Конда́къ 1

Избра́нному во іере́ехъ, ди́вному уго́днику Бо́жію Іоа́нну, па́стырю и учи́телю, о царе́хъ моли́твеннику, ско́рбныхъ утѣ́шителю, земли́ Россíйскія свѣ́тлому свѣти́льнику, все́ житіе́ свое́ на служе́ніе Бо́гу и бли́жнимъ посвяти́вшему, и мно́жество грѣ́шниковъ на покая́ніе обрати́вшему; мно́гимъ же боля́щимъ исцѣле́ніе у Бо́га испроси́вшему, похвалы́ вознесе́мъ, я́ко хода́таю на́шему и ско́рому помо́щнику. Ты́ же, о́тче, я́ко имѣ́яй дерзнове́ніе ко Го́споду, отъ вся́кихъ на́съ бѣ́дъ свобожда́й, да зове́мъ ти́ хвале́бно:

Ра́дуйся, Іоа́нне, но́вый Россíйскій свѣти́льниче и те́плый о на́съ къ Бо́гу моли́твенниче.

Икосъ 1

Ангела-храни́теля своего́, еще́ шестолѣ́тенъ сы́й, въ свѣ́тлости неизрече́ннѣй я́вѣ узрѣ́лъ еси́, Іоа́нне, и́же и рече́ тебѣ́, я́ко по повелѣ́нію Госпо́дню всегда́ неви́димо сопрису́тствуетъ и храни́тъ тя́ отъ всѣ́хъ зо́лъ. Тѣ́мже отъ ю́ности избра́нника Бо́жія тя́ вѣ́дуще, взыва́емъ си́це:

Ра́дуйся, отъ младе́нства по предувѣ́дѣнію Бо́гомъ избра́нный; ра́дуйся, отъ ю́ности въ служе́ніе Ему́ Того́ благода́тію призва́нный. Ра́дуйся, а́нгела-храни́теля твоего́ изъ дѣ́тства до́брыми нра́вы весели́вый; ра́дуйся, николи́же того́ чи́мъ опеча́ливый. Ра́дуйся, яко незри́мый храни́тель тво́й я́вѣ тебѣ́ яви́ся; ра́дуйся, я́ко то́й всегда́ храни́ти тя́ обѣща́ся. Ра́дуйся, благочести́выхъ роди́телей ча́до возлю́бленное; ра́дуйся, тѣ́ми издѣ́тска въ стра́сѣ Бо́жіемъ воспита́нный. Ра́дуйся, воздержа́нію отъ ю́ности себе́ обучи́вый; ра́дуйся, во убо́жествѣ и нищетѣ́ млады́я дни́ своя́ препроводи́вый. Ра́дуйся, я́ко благонра́вія твоего́ ра́ди благода́ть Бо́жія я́вѣ на тебѣ́ почива́ше; ра́дуйся, я́ко та́ лице́ твое́ всегда́ благоумиле́нно творя́ше.

Ра́дуйся, Іоа́нне, но́вый Россíйскій свѣти́льниче и те́плый о на́съ къ Бо́гу моли́твенниче.

Конда́къ 2

Ви́димъ тя́, богому́дре Іоа́нне, отъ ю́на во́зраста благода́тію Бо́жіею осѣне́на бы́вша, и е́ю та́инственно на добродѣ́тельное житіе́ наставля́ема и руководи́ма. Тѣ́мже, иму́ще тя́ во о́бразъ на́мъ и подража́ніе, уми́льно вопіе́мъ Христу́ Бо́гу: Аллилу́ія.

Икосъ 2

Ра́зумъ тво́й измла́да въ изуче́ніе Свяще́нныхъ и оте́ческихъ Писа́ній углуби́въ, Іоа́нне, и изъ ни́хъ воспрія́лъ еси́ оби́льно во́ду жи́ву, отъ исто́чника Свята́го Ду́ха проистека́ющую. Тѣ́мже мо́лимъ тя́, умоли́ блага́го Го́спода, да сподо́битъ прича́стники бы́ти сея́ живи́тельныя струи́ и на́съ, взыва́ющихъ ти́ си́це:

Ра́дуйся, отъ младе́нчества чи́ста себе́ отъ страсте́й соблюды́й; ра́дуйся, благода́ть свята́го креще́нія цѣ́лу и невреди́му сохрани́вый. Ра́дуйся, чте́ніе Боже́ственныхъ Писа́ній усе́рдно возлюби́вый; ра́дуйся, сокрове́нный въ ни́хъ смы́слъ пра́во и до́брѣ уразумѣ́вый. Ра́дуйся, во уче́ніи кни́жнѣмъ прилежа́ніе примѣ́рное показа́вый; ра́дуйся, въ любому́дріи есте́ственнѣмъ и духо́внѣмъ сла́вно преуспѣ́вый. Ра́дуйся, любому́дріемъ твои́мъ мíра пре́лести ско́ро распозна́вый; ра́дуйся, тѣ́хъ сѣ́тей, я́ко оре́лъ высокопа́рный, му́дрѣ избѣжа́вый. Ра́дуйся, сѣ́верныя Россíйскія страны́ чу́дное и свѣ́тлое воспита́ніе; ра́дуйся, мра́ка грѣхо́внаго въ лю́дехъ разгна́ніе. Ра́дуйся, всѣ́мъ притека́ющимъ къ тебѣ́ ско́рое вспоможе́ніе подава́яй; ра́дуйся, многомо́щное на́мъ предъ Бо́гомъ заступле́ніе явля́яй.

Ра́дуйся, Іоа́нне, но́вый Россíйскій свѣти́льниче и те́плый о на́съ къ Бо́гу моли́твенниче.

Конда́къ 3

Си́ла благода́ти Бо́жія, недостаю́щая восполня́ющая, оби́льно излія́ся на тя́, Іоа́нне приснопа́мятне, егда́ отъ святи́теля Христофо́ра во іере́я рукополо́женъ бы́лъ еси́, и гра́ду Кроншта́дту па́стырь учине́нъ; отто́ле бо нача́лъ еси́ учи́ти лю́ди е́же вѣ́рно служи́ти Святѣ́й Тро́ицѣ и пѣ́ти Ей: Аллилу́ія.

Икосъ 3

Имѣ́я любо́вь Боже́ственную въ се́рдцѣ свое́мъ, му́дре Іоа́нне, и уста́вы воздержа́нія стро́го соблюда́я, удо́бь побора́лъ еси́ страсте́й двиза́нія, николи́же тѣ́ми запя́тъ бы́въ. Тѣ́мже, я́ко му́жъ си́ленъ, изше́лъ еси́ на дѣ́ланіе ни́вы Госпо́дни: сло́вомъ, я́ко ра́ломъ, разрыхля́я отвердѣ́вшая и оледенѣ́вшая сердца́ человѣ́ческая, согрѣва́я та́ моли́твою и теплото́ю любве́ твоея́, и насѣва́я въ ни́хъ сѣ́мена и́скренняго покая́нія и живы́я вѣ́ры. Сего́ ра́ди воспису́емъ ти́ похвалы́ таковы́я:

Ра́дуйся, избра́нный сосу́де Бо́жія благода́ти; ра́дуйся, даро́въ небе́сныхъ вмѣсти́лище. Ра́дуйся, всѣ́мъ се́рдцемъ и всѣ́мъ помышле́ніемъ твои́мъ Бо́га возлюби́вый; ра́дуйся, сего́ ра́ди и ча́да твоя́ духо́вная и́скреннѣ Того́ люби́ти научи́вый. Ра́дуйся, за́повѣди Бо́жія и уста́вы Це́ркве о постѣ́хъ опа́сно храни́вый; ра́дуйся, любо́вь твою́ къ Бо́гу и бли́жнимъ дѣя́ньми и уче́ніи твои́ми прояви́вый. Ра́дуйся, отъ ю́ности надъ страстьми́ воцари́выйся; ра́дуйся, сла́венъ побѣди́тель надъ тѣ́ми яви́выйся. Ра́дуйся, въ мíрѣ пожи́вый премíрно; ра́дуйся, на земли́ му́дрствовавый небе́сно. Ра́дуйся, ца́рства Правосла́вно-Россíйскаго сто́лпе непоколеби́мый; ра́дуйся, Правосла́вія и до́брыхъ обы́чаевъ блюсти́телю непозы́блемый.

Ра́дуйся, Іоа́нне, но́вый Россíйскій свѣти́льниче и те́плый о на́съ къ Бо́гу моли́твенниче.

Конда́къ 4

Бу́рею мно́гихъ бѣ́дъ и волне́ній жите́йскихъ одержи́мымъ, на́мъ помога́й, о́тче Іоа́нне, я́коже и въ животѣ́ твое́мъ помога́лъ еси́ всѣ́мъ, съ вѣ́рою къ тебѣ́ притека́вшимъ, да вси́ тобо́ю вспомоществу́еми, благода́рно о тебѣ́ пое́мъ Бо́гу: Аллилу́ія.

Икосъ 4

Слы́шавъ апо́стола глаго́люща: "на́ше житіе́ на небесѣ́хъ е́сть", и измла́да возжела́въ наслѣ́довати е́, маловре́менное сіе́ житіе́ не во угожде́ніи пло́ти и страсте́мъ ижди́лъ еси́, Іоа́нне, но во очище́ніи души́ отъ по́мысловъ грѣхо́вныхъ. Тѣ́мже, иму́ще тя́ во о́бразъ богоуго́днаго житія́ и помо́щника во благоче́стіи, взыва́емъ ти́ си́це:

Ра́дуйся, свѣ́та ева́нгельскаго въ на́ша дни́ свѣ́тлое блиста́ніе; ра́дуйся, омраче́нныхъ ду́шъ вседѣ́йственное просвѣще́ніе. Ра́дуйся, я́ко въ Боже́ственная Писа́нія ве́сь у́мъ тво́й впери́лъ еси́; ра́дуйся, въ ни́хъ бо стезю́ пра́вую въ Ца́рствіе небе́сное обрѣ́лъ еси́. Ра́дуйся, я́ко вся́ дѣя́нія твоя́ свѣ́тъ мíру бы́ша; ра́дуйся, я́ко тобо́ю Оте́цъ Небе́сный ди́вно просла́вися. Ра́дуйся, я́ко сло́во твое́ не бѣ́, я́коже кимва́лъ бряца́яй, ме́ртвъ, нечу́вственъ; ра́дуйся, я́ко то́е бя́ше вои́стину жи́во и дѣ́йственно. Ра́дуйся, я́ко тобо́ю ме́ртвіи ду́хомъ вѣ́рою оживля́ются; ра́дуйся, я́ко па́дшіи въ бе́здну грѣхо́вную тобо́ю къ покая́нію возбужда́ются. Ра́дуйся, [я́ко тебе́ во дни́ на́ша яви́ Госпо́дь земли́ Россíйстѣй я́ко проро́ка и апо́стола; ра́дуйся,] я́ко въ тебѣ́ неустраши́маго обличи́теля и крѣ́пкаго противобо́рца враго́мъ и́стины вѣ́рніи обрѣто́ша.

Ра́дуйся, Іоа́нне, но́вый Россíйскій свѣти́льниче и те́плый о на́съ къ Бо́гу моли́твенниче.

Конда́къ 5

Звѣзда́ многосвѣ́тлая земли́ Россíйскія, мра́къ грѣхо́вный просвѣща́ющая, яви́лся еси́, свяще́нне Іоа́нне. Тѣ́мже и ны́нѣ пода́ждь просвѣще́ніе сыно́мъ Россíйскимъ, тьмо́ю заблужде́нія объя́тымъ и во вла́сть нечести́выхъ преда́вшихся, да позна́ютъ свое́ окая́нство, и обрати́вшеся ко Го́споду, въ покая́ніи возопію́тъ Ему́: Аллилу́ія.

Икосъ 5

Ви́дѣвше Россíйстіи наро́ди вели́каго тя́ благоче́стія проповѣ́дника и многомо́щна предъ Бо́гомъ моли́твенника и предста́теля, во мно́жествѣ отовсю́ду къ тебѣ́ притека́ху, инíи же издале́ча письмена́ тебѣ́ посыла́ху, исцѣле́нія въ болѣ́знехъ, совѣ́та въ недоумѣ́ніихъ и утѣше́нія въ ско́рбехъ прося́ще, и улучи́вше жела́нная, благода́рственно тебѣ́ взыва́ху:

Ра́дуйся, Іоа́нне, но́вый мíру свѣти́льниче; ра́дуйся, несре́дственный въ моли́твахъ Бо́гу собесѣ́дниче. Ра́дуйся, я́ко твоя́ моли́твы си́льны и многомо́щны Влады́ку умилостивля́ти; ра́дуйся, я́ко твое́ къ Нему́ предста́тельство многодѣ́йственно бла́гость Его́ на щедрода́тельство подвиза́ти. Ра́дуйся, я́ко тобо́ю, по мѣ́рѣ вѣ́ры, подаю́тся благода́тная исцѣле́нія; ра́дуйся, я́ко неду́гующіи пріе́млютъ тобо́ю ско́рое неду́говъ свои́хъ въ здра́віе премѣне́ніе. Ра́дуйся, я́ко грѣ́шніи на покая́ніе тобо́ю обраща́ются; ра́дуйся, я́ко безчи́нніи крамо́льницы тобо́ю вразумля́ются. Ра́дуйся, я́ко безу́мніи глуми́теліе надъ та́йнами вѣ́ры тобо́ю посрамля́ются; ра́дуйся, я́ко посмѣя́теліе чуде́сныхъ твои́хъ дѣя́ній тобо́ю подоба́ющее вразумле́ніе пріе́млютъ. Ра́дуйся, скорбя́щихъ благода́тный утѣ́шителю; ра́дуйся, въ недоумѣ́ніи су́щихъ бла́гостный вразуми́телю.

Ра́дуйся, Іоа́нне, но́вый Россíйскій свѣти́льниче и те́плый о на́съ къ Бо́гу моли́твенниче.

Конда́къ 6

Проповѣ́дникомъ и́стины, богоно́снымъ отце́мъ подража́я, всего́ себе́ на служе́ніе Бо́гу и бли́жнимъ вда́лъ еси́, и са́нъ свяще́нства нося́, поко́я не вѣ́далъ еси́, слу́жбы Бо́жія въ хра́мѣ при́сно соверша́я и въ домѣ́хъ вѣ́рныхъ моле́бныя пѣ́нія воспѣва́я, нужда́ющимся же ще́дро благотворя́, та́ко наименова́ніе благотво́рца и безсре́бренника стяжа́лъ еси́, Іоа́нне. Тѣ́мже и по успе́ніи твое́мъ, Россíйстіи лю́діе прославля́ютъ и́мя твое́, и вѣ́чную па́мять тебѣ́ возглаша́юще, пою́тъ Бо́гу: Аллилу́ія.

Икосъ 6

Возсія́вый отъ Дѣ́вы Христо́съ Бо́гъ на́шъ и тьму́ идолобѣ́сія свѣ́томъ Ева́нгелія разгна́вый, яви́ тя, о́тче Іоа́нне, вѣ́рна и ре́вностна проповѣ́дника Своея́ и́стины, клевре́ты лука́ваго извраща́емыя. Тѣ́мже, я́ко имѣ́яй дерзнове́ніе ко Го́споду, изба́ви отъ тѣ́хъ зло́бы и кова́рства всѣ́хъ воспѣва́ющихъ ти́ такова́я:

Ра́дуйся, служи́телю Христо́въ изря́дный; ра́дуйся, во іере́ехъ уго́дниче Того́ преизя́щный. Ра́дуйся, я́ко бы́лъ еси́ до́му Бо́жія стра́жъ неусы́пный; ра́дуйся, я́ко пасо́мымъ твои́мъ бы́лъ еси́ отъ та́тей духо́вныхъ крѣ́пкій храни́тель. Ра́дуйся, писа́ньми твои́ми мно́гихъ отъ любве́ мірскíя къ любви́ Христо́вѣ подви́гнувый; ра́дуйся, вѣща́ньми твои́ми любо́вь Бо́жію къ человѣ́комъ, въ искупле́ніи и промышле́ніи на́мъ явле́нную, изъяви́вый. Ра́дуйся, дѣ́йствіе Ду́ха Бо́жія на сердца́ человѣ́ческая удобопости́жно сказа́вый; ра́дуйся, та́йну моли́твеннаго съ Бо́гомъ собесѣ́дованія я́вѣ указа́вый. Ра́дуйся, цѣлому́дріе въ зако́нномъ супру́жествѣ твое́мъ чуде́сно сохрани́вый; ра́дуйся, мно́гая ча́да духо́вная покая́ніемъ породи́вый. Ра́дуйся, въ сердца́хъ вѣ́рныхъ благу́ю па́мять по себѣ́ оста́вивый; ра́дуйся, я́ко па́мять сія́, я́ко пра́ведника, незабве́нна пребу́детъ во вѣ́ки.

Ра́дуйся, Іоа́нне, но́вый Россíйскій свѣти́льниче и те́плый о на́съ къ Бо́гу моли́твенниче.

Конда́къ 7

Хотя́ Всеблагíй Госпо́дь утѣ́шити вѣ́рныя лю́ди Своя́ и отврати́ти беззако́нныхъ отъ злы́хъ дѣ́лъ и́хъ, воздви́же тя́, проро́ка земли́ на́шей, я́коже нѣ́когда Ниневíи, гра́ду вели́кому, Іо́ну: да проповѣ́си гнѣ́въ Бо́жій, гряду́щій вско́рѣ на зе́млю на́шу, е́же и сбы́сться по твоему́ вѣща́нію, и́бо непока́яни въ горды́ни свое́й пребы́хомъ и не восхотѣ́хомъ съ тобо́ю смире́нно пѣ́ти Христу́ Бо́гу: Аллилу́ія.

Икосъ 7

Но́ва зна́мѣнія гнѣ́ва Бо́жія постиго́ша на́съ, зане́ не восхотѣ́хомъ вня́ти богодухнове́ннымъ твои́мъ глаго́ломъ: держа́ва бо Россíйская паде́ся и лю́тымъ безбо́жникомъ во вла́сть предаде́ся, и́же честны́я оби́тели и́ноческіе разори́ша, святы́я хра́мы оскверни́ша, и вся́ благочести́выя лю́ди лю́тѣ озло́биша, и мно́жество духо́внаго и мірска́го чи́на му́ченичестѣй сме́рти преда́ша. Тѣ́мже изъ глубины́ души́ покая́ніе Го́споду прино́симъ, и къ твое́й моли́твѣ прибѣга́емъ, да проще́ніе грѣхо́въ на́шихъ и ми́лости Бо́жіей сподо́бимся. Тебѣ́ же, я́ко предста́телю на́шему, уми́льно глаго́лемъ:

Ра́дуйся, покая́нія велегла́сный проповѣ́дниче; ра́дуйся, гряду́щаго гнѣ́ва Бо́жія на лю́ди согрѣши́вшія нело́жный провозвѣ́стниче. Ра́дуйся, нече́стія людска́го громогла́сный обличи́телю; ра́дуйся, о исправле́ніи тѣ́хъ ре́вностный рачи́телю. Ра́дуйся, ца́рства Правосла́вно-Россíйскаго при животѣ́ твое́мъ крѣ́пкій опло́тъ бы́вый; ра́дуйся, отъ крамо́лъ во дни́ о́ны то́е сохрани́вый. Ра́дуйся, Госуда́рей благочести́выхъ при́сный моли́твенниче и спобо́рниче; ра́дуйся, му́дрый тѣ́хъ наста́вниче и храни́телю. Ра́дуйся, о вла́сти ца́рстѣй, я́ко богоуста́вленной, мно́гая словеса́ провѣща́вый; ра́дуйся, къ послуша́нію и вѣ́рности зако́нной вла́сти то́й лю́ди тщали́во приводи́вый. Ра́дуйся, моли́твами твои́ми престо́лы царе́й благочести́выхъ огражда́яй; ра́дуйся, суды́ пра́вы въ лю́дехъ твори́ти тѣ́хъ поуча́яй.

Ра́дуйся, Іоа́нне, но́вый Россíйскій свѣти́льниче и те́плый о на́съ къ Бо́гу моли́твенниче.

Конда́къ 8

Страннолѣ́пный и ангелоподо́бный пу́ть житія́ земна́го соверши́лъ еси́, о́тче Іоа́нне: въ мíрѣ бо пожи́въ въ воздержа́ніи и цѣлому́дріи, и во всегда́шнемъ Бо́га славосло́віи вели́кимъ отце́мъ послѣ́довалъ еси́. Съ ни́ми же ны́нѣ на небеси́ Христу́ въ весе́ліи предстоя́, и моли́твы о мíрѣ принося́, вы́ну пое́ши: Аллилу́ія.

Икосъ 8

Вси́ правосла́вніи лю́діе, я́коже въ животѣ́ твое́мъ, та́ко и по преставле́ніи, съ ве́ліею любо́вію чту́тъ тя́, о́тче Іоа́нне, я́ко ве́ліе дерзнове́ніе къ Бо́гу и́маши, и мо́лиши бла́гость Его́ о всѣ́хъ къ тебѣ́ притека́ющихъ, и та́ко взыва́ющихъ:

Ра́дуйся, блага́го ко́рене до́брое прозябе́ніе; ра́дуйся, благочести́выхъ роди́телей честно́е рожде́ніе и благо́е воспита́ніе. Ра́дуйся, я́ко ма́лая ве́сь Сура́, твоего́ ра́ди въ не́й рожде́нія и воспита́нія, все́й земли́ Россíйстѣй вѣ́дома сотвори́ся; ра́дуйся, я́ко гра́дъ Кроншта́дтъ твои́мъ въ не́мъ служе́ніемъ просла́вися. Ра́дуйся, я́ко милосе́рдыми дѣ́лы твои́ми вся́ земля́ Россíйская напо́лнися; ра́дуйся, я́ко вѣ́сть о чу́днѣмъ и святѣ́мъ житіи́ твое́мъ за предѣ́лы ея́ распространи́ся. Ра́дуйся, я́ко писа́ньми твои́ми та́йна благода́тного съ Бо́гомъ обще́нія изъясня́ется; ра́дуйся, я́ко си́ми писа́ньми свѣ́тъ духо́внаго озаре́нія въ сердца́ чту́щихъ я́ излива́ется. Ра́дуйся, я́ко въ писа́ніихъ твои́хъ чистота́ души́ твоея́ я́вѣ прозрѣва́ется; ра́дуйся, я́ко въ ни́хъ, я́коже въ зерца́лѣ, богоподо́біе души́ человѣ́ческія отобража́ется. Ра́дуйся, я́ко богому́дрыми писа́ньми твои́ми не то́кмо лю́діе Россíйстіи, но и инозе́мніи ко благоче́стію своему́ назида́ются; ра́дуйся, я́ко тѣ́ми писа́ньми и́стинная вѣ́ра возсіява́етъ и мра́къ ересе́й разгоня́ется.

Ра́дуйся, Іоа́нне, но́вый Россíйскій свѣти́льниче и те́плый о на́съ къ Бо́гу моли́твенниче.

Конда́къ 9

Вся́кое сло́во не довлѣ́етъ къ похвалѣ́ твое́й, о́тче Іоа́нне, ты́ бо Ду́хомъ Святы́мъ дви́жимь, отъ ю́ности Бо́гу усе́рдно послужи́лъ еси́: въ изуче́ніи Свяще́нныхъ Писа́ній мно́га лѣ́та усе́рдно тружда́яся и ра́зумъ глубо́къ стяжева́я, та́же о науче́ніи отроко́въ и о па́ствѣ твое́й прилѣ́жно пекíйся, всѣ́хъ поуча́лъ еси́ разу́мно пѣ́ти Бо́гу: Аллилу́ія.

Икосъ 9

Витíи нечисти́віи и суему́дренніи и вѣ́ры хули́теліе тобо́ю я́вѣ посра́млени бы́ша во злоче́стіи свое́мъ, правосла́вніи же въ вѣ́рѣ утверди́шася, боговѣща́нными твои́ми глаго́лы наставля́еми. Тѣ́мже, восхваля́юще тя́, взыва́емъ си́це:

Ра́дуйся, цѣвни́це, боговѣща́нная; ра́дуйся, гу́сли Ду́ха сладкозву́чныя. Ра́дуйся, словесы́ и писа́ньми твои́ми догма́ты вѣ́ры уясни́вый; ра́дуйся, вѣща́ньми твои́ми вѣ́рныхъ смы́слы въ Правосла́віи утверди́вый. Ра́дуйся, мно́гихъ коле́блющихся въ и́стиннѣй вѣ́рѣ утверди́вый; ра́дуйся, гордели́ваго въ суему́дріи хули́теля та́инствъ Це́ркве Христо́вы небоя́зненно обличи́вый. Ра́дуйся, я́ко тобо́ю полки́ богобо́рцевъ побѣжде́ни бы́ша; ра́дуйся, я́ко со́нмы пасо́мыхъ твои́мъ па́стырскимъ раче́ніемъ Ца́рствіе небе́сное улучи́ша. Ра́дуйся, ра́зума боже́ственнаго му́дрый изъяви́телю; ра́дуйся, та́инствъ церко́вныхъ благоговѣ́йный соверши́телю. Ра́дуйся, благонаде́жный на́шъ въ Ца́рствіе небе́сное руководи́телю; ра́дуйся, пути́ спаси́тельнаго на́шъ и́стинный учи́телю.

Ра́дуйся, Іоа́нне, но́вый Россíйскій свѣти́льниче и те́плый о на́съ къ Бо́гу моли́твенниче.

Конда́къ 10

Спасти́ хотя́ ду́шу твою́, полноту́ добродѣ́телей ева́нгельскихъ въ себѣ́ совокупи́лъ еси́, о́тче Іоа́нне: апо́стольское и святооте́ческое вѣ́ры исповѣ́даніе, му́ченическую въ благоче́стіи тве́рдость, всегда́шнее въ моли́твахъ бо́дрствованіе, воздержа́ніе и смире́ніе, вку́пѣ же и по́двиги преподо́бныхъ. Тѣ́мже ны́нѣ со святы́ми на небеси́ водворя́яся и непреста́нно Бо́га славосло́вя, помина́й на́съ, сла́вную па́мять твою́ почита́ющихъ и пою́щихъ Бо́гу: Аллилу́ія.

Икосъ 10

Царя́ Небе́снаго всеусе́рдный священнослужи́тель бы́въ, о благоде́нствіи земна́го оте́чества твоего́ ревнова́лъ еси́, правому́дренно поуча́я, е́же воздава́ти Бо́жіе Бо́гови и ке́сареви ке́сарево. Сего́ ра́ди восхваля́емъ тя́ си́це:

Ра́дуйся, ра́бе Бо́жій, благíй и вѣ́рный; ра́дуйся, служи́телю Того́ усе́рдный. Ра́дуйся, вся́ повелѣ́нная отъ Го́спода, тщали́во твори́вый; ра́дуйся, за́повѣдей Его́ иску́сный дѣ́латель бы́вый. Ра́дуйся, о вездѣсу́щіи Бо́жіи всегда́ помышля́вый; ра́дуйся, у́мнымъ очесе́мъ свои́мъ Того́ вы́ну представля́вый. Ра́дуйся, благочести́выхъ царе́й оте́чества твоего́, я́ко слу́гъ Бо́жіихъ, почита́вый; ра́дуйся, сло́вомъ твои́мъ и моли́твами въ тру́днѣмъ по́двизѣ управле́нія и́мъ помога́вый. Ра́дуйся, къ попече́нію о благи́хъ Це́ркве и наро́да тѣ́хъ подвиза́вый; ра́дуйся, отъ крамо́лъ и мяте́жей и́хъ оберега́вый. Ра́дуйся, и ны́нѣ о земли́ Россíйстѣй и о всѣ́хъ ца́рствахъ правосла́вныхъ Бо́га умоля́яй; ра́дуйся, я́ко предста́тель еси́ всѣ́хъ на тя́ надѣ́ющихся.

Ра́дуйся, Іоа́нне, но́вый Россíйскій свѣти́льниче и те́плый о на́съ къ Бо́гу моли́твенниче.

Конда́къ 11

Пѣ́сненными похвала́ми невозмо́жно е́сть изобрази́ти мно́жество о Бо́зѣ исправле́ній твои́хъ, о пречу́дне о́тче Іоа́нне, я́же соверши́лъ еси́ во все́мъ житіи́ твое́мъ: немощны́я, моли́твами твои́ми, исцѣля́я, бѣ́сы отъ человѣ́къ изгоня́я, неду́говавшимъ пія́нствомъ и ины́ми страстьми́ врачу́я, въ нищетѣ́ же и убо́жествѣ су́щія оби́льно ущедря́я, и всѣ́мъ по коего́ждо потре́бѣ помога́я и благотворя́, во е́же благода́рно о тебѣ́ пѣ́ти Бо́гу: Аллилу́ія.

Икосъ 11

Свѣти́льника свѣ́тла и прозорли́вца ди́вна тя́ Госпо́дь во дне́хъ на́шихъ, провозвѣсти́вша гряду́щій гнѣ́въ Его́ на ца́рство Россíйское, зане́ непока́яхомся про́повѣдію твое́ю. Тѣ́мже, я́ко проро́ка Бо́жія и провозвѣ́стника Того́ суде́бъ, ублажа́емъ тя́ и въ покая́ніи взыва́емъ:

Ра́дуйся, прови́дче ди́вный; ра́дуйся, бу́дущихъ собы́тій предсказа́телю нело́жный. Ра́дуйся, дре́внимъ покая́нія проповѣ́дникомъ ра́вный; ра́дуйся, гряду́щаго гнѣ́ва Бо́жія на нераска́янныя грѣ́шники возвѣсти́телю. Ра́дуйся, покая́нія сладкогла́сный глаша́таю; ра́дуйся, смяте́нныхъ серде́цъ умири́телю. Ра́дуйся, многомо́щный на́шъ предъ Бо́гомъ хода́таю; ра́дуйся, благонаде́жный на́шъ предъ Ни́мъ предста́телю. Ра́дуйся, до́брый слове́сныхъ ове́цъ па́стырю, мно́жество заблу́дшихъ ду́шъ взыска́вый; ра́дуйся, отъ у́зъ темни́чныхъ и сме́рти мно́гихъ свободи́вый.

Ра́дуйся, Іоа́нне, но́вый Россíйскій свѣти́льниче и те́плый о на́съ къ Бо́гу моли́твенниче.

Конда́къ 12

Благода́ть Бо́жія, ю́же прія́лъ еси́ сугу́бо во cвятѣ́мъ креще́ніи и во іере́йстѣмъ рукоположе́ніи, не вотще́ въ тебѣ́ бы́сть, о́тче Іоа́нне: раче́ніемъ бо твои́мъ употреби́лъ еси́ сію́ на по́льзу мно́гимъ и во сла́ву Дарода́теля ея́; свѣ́тлостію бо житія́ твоего́ и дѣ́лы милосе́рдными вели́кій уго́дникъ предъ Бо́гомъ яви́лся еси́, и отъ мно́жества у́стъ, тобо́ю духо́вно и тѣле́сно облагодѣ́тельствованныхъ, возно́сится Тому́ вели́кая пѣ́снь: Аллилу́ія.

Икосъ 12

Пою́ще богоуго́дное твое́ отъ ю́ности житіе́, и духо́вное отъ си́лы въ си́лу восхожде́ніе, ублажа́емъ пра́ведную твою́ кончи́ну и сла́вное погребе́ніе благода́тныхъ твои́хъ моще́й, вѣ́чный поко́й обрѣ́тшихъ въ созда́ннѣй тобо́ю дѣви́чей оби́тели. Вѣ́руемъ же, я́ко и свята́я душа́ твоя́ упоко́ися въ пресвѣ́тлыхъ ра́йскихъ селе́ніихъ, я́же наслѣ́довати помози́ и на́мъ, возглаша́ющимъ ти́ похвалы́ сицевы́я:

Ра́дуйся, тече́ніе вре́менныя жи́зни ра́вно и богоуго́дно сконча́вый; ра́дуйся, вѣ́ру пра́вую непоро́чну сохрани́вый. Ра́дуйся, ми́рною христіа́нскою кончи́ною пра́ведность твою́ извѣсти́вый; па́дуйся, поко́й вѣ́чный на небеси́ со святы́ми получи́вый. Ра́дуйся, ра́дости пра́ведныхъ во оби́телехъ ра́йскихъ причасти́выйся; ра́дуйся, со мно́жествомъ ду́шъ, тобо́ю спасе́ніе улучи́вшихъ, блаже́нства вѣ́чнаго сподо́бивыйся. Ра́дуйся, съ ца́рственными новому́ченики Ца́рство небе́сное наслѣ́дивый; ра́дуйся, съ ни́ми Царю́ Сла́вы предстоя́й и о избавле́ніи оте́чества на́шего отъ безбо́жныхъ вра́гъ моли́твы вознося́й. Ра́дуйся, вели́кій Правосла́вія побо́рниче; ра́дуйся, непреодоли́мый благоче́стія защи́тниче. Ра́дуйся, со́нными явле́ньми пресла́вно чудотворя́й; ра́дуйся, иносла́вныя ко Правосла́вію приводя́й.

Ра́дуйся, Іоа́нне, но́вый Россíйскій свѣти́льниче и те́плый о на́съ къ Бо́гу моли́твенниче.

Конда́къ 13

О, всечестны́й о́тче Іоа́нне, не кроншта́дтскій то́кмо, но и всероссíйскій, па́че же - всемíрный свѣти́льниче и вели́кій Христо́въ уго́дниче и чудотво́рче! Пріими́ отъ на́съ, недосто́йныхъ, хвале́бное пѣ́ніе сіе́, и благопрія́тными твои́ми ко Бо́гу моли́твами изба́ви на́съ отъ бѣ́дъ вре́менныхъ и муче́ній вѣ́чныхъ, да сподо́бимся съ тобо́ю въ Ца́рствіи небе́снѣмъ вѣ́чно воспѣва́ти: Аллилу́ія.

Се́й конда́къ глаго́лется три́жды. Та́же Икосъ 1-й и Конда́къ 1-й

Моли́тва свято́му пра́ведному отцу́ на́шему Іоа́нну, Кроншта́дтскому чудотво́рцу

Святы́й пра́ведный о́тче на́шъ Іоа́нне, вели́кій чудотво́рче и свѣти́льниче Ру́сскія земли́! Ты́ во свѣ́тѣ пренебе́снѣмъ Христа́ Бо́га на́шего зри́ши, ми́лости Его́ за любо́вь твою́ сподобля́емь. Боже́ственныя благода́ти испо́лненъ бы́въ, Тѣ́ломъ Христо́вымъ и Кро́вію Его́ при́сно пита́емь, изше́лъ еси́ на па́стырское дѣ́ланіе да́же до ве́чера жи́зни твоея́. Оба́че не преста́лъ еси́ и ны́нѣ отъ дѣ́ланія твоего́, во вѣ́ки живы́й во Христѣ́. Вѣ́мы, вели́кій па́стырю на́шъ, я́ко свяще́нствовавшу ти́, инíи милосе́рдію тобо́ю научи́шася, друзíи же отъ нищеты́ и паде́ній грѣхо́вныхъ тобо́ю возведе́ніи бы́ша и зѣло́ возлюби́ша тя́, вся́кому добру́ и́хъ науча́юща. Тѣ́мже мо́лимъ тя́: научи́ и на́съ добро́ твори́ти, грѣха́ огреба́тися, о спасе́ніи ду́шъ на́шихъ пещи́ся, и во вся́комъ дѣ́лѣ бла́зѣ бу́ди на́мъ помо́щникъ благíй, тебѣ́ бо сказа́ Бо́гъ ну́жды люде́й Свои́хъ, цѣли́телю и благодѣ́телю на́шъ! Вѣ́мы и сія́, пра́ведный о́тче, я́ко вели́кій моли́твенникъ и чу́дный соверши́тель Безкро́вныя Же́ртвы ты́ бы́лъ еси́, испо́лненъ сы́й ду́ха вѣ́ры, наде́жды и любве́ христіа́нскія. Се́ бо Боже́ственную Литургíю соверша́я и о вручи́вшихъ себе́ моли́твенному твоему́ заступле́нію пла́менно моля́ся, я́ко оте́цъ чадолюби́вый всѣ́хъ любо́вію твое́ю объима́лъ еси́, поминове́ніе о ни́хъ творя́, да омы́ются грѣхи́ и́хъ святѣ́йшею Кро́вію Христо́вою. Тѣ́мже и мы́, грѣ́шніи, упова́юще на любо́вь и по́мощь твою́, усе́рдно взыва́емъ ти́: моли́ся, вели́кій па́стырю Ру́сскія земли́, о бра́тіи твое́й, архипа́стырехъ и па́стырехъ на́шихъ, да поживу́тъ по во́ли Бо́жіей, я́коже пре́жніи пасты́ри, Бо́гу угоди́вшіи, и да внуши́тъ Госпо́дь моле́нія и́хъ на вся́къ ча́съ. Моли́, чудотво́рче преди́вный, Всеми́лостиваго Спа́са на́шего о всѣ́хъ неду́гующихъ и многообра́знѣ бѣ́дствующихъ, утѣше́нія ча́ющихъ, да исцѣле́ніе и по́мощь пріи́мутъ и да утѣ́шеніи бу́дутъ. Моли́ся Бо́гу, о́тче Іоа́нне, о дѣ́техъ и о́троцѣхъ уча́щихся, я́ко да позна́ютъ тíи вѣ́ру Христо́ву и да поживу́тъ по вѣ́рѣ, возлюби́въ крѣ́пко Го́спода на́шего, Пречи́стую Влады́чицу Богоро́дицу и вся́ святы́я, съ ни́ми же и тя́, вои́стину до́брого отца́ и наста́вника и́хъ, и да соблюда́ютъ и́хъ а́нгели-храни́тели и́хъ, я́коже и тя́ а́нгеле-храни́телю тво́й соблюда́ше отъ прираже́ній вра́жіихъ. Ду́хомъ апо́стольскія ре́вности о вѣ́рѣ Правосла́вной пламенѣ́я, гро́зно и непреста́нно облича́лъ еси́ хулы́ искази́телей Ева́нгелія Христо́ва. Тѣ́мже мо́лимъ тя́: порази́ и ны́нѣ, уго́дниче Бо́жій, вся́ собла́зны и раздѣле́нія, толи́ко умно́жившіяся ны́нѣ, да поживу́тъ лю́діе правосла́вніи въ едине́ніи и ми́рѣ, и въ вѣ́рности Ма́тери свое́й, Це́ркви Христо́вой. Къ си́мъ же и сію́ вели́кую мольбу́ съ вѣ́рою ти́ прино́симъ: предста́тельствуй, вели́кій чудотво́рче и проро́че, ро́ду твоему́ явле́нный, у стра́шнаго престо́ла Го́спода Сла́вы, да пощади́тъ и поми́луетъ стра́ждущую зе́млю Ру́сскую, въ не́й же толи́ко просія́ любы́ твоя́. И да изба́витъ Госпо́дь лю́ди Своя́ отъ и́га лю́тыхъ безбо́жникъ и го́рькаго мучи́тельства и́хъ. О, пречу́дный о́тче Іоа́нне, вели́кій іере́ю Бо́га Вы́шняго! Се́ о́бразъ тво́й честны́й лобыза́емъ, вѣ́дуще, я́ко вели́кого засту́пника и утѣ́шителя дарова́ тя́ Госпо́дь лю́демъ Свои́мъ. Испроси́ у́бо на́мъ ду́хъ покая́нія и обновле́нія и́стиннаго. Вѣ́мы, я́ко во дни́ земна́го житія́ твоего́ мно́гое мно́жество люде́й во святѣ́мъ хра́мѣ, го́рдость и смуще́ніе отло́жше, пла́чуще и рыда́юще, о та́йныхъ свои́хъ грѣсѣ́хъ я́вѣ ка́ющееся, чрезъ тя́ живи́тельное разрѣше́ніе отъ Бо́га Спа́са пріима́ху. Якоже тогда́ надъ ни́ми, простри́ и ны́нѣ неви́димо благословля́ющую ру́ку твою́, и проще́ніе грѣхо́въ на́шихъ у Бо́га Милосе́рднаго испроси́. Посо́бствуй у́бо на́мъ про́чее вре́мя живота́ на́шего богоуго́днѣ преити́, да сподо́бимся святы́ми твои́ми моли́твами дости́гнути небе́снаго Ца́рствія, и та́мо вку́пѣ съ тобо́ю, отце́мъ, моли́твенникомъ и засту́пникомъ на́шимъ, сла́вити Ди́внаго во святы́хъ Свои́хъ Бо́га, Отца́ и Сы́на и Свята́го Ду́ха, ны́нѣ и при́сно и во вѣ́ки вѣко́въ. Ами́нь.

Тропа́рь, гла́съ 4

Со апо́столы изы́де вѣща́ніе твое́ въ концы́ вселе́нныя, съ исповѣ́дники страда́нія за Христа́ претерпѣ́лъ еси́, святи́телемъ уподо́бился еси́ сло́ва проповѣ́даніемъ, съ преподо́бными во благода́ти Бо́жіей просія́лъ еси́. Сего́ ра́ди вознесе́ Госпо́дь бе́здну смире́нія твоего́ превы́ше небе́съ, и дарова́ на́мъ и́мя твое́ во исто́чникъ преди́вныхъ чуде́съ. Тѣ́мже во Христѣ́ во вѣ́ки живы́й, чудотво́рче, любо́вію ми́луяй су́щія въ бѣда́хъ, слы́ши ча́да твоя́, вѣ́рою тя призыва́ющія, Іоа́нне пра́ведне, возлю́бленный па́стырю на́шъ.

Сла́ва, и ны́нѣ, богоро́диченъ, гла́съ то́йже

Еже отъ вѣ́ка утае́нное, и а́нгеломъ несвѣ́домое та́инство, Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и Кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.

Конда́къ, гла́съ 4

Отъ младе́нства Бо́гомъ избра́нный, и во о́трочествѣ да́ръ уче́нія чуде́сно отъ Него́ пріе́мый, и къ пресви́терству въ со́нномъ видѣ́ніи пресла́вно призва́нъ бы́въ, па́стырь ди́вный Це́ркве Христо́вы яви́лся еси́, о́тче Іоа́нне, благода́ти тезоимени́те; моли́ Христа́ Бо́га всѣ́мъ на́мъ съ тобо́ю въ Ца́рствіи Бо́жіемъ бы́ти.

Велича́ніе

Велича́емъ тя́, святы́й пра́ведный о́тче Іоа́нне, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.