Конда́къ 1
Избра́нный воево́до, Бо́гомъ вруче́ннаго тебѣ́ полка́ во́иновъ духо́вныхъ, и преди́вный въ чудесѣ́хъ, преподо́бне о́тче на́шъ Корни́ліе! Восхваля́емъ по́двиги твоя́ въ пѣ́снехъ хвале́бныхъ, и мо́лимъ ти ся прилѣ́жно: я́ко имѣ́яй дерзнове́ніе ко Го́споду, моли́ся вы́ну о спасе́ніи на́съ, грѣ́шныхъ, и моли́твами твои́ми богопрія́тными, отъ вся́кихъ на́съ бѣ́дъ, вре́менныхъ и вѣ́чныхъ, свободи́, да зове́мъ ти́:
Ра́дуйся, Корни́ліе, вели́кій чудотво́рче.
Икосъ 1
Ангела земна́го и человѣ́ка небе́снаго, яви́ на́мъ тебе́ всея́ тва́ри Зижди́тель, преподо́бне о́тче Корни́ліе: прови́дѣвъ бо благопло́діе души́ твоея́, отъ ю́ныхъ лѣ́тъ избра́ тя служи́ти Ему́ въ преподо́біи и чистотѣ́, на́мъ же, чту́щимъ тя́, внуша́етъ вопи́ти къ тебѣ́:
Ра́дуйся, благоро́дныхъ роди́телей сы́не боголюбе́зный; ра́дуйся, благочести́выя четы́ прозябе́ніе благода́тное. Ра́дуйся, отъ младе́нчества на слу́жбу Бо́гови освяще́нный; ра́дуйся, отъ ю́ности на по́двиги духо́вныя предъизбра́нный. Ра́дуйся, свѣ́тлость са́на боля́рскаго Христа́ ра́ди презрѣ́вый; ра́дуйся, служи́ти Царю́ Небе́сному преи́скреннѣ восхотѣ́вый. Ра́дуйся, сего́ ра́ди слу́жбу царю́ земно́му оста́вивый; ра́дуйся, на по́двиги поста́ и моли́твы ре́вностно потекíй. Ра́дуйся, въ оби́тели преподо́бнаго Кири́лла во и́ночество постриже́нный; ра́дуйся, въ послуша́ніи ста́рцу твоему́ зѣло́ преуспѣ́вый. Ра́дуйся, труды́ вели́кія въ хлѣ́бнѣ нелѣ́ностно соверши́вый; ра́дуйся, вери́ги тя́жкія на тѣ́лѣ твое́мъ носи́вый.
Ра́дуйся, Корни́ліе, вели́кій чудотво́рче.
Конда́къ 2
Ви́дѣвъ Госпо́дь твоя́ по́двиги, бдѣ́нія, сухояде́нія и моли́твы, преподо́бне о́тче, осѣни́ тя свы́ше Боже́ственною благода́тію, и дарова́ ти си́лу и крѣ́пость, труди́тися въ послуша́ніихъ монасты́рскихъ сугу́бо проти́ву други́хъ бра́тій, и́хже не́мощи съ любо́вію носи́лъ еси́, и уро́ки и́мъ да́нные въ рабо́тахъ за ни́хъ исполня́лъ еси́, но́щи же въ моли́твахъ колѣнопреклоне́нныхъ провожда́лъ еси́, зовы́й немо́лчно Христу́ Бо́гу: Аллилу́ія.
Икосъ 2
Ра́зумъ духо́вный тебѣ́ свы́ше дарова́ Бо́гъ, досточу́дне о́тче, и́мже до́брѣ разсужда́лъ еси́, что́ е́сть во́ля Бо́жія и что́ во́ля человѣ́ческая; пе́рвѣй у́бо всецѣ́ло повину́лъ еси́, вторы́я же вся́чески избѣга́лъ еси́ послу́шати, и бы́лъ еси́ и́стинный уго́дникъ Бо́жій, досто́йный неле́стныхъ похва́лъ таковы́хъ:
Ра́дуйся, чудото́чнаго дре́ва преподо́бнаго Кири́лла о́трасль благопло́дная; ра́дуйся, оби́тели его́ святы́я пито́миче Бо́гомъ просла́вленный. Ра́дуйся, и́ноче богоуго́дный, Бо́гу, а не человѣ́комъ угожда́вый; ра́дуйся, смире́ніемъ высо́кая стяжа́вый. Ра́дуйся, Писа́ній Боже́ственныхъ нелѣ́ностный изучи́телю; ра́дуйся, кни́гъ душеспаси́тельныхъ трудолю́бный списа́телю. Ра́дуйся, въ сниска́ніи му́дрости духо́вныя съ любо́вію подвиза́выйся; ра́дуйся, добродѣ́тели дре́внихъ богоно́сныхъ оте́цъ себѣ́ усво́ивый. Ра́дуйся, словеса́ и уче́нія и́хъ въ се́рдцѣ твое́мъ запечатлѣ́вый; ра́дуйся, я́ко пчела́ ме́дъ неги́блющій богому́дренно собира́вый. Ра́дуйся, бразду́ душе́вную до́брѣ воздѣ́лавый; ра́дуйся, слеза́ми моли́твенными ни́ву серде́чную уплодоноси́вый.
Ра́дуйся, Корни́ліе, вели́кій чудотво́рче.
Конда́къ 3
Си́лою Бо́жіею руководи́мый, оста́вилъ еси́, о́тче Корни́ліе, оби́тель, тебе́ духо́вно воспита́вшую, и я́ко му́жъ соверше́нъ, по́двигъ стра́нничества Бо́га ра́ди на ся́ воспрія́лъ еси́, оби́тели и́ноческія обходя́, и въ ни́хъ житію́ духо́вному поуча́яся, да возмо́жеши се́рдцемъ и усты́ благопрія́тно воспѣва́ти Бо́гу а́нгельскую пѣ́снь: Аллилу́ія.
Икосъ 3
Имѣ́я по́мыслъ чи́стъ и непоро́чную ду́шу, преподо́бне о́тче, вся́ до́брая и душеполе́зная, въ стра́нствіи твое́мъ ви́дѣнная и слы́шанная, слага́лъ еси́ въ се́рдцѣ твое́мъ, и тѣ́ми поуча́лся еси́ богоугожде́нію и́стинному, его́же ве́рхъ - свята́я любо́вь. Сію́ у́бо себѣ́ усво́ивъ па́че ины́хъ добродѣ́телей, вѣ́рный подража́тель Христо́въ бы́лъ еси́, и не́мощи не́мощныхъ любвеоби́льно носи́лъ еси́, во е́же всѣ́мъ зва́ти тебѣ́:
Ра́дуйся, богому́дрый стра́нниче; ра́дуйся, Христо́въ избра́нниче. Ра́дуйся, кра́сныя но́зѣ твои́ въ пу́ть спаси́тельный напра́вивый; ра́дуйся, стра́нствіе вои́стинну душеполе́зное соверши́вый. Ра́дуйся, отъ Новгоро́дскаго святи́теля Генна́дія любо́вію о Христѣ́ почте́нный; ра́дуйся, превозноше́нія человѣ́ческаго избѣга́вый. Ра́дуйся, въ пусты́ню отъ по́честей земны́хъ сокры́выйся; ра́дуйся, въ мѣста́ неудобопроходи́мая удали́выйся. Ра́дуйся, безмо́лвія люби́телю; ра́дуйся, смире́нія стяжа́телю. Ра́дуйся, кри́не пусты́ннаго прозябе́нія; ра́дуйся, ма́слина небе́снаго насажде́нія.
Ра́дуйся, Корни́ліе, вели́кій чудотво́рче.
Конда́къ 4
Бу́рю скорбе́й пусты́нныхъ му́жественно претерпѣ́лъ еси́, подви́жниче Бо́жій, и, преходя́ отъ мѣ́ста къ мѣ́сту, Коме́льскія пусты́ни дости́глъ еси́, идѣ́же въ обита́лищи разбо́йниковъ небоя́зненно всели́лся еси́, мѣ́сто, беззако́ніями оскверне́нное очи́стивъ и освяти́въ, на не́мже денноно́щно возноси́лъ еси́ хвалы́ Бо́гу, и пѣ́лъ еси́ Ему́ во умиле́ніи глубо́цѣмъ: Аллилу́ія.
Икосъ 4
Слы́шавше разбо́йницы твое́ и́мъ изобличе́ніе, и ви́дѣвше небоя́зненное му́жество души́ твоея́, я́ко преще́нія и́хъ не устраши́лся еси́, гото́въ сы́й сме́рть прія́ти отъ ру́къ и́хъ ра́достно, оста́виша тя́ въ поко́и, служи́ти Бо́гу на избра́нномъ ти́ мѣ́стѣ, идѣ́же ны́нѣ честву́емъ тя́, взыва́я тебѣ́ си́це:
Ра́дуйся, пусты́нниче, земны́хъ пристра́стій чу́ждый; ра́дуйся, по́стниче, умертви́вый стра́сти воздержа́ніемъ. Ра́дуйся, му́жество крѣ́пкое о Христѣ́ яви́вый; ра́дуйся, враги́ неви́димыя до конца́ побѣди́вый. Ра́дуйся, разбо́йническое жили́ще въ селе́ніе Бо́жіе претвори́вый; ра́дуйся, разбо́йниковъ преще́нія ни во что́же вмѣни́вый. Ра́дуйся, любо́вію зло́бу побѣди́вый; ра́дуйся, смире́ніемъ не́нависть укроти́вый. Ра́дуйся, разбо́йниковъ, огра́бившихъ тя́, вразуми́вый чуде́сно; ра́дуйся, кни́ги твоя́, и́ми похище́нныя, возврати́вый пресла́вно. Ра́дуйся, учи́телю благоче́стія; ра́дуйся, наста́вниче богому́дрія.
Ра́дуйся, Корни́ліе, вели́кій чудотво́рче.
Конда́къ 5
Боготе́чное свѣти́ло бы́въ, сія́ніемъ добродѣ́тельнаго житія́ твоего́ привле́клъ еси́ въ пусты́ню Коме́льскую пустыннолюби́выя и́ноки, сожи́тельствовати тебѣ́, преподо́бне о́тче. Ты́ же, по глаго́лу Христо́ву, гряду́щихъ къ тебѣ́ не изгоня́лъ еси́, но съ любо́вію принима́лъ еси́: и та́ко въ пусты́ни твое́й устро́ися оби́тель свята́я, въ не́йже и́ноковъ ли́къ, тобо́ю управля́емый, поя́ше Бо́гу хвале́бную пѣ́снь: Аллилу́ія.
Икосъ 5
Ви́дѣвше тя́ ученицы́ твои́ богоно́сна и равноа́нгельна житіе́мъ, возжела́ша сооруди́ти хра́мъ Бо́жій на мѣ́стѣ по́двиговъ твои́хъ пусты́нныхъ, преподо́бне о́тче, и́хже жела́ніе исполня́я, хра́мъ пе́рвый, во и́мя Богома́тере, въ пусты́ни твое́й постро́илъ еси́, свои́ма рука́ма въ дѣ́лѣ построе́нія его́ тружда́яся. Сія́ труды́ твоя́ воспомина́юще, свя́тче Бо́жій, прино́симъ ти́ пѣ́ніе таково́е:
Ра́дуйся, подви́жниче соверше́нный; ра́дуйся, трудолю́бче нелицемѣ́рный. Ра́дуйся, усе́рдный слуго́ Ма́тере Го́спода на́шего; ра́дуйся, во и́мя Ея́ свято́е хра́мъ Бо́жій въ оби́тели твое́й сооруди́вый. Ра́дуйся, Ея́ покро́ву благода́тному оби́тель твою́ препоручи́вый; ра́дуйся, помо́щницу Ю во все́мъ всегда́ имѣ́вый. Ра́дуйся, пусты́нный жи́телю, гра́ды и ве́си испо́лнивый сла́вою до́брыхъ дѣ́лъ твои́хъ; ра́дуйся, селе́ніе разбо́йниковъ напо́лнивый подви́жники благоче́стія. Ра́дуйся, пусты́ню въ гра́дъ претвори́вый; ра́дуйся, де́брь неудобопрохо́димую и́ноками насели́вый. Ра́дуйся, мно́ги ско́рби и біе́нія отъ разбо́йниковъ претерпѣ́вый; ра́дуйся, нищету́ духо́вную зѣло́ возлюби́вый.
Ра́дуйся, Корни́ліе, вели́кій чудотво́рче.
Конда́къ 6
Проповѣ́дникъ Бо́жій бы́лъ еси́ бра́тіи твое́й, о́тче преподо́бне: рукоположе́ніе бо свяще́нное воспріе́мъ отъ митрополи́та Си́мона, алтарю́ Госпо́дню благоговѣ́йно служи́лъ еси́, и та́инъ Христо́выхъ соверши́тель непоро́ченъ бы́лъ еси́, поуча́я нелѣ́ностно ученики́ твоя́, сло́вомъ и примѣ́ромъ твои́мъ, богоугожде́нію и́стинному и пѣ́нію хвале́бному Пресвятѣ́й Тро́ицѣ: Аллилу́ія.
Икосъ 6
Возсія́лъ еси́ въ пусты́ни Коме́льской свѣ́томъ до́брыхъ дѣ́лъ твои́хъ, блаже́нне о́тче, о ни́хже прославля́шеся на земли́ Оте́цъ Небе́сный - Бо́гъ на́шъ: ни́щія пита́лъ еси́, стра́нники упокоева́лъ еси́, больны́я врачева́лъ еси́, и вся́кому проси́вшему у тебе́ въ ну́ждѣ, доброхо́тенъ да́тель бы́лъ еси́. Тѣ́мже слы́шиши благохвале́нія сицева́я:
Ра́дуйся, Авраа́мле страннолю́біе возлюби́вый; ра́дуйся, апо́стольское нищелю́біе себѣ́ усво́ивый. Ра́дуйся, всѣ́мъ бѣ́дствующимъ усе́рденъ помо́щникъ бы́вый; ра́дуйся, хлѣ́бъ тво́й съ убо́гими раздѣля́вый. Ра́дуйся, страннопріи́мницу и больни́цу въ оби́тели твое́й устро́ивый; ра́дуйся, чи́нъ и уста́въ общежи́тельный ученико́мъ твои́мъ начерта́вый. Ра́дуйся, Анто́нія Вели́каго по́двигамъ пусты́ннымъ подража́вый; ра́дуйся, во и́мя его́ хра́мъ въ оби́тели твое́й сооруди́вый. Ра́дуйся, видѣ́ніемъ его́ чуде́снымъ утѣ́шенный; ра́дуйся, обѣтова́нія блага́я отъ у́стъ его́ услы́шавый. Ра́дуйся, молчали́вая уста́ имѣ́вый; ра́дуйся, псалмопѣ́нію всегда́ прилѣжа́вый.
Ра́дуйся, Корни́ліе, вели́кій чудотво́рче.
Конда́къ 7
Хотѣ́ніе имѣ́лъ еси́, преподо́бне, въ безмо́лвіи ненаруши́момъ рабо́тати Христу́ Бо́гу, сего́ ра́ди съ люби́мымъ ученико́мъ твои́мъ преподо́бнымъ Генна́діемъ удали́лся еси́ въ пусты́ню на е́зеро Су́рское, на мѣ́сто безмо́лвное и уда́ленное отъ жили́щъ человѣ́ческихъ, идѣ́же въ по́двизѣхъ отше́льническихъ до́брѣ подвиза́лся еси́ и оби́тель и́ноческую основа́лъ еси́, зовы́й немо́лчно Спа́су Христу́: Аллилу́ія.
Икосъ 7
Но́вымъ подвиго́мъ духо́внымъ вда́лъ еси́ себе́, уго́дниче Бо́жій, въ пусты́ни Су́рстѣй, и труды́ ко трудо́мъ прилага́лъ еси́, удруча́я пло́ть твою́ посто́мъ, бдѣ́ніемъ, колѣнопреклоне́ніемъ, до́лу лега́ніемъ и моли́твами непреста́нными, я́ко диви́тися ученику́ твоему́ Генна́дію таково́му житію́ твоему́ и ре́вности твое́й о спасе́ніи душе́внѣмъ, я́же и на́съ во удивле́ніе приво́дятъ и подвиза́ютъ зва́ти тебѣ́:
Ра́дуйся, пусты́ннаго безмо́лвія возжелѣ́вый; ра́дуйся, молвы́ человѣ́ческія уклони́выйся. Ра́дуйся, проро́ку Бо́жію Иліи́ по́двиги пусты́нными подража́вый; ра́дуйся, Предте́чи Госпо́дню Іоа́нну житіе́мъ отше́льническимъ послѣ́довавый. Ра́дуйся, мно́ги ча́да о Христѣ́ духо́вно воспита́вый; ра́дуйся, къ богоугожде́нію и́стинному ученики́ твоя́ наста́вивый. Ра́дуйся, преподо́бнаго Кири́лла Новоезе́рскаго во и́ночество постригíй; ра́дуйся, преподо́бнаго Генна́дія Любимогра́дскаго во а́нгельскій о́бразъ облекíй. Ра́дуйся, и́ночества богоуго́днаго въ предѣ́лѣхъ Волого́дскихъ распространи́телю; ра́дуйся, оби́телей пусты́нныхъ основа́телю. Ра́дуйся, звѣздо́ пресвѣ́тлая въ ли́цѣ преподо́бныхъ Россíйскихъ; ра́дуйся, благода́тная красото́ святы́я Христо́вы Це́ркве.
Ра́дуйся, Корни́ліе, вели́кій чудотво́рче.
Конда́къ 8
Стра́нствуя въ пусты́ни Су́рстѣй, преподо́бне о́тче, въ сиротствѣ́ оста́вилъ еси́ оби́тель твою́ Коме́льскую, ея́же сиротство́ уви́дѣвъ вели́кій кня́зь Васи́лій, сожалѣ́ о не́й и повелѣ́ тебѣ́ возврати́тися въ ню́ на пре́жнее твое́ настоя́тельство, да управля́еши оби́телію, тобо́ю осно́ванною и усоверше́нною. Ты́ же, послушли́въ сы́й во́ли Бо́жіей, въ повелѣ́ніи благовѣ́рнаго кня́зя тебѣ́ явле́ннѣй, со усе́рдіемъ въ оби́тель Коме́льскую возврати́лся еси́, и ра́дость ве́лію си́мъ бра́тіи твое́й сотвори́лъ еси́, во е́же вопи́ти и́мъ благода́рными гла́сы ко Го́споду: Аллилу́ія.
Икосъ 8
Ве́сь въ Бо́зѣ бы́въ богомы́сліемъ моли́твеннымъ непреста́ннымъ, преподо́бне о́тче Корни́ліе, и бли́жнихъ твои́хъ о Бо́зѣ зѣло́ возлюби́лъ еси́, наипа́че же ни́щихъ и стра́ждущихъ, ме́ньшихъ о Христѣ́ бра́тій твои́хъ, и́хже во вре́мя гла́да щедрода́тельно пита́лъ еси́, вся́кому нужда́ющемуся ми́лостыню неоску́дно подава́лъ еси́, и ма́лыя дѣ́ти любвеоби́льно призрѣва́лъ еси́, я́ко оте́цъ чадолюби́вый. Тѣ́мже тебѣ́, подража́телю милосе́рдія Спа́сова, вопіе́мъ хвале́бно:
Ра́дуйся, преподо́бне, преподо́біемъ христоподража́тельнымъ украше́нный; ра́дуйся, богоно́сне, Бо́га и бли́жняго твоего́ соверше́нно возлюби́вый. Ра́дуйся, ни́щихъ пита́телю; ра́дуйся, стра́нныхъ упокои́телю. Ра́дуйся, стра́ждущихъ утѣ́шителю; ра́дуйся, вдо́въ и сиро́тъ защи́тителю. Ра́дуйся, вся́къ во́зрастъ вѣ́рныхъ ми́лостынею твое́ю снабдѣва́вый; ра́дуйся, ма́лыя дѣ́ти любо́вію твое́ю о Христѣ́ взыска́вый. Ра́дуйся, во дни́ гла́да отъ жи́тницъ твои́хъ мно́гія препита́вый; ра́дуйся, утро́бу щедро́тъ твои́хъ ску́постію не загради́вый. Ра́дуйся, наде́жду несумнѣ́нную на Бо́га возлага́вый; ра́дуйся, по вѣ́рѣ и моли́твѣ твое́й, отъ Бо́га препита́ніе неоску́дно получи́вый.
Ра́дуйся, Корни́ліе, вели́кій чудотво́рче.
Конда́къ 9
Вся́ добродѣ́тели испо́лнивъ и соверше́нно Бо́гу угоди́въ, преблаже́нне о́тче, въ ста́рости масти́тѣй сы́й, па́ки оста́вилъ еси́ же́злъ настоя́тельства въ оби́тели твое́й, и на поко́й отше́лъ еси́ въ оби́тель Кири́ллову, да идѣ́же постриже́нъ бы́лъ еси́ въ и́ночество, та́мо и сконча́еши по́двигъ житія́ твоего́ свята́го. Оба́че ученика́ми твои́ми умоле́нный, и́же не тепя́ху ско́рби разлуче́нія съ тобо́ю, къ ни́мъ возврати́лся еси́ въ оби́тель Коме́льскую, и въ не́й въ безмо́лвіи келе́йномъ пребыва́лъ еси́, благопрія́тно поя́ Бо́гу пѣ́снь хвалы́ и благодаре́нія: Аллилу́ія.
Икосъ 9
Витíйство человѣ́ческое не довлѣ́етъ ко изглаго́ланію мно́гихъ подвиго́въ богоуго́днаго равноа́нгельнаго житія́ твоего́, преподо́бне о́тче Корни́ліе: въ ста́рости глубо́цѣй неосла́бно и нелѣ́ностно подвиза́лся еси́ въ моли́твахъ, бдѣ́ніихъ и поще́ніихъ, гото́вяся ко исхо́ду твоему́ и преселе́нію въ вѣ́чность. Сего́ ра́ди тебѣ́, до́брому подви́жнику Христо́ву, смиренному́дренно прино́симъ сія́ пѣ́сни хвале́бныя:
Ра́дуйся, и́стинный уго́дниче Бо́жій, вѣ́ру до конца́ сохрани́вый; ра́дуйся, избра́нный слуго́ Госпо́день, наде́жду несумнѣ́нну стяжа́вый. Ра́дуйся, равноа́нгельный человѣ́че, любо́вь святу́ю себѣ́ усво́ивый; ра́дуйся, послѣ́дователю ева́нгельскаго уче́нія, вся́ за́повѣди его́ соверши́вый. Ра́дуйся, въ ста́рости масти́тѣй ю́ность духо́вную прояви́вый; ра́дуйся, въ безмо́лвіи моли́твенномъ духо́вно созрѣ́вый. Ра́дуйся, къ исхо́ду сме́ртному до́брѣ себе́ пріугото́вивый; ра́дуйся, съ горя́щимъ свѣти́льникомъ до́брыхъ дѣ́лъ Жениха́ небе́снаго срѣ́сти гото́вый. Ра́дуйся, свято́е и́мя Го́спода Іису́са въ се́рдцѣ и уста́хъ твои́хъ всегда́ имѣ́вый; ра́дуйся, и́менемъ тѣ́мъ Боже́ственнымъ исцѣле́нія боля́щихъ соверша́вый. Ра́дуйся, благода́тію цѣле́бною свы́ше обогаще́нный; ра́дуйся, да́ромъ прозорли́вства отъ Го́спода одаре́нный.
Ра́дуйся, Корни́ліе, вели́кій чудотво́рче.
Конда́къ 10
Спасе́нія душе́внаго во упова́ніи бы́въ, свя́тче Бо́жій, ми́рно и ра́достно возлежа́лъ еси́ на одрѣ́ сме́ртнѣмъ, послѣ́днее цѣлова́ніе и благослове́ніе подава́я бра́тіи твое́й, и́же го́рько пла́каху о разлуче́ніи съ тобо́ю. Ты́ же пла́чь и́хъ утоля́я, и по сме́рти обѣща́лся еси́ ду́хомъ твои́мъ не разлуча́тися съ ни́ми, и не оставля́ти оби́тель твою́, а́ще то́кмо соблюду́тъ за́повѣди твоя́ и уста́въ тобо́ю и́мъ оста́вленный, въ не́мже поуча́еши благоугожда́ти Бо́гу и досто́йно возноси́ти Ему́ трисвяту́ю пѣ́снь: Аллилу́ія.
Икосъ 10
Царя́ Небе́снаго Христа́ Бо́га вѣ́рный ра́бъ бы́вый, преподо́бне о́тче, въ ру́цѣ Его́ святы́я ми́рно и безмяте́жно пре́далъ еси́ чи́стую твою́ ду́шу, тѣ́ло же твое́ многоподви́жное, въ наслѣ́діе цѣле́бное оби́тели твое́й оста́вилъ еси́, въ не́йже о́но че́стно погребе́ся, и то́ки чуде́съ источа́етъ отъ ра́ки твоея́. Покланя́ющеся мѣ́сту посме́ртнаго поко́я твоего́, свя́те, умиле́нно тебѣ́ вопіе́мъ:
Ра́дуйся, кончи́ну пра́ведную получи́вый; ра́дуйся, непосты́дно и свя́то тече́ніе твое́ сконча́вый. Ра́дуйся, во благоуха́ніи святы́ни сно́мъ сме́ртнымъ опочи́вый; ра́дуйся, свѣ́тлостію лица́ твоего́ по сме́рти ученики́ твоя́ удиви́вый. Ра́дуйся, со слеза́ми мно́гими отъ ни́хъ погребе́нный; ра́дуйся, въ хра́мѣ Богома́тере, тобо́ю созда́нномъ, положе́нный. Ра́дуйся, подъ кро́вомъ Цари́цы Небе́сныя посме́ртный поко́й тѣ́лу твоему́ обрѣты́й; ра́дуйся, душе́ю твое́ю свято́ю въ оби́тели ра́йскія къ Не́й воспари́вый. Ра́дуйся, отъ Сы́на Ея́ и Бо́га вѣнце́мъ безсме́ртныя жи́зни почте́нный; ра́дуйся, лико́мъ святы́хъ, престо́лу Его́ предстоя́щихъ, сопричте́нный. Ра́дуйся, чудесы́ мно́гими по сме́рти свя́тость твою́ ознаменова́вый; ра́дуйся, отъ ра́ки твоея́ честны́я исцѣле́нія благода́тныя источи́вый.
Ра́дуйся, Корни́ліе, вели́кій чудотво́рче.
Конда́къ 11
Пѣ́ніе моле́бное, у свята́го гро́ба твоего́ соверша́емое, уго́дниче Бо́жій, ми́лостивно пріе́млеши, и съ вѣ́рою приходя́щимъ на поклоне́ніе многоцѣле́бнымъ моща́мъ твои́мъ дара́ми благода́тными воздае́ши, больны́мъ исцѣле́ніе, скорбя́щимъ утѣше́ніе, бѣ́дствующимъ вспоможе́ніе да́руя, моли́твеннымъ предста́тельствомъ твои́мъ у престо́ла Го́спода сла́вы, Ему́же со святы́ми пое́ши: Аллилу́ія.
Икосъ 11
Свѣ́тлыми луча́ми чуде́съ твои́хъ, преподо́бне о́тче Корни́ліе, оби́тель твою́ просвѣща́еши, и всю́ страну́ Россíйскую благода́тно озаря́еши, я́ко сла́вити тя́ бли́жнимъ и да́льнимъ, пресла́внаго чудотво́рца. Тѣ́мже и мы́, грѣ́шніи, заступле́нія моли́твеннаго твоего́ прося́ще, съ вѣ́рою и любо́вію прославля́емъ тя́ по до́лгу благохвале́ніи си́ми:
Ра́дуйся, цѣле́бниче безме́здный неду́говъ душе́вныхъ и тѣле́сныхъ; ра́дуйся, помо́щниче ско́рый и преди́вный на по́мощь тя́ призыва́ющимъ. Ра́дуйся, слѣпы́мъ прозрѣ́нія ми́лостивый пода́телю; ра́дуйся, разсла́бленныхъ тѣ́ломъ благода́тный укрѣпи́телю. Ра́дуйся, въ со́ніихъ и видѣ́ніихъ вѣ́рныя посѣща́яй; ра́дуйся, боля́щимъ здра́віе явле́ніемъ твои́мъ подава́яй. Ра́дуйся, неду́жнаго боля́рина Симео́на предъ мно́гими пресла́вно исцѣли́вый; ра́дуйся, свѣщу́ у гро́ба твоего́ чуде́сно воспламени́вый. Ра́дуйся, лю́тѣ страда́вшаго и́нока Корни́лія отъ мучи́тельнаго неду́га изба́вивый; ра́дуйся, нога́ми болѣ́зновавшаго Мокíя пра́во ходи́ти устро́ивый. Ра́дуйся, бѣснова́таго Проко́пія отъ діа́вольскаго муче́нія свободи́вый; ра́дуйся, изступле́ннаго умо́мъ Се́ргія здра́вымъ смы́сломъ одари́вый.
Ра́дуйся, Корни́ліе, вели́кій чудотво́рче.
Конда́къ 12
Благода́ть мно́гихъ чуде́съ, отъ Бо́га тебѣ́ дарова́нную, преподо́бне уго́дниче Христо́въ, слы́шавъ святѣ́йшій патріа́рхъ всероссíйскій Іовъ, собо́рнѣ установи́ пра́здновати святу́ю па́мять твою́ во все́й Правосла́вной Всероссíйской Це́ркви, я́ко вои́стинну Бо́гомъ просла́вленнаго чудотво́рца. Таково́е прославле́ніе твое́ въ ли́цѣ святы́хъ со утѣше́ніемъ воспомина́я, благода́рственно вопіе́мъ Ди́вному во святы́хъ Свои́хъ Бо́гу: Аллилу́ія.
Икосъ 12
Пое́мъ мно́гая и пресла́вная чудотворе́нія твоя́, преподо́бне о́тче Корни́ліе, въ ни́хже ви́димъ вели́кую ми́лость Бо́жію къ странѣ́ Россíйстѣй, такова́го чудотво́рца возрасти́вшей, и усе́рдно благодари́мъ благи́хъ пода́теля Го́спода, си́це благодѣ́ющаго оте́чествію на́шему, тебѣ́ же, небе́сному засту́пнику на́шему, уми́льно глаго́лемъ:
Ра́дуйся, дру́же Христо́въ, до конца́ вѣ́ренъ пребы́вый; ра́дуйся, сожи́телю святы́хъ, при́сный Бо́гу. Ра́дуйся, таи́нниче Пресвяты́я Тро́ицы; ра́дуйся, избра́нный слуго́ Пресвяты́я Богоро́дицы. Ра́дуйся, а́нгельскихъ во́инствъ собесѣ́дниче; ра́дуйся, преподо́бныхъ украше́ніе. Ра́дуйся, сосу́де Боже́ственныя благода́ти; ра́дуйся, сокро́вищнице даро́въ Свята́го Ду́ха. Ра́дуйся, чуде́съ рѣко́ приснотеку́щая; ра́дуйся, сосу́де мѵ́ра цѣле́бнаго преиспо́лненный. Ра́дуйся, тѣле́съ на́шихъ врачу́ Бо́гомъ дарова́нный; ра́дуйся, о душа́хъ на́шихъ моли́твенниче богопрія́тный.
Ра́дуйся, Корни́ліе, вели́кій чудотво́рче.
Конда́къ 13
О, вели́кій и пресла́вный чудотво́рче, преподо́бне о́тче Корни́ліе! При́зри отъ го́рнихъ высо́тъ оби́телей ра́йскихъ на на́съ, земны́хъ и грѣ́шныхъ, и услы́ши ма́лое сіе́ моле́ніе на́ше, въ похвалу́ тебѣ́ приноси́мое отъ и́стиннаго усе́рдія, е́же ми́лостивно пріе́мши, умоли́ Созда́теля на́шего Го́спода, изба́вити на́съ гее́нны о́гненныя и муче́ній вѣ́чныхъ, и сподо́бити Ца́рствія небе́снаго и блаже́нства святы́хъ, да съ тобо́ю воспое́мъ Ему́ во вѣ́ки: Аллилу́ія.
Се́й конда́къ глаго́лется три́жды. Та́же Икосъ 1-й и Конда́къ 1-й
Моли́тва
О, свяще́нная главо́, земны́й а́нгеле, небе́сный человѣ́че, вели́кій чудотво́рче, преподо́бне о́тче Корни́ліе! Къ тебѣ́ съ вѣ́рою и любо́вію усе́рдно прибѣга́юще, умиле́нно про́симъ тя́, небе́снаго предста́теля на́шего: яви́ на́мъ, смире́ннымъ и грѣ́шнымъ, любо́вь твою́ оте́ческую и многомо́щное твое́ заступле́ніе; се́ бо, грѣ́хъ ра́ди на́шихъ, не дерза́емъ съ свобо́дою ча́дъ Бо́жіихъ проси́ти Го́спода и Влады́ку на́шего о ну́жныхъ на́мъ на потре́бу, но тебе́ моли́твенника къ Нему́ благопрія́тнаго предлага́емъ, вѣ́руя несомнѣ́нно, я́ко вся́ блага́я мо́жеши на́мъ испроси́ти у бла́гости Его́, а́ще то́кмо восхо́щеши. Испроси́ у́бо на́мъ, уго́дниче Бо́жій, у Всеще́драго и Человѣколю́бца Бо́га, вѣ́ру пра́ву, благоче́стіе непоколеби́мое, покая́ніе соверше́нное, житія́ исправле́ніе рѣши́тельное, да про́чее не прогнѣвля́емъ Го́спода наруше́ніемъ святы́хъ Его́ за́повѣдей и сподо́бимся проще́нія грѣхо́въ на́шихъ отъ Него́ получи́ти. Умоли́, чудотво́рче святы́й, Царя́ ца́рствующихъ и Го́спода госпо́дствующихъ, дарова́ти ми́ръ и благострое́ніе ца́рству на́шему Россíйскому, здра́віе же, спасе́ніе и на враги́ одолѣ́ніе Благочести́вѣйшему, Самодержа́внѣйшему, Вели́кому Госуда́рю на́шему, Импера́тору [и́мярекъ], я́ко да позна́ютъ вси́ противля́ющіися Ему́, я́ко съ на́ми Бо́гъ и святíи уго́дники Его́. [или́: Умоли́ Бо́га: стра́ждущую страну́ Россíйскую отъ лю́тыхъ безбо́жникъ и вла́сти и́хъ Госпо́дь да свободи́тъ, и да возста́витъ престо́лъ правосла́вныхъ царе́й; вѣ́рныхъ рабо́въ Его́, въ ско́рби и печа́ли де́нь и но́щь вопію́щихъ къ Нему́, многоболѣ́зный во́пль да услы́шитъ и да изведе́тъ отъ поги́бели живо́тъ на́шъ. Яко да позна́ютъ вси́ противля́ющіися, я́ко съ на́ми Бо́гъ и святíи уго́дники Его́.] Сохрани́, свя́тче Бо́жій, моли́твами твои́ми Це́рковь Христо́ву отъ ересе́й и раско́ловъ, суевѣ́рія и невѣ́рія человѣ́ческаго, да цвѣте́тъ въ не́й свято́е Правосла́віе во все́й си́лѣ и прино́ситъ плоды́ спаси́тельныя душа́мъ. Солюди́ отъ вся́каго зла́ и оби́тель тобо́ю созда́нную, и вся́ живу́щія и подвиза́ющіяся въ не́й по твои́мъ уста́вомъ, да цѣ́лы и невреди́мы пребу́дутъ отъ искуше́ній врага́ спасе́нія человѣ́ческаго. При́зри ми́лостивно и на предстоя́щія ра́цѣ моще́й твои́хъ и моля́щіяся лю́ди, и́же въ оби́тель твою́ прихо́дятъ на поклоне́ніе, и вся́ проше́нія и́хъ во бла́го испо́лни: боля́щимъ исцѣле́ніе, скорбя́щимъ утѣше́ніе, бѣ́дствующимъ вспоможе́ніе ско́ро пода́ждь. Всѣ́мъ же на́мъ здра́віе душе́вное и тѣле́сное, земли́ плодоно́сіе, ти́хое и богоуго́дное житіе́, благу́ю христіа́нскую кончи́ну и до́брый отвѣ́тъ на стра́шномъ Судѣ́ Христо́вомъ, у Всеми́лостиваго Бо́га исхода́тайствуй, я́ко вои́стинну имѣ́яй ве́ліе къ Нему́ дерзнове́ніе. Ей, о́тче, вѣ́мы, я́ко мно́го мо́жетъ моли́тва твоя́ предъ лице́мъ Вседержи́теля Го́спода. Сего́ ра́ди крѣ́пко на тя́ упова́емъ, и на твоя́ святы́я моли́твы зѣло́ надѣ́емся, я́ко ты́ приведе́ши на́съ предста́тельствомъ твои́мъ въ небу́рное приста́нище спасе́нія, и наслѣ́дники пока́жеши на́съ всесвѣ́тлаго Ца́рствія Христо́ва. Не посрами́ же, свя́те о́тче на́шъ, упова́нія на́шего, и сподо́би на́съ вку́пѣ съ тобо́ю блаже́нства ра́йскаго наслажда́тися, да сла́вимъ, хва́лимъ и велича́емъ вели́кую ми́лость къ на́мъ Человѣколю́бца Бо́га, Отца́ и Сы́на и Свята́го Ду́ха, и твое́ благо́е оте́ческое заступле́ніе, во вѣ́ки вѣко́въ. Ами́нь.
Тропа́рь, гла́съ 4
Отъ ю́ности горя́щимъ жела́ніемъ боже́ственныя любве́ разжига́емь, жите́йскія молвы́ оста́вилъ еси́, преподо́бне, ревни́тель Анто́нію Вели́кому бы́въ, безмо́лвіемъ и жесто́кимъ пребыва́ніемъ послѣ́дуя Христу́, бдѣ́ніемъ, и моли́твами, и посто́мъ о́бразъ бы́лъ еси́ твои́мъ ученико́мъ. Тѣ́мже моли́ся Го́сподеви, Корни́ліе блаже́нне, спасти́ся душа́мъ на́шимъ.
Конда́къ, гла́съ 8
Го́сподеви, отъ Святы́я Дѣ́вы возсія́вшу мíрови, и Тому́ измла́да, я́ко а́нгелъ, послужи́лъ еси́, блаже́нне, и си́лою Его́ пусты́ню, я́ко гра́дъ, сотвори́лъ еси́, мно́жество же учени́къ въ не́й собра́лъ еси́, и́хже богодохнове́нными уче́ньми просвѣти́лъ еси́. Тѣ́мъ вопіе́мъ ти́: ра́дуйся, о́тче на́шъ Корни́ліе, и́нокомъ боже́ственное удобре́ніе.
Велича́ніе
Ублажа́емъ тя́, преподо́бне о́тче Корни́ліе, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.
