Текст одо­брен ре­шением Священ­но­го Си­но­да Рус­ской Пра­во­слав­ной Цер­кви 14 марта 1887 года (№ 387)

Кон­да́къ 1

Избра́н­ный уго́д­ни­че Хри­сто́въ и ди́в­ный бла­го­че́­стія по­дви́ж­ни­че, пре­по­до́б­не о́тче Іо́­си­фе, и́же сугу́­бый свы́­ше да́ръ прі­е́­мый бо­го­вѣ́­дѣнія же и ис­цѣ­ле́ній, я́ко имѣ́яй дер­зно­ве́ніе ко Святѣ́й Тро́­и­цѣ, моли́ из­ба́­ви­ти­ся на́мъ отъ находя́щихъ бѣ́дъ, и скор­бе́й, и бо­лѣ́­зней, да лю­бо́­вію зо­ве́мъ ти́:

Ра́дуй­ся, пре­по­до́б­не о́тче Іо́­си­фе, бо­го­му́­дре, чу­до­тво́р­че.

Икосъ 1

Ангела во пло́­ти тя́ вѣ́ду­ще, пре­по­до́б­не Іо́­си­фе, по́­слан­на отъ Бо́га, да яви́тъ то­бо́ю въ че­ло­вѣ́­цехъ о́бразъ и́стин­на­го бла­го­че́­стія и до́­брыхъ дѣ́лъ, чудя́щеся путе́мъ Его́, во вре́­мен­нѣмъ жи­тіи́ тво­е́мъ явле́н­нымъ, и ве­ли́­чіе бла­гоутро́­бія Его́ про­слав­ля́юще, во уми­ле́ніи сер­де́ч­нѣмъ взы­ва́­емъ ти́ си́це:

Ра́дуй­ся, до́­бра­го ко́­ре­не о́тра­сле бла­го­ро́д­ная; ра́дуй­ся, лозо́ ви­но­гра́­да Хри­сто́­ва мно­го­пло́д­ная. Ра́дуй­ся, ча́до мо­ли́­твы ро­ди́­те­лей бла­го­че­сти́­выхъ; ра́дуй­ся, на­де́­ждо и утѣ­ше́ніе сер­де́цъ и́хъ бо­го­лю­би́­выхъ. Ра́дуй­ся, из­дѣ́т­ска стра́хъ Го­спо́­день стяжа́­вый; ра́дуй­ся, сѣ́мя сло́­ва Бо́жія отъ ю́но­сти вос­прія́вый. Ра́дуй­ся, из­мла́­да сми­ре́нія и мол­ча́­нія хра­ни́­те­лю; ра́дуй­ся, мо­ли́­твы и воз­дер­жа́нія ре­вни́­те­лю.

Ра́дуй­ся, пре­по­до́б­не о́тче Іо́­си­фе, бо­го­му́­дре, чу­до­тво́р­че.

Кон­да́къ 2

Ви́дя Хри­сто́съ бла­го́е се́рд­ца тво­е­го́ из­во­ле́ніе и ра­че́ніе, я́ко отъ ю́но­сти не­мо́лч­но про­слав­ля́лъ еси́ и́мя Го­спо́д­не чте́ніемъ и пѣ́ніемъ псалмо́въ и пѣ́­сней свяще́н­ныхъ во святѣ́мъ хра́­мѣ Его́, въ ски́ніи не­бе́с­нѣй вчи­ни́ тя́, пре­по­до́б­не, въ ли́цѣ пра́­вед­никъ со­вер­ше́н­ныхъ воз­но­си́­ти Ему́ ку́п­но съ ни́ми а́н­гель­ское пѣ́ніе: Алли­лу́ія.

Икосъ 2

Разу­мѣ́въ отъ пи­са́ній оте́­че­скихъ бла­ги́хъ мíра сего́ тще­ту́, ис­хо́дъ же отъ вре́­мен­на­го сего́ житія́ не­пре­ста́н­но по­мыш­ля́я и пре­бы­ва́я при́­сно въ со­кро­ве́н­нѣмъ по́­дви­зѣ мо­ли́­твы, ни­ка́­ко­же се́рд­цемъ при­лѣ­пи́л­ся еси́ къ су́­щимъ отъ мíра, ра́з­вѣ то́­чію къ еди́­ному до­сто́й­нѣй­шему отъ све́рст­никъ тво­и́хъ, съ ни́м­же и пу́ть бо­гоу­го́д­на­го и́но­че­ска­го житія́ отъ дне́й о́тро­че­ства предъ­из­бра́лъ еси́, пре­по­до́б­не. Тѣ́м­же убла­жа́­емъ тя́ си́це:

Ра́дуй­ся, цвѣ́­те бла­гоу­ха́н­ный до́­бра­го во­спи­та́нія; ра́дуй­ся, со­су́­де Бо­же́­ствен­на­го из­бра́нія. Ра́дуй­ся, въ ра́зумѣ Бо́­гомъ про­свѣ­ще́н­ный; ра́дуй­ся, се́рд­цемъ въ Бо́зѣ утвер­жде́н­ный. Ра́дуй­ся, о́бра­зе со­дру́­же­ства не­по­ро́ч­на­го и не­ле́ст­на­го; ра́дуй­ся, все­ду­ше́в­нѣ взы­ска́­вый Ца́рствія не­бе́с­на­го.

Ра́дуй­ся, пре­по­до́б­не о́тче Іо́­си­фе, бо­го­му́­дре, чу­до­тво́р­че.

Кон­да́къ 3

Бу́рю по­мыш­ле́ній мір­ски́хъ пре­по­бѣ­жда́я бла­го­да́тію Хри­сто́­вою, по́­мы­сломъ лу́ч­шимъ во­сте́клъ еси́ къ не­бе́с­нымъ, пре­по­до́б­не, въ го́рняя впе­ри́въ у́мъ тво́й безмяте́ж­ный и без­стра́ст­ный, и во́лю все­цѣ́­ло по­ко­ри́въ подъ и́го Хри­сто́­во, тѣ́ло же твое́ со­дѣ́­лалъ еси́ жи­ли́­щемъ Ду́ха Свята́го, и от­ню́ду­же и въ тѣ­ле­си́, я́ко без­пло́­тенъ, со без­пло́т­ны­ми взы­ва́лъ еси́ Бо́гу: Алли­лу́ія.

Икосъ 3

Ре́в­ность имѣ́яй о со­вер­ше́н­нѣмъ жи­тіи́ хри­стіа́н­стѣмъ и отъ пи­са́ній оте́­че­скихъ нау­че́нъ, е́же вда́­ти себе́ въ по­слу­ша́­ніе иску́сну ру­ко­во­ди́­те­лю и на­ста́в­нику не­ле́ст­ну, въ ю́но­сти ро­ди́­те­ли твоя́ оста́­вилъ еси́, пре­по­до́б­не, и по­ло­жи́лъ еси́ въ се́рд­цы тво­е́мъ во­про­си́­ти ду­хо́в­на­го ста́р­ца Вар­со­но́­фія, да а́ще что́ ре­че́тъ, бу́ди то́ тебѣ́, я́ко сло́­во Са­мо­го́ Бо́га, е́же и свер­ши́­ся во бла­го́е Бо́жіимъ устро­е́­ніемъ. Сего́ ра́ди, то­ли́­кое вѣ́ры твоея́ упо­ва́ніе убла­жа́­ю­ще, взы­ва́­емъ ти́:

Ра́дуй­ся, я́ко лю­бе́з­ная и кра́с­ная мíра сего́ пре­зрѣ́лъ еси́; ра́дуй­ся, я́ко не­бе́с­ныхъ и не­тлѣ́н­ныхъ же­ла́ніемъ во­жде­лѣ́лъ еси́. Ра́дуй­ся, вну́­трен­нею Кре­ста́ Хри­сто́­ва кра­со­то́ю вос­хи­ще́н­ный; ра́дуй­ся, си́­лою свы́­ше на тру́дъ кре­сто­но­ше́нія об­ле­че́н­ный. Ра́дуй­ся, во́­лею тве́рдою во́ли своея́ отрекíйся; ра́дуй­ся, отсѣ­че́ніемъ стра­сте́й уго­ди́­вый Бо́гу и спа­сы́й­ся.

Ра́дуй­ся, пре­по­до́б­не о́тче Іо́­си­фе, бо­го­му́­дре, чу­до­тво́р­че.

Кон­да́къ 4

Си́лою люб­ве́ Бо́жія вле­ко́мь къ вя́щ­ше­му житія́ и́но­че­ска­го со­вер­ше́н­ству и му́­дрѣ по­слѣ́дуя со­вѣ́ту и бла­го­сло­ве́нію про­зор­ли́­ва­го и свята́го ста́р­ца Вар­со­но́­фія, при­ше́лъ еси́ во оби́­тель пре­по­до́б­на­го Па­фну́тія и того́ умо­ли́лъ еси́ прія́ти тя́ въ по­слу­ша́­ніе, да ку́п­но съ ни́мъ въ тру­дѣ́хъ и по́­дви­зѣхъ вы́ну бла­гоу­го­жда́яй Бо́гу, вос­пѣ­ва́­е­ши: Алли­лу́ія.

Икосъ 4

Про­ви́дя ду́­хомъ бла­го́е про­из­во­ле́ніе ю́но­ши, чи­сто­ту́ же ду­ше́в­ную и бла­го­да́т­ное при­зва́ніе его́, пре­по­до́б­ный Па­фну́тій а́біе об­ле­че́ и́ во и́но­че­скій о́бразъ и воз­ло­жи́ на́нь и́го по­слу­ша́­ній, я́же со усе́р­діемъ въ про­сто­тѣ́ и въ тер­пѣ́ніи мно́­зѣ ис­пол­ня́ше, я́ко бы́ти ему́ о́бра­зомъ без­пре­ко­сло́в­на­го по­ви­но­ве́нія, труда́ и бла­го­че́­стія. Тѣ́м­же ны́нѣ зо­ве́мъ ему́ си́це:

Ра́дуй­ся, тѣ́­сный пу́ть спа­се́нія отъ ю́но­сти воз­лю­би́­вый; ра́дуй­ся, яре́мъ Го­спо́­день на вы́ю свою́ воз­ло­жи́­вый. Ра́дуй­ся, свяще́н­ны­ми обѣ́­ты во́лю свою́ связа́­вый; ра́дуй­ся, себе́ и ве́сь жи­во́тъ сво́й Го́­спо­де­ви пре­да́­вый. Ра́дуй­ся, ко­е­му́­ждо во бла́­го усе́рд­ный слу­жи́­те­лю; ра́дуй­ся, боля́щихъ и не­мощ­ны́хъ упо­ко­и́­те­лю. Ра́дуй­ся, по́­мы­слы плот­скíя си́­лою мо­ли́­твы про­го­ня́яй; ра́дуй­ся, сомня́щихся въ вѣ́рѣ сло́­вомъ Бо́жіимъ утвер­жда́яй.

Ра́дуй­ся, пре­по­до́б­не о́тче Іо́­си­фе, бо­го­му́­дре, чу­до­тво́р­че.

Кон­да́къ 5

Боже́­ствен­ною лю­бо́­вію рас­па­ля́емь, и бли́ж­нихъ тво­и́хъ, и́же въ мíрѣ, не отве́ргл­ся еси́ се́рд­цемъ, пре­по­до́б­не: слы́­шавъ бо ста́р­ца отца́ тво­е­го́ въ раз­сла­бле́ніи тѣ­ле́с­немъ су́ща, умо­ли́лъ еси́ пре­по­до́б­на­го Па­фну́тія во оби́­тель того́ прія́ти и на­до́лзѣ по­слу­жи́лъ еси́ боля́щему ро­ди́­те­лю тво­е­му́, со вся́кимъ ра­че́ніемъ при­зи­ра́я его́ и пита́я тѣ­ле́с­нѣ ру­ка́­ма тво­и́­ма и ду­хо́в­нѣ сло́­вомъ Бо́жіимъ до са́мыя кон­чи́­ны, я́ко тому́ взы­ва́­ти къ тебѣ́: "не а́зъ ти́ оте́цъ, но ты́ ми́ оте́цъ еси́". Се́й у́бо тру́дъ люб­ве́ твоея́ сы­но́в­нія вос­хва­ля́юще, я́ко же́ртву бо­го­прія́тну, по­е́мъ: Алли­лу́ія.

Икосъ 5

Имы́й во оби́­те­ли осмь­на́­де­сять лѣ́тъ житія́ въ по­слу­ша́­ніи, бдѣ́ніи, по­ще́ніи и нау­че́ніи пи­са́ніемъ святы́хъ и духо­но́с­ныхъ оте́цъ, егда́ на­ста́ ча́съ бла­же́н­ныя кон­чи́­ны пре­по­до́б­на­го Па­фну́тія, на­ча́ль­ство­ва­ти по не́мъ, а́ще и не хотя́й, при­зва́нъ бы́лъ еси́ и во пре­сви́­те­ра по­ста́в­ленъ, да упра́­ви­ши до́­брѣ со́­бран­ное и́мъ ста́­до Хри­сто́­во. Ты́ же вма́­лѣ на­ча́ль­ство­вавъ, па́ки управ­ля́емь вос­хо­тѣ́лъ еси́ бы́ти, да пріумно́­жи­ши до­бро­дѣ́­те­лей не­тлѣ́н­ная со­кро́­ви­ща. Тѣ́м­же, дивя́щеся ре́­вност­ному до­бро­то­лю́­бію и сми­рен­но­му́­дрію тво­е­му́, во­піе́мъ ти́:

Ра́дуй­ся, ли­ше́ніи тѣ­ле́с­ны­ми мно́­га бла́­га ду­хо́в­ная со­бра́­вый; ра́дуй­ся, ни­ще­то́ю да­ро­ва́нія не­бе́с­ная стяжа́­вый. Ра́дуй­ся, мол­ча́­нія изря́дный хра­ни́­те­лю; ра́дуй­ся, стро́­гихъ уста́­вовъ и́но­че­скихъ блю­сти́­те­лю. Ра́дуй­ся, боля́щимъ, я́ко бра́тіи Хри­сто́­вой, по­слу­жи́­вый; ра́дуй­ся, вы­со́кій о́бразъ люб­ве́ сы­но́в­нія яви́­вый. Ра́дуй­ся, вла́­сти надъ други́­ми и че́­сти укло­ни́­вый­ся; ра́дуй­ся, па́ки, я́ко слуга́ незна́­емь, во оби́­тель Кири́л­лову все­ли́­вый­ся. Ра́дуй­ся, та́мо бра́ш­на уго­тов­ля́ти опре­дѣ­ле́н­ный; ра́дуй­ся, и въ ру́­би­щѣ ра́б­стѣмъ по­зна́н­ный и об­ли­че́н­ный.

Ра́дуй­ся, пре­по­до́б­не о́тче Іо́­си­фе, бо­го­му́­дре, чу­до­тво́р­че.

Кон­да́къ 6

Купцу́ упо­до́­бил­ся еси́, и́щу­щему до́­бра­го би́­се­ра, Іо́­си­фе пре­по­до́б­не, егда́ въ по­слу­ша́­ніи и вся́цѣмъ по́­дви­зѣ ду­хо́в­нѣмъ бла­го­иску́­сенъ бы́въ, оби́­те­ли и́но­че­скія по­сѣ­ща́лъ еси́, да ис­пы́т­но по­зна́­е­ши въ тѣ́хъ лу́ч­шая и со­вер­ше́н­нѣй­шая и пріу­сво́и­ши на по́ль­зу ду́шъ ста́­да тво­е­го́ сло­ве́с­на­го, е́же ра́­до­стію ве́ліею воз­ра́­до­ва­ся воз­вра­ще́нію тво­е­му́, бла­го­да́р­ствен­но взы­ва́я Па­сты­ре­на­ча́ль­нику Хри­сту́: Алли­лу́ія.

Икосъ 6

Слы́­шавъ бла­го­вѣ́р­ный кня́зь Бо­ри́съ о при­ше́­ствіи пре­по­до́б­на­го Іо́­си­фа въ его́ пре­дѣ́­лы, из­ше́дъ усе́рд­но моля́ше и́, да из­бе­ре́тъ въ его́ на­слѣ́діи мѣ́­сто, да со­гра­ди́тъ на не́мъ святу́ю оби́­тель и пре­бы­ва́­етъ въ не́й со и́но­ки, е́же и свер­ши́­ся, ды­ха́нію бу́р­ну ука­зу́­ю­щу мѣ́­сто, и устро́­ися ра­че́ніемъ кня́зя, па́че же бла­го­сло­ве́ніемъ Бо́жіимъ по мо­ли́­твамъ пре­по­до́б­на­го, ему́­же съ лю­бо́­вію взы­ва́­емъ си́це:

Ра́дуй­ся, вы­со́­кихъ по́­дви­говъ житія́ хри­стіа́н­ско­го ре­вни́­те­лю; ра́дуй­ся, но­во­на­ча́ль­ныхъ иску́с­ный ру­ко­во­ди́­те­лю. Ра́дуй­ся, не­из­мѣ́н­ное пра́­ви­ло по­ста́ и покая́нія; ра́дуй­ся, хра­ни́­те­лю не­пре­ста́н­на­го воз­дер­жа́нія. Ра́дуй­ся, мір­ски́мъ на­ста́в­ни­че жи́­зни бо­гоу­го́д­ныя; ра́дуй­ся, ос­но­ва́­те­лю оби́­те­ли бла­го­пло́д­ныя. Ра́дуй­ся, я́ко бла­га́я на­чи­на́нія твоя́ Хри­сто́съ бла­го­сло­ви́; ра́дуй­ся, я́ко со­тру́д­ни­ка тебѣ́ въ лицѣ́ дер­жа́в­на­го яви́.

Ра́дуй­ся, пре­по­до́б­не о́тче Іо́­си­фе, бо­го­му́­дре, чу­до­тво́р­че.

Кон­да́къ 7

Ве́ліе стяжа́въ со­кро́­ви­ще люб­ве́, пре­по­до́б­не, я́коже во дни́ пе́р­выхъ хри­стіа́нъ, и́мже бѣ́ се́рд­це и душа́ еди́­на и отъ ни́х­же ни­кто́­же отъ имѣ́­ній гла­го́­ла­ше что́ свое́ бы́ти, су­ди́лъ еси́ и во и́но­цѣхъ оби́­те­ли твоея́, я́ко из­во­ле́ніемъ се́рд­ца отве́рг­ших­ся мíра и его́ стяжа́ній, уста́­ви­ти си­це­ва́­го жи́­тель­ства о́бразъ, да вси́ вку́­пѣ еди́­но взы́­щутъ стяжа́ніе вѣ́ч­ное, Бо́га, Ему́­же и да взы­ва́­ютъ вы́ну: Алли­лу́ія.

Икосъ 7

Но́ва­го Ѳе­о­до́­сія, о́бщихъ житíй на­ча́ль­ни­ка, зри́тъ въ тебѣ́ стра­на́ Россíйская, пре­по­до́б­не о́тче Іо́­си­фе, я́коже бо то́й, и́но­че­скія обѣ́­ты вос­прія́въ, всѣ́мъ се́рд­цемъ и ду­ше́ю уста́­вомъ о́бща­го и́но­че­ска­го житія́ пре́­данъ бя́ше, си́це и ты́, си́мъ ше́­ствуяй путе́мъ, въ тер­пѣ́ніи мно́­зѣ за́­по­вѣ­демъ обще­жи́тія святы́хъ оте́цъ не­у­кло́н­но по­слѣ́­до­валъ еси́, тѣ́м­же отъ чту́­щихъ тя́ слы́­ши­ши та­ко­ва́я:

Ра́дуй­ся, о́бщее жи­тіе́ мо­на́­ше­ству­ю­щихъ ос­но­ва́­вый; ра́дуй­ся, тѣ́мъ всеору́жіе бла­го­че́­стія и́мъ по­да́­вый. Ра́дуй­ся, о́бщи­ми тру­ды́ пра́з­дныхъ по́­мы­словъ ша­та́­нія упразд­ни́­вый; ра́дуй­ся, тѣ́ми, я́ко бро­не́ю, стра­сте́й раз­жже́н­ныя стрѣ́­лы отра­зи́­вый. Ра́дуй­ся, все­ли́­вый во оби́­те­ли ду́хъ о́бща­го воз­дер­жа́нія; ра́дуй­ся, по­тре­би́­вый въ не́й пле́­ве­лы лю­бостяжа́нія. Ра́дуй­ся, бо́др­ство­ва­нію ду­хо́в­но­му мно́­ги и́но­ки нау­чи́­вый; ра́дуй­ся, до кон­ца́ житія́ пе́р­вый въ тру­жда́­ю­щих­ся бы́­вый.

Ра́дуй­ся, пре­по­до́б­не о́тче Іо́­си­фе, бо­го­му́­дре, чу­до­тво́р­че.

Кон­да́къ 8

Стра́н­никъ при­ше́лъ еси́ въ пу­сты́­ню оте́­че­ствія тво­е­го́, пре­по­до́б­не, и а́біе до­мо­вла­ды́­ка яви́лся еси́ Бо́гу, пре­кло́нь­шу се́рд­це во вла́­сти су́­ща­го бла­го­вѣ́р­на­го кня́зя Бо­ри́­са, е́же по­слу­жи́­ти отъ имѣ́­ній сво­и́хъ на со­зи­да́­ніе це́р­кве ка́­мен­ныя на мѣ́­стѣ се́мъ, бла­гоу­кра­си́­ти же ю́ бо­го­лѣ́п­но, и ке́л­ліи воз­дви́г­нути мно́­жа­щим­ся бра́тіямъ, да и здѣ́ си́ми, я́ко на не­бе­си́ святы́ми а́н­ге­лы, воз­но́­сит­ся Бо́гу пѣ́снь: Алли­лу́ія.

Икосъ 8

Ви́дяще ре́­вност­ное по Бо́зѣ и же­сто́­кое жи­тіе́ пре­по­до́б­на­го Іо́­си­фа и бра́тіи, не­пре­ста́н­но въ тру­дѣ́хъ и по­ще́ніи по­дви­за́­ю­щих­ся и ходя́щихъ въ ру́­бищныхъ и ху­ды́хъ оде́­ждахъ, нѣ́­цыи отъ и́нокъ и вся́каго чи́на мір­ски́хъ лю­де́й и князе́й не то́­чію си́хъ не отвра­ща́­хуся, но па́че ре́­вно­стію ду­хо́в­ною горя́ще и во оби́­те­ли ку́п­но съ ни́ми по­дви­за́­ти­ся же­ла́­ю­ще, при­но­ша́­ху ту́ имѣ́­нія своя́ на по́ль­зу о́бщую. Тѣ́м­же зда́­те­лю тоя́ воз­гла­ша́­емъ та́ко:

Ра́дуй­ся, му́­дрѣ пред­на­чер­та́­вый оби́­тель но́ву; ра́дуй­ся, по­ре­вно­ва́­вый ни­ще­толю́б­но­му жи­тію́ Хри­сто́ву. Ра́дуй­ся, святы́я хра́­мы во оби́­те­ли со­зда́­вый; ра́дуй­ся, мно́гъ со­бо́ръ мо­на́­ше­ству­ю­щихъ со­бра́­вый. Ра́дуй­ся, я́ко тру́дъ тво́й свы́­ше бла­го­сло­ви́ся; ра́дуй­ся, я́ко свято́е же­ла́ніе се́рд­ца тво­е­го́ со­вер­ши́­ся. Ра́дуй­ся, я́ко во оби́­те­ли тво­е́й мно́­зи ду́ши своя́ спа­со́­ша; ра́дуй­ся, я́ко изъ нея́ па­сты­ре­на­ча́ль­ни­цы изы­до́­ша.

Ра́дуй­ся, пре­по­до́б­не о́тче Іо́­си­фе, бо­го­му́­дре, чу­до­тво́р­че.

Кон­да́къ 9

Всѣ́мъ се́рд­цемъ воз­лю­би́­вый Бо́га и мно́­га да­ро­ва́нія ду­хо́в­ная отъ Него́ вос­прі­е́­мый, пре­по­до́б­не Іо́­си­фе, и предъ че­ло­вѣ́­ки то­ли́ку бла­го­да́ть обрѣ́лъ еси́, я́ко не то́­чію мно́­зи отъ про­сты́хъ, но и кня́зи, тре́бу­ю­ще тво­и́хъ на­став­ле́ній, въ по­слу­ша́­ніе тебѣ́ вдая́ху себе́ со­вер­ше́н­но, и́мже ми­ро­тво́­рецъ бы́лъ еси́, ис­хо­да́­тай­ство­вавъ бла­го­во­ле́ніе са­мо­де́рж­ца кня́зю Юрію, и́же не­по­ви́н­нѣ окле­ве­та́нъ, подъ стра́­хомъ сме́рт­нымъ бя́ше, из­ба́вленъ же бы́въ, въ ра́­до­сти ду­ше́в­нѣй во­зо­пи́ Бо́гу: Алли­лу́ія.

Икосъ 9

Бла­го­да́ть Бо­же́­ствен­ная, при­вле­ка́­е­мая мо­ли́­тва­ми пре­по­до́б­на­го, я́вѣ зна́­ме­на­ся въ не́мъ да­ро­ва́ніи чу­до­тво­ре́ній и вѣ́­дѣніемъ со­кро­ве́н­ныхъ: уме́р­ша бо бла­го­че­сти́­ва­го кня́зя Іо­а́н­на мо­ли́­твою сво­е́ю воз­бу­ди́, да ко­не́ч­нѣ преду­го­то́­вит­ся покая́ніемъ и вос­пріи́­метъ за­ло́гъ жи́­зни вѣ́ч­ныя, и та́ко да оты́­детъ ко Го́­спо­ду. Тѣ́м­же, во грѣ­сѣ́хъ жи­ву́щіи и дѣ́й­ствен­на­го воз­бу­жде́нія на покая́ніе тре́бую­щіи, во­зо­піи́мъ къ нему́:

Ра́дуй­ся, бла­го­че­сти́­выхъ отра́­до и утѣ­ше́ніе; ра́дуй­ся, ко­ле́б­лю­щих­ся въ вѣ́рѣ тве́р­дое огра­жде́ніе. Ра́дуй­ся, отчаява́­ю­ших­ся утвер­жда́яй во упо­ва́ніи; ра́дуй­ся, про­свѣ­ти́­вый мно́­гихъ тво­и́­ми пи­са́ніи. Ра́дуй­ся, ми́ръ по­сре­дѣ́ вра­жду́­ю­щихъ устроя́яй; ра́дуй­ся, не­по­ви́н­ныя отъ сме́р­ти из­ба­вля́яй. Ра́дуй­ся, уми­ра́­ю­щія воз­став­ля́яй на покая́ніе; ра́дуй­ся, всѣ́мъ вну­ша́яй жи́­зни вѣ́ч­ныя взы­ска́ніе. Ра́дуй­ся, ше́­ство­ва­вый путе́мъ тру́д­нымъ и тѣ́­снымъ; ра́дуй­ся, воз­во­дя́й други́хъ къ оби́­те­лемъ не­бе́с­нымъ.

Ра́дуй­ся, пре­по­до́б­не о́тче Іо́­си­фе, бо­го­му́­дре, чу­до­тво́р­че.

Кон­да́къ 10

Новоу­стро́ен­ну оби́­тель пре­по­до́б­на­го Іо́­си­фа ис­пы­та́ Го­спо́дь по­сѣ­ще́ніемъ гнѣ́­ва Сво­е­го́, ку́п­но же и ми́­ло­сти: за грѣ­хи́ бо людскíя гла́дъ крѣ́­покъ на­ве­де́ на зе́­млю Во­ло­ко­ла́м­ску и на вся́ окре́ст­ныя ве́си, я́ко мно́­гимъ лю́­демъ без­го́д­но по­ги­ба́­ти. Пре­по­до́б­ный же, увѣ́­дѣвъ сія́, усугу́­би во оби́­те­ли мо­ле́ніе и отве́р­зе жи́т­ни­цы тоя́ а́лчу­щимъ. Разда́въ же вся́ су́щая и не могíй кто­му́ не то́­чію ты́сящь при­ше́д­ша­го на­ро́­да, но ниже́ бра́тіи своея́ пре­пи­та́­ти, по­сла́ за­и­мо­ва́­ти на оби́­тель сре­бро́ и ку́­плю дѣ́яй сѣ́­менъ хлѣ́б­ныхъ, ни­ка́­ко­же оста́­ви тре́бую­щія по­ги­ба́­ти гла́­домъ, дѣ́­темъ же и́хъ ма́­лымъ осо́бь со­зда́ до́мъ, до́н­де­же дер­жа́в­ный бла­го­че­сти́­вый ца́рь Ва­си́лій, слы́­шавъ сія́, вне­за́­пу пріи́­де во оби́­тель и да­ро­ва́ до­во́ль­ная ко при­зрѣ́­нію бѣ́д­ству­ю­щихъ, и́же, ви́дяще въ се́мъ ми­ло­се́рдую­щую ру́ку Бо́жію, во уми­ле́ніи сер­де́цъ воз­не­со́­ша хва­ле́б­ный гла́съ Бо́гу: Алли­лу́ія.

Икосъ 10

Бла­го́­му из­во­ле́нію дер­жа́в­на­го по­слѣ́ду­ю­ще, мно́­зи отъ вое­на­ча́ль­никъ и князе́й удѣ́ль­ныхъ и ины́хъ хри­сто­лю́б­цевъ бо­га́­тая дая́нія въ оби́­тель Іо́­си­фо­ву при­но­ша́­ху, я́ко всѣ́мъ при­ше́д­шимъ къ не́й гла́­да ра́ди без­бѣ́д­но въ до́мы своя́ воз­вра­ти́­ти­ся и но́­вымъ изо­би́ліемъ бла­го­сло­ви́­ти­ся оби́­те­ли пре­по­до́б­на­го, къ не­му́­же взы­ва́­емъ ны́нѣ:

Ра́дуй­ся, на­де́­ждо свѣ́т­лая въ ну­ждѣ́ и обстоя́ніи су́­щихъ; ра́дуй­ся, по­кро­ви́­те­лю си́­рыхъ и кро́­ва не­и­му́­щихъ. Ра́дуй­ся, гла́­домъ по­ги­ба́­ю­щихъ пи­та́­те­лю; ра́дуй­ся, ча́­домъ и́хъ ви­та́­ли­ща со­зи­да́­те­лю. Ра́дуй­ся, ми́­ло­сти исто́ч­ни­че не­и­сто­щи́­мый; ра́дуй­ся, скорбя́щихъ утѣ́­ши­те­лю не­зри́­мый. Ра́дуй­ся, по­слѣ́д­няя твоя́ вза­и́мъ Бо́­го­ви да́­вый; ра́дуй­ся, до́­брымъ рас­то­че́ніемъ су́­щихъ бо­га́­тая со­бра́­вый.

Ра́дуй­ся, пре­по­до́б­не о́тче Іо́­си­фе, бо­го­му́­дре, чу­до­тво́р­че.

Кон­да́къ 11

Вѣ́дый отъ Бо­же́­ствен­ныхъ Пи­са́ній, я́ко "еди́нъ, упо­ва́­ю­щій на Го́­спо­да, по­же­не́тъ ты́сящи, и два́ дви́г­не­та тмы́" (Втор. 32:30), не убоя́лся еси́, пре­по­до́б­не, еди́нъ со святы́мъ Ген­на́­діемъ со́н­ми­щу си́ль­ныхъ жи­до́в­ска­го зло­вѣ́рія по­бо́р­никъ про­тиву­ста́­ти, и ору́жіемъ и́сти­ны въ ко­не́цъ си́хъ по­ра­зи́лъ еси́. Вси́ бо раз­сѣ́яшася, я́ко пра́хъ предъ ли­це́мъ вѣ́тра, тебѣ́ же бла­го­да́р­ствен­но се́рд­цемъ и усты́ взы­ва́­ю­щу: Алли­лу́ія.

Икосъ 11

"Вѣ́руяй въ Мя́, - рече́ Го­спо́дь, - рѣ́ки отъ чре́­ва его́ исте­ку́тъ воды́ жи́вы" (Ин. 7:38). Сія́ у́бо въ тебѣ́ оправ­ди́­ша­ся, до­сто­чу́д­не Іо́­си­фе: не бо́ свяще́н­нымъ до­гма́­томъ бо­го­сло́­вія во учи́­ли­щи нѣ́­ко­емъ на­ста́в­ленъ бы́лъ еси́, но са́мъ жи­во́ю вѣ́­рою се́рд­ца взы­ску́яй Бо́га, и́стину обрѣ́лъ еси́ въ сло́­вѣ Бо́жіи и пи­са́ніихъ оте́­че­скихъ, и яви́лся еси́ опло́тъ не­о­бо­ри́мъ Пра­во­сла́­вія. Тѣ́м­же взы­ва́­емъ ти́:

Ра́дуй­ся, лжему́­дрія жи­до́в­ска­го лу­ка́в­ство раз­зо­ри́­вый; ра́дуй­ся, сомня́щихся въ Пра­во­сла́в­нѣй вѣ́рѣ утвер­ди́­вый. Ра́дуй­ся, бо́­дрый уче́нія Хри­сто́­ва за­щи́т­ни­че; ра́дуй­ся, бо­го­лю­би́­вою ре́­вно­стію воз­жже́н­ный свѣ­ти́ль­ни­че. Ра́дуй­ся, бла­го­по­тре́б­нѣ во оте́­че­ствіи тво­е́мъ возсія́вый; ра́дуй­ся, вѣ́ру въ дѣ́­лѣхъ житія́ тво­е­го́ по­ка­за́­вый. Ра́дуй­ся, разу́м­ныхъ и пре­про́­стыхъ бла­го­иску́с­ный учи́­те­лю; ра́дуй­ся, бли́ж­нихъ и да́ль­нихъ Россія́нъ про­свѣ­ти́­те­лю.

Ра́дуй­ся, пре­по­до́б­не о́тче Іо́­си­фе, бо­го­му́­дре, чу­до­тво́р­че.

Кон­да́къ 12

Ми́ру во­дво­ри́в­шуся въ Це́р­кви ду́хъ зло́­бы па́ки, па́­ко­сти дѣ́я, по­дви́г­ну се́рд­це Во́­лоцка­го вла­дѣ́­теля ко­ры́­сти ра́ди мно́­га сму­ще́нія и утѣ­сне́нія тво­ри́­ти оби́­те­ли, еще́ же и осу­жде́ніе не­пра́­вед­но воз­дви́г­нути на пре­по­до́б­на­го, е́же и паде́ на гла­ву́ осу­ди́в­ша­го. Со­бо́­ромъ бо свяще́н­нымъ пре­по­до́б­ный Іо́­сифъ съ ве­ли́­кою че́­стію опра́­вданъ бы́сть, при́­сно вос­пѣ­ва́яй Бо́гу: Алли­лу́ія.

Икосъ 12

Тече́ніе житія́ скон­ча­ва́я въ тру­дѣ́хъ и мо­ли́­твахъ, и по́­дви­зѣхъ бла­го­че́­стія, за­вѣ­ща́ пре­по­до́б­ный не­из­мѣ́н­но хра­ни́­ти пре́­дан­ный и́мъ уста́въ, зна­ме­на́­тель­нѣ при­ре́къ: "а́ще получу́ отъ Бо́га ми́­лость, то оби́­тель сія́ ни­чи́м­же скуд­на́ бу́­детъ", и та́ко, за­вѣ́су пло́­ти от­ло­жи́въ, оты́­де ко Го́­спо­ду и по си́хъ ис­цѣ­ле́нія по­да­ва́­ше боль­ны́мъ, при­хо­дя́щимъ съ мо­ли́­твою къ его́ мо­ще́мъ. Сего́ ра́ди при­но́­симъ ему́ по­хва­ле́нія та­ко­ва́я:

Ра́дуй­ся, чи­сто­ты́ ду­ше́в­ныя хра­ни́­те­лю не­ли­це­мѣ́р­ный; ра́дуй­ся, и́стин­ный ра́бе Хри­сто́въ благíй и вѣ́р­ный. Ра́дуй­ся, стрѣ­ла́­ми вра́жіихъ на­вѣ́тъ неуязви́­мый; ра́дуй­ся, спа­са́­е­мыхъ во­ждю́ не­по­бѣ­ди́­мый. Ра́дуй­ся, до­сто­чу́д­ный о́бра­зе тер­пѣ́нія; ра́дуй­ся, на­ста́в­ни­че не­ле́ст­на­го бла­го­го­вѣ́нія. Ра́дуй­ся, и по от­ше́­ствіи оби́­тель твою́ со­блю­да́яй; ра́дуй­ся, моля́щимся бла­го­по­тре́б­ная по­да­ва́яй. Ра́дуй­ся, отъ Го́­спо­да вѣ­не́цъ пра́­вды вос­прія́вый; ра́дуй­ся, сла́­вою чу­до­тво­ре́ній просія́вый.

Ра́дуй­ся, пре­по­до́б­не о́тче Іо́­си­фе, бо­го­му́­дре, чу­до­тво́р­че.

Кон­да́къ 13

О, пре­по­до́б­не и бо­го­но́с­не о́тче Іо́­си­фе! Вос­по­ми­на́­ю­ще ны́нѣ по́­дви­ги и тру­ды́ твоя́, я́же о Хри­стѣ́ содѣ́янная, мы́, грѣ́ш­ніи и не­до­сто́й­ніи раби́ твои́, сми­ре́н­но про́­симъ тя́: моли́ ми́­ло­сти­ва­го Бо́га, да да́руетъ ми́ръ жи́­тель­ству на́­шему и Це́р­кви Сво­е́й святѣ́й, да огра­ди́тъ ю́ отъ всѣ́хъ ду­ше­па́­губ­ныхъ и без­бо́ж­ныхъ уче́ній, да по­да́стъ же на́мъ вся́ бла­го­по­тре́б­ная въ жи­тіи́ се́мъ, и въ бу́ду­щемъ вѣ́цѣ да спо­до́­битъ на́съ вос­пѣ­ва́­ти Ему́: Алли­лу́ія.

Се́й кон­да́къ гла­го́­лет­ся три́­жды. Та́же Икосъ 1-й и Кон­да́къ 1-й

Мо­ли́­тва пе́р­вая

О, ве­ли́кій на­ста́в­ни­че, ре­вни́­те­лю и учи́­те­лю Пра­во­сла́в­ныя вѣ́ры, свя́те пре­му́­дре Іо́­си­фе! Пріи­ми́ мо­ле́ніе на́съ, грѣ́ш­ныхъ, къ тебѣ́ при­но­си́­мое, и те́­плымъ пред­ста́­тель­ствомъ умо­ли́ въ Тро́­и­цѣ сла́­ви­ма­го Бо́га, да нис­по́­слетъ Онъ бо­га́­тыя Своя́ ми́­ло­сти на́мъ, грѣ́ш­нымъ; да утвер­ди́тъ во святѣ́й Сво­е́й Пра­во­сла́в­нѣй Це́р­кви пра́вую вѣ́ру и бла­го­че́­стіе; па́­сты­ремъ ея́ да по­да́стъ святу́ю ре́­вность о спа­се́ніи сло­ве́с­на­го ста́­да, я́ко да вѣ́ру­ю­щихъ со­блю­ду́тъ, не­вѣ́ру­ю­щихъ же и отпа́д­шихъ отъ и́стин­ныя вѣ́ры вра­зумя́тъ и обратя́тъ. Бла­го­че­сти́­вѣй­шему же, Са­мо­дер­жа́в­нѣй­шему, Ве­ли́­кому Го­су­да́­рю на́­шему Импе­ра́­то­ру [имярекъ] да да́руетъ Го­спо́дь му́­же­ство, му́­дрость и на вра­ги́ по­бѣ́ду и одо­лѣ́ніе. Всѣ́мъ же на́мъ ис­про­си́ вся́ бла­го­по­тре́б­ная во вре́­мен­номъ се́мъ жи­тіи́ и по­ле́з­ная къ вѣ́ч­ному спа­се́нію на́­шему. Помяни́ ста́­до твое́, е́же со­бра́лъ еси́, не за­бу́­ди по­сѣ­ща́­ти ча́дъ сво­и́хъ и, я́ко ча­до­лю­би́­вый оте́цъ, не пре́­зри, ниже́ отри́­ни мо­ле́нія на́ша, но воз­дѣ­жи́ ру́цѣ твои́ мо­ли́­твен­нѣи ко Го́­спо­ду Бо́гу, да от­ло­жи́тъ пра́­вед­ный гнѣ́въ Сво́й, дви́­жи­мый на ны́, и из­ба́­витъ на́съ отъ вра́гъ ви́­ди­мыхъ и не­ви́­ди­мыхъ, отъ гла́­да, по­то́­па, меча́, смер­то­но́с­ныя я́звы, на­ше́­ствія ино­пле­ме́н­ныхъ и ме­ждоу­со́б­ныя бра́­ни. Ей, пре­ми­ло­се́р­дый за­сту́п­ни­че на́шъ, пре­сла́в­ный чу­до­тво́р­че, всѣ́хъ на́съ упра́­ви въ ми́рѣ и покая́ніи скон­ча́­ти жи­во́тъ на́шъ и пре­се­ли́­ти­ся со упо­ва́ніемъ въ бла­же́н­ная нѣ́­дра Авра­а́­мо­ва, идѣ́­же не­пре­ста́н­но сла­во­сло́­вит­ся все­пѣ́­тое и́мя Отца́ и Сы́на и Свята́го Ду́ха. Ами́нь.

Мо­ли́­тва ина́я

О, пре­бла­же́н­не и при­сно­сла́в­не о́тче на́шъ Іо́­си­фе! Вѣ́ду­ще твое́ ве­ли́­кое къ Бо́гу дер­зно­ве́ніе и къ тво­е­му́ тве́р­дому за­ступле́нію при­бѣ­га́­ю­ще, въ со­кру­ше́ніи се́рд­ца мо́­лимъ тя́: оза­ри́ на́съ свѣ́­томъ да­ро­ва́н­ныя тебѣ́ бла­го­да́­ти, и мо­ли́­тва­ми тво­и́­ми по­мо­зи́ на́мъ бу́р­ное мо́ре житія́ сего́ прей­ти́ безмяте́ж­но и при­ста́­ни­ща спа­се́нія не­бла́з­нен­но до­сти́г­нути, по­ра­бо­ще́­ни бо су́ще су́­ет­ны­ми, и грѣ­хо­лю­би́­ви, и не́­мощ­ни, е́же отъ обы­ше́д­шихъ на́съ зо́лъ воз­ни́­к­нути. Къ кому́ при­бѣ́г­немъ, а́ще не къ тебѣ́, яви́в­ше­му не­о­ску­дѣ­ва́­е­мое бо­га́т­ство ми́­ло­сти въ зем­нѣ́мъ жи­тіи́ тво­е́мъ? Вѣ́руемъ же, я́ко и по от­ше́­ствіи тво­е́мъ мно­жа́й­шее стяжа́лъ еси́ да­ро­ва́ніе ми­ло­се́р­до­ва­ти бѣ́д­ству­ю­щихъ. Тѣ́м­же у́бо, при­па́­да­ю­ще ны́нѣ къ цѣль­бо­но́с­но­му гро́бу тво­е­му́, уми­ле́н­но про́­симъ тя́, свя́тче Бо́жій: са́мъ иску­ше́нъ бы́въ, по­мо­зи́ и на́мъ иску­ша́­е­мымъ; по­сто́мъ и бдѣ́ніемъ по­пра́­вый си́лу де́­мон­скую, и на́съ отъ на­па­де́ній вра́жіихъ за­щи­ти́; пре­пи­та́­вый гла́­домъ по­ги­ба́­ю­щія, и на́мъ ис­про­си́ у Го́­спо­да изо­би́ліе пло­до́въ зем­ны́хъ и вся́ ко спа­се́нію по­тре́б­ная; по­сра­ми́­вый ере­ти́­че­ская му­дро­ва́нія, Це́р­ковь святу́ю отъ е́ре­сей, и ра­ско́­ловъ, и сму­ще́ній, мо­ли́­тва­ми тво­и́­ми огра­ди́. Да то́­жде му́др­ствуемъ вси́, еди́­нымъ се́рд­цемъ сла́вяще Святу́ю, Еди­но­су́щ­ную, Жи­во­тво­ря́щую и Не­раз­дѣ́ль­ную Тро́­и­цу, Отца́ и Сы́на и Свята́го Ду́ха во вся́ вѣ́ки. Ами́нь.

Тро­па́рь, гла́съ 5

Яко по́ст­ни­ковъ удо­бре́ніе и отце́въ кра­со­ту́, ми́­ло­сти по­да́­теля, раз­су­жде́нія свѣ­ти́ль­ни­ка, вси́ вѣ́р­ніи, со­ше́д­ше­ся, вос­хва́­лимъ кро́­то­сти учи́­теля и ере­се́й по­сра­ми́­теля пре­му́­дра­го Іо́­си­фа, россíйскую звѣз­ду́, моля́щася Го́­спо­ду по­ми́­ло­ва­ти­ся ду­ша́мъ на́­шимъ.

Кон­да́къ, гла́съ 8

Житія́ тре­вол­не́нія, и мяте́жъ мірскíй, и стра́ст­ная взы­гра́нія въ ни­что́­же вмѣ­ни́въ, пу­сты́н­ный гра­жда­ни́нъ по­ка­за́л­ся еси́, мно́­гихъ бы́въ на­ста́в­никъ, Іо́­си­фе пре­по­до́б­не, мо­на́­ховъ со­бра́­тель и мо­ле́б­никъ вѣ́­ренъ, чи­сто­ты́ ра­чи́­тель. Моли́ Хри­ста́ Бо́га спа­сти́­ся ду­ша́мъ на́­шимъ.

Ве­ли­ча́­ніе

Убла­жа́­емъ тя́, пре­по­до́б­не о́тче Іо́­си­фе, и чте́мъ святу́ю па́мять твою́, на­ста́в­ни­че мо­на́­ховъ и со­бе­сѣ́д­ни­че а́н­ге­ловъ.