сотре́! Ра́дуйся, я́ко изъ тебе́ всемíрное Со́лнце пра́вды возсія́ и мглу́ невѣ́рія разгна́! Ра́дуйся, я́ко въ тебѣ́ Христу́ возле́гшу, вся́ концы́ земли́ вони́ безсме́ртія испо́лнишася! Ра́дуйся, я́ко тебѣ́ откры́вшуся, исто́чникъ на́шего тлѣ́нія заключи́ся!

Ра́дуйся, живоно́сный гро́бе, изъ него́же Христо́съ воскре́се!

Конда́къ 9

Проповѣ́дницы воста́нія Твоего́, богоно́сніи апо́столи, по́слани бы́вше, отъ коне́цъ до коне́цъ земли́ проповѣ́даша Тебе́ и́стиннаго Бо́га, и́долы сокруши́ша, беззако́нные обы́чаи язы́ческіе попра́ша, хра́мы и же́ртвенники Бо́гу и́стинну воздвиго́ша, и всѣ́хъ вѣ́рныхъ научи́ша воспѣва́ти Тебѣ́: Аллилу́ія!

Икосъ 9

По воста́ніи Твое́мъ изъ гро́ба, две́ремъ заключе́ннымъ, ко ученико́мъ Твои́мъ вше́лъ еси́, и вку́шъ отъ хлѣ́ба и со́та, Сла́дость церко́вная, не привидѣ́ніе предъ ни́ми, но и́стиннаго и́хъ Учи́теля и Го́спода бы́ти увѣ́рилъ еси́, тѣ́мже, свобо́ждшеся отъ недоумѣ́ній и стра́ха, съ ра́достію неизрече́нною посѣща́ху мѣ́сто погребе́нія Твоего́, глаго́люще:

Ра́дуйся, живоно́сный гро́бе, въ не́мже Бо́гъ Сло́во, пло́тію усну́въ, священнота́йнѣ тридне́внова! Ра́дуйся, я́ко То́йже воста́ніемъ Свои́мъ вся́ отъ вѣ́ка усну́вшія возбуди́лъ е́сть! Ра́дуйся, я́ко въ тебѣ́ Со́лнцу пра́вды, Христу́, заше́дшу, су́щимъ во а́дѣ и сѣ́ни сме́ртнѣй Свѣ́тъ жи́зни возсія́! Ра́дуйся, я́ко изъ тебе́ Произше́дый, воскресе́ніе и живо́тъ вѣ́чный всѣ́мъ дарова́! Ра́дуйся, я́ко а́нгелу о тебѣ́ благовѣству́ющу, пла́чь и рыда́ніе Ада́мово преста́! Ра́дуйся, я́ко ка́меню отъ тебе́ отпа́дшу, каменносерде́чніи язы́цы навы́кнутъ вѣ́ровати въ жи́знь вѣ́чную!

Ра́дуйся, живоно́сный гро́бе, изъ него́же Христо́съ воскре́се!

Конда́къ 10

Земля́ убоя́ся и умолче́, Тебе́, Творца́ своего́, зря́щи во гро́бѣ ма́лѣ положе́на; а́дъ, вострепета́въ отъ непристу́пныя сла́вы Воскресе́нія Твоего́, издая́ше ме́ртвыя, отъ вѣ́ка содержи́мыя; небеса́ же восхо́дъ ко Отцу́ гото́вяху, Его́же николи́же отлуча́лся еси́. Тѣ́мже и мы́, иску́пленніи Кресто́мъ Твои́мъ, вси́ Тебѣ́ зове́мъ: Аллилу́ія!

Икосъ 10

Марíя Магдали́на, я́ко теплѣ́йшая къ Тебѣ́, Христу́ Бо́гу, вѣ́рою, зѣло́ ра́но прише́дши на гро́бъ Тво́й, сподо́бися узрѣ́ти Тя́, Жизнода́вца, и жела́ше облобыза́ти пречи́стыя но́зѣ Твои́, но Ты́ у́бо, я́ко Влады́ка вся́ческихъ, - "не прикаса́йся Мнѣ́", - ре́клъ еси́, - "не у́бо взыдо́хъ ко Отцу́ Моему́, иди́ же къ бра́тіи Мое́й и рцы́ и́мъ о воста́ніи Мое́мъ". Тѣ́мже, я́ко благовѣ́стіе нося́щая, не́бо и зе́млю оглаша́ше, вопію́ще:

Ра́дуйся, живоно́сный гро́бе, въ не́мже Христо́съ Пречи́стою Пло́тію, усну́ и почи́ я́ко ле́въ, ники́мже возбуди́мый! Ра́дуйся, изъ него́же я́ко Бо́гъ, самовла́стнѣ воста́, ничи́мже удержи́мый! Ра́дуйся, я́ко о бы́вшемъ въ тебѣ́ а́дъ нево́лею и́стинствуетъ, глаго́ля: "у́не мнѣ́ бя́ше, а́ще бы отъ Марíи Ро́ждшагося не прія́лъ!" Ра́дуйся, я́ко тобо́ю посра́мленъ, кня́зь тьмы́ рыда́етъ! Ра́дуйся, я́ко тобо́ю обра́дованъ, ли́къ а́нгельскій торжеству́етъ! Ра́дуйся, но́выя благода́ти храни́лище и непрестаю́щихъ чуде́съ исто́чниче!

Ра́дуйся, живоно́сный гро́бе, изъ него́же Христо́съ воскре́се!

Конда́къ 11

Предста́въ, по воскресе́ніи, ученико́мъ Твои́мъ, Христе́ Бо́же, мíръ Тво́й по́далъ еси́ и́мъ и вла́сть отпуща́ти грѣхи́, да проповѣ́дуютъ воста́ніе Твое́ отъ гро́ба, крестя́ще во и́мя Отца́ и Сы́на и Свята́го Ду́ха. Они́ же изше́дше, я́ко облече́нные си́лою свы́ше, научи́ша вся́ язы́ки воспѣва́ти Тебѣ́, я́ко Бо́гу: Аллилу́ія!

Икосъ 11

По воста́ніи Твое́мъ изъ ме́ртвыхъ, явля́я Себе́ ученико́мъ Твои́мъ, Христе́, - "Си́моне Іо́нинъ, лю́биши ли Мя́?" - ре́клъ еси́ Петру́, и по трикра́тномъ любве́ его́ къ Тебѣ́ извѣще́ніи, Це́ркви Твое́й па́ки того́ учи́теля и апо́стола дарова́лъ еси́; мы́ же, про́повѣдію его́ науче́нніи, покланя́ющеся живоно́сному гро́бу Твоему́, та́ко глаго́лемъ:

Ра́дуйся, всесвяты́й гро́бе, въ не́мже, я́ко въ ковче́зѣ Но́евѣ, отъ разлія́нія грѣхо́внаго и тли́ сме́ртныя ве́сь ро́дъ человѣ́ческій спасе́ся! Ра́дуйся, изъ него́же, я́ко изъ свята́го святы́хъ, ми́ръ и благослове́ніе всѣ́мъ па́дшимъ сына́мъ Ада́ма изнесе́ся! Ра́дуйся, любве́ Христо́вы къ на́мъ, во дне́хъ пло́ти Его́, послѣ́дній кра́ю и предѣ́ле! Ра́дуйся, и на́съ всѣ́хъ бра́тію на́шу по пло́ти до сме́рти и гро́ба люби́ти научи́вый! Ра́дуйся, мра́къ и стра́хи сѣ́ни сме́ртныя для вѣ́рующихъ разгна́вый! Ра́дуйся, стра́нникомъ земли́ пу́ть жи́зни вѣ́чныя въ небе́сный Іерусали́мъ указа́вый!

Ра́дуйся, живоно́сный гро́бе, изъ него́же Христо́съ воскре́се!

Конда́къ 12

Боже́ственное, е́же о на́съ, смотре́ніе Твое́ сла́вяще, стра́сти Твоя́ почита́емъ, преди́вному воскресе́нію Твоему́ покланя́емся, и отъ земли́ къ Небе́сному Роди́телю пресла́вное вознесе́ніе воспѣва́емъ и мо́лимся: Пресвята́го Твоего́ Ду́ха не отъими́ отъ на́съ, да вси́ зове́мъ Тебѣ́ во вѣ́ки: Аллилу́ія!

Икосъ 12

На го́ру Елео́нскую егда́ возше́лъ еси́, Отчее Сія́ніе, тогда́ пресвѣ́тлый о́блакъ подъя́тъ Тя́, зря́щимъ ученико́мъ Твои́мъ, и а́нгели апо́столомъ глаго́лаху: "му́жіе Галиле́йстіи, что́ стоите́ зря́ще на не́бо? се́ бо, Его́же ви́дите вознося́щася, То́й па́ки пріи́детъ съ пло́тію". Они́ же съ ра́достію возврати́вшеся во Іерусали́мъ, хва́ляху Тебе́, и́стиннаго Бо́га, и живоно́сному гро́бу Твоему́, въ не́мже тридне́вно положе́нъ бы́лъ еси́, съ весе́ліемъ возглаша́ху:

Ра́дуйся, живоно́сный гро́бе, собы́вшимся въ тебѣ́ всѣ́хъ на́съ въ вѣ́рѣ во Христа́ утверди́вый! Ра́дуйся, предъ мучи́тели и враги́ и́стины, наде́ждою воскресе́нія непобѣди́мы на́съ сотвори́вый! Ра́дуйся, въ не́мже священнота́йнѣ, въ купе́ли креще́нія, вси́ вѣ́рующіи Христу́ спогреба́ются! Ра́дуйся, изъ него́же креще́нніи, уме́рши грѣху́, къ но́вѣй жи́зни со Христо́мъ совостаю́тъ! Ра́дуйся, я́ко предъ тобо́ю отъ благода́ти воскресе́нія, въ тебѣ́ почíющей, вся́ крѣ́пость а́да исчеза́етъ! Ра́дуйся, я́ко изъ тебе́, отъ полноты́ си́лы Бо́жіей, на тебѣ́ я́вльшейся, заря́ жи́зни вѣ́чныя незаходи́мо сія́етъ!

Ра́дуйся, живоно́сный гро́бе, изъ него́же Христо́съ воскре́се!

Конда́къ 13

О, пресвяты́й и живоно́сный гро́бе Христо́въ, утѣше́ніе ро́да человѣ́ческаго и всея́ земли́ украше́ніе! Тебѣ́, я́ко черто́гу Царя́ сла́вы, мы́сленнѣ съ вѣ́рою предстоя́ще, мо́лимся къ тридне́вно воскре́сшему изъ тебе́ Христу́ Бо́гу на́шему, во е́же изба́витися на́мъ отъ вра́гъ ви́димыхъ и неви́димыхъ, отъ бѣ́дъ вре́менныхъ и вѣ́чныхъ, па́че же отъ страсте́й и грѣхо́въ на́шихъ, да, совоскре́сше Ему́ покая́ніемъ, въ обновле́ніи пра́выя жи́зни ходи́ти на́чнемъ, благода́рнѣ зову́ще: Аллилу́ія!

Се́й конда́къ глаго́лется три́жды. Та́же Икосъ 1-й и Конда́къ 1-й

Моли́тва ко Го́споду Іису́су воскре́сшему

Сла́ва Тебѣ́, Го́споди Іису́се Христе́, Бо́же мо́й, я́ко па́ки сподо́билъ мя́ еси́ недосто́йного, преше́дши по́прище свята́го поста́, поклони́тися Боже́ственнымъ Страсте́мъ Твои́мъ и ви́дѣти всера́достный де́нь пресла́внаго изъ гро́ба Воскресе́нія Твоего́, въ о́ньже свободи́лъ еси́ су́щія во а́дѣ отъ вѣ́къ свя́занныя ду́ши пра́ведныхъ. Тоя́ Боже́ственныя свобо́ды ду́ха и пло́ти, дража́йшій Спаси́телю мо́й, и а́зъ жела́ю, да разрѣши́ши мя́, свя́зана су́ща мно́гими грѣхи́, и да сотвори́ши возсія́ти живоно́сному свѣ́ту Воскресе́нія Твоего́ во мра́чнѣй души́ мое́й. Ви́жду бо безчи́сленныя щедро́ты и неизрече́нное человѣколю́біе Твое́, я́ко не то́чію отъ небытíя въ бытіе́ мя́ приве́лъ еси́, и о́браза Твоего́ подо́біемъ украси́въ, всея́ до́льней тва́ри влады́ку поста́вилъ мя́ еси́, но и посе́мъ па́дша съ высоты́ и врагу́ порабо́тившася, не оста́вилъ еси́, но, искупи́въ мя́ безцѣ́нною Кро́вію Твое́ю, благода́тію креще́нія снабди́лъ мя́ еси́, да востеку́ на пе́рвое достоя́ніе. Азъ же, окая́нный, запя́тъ бы́въ умо́мъ плотски́мъ, обрати́хся вспя́ть и па́ки ра́бъ сотвори́хся грѣха́ и страсте́й, доне́лѣже еди́нъ по еди́ному погуби́хъ всѣ́ да́ры благода́ти Твоея́. И ны́нѣ у́бо, ч́то сотворю́, не вѣ́мъ; оба́че помяну́въ глаго́лы пречи́стыхъ у́стъ Твои́хъ, я́ко не прише́лъ еси́ призва́ти пра́ведники, но грѣ́шники въ покая́ніе, и а́зъ, я́ко еди́нъ отъ си́хъ, съ вѣ́рою и смире́ніемъ прихожду́ къ живоно́сному гро́бу Твоему́, не арома́ты и воню́ мѵ́ра нося́й, (на́гъ бо е́смь и пу́стъ благи́хъ дѣ́лъ), но па́че наде́жду имы́й обрѣсти́ въ не́мъ проще́ніе грѣха́мъ мои́мъ и обновле́ніе нечи́стому житію́ моему́. При́зри у́бо на мя́, ка́ющася и служи́ти Тебѣ́ хотя́ща, и не отри́ни отъ благода́ти Воскресе́нія Твоего́! Живоно́сною сме́ртію Твое́ю и погребе́ніемъ умертви́ моя́ лю́тыя стра́сти, да, я́ко ме́ртвъ и погребе́нъ, живу́ въ мíрѣ се́мъ. Пресла́внымъ воста́ніемъ Твои́мъ воздви́гни мою́ ду́шу, умерщвле́нную грѣхми́, и оживи́ со́вѣсть, ея́же ничто́же въ мíрѣ ну́жнѣйши е́сть. Вознесе́ніемъ Твои́мъ отто́ргни мя́ отъ су́етныхъ и душетлѣ́нныхъ бла́гъ земны́хъ, и сотвори́ мя́ го́рняя му́дрствовати, я́ко да не ктому́ себѣ́ живя́ и угожда́я, но Тебѣ́, Го́споду и Бо́гу моему́, служа́ и рабо́тая, я́коже сподо́бихся поклони́тися Воскресе́нію Твоему́ на земли́, та́ко сподо́бленъ бу́ду ви́дѣти Тебе́, дража́йшаго Искупи́теля моего́, и на небеси́, за прія́тіе сме́рти кре́стныя сла́вою и че́стію вѣнча́нна, и ста́въ одесну́ю вели́чествія Твоего́, со арха́нгелы и а́нгелы, и со всѣ́ми иску́пленными Тобо́ю бра́тіями мои́ми, во вѣ́ки вѣко́въ пою́ Тебѣ́: Аллилу́ія! Ами́нь.

Тропа́рь, гла́съ 5

Христо́съ воскре́се изъ ме́ртвыхъ, сме́ртію сме́рть попра́въ, и су́щимъ во гробѣ́хъ живо́тъ дарова́въ.

Конда́къ, гла́съ 8

Аще и во гро́бъ снизше́лъ еси́, Безсме́ртне, но а́дову разруши́лъ еси́ си́лу, и воскре́слъ еси́ я́ко побѣди́тель, Христе́ Бо́же, жена́мъ мѵроно́сицамъ вѣща́вый: ра́дуйтеся, и Твои́мъ апо́столомъ ми́ръ да́руяй, па́дшимъ подая́й воскресе́ніе.

Велича́ніе

Велича́емъ Тя́, Живода́вче Христе́, на́съ ра́ди во а́дъ сше́дшаго и съ Собо́ю вся́ воскреси́вшаго.