Текст одобрен решением Священного Синода Русской Православной Церкви 4(17) мая 1884 года (№ 968)

Конда́къ 1

Избра́нный чудотво́рче и изря́дный уго́дниче Христо́въ, мно́гимъ воздержа́ніемъ на земли́ житіе́ твое́ укра́сивый, сего́ ра́ди и вѣнце́мъ отъ Христа́ на небеси́ вѣнча́нный и, съ вѣ́рою приходя́щимъ, источа́яй многоцѣле́бныя да́ры. Восхваля́емъ тя́, засту́пника на́шего, преподо́бне о́тче Варлаа́ме, ты́ же, я́ко имѣ́яй дерзнове́ніе ко Го́споду, отъ вся́кихъ на́съ бѣ́дъ свободи́, да зове́мъ ти́:

Ра́дуйся, Варлаа́ме, вели́кій и пресла́вный чудотво́рче.

Икосъ 1

Ангеломъ уподо́бился еси́, богому́дре о́тче Варлаа́ме, непоро́чнымъ житіе́мъ твои́мъ на земли́: добродѣ́тельми укра́шенъ, пресели́лся еси́ отъ земли́ на не́бо, ди́вный о́бразъ соверше́нства духо́внаго на́мъ оста́вивъ, да подража́емъ добродѣ́телемъ твои́мъ. Ты́ же со а́нгелы и всѣ́ми святы́ми, предстоя́ престо́лу Го́спода сла́вы, моли́ся о на́съ, почита́ющихъ тя́ и во умиле́ніи зову́щихъ ти́ такова́я:

Ра́дуйся, о́трасле богодаро́ванная ко́рене благочести́ваго; ра́дуйся, вели́каго Новагра́да прозябе́ніе пречестно́е. Ра́дуйся, ча́до возлю́бленное, благода́ти Ду́ха Бо́жія испо́лненное; ра́дуйся, отроча́ боголюбе́зное. Ра́дуйся, измла́да Боже́ственными Писа́ньми ду́шу твою́ насы́тивый; ра́дуйся, во мла́дости му́дрость ста́рца стяжа́вый. Ра́дуйся, воздержа́ніемъ роди́тели твоя́ изуми́вый; ра́дуйся, смире́ніемъ и послуша́ніемъ мно́гихъ удиви́вый. Ра́дуйся, ю́ность твою́ непоро́чностію житія́ укра́сивый; ра́дуйся, цѣлому́дріе дѣ́вства невреди́мо сохрани́вый. Ра́дуйся, отъ ю́ности въ же́ртву благопрія́тну Го́сподеви са́мъ себе́ принесы́й; ра́дуйся, во все́мъ житіи́ еди́но попече́ніе имѣ́вый, е́же Тріѵпоста́сному Бо́гу то́кмо служи́ти.

Ра́дуйся, Варлаа́ме, вели́кій и пресла́вный чудотво́рче.

Конда́къ 2

Ви́дѣвше роди́тели ве́ліе воздержа́ніе твое́, о́тче преблаже́нне, въ печа́ли бя́ху, да не въ болѣ́знь впаде́ши, ю́нъ сы́й. Ты́ же первоверхо́внаго апо́стола глаго́лу внима́я, я́ко бра́шно и питіе́ не поставля́етъ на́съ предъ Бо́гомъ, но то́кмо по́стъ и моли́тва, усе́рдно проси́лъ еси́ роди́тели твоя́ да́ти тебѣ́ посто́мъ и моли́твою стра́сти ю́ношескія умерщвля́ти, да не поработя́тъ сія́ ду́ха. Они́ же, слы́шавше такова́я, почуди́шася и оста́виша тя́ жи́ти благо́му твоему́ изволе́нію, воспѣва́юще вразуми́вшему тя́ Бо́гу благода́рственную пѣ́снь: Аллилу́ія.

Икосъ 2

Ра́зумъ благíй, благоро́дство и́стинное, бога́тство неистощи́мое стяжа́лъ еси́, богоблаже́нне Варлаа́ме, егда́ отъ ю́ности возжела́въ го́рняя му́дрствовати, а не земна́я, взыска́лъ еси́ стези́ къ небе́снымъ оби́телемъ въ безмо́лвіи и богомы́сліи. Мы́ же, помина́юще толи́кую твою́ къ по́двигомъ духо́внымъ ре́вность, со умиле́ніемъ взыва́емъ ти́ такова́я:

Ра́дуйся, безмо́лвія и богомы́слія до́брый рачи́телю; ра́дуйся, потре́бнаго для души́ сле́зный иска́телю. Ра́дуйся, во́лею свое́ю и́го за́повѣдей Христо́выхъ подъя́вый; ра́дуйся, угожде́ніе Бо́гу па́че всего́ предъизбра́вый. Ра́дуйся, кро́ткій послѣ́дователю Христо́въ; ра́дуйся, живы́й о́бразе ева́нгельскаго самоотверже́нія. Ра́дуйся, воздержа́нія пра́вило извѣ́стное; ра́дуйся, я́ко отъ ю́ности навы́кнувый поще́нію. Ра́дуйся, всего́ мíра кра́сная, зна́тность ро́да и по́чести мірскíя Христа́ ра́ди ни во что́ вмѣни́вый; ра́дуйся, то́кмо добродѣ́тельное по Бо́зѣ житіе́ возлюби́вый. Ра́дуйся, и на́съ земны́я ра́дости презира́ти науча́яй; ра́дуйся, къ го́рнему умы́ и сердца́ на́ша направля́яй.

Ра́дуйся, Варлаа́ме, вели́кій и пресла́вный чудотво́рче.

Конда́къ 3

Си́ла Вы́шняго измла́да вложи́ въ се́рдце твое́, преподо́бне о́тче на́шъ Варлаа́ме, къ и́ноческому житію́ ре́вность, е́юже руководи́мь по сме́рти роди́телей твои́хъ, оста́вилъ еси́ до́мъ и́хъ, и во все́мъ упова́ніе возложи́въ на Го́спода, оби́тели Пресвяты́я Богоро́дицы дости́глъ еси́, идѣ́же и водвори́лся еси́ съ рабо́тающими Бо́гу во и́ноческомъ житіи́, непреста́нно вопія́ Ему́ а́нгельскую пѣ́снь: Аллилу́ія.

Икосъ 3

Имѣ́я непреодоли́мое жела́ніе и́го Христо́во на себе́ прія́ти и во слѣ́дъ Христу́ поити́, въ послуша́ніе отцу́ твоему́ духо́вному преда́лся еси́ все́ю душе́ю и всѣ́мъ се́рдцемъ. Се́й же, проразумѣва́я въ тебѣ́ сосу́дъ избра́нный Свято́му Ду́ху, облече́ тя во а́нгельскій о́бразъ и нарече́ и́мя ти́ Варлаа́мъ. Ты́ же вся́ добродѣ́тели, подоба́ющія и́нокомъ, соверши́лъ еси́, и въ новонача́ліи свое́мъ соверше́нъ бы́ти и́нокъ и до́бръ подви́жникъ показа́лся еси́. Сего́ ра́ди изъ глубины́ серде́цъ вопіе́мъ ти́ такова́я:

Ра́дуйся, и́ноческаго житія́ ско́рби и тѣсноту́ возлюби́вый; ра́дуйся, сожи́тельство и собесѣ́дничество съ преподо́бными избра́вый. Ра́дуйся, вѣ́рою, любо́вію и упова́ніемъ спасе́нія испо́лненный; ра́дуйся, обѣ́томъ дѣ́вства чистоту́ се́рдца яви́вый. Ра́дуйся, обѣ́томъ нестяжа́нія высоту́ ду́ха показа́вый; ра́дуйся, обѣ́томъ послуша́нія всесоверше́нное служе́ніе свое́ еди́ному Бо́гу утверди́вый. Ра́дуйся, житію́ и по́двигомъ дре́внихъ преподо́бныхъ оте́цъ поревнова́вый; ра́дуйся, въ труды́ и послуша́ніе отцу́ своему́ духо́вному преда́тися усе́рдно восхотѣ́вый. Ра́дуйся, иску́съ долготерпѣ́нія благоуспѣ́шно проше́дый; ра́дуйся, вся́кое послуша́ніе со смире́ніемъ и кро́тостію соверши́вый. Ра́дуйся, благочи́нія монасты́рскаго вѣ́рный храни́телю; ра́дуйся, равноа́нгельнаго житія́ стро́гій ревни́телю.

Ра́дуйся, Варлаа́ме, вели́кій и пресла́вный чудотво́рче.

Конда́къ 4

Бу́рю мірска́го житія́ и во́лны страсте́й преше́дъ, богому́дре о́тче Варлаа́ме, обрѣ́лъ еси́ ти́хое приста́нище во оби́тели Пресвяты́я Богоро́дицы, идѣ́же и всели́вся, нелѣ́ностно порабо́талъ еси́ Христу́ во мно́зѣ долготерпѣ́ніи, со вся́кимъ воздержа́ніемъ смиря́я свою́ ду́шу, тѣ́ло же свое́ труды́ и по́двиги утомля́я, я́ко все́й бра́тіи зѣло́ удивля́тися вели́кому твоему́ смире́нію и послуша́нію, и прославля́ти о тебѣ́ Бо́га, вопію́ще Ему́: Аллилу́ія.

Икосъ 4

Слы́шавъ похваля́ема тя́ бы́ти во оби́тели отъ человѣ́къ, превозноше́нія су́етнаго убоя́лся еси́, о́тче преподо́бне, и те́плѣ моли́лся еси́ ко Го́споду, да сподо́битъ тя́ въ пусты́нномъ безмо́лвіи Ему́ служи́ти. Тѣ́мже, я́ко ища́й сла́вы еди́наго Бо́га, прише́лъ еси́ на го́ру Ху́тынскую, свы́ше тебѣ́ луче́мъ Боже́ственнаго свѣ́та ука́занную, да та́мо въ ми́рѣ еди́ному Го́споду рабо́таеши. Мы́ же, дивя́щеся пречу́дному сему́ указа́нію, ра́достно зове́мъ ти́ такова́я:

Ра́дуйся, презрѣ́вый сла́ву человѣ́ческую, я́ко су́етную; ра́дуйся, воспрія́вый свято́е смире́ніе Іису́сово. Ра́дуйся, благода́тію Бо́жіею води́мый, я́ко еди́нъ отъ дре́внихъ патріа́рховъ; ра́дуйся, освяти́вый го́ру Ху́тынскую твои́мъ прише́ствіемъ. Ра́дуйся, лу́чь о́гненъ ви́дѣвый на не́й; ра́дуйся, чрезъ сіе́ прія́вый отъ Го́спода благо́е извѣще́ніе о мѣ́стѣ поко́я твоего́. Ра́дуйся, зри́телю Боже́ственныхъ видѣ́ній; ра́дуйся, усе́рдный исполни́телю Бо́жіихъ велѣ́ній. Ра́дуйся, го́рлице пустыннолюби́вая, Ху́тынскую де́брь огласи́вшая пѣ́ніемъ сла́вы Бо́жія; ра́дуйся, кри́не, благоуха́ющій въ пусты́ни. Ра́дуйся, моли́твъ благово́нное кади́ло; ра́дуйся, псалмопѣ́нія орга́не изя́щный.

Ра́дуйся, Варлаа́ме, вели́кій и пресла́вный чудотво́рче.

Конда́къ 5

Боготе́чною звѣздо́ю преше́дъ на го́ру Ху́тынскую, блиста́я и́ноческими по́двиги твои́ми, преподо́бне о́тче Варлаа́ме, ди́внаго видѣ́нія сподо́бился еси́, егда́ узрѣ́въ лу́чь Боже́ственнаго свѣ́та, указа́вшій тебѣ́ мѣ́сто по́двиговъ твои́хъ, зѣло́ умили́лся еси́ въ се́рдцѣ твое́мъ, сла́вя Бо́га и воспѣва́я Ему́: Аллилу́ія.

Икосъ 5

Спасти́ хотя́й ду́шу твою́, уго́дниче Бо́жій, а́ще и всемѣ́рно бѣ́галъ еси́ сла́вы, я́же отъ человѣ́къ, вѣ́рно оба́че сло́во Го́спода, я́ко не мо́жетъ гра́дъ укры́тися верху́ горы́ стоя́. Та́ко бо и о твое́мъ пусты́нномъ по́двизѣ увѣ́дѣша вели́каго Новагра́да лю́діе, и нача́ша благоговѣ́йно приходи́ти къ тебѣ́, прося́ у тебе́ моли́твъ, душеполе́зныхъ наставле́ній и благослове́нія. Ты́ же, всѣ́хъ съ любо́вію пріе́мля, поуча́лъ еси́ отъ Боже́ственнаго Писа́нія, е́же твори́ти за́повѣди Госпо́дни и имѣ́ти любо́вь нелицемѣ́рну. Мы́ же, ублажа́юще тя́, вопіе́мъ ти́ такова́я:

Ра́дуйся, гра́де, верху́ горы́ стоя́й и не могíй укры́тися; ра́дуйся, свѣти́льниче, Боже́ственнымъ пла́менемъ возже́нный. Ра́дуйся, огневи́дный сто́лпе, наставля́яй на пу́ть спасе́нія; ра́дуйся, лучеза́рный свѣти́льниче, вѣ́рныя просвѣща́яй. Ра́дуйся, цвѣ́те духо́вный, благода́тію привлека́яй взо́ры душе́вныя къ тебѣ́ приходя́щихъ; ра́дуйся, пчело́ трудолюби́вая, со́ты добродѣ́телей въ насыще́ніе а́лчущихъ съ собо́ю нося́щая. Ра́дуйся, грѣ́шныя на пу́ть спасе́нія направля́яй; ра́дуйся, скорбя́щія сла́достію слове́съ твои́хъ утѣша́яй. Ра́дуйся, ю́ныя наставля́яй; ра́дуйся, ста́рыя не сло́вомъ то́чію, па́че житіе́мъ укрѣпля́яй. Ра́дуйся, притека́ющимъ къ тебѣ́ те́плый моли́твенниче и боговѣща́нный учи́телю; ра́дуйся, и на́съ всѣ́хъ, обремене́нныхъ грѣхи́ мно́гими, въ любви́ дру́гъ ко дру́гу ди́вный наста́вниче.

Ра́дуйся, Варлаа́ме, вели́кій и пресла́вный чудотво́рче.

Конда́къ 6

Проповѣ́дника терпѣ́нія, му́жества и кро́тости зри́мъ тя́, богому́дре о́тче Варлаа́ме, во всѣ́хъ озлобле́ніихъ, я́же творя́ху ти́ ду́си зло́бы: сíи бо иногда́ во о́бразѣ звѣре́й ди́віихъ, иногда́ во о́бразѣ змíй ядови́тыхъ явля́хуся къ тебѣ́ и устраша́ху, понужда́я тя́ отъити́ отъ мѣ́ста того́. Ты́ же вѣ́рою и кре́стнаго зна́менія си́лою вся́ ко́зни и́хъ сла́вно побѣди́лъ еси́ и змíевъ ядови́тыхъ отъ оби́тели твоея́ навсегда́ дале́че отгна́лъ еси́. Сего́ ра́ди мы́, прославля́юще о тебѣ́ Го́спода, во умиле́ніи благода́рственно вопіе́мъ Ему́: Аллилу́ія.

Икосъ 6

Возсія́въ отъ вели́каго Новагра́да, о́тче на́шъ Варлаа́ме, просвѣти́лъ еси́ чу́днымъ житіе́мъ твои́мъ го́ру Ху́тынскую, на не́йже и оби́тель и́нокомъ во спасе́ніе Бо́жіимъ изволе́ніемъ устро́илъ еси́, и це́рковь во и́мя Преображе́нія Госпо́дня созда́лъ еси́, и свяще́нства благода́ть воспрія́ти чрезъ святи́теля Бо́жія и игу́меномъ созда́нныя тобо́ю оби́тели отъ него́ нарещи́ся не уклони́лся еси́, а́ще и тужа́ше ду́хъ тво́й, ужаса́яся высоты́ сея́. Мы́ же, прославля́юще тя́, любо́вію вопіе́мъ ти́:

Ра́дуйся, во удале́ніи отъ мíра су́етнаго пусты́нную оби́тель ра́ди и́щущихъ спасе́нія до́брѣ основа́вый; ра́дуйся, водвори́вшимся въ не́й вели́кій учи́телю и богому́дрый наста́вниче. Ра́дуйся, благоговѣ́йный олтаря́ Госпо́дня служи́телю, о вѣ́рныхъ моля́йся; ра́дуйся, со мно́гимъ дерзнове́ніемъ о на́съ недосто́йныхъ ко Го́споду предста́тельствующій. Ра́дуйся, та́инъ Бо́жіихъ и́стинный строи́телю; ра́дуйся, слове́снаго ста́да твоего́ до́брый па́стырю. Ра́дуйся, предводи́телю богому́дрый въ пути́ спасе́нія; ра́дуйся, вождю́ до́блій, мно́гихъ приведы́й ко спасе́нію. Ра́дуйся, святы́я во́ли Бо́жія исполни́телю; ра́дуйся, оте́ческихъ преда́ній усе́рдный храни́телю. Ра́дуйся, и́ноковъ благочести́выхъ похвало́ и украше́ніе; ра́дуйся, и о на́съ грѣ́шныхъ Судіи́ Пра́веднаго умоле́ніе.

Ра́дуйся, Варлаа́ме, вели́кій и пресла́вный чудотво́рче.

Конда́къ 7

Хотя́щу ти́ угоди́ти еди́ному Го́споду, богоно́сне о́тче Варлаа́ме, ве́сь вда́лся еси́ безмѣ́рнымъ по́двигомъ и глубинѣ́ смире́нія. Труды́ же твоя́, и моли́твы, и поще́нія ко́е сло́во изглаго́лати мо́жетъ? Вѣ́мы то́кмо, я́ко вери́гами тя́жкими и власяни́цею обле́клся еси́, претерпѣва́я болѣ́зни любве́ ра́ди Бо́жія. Сего́ ра́ди Человѣколю́бецъ Госпо́дь, ви́дя смире́ніе твое́, возвели́чи тя́ благода́тію чудотворе́ній, Его́же благодаря́ще, вопіе́мъ Ему́ ку́пно съ тобо́ю: Аллилу́ія.

Икосъ 7

Ди́вное и пресла́вное чу́до показа́ тобо́ю на земли́ всѣ́хъ чуде́съ Творе́цъ и Влады́ка, егда́ премѣни́шася естества́ уста́вы: среди́ бо лѣ́та мра́зъ си́ленъ и снѣ́гъ глубо́къ яви́стася въ предѣ́лѣхъ Новагра́да, е́же ты́ предре́клъ еси́ о́ному святи́телю. Святи́тель Бо́жій и лю́діе Новагра́да смути́шася тогда́ зѣло́, боя́хубося, я́ко гла́дъ ве́лій наста́нетъ въ странѣ́ и́хъ. Егда́ же услы́шаша отъ тебе́ изволе́ніе Бо́жіе, явле́нное въ ви́димомъ и благо́е промышле́ніе о лю́дехъ Свои́хъ, ра́дости испо́лнишася и возблагодари́ша Бо́га, ди́внаго во святы́хъ Свои́хъ. Мы́ же, дивя́щеся си́лѣ Бо́жіей, обита́ющей въ тебѣ́ и, помина́юще ско́рое твое́ заступле́ніе, со умиле́ніемъ покланя́емся тебѣ́, я́ко ве́ліе дерзнове́ніе иму́щему предъ Го́сподемъ и благода́рственно вопіе́мъ:

Ра́дуйся, въ мíрѣ премíрнымъ яви́выйся; ра́дуйся, страну́ Новгоро́дскую удиви́вый чудесы́. Ра́дуйся, и́мже о си́лѣ Бо́жіей естества́ уста́вы премѣни́шася; ра́дуйся, и́мже лю́діе Новагра́да отъ гла́да изба́вишася. Ра́дуйся, дѣ́лателю чуде́съ пресла́вныхъ; ра́дуйся, хода́таю и пода́телю дарова́ній многообра́зныхъ. Ра́дуйся, мно́гія отъ тя́жкихъ напа́стей и скорбе́й изба́вивый; ра́дуйся, ско́рый помо́щниче всѣ́хъ, въ бѣда́хъ су́щихъ. Ра́дуйся, Новагра́да красото́ и утвержде́ніе; ра́дуйся, горы́ Ху́тынскія сла́во и похвале́ніе. Ра́дуйся, промышле́нія о лю́дехъ благо́е прія́телище; ра́дуйся, и на́съ грѣ́шныхъ, прибѣга́ющихъ подъ кро́въ тво́й, неусы́пный засту́пниче.

Ра́дуйся, Варлаа́ме, вели́кій и пресла́вный чудотво́рче.

Конда́къ 8

Неистощи́мый исто́чникъ вели́кихъ чуде́съ яви́лся еси́, достосла́вне о́тче на́шъ Варлаа́ме: прія́лъ бо еси́, еще́ въ мíрѣ се́мъ живя́, да́ръ отъ Бо́га не то́кмо неду́ги исцѣля́ти, но и ме́ртвыя воскреша́ти, я́коже воскреси́лъ еси́ моли́твою о́наго о́трока; и бу́дущая прорица́ти, я́коже предре́клъ еси́ кня́зю Новогра́дскому о рожде́ніи ему́ сы́на. По сме́рти же наипа́че просла́ви тя́ Бо́гъ мно́гими чудотворе́ніи, да вси́ чудотворя́щему тобо́ю Бо́гу вопіе́мъ: Аллилу́ія.

Икосъ 8

Ве́сь еси́ съ вѣ́рою къ тебѣ́ притека́ющимъ вои́стинну помо́щникъ вели́кій, уго́дниче Бо́жій Варлаа́ме, не то́чію прибѣга́ющимъ къ цѣльбоно́снымъ моще́мъ твои́мъ, но и дале́че отстоя́щимъ и призыва́ющимъ всечестно́е и́мя твое́. Тѣ́мже во умиле́ніи зове́мъ ти́, я́ко вои́стину досто́йному благохвале́ній:

Ра́дуйся, утѣше́ніе, скорбя́ми жите́йскими утѣсне́нныхъ; ра́дуйся, весе́ліе, въ печа́лехъ су́щихъ. Ра́дуйся, злостра́ждущихъ отъ духо́въ зло́бы ско́рый помо́щниче и изба́вителю; ра́дуйся, я́ко никто́же съ вѣ́рою притека́яй, то́щь отхо́дитъ отъ тебе́. Ра́дуйся, я́ко су́щимъ въ пучи́нѣ скорбе́й до́бръ обрѣта́ешися ко́рмчій; ра́дуйся, я́ко ми́лостивый при жи́зни, благотвори́ши всѣ́мъ тре́бующимъ и по сме́рти. Ра́дуйся, пла́вающихъ ле́гкое по вода́мъ прехожде́ніе; ра́дуйся, путьше́ствующихъ до́брый путеводи́телю. Ра́дуйся, си́льный вдови́цъ покрови́телю; ра́дуйся, сиро́тъ милосе́рдый и благопопечи́тельный храни́телю. Ра́дуйся, а́лчущихъ любвеоби́льный пита́телю; ра́дуйся, всѣ́хъ безпо́мощныхъ вѣ́рный предъ Го́сподемъ хода́таю.

Ра́дуйся, Варлаа́ме, вели́кій и пресла́вный чудотво́рче.

Конда́къ 9

Вся́кія ско́рби и труды́ до́бльственно претерпѣ́лъ еси́, о́тче на́шъ Варлаа́ме, ше́ствуя по пути́ спасе́нія до масти́тыя ста́рости. Скончава́я же тече́ніе вре́менныя жи́зни сея́, всѣ́хъ поуча́лъ еси́ исполне́ніемъ во́ли Бо́жіей благоугожда́ти Го́сподеви. Мы́ же грѣ́шніи, и́щуще съ вѣ́рою твоего́ заступле́нія и, припа́дающе къ тебѣ́, я́ко отцу́ благосе́рдому, смире́нно мо́лимъ тя́: бу́ди на́мъ покро́въ и защище́ніе въ де́нь кончи́ны на́шея, да не осужде́нно предста́немъ престо́лу Судіи́ всѣ́хъ, и вопіе́мъ Ему́ съ тобо́ю и со всѣ́ми небе́сными си́лами а́нгельскую пѣ́снь: Аллилу́ія.

Икосъ 9

Вѣтíйствующій язы́къ недоумѣ́етъ досто́йно воспѣ́ти твоя́ по́двиги и труды́, благíй ра́бе Бо́жій, я́же поне́слъ еси́ любве́ ра́ди и спасе́нія ду́шъ при́сныхъ твои́хъ: яви́лся бо еси́ проповѣ́дникъ воздержа́нія и терпѣ́нія и́нокомъ пустыннолюби́вымъ и всѣ́мъ учи́тель му́дрый, наставля́яй на пу́ть спасе́нія. Мы́ же, чудя́щеся высотѣ́ и си́лѣ твоея́ добродѣ́тели, зане́ ви́димъ плоды́ ея́ въ твои́хъ ученика́хъ и сподви́жникахъ, Анто́ніи, Ксенофо́нтѣ, Косьмѣ́ и Константи́нѣ, уже́ просла́вленныхъ вмѣ́стѣ съ тобо́ю во Ца́рствіи Отца́ Небе́снаго, любо́вію прославля́емъ тя́ си́це:

Ра́дуйся, трудолю́бче, тече́ніе жи́зни твоея́ въ вели́кихъ по́двигахъ соверши́вый; ра́дуйся, терпѣ́нію Христо́ву вѣ́рно подража́вый. Ра́дуйся, свѣ́томъ добродѣ́телей твои́хъ Бо́га просла́вивый; ра́дуйся, сѣ́мя до́брое, на земли́ бла́зѣ посѣ́янное и стори́чный пло́дъ прине́сшее. Ра́дуйся, свѣти́ло благоче́стія немерца́ющее; ра́дуйся, звѣздо́, ко спасе́нію пу́ть вѣ́рный показу́ющая. Ра́дуйся, не сло́вомъ то́чію, но па́че житіе́мъ поуча́яй; ра́дуйся, и́нокомъ пу́ть и́стинный ко спасе́нію показа́вый. Ра́дуйся, по́стничества и терпѣ́нія о́бразъ преди́вный; ра́дуйся, воздержа́нія учи́телю. Ра́дуйся, за́повѣдей Христо́выхъ вѣ́рный исполни́телю; ра́дуйся, и всѣ́хъ на́съ въ любви́ къ при́снымъ ди́вный наста́вниче.

Ра́дуйся, Варлаа́ме, вели́кій и пресла́вный чудотво́рче.

Конда́къ 10

Спасти́ хотя́й ду́ши учени́къ твои́хъ, преподо́бне о́тче Варлаа́ме, и проразумѣ́вый, е́же къ Бо́гу твое́ отше́ствіе, призва́лъ еси́ всю́ бра́тію твою́ и, я́ко оте́цъ чадолюби́вый, наставля́я и́хъ, предре́клъ еси́ о бы́ти имѣ́ющемъ по блаже́ннѣй кончи́нѣ твое́й прославле́ніи оби́тели твоея́, а́ще любо́вь соблюду́тъ дру́гъ ко дру́гу. Ны́нѣ же, по предрече́нію твоему́, исполня́емая зря́ще, въ ра́дости ку́пно съ тобо́ю вопіе́мъ Го́споду и Бо́гу благода́рственную пѣ́снь: Аллилу́ія.

Икосъ 10

Царя́ Небе́снаго возлюби́въ всѣ́мъ се́рдцемъ твои́мъ, и все́ю душе́ю твое́ю, и все́ю мы́слію твое́ю, до конца́ жи́зни твоея́ въ терпѣ́ніи и по́двизѣ неосла́бно пребы́лъ еси́ и, егда́ дости́гнувъ въ мѣ́ру во́зраста и въ му́жа соверше́нна, позна́лъ приближе́ніе вре́мени, ну́жнаго человѣ́ку измѣне́нія, во е́же тлѣ́нному наслѣ́довати обѣтова́нное безсме́ртіе, тогда́ завѣща́лъ еси́ ученико́мъ твои́мъ вся́ потре́бная ко спасе́нію, наста́вника же въ себе́ мѣ́сто Анто́нія, сподви́жника твоего́, оста́вилъ еси́, ему́же и оби́тель святу́ю вручи́лъ еси́, и бра́тію; та́же благослови́въ всѣ́хъ, пре́далъ еси́ святу́ю ду́шу твою́ въ ру́цѣ Бо́жіи. Мы́ же, помина́юще сія́, изъ глубины́ серде́цъ вопіе́мъ ти́ такова́я:

Ра́дуйся, и́скреннюю любо́вь къ Бо́гу въ душѣ́ и се́рдцѣ непреста́нно имѣ́вый; ра́дуйся, то́юже любо́вію къ духо́внымъ ча́дамъ твои́мъ при отше́ствіи преиспо́лненный. Ра́дуйся, стра́хъ Бо́жій въ се́рдцѣ вы́ну сохрани́вый; ра́дуйся, еди́ному Го́споду до конца́ послужи́вый. Ра́дуйся, благоче́стно тече́ніе вре́менныя жи́зни сконча́вый; ра́дуйся, кончи́ну свою́ предувѣ́дѣвый. Ра́дуйся, я́ко съ тве́рдымъ надѣ́яніемъ бла́гъ вѣ́чныхъ преста́вился еси́ къ Бо́гу; ра́дуйся, я́ко Ца́рь ца́рствующихъ прія́тъ тя́ въ небе́сное Ца́рствіе. Ра́дуйся, я́ко свя́тостію житія́ ми́лость Бо́жію обрѣ́лъ еси́; ра́дуйся, ра́бе благíй и вѣ́рный, вше́дый въ ра́дость Го́спода твоего́. Ра́дуйся, я́ко отъ оби́тели земны́я въ оби́тель небе́сную пресели́лся еси́; ра́дуйся, я́ко съ небе́сныхъ высо́тъ на мольбы́ на́ша ми́лостивно призира́еши.

Ра́дуйся, Варлаа́ме, вели́кій и пресла́вный чудотво́рче.

Конда́къ 11

Пѣ́ніе погреба́льное слеза́ми растворя́шеся у гро́ба твоего́, досточу́дне о́тче Варлаа́ме, мно́жества же ра́ди свѣще́й и благово́нія кади́льнаго, свѣ́тлымъ торжество́мъ явля́шеся погребе́ніе твое́, и мно́зи тогда́ неду́жніи получи́ша исцѣле́ніе прикоснове́ніемъ ко святы́мъ моще́мъ твои́мъ, ра́дующеся и благода́рственно взыва́юще къ чудотворя́щему тобо́ю Бо́гу: Аллилу́ія.

Икосъ 11

Свѣтоза́рное свѣти́ло, на Ху́тынской горѣ́ возсія́вшее, и по честнѣ́мъ успе́ніи твое́мъ зри́мъ тя́, богому́дре о́тче Варлаа́ме, зане́ и ны́нѣ свѣти́ши на́мъ зна́меніи и чудесы́, отъ святы́хъ моще́й твои́хъ истека́ющими, я́же изволе́ніемъ Бо́жіимъ земля́ яви́ святи́телю Евѳи́мію и бы́вшимъ во хра́мѣ съ ни́мъ игу́мену Тара́сію, иподіа́кону же Іоа́нну, я́ко многоцѣ́нное и благода́ти испо́лненное сокро́вище. Тѣ́мже и мы́, благода́рственная Бо́гу принося́ о тебѣ́ пѣ́нія, взыва́емъ къ тебѣ́ си́це:

Ра́дуйся, нетлѣ́ніемъ моще́й твои́хъ сла́вно отъ Бо́га возвели́ченный; ра́дуйся, отъ моще́й твои́хъ исцѣле́нія неду́говъ благода́тію Бо́жіей источа́яй. Ра́дуйся, ча́ше, излива́ющая то́ки милосе́рдія Бо́жія; ра́дуйся, чуде́съ пучи́но, свы́ше излія́нная. Ра́дуйся, пре́жде сме́рти яви́вый ди́вная; ра́дуйся, и по успе́ніи соверша́яй чу́дная. Ра́дуйся, я́ко и по сме́рти жи́въ пребыва́еши, явля́я въ себѣ́ си́лы Боже́ственныя; ра́дуйся, я́ко моли́твенно тя́ призыва́ющія ско́ро посѣща́еши. Ра́дуйся, немощны́хъ цѣли́телю; ра́дуйся, ско́рбныхъ утѣ́шителю. Ра́дуйся, я́ко и по преставле́ніи твое́мъ при́сно съ на́ми пребыва́еши; ра́дуйся, я́ко и живя́ въ селе́ніихъ ра́йскихъ, на́съ не оставля́еши.

Ра́дуйся, Варлаа́ме, вели́кій и пресла́вный чудотво́рче.

Конда́къ 12

Хотя́ сокрове́нную та́йну яви́ти, показа́лъ еси́ ди́вная боголюби́вому му́жу Тара́сію о поги́бели и потопле́ніи вели́каго Новагра́да. Оба́че са́мъ же ты́ и вели́кій покро́въ гра́ду бы́лъ еси́, и гнѣ́въ Бо́жій моли́твами твои́ми умягчи́лъ еси́, и гра́дъ тво́й отъ ка́зни изба́вилъ еси́. Тогда́ вси́ лю́діе, ви́дѣвше тя́ ко Го́споду пречу́днаго хода́тая, вопія́ху къ Бо́гу: Аллилу́ія.

Икосъ 12

Ди́венъ показа́лся еси́ ученико́мъ твои́мъ, егда́ еди́наго отъ осужде́нныхъ, никому́ же тя́ моля́щу, отъ ка́зни сме́ртныя свободи́лъ еси́, друга́го же, и мно́гимъ тя́ о не́мъ прося́щимъ, отъ сме́рти изба́вити не восхотѣ́лъ еси́. Мы́ же не дерза́емъ испы́тывати сокрове́нная суде́бъ Бо́жіихъ та́йны, но со стра́хомъ къ тебѣ́ взыва́емъ:

Ра́дуйся, таи́нниче вели́кій Бо́жія благода́ти; ра́дуйся, защи́тниче отъ бѣ́дъ и сме́рти непови́нныя. Ра́дуйся, свяще́нный у́ме, постига́яй Боже́ственныя та́йны; ра́дуйся, ра́зуме, просвѣще́нный свѣ́томъ го́рнія сла́вы. Ра́дуйся, ду́ше, освяще́нный благода́тію Бо́жіею; ра́дуйся, се́рдцемъ очи́щеннымъ зря́й непостижи́мыя Бо́жія судьбы́. Ра́дуйся, вну́тренняя се́рдца испыту́яй; ра́дуйся, прозрѣва́яй сокрове́нныя мы́сли. Ра́дуйся, свѣ́тлый у́ме, озаре́нный невече́рнимъ Свѣ́томъ; ра́дуйся, чи́стый душе́ю, просвѣтле́нный Со́лнцемъ пра́вды.

Ра́дуйся, Варлаа́ме, вели́кій и пресла́вный чудотво́рче.

Конда́къ 13

О, вели́кій и пречу́дный о́тче на́шъ Варлаа́ме! Къ тебѣ́ припа́дая со умиле́ніемъ, мо́лимъ: пріими́ сіе́ ма́лое хвале́бное пѣ́ніе на́ше и богопрія́тнымъ твои́мъ хода́тайствомъ испроси́ на́мъ отъ Христа́, ми́лостиваго Бо́га на́шего, проще́ніе прегрѣше́ній на́шихъ, дарова́ніе на́мъ грѣ́шнымъ христіа́нскія кончи́ны живота́ на́шего и Ца́рствія небе́снаго наслѣ́діе, да сподо́бимся съ тобо́ю и со всѣ́ми святы́ми во вѣ́ки воспѣва́ти Бо́гу и Спаси́телю на́шему: Аллилу́ія.

Се́й конда́къ глаго́лется три́жды. Та́же Икосъ 1-й и Конда́къ 1-й

Моли́тва преподо́бному Варлаа́му Ху́тынскому

О, преподо́бне и богоно́сне о́тче на́шъ Варлаа́ме! Услы́ши на́съ, моля́щихся тебѣ́, и бу́ди на́мъ помо́щникъ въ ско́рбехъ на́шихъ, и изба́ви на́съ отъ напа́стей, за мно́жество прегрѣше́ній находя́щихъ на ны́, умоли́, уго́дниче Христо́въ, всеблага́го Бо́га дарова́ти на́мъ оставле́ніе всѣ́хъ, отъ ю́ности на́шея до настоя́щаго дне́ и часа́, дѣ́ломъ, сло́вомъ, помышле́ніемъ и всѣ́ми чу́вствы содѣ́янныхъ на́ми согрѣше́ній, исходата́йствуй на́мъ невозбра́нный вхо́дъ въ небе́сное Ца́рствіе, да прославля́емъ непреста́нно сла́вимую отъ а́нгелъ Всесвяту́ю Тро́ицу, Отца́ и Сы́на и Свята́го Ду́ха, и твое́ ми́лостивное предста́тельство въ безконе́чныя вѣ́ки, ами́нь.

Тропа́рь, гла́съ 3

Иже на земли́ лега́ніемъ, поще́ніемъ же и бдѣ́ніемъ тѣ́ло твое́ изнуря́я, преподо́бне, вся́ плотска́я мудрова́нія умертви́лъ еси́, и исцѣле́ній струя́ незави́стная яви́лся еси́ вѣ́рою притека́ющимъ къ ра́цѣ моще́й твои́хъ, Варлаа́ме о́тче на́шъ, моли́ Христа́ Бо́га спасти́ся душа́мъ на́шимъ.

Конда́къ, гла́съ 8

Якоже другíй Илія́, о́тче, до́ждь съ небесе́ све́лъ еси́: о́нъ у́бо о́гнь сведе́ и царя́ удиви́, ты́ же лю́ди твоя́ возвесели́лъ еси́ и торжествова́ти устро́илъ еси́. Вели́кій бо Но́вградъ вельми́ тобо́ю хва́лится, имѣ́я мо́щи твоя́ въ себѣ́, его́же сохраня́й отъ вра́гъ непоколеби́ма, да зове́мъ ти́: ра́дуйся, преподо́бне Варлаа́ме, о́тче на́шъ.

Велича́ніе

Ублажа́емъ тя́, преподо́бне о́тче Варлаа́ме, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.