Конда́къ 1

Изря́дный воево́до за вѣ́ру, царя́ и оте́чество, вели́кій игу́мене земли́ на́шея во дни́ сму́ты и озлобле́нія грѣхо́внаго, те́плый утѣ́шителю всѣ́хъ напа́ствуемыхъ и обремене́нныхъ скорбьми́ мно́гими, правосла́вный храни́телю оте́ческихъ преда́ній, и́хже ра́ди положи́лъ еси́ ду́шу свою́ за дру́ги своя́ и на́съ свободи́лъ еси́ отъ ра́бства инозе́мнаго и поруга́нія лати́нства скве́рнаго и ны́нѣ отъ Го́спода просла́вленъ еси́ явле́ніемъ чуде́съ твои́хъ, и́ми же собра́лъ еси́ на́съ къ ра́цѣ моще́й твои́хъ, со умиле́ніемъ любви́ пою́щихъ ти́:

Ра́дуйся, святи́телю Ермоге́не, па́стырю до́брый Руси́ правосла́вныя.

Икосъ 1

Ангела храни́теля, спу́тьствующа и спаси́тельная предлага́юща, яви́ тя́ Руси́ милосе́рдый Христо́съ во дни́ нестрое́нія, да спасе́тъ ю́ отъ блужда́нія грѣхо́внаго. И ны́нѣ яви́ тя́ моли́твенника и чудотво́рца, я́ко зна́меніе вре́мени: да и ны́нѣ гряду́тъ по тебѣ́ вси́ блужда́ющіи, я́ко о́вцы не иму́щія па́стыря, и обрѣ́тше тобо́ю спасе́ніе, да пою́тъ тебѣ́ си́це:

Ра́дуйся, Це́ркви на́шея прему́дрое возглавле́ніе; ра́дуйся, о ча́дѣхъ Це́ркве те́плое промышле́ніе. Ра́дуйся, ца́рства на́шего церко́вное утвержде́ніе; ра́дуйся, сыно́въ ца́рства правосла́вное озаре́ніе. Ра́дуйся, епи́скопомъ и міря́номъ до́брое поуче́ніе; ра́дуйся, царе́мъ на́шимъ совѣ́те и утѣше́ніе. Ра́дуйся, Це́ркве и ца́рства Христо́во корми́ло; ра́дуйся, земли́ Ру́сскія правосла́вное свѣти́ло.

Ра́дуйся, святи́телю Ермоге́не, па́стырю до́брый Руси́ правосла́вныя.

Конда́къ 2

Ви́дя Ру́сь, я́ко вдови́цу, зѣ́льнѣ пла́чущу о запустѣ́ніи до́ма своего́, умилосе́рдився, на ра́мена своя́ подъя́лъ еси́ ско́рби ея́ и да́же до сме́рти поне́слъ еси́ я́. Блаже́нъ еси́, состра́ждущій и пла́чущій предъ Бо́гомъ, сего́ бо ра́ди ны́нѣ вѣ́чно ра́дуешися на небесѣ́хъ, поя́ Бо́гу: Аллилу́ія.

Икосъ 2

Ра́зумомъ любве́, наказу́ющія и ми́лующія, управля́лъ еси́, святи́телю, наро́домъ правосла́внымъ, я́ко корабле́мъ, въ пучи́нѣ зо́лъ потопля́емымъ, и приве́лъ еси́ его́ къ ти́хой при́стани правосла́внаго самодержа́вія, окормля́емаго спаси́тельными преда́ньми святы́я Це́ркве, тѣ́мже благода́рственно пое́мъ ти́:

Ра́дуйся, му́дрости мíра сего́ отрекíйся; ра́дуйся, въ безу́міе Христа́ ра́ди облекíйся. Ра́дуйся, ума́ Христо́ва вмѣсти́лище; ра́дуйся, ра́зума Це́ркве храни́лище. Ра́дуйся, главо́, свѣ́тъ и́стины излуча́ющая; ра́дуйся, прему́дросте, нему́дрыя просвѣща́ющая. Ра́дуйся, благовѣ́стниче правосла́вныя пра́вды; ра́дуйся, обличи́телю человѣ́ческія непра́вды.

Ра́дуйся, святи́телю Ермоге́не, па́стырю до́брый Руси́ правосла́вныя.

Конда́къ 3

Си́лою вѣ́ры вся́ превозмо́глъ еси́, святи́телю, и всеору́жіемъ Бо́жіей благода́ти вся́ побѣди́лъ еси́, вся́ бо мо́жетъ о укрѣпля́ющемъ Іису́сѣ рабо́тающій Ему́ со стра́хомъ и ра́дующійся Ему́ съ тре́петомъ, поя́ Ему́: Аллилу́ія.

Икосъ 3

Имѣ́я благода́ть свяще́нства, до́брѣ носи́му въ благоуха́ющемъ сосу́дѣ души́ твоея́, бы́лъ еси́, святи́телю, исто́чникъ си́лы, Ру́сь оскудѣва́ющу восполня́ющій, то́ю бо спасе́нна, благода́рственная пое́тъ ти́:

Ра́дуйся, іере́ю, Бо́гомъ избра́нный; ра́дуйся, свяще́нниче, благода́тію облагоуха́нный. Ра́дуйся, епи́скопе, зерца́ло со́вѣсти нелицепрія́тныя; ра́дуйся, святи́телю, кади́ло моли́твы благопрія́тныя. Ра́дуйся, па́стырю святы́я Це́ркве, со вла́стію Ду́ха управля́яй; ра́дуйся, митрополи́те, о сла́вѣ Це́ркве неусы́пно промышля́яй. Ра́дуйся, патріа́рше, и́мже Ру́сь изы́де на па́жить весе́лія; ра́дуйся, патріа́рше, и́мже Ру́сь обрѣ́те ра́дость спасе́нія.

Ра́дуйся, святи́телю Ермоге́не, па́стырю до́брый Руси́ правосла́вныя.

Конда́къ 4

Бу́рею помышле́ній сумни́тельныхъ и стремле́ній мяте́жныхъ волну́ема, хи́щники и иска́тели ца́рскія вла́сти наводня́ема и въ пучи́ну иносла́внаго суему́дрія погружа́ема, Ру́сь утопа́ше: узрѣ́въ же тя́, я́ко Христа́, еди́наго непотопля́емаго и бу́рею сму́ты неколе́блемаго, возра́довася наде́ждею и, ру́ку спасе́нія получи́въ, пое́тъ Бо́гу: Аллилу́ія.

Икосъ 4

Слы́шавше та́тіе Це́ркве и разбо́йницы ца́рства гла́съ тво́й, святи́телю, я́ко вла́сть иму́щаго, благода́тію и́стины испо́лненный, скрежета́ху зубы́ свои́ми и трепета́ху я́ко бѣ́си, и́же и ны́нѣ трепе́щутъ си́лы твоея́ у ра́ки моще́й твои́хъ. Мы́ же, почита́я сію́ си́лу, я́ко Бо́жію, во утвержде́ніе правосла́внаго ца́рства на ка́мени церко́внѣмъ источа́ему, пое́мъ ти́ си́льному о Го́сподѣ:

Ра́дуйся, крѣ́пкій побо́рниче проти́ву самозва́нныхъ повели́телей; ра́дуйся, обличи́телю непри́званныхъ спаси́телей. Ра́дуйся, суему́драго иносла́вія пра́ведное поруга́ніе; ра́дуйся, спаси́тельнаго Правосла́вія немо́лчное назида́ніе. Ра́дуйся, це́рковь и ца́рство сою́зомъ нераздѣ́льныя любве́ соедини́вый; ра́дуйся, царя́ и ца́рство въ послуша́ніе Правосла́вія плѣни́вый. Ра́дуйся, правосла́вныя держа́вы незы́блемое утвержде́ніе; ра́дуйся, царю́ на́шему ско́рая по́моще и наставле́ніе.

Ра́дуйся, святи́телю Ермоге́не, па́стырю до́брый Руси́ правосла́вныя.

Конда́къ 5

Но́ву звѣзду́ показа́ тя́ на небесѣ́хъ сла́вы въ со́нмѣ священному́чениковъ Госпо́дь Вседержи́тель, зане́ и на земли́ бы́лъ еси́ звѣзда́ свѣ́тлая, осіява́юща царя́ и ца́рство свѣ́томъ Правосла́вія и путево́дствующа ко угожде́нію Еди́ному Бо́гу, поя́ Ему́: Аллилу́ія.

Икосъ 5

Ви́дѣша тя́ правосла́вніи, я́ко свѣти́ло церко́вное, безо́блачно сія́ющее въ просвѣще́ніе омраче́нныхъ страстьми́, устреми́шася къ тебѣ́ изъ мра́ка обольще́нія ле́стію и стра́хомъ человѣ́ческимъ и воспрія́ша отъ тебе́ спаси́тельное дерзнове́ніе, е́же да́руй и на́мъ, грѣ́шнымъ, поуча́ющимся у ра́ки моще́й твои́хъ си́мъ пѣ́ніемъ:

Ра́дуйся, почита́яй царя́, я́ко Бо́жіе дарова́ніе; ра́дуйся, мня́й бы́ти ему́ всѣ́мъ развраще́ннымъ въ наказа́ніе. Ра́дуйся, царя́ Ѳео́дора къ огражде́нію немощны́хъ вѣ́рою склони́вый; ра́дуйся, бы́ти ему́ отце́мъ лю́бящимъ и вѣ́чное спасе́ніе и́хъ умоли́вый. Ра́дуйся, царя́ Васи́лія тве́рдости учи́вый; ра́дуйся, въ ра́дости и въ го́рѣ дру́гъ ему́ бы́вый. Ра́дуйся, царя́ на́шего пребыва́ющее благослове́ніе; ра́дуйся, во всѣ́хъ дѣ́лѣхъ небе́сное ему́ поможе́ніе.

Ра́дуйся, святи́телю Ермоге́не, па́стырю до́брый Руси́ правосла́вныя.

Конда́къ 6

Проповѣ́дникъ ве́лія благода́ти, ниспосыла́емыя правосла́внымъ лю́демъ неусыпа́ющими моли́твами Богома́тере бы́лъ еси́, святи́телю Ермоге́не. Сего́ ра́ди удосто́ился еси́ отъ Пречи́стыя взя́ти отъ земли́ святу́ю ико́ну Ея́, во гра́дѣ Каза́ни явле́нную, и просла́вити ю́ по достоя́нію, я́ко щи́тъ и заступле́ніе Руси́, поя́ Честнѣ́йшей го́рнихъ во́инствъ: Аллилу́ія.

Икосъ 6

Возсія́вшу свѣ́ту и́стины Христо́вой, во свѣ́тѣ Правосла́вія хо́димъ и бѣжи́мъ вся́кія лжи́, да досто́йни бу́демъ небе́снаго патріа́рха всея́ Руси́, святи́теля Ермоге́на, ему́же пое́мъ со воскликнове́ніемъ:

Ра́дуйся, чудотво́рныя ико́ны Каза́нскія пе́рвое прославле́ніе; ра́дуйся, те́плыя любве́ Богома́тере умиле́нное пѣснопѣ́ніе. Ра́дуйся, вѣ́руяй моли́твамъ Влады́чицы, я́ко всеси́льному огражде́нію; ра́дуйся, ввѣ́ривый правосла́вное во́инство Ея́ ма́тернему заступле́нію. Ра́дуйся, Бо́жію Ма́терь всѣ́мъ се́рдцемъ свои́мъ возлюби́вый; ра́дуйся, на моли́тву предъ Не́ю Ру́сь стра́ждущу приклони́вый. Ра́дуйся, до́мъ Пречи́стыя, я́ко хору́гвь правосла́внаго ца́рства почита́яй; ра́дуйся, о утвержде́ніи сего́ ца́рства предъ Пречи́стою рыда́яй.

Ра́дуйся, святи́телю Ермоге́не, па́стырю до́брый Руси́ правосла́вныя.

Конда́къ 7

Хотя́ бы́ти па́стырь до́брый, ему́ же су́ть о́вцы своя́, ви́дѣвъ во́лка гряду́ща, не оставля́лъ еси́ о́вцы и не бѣ́галъ еси́, но предъ ни́ми ходи́лъ еси́ во всеору́жіи си́лы и и́стины, поя́ Бо́гу: Аллилу́ія.

Икосъ 7

Но́ваго человѣ́ка по о́бразу Созда́вшаго его́, а не но́ваго ца́рства иносла́внаго измышле́нія, возжелѣ́лъ еси́, святи́телю Ермоге́не. Сего́ ра́ди ополчи́лся еси́ за ца́рство древлеправосла́вное, е́же тщи́тся во всѣ́хъ лю́дѣхъ и во все́мъ житіи́ и́хъ вообрази́ти Христа́ Го́спода. Пое́мъ и сла́вимъ сіе́ правосла́вное ратобо́рство и, ра́дуяся, вопіе́мъ ти́:

Ра́дуйся, волко́въ хи́щныхъ неща́дное изгна́ніе; ра́дуйся, кова́рства и́хъ му́дрое распозна́ніе. Ра́дуйся, ца́рства правосла́внаго вѣ́рное спасе́ніе; ра́дуйся, ста́да Христо́ва церко́вное огражде́ніе. Ра́дуйся, я́ко ко́кошъ птенцы́ своя́ созыва́яй; ра́дуйся, я́ко оре́лъ, птенцы́ своя́ покрыва́яй. Ра́дуйся, Правосла́вія вели́кій ревни́телю; ра́дуйся, царе́мъ и ца́рству церко́вный учи́телю.

Ра́дуйся, святи́телю Ермоге́не, па́стырю до́брый Руси́ правосла́вныя.

Конда́къ 8

Стра́нно міролю́бцемъ зрѣ́ти, ка́ко святи́тель Ермоге́нъ, во пло́ти сы́й, не себѣ́ угожда́етъ, ка́ко сла́ву, че́сть и вся́ мірска́я, я́ко пра́хъ, попира́етъ и го́рняя му́дрствуетъ, и́щущи сла́вы у Еди́наго, на небесѣ́хъ Живу́щаго, поя́ Ему́: Аллилу́ія.

Икосъ 8

Ве́сь бѣ́ ревну́ющь ре́вностію Иліи́ проро́ка, святи́телю Ермоге́не, егда́ узрѣ́лъ еси́ запустѣ́ніе ца́рства и поруга́ніе святы́нь Правосла́вія, и огне́мъ сея́ ре́вности воспламени́лъ еси́ сердца́ всѣ́хъ правосла́вныхъ во спасе́ніе Руси́, пою́щія ти́ ны́нѣ съ любо́вію:

Ра́дуйся, Ду́ха Бо́жія не угаша́яй; ра́дуйся, дарова́ніе благода́ти возгрѣва́яй. Ра́дуйся, Ду́хомъ Бо́жіимъ пламенѣ́ющій; ра́дуйся, я́ко оре́лъ надъ мíромъ си́мъ паря́щій. Ра́дуйся, созерца́яй го́рняя; ра́дуйся, одухотворя́яй до́льняя. Ра́дуйся, се́ю ре́вностію о ца́рствѣ ревнова́вый; ра́дуйся, ца́рству на́шему пу́ть правосла́внаго строи́тельства указа́вый.

Ра́дуйся, святи́телю Ермоге́не, па́стырю до́брый Руси́ правосла́вныя.

Конда́къ 9

Все́ естество́ а́нгельское, ви́дяще правосла́вныя лю́ди во хра́мѣ Пречи́стыя Богоро́дицы со умиле́ніемъ, ко Го́споду припа́дающія и во грѣсѣ́хъ свои́хъ съ сокруше́ніемъ ка́ющіяся, да отврати́тъ Госпо́дь гнѣ́въ сво́й, пра́ведно на зе́млю Ру́сскую дви́жимый, зѣло́ ра́довася, поя́ Бо́гу: Аллилу́ія.

Икосъ 9

Витíи безмо́лвствуютъ, сладкозву́чніи же благода́тію святи́теліе Ермоге́нъ и Іовъ проповѣ́дуютъ покая́ніе во отпуще́ніе грѣхо́въ, и́хже ра́ди гнѣ́въ Бо́жій потряса́етъ ца́рства, и исторга́ютъ сле́зы покая́нія и во́пли рыда́нія, и́ми же согрѣши́вшая Ру́сь омы́лася е́сть, освяти́лася, оправда́лася и ны́нѣ пое́тъ своему́ по Бо́зѣ помо́щнику правосла́вно:

Ра́дуйся, грѣ́шныя оте́чески наказу́яй; ра́дуйся, покая́ніе, я́ко спасе́ніе отъ всѣ́хъ зо́лъ, благовѣству́яй. Ра́дуйся, вла́стію отъ Бо́га грѣхи́ ца́рства разрѣша́яй; ра́дуйся, отъ вся́кія скве́рны пло́ти и ду́ха правосла́вныя очища́яй. Ра́дуйся, сле́зными тече́ньми зе́млю на́шу ороси́вый; ра́дуйся, плоды́ послуша́нія святѣ́й Це́ркви на не́й возрасти́вый. Ра́дуйся, рыда́ньми покая́нія лице́ ца́рства обнови́вый; ра́дуйся, ми́лость Бо́жію къ на́мъ, грѣ́шнымъ, обрати́вый.

Ра́дуйся, святи́телю Ермоге́не, па́стырю до́брый Руси́ правосла́вныя.

Конда́къ 10

Спасти́ хотя́ Ру́сь отъ безнача́лія грѣхолюби́ваго не къ те́мному За́паду, но къ богобоя́зненному до́му Рома́новыхъ обрати́лъ еси́ о́чи свои́, святи́телю Ермоге́не, да бу́детъ о́нъ вла́стію отъ Бо́га во утвержде́ніе Христо́ва Зако́на и да пою́тъ ца́ріе и лю́діе еди́нѣми усты́ и еди́нѣмъ се́рдцемъ Спаси́телю Бо́гу: Аллилу́ія.

Икосъ 10

Стѣна́ необори́мая Це́ркве бы́лъ еси́, святи́телю, е́юже ца́рство Ру́сское огради́ся, въ правосла́віи утверди́ся и отъ враго́въ спасе́ся, и ны́нѣ пое́тъ ти́ благода́рственно:

Ра́дуйся, мудрова́ніе За́пада отверга́яй; ра́дуйся, правосла́вное житіе́ благословля́яй. Ра́дуйся, святы́хъ преда́ній храни́телю; ра́дуйся, уста́вовъ церко́вныхъ ревни́телю. Ра́дуйся, моли́тву и по́стъ, я́ко сокро́вище спасе́нія, лобыза́яй; ра́дуйся, святы́я ико́ны и мо́щи святы́хъ со благоговѣ́ніемъ почита́яй. Ра́дуйся, до́му Рома́новыхъ ра́дость благовѣству́яй; ра́дуйся, въ не́мъ Бо́жіею ми́лостію царя́ всея́ Руси́ указу́яй.

Ра́дуйся, святи́телю Ермоге́не, па́стырю до́брый Руси́ правосла́вныя.

Конда́къ 11

Пѣ́ніе исхо́дное и рыда́ніе надгро́бное твори́тъ свята́я Ру́сь у гро́ба святи́теля Ермоге́на, положи́вшаго ду́шу свою́ за дру́ги своя́. Не пла́чите, правосла́вніи, но па́че дерза́йте вѣ́рою: пра́ведникъ бо и по сме́рти бу́детъ жи́ти во вѣ́ки, поя́ Бо́гу: Аллилу́ія.

Икосъ 11

Свѣти́льникъ Христо́въ, на верху́ горы́ стоя́й и все́й Руси́ свѣтя́й бы́лъ еси́, святи́телю Ермоге́не. И се́, полага́ешися подъ спу́домъ моги́льнымъ пло́тію, да возсія́еши ду́хомъ, я́ко со́лнце, во Ца́рствіи Отца́ Небе́снаго, на́съ же да научи́ши си́це пѣ́ти болѣ́зни и труды́ твоя́:

Ра́дуйся, съ престо́ла патріа́ршаго беззако́нно све́рженный; ра́дуйся, въ те́мное подземе́ліе, я́ко во гро́бъ вве́рженный. Ра́дуйся, и здѣ́ о́вцы своя́ волко́мъ хи́щнымъ не преда́вый; ра́дуйся, и здѣ́ спасе́ніе Руси́ благовѣствова́вый. Ра́дуйся, пра́вды ра́ди мно́гими скорбьми́ терза́емый; ра́дуйся, гла́домъ и муче́ньми да́же до сме́рти изнуря́емый. Ра́дуйся, му́чениче, за правосла́віе ца́рства пострада́вый; ра́дуйся, страстоте́рпче, въ ру́цѣ Го́споду ду́хъ сво́й преда́вый.

Ра́дуйся, святи́телю Ермоге́не, па́стырю до́брый Руси́ правосла́вныя.

Конда́къ 12

Благода́ти Бо́жіей сокро́вище яви́ся свята́я и всечестна́я ра́ка твоя́, святи́телю о́тче Ермоге́не, и исто́чникъ приснотеку́щія си́лы, е́юже бѣ́си изгоня́ются, неду́жніи исцѣля́ются, хромíи хо́дятъ, глусíи слы́шатъ, слѣпíи прозрѣва́ютъ, озло́бленніи смиря́ются, скорбя́щіи утѣша́ются и вси́ лику́ютъ о Го́сподѣ и прославля́ютъ Бо́га, ди́внаго во святы́хъ Свои́хъ, пою́ще Ему́: Аллилу́ія.

Икосъ 12

Пою́ще твое́ прославле́ніе, святи́телю Ермоге́не, сія́ пѣ́сни прино́симъ ти́, чудотво́рче святы́й, я́ко благоуха́ніе христіа́нскія ра́дости: зри́мъ бо Бо́жію си́лу не то́кмо въ не́мощехъ, но и въ оста́нкахъ твои́хъ соверша́ему. И ны́нѣ озаря́еши на́съ свѣ́томъ твоея́ благода́ти, обвеселя́я сердца́ на́ша пѣ́ти ти́ со умиле́ніемъ:

Ра́дуйся, ты́ бо Сладча́йшаго при́сно созерца́еши; ра́дуйся, ты́ бо лице́мъ къ лицу́ Христа́ воспѣва́еши. Ра́дуйся, ты́ бо отъ лица́ Его́ озаря́ешися боже́ственнымъ свѣтоизлія́ніемъ; ра́дуйся, ты́ бо во свѣ́тѣ лица́ Бо́жія награжда́ешися небе́снымъ сія́ніемъ. Ра́дуйся, ты́ бо боже́ственною си́лою преобража́ешися отъ сла́вы въ сла́ву; ра́дуйся, ты́ бо, я́ко со́лнце но́вое, украша́еши Его́ держа́ву. Ра́дуйся, и́бо твои́мъ сія́ніемъ и мы́ незри́мо просвѣща́емся; ра́дуйся, и́бо твое́ю си́лою и мы́ оживотворя́емся.

Ра́дуйся, святи́телю Ермоге́не, па́стырю до́брый Руси́ правосла́вныя.

Конда́къ 13

О, пресла́вный уго́дниче Бо́жій, до́брый па́стырю Руси́, святи́телю о́тче на́шъ Ермоге́не! Пріими́ на́ше твое́й сла́вѣ сора́дованіе, я́ко воздыха́ніе души́: жа́ждетъ бо неотъе́млемыя ра́дости, и умоли́ Пастыренача́льника Христа́ дарова́ти и на́мъ пребыва́ющую благода́ть утѣше́нія и ра́дованія, да весели́тся предъ лице́мъ Его́ Ру́сь и да пое́тъ Ему́ вы́ну: Аллилу́ія.

Се́й конда́къ глаго́лется три́жды. Та́же Икосъ 1-й и Конда́къ 1-й

Моли́тва святи́телю и чудотво́рцу Ермоге́ну

О, вели́кій уго́дниче Христо́въ, святи́телю о́тче на́шъ Ермоге́не! Къ тебѣ́, моли́твеннику те́плому и предста́телю предъ Бо́гомъ непосты́дному, усе́рдно притека́емъ, въ ну́ждахъ и ско́рбехъ на́шихъ утѣше́нія и по́мощи прося́ще. Въ дре́внюю годи́ну искуше́ній, внегда́ обыше́дше обыдо́ша страну́ на́шу нечести́віи врази́, Госпо́дь яви́ тя́ Це́ркви Свое́й столпа́ непоколеби́ма и лю́демъ россíйскимъ па́стыря до́бра, ду́шу свою́ за о́вцы положи́вша и лю́тыя во́лки дале́че отгна́вша. Ны́нѣ у́бо при́зри и на ны́, недосто́йныя ча́да твоя́, умиле́нною душе́ю и сокруше́ннымъ се́рдцемъ тебе́ призыва́ющія. Крѣ́пость бо на́ша въ на́съ оскудѣ́ и вра́жія ловле́нія и сѣ́ти обыдо́ша на́съ. Помози́ на́мъ, засту́пниче на́шъ! Утверди́ на́съ въ вѣ́рѣ святѣ́й, научи́ на́съ всегда́ твори́ти за́повѣди Бо́жія и вся́ преда́нія церко́вная, отъ оте́цъ на́мъ заповѣ́данная. Укрѣпи́ Благовѣ́рнаго Царя́ на́шего, Бо́гомъ на́мъ да́ннаго, и научи́ на́съ люби́ти Его́ нелицемѣ́рно. Па́стыремъ на́шимъ бу́ди архипа́стырь, во́иномъ во́ждь духо́вный, боля́щимъ вра́чь, печа́льнымъ утѣ́шитель, гони́мымъ засту́пникъ, ю́нымъ наста́вникъ, всѣ́мъ же благосе́рдый оте́цъ и за вся́ те́плый моли́твенникъ; я́ко да моли́твами твои́ми огражда́еми, непреста́нно воспое́мъ и просла́вимъ всесвято́е и́мя Живонача́льныя Тро́ицы, Отца́ и Сы́на и Свята́го Ду́ха, во вѣ́ки вѣко́въ. Ами́нь.

Тропа́рь на преставле́ніе [17-го Февруа́рія], гла́съ 4

Россíйскія земли́ первопресто́льниче и неусы́пный о не́й къ Бо́гу моли́твенниче! за вѣ́ру Христо́ву и па́ству твою́ ду́шу свою́ положи́въ, держа́ву царе́й на́шихъ утверди́лъ еси́ и страну́ на́шу отъ нече́стія изба́вилъ еси́, тѣ́мже вопіе́мъ ти́: спаса́й на́съ моли́твами твои́ми, священному́чениче Ермоге́не, о́тче на́шъ.

Инъ тропа́рь на прославле́ніе [12-го Ма́ія], гла́съ 4

Приспѣ́ де́нь свѣ́тлаго торжества́, гра́дъ Москва́ ра́дуется, и съ ни́мъ Ру́сь Правосла́вная ликоству́етъ пѣ́сньми и пѣ́ньми духо́вными: дне́сь бо свяще́нное торжество́ въ явле́ніи честны́хъ и многоцѣле́бныхъ моще́й святи́теля и чудотво́рца Ермоге́на, я́коже со́лнце незаходи́мое возсія́ свѣтоза́рными луча́ми, разгоня́я тму́ искуше́ній же и бѣ́дъ отъ вопію́щихъ вѣ́рно: спаса́й на́съ, я́ко предста́тель на́шъ, вели́кій Ермоге́не.

Сла́ва, и ны́нѣ, богоро́диченъ

Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.

Конда́къ, гла́съ 6

Темни́цею и гла́домъ изнуря́емь, да́же до сме́рти вѣ́ренъ пребы́лъ еси́, блаже́нне Ермоге́не, малоду́шіе отъ серде́цъ люде́й твои́хъ изгоня́я и на о́бщій по́двигъ вся́ призыва́я. Тѣ́мже и нечести́выхъ мяте́жъ низложи́лъ еси́ и ски́птры ца́рства утверди́лъ еси́, да вси́ зове́мъ ти́: ра́дуйся, засту́пниче Россíйскія земли́.

Велича́ніе

Велича́емъ тя́, священному́чениче Ермоге́не, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.