Конда́къ 1

Избра́нному и ди́вному но́вому Сиби́рскія страны́ чудотво́рцу всера́достно ны́нѣ прино́симъ ти́, свя́те Симео́не, хвале́бная пѣ́нія. Ты́ же, я́ко имѣ́яй дерзнове́ніе ко Христу́ Бо́гу, отъ вся́кихъ на́съ бѣ́дъ свободи́, да зове́мъ ти́:

Ра́дуйся, Симео́не, чудотво́рче преди́вный!

Икосъ 1

Ангелъ во пло́ти и небе́сный человѣ́къ яви́лся еси́, блаже́нне Симео́не, а́нгельски бо въ мíрѣ се́мъ пожи́лъ еси́, тѣ́мже и а́нгельстіи чи́ни удиви́шася непоро́чности твоего́ житія́ и, по преставле́ніи твое́мъ, съ весе́ліемъ прія́ша пра́ведную твою́ ду́шу. Сего́ ра́ди и мы́, чудя́щеся высотѣ́ твое́й добродѣ́тели, прославля́емъ тя́ си́це:

Ра́дуйся, я́ко свя́то и богоуго́дно на земли́ пожи́лъ еси́; ра́дуйся, я́ко по́двигомъ до́брымъ здѣ́ подвиза́вся, тече́ніе свое́ пра́ведно сконча́лъ еси́. Ра́дуйся, я́ко пресели́лся еси́ въ поко́ища небе́сная; ра́дуйся, я́ко въ оби́телехъ премíрныхъ, я́же угото́ва Бо́гъ лю́бящимъ Его́, на несконча́емыя вѣ́ки водворя́ешися. Ра́дуйся, я́ко Ца́рь ца́рствующихъ прія́тъ тя́ въ небе́сное Ца́рствіе; ра́дуйся, я́ко при́сно со а́нгелы на небеси́ обита́еши. Ра́дуйся, я́ко съ проро́ки и апо́столы вселя́ешися; ра́дуйся, я́ко съ по́стники и преподо́бными торжествова́ти сподо́бился еси́. Ра́дуйся, я́ко предстои́ши ны́нѣ со всѣ́ми святы́ми престо́лу Бо́жію; ра́дуйся, я́ко Пресвяту́ю Тро́ицу несре́дственнѣ зрѣ́ти сподобля́ешися. Ра́дуйся, я́ко неизрече́нную сла́ву Госпо́дню я́вственнѣ созерца́еши; ра́дуйся, я́ко тоя́ прича́стника бы́ти удосто́и тя́ Госпо́дь.

Ра́дуйся, Симео́не, чудотво́рче преди́вный!

Конда́къ 2

Ви́дя вдови́цу зѣло́ пла́чущую, я́коже бо тогда́ умилосе́рдився, и ю́, изнемо́гшу тѣ́ломъ и бы́вшу бли́зъ коне́чнаго издыха́нія и очи́ма нима́ло зрѣ́ти могу́щу, яви́вся исцѣли́лъ еси́. Си́це и о мнѣ́ умилосе́рдися, уго́дниче Бо́жій, и отъ мно́гихъ грѣхопаде́ній немощству́ющее тѣ́ло мое́ исцѣли́ и ду́шу мою́ ко спасе́нію наста́ви, да въ ра́дости воззову́ къ Бо́гу пѣ́снь: Аллилу́ія.

Икосъ 2

Разумѣ́ти хотя́щу архіере́ю Сиби́рскія страны́ и́мя твое́, егда́ обрѣ́тены бы́ша святы́я твоя́ мо́щи, ты́ въ видѣ́ніи я́влься ему́, о и́мени свое́мъ возвѣсти́лъ еси́, о́нъ же, удиви́вся чудеси́ и просла́вивъ Бо́га, похва́льныя глаго́лы вѣща́я, вопія́ше тебѣ́ си́це:

Ра́дуйся, вели́кій пра́ведниче Бо́жій, въ чудесѣ́хъ просія́вый; ра́дуйся, цѣле́бниче неду́говъ всѣ́мъ, призыва́ющимъ тя́ съ вѣ́рою. Ра́дуйся, я́ко и пре́жде проше́нія по́мощію предваря́еши; ра́дуйся, я́ко и недоумѣва́ющихъ о прославле́ніи нетлѣ́нныхъ моще́й твои́хъ чудесы́ твои́ми вразуми́лъ еси́. Ра́дуйся, я́ко разсла́бленныхъ укрѣпи́лъ еси́; ра́дуйся, я́ко слѣпы́мъ прозрѣ́ніе дарова́лъ еси́. Ра́дуйся, хромы́мъ хожде́ніе устроя́яй; ра́дуйся, отъ бѣсну́ющихся бѣсо́въ отгна́телю. Ра́дуйся, ско́рбныхъ утѣ́шителю; ра́дуйся, ни́щихъ и убо́гихъ покрови́телю. Ра́дуйся, правосла́вныхъ утвержде́ніе; ра́дуйся, ересе́й посрамле́ніе.

Ра́дуйся, Симео́не, чудотво́рче преди́вный!

Конда́къ 3

Си́ла Вы́шняго утверди́ тя́ въ житіи́ твое́мъ свято́мъ, и ты́ подвиза́лся еси́ о спасе́ніи души́ твоея́, труда́ми бо и воздержа́ніемъ увяди́лъ еси́ плотскíя стра́сти и въ непреста́нныхъ моли́твахъ твои́хъ всегда́ взыва́лъ еси́ къ Бо́гу: Аллилу́ія.

Икосъ 3

Имѣ́я милосе́рдіе мно́гое, о призыва́ющихъ тя́ съ вѣ́рою при́сно мо́лишися къ Бо́гу, у Него́ же равноа́нгельнымъ житіе́мъ твои́мъ вели́кое дерзнове́ніе стяжа́лъ еси́. Не пре́зри и на́съ, недосто́йныхъ, тре́бующихъ твоея́ по́мощи, и я́ко да́ры, пріими́ отъ на́съ пѣ́снь сію́:

Ра́дуйся, я́ко вся́, ели́ка про́сиши отъ Бо́га, да́руетъ ти́ Госпо́дь; ра́дуйся, я́ко моли́твы твоя́ о на́съ, я́коже кади́ло благово́нное, отъ Бо́га пріе́млются. Ра́дуйся, я́ко возжада́ душа́ твоя́ къ Бо́гу Крѣ́пкому; ра́дуйся, Христа́ еди́наго возлюби́вый. Ра́дуйся, я́ко невозвра́тнымъ жела́ніемъ послѣ́довалъ еси́ Ему́; ра́дуйся, добродѣ́тельное житіе́ всегда́ имѣ́вый. Ра́дуйся, возненави́дѣвый стра́сти мíра сего́; ра́дуйся, маловре́меннаго утѣше́нія на земли́ не иска́вый. Ра́дуйся, смиренному́дріемъ украси́выйся; ра́дуйся, тве́рдый адама́нте и сто́лпе непоколеби́мый прило́ги вра́жіими. Ра́дуйся, я́ко нетлѣ́ніемъ тѣ́ло твое́ просла́ви Госпо́дь; ра́дуйся, я́ко отъ гро́ба твоего́ и пе́рсть пріе́млющіи исцѣля́ются.

Ра́дуйся, Симео́не, чудотво́рче преди́вный!

Конда́къ 4

Бу́ря недоумѣ́нія смуща́етъ мя́, ка́ко возмогу́ досто́йно воспѣ́ти чудеса́ твоя́, блаже́нне Симео́не? Кто́ бо мно́гихъ чудотворе́ній твои́хъ да́ры по досто́инству изрещи́ мо́жетъ? Оба́че и а́зъ ди́вно въ тебѣ́ прославля́ющемуся Бо́гу вопи́ти дерза́ю: Аллилу́ія.

Икосъ 4

Слы́шавше, блаже́нне и преди́вне Симео́не, о вели́чіи чуде́съ твои́хъ, я́ко моли́твами твои́ми су́щихъ въ бѣда́хъ и ско́рбехъ предваря́еши, ско́ро отъ ни́хъ избавля́я, вопіе́мъ тебѣ́ такова́я:

Ра́дуйся, избавле́ніе на́ше отъ печа́ли и скорбе́й; ра́дуйся, я́ко твои́мъ предста́тельствомъ да́руется духо́вная благода́ть всѣ́мъ, съ те́плою вѣ́рою къ тебѣ́ притека́ющимъ. Ра́дуйся, я́ко твои́ми моли́твами ко́зни нечи́стыхъ духо́въ побѣждены́; ра́дуйся, я́ко и невѣ́дущимъ и неслы́шавшимъ о прославле́ніи твое́мъ исцѣле́ніе подае́ши. Ра́дуйся, я́ко цѣле́бныя да́ры всю́ду то́чиши; ра́дуйся, я́ко страну́ Сиби́рскую при́сно присѣща́еши. Ра́дуйся, ско́рый оби́димыхъ засту́пниче; ра́дуйся, су́щимъ въ лю́тыхъ обстоя́ніихъ посо́бниче и предста́телю. Ра́дуйся, малоду́шныя утѣша́яй; ра́дуйся, неду́жнымъ крѣ́пкое исправле́ніе. Ра́дуйся, плѣне́ннымъ ско́рое свобожде́ніе; ра́дуйся, грѣ́шнымъ ко спасе́нію наставле́ніе.

Ра́дуйся, Симео́не, чудотво́рче преди́вный!

Конда́къ 5

Пресвѣ́тлая звѣзда́ яви́лся еси́, пра́ведный Симео́не: су́щихъ бо во тмѣ́ у́мныя о́чи озаря́я свѣ́томъ Ева́нгелія Христо́ва и избавля́я заблу́ждшихъ отъ сѣте́й змíевыхъ и отъ всѣ́хъ кова́рствъ его́, научи́лъ еси́ я́ благода́рственно и всера́достно съ ли́ки святы́хъ ко Христу́ Бо́гу вопи́ти: Аллилу́ія.

Икосъ 5

Ви́дѣвше въ житіи́ твое́мъ, блаже́нне, духо́вныхъ по́двиговъ твои́хъ высо́кая исправле́нія, вся́кій ра́зумъ удивля́ющая, прославля́емъ да́вшаго ти́ такову́ю благода́ть Бо́га, тебѣ́ же хвале́бными гла́сы си́це вопіе́мъ:

Ра́дуйся, я́ко юро́дъ бы́въ Христа́ ра́ди, высоту́ смиренному́дрія стяжа́лъ еси́; ра́дуйся, я́ко стра́нникъ и пришле́цъ на земли́ обрѣ́лся еси́. Ра́дуйся, я́ко ны́нѣ граждани́номъ небе́снымъ бы́ти на несконча́емыя вѣ́ки сподо́бился еси́; ра́дуйся, я́ко незло́бивый а́гнецъ въ терпѣ́ніи твое́мъ бы́лъ еси́. Ра́дуйся, я́ко кро́тостію ко озлобля́ющимъ тя́ зе́млю живы́хъ наслѣ́довалъ еси́; ра́дуйся, чи́стыми ду́шу и тѣ́ло твое́ сохрани́вый, и ны́нѣ чи́стымъ се́рдцемъ зря́й Бо́га. Ра́дуйся, я́ко му́дрою мы́слію утверди́вый ду́шу твою́ во спасе́ніе; ра́дуйся, я́ко съ невозвра́тною наде́ждою бла́гъ вѣ́чныхъ преста́вился еси́ къ Бо́гу. Ра́дуйся, я́ко десна́го стоя́нія удосто́ился еси́; ра́дуйся, я́ко не скры́лъ еси́ тала́нта, ввѣ́реннаго ти́ Бо́гомъ. Ра́дуйся, благíй ра́бе и вѣ́рный, вше́дый въ ра́дость Го́спода своего́; ра́дуйся, я́ко ны́нѣ утѣша́ешися, я́коже дре́вній о́ный ева́нгельскій Ла́зарь, на ло́нѣ Авраа́мли.

Ра́дуйся, Симео́не, чудотво́рче преди́вный!

Конда́къ 6

Проповѣ́дника богоно́снаго Па́вла вѣща́ніе и глаго́лы исполня́я, Симео́не свя́те, юро́дственное Христа́ ра́ди на земли́ пожи́лъ житіе́, и болѣ́зни мно́гія претерпѣва́я, всегда́ благода́рственныя Бо́гу возсыла́лъ еси́ хвалы́, си́це глаго́ля Ему́: Аллилу́ія.

Икосъ 6

Возсія́лъ еси́ ве́ліе просвѣще́ніе свѣ́тлостію чуде́съ твои́хъ, пра́ведный Симео́не, отъ свята́го гро́ба твоего́ непреста́нно истека́ющихъ, и тѣ́мъ дале́че отгна́лъ еси́ тму́ ересе́й и раско́ловъ отъ окре́стныхъ мѣ́стъ, идѣ́же въ правовѣ́ріи и благоче́стіи подвиза́лся еси́ и въ нетлѣ́ніи тѣлеси́ почива́еши. Мы́ же, чудя́щеся си́мъ, взыва́емъ ти́ си́це:

Ра́дуйся, я́ко яви́лся во странѣ́ Сиби́рстѣй крѣ́пкій защи́тникъ Правосла́вія проти́ву развра́тниковъ и ху́льниковъ Христо́вы Це́ркве; ра́дуйся, я́ко и ны́нѣ борю́щимся съ ни́ми усе́рдный посо́бникъ обрѣта́ешися. Ра́дуйся, проти́вниковъ святы́я Це́ркве посрами́телю; ра́дуйся, злы́хъ волко́въ отъ ста́да Христо́ва отгна́телю. Ра́дуйся, облекíйся во ору́жіе свѣ́та; ра́дуйся, лука́вствующихъ обличи́телю. Ра́дуйся, правосла́вныхъ ти́хое приста́нище; ра́дуйся, путеше́ствующихъ благо́е поспѣше́ніе. Ра́дуйся, я́ко и отъ мно́гія ску́дости твоея́ разумѣва́лъ еси́ на ни́ща и убо́га; ра́дуйся, я́ко ми́лостивъ бы́въ при жи́зни, благотвори́ши всѣ́мъ тре́бующимъ и по сме́рти. Ра́дуйся, я́ко избра́лъ еси́ до́брая, е́же Бо́га ра́ди тружда́тися; ра́дуйся, я́ко на тебѣ́ испо́лнися сло́во подви́жническое: болѣ́зненно, е́же тружда́тися, но блаже́нно воспрія́тіе.

Ра́дуйся, Симео́не, чудотво́рче преди́вный!

Конда́къ 7

Хотя́щу нѣ́коему человѣ́ку отъ мно́гихъ враче́въ исцѣли́тися отъ очны́я болѣ́зни, и егда́ ничто́же успѣ́, прибѣ́гшу къ тебѣ́, врачу́ безме́здному, а ты́ о́чи его́, напо́лнены кро́вію и зрѣ́ти не могу́щая, пе́рстію внеза́пу исцѣли́лъ еси́. Онъ же возра́довався, благодаря́ше тя́ и, Бо́га прославля́я, рече́: Аллилу́ія.

Икосъ 7

Ди́вна тя́ показа́ на́мъ Творе́цъ и Госпо́дь всѣ́хъ чудотво́рца: егда́ бо нетлѣ́ніемъ просла́ви тѣ́ло твое́, тогда́ и земля́ не скры́ гро́бъ тво́й и яви́ всѣ́мъ на́мъ, я́ко многоцѣ́нное сокро́вище. Тѣ́мже и мы́, чудя́щеся, вопіе́мъ ти́ си́це:

Ра́дуйся, цвѣ́те нетлѣ́нный, въ странѣ́ Сиби́рстѣй прекра́сно процвѣты́й; ра́дуйся, до́блій подви́жниче благоче́стія, во гра́дѣ Верхоту́рстѣмъ возсія́вый. Ра́дуйся, я́ко явля́ешися а́ки дре́во живо́тное, отъ него́же неду́гующіи получа́ютъ исцѣле́ніе; ра́дуйся, я́ко предста́тельствомъ твои́мъ предъ Бо́гомъ, а́ки вѣ́твь благосѣнноли́ственная, покрыва́еши на́съ. Ра́дуйся, я́ко до́брѣ вкорени́лся еси́ въ вертогра́дѣ Христо́вы Це́ркве; ра́дуйся, я́ко оби́льные плоды́ добродѣ́телей прине́слъ еси́ Бо́гу. Ра́дуйся, я́ко піе́ши ны́нѣ во́ду живо́тную отъ неисчерпа́емаго исто́чника безсме́ртія; ра́дуйся, заблу́ждшихъ наста́вниче. Ра́дуйся, я́ко ка́ющимся въ согрѣше́ніихъ испроша́еши отъ Бо́га проще́ніе; ра́дуйся, всѣ́хъ благи́хъ на́мъ отъ Него́ хода́таю. Ра́дуйся, я́ко свѣ́тлую оде́жду чистоты́ и цѣлому́дрія до́брѣ сохрани́въ, вше́лъ еси́ въ черто́гъ небе́сный; ра́дуйся, я́ко чи́стая душа́ твоя́ къ ли́ку ева́нгельскихъ му́дрыхъ дѣ́въ сопричте́ся и ку́пно съ ни́ми а́нгельски водворя́ется въ небе́сномъ черто́зѣ Жениха́ Христа́.

Ра́дуйся, Симео́не, чудотво́рче преди́вный!

Конда́къ 8

Стра́нное на земли́ житіе́ пожи́въ и удали́вся су́етнаго мíра, добродѣ́тельми къ Бо́гу прибли́жился еси́, сего́ ра́ди высо́кій Бо́гъ, ви́дя твое́ смире́ніе, возвели́чи тя́ Свое́ю благода́тію, Его́же восхваля́юще, пое́мъ Ему́ ку́пно съ тобо́ю а́нгельскую пѣ́снь: Аллилу́ія.

Икосъ 8

Ве́сь у́мъ тво́й въ вы́шній Іерусали́мъ при́сно простира́я, а́ще тѣ́ломъ и на земли́ пребыва́лъ еси́, вся́ кра́сная мíра сего́ возненави́дѣлъ и равноа́нгельное житіе́ здѣ́ пожи́лъ еси́, Симео́не блаже́нне, тѣ́мъ и отъ чту́щихъ тя́ слы́шиши сія́:

Ра́дуйся, человѣ́че Бо́жій досточу́дный; ра́дуйся, зерца́ло добродѣ́телей преизя́щныхъ. Ра́дуйся, премѣни́вый тлѣ́нная настоя́щая на бу́дущая вѣ́чная; ра́дуйся, уподо́бивыйся Іову терпѣ́ніемъ. Ра́дуйся, селе́ніе честно́е Святы́я Тро́ицы; ра́дуйся, свя́тче Бо́жій, со всѣ́ми святы́ми прославля́емый. Ра́дуйся, ковче́же, отъ пото́па грѣхо́внаго призыва́ющихъ тя́ спаса́яй; ра́дуйся, я́ко услажда́лъ еси́ се́рдце твое́ весе́ліемъ бу́дущихъ бла́гъ. Ра́дуйся, воздержа́ніемъ пло́ть твою́ изнури́вый; ра́дуйся, я́ко свя́тостію житія́ твоего́ ми́лость Бо́жію обрѣ́лъ еси́. Ра́дуйся, я́ко непреста́нными моли́твами о на́съ Бо́га умилостивля́еши; ра́дуйся, я́ко благи́мъ наде́ждамъ твои́мъ исполне́ніе прія́лъ еси́.

Ра́дуйся, Симео́не, чудотво́рче преди́вный!

Конда́къ 9

Все́ мно́жество человѣ́ческое удиви́ся е́же на земли́ во пло́ти твоему́ терпѣ́нію и незло́бію, непоро́чна и пра́ведна тя́ зря́ще, и ны́нѣ ми́лостивымъ твои́мъ предста́тельствомъ въ ско́рбехъ на́съ не оставля́юща. Тѣ́мже и мы́, ра́дующеся, къ Бо́гу пое́мъ пѣ́снь: Аллилу́ія.

Икосъ 9

Витíи многовѣща́нныя изнемого́ша по досто́инству повѣ́дати мно́гое твое́ терпѣ́ніе и те́плую ко Хри́сту любо́вь. Азъ же, многогрѣ́шный, ка́ко возмогу́ изглаго́лати равноа́нгельное твое́ житіе́ и пресла́вная чудеса́? Но оба́че дерза́ю, надѣ́яся на твое́ беззло́біе, вопи́ти тебѣ́ си́це:

Ра́дуйся, я́ко а́нгеломъ подо́бяся, вы́ну пуща́лъ еси́ на не́бо о́чи твоего́ се́рдца; ра́дуйся, я́ко до́блими твои́ми по́двиги спасе́ніе и вѣне́цъ нетлѣ́нный отъ Христа́ Бо́га прія́лъ еси́. Ра́дуйся, я́ко на вся́къ де́нь и на вся́ку но́щь славосло́вилъ еси́ Творца́ вся́ческихъ; ра́дуйся, я́ко побѣди́лъ еси́ діа́вола смире́ніемъ свои́мъ. Ра́дуйся, я́ко ни́щь тѣ́ломъ и ду́хомъ бы́лъ еси́ на земли́, сего́ ра́ди угото́ва ти́ Госпо́дь Ца́рство небе́сное; ра́дуйся, кро́тости ра́ди твоея́ наслѣ́дивый зе́млю обѣтова́нія. Ра́дуйся, я́ко и ины́хъ, зря́щихъ твою́ свя́тость, научи́лъ еси́ пра́ведно жи́ти; ра́дуйся, я́ко душе́вныя стра́сти исцѣля́еши. Ра́дуйся, я́ко тѣле́сныя болѣ́зни врачу́еши; ра́дуйся, я́ко и многовре́менныя неду́ги отъ человѣ́къ отгоня́еши. Ра́дуйся, я́ко су́щимъ бли́зъ коне́чнаго издыха́нія здра́віе да́руеши; ра́дуйся, я́ко и отъ смертоно́сныхъ я́звъ свобожда́еши.

Ра́дуйся, Симео́не, чудотво́рче преди́вный!

Конда́къ 10

Спасе́ніе восхотѣ́въ да́ти Госпо́дь лю́демъ Свои́мъ, свѣ́тлаго свѣти́льника всѣ́мъ на́мъ даде́ тебе́, точа́ща благода́ть цѣльбы́ всѣ́мъ, притека́ющимъ къ ра́цѣ моще́й твои́хъ. И мы́, получи́вше ми́лость отъ безме́зднаго тя́ врача́, благода́рными гла́сы восхваля́юще Бо́га, пое́мъ пѣ́снь: Аллилу́ія.

Икосъ 10

Стѣна́ еси́ ты́ и покро́въ всѣ́мъ притека́ющимъ къ тебѣ́, пра́ведный Симео́не: и́бо Госпо́дь просла́ви тя́, украси́въ нетлѣ́ніемъ и чудесы́ и приглаша́ти тебѣ́ научи́:

Ра́дуйся, сто́лпе непоколеби́мый Правосла́вія; ра́дуйся, сокро́вище неоску́дно мно́гихъ исцѣле́ній. Ра́дуйся, пода́телю прося́щимъ у тебе́ я́же на по́льзу; ра́дуйся, уцѣлому́дривый живу́щія сту́дно. Ра́дуйся, наказа́телю помраче́нныхъ умо́мъ; ра́дуйся, учи́телю смиренному́дрія и терпѣ́нія. Ра́дуйся, я́ко въ со́ніихъ явля́яся, науча́еши до́брому житію́; ра́дуйся, звѣздо́, чуде́сно возсія́вшая въ Сиби́рстѣй странѣ́. Ра́дуйся, я́ко луча́ми чудотворе́ній твои́хъ просвѣща́еши и далеча́йшія страны́; ра́дуйся, я́ко нѣ́когда незна́емь, ны́нѣ же со сла́вою познава́ешися отъ всѣ́хъ и́щущихъ тя́. Ра́дуйся, я́ко ры́барь бы́въ, содѣ́лался еси́ ловце́мъ человѣ́ковъ; ра́дуйся, я́ко хода́тайствомъ твои́мъ къ Бо́гу му́къ вѣ́чныхъ свобожда́еши на́съ.

Ра́дуйся, Симео́не, чудотво́рче преди́вный!

Конда́къ 11

Пѣ́ніе умиле́нное приношу́ ти́, недосто́йный, и вопію́ со слеза́ми: хода́тайствуй за мя́ при́сно къ Бо́гу, душе́ю и тѣ́ломъ, отъ страсте́й вою́ющихъ на мя́, лю́тѣ неду́гующаго, и пода́ждь ми́ моли́твами твои́ми исцѣле́ніе и грѣхо́въ избавле́ніе, отъ се́рдца тебѣ́ сія́ принося́щему, да и а́зъ въ ра́дости воспою́ прославля́ющему тя́ Бо́гу пѣ́снь: Аллилу́ія.

Икосъ 11

Свѣтопріе́мную свѣщу́ зри́мъ тя́, богому́дре Симео́не: невеще́ственнымъ бо любве́ огне́мъ возже́глся еси́ и наставля́еши къ боже́ственному дѣя́нію вся́, о́бразомъ житія́ твоего́, я́ко заре́ю, просвѣща́я чу́вства на́ша, тѣ́мже и досто́инъ еси́ зва́ніемъ почита́тися си́мъ:

Ра́дуйся, луче́ пресвѣ́тлая, отъ Со́лнца Христа́ возсія́вшая; ра́дуйся, свѣти́ло благоче́стія немерца́ющее. Ра́дуйся, я́ко свѣ́тъ прему́дрости Бо́жія просвѣти́ ду́шу твою́; ра́дуйся, я́ко вѣ́чнаго сего́ свѣ́та луче́й чрезъ тебе́ и мы́ сподобля́емся. Ра́дуйся, безме́здный врачу́; ра́дуйся, я́ко источа́еши оби́льныя струи́ исцѣле́ній. Ра́дуйся, благонаде́жный о на́съ предста́телю и моли́твенниче предъ престо́ломъ Госпо́днимъ; ра́дуйся, спаси́тельное приста́нище всѣ́мъ, притека́ющимъ къ тебѣ́. Ра́дуйся, я́ко су́щимъ въ пучи́нѣ скорбе́й обрѣта́ешися ко́рмчій; ра́дуйся, те́плый засту́пниче су́щимъ во обстоя́ніихъ лю́тыхъ. Ра́дуйся, благоуха́ніе духо́вное источа́яй отъ многоцѣле́бныхъ твои́хъ моще́й; ра́дуйся, еле́емъ ра́дованія исцѣля́яй ско́рби душе́вныя вѣ́рою моля́щихся тебѣ́.

Ра́дуйся, Симео́не, чудотво́рче преди́вный!

Конда́къ 12

Благода́ть превѣ́лію даде́ тебѣ́ Госпо́дь неду́жныхъ болѣ́зни врачева́ти, де́моны прогоня́ти и стра́сти цѣли́ти, тѣ́мже не забу́ди и на́съ, усе́рдно призыва́ющихъ тя́ во вре́мя тѣ́сныхъ обстоя́ній и тя́жкихъ напа́стей, и моли́твами твои́ми отъ о́ныхъ изба́ви, да благода́рно вопіе́мъ къ Бо́гу: Аллилу́ія.

Икосъ 12

Пою́ще твоя́ чудеса́, пра́ведный Симео́не, вѣ́рою несомнѣ́нною притека́емъ къ многоцѣле́бнымъ и святы́мъ моще́мъ твои́мъ, и припа́дая къ ни́мъ, съ любо́вію и стра́хомъ лобыза́емъ о́ныя. Ты́ же, о свя́тче Бо́жій, я́ко благоутро́бный, принеси́ моле́ніе ко

Влады́цѣ, да сподо́битъ на́съ десна́го стоя́нія на судѣ́ Свое́мъ, вопію́щихъ къ тебѣ́ сицева́я:
Ра́дуйся, вели́кій Христо́въ уго́дниче; ра́дуйся, моли́твенниче усе́рдный о воспѣва́ющихъ тя́. Ра́дуйся, Бо́жій избра́нниче, благода́тію Ду́ха Свята́го пріосѣне́нный; ра́дуйся, пра́ведниче, возвесели́выйся о Го́сподѣ. Ра́дуйся, я́ко мзда́ твоя́ мно́га на небесѣ́хъ; ра́дуйся, предста́телю на́шъ ско́рый и те́плый. Ра́дуйся, хода́таю неусы́пный о на́съ предъ Бо́гомъ; ра́дуйся, и́го благо́е и бре́мя ле́гкое понесы́й. Ра́дуйся, за труды́ твоя́ и по́двиги на земли́, вѣ́чное упокое́ніе обрѣты́й на небеси́; ра́дуйся, я́ко вре́менныхъ и вѣ́чныхъ бла́гъ отъ Бо́га на́мъ при́сно про́сиши. Ра́дуйся, о ка́ющихся спору́чниче предъ Бо́гомъ; ра́дуйся, кади́ло благово́нное, облагоуха́ющее чту́щихъ тя́.

Ра́дуйся, Симео́не, чудотво́рче преди́вный!

Конда́къ 13

О, пречу́дный и ми́лостивый но́вый чудотво́рче, пра́ведный Симео́не! Пріими́ ны́нѣ ма́лое сіе́ моле́ніе на́ше и принеси́ е́ ко Христу́ Бо́гу на́шему, да сохрани́тъ на́съ отъ вра́гъ ви́димыхъ и неви́димыхъ, отъ наше́ствія иноплеме́нникъ, отъ неду́га и гла́да, отъ вся́кія ско́рби и внеза́пныя сме́рти и бу́дущаго вѣ́чнаго муче́нія изба́витъ, моли́твами твои́ми, всѣ́хъ вопію́щихъ къ Нему́: Аллилу́ія.

Се́й конда́къ глаго́лется три́жды. Та́же Икосъ 1-й и Конда́къ 1-й

Моли́тва

О, святы́й и пра́ведный Симео́не, чи́стою душе́ю твое́ю въ небе́сныхъ оби́телехъ въ ли́цѣ святы́хъ водворя́яйся, здѣ́ же тѣ́ломъ твои́мъ нетлѣ́нно почива́яй! По да́ннѣй ти́ благода́ти отъ Го́спода моли́тися о на́съ, ми́лостивно при́зри на на́съ многогрѣ́шныхъ, а́ще и недосто́йнѣ, оба́че съ вѣ́рою и упова́ніемъ притека́ющихъ ко святы́мъ и цѣльбоно́снымъ моще́мъ твои́мъ, и испроси́ на́мъ отъ Бо́га проще́ніе согрѣше́ній на́шихъ, въ ня́же впа́даемъ мно́жицею во вся́ дни́ живота́ на́шего и я́коже пре́жде о́вымъ у́бо отъ о́чныя зѣ́льныя болѣ́зни нима́ло зрѣ́ти могу́щимъ исцѣле́ніе оче́съ, о́вымъ же бли́зъ сме́рти бы́вшимъ отъ лю́тыхъ неду́говъ врачева́ніе, и ины́мъ ина́я мно́гая пресла́вная благодѣя́нія дарова́лъ еси́, си́це изба́ви и на́съ отъ неду́говъ душе́вныхъ и тѣле́сныхъ и отъ вся́кія ско́рби и печа́ли, и вся́ блага́я къ настоя́щему житію́ на́шему и къ вѣ́чному спасе́нію благопотре́бная на́мъ отъ Го́спода испроси́, да́ та́ко твои́мъ предста́тельствомъ и моли́твами стяжа́вше вся́ на́мъ поле́зная, а́ще и недосто́йніи, благода́рнѣ восхваля́юще тя́, просла́вимъ Бо́га, ди́внаго во святы́хъ Свои́хъ, Отца́ и Сы́на и Свята́го Ду́ха, ны́нѣ и при́сно и во вѣ́ки вѣко́въ. Ами́нь.

Тропа́рь на пренесе́ніе моще́й [12-го Септе́мврія], гла́съ 4

Дне́сь ра́дуется сла́вная страна́ Сиби́рь, обрѣ́тши святы́я твоя́ мо́щи вну́трь себе́. Архіере́и, свяще́нницы и воево́ды и ве́сь со́нмъ людскíй, духо́внѣ веселя́щеся, вопіе́мъ ти́: о, богому́дре Симео́не, изба́ви на́съ, къ тебѣ́ прибѣга́ющихъ, отъ всѣ́хъ бѣ́дъ, прося́ пода́тися всѣ́мъ по коего́ждо проше́нію и изба́витися странѣ́ се́й и гра́ду отъ о́гненнаго запале́нія и пога́нскаго наше́ствія и междоусо́бныя бра́ни и отъ вся́каго зла́. Чту́ще же ны́нѣ честны́хъ и многоцѣле́бныхъ моще́й твои́хъ пренесе́ніе, но́вый цѣле́бниче, вси́ мы́ вопіе́мъ: сла́ва Да́вшему тобо́ю всѣ́мъ исцѣле́ніе.

Инъ тропа́рь, на прославле́ніе [18-го Деке́мврія], гла́съ 4

Мірска́го мяте́жа бѣ́гая, все́ жела́ніе обрати́лъ еси́ къ Бо́гу, да въ видѣ́нія восхо́дъ обря́щеши горѣ́, и та́ко не уклони́вся въ лука́вствія се́рдца, но очи́стивъ ду́шу и тѣ́ло, прія́лъ еси́ благода́ть точи́ти цѣльбы́ вѣ́рнымъ и невѣ́рнымъ, притека́ющимъ къ ра́цѣ моще́й твои́хъ, Симео́не пра́ведне. Тѣ́мже, по да́нному ти́ да́ру, испроси́ у Христа́ Бо́га исцѣле́ніе на́мъ, боля́щимъ душе́вными страстьми́, и моли́ спасти́ ду́ши на́ша.

Конда́къ на пренесе́ніе моще́й [12-го Септе́мврія], гла́съ 4

Наста́ дне́сь всечестна́я па́мять но́ваго цѣле́бника, пра́веднаго Симео́на, созыва́етъ же лю́ди въ пречестны́й хра́мъ свята́го Бо́жія архіере́я Никола́я, идѣ́же ра́достно соше́дшеся, благочести́выхъ мно́жества ве́село пра́зднуютъ пренесе́ніе честны́хъ и многоцѣле́бныхъ моще́й твои́хъ пра́здникъ. Ты́ бо яви́лся еси́ гра́ду на́шему и все́й Сиби́ри врачевство́ безме́здное, подава́я исцѣле́ніе съ вѣ́рою приходя́щимъ къ тебѣ́, Симео́не всеблаже́нне! Но, я́ко имѣ́яй дерзнове́ніе ко Влады́цѣ Христу́, Того́ моли́ спасти́ гра́дъ и лю́ди, моля́щіяся тебѣ́, па́че же хода́тай бу́ди ко Го́споду во дни́ наше́ствія печа́ли рабо́мъ твои́мъ, да зове́мъ ти́: ра́дуйся, Сиби́рстѣй странѣ́ похвало́ и утвержде́ніе гра́ду на́шему.

Инъ конда́къ на прославле́ніе [18-го Деке́мврія], гла́съ 2

Мíра су́етнаго отве́рглся еси́, да бла́га вѣ́чныя жи́зни наслѣ́диши, возлюби́въ незло́біе и чистоту́ души́ и тѣ́ла. Сниска́лъ еси́, е́же возлюби́лъ, свидѣ́тельствуютъ бо о се́мъ гро́бъ и нетлѣ́ніе моще́й твои́хъ, и благода́ть чудотворе́нія наипа́че. То́чиши бо цѣльбы́ всѣ́мъ притека́ющимъ къ тебѣ́ и непросвѣще́ннымъ, Симео́не блаже́нне, чудотво́рче преди́вный.

Велича́ніе

Ублажа́емъ тя́, святы́й пра́ведный Симео́не, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.