Конда́къ 1

Избра́ннѣй уго́дницѣ Христо́вой, всеблаже́ннѣй великому́ченицѣ Анастасíи похва́льное пѣ́ніе прино́симъ, я́ко иму́щей мно́гое дерзнове́ніе ко Го́споду е́же отъ вся́кихъ бѣ́дъ, скорбе́й и болѣ́зней свобожда́ти вѣ́рныя, и съ любо́вію взыва́емъ си́це:

Ра́дуйся, всеблаже́нная великому́ченице Анастасíе, у́зниковъ свята́я посѣти́тельнице и моли́твеннице о душа́хъ на́шихъ.

Икосъ 1

Ангеломъ уподо́билася еси́ ра́зумомъ чи́стымъ, позна́вши Того́, Иже е́сть всего́ ви́димаго и неви́димаго вѣ́чное нача́ло и еди́ный коне́цъ жела́ній всѣ́хъ благочести́выхъ. Мы́ же, восхваля́юще му́дрое обуче́ніе твое́ отъ свята́го му́ченика Хрисого́на, съ любо́вію вопіе́мъ ти́:

Ра́дуйся, возлюби́вшая вѣ́ру Христо́ву. Ра́дуйся, послѣ́довавшая благоче́стію ма́тере твоея́ Фа́всты. Ра́дуйся, соблю́дшая чистоту́ дѣ́вства твоего́. Ра́дуйся, всегда́ неви́димо охраня́емая а́нгелами. Ра́дуйся, чистото́ю твое́ю къ Бо́гу прибли́зившаяся.

Ра́дуйся, всеблаже́нная великому́ченице Анастасíе, у́зниковъ свята́я посѣти́тельнице и моли́твеннице о душа́хъ на́шихъ.

Конда́къ 2

Ви́дящи свята́я Анастасíя, я́ко мно́зи христіа́не стра́ждутъ въ темни́цѣхъ за и́мя и уче́ніе Іису́съ Христо́во, нача́тъ со усе́рдіемъ служи́ти и́мъ, утѣша́ти же и цѣли́ти я́ содѣ́йствующу Бо́гу, со благоговѣ́ніемъ пою́щи: Аллилу́ія.

Икосъ 2

Уразумѣ́ богому́драя Анастасíя, я́ко вся́ мíра сего́ кра́сная тлѣ́нію прича́стна су́ть, и того́ ра́ди презрѣ́вши свѣ́тлыя оде́жды и у́твари многоцѣ́нны, та́йно обо́лкишися во оде́жды ни́щихъ, вхожда́ше въ темни́цы послужи́ти исповѣ́дникомъ Христо́вымъ. Мы́ же, мы́сленно спослѣ́дствующе е́й, взыва́емъ къ не́й съ любо́вію:

Ра́дуйся, подража́тельнице Христо́ва. Ра́дуйся, посѣти́тельнице заключе́нныхъ въ темни́цахъ. Ра́дуйся, утѣ́шительнице исповѣ́дниковъ Христо́выхъ. Ра́дуйся, зла́то и сребро́ твое́ на ни́хъ расточи́вшая. Ра́дуйся, тѣ́ми стяжа́вшая Ца́рствіе небе́сное. Ра́дуйся, ру́цѣ и но́зѣ святы́хъ омыва́вшая и власы́ и́хъ очища́вшая. Ра́дуйся, неду́ги и́хъ врачева́вшая и тѣлеса́ и́хъ че́стнѣ погреба́вшая.

Ра́дуйся, всеблаже́нная великому́ченице Анастасíе, у́зниковъ свята́я посѣти́тельнице и моли́твеннице о душа́хъ на́шихъ.

Конда́къ 3

Си́лою укрѣпля́ема свы́ше, свята́я му́ченице, послужи́ благоче́стно святы́мъ и посрами́ ненави́стника вся́кія добродѣ́тели, діа́вола, наусти́вшаго рабы́ню оклевета́ти ю́ предъ му́жемъ невѣ́рнымъ. Мы́ же, восхваля́юще благотворе́нія твоя́, Анастасíе, пое́мъ вку́пѣ съ тобо́ю: Аллилу́ія.

Икосъ 3

Иму́щи вели́кую любо́вь о Го́сподѣ ко всѣ́мъ, въ темни́цахъ стра́ждущимъ за и́мя Христо́во, ея́ же ра́ди мно́жицею біе́на бы́вши отъ невѣ́рнаго му́жа, напослѣ́докъ въ дому́ его́ себѣ́ темни́цу обрѣ́те. Тѣ́мже, му́жеству ея́ дивя́щеся, вопіе́мъ къ не́й:

Ра́дуйся, избра́нная невѣ́сто Христо́ва. Ра́дуйся, за́повѣдей Христо́выхъ усе́рдная храни́тельнице. Ра́дуйся, не сло́вомъ то́чію, но и дѣ́ломъ сія́ испо́лнившая. Ра́дуйся, ду́шу свою́ за дру́ги твоя́ положи́ти гото́вая. Ра́дуйся, мно́гое озлобле́ніе за Христа́ прія́вшая. Ра́дуйся, терпѣ́ніемъ свои́мъ адама́нту крѣ́пкому уподо́бившаяся.

Ра́дуйся, всеблаже́нная великому́ченице Анастасíе, у́зниковъ свята́я посѣти́тельнице и моли́твеннице о душа́хъ на́шихъ.

Конда́къ 4

Бу́рю я́рости своея́ воздви́же на тя́ нечести́вый мучи́тель, му́жъ тво́й, я́ко плѣ́нницу и рабу́ вмѣни́ тя́, свята́я Анастасíе. Мы́ же, воспомина́юще озлобле́нія отъ него́ и страда́нія твоя́, пое́мъ укрѣпля́вшему тя́ Го́споду: Аллилу́ія.

Икосъ 4

Слы́ша блаже́нная Анастасíя, я́ко мно́го претерпѣ́ святы́й учи́тель ея́ Хрисого́нъ за Христа́, ему́ же и послѣ́дова страда́ньми свои́ми и та́йно восписа́ ему́ си́це: "учи́телю! ча́ю умре́ти и ничто́же и́но остае́тся, то́чію да испусти́вши ду́хъ, паду́ ме́ртва". Мы́ же, чудя́щеся терпѣ́нію твоему́, глаго́лемъ си́це:

Ра́дуйся, не пощади́вшая пло́ти своея́ честны́я. Ра́дуйся, во дни́ и въ нощи́ поверга́вшаяся къ стопа́мъ Христо́вымъ. Ра́дуйся, жела́вшая расточи́ти бога́тство твое́ Бо́га ра́ди неиму́щимъ. Ра́дуйся, му́дро ку́плю дѣ́ющая. Ра́дуйся, еди́но иму́щая попече́ніе о стра́ждущихъ во у́захъ. Ра́дуйся, невозбра́нно вше́дшая въ черто́гъ небе́сный.

Ра́дуйся, всеблаже́нная великому́ченице Анастасíе, у́зниковъ свята́я посѣти́тельнице и моли́твеннице о душа́хъ на́шихъ.

Конда́къ 5

Яко боготе́чная звѣзда́ яви́лася еси́ въ Ри́мстѣй странѣ́, великому́ченице Анастасíе, посѣща́ющи стра́ждущихъ за Христа́ въ темни́цахъ и сердца́ и́хъ въ вѣ́рѣ утвержда́ющи, да при́сно взыва́ютъ съ тобо́ю Спаси́телю всѣ́хъ Бо́гу: Аллилу́ія.

Икосъ 5

Ви́дѣ тя́ богоно́сный учи́тель тво́й Хрисого́нъ въ смуще́ніи и волне́ніи мíра сего́ су́щу, повелѣ́ съ проро́комъ взыва́ти тебѣ́: "вску́ю приско́рбна еси́, душе́ моя́, и вску́ю смуща́еши мя́? упова́й на Бо́га!" Мы́ же, помина́юще ско́рбь и печа́ль твою́ я́же по Бо́зѣ, зове́мъ ти́:

Ра́дуйся, возложи́вшая все́ упова́ніе твое́ на Го́спода. Ра́дуйся, претерпѣ́вшая тѣсноту́ Ца́рствія ра́ди небе́снаго. Ра́дуйся, чистото́ю твое́ю со а́нгелы жи́ти на небеса́хъ сподо́бившаяся. Ра́дуйся, скорбьми́ твои́ми къ Бо́гу прибли́зившаяся. Ра́дуйся, моли́твами твои́ми избавля́ющая на́съ отъ мно́гихъ скорбе́й. Ра́дуйся, хода́тайствомъ твои́мъ свобожда́ющая отъ искуше́ній.

Ра́дуйся, всеблаже́нная великому́ченице Анастасíе, у́зниковъ свята́я посѣти́тельнице и моли́твеннице о душа́хъ на́шихъ.

Конда́къ 6

Проповѣ́дуетъ ве́сь мíръ христіа́нскій честны́я по́двиги твоя́, великому́ченице Анастасíе, и страда́нія твоя́ сла́витъ, му́ченическую кончи́ну твою́ ублажа́етъ и пое́тъ Бо́гу: Аллилу́ія.

Икосъ 6

Возсія́ла еси́ па́че со́лнца добродѣ́тельми твои́ми въ вели́комъ гра́дѣ Ри́мѣ, егда́ испо́лнися предрече́ніе учи́теля твоего́, свята́го Хрисого́на, о поги́бели безбо́жнаго му́жа твоего́. Свобо́дна бо су́щи, съ вя́щшимъ усе́рдіемъ начала́ еси́ пещи́ся о му́ченицехъ Христо́выхъ. Мы́ же, взира́юще съ любо́вію на дѣя́нія твоя́, глаго́лемъ ти́ си́це:

Ра́дуйся, усе́рдная помо́щнице стра́ждущимъ. Ра́дуйся, боже́ственными словесы́ утѣша́вшая друзе́й Христо́выхъ. Ра́дуйся, имѣ́вшая ве́ліе попече́ніе о тре́хъ дѣ́вахъ: Ага́піи, Хіонíи и Ири́нѣ. Ра́дуйся, тѣ́хъ на по́двигъ му́ченичества укрѣпи́вшая. Ра́дуйся, у́мъ тво́й горѣ́ имѣ́вшая. Ра́дуйся, се́рдце твое́ жили́ще Свята́го Ду́ха содѣ́лавшая. Ра́дуйся, огне́мъ любве́ къ Бо́гу всецѣ́ло возгорѣ́вшая. Ра́дуйся, въ кро́вѣ кри́лъ Его́ небе́сный покро́въ обрѣ́тшая. Ра́дуйся, му́жествомъ твои́мъ врага́ спасе́нія до конца́ низложи́вшая.

Ра́дуйся, всеблаже́нная великому́ченице Анастасíе, у́зниковъ свята́я посѣти́тельнице и моли́твеннице о душа́хъ на́шихъ.

Конда́къ 7

Хотѣ́ніе свята́го Хрисого́на, е́же умре́ти за Христа́, испо́лнися Бо́жіимъ про́мысломъ: егда́ же узрѣ́ла еси́ честны́я мо́щи своего́ учи́теля страстоте́рпца, любе́зно и́хъ лобза́ющи, воспла́калася еси́, изъ глубины́ души́ износя́щи Бо́гу пѣ́снь: Аллилу́ія.

Икосъ 7

Но́вую благода́ть и си́лу дарова́ тебѣ́ Госпо́дь на́шъ, егда́ воспрія́ла еси́ по́двигъ преходи́ти изъ гра́да въ гра́дъ, посѣща́юще во у́захъ сѣдя́щихъ. Мы́, послѣ́дующе стра́нствованію твоему́, уми́льно вопіе́мъ ти́:

Ра́дуйся, послѣ́довательнице стопа́мъ Христо́вымъ. Ра́дуйся, служи́тельнице мно́гимъ святы́мъ. Ра́дуйся, чистото́ю уневѣ́стившаяся Христу́. Ра́дуйся, великому́ченице просла́вленная. Ра́дуйся, узорѣши́тельнице проименова́нная. Ра́дуйся, зла́томъ твои́мъ купу́ющая свобо́ду вѣ́рнымъ отъ у́зъ темни́чныхъ. Ра́дуйся, моли́твами твои́ми избавля́ющая на́съ у́зъ грѣхо́вныхъ. Ра́дуйся, врачева́ніе больны́мъ низпосыла́ющая. Ра́дуйся, Бо́жіимъ велѣ́ніемъ полуме́ртвыхъ возставля́ющая.

Ра́дуйся, всеблаже́нная великому́ченице Анастасíе, у́зниковъ свята́я посѣти́тельнице и моли́твеннице о душа́хъ на́шихъ.

Конда́къ 8

Стра́нствованіе твое́ со свято́ю му́ченицею Ѳеодо́тіею мно́гимъ осла́бу подаде́: боля́щимъ дарова́ исцѣле́ніе, мно́гимъ уме́ршимъ угото́ва погребе́ніе, живы́мъ на вя́щшія по́двиги добродѣ́тели укрѣпле́ніе. На́съ же недосто́йныхъ сподо́би, свята́я, моли́твами твои́ми пѣ́ти разу́мно Бо́гу: Аллилу́ія.

Икосъ 8

Ве́сь хра́мины темни́цы испо́лнися мно́гимъ пла́чемъ и рыда́ніями твои́ми, егда́ ра́но прите́кши въ ню́ по обы́чаю твоему́ и не еди́наго же обрѣ́тши отъ у́зникъ, за и́мя Христо́во всажде́нныхъ: вси́ бо въ но́щь еди́ну повелѣ́ніемъ злочести́ваго царя́ сме́рти пре́даны бы́ша. Мы́ же, вспомина́юще ско́рбь твою́ о друзѣ́хъ Бо́жіихъ, взыва́емъ та́ко:

Ра́дуйся, со усе́рдіемъ поиска́вшая въ темни́цахъ рабо́въ Христо́выхъ. Ра́дуйся, па́ки обрѣ́тшая тѣ́хъ въ небе́сныхъ селе́ніихъ. Ра́дуйся, взе́мшая съ любо́вію на ра́мо свое́ кре́стъ Госпо́день. Ра́дуйся, сподо́бльшаяся всю́ду зрѣ́ти разу́мными очесы́ Го́спода Вседержи́теля. Ра́дуйся, за любо́вь твою́ къ бли́жнимъ ве́ліе дерзнове́ніе къ Бо́гу стяжа́вшая.

Ра́дуйся, всеблаже́нная великому́ченице Анастасíе, у́зниковъ свята́я посѣти́тельнице и моли́твеннице о душа́хъ на́шихъ.

Конда́къ 9

Нечести́віи мучи́теліе совѣ́тъ сотвори́ша на тя́, страстоте́рпице непобѣди́мая, хотя́ще преклони́ти тя́ ко и́дольскому служе́нію. Ты́ же небоя́зненно взыва́ла еси́ къ ни́мъ: "раба́ Христо́ва е́смь, и пою́ Ему́ де́нь и но́щь: Аллилу́ія".

Икосъ 9

Витíйствова съ тобо́ю нача́льнѣйшій жре́цъ и́дольскій, хотя́й ле́стію улови́ти святу́ю ду́шу твою́. Ты́ же, позна́вши всю́ хи́трость вра́жію, посрами́ла еси́ мучи́теля и премѣни́ла вся́ зла́я во блага́я, безтре́петно взира́ющи на ору́дія мучи́тельскія и на вся́ му́ки. Мы́ же, дивя́щеся му́жеству твоему́, зове́мъ ти́ умиле́нными гла́сы:

Ра́дуйся, доброво́льно оста́вившая вся́ мíра сего́ кра́сная. Ра́дуйся, возжела́вшая прія́ти разли́чныя му́ки за Христа́. Ра́дуйся, съ любо́вію на сме́рть идти́ восхотѣ́вшая. Ра́дуйся, и самѣ́хъ мучи́телей терпѣ́ніемъ твои́мъ удиви́вшая. Ра́дуйся, страда́ньми твои́ми Це́рковь Христо́ву украси́вшая. Ра́дуйся, де́моны нога́ма твои́ма попра́вшая.

Ра́дуйся, всеблаже́нная великому́ченице Анастасíе, у́зниковъ свята́я посѣти́тельнице и моли́твеннице о душа́хъ на́шихъ.

Конда́къ 10

Спасти́ся всѣ́мъ хотя́щимъ лю́дямъ споспѣшеству́й моли́твами твои́ми, великому́ченице, предъ Го́сподемъ и испроси́ разрѣше́ніе грѣхо́въ почита́ющимъ страда́нія твоя́, да вопіе́мъ съ тобо́ю: Аллилу́ія.

Икосъ 10

Царя́ Небе́снаго возлюби́ всѣ́мъ се́рдцемъ свои́мъ свята́я Анастасíя и въ темни́цу вве́ржена бы́сть за сладча́йшаго Іису́са, надо́лзѣ гла́домъ и жа́ждею истаява́ющи и моли́твою укрѣпля́ющися. Тѣ́мже, прославля́юще тоя́ честна́я страда́нія, возсыла́емъ къ не́й пѣ́ніе таково́е:

Ра́дуйся, послѣ́довательнице страсте́мъ Христо́вымъ. Ра́дуйся, украси́вшаяся побѣдоно́сною сла́вою. Ра́дуйся, благочести́вымъ жена́мъ похвало́ и велича́ніе. Ра́дуйся, земно́ю темни́цею въ небе́сный черто́гъ восте́кшая. Ра́дуйся, та́мо съ му́ченики водвори́вшаяся. Ра́дуйся, моли́твою твое́ю у престо́ла Бо́жія воспомина́ющая на́съ. Ра́дуйся, у́зы грѣхо́вныя ско́ро разрѣша́ющая. Ра́дуйся, де́моны отъ человѣ́къ прогоня́ющая.

Ра́дуйся, всеблаже́нная великому́ченице Анастасíе, у́зниковъ свята́я посѣти́тельнице и моли́твеннице о душа́хъ на́шихъ.

Конда́къ 11

Пѣ́ніе всеумиле́нное прино́симъ ти́, прославля́юще твоя́ за Христа́ страда́нія, и мо́лимъ тя́: свята́я страстоте́рпице, испроси́ у Ми́лостиваго Го́спода Благовѣ́рному Импера́тору на́шему здра́віе, долгоде́нствіе и на враги́ побѣ́ду и одолѣ́ніе. На́мъ же, восхваля́ющимъ муче́нія твоя́, пода́ждь ми́ръ и спасе́ніе, да пое́мъ Бо́гу во вѣ́ки: Аллилу́ія.

Икосъ 11

Свѣ́тлымъ и ра́достнымъ лице́мъ послѣ́довала еси́ на страда́ніе, угото́ванное ти́ отъ мучи́телей, е́же помышля́юще съ ра́достію зове́мъ:

Ра́дуйся, отъ потопле́нія въ мо́ри Бо́жіимъ смотрѣ́ніемъ изба́вльшаяся. Ра́дуйся, протяже́нная мучи́тели къ четы́ремъ столпо́мъ и тѣ́мъ уподо́бльшаяся распя́тому на Крестѣ́ Сы́ну Бо́жію. Ра́дуйся, жего́мая огне́мъ да́же до сме́рти. Ра́дуйся, сокро́вищнице исцѣ́леній неоску́дная. Ра́дуйся, ча́ше даро́въ Бо́жіихъ преизоби́льная. Ра́дуйся, всѣ́хъ благи́хъ жела́ній ско́рая исполни́тельнице.

Ра́дуйся, всеблаже́нная великому́ченице Анастасíе, у́зниковъ свята́я посѣти́тельнице и моли́твеннице о душа́хъ на́шихъ.

Конда́къ 12

Благода́ть свы́ше ниспосли́ всѣ́мъ на́мъ, притека́ющимъ съ любо́вію къ ра́цѣ моще́й твои́хъ, и испроси́ у Го́спода проще́ніе согрѣше́ній на́шихъ, боля́щимъ же и стра́ждущимъ исцѣле́ніе, да благода́рственно вси́ вопіе́мъ ди́вному во святы́хъ Бо́гу: Аллилу́ія.

Икосъ 12

Пою́ще по́двиги твоего́ во́льнаго муче́нія за Христа́, покланя́емся страда́нію твоему́, великому́ченице досточу́дная, почита́емъ святу́ю кончи́ну твою́ и мо́лимъ тя́: простри́ твою́ съ небесе́ по́мощь и на на́съ, живу́щихъ во тмѣ́ страсте́й и искуше́ній и вопію́щихъ ти́:

Ра́дуйся, великому́ченице свята́я, прине́сшая тѣ́ло свое́ въ богопрія́тную же́ртву во многоразли́чныхъ муче́ніихъ. Ра́дуйся, го́рлице, взлетѣ́вшая во Іерусали́мъ вы́шній. Ра́дуйся, чи́стая и непоро́чная невѣ́сто Христо́ва. Ра́дуйся, кади́льнице духо́вная, ѳиміа́мъ моли́твы о на́съ къ Бо́гу принося́щая. Ра́дуйся, почита́ющимъ па́мять твою́ и страда́нія твоя́ богоуго́днаго житія́ зерца́ло. Ра́дуйся, болѣ́зни душе́вныя и тѣле́сныя ско́ро исцѣля́ющая. Ра́дуйся, свѣ́тлый о́бразе житія́ всѣ́мъ, ча́ющимъ улучи́ти христіа́нскую кончи́ну.

Ра́дуйся, всеблаже́нная великому́ченице Анастасíе, у́зниковъ свята́я посѣти́тельнице и моли́твеннице о душа́хъ на́шихъ.

Конда́къ 13

О, многострада́льная и преди́вная, свята́я великому́ченице Анастасíе! Ны́нѣшнее на́ше ма́лое моле́ніе пріими́ отъ недосто́йныхъ ра́бъ твои́хъ, съ любо́вію приноси́мое тебѣ́, и испроси́ на́мъ у Христа́ Бо́га грѣхо́вныхъ у́зъ разрѣше́ніе, да изба́вимся моли́твами твои́ми гнѣ́ва Бо́жія и вѣ́чнаго осужде́нія, и да удосто́имся въ небе́снѣмъ Ца́рствіи ку́пно съ тобо́ю во вѣ́ки пѣ́ти Бо́гу: Аллилу́ія.

Се́й конда́къ глаго́лется три́жды. Та́же Икосъ 1-й и Конда́къ 1-й

Моли́тва святѣ́й великому́ченицѣ Анастасíи

О, многострада́льная и прему́драя великому́ченице Христо́ва Анастасíе! Ты́ душе́ю на небеси́ у престо́ла Госпо́дня предстои́ши, на земли́ же, да́нною тебѣ́ благода́тію, разли́чная соверша́еши исцѣле́нія. При́зри у́бо ми́лостивно на предстоя́щія лю́ди [и моля́щіяся предъ моща́ми твои́ми], прося́щія твоея́ по́мощи: простри́ ко Го́споду святы́я моли́твы твоя́ о на́съ, и испроси́ на́мъ оставле́ніе согрѣше́ній на́шихъ, неду́жнымъ - исцѣле́ніе, скорбя́щимъ и бѣ́дствующимъ - ско́рую по́мощь; умоли́ Го́спода, да пода́стъ всѣ́мъ на́мъ христіа́нскую кончи́ну и до́брый отвѣ́тъ на стра́шнѣмъ суди́щи Свое́мъ, да сподо́бимся и мы́ ку́пно съ тобо́ю сла́вити Отца́ и Сы́на и Свята́го Ду́ха во вѣ́ки вѣко́въ. Ами́нь.

Тропа́рь му́ченицѣ, гла́съ 4

Агница Твоя́, Іису́се, Анастасíя, зове́тъ ве́ліимъ гла́сомъ: Тебе́, Женише́ мо́й, люблю́, и Тебе́ и́щущи, страда́льчествую, и сраспина́юся, и спогреба́юся креще́нію Твоему́, и стражду́ Тебе́ ра́ди, я́ко да ца́рствую въ Тебѣ́, и умира́ю за Тя́, да и живу́ съ Тобо́ю; но, я́ко же́ртву непоро́чную, пріими́ мя, съ любо́вію поже́ршуюся Тебѣ́. Тоя́ моли́твами, я́ко Ми́лостивъ, спаси́ ду́ши на́ша.

Конда́къ, гла́съ 2

Во искуше́ніихъ и ско́рбехъ су́щіи, къ твоему́ хра́му притека́юще, пріе́млютъ честна́я дарова́нія отъ живу́щія въ тебѣ́ Боже́ственныя благода́ти, Анастасíе: ты́ бо при́сно мíру то́чиши исцѣле́нія.

Велича́ніе

Велича́емъ тя́, страстоте́рпице Христо́ва Анастасíе, и чте́мъ честно́е страда́ніе твое́, е́же за Христа́ претерпѣ́ла еси́.