Конда́къ 1

Избра́ннѣй и преди́внѣй уго́дницѣ Христо́вѣ, ско́рой помо́щницѣ и моли́твенницѣ на́шей, похва́льная воспѣва́емъ ти́, о на́съ предъ Христо́мъ Бо́гомъ предста́тельнице. Ты́ же, я́ко иму́щая ве́ліе дерзнове́ніе ко Го́споду, моли́ся, да изба́витъ отъ бѣ́дъ и скорбе́й ны́, зову́щія:

Ра́дуйся, свята́я благовѣ́рная княги́не, преподо́бная ма́ти Анно.

Икосъ 1

Ангеловъ Творе́цъ честну́ю о́трасль благочести́ваго ко́рене благовѣ́рныхъ Россíйскихъ князе́й избра́ тя во о́бразъ всѣ́мъ, сія́ющую вѣ́рою, любо́вію, чистото́ю, да вси́, зря́ще твое́ богоуго́дное житіе́, со благоговѣ́ніемъ и ра́достію глаго́лютъ ти́ си́це:

Ра́дуйся, я́ко отъ младе́нства благода́ти Бо́жія испо́лнилася еси́; ра́дуйся, я́ко въ житіи́ твое́мъ добродѣ́тельми мно́гими просвѣти́лася еси́. Ра́дуйся, пра́вило вѣ́ры и благоче́стія; ра́дуйся, о́бразе кро́тости и смире́нія. Ра́дуйся, свѣти́ло любве́ и воздержа́нія; ра́дуйся, даро́въ Свята́го Ду́ха честно́е вмѣсти́лище. Ра́дуйся, ско́рбныхъ утѣше́ніе; ра́дуйся, княги́нь и иноки́нь Россíйскихъ похвале́ніе. Ра́дуйся, живу́щихъ въ мíрѣ ти́хое приста́нище; ра́дуйся, благочести́выхъ роди́телей утѣше́ніе. Ра́дуйся, градо́въ Тфе́ри и Ка́шина и всея́ земли́ на́шея украше́ніе; ра́дуйся, ны́нѣ съ ли́ки а́нгельскими на небесѣ́хъ Влады́цѣ всѣ́хъ предстоя́щая.

Ра́дуйся, свята́я благовѣ́рная княги́не, преподо́бная ма́ти Анно.

Конда́къ 2

Прови́дѣвъ Госпо́дь ангелоподо́бное житіе́ твое́, я́ко свято́е и́мя Его́ просла́виши и, я́коже заповѣ́да святы́й апо́столъ, бди́тельна, святолѣ́пна, цѣлому́дрена, здра́ва вѣ́рою, любо́вію и терпѣ́ніемъ пребу́деши, отъ ю́ности твоея́ призва́ тя пѣ́ти Ему́: Аллилу́ія.

Икосъ 2

Ра́зумъ небе́сный тебѣ́ дарова́ся, богоизбра́нная отрокови́це, непреста́нно помышля́ти о небе́сныхъ въ боголюби́вѣмъ кро́вѣ благовѣ́рныхъ роди́телей твои́хъ. Сего́ ра́ди пріими́ отъ на́съ похвалы́ сія́:

Ра́дуйся, роди́телей благочести́выхъ пло́дъ благослове́нный бы́вшая; ра́дуйся, добродѣ́тели и благоче́стіе и́хъ унаслѣ́довавшая. Ра́дуйся, благоче́стію и моли́твѣ отъ ни́хъ науче́нная; ра́дуйся, чте́нію Боже́ственныхъ Писа́ній навы́кшая. Ра́дуйся, житія́ святы́хъ и поуче́нія и́хъ возлюби́вшая; ра́дуйся, отъ святи́телей росто́вскихъ науче́ніе пріи́мшая. Ра́дуйся, съ роди́тели твои́ми благослове́нію и наставле́нію іере́евъ Госпо́днихъ при́сно внима́вшая; ра́дуйся, а́ки кри́нъ благово́нный во оте́чествіи твое́мъ процвѣ́тшая. Ра́дуйся, отъ млады́хъ ногте́й твои́хъ стра́хъ Бо́жій имѣ́вшая; ра́дуйся, отъ ю́ности твоея́ го́рняя му́дрствовавшая. Ра́дуйся, си́мъ пу́ть спасе́нія на́мъ показа́вшая; ра́дуйся, непоколеби́мое на Го́спода Іису́са упова́ніе неизмѣ́нно сохра́ньшая.

Ра́дуйся, свята́я благовѣ́рная княги́не, преподо́бная ма́ти Анно.

Конда́къ 3

Си́ла Вы́шняго отъ ю́ности Твоея́ вои́стину осѣня́ше тя́, и храня́ше, и возбужда́ше на моли́твы, поще́ніе и милосе́рдіе, во е́же благочести́вымъ пре́дкомъ твои́мъ подража́ти и Го́сподеви воспѣва́ти: Аллилу́ія.

Икосъ 3

Иму́щи благочести́выя роди́тели, прилежа́ла еси́ богоуго́дному житію́, благода́тію Бо́жіею во вся́цѣмъ дѣ́лѣ бла́зѣ всегда́ подкрѣпля́ема су́щи. Тѣ́мже дивя́щеся таково́му отъ ю́ности твоея́ раче́нію, со умиле́ніемъ зове́мъ ти́:

Ра́дуйся, я́ко Госпо́дь Бо́гъ благоизво́ли отъ ю́ности освяти́ти тя́; ра́дуйся, я́ко Бога́тый ми́лостію обогати́ тя благода́тію Свое́ю. Ра́дуйся, я́ко Госпо́дь испо́лни тя́ стра́ха Бо́жія, прему́дрости и ра́зума; ра́дуйся, я́ко отъ младе́нчества Го́сподеви прилѣпи́лася еси́. Ра́дуйся, я́ко со стра́хомъ Бо́жіимъ и усе́рдіемъ хра́му Бо́жію и слу́жбамъ церко́внымъ при́сно прилежа́ла еси́; ра́дуйся, я́ко и въ до́мѣ неусы́пно пра́вило моли́твенное исправля́ла еси́. Ра́дуйся, я́ко вся́кое дѣ́ло твое́ съ моли́твою сопряга́шеся; ра́дуйся, я́ко тру́дъ тво́й благодаре́ніемъ Бо́гу скончава́шеся. Ра́дуйся, чистоты́ душе́вныя и тѣле́сныя храни́тельнице; ра́дуйся, неуста́ннымъ благотворе́ніемъ и ми́лостынями вѣ́рнымъ ско́рая помо́щнице. Ра́дуйся, дѣ́вамъ чи́стымъ прему́драя устрои́тельнице; ра́дуйся, ча́домъ на́шимъ до́брая учи́тельнице.

Ра́дуйся, свята́я благовѣ́рная княги́не, преподо́бная ма́ти Анно.

Конда́къ 4

Бу́ря бѣ́дъ и напа́стей утѣсня́ше тогда́ оте́чество на́ше и вѣ́ру правосла́вную, и вси́ бѣ́дствоваху отъ наше́ствія иноплеме́нникъ и междоусо́бныя бра́ни. Ты́ же, ю́нице, се́рдцемъ чи́стая, во уедине́ніи су́щи, излива́ла еси́ въ моли́твѣ предъ Го́сподемъ ду́шу твою́, а́нгельскую пѣ́снь вопію́щи: Аллилу́ія.

Икосъ 4

Слы́шавши боголюби́вая княги́ня Ксе́нія, ма́ти свята́го кня́зя Тферска́го Михаи́ла, о благоче́стіи твое́мъ, княги́не Анно, рече́ посло́мъ свои́мъ: слы́шахъ, я́ко е́сть у Росто́вскаго кня́зя дщи́ зѣло́ добродѣ́тельна, прему́дра же и прекра́сна; сію́ у́бо, Бо́жіимъ изволе́ніемъ, ви́дѣти жела́ю въ супру́жествѣ за сы́номъ мои́мъ. И а́біе по благода́ти Бо́жіей испо́лнися жела́ніе се́рдца ея́, да тобо́ю Бо́гъ просла́вится и да вси́ воспѣва́ютъ тебѣ́:

Ра́дуйся, невѣ́сто, про́мысломъ Бо́жіимъ предука́занная; ра́дуйся, голуби́це чи́стая и непоро́чная се́рдцемъ. Ра́дуйся, му́драя ева́нгельская дѣ́во, во свѣ́тѣ вѣ́ры и дѣ́лъ благи́хъ ходи́вшая; ра́дуйся, я́ко невозвра́тнымъ путе́мъ по за́повѣдемъ Влады́ки твоего́ ше́ствовала еси́. Ра́дуйся, я́ко за пресла́вныя добродѣ́тели твоя́ вни́ти въ черто́гъ Царя́ Небе́снаго сподо́билася еси́; ра́дуйся, всѣ́мъ жена́мъ россíйскимъ похвало́ и утвержде́ніе. Ра́дуйся, чистото́ю твое́ю всѣ́мъ родо́мъ тве́рдое науче́ніе; ра́дуйся, я́ко согла́сіе супру́говъ, по моли́твамъ къ тебѣ́, подава́ла еси́. Ра́дуйся, неисповѣди́мыми судьба́ми Бо́жіими отъ Него́ просла́вленная; ра́дуйся, но́вая чудеса́ и зна́менія мно́га чту́щимъ тя́ яви́вшая. Ра́дуйся, я́ко Царя́ Боговѣнча́ннаго и о́трасли До́ма Его́ на поклоне́ніе моще́мъ твои́мъ подви́гла еси́; ра́дуйся, я́ко и сердца́ вѣ́рныхъ къ почита́нію и воспрославле́нію твоему́ привлекла́ еси́.

Ра́дуйся, свята́я благовѣ́рная княги́не, преподо́бная ма́ти Анно.

Конда́къ 5

Яко свѣ́тлая звѣзда́, богому́драя невѣ́сто, при́сными твои́ми сопровожда́ема, съ вели́кою сла́вою во гра́дъ Тфе́рь во хра́мъ Спа́са на́шего прибыла́ еси́. Кня́зи же и наро́ди, велелѣ́пно срѣта́юще тя́, ра́довахуся о тебѣ́, вопію́ще Бо́гу: Аллилу́ія.

Икосъ 5

Ви́дѣвше тя́ вельмо́жи, кли́рицы и мірстíи лю́діе богоспаса́емаго гра́да Тфе́ри, на бра́къ честны́й съ возлю́бленнымъ кня́земъ и́хъ Михаи́ломъ прите́кшую, изыдо́ша въ срѣ́теніе твое́ и вопія́ху ти́, глаго́люще:

Ра́дуйся, отъ Лива́на невѣ́сто, во о́бразъ едине́нія Христа́ и Це́ркве, сочета́тися бра́комъ со кня́земъ на́шимъ гряду́щая; ра́дуйся, чи́стая голуби́це, прише́ствіемъ твои́мъ ми́ръ съ Бо́гомъ и въ человѣ́цѣхъ благоволе́ніе зна́менующая. Ра́дуйся, отъ Бо́га кня́зю на́шему въ дѣ́лѣхъ управле́нія помо́щнице угото́ванная; ра́дуйся, за неви́нныя и лю́тѣ стра́ждущія хода́таице, про́мысломъ Бо́жіимъ предука́занная. Ра́дуйся, о ну́ждахъ и потре́бахъ на́шихъ пещи́ся отъ Бо́га поста́вленная; ра́дуйся, сокро́вище ма́терняго попече́нія, отъ Го́спода на́мъ да́нное. Ра́дуйся, свѣти́ло милосе́рдія, надъ гра́домъ на́шимъ восходя́щее; ра́дуйся, звѣздо́ у́тренняя, при́сно ра́дость на́мъ возвѣща́ющая. Ра́дуйся, о́блаче всесвѣ́тлый, до́ждь любве́ и по́мощи всѣ́мъ досто́йнымъ твоего́ заступле́нія иска́пати обѣща́яй; ра́дуйся, во о́бразъ жена́мъ христіа́нскимъ свы́ше пронарече́нная. Ра́дуйся, вдови́цамъ и си́рымъ покро́ве, провидѣ́ніемъ по́сланный; ра́дуйся, ю́нымъ дѣ́вамъ и жена́мъ прибѣ́жище и укрѣпле́ніе.

Ра́дуйся, свята́я благовѣ́рная княги́не, преподо́бная ма́ти Анно.

Конда́къ 6

Проповѣ́дуютъ о богоуго́днѣмъ житіи́ твое́мъ, блаже́нная ма́ти, въ супру́жествѣ и княже́ніи, добродѣ́тели твоея́: ве́ліе благоче́стіе, смиренному́дріе, милосе́рдіе, и́стинная ма́терняя любы́ ко всѣ́мъ, пою́щимъ о тебѣ́ Бо́гу: Аллилу́ія.

Икосъ 6

Возсія́ богоуго́дное житіе́ твое́, я́ко кра́сная заря́, призыва́ющая всѣ́хъ на богоугожде́ніе и на дѣ́ланіе свое́ со усе́рдіемъ, да вси́ послѣ́дующе ти́ зову́тъ:

Ра́дуйся, со кня́земъ, супру́гомъ твои́мъ, во вся́комъ благоче́стіи и чистотѣ́ пожи́вшая; ра́дуйся, и ча́да твоя́ во стра́сѣ Бо́жіи воспита́вшая. Ра́дуйся, Це́ркви Бо́жіей благодѣ́явшая и благолѣ́піе хра́мовъ Бо́жіихъ люби́вшая; ра́дуйся, и по кончи́нѣ твое́й любо́вь мно́гу ко хра́момъ Бо́жіимъ въ душа́хъ гра́жданъ боголюби́выхъ возжига́вшая. Ра́дуйся, я́ко отъ вся́каго неду́га прибѣга́ющія съ вѣ́рою къ тебѣ́ исцѣля́еши; ра́дуйся, я́ко отъ лю́таго наси́лія діа́вольскаго моля́щіяся къ тебѣ́ изыма́еши. Ра́дуйся, я́ко при́сно вся́кое попече́ніе о бла́зѣ владо́мыхъ имѣ́вшая; ра́дуйся, въ ско́рбехъ и страда́ніихъ несча́стнымъ, си́рымъ и бѣ́днымъ, помо́щнице те́плая. Ра́дуйся, больны́хъ цѣли́тельнице ско́рая и чу́дная; ра́дуйся, и́щущимъ пути́ ко спасе́нію наста́внице благода́тная. Ра́дуйся, я́ко по преставле́ніи твое́мъ сподо́билася еси́ отъ Бо́га да́ра чудотворе́ній; ра́дуйся, полки́ иноплеме́нныхъ моле́ніемъ твои́мъ отъ гра́да Ка́шина отгна́вшая.

Ра́дуйся, свята́я благовѣ́рная княги́не, преподо́бная ма́ти Анно.

Конда́къ 7

Хотя́ Госпо́дь и́стинное благоче́стіе твое́ яви́ти и въ терпѣ́ніи тя́ укрѣпи́ти, ско́рби мно́ги попусти́ на тя́, да просвѣти́шася, я́коже зла́то въ горни́лѣ, и да пое́ши Бо́гу: Аллилу́ія.

Икосъ 7

Но́ваго страстоте́рпца яви́ Госпо́дь, супру́га твоего́ благовѣ́рнаго кня́зя Михаи́ла, ему́же сострада́ющи вѣнце́мъ отъ Бо́га вѣнча́лася еси́, благовѣ́рная княги́не, да прославля́юще просла́вльшаго тя́ Го́спода, пое́мъ си́це:

Ра́дуйся, пра́ведная Анно, нося́щая ду́хъ сокруше́нъ къ си́льному Бо́гу ра́зумовъ; ра́дуйся, мно́гія ско́рби и бѣды́ претерпѣ́вшая. Ра́дуйся, моли́твою вся́ побѣжда́вшая; ра́дуйся, терпѣ́ніемъ и упова́ніемъ супру́га твоего́ утѣша́вшая. Ра́дуйся, отъ еди́наго Го́спода по́мощи ожида́вшая; ра́дуйся, къ Нему́ ми́лостивому съ го́рькими слеза́ми припа́давшая. Ра́дуйся, отъ Го́спода я́коже зла́то въ горни́лѣ скорбе́й очище́нная; ра́дуйся, я́коже ка́мень драгíй чистото́ю сія́ющая. Ра́дуйся, виногра́де, изъ точи́ла принося́й вино́ благово́нное; ра́дуйся, ма́нно, пита́ющая и услажда́ющая всѣ́хъ тре́бующихъ. Ра́дуйся, исто́чниче ра́зума, отъ Бо́га ра́зумовъ вся́ напая́яй; ра́дуйся, росо́, ороша́ющая и оживля́ющая страну́ твою́, отъ наше́ствія иноплеме́нныхъ пострада́вшую.

Ра́дуйся, свята́я благовѣ́рная княги́не, преподо́бная ма́ти Анно.

Конда́къ 8

Стра́нникъ въ невѣ́рнѣй странѣ́ яви́ся, благовѣ́рный супру́гъ тво́й, всеблаже́нная Анно, егда́ за́вистію и клевето́ю сро́дникъ свои́хъ къ безбо́жному царю́ орды́нскому приведе́нъ бы́сть. Ты́ же, ско́рбь се́рдца твоего́ покрыва́ющи, и́злиха вопія́ла еси́ Бо́гу: Аллилу́ія.

Икосъ 8

Ве́сь еси́ жела́ніе мое́, ве́сь сла́дость Сладча́йшій Іису́се! Си́це моля́шеся Михаи́лъ, кня́зь христолюби́вый, и та́ко глаго́лаше: а́ще Бо́гъ соизво́литъ, хощу́ ити́ са́мъ во Орду́ ко беззако́нному царю́, хощу́ са́мъ да́ти отвѣ́тъ и ду́шу мою́ положи́ти за о́вцы ста́да Христо́ва по сло́ву Его́. Ты́ же, супру́жнице кня́зя благочести́ваго, вдохновле́нная благода́тію свы́ше, рекла́ еси́ ему́: пои́стинѣ блаже́нъ бу́деши во вся́ ро́ды. Сего́ ра́ди вси́ приглаша́ху ти́ си́це:

Ра́дуйся, блаже́нная ма́ти въ же́нстѣмъ естествѣ́ му́жескую крѣ́пость имѣ́вшая; ра́дуйся, долготерпѣли́вно упова́ніемъ на Го́спода укрѣпля́вшаяся. Ра́дуйся, глаго́лавшая кня́зю: Госпо́дь бу́детъ тво́й помо́щникъ; ра́дуйся, ре́кшая ему́: за Го́спода пострада́въ, пои́стинѣ блаже́нъ бу́деши. Ра́дуйся, я́ко и сама́ уготовля́лася еси́ пострада́ти за Спа́са Христа́; ра́дуйся, спострада́вшая супру́гу твоему́ въ ско́рби мно́зѣ. Ра́дуйся, а́ще и не пло́тію, оба́че се́рдцемъ за Христа́ страда́вшая; ра́дуйся, то́кмо посто́мъ, моли́твою и благода́тію Бо́жіею подкрѣпля́вшаяся. Ра́дуйся, во́племъ крѣ́пкимъ ко Го́споду взыва́вшая; ра́дуйся, глаго́лавшая: изми́ на́съ, Го́споди, отъ человѣ́къ лука́выхъ и отъ муже́й непра́ведныхъ, ополча́вшихъ бра́ни, изба́ви на́съ. Ра́дуйся, супру́га твоего́ презрѣ́ти сла́ву и всю́ сла́дость мíра сего́ тлѣ́ннаго увѣща́вшая; ра́дуйся, и на́мъ крѣ́пкое упова́ніе подаю́щая.

Ра́дуйся, свята́я благовѣ́рная княги́не, преподо́бная ма́ти Анно.

Кондакъ 9

Все́ се́рдце Твое́ содрогну́ся, богому́драя, егда́ вѣ́стникъ печа́льную вѣ́сть принесе́, я́ко благовѣ́рный супру́гъ тво́й Михаи́лъ во мно́зѣхъ страда́ніихъ сме́рть му́ченическую претерпѣ́, и а́біе въ ско́рби ве́ліей, прекло́ньши колѣ́на, ко Отцу́ Небе́сному, возстена́ла еси́: бу́ди во́ля Твоя́! Ангели же, вознося́ще ду́шу блаже́ннаго на не́бо, поя́ху: Аллилу́ія.

Икосъ 9

Вѣтíи многовѣща́нніи не возмо́гутъ изрещи́ ско́рби твоя́ и крѣ́пость любве́ твоея́, егда́ со ча́ды твои́ми текла́ еси́ во срѣ́теніе моще́й блаже́ннаго кня́зя, супру́га твоего́. Тѣ́мже и мы́, ублажа́юще болѣ́зни се́рдца твоего́, глаго́лемъ си́це:

Ра́дуйся, о́гненное искуше́ніе Го́спода ра́ди претерпѣ́вшая; ра́дуйся, пріобщи́тися страсте́мъ Христо́вымъ удосто́ившаяся. Ра́дуйся, съ вѣ́рою и любо́вію поне́сшая кре́стъ тво́й и Христу́ послѣ́довавшая; ра́дуйся, пре́лести мíра сего́ спасе́нія ра́ди презрѣ́вшая. Ра́дуйся, я́ко и во явле́ніе сла́вы Его́ возра́дуешися и восторжеству́еши; ра́дуйся, въ бѣда́хъ и ско́рбныхъ обстоя́ніихъ помо́щнице на́мъ ско́рая. Ра́дуйся, я́ко и сама́ въ житіи́ твое́мъ Христа́ ра́ди многоско́рбна была́ еси́; ра́дуйся, ду́шъ смяте́нныхъ умиротвори́тельнице ти́хая. Ра́дуйся, уныва́ющимъ утѣ́шительнице ди́вная; ра́дуйся, недоумѣ́ющимъ совѣ́тнице му́драя. Ра́дуйся, призыва́ющимъ тя́ моли́твеннице те́плая; ра́дуйся, съ вѣ́рою и упова́ніемъ умира́ющимъ спору́чнице крѣ́пкая.

Ра́дуйся, свята́я благовѣ́рная княги́не, преподо́бная ма́ти Анно.

Конда́къ 10

Спаси́тельнаго по́двига и́щущи, блаже́нная многоско́рбная княги́ня Анна, те́плыми моли́твами непреста́нно Бо́га моля́ше, да не лиши́тъ ю́ достоя́нія святы́хъ и наслѣ́дія небе́снаго Своего́ Ца́рствія, пою́щую Бо́гу: Аллилу́ія.

Икосъ 10

Стѣна́ неруши́мая, приста́нище и предста́тельство къ тебѣ́ прибѣга́ющихъ была́ еси́, блаже́нная, утѣше́ніе и весе́ліе. Сего́ ра́ди зове́мъ ти́:

Ра́дуйся, и во вдовствѣ́ бы́вшая прави́тельница му́драя, Ользѣ святѣ́й подо́бная и милосе́рдная; ра́дуйся, ча́да твоя́ во стра́сѣ Бо́жіемъ содержа́вшая. Ра́дуйся, ходи́ти въ за́повѣдехъ Госпо́днихъ и явля́ти ко всѣ́мъ ми́лость поуча́вшая; ра́дуйся, блаже́нная, ни́щія пита́вшая и убо́гія призира́вшая. Ра́дуйся, стра́нныя въ до́мъ тво́й вводи́ти повелѣва́вшая, пи́щу и оде́жду и́мъ подава́вшая; ра́дуйся, си́рыя и вдови́цы заступа́вшая и всѣ́мъ прося́щимъ по́мощи помога́вшая. Ра́дуйся, мно́го душе́ю за ча́да твоя́ поболѣ́вшая; ра́дуйся, супру́жнице до́бляя. Ра́дуйся, и́ноческое стро́гое житіе́ во вдовствѣ́ проводи́вшая; ра́дуйся, печа́льми земны́ми угнете́ннымъ ми́ръ вѣ́чный раскрыва́ющая. Ра́дуйся, у Распя́таго на Крестѣ́ за ны́, грѣ́шныя, ми́ра и тишины́ непреста́нно проси́вшая; ра́дуйся, въ ны́нѣшнемъ житіи́ всѣ́мъ помо́щнице те́плая.

Ра́дуйся, свята́я благовѣ́рная княги́не, преподо́бная ма́ти Анно.

Конда́къ 11

Пѣ́ніе и моли́твы непреста́нныя возноси́ти Бо́гу хотя́щи, блаже́нная, пришла́ еси́ во оби́тель дѣви́чу и та́мо, съ вели́кимъ смире́ніемъ моля́щися, повелѣ́ла еси́ себе́ постри́щи во а́нгельскій чи́нъ, и та́ко, по́мощію Всевы́шняго Бо́га, въ ма́лѣ вре́мени превозшла́ еси́ добродѣ́тельми вся́ бы́вшая та́мо по́стницы, пою́щи Го́сподеви: Аллилу́ія.

Икосъ 11

Свѣтопода́тельный свѣти́льникъ была́ еси́, богоблаже́нная: кня́зи бо, княги́ни, ча́да твоя́ и вся́ благоче́стно живу́щая во градѣ́хъ Тфе́ри и Ка́шинѣ, оби́тель твою́ посѣща́вшія, непреста́нно поуча́ла еси́ Бо́га боя́тися, Тому́ всегда́ уго́дная твори́ти и жи́ти въ любви́ дру́гъ ко дру́гу. Сего́ ра́ди вси́ прославля́ху тя́ си́це:

Ра́дуйся, мірскíя суеты́ отрѣши́вшаяся; ра́дуйся, небе́снаго оте́чества возжелѣ́вшая. Ра́дуйся, Христа́ всѣ́мъ се́рдцемъ возлюби́вшая; ра́дуйся, къ подно́жію но́гъ Его́ при́сно припа́давшая. Ра́дуйся, вели́кимъ а́нгельскимъ о́бразомъ украси́вшаяся; ра́дуйся, на и́ноческія по́двиги и боре́нія устреми́вшаяся. Ра́дуйся, и́ноческому послуша́нію всецѣ́ло преда́вшаяся; ра́дуйся, всю́ себе́ въ же́ртву непоро́чную прине́сшая. Ра́дуйся, у́мъ и се́рдце твое́ моли́твѣ посвяти́вшая; ра́дуйся, я́ко Христо́съ по успе́ніи твое́мъ въ черто́гъ Сво́й тя́ всели́. Ра́дуйся, я́ко и мо́щи твоя́ нетлѣ́нны сохрани́, и мно́гими чудесы́ и исцѣле́ньми къ тебѣ́ приходя́щихъ обогати́; ра́дуйся, наста́внице иноки́нямъ и собесѣ́днице а́нгеломъ.

Ра́дуйся, свята́я благовѣ́рная княги́не, преподо́бная ма́ти Анно.

Конда́къ 12

Благода́ть и ве́ліе дерзнове́ніе твое́ предъ Бо́гомъ вѣ́дуще, тебѣ́, преподо́бная ма́ти, мо́лимся: моли́ся о на́съ ко Го́споду, да изба́витъ ны́ отъ всѣ́хъ бѣ́дъ и напа́стей, и сохрани́тъ и утверди́тъ ны́ во святѣ́й вѣ́рѣ, во вся́комъ благоче́стіи и чистотѣ́, да ти́хое и безмо́лвное житіе́ поживе́мъ и пое́мъ благодѣ́ющему тобо́ю Бо́гу: Аллилу́ія.

Икосъ 12

Пою́ще твое́ прославле́ніе, ублажа́емъ тя́, преподо́бная, я́ко многомо́щную о на́съ моли́твенницу предъ Го́сподемъ, утѣ́шительницу и покрови́тельницу, и возглаша́емъ ти́ си́це:

Ра́дуйся, по́двигомъ до́брымъ подвиза́вшаяся; ра́дуйся, тече́ніе ско́рбное посто́мъ, бдѣ́ніемъ и моли́твою непреста́нно соверша́вшая. Ра́дуйся, носи́вшая на земли́ вѣне́цъ терно́вый; ра́дуйся, унаслѣ́довавшая на небеси́ вѣне́цъ нетлѣ́нный. Ра́дуйся, супру́жнице страстоте́рпца Христо́ва; ра́дуйся, съ ни́мъ спострада́вшая и вѣнча́вшаяся. Ра́дуйся, моли́твами твои́ми гра́дъ Ка́шинъ отъ смертоно́сныя я́звы изба́вившая; ра́дуйся, я́ко вѣ́ру къ тебѣ́ несумнѣ́нную и наде́жду извѣ́стную въ лю́бящихъ тя́ возгрѣ́ла еси́. Ра́дуйся, отъ Го́спода всѣ́хъ благи́хъ на́мъ пода́тельнице; ра́дуйся, во всѣ́хъ ско́рбехъ и обстоя́ніихъ утѣ́шительнице. Ра́дуйся, отъ вра́гъ ви́димыхъ и неви́димыхъ защи́тнице; ра́дуйся, о на́съ предъ Го́сподемъ въ де́нь пра́веднаго воздая́нія предста́тельнице.

Ра́дуйся, свята́я благовѣ́рная княги́не, преподо́бная ма́ти Анно.

Конда́къ 13

О, преподо́бная и преблаже́нная ма́ти Анно! Моли́ся при́сно Христу́ Бо́гу на́шему, дарова́ти Благочести́вѣйшему Госуда́рю на́шему на враги́ побѣ́ды и одолѣ́ніе, и мíру умире́ніе, и все́й Россíйстѣй земли́ вели́кое утвержде́ніе, на́мъ же грѣхо́въ оставле́ніе и житія́ исправле́ніе, да та́ко небе́снаго Ца́рствія наслѣ́дницы бу́демъ, въ ра́дости пою́ще со а́нгелы Бо́гу: Аллилу́ія, аллилу́ія, аллилу́ія.

Се́й конда́къ глаго́лется три́жды. Та́же Икосъ 1-й и Конда́къ 1-й

Моли́тва ко преподо́бнѣй княги́нѣ Аннѣ, Ка́шинской чудотво́рицѣ

О, преподо́бная и преблаже́нная ма́ти Анно! Смире́нно припа́дающе къ ра́цѣ честны́хъ моще́й твои́хъ, мо́лимся со слеза́ми прилѣ́жно: не забу́ди убо́гихъ твои́хъ до конца́, но помина́й на́съ всегда́ во святы́хъ твои́хъ и благопрія́тныхъ моли́твахъ къ Бо́гу. О, преблаже́нная вели́кая княги́не Анно! Не забу́ди присѣща́ти ча́дъ твои́хъ, а́ще бо тѣ́ломъ и преста́вилася еси́ отъ на́съ, но и по сме́рти жива́ пребыва́еши и не отступа́еши отъ на́съ ду́хомъ, сохраня́ющи на́съ отъ стрѣ́лъ вра́жіихъ, вся́кія пре́лести бѣсо́вскія и ко́зней діа́вольскихъ. Моли́твеннице на́ша усе́рдная! Не преста́й моля́щися за ны́ ко Христу́, Бо́гу на́шему, а́ще бо моще́й твои́хъ ра́ка предъ очи́ма на́шима вы́ну ви́дима е́сть, но свята́я душа́ твоя́, со а́нгельскими во́инствы у престо́ла Вседержи́теля предстоя́щи, досто́йно весели́тся. Къ тебѣ́ у́бо припа́даемъ, тебѣ́ мо́лимся, тебѣ́ ми́ли ся дѣ́емъ: моли́ся, преблаже́нная Анно, Всеми́лостивому Бо́гу на́шему о спасе́ніи ду́шъ на́шихъ, е́же испроси́ти на́мъ вре́мя на покая́ніе и невозбра́нно прейти́ отъ земли́ на не́бо, мыта́рствъ го́рькихъ и вѣ́чныя му́ки изба́витися и небе́сному Ца́рствію наслѣ́дникомъ бы́ти со всѣ́ми преподо́бными, отъ вѣ́ка угоди́вшими Го́споду на́шему Іису́су Христу́, Ему́же сла́ва, со Безнача́льнымъ Его́ Отце́мъ, и съ Пресвяты́мъ, и Благи́мъ, и Животворя́щимъ Его́ Ду́хомъ, ны́нѣ, и при́сно, и во вѣ́ки вѣко́въ. Ами́нь.

Тропа́рь, гла́съ 3

Дне́сь восхваля́емъ тя́, преподо́бная ма́ти, вели́кая княги́не иноки́не Анно: я́ко бо лоза́ плодови́та посредѣ́ те́рнія, процвѣла́ еси́ во гра́дѣ Ка́шинѣ твои́ми добродѣ́тельми, всѣ́хъ удиви́ла еси́ чу́днымъ твои́мъ житіе́мъ, тѣ́мже Христу́ Бо́гу угоди́ла еси́, и ны́нѣ, ра́дующися и веселя́щися, пребыва́еши съ ли́ки преподо́бныхъ же́нъ, наслажда́ющися ра́йскія красоты́ и весе́лія. Мо́лимъ у́бо тя́: моли́ о на́съ Человѣколю́бца, Христа́ Бо́га на́шего, дарова́ти на́мъ ми́ръ и ве́лію ми́лость.

Конда́къ, гла́съ 4

Яко пресвѣ́тлая звѣзда́, яви́лася еси́ въ Россíйстѣй земли́, во гра́дѣ Ка́шинѣ, преподо́бная ма́ти Анно, во всѣ́хъ благочести́выхъ и вѣ́рныхъ жена́хъ, а́ки кри́нъ процвѣла́ еси́ чи́стымъ и непоро́чнымъ твои́мъ житіе́мъ, во иноки́няхъ же соверше́нными твои́ми труды́ и по́двиги, и возшла́ еси́ къ Вы́шнему гра́ду, ра́дующися и веселя́щися, я́ко до́брѣ соверши́вши твое́ тече́ніе, и ны́нѣ честны́я твоя́ мо́щи, а́ки би́серіе драго́е, яви́шася на исцѣле́ніе всѣ́мъ, приходя́щимъ съ вѣ́рою. Тѣ́мъ и вопіе́мъ ти́: ра́дуйся, всекра́сная душе́ю, и моли́ Христа́ Бо́га о спасе́ніи ду́шъ на́шихъ.

Велича́ніе

Ублажа́емъ тя́, преподо́бная ма́ти, вели́кая княги́не Анно, и чте́мъ святу́ю па́мять твою́, наста́внице иноки́нямъ и собесѣ́днице а́нгеломъ.