Кон­да́къ 1

Воз­бра́н­ный во­ждю́ Це́р­кве Хри­сто́­вы, зла­то­сло­ве́с­ный учи́­те­лю Іо­а́н­не! Отъ ю́но­сти до­бро­дѣ́­тель­ми укра­си́в­ся, до́­брѣ по­тру­ди́л­ся еси́, и за и́мя Хри­сто́­во го­не́ніе пре­тер­пѣ́въ, во из­гна́ніи жи­тіе́ скон­ча́лъ еси́, сего́ ра́ди на не­бе­сѣ́хъ сугу́­бо про­сла́в­ленъ еси́, му́­дрый чи́на цер­ко́в­на­го устро­и́­те­лю. Тѣ́м­же и мы́ уми­ле́н­нѣ чти́мъ тя́, зо­ву́­ще:

Ра́дуй­ся, святи́­те­лю ве­ли́кій Іо­а́н­не Зла­тоу́­сте.

Икосъ 1

Ангель­скій о́бразъ нося́, во пло́­ти а́ки без­пло́­тенъ по­жи́лъ еси́, Іо­а́н­не: во спа­се́ніе бо бра́тій мно́­гія тру­ды́ подъе́мля, дѣ́лы до́­бры­ми Отца́ Не­бе́с­на­го про­сла́­вилъ еси́. Тѣ́м­же ти́ гла­го́­лемъ:

Ра́дуй­ся, Це́р­кве Пра­во­сла́в­ныя укра­ше́ніе; ра́дуй­ся, ро­ди́­те­лей име­ни́­тыхъ ча́до бла­го­сло­ве́н­ное. Ра́дуй­ся, еще́ во о́тро­че­ствѣ отъ ма́­те­ре твоея́ лю­бо́­вію ко сло́ву Бо́жію на­по­е́н­ный; ра́дуй­ся, отъ ю́но­сти ра́зумъ и́гу Хри­сто́ву по­ко­ри́­вый. Ра́дуй­ся, Бо́­го­ви усе́рд­но по­слу­жи́­вый; ра́дуй­ся, все­ле́н­ныя учи́­те­лю. Ра́дуй­ся, хри­стіа́нъ всѣ́хъ вре­ме́нъ въ мо­ли́­твахъ на­ста́в­ни­че; ра́дуй­ся, житія́ и́но­че­ска­го въ Ца­ре­гра́­дѣ об­но­ви́­те­лю. Ра́дуй­ся, го́­тѳовъ и ски́­ѳовъ про­свѣ­ти́­те­лю; ра́дуй­ся, бо­гоу­крѣп­ле́н­ный пра́­вды ре­вни́­те­лю. Ра́дуй­ся, вше́­дый въ ра́­дость Го́­спо­да тво­е­го́; ра́дуй­ся, усе́рд­ный о на́съ пред­ста́­те­лю.

Ра́дуй­ся, святи́­те­лю ве­ли́кій Іо­а́н­не Зла­тоу́­сте.

Кон­да́къ 2

Ви́дя Хри­сто́съ ро­ди́­те­лей тво­и́хъ Се­ку́н­да и Анѳу́­сы жи­тіе́ чи́­стое, бла­го­во­ли́ я́ про­сла́­ви­ти, и тя́, Іо­а́н­не, и́ма во утѣ­ше́ніе да­ро­ва́, да вѣ́р­ніи, до­бро­дѣ́­те­ли твоя́ по­ми­на́­ю­ще, пре­воз­но́сятъ чету́ пра́­вед­ную, тя́ из­ра­сти́в­шую, и, то́й ре­вну́­ю­ще, по­ю́тъ Бо́­го­ви: Алли­лу́ія.

Икосъ 2

Ра́зумъ уче́ніемъ уму­дри́­вый, се́рд­цемъ же во бла­го­че́­стіи отъ мла́­до­сти во­спи­та́нъ сы́й, ра́­дость и утѣ­ше́ніе бы́лъ еси́, Іо­а́н­не, ма́­те­ри тво­е́й, егда́ су­пру́­га сво­е­го́ и дще́­ре ли­ши́­ся. Тѣ́м­же при­но́­симъ тебѣ́ хва­лы́ си­це­вы́я:

Ра́дуй­ся, отро­ко́мъ звѣз­до́ бла­гонра́­вія; ра́дуй­ся, а́н­ге­ла-хра­ни́­теля уве­се­ле́ніе. Ра́дуй­ся, я́ко того́ ни­ко­ли́­же опе­ча́­лилъ еси́; ра́дуй­ся, при́­сныхъ лю­би́­ми­че. Ра́дуй­ся, во уче́ніи пре­спѣ­ва́­вый и тѣ́мъ мудре­цы́ мíра сего́ уди­ви́­вый; ра́дуй­ся, я́ко, еще́ уче­ни́къ сы́й, Ан­ѳи́­мія бо­го­ху́ль­ни­ка по­сра­ми́лъ и вра­зу­ми́лъ еси́. Ра́дуй­ся, уг­не­те́н­ныхъ сле́­зы го́рь­кія въ су­дѣ́хъ узрѣ́­вый; ра́дуй­ся, отъ творя́щихъ без­за­ко́нія укло­ни́­вый­ся. Ра́дуй­ся, пути́ незло́­бія спа­си́­тель­на­го взы­ска́­вый; ра́дуй­ся, по успе́ніи ма́­те­ре въ пу­сты́­ню за­клю­чи́­вый­ся. Ра́дуй­ся, та́мо за ро­ди́­те­ли пре­ста́вль­шіяся Бо́­го­ви усе́рд­но мо­ли́­вый­ся; ра́дуй­ся, я́ко тíи дне́сь, со Вла­ды́­чи­цею и святы́ми ли­ку́­ю­ще, отъ зем­но­ро́д­ныхъ ве­ли­ча́­ют­ся и хва́лятся.

Ра́дуй­ся, святи́­те­лю ве­ли́кій Іо­а́н­не Зла­тоу́­сте.

Кон­да́къ 3

Си́лы, во е́же сло́­вомъ и дѣ́­ломъ Хри­сту́ ра­бо́­та­ти стяжа́лъ еси́, Іо­а́н­не, а́ки те­зо­и­ме́н­ный ти́ Пред­те́­ча, въ пу­сты́­ни. Та́мо бо, по­сто́мъ стра́­сти плот­скíя умер­тви́въ, мо­ли́­твою ду́хъ окри­ли́лъ еси́ и, я́ко во́­инъ, про­ти́ву кня́зя вла́­сти воз­ду́ш­ныя во вся́ ору́жія Бо́жія обле́кл­ся еси́, со упо­ва́ніемъ поя́ Бо́гу крѣ́п­ко­му: Алли­лу́ія.

Икосъ 3

Имѣ́я власяни́цу и по́ясъ усме́нъ о чре­слѣ́хъ, Кре­сти́­теля Хри­сто́­ва ре­вни́­те­лю, бы́ліемъ пи­та́л­ся еси́, Іо­а́н­не, въ пу­сты́­ни, изъ нея́же, я́ко му́жъ си́лы ис­по́лнь, из­ше́лъ еси́. Тѣ́м­же во­піе́мъ ти́:

Ра́дуй­ся, воз­дер­жа́ніемъ Иліи́ про­ро́ку упо­до́­би­вый­ся; ра́дуй­ся, ни­ще­ты́ Хри­сто́­вы по­дра­жа́­те­лю. Ра́дуй­ся, цѣ­ло­му́­дріемъ не­мо­же́ніе тѣ­ле­се́ укрѣ­пи́­вый; ра́дуй­ся, бо­го­мы́­сліемъ уны́­ніе от­гна́­вый. Ра́дуй­ся, па́мятію все­вѣ́­дѣнія Бо́жія се́рд­це не­по­ро́ч­но со­блю­ды́й; ра́дуй­ся, бдѣ́ніемъ ко́з­ни бѣ­со́в­скія по­сра­ми́­вый. Ра́дуй­ся, иску­ше́нія са́мъ по­бѣ­ди́­вый и ины́я по­слѣ­ди́ то­му́­жде нау­чи́­вый; ра́дуй­ся, въ дѣ́­ла­ніи ду­хо́в­нѣмъ по­дви­за́­ю­щих­ся му́­дрый укрѣ­пи́­те­лю. Ра́дуй­ся, дру́­га тво­е­го́ Ѳе­о́­до­ра отъ па­де́нія грѣ­хо́в­на­го удер­жа́­вый; ра́дуй­ся, дру́­га тво­е­го́ епи́­ско­па Ва­си́лія во служе́ніи утвер­ди́­вый. Ра́дуй­ся, отъ мíра из­гна́н­нымъ при­ста́­ни­ща ти́ха­го ука­за́­те­лю; ра́дуй­ся, и́но­че­ска­го житія́ за­щи́т­ни­че.

Ра́дуй­ся, святи́­те­лю ве­ли́кій Іо­а́н­не Зла­тоу́­сте.

Кон­да́къ 4

Бу́рю иску­ше́ній но́вую по­бѣ­ди́лъ еси́, Іо­а́н­не, въ пе­ще́­рѣ еди́нъ все­ли́в­ся; бо­лѣ́­зни же ра́ди изъ пу­сты́­ни из­ше́дъ во Ан­тіо­хíю, отъ свята́го Ме­ле́тія во діа́­ко­на по­ста́в­ленъ бы́лъ еси́ и по­пе­че́нію о не­и­му́­щихъ ре́­вност­но пре­да́л­ся еси́. Еже ви́дяще, вѣ́р­ніи ра́­дост­но поя́ху Бо́­го­ви: Алли­лу́ія.

Икосъ 4

Слы́­шавъ отъ вѣ́р­ныхъ о тебѣ́ рѣ́чи хва­ле́б­ныя, святы́й Фла­віа́нъ по достоя́нію бла­го­да́ть свяще́н­ства низ­ве­де́ на тя́, Іо­а́н­не. Тѣ́м­же лю́діе ан­тіо­хíйстіи веселя́хуся и, тру­ды́ твоя́ пра́­вед­но чту́­ще, та́ко тя́ ве­ли­ча́ху:

Ра́дуй­ся, о себѣ́ по­пе­че́ніе вся́кое отве́р­гій; ра́дуй­ся, убо́­гимъ по­кро́­ве. Ра́дуй­ся, те́­плое си́­рымъ при­бѣ́­жи­ще; ра́дуй­ся, скор­бе́й уто­ли́­те­лю. Ра́дуй­ся, о люд­ски́хъ не­вѣ́­же­ствіихъ пе­ча́ль­ни­че; ра́дуй­ся, дѣ́в­ствен­на­го житія́ слад­ко­гла́с­ный убла­жа́­те­лю. Ра́дуй­ся, мно́­ги іу­де́и про­свѣ­ти́­вый; ра́дуй­ся, иска́в­шія спа­се́нія пра́­вымъ уче́ніемъ огла­ша́­вый. Ра́дуй­ся, жи­тіе́мъ тво­и́мъ сего́ уче́нія не по­сра­ми́­вый; ра́дуй­ся, бла­го­че́­стія свѣ­ти́ль­ни­че. Ра́дуй­ся, апо́­сто­ломъ еди­нон­ра́в­ни­че; ра́дуй­ся, я́ко пра́­вед­но да­де́ся ти́ жре́­бій па́­стыр­ска­го о ду­ша́хъ по­пе­че́нія.

Ра́дуй­ся, святи́­те­лю ве­ли́кій Іо­а́н­не Зла­тоу́­сте.

Кон­да́къ 5

Бого­то́ч­ною Кро́­вію отъ вѣ́ч­ныя сме́р­ти искупле́н­ныя со­блю­да́я, егда́ са́нъ свяще́н­ства прія́лъ еси́, Іо­а́н­не, дѣ́ло бла­го­вѣ́ст­ни­ка трезвя́ся до́­брѣ со­тво­ри́лъ еси́, об­ли­ча́я, за­пре­ща́я, умоля́я со вся́кимъ дол­го­тер­пѣ́ніемъ и уче́ніемъ и поя́ Бо́гу: Алли­лу́ія.

Икосъ 5

Ви́дя не­стро­е́­нія во гра́­дѣ, скорбя́ же о се́мъ, поко́я не по­зна́лъ еси́, Іо­а́н­не, не­вѣ́р­ныя бо бла­го­вѣ́­стіемъ огла­ша́лъ еси́, вѣ́р­ныя же та́­ин­ствы цер­ко́в­ны­ми освяща́я и та́й­намъ вѣ́ры уча́, до­сто́й­но стяжа́лъ еси́ и́мя Зла­та́я уста́, слы́­шавъ отъ всѣ́хъ си­це­ва́я:

Ра́дуй­ся, па́­сты­рю до́­брый; ра́дуй­ся, святы́мъ кре­ще́­ніемъ мно́­га ча́да Це́р­кви Хри­сто́­вѣ по­ро­ди́­вый. Ра́дуй­ся, по­ма́­за­ніемъ мѵ́ра пе­ча́ть да́ра Ду́ха Свята́го тѣ́мъ да­ро­ва́­вый; ра́дуй­ся, святѣ́й­шія тра­пе́­зы пред­стоя́телю уми­ле́н­ный. Ра́дуй­ся, пи́­щею не­тлѣ́нія ча́да твоя́ пи­та́­вый; ра́дуй­ся, покая́ніемъ сер­де́цъ очи­сти́­те­лю. Ра́дуй­ся, су­пру́­жествъ о Го́­спо­дѣ со­че­та́­те­лю; ра́дуй­ся, еле́я по­ма́­за­ніемъ цѣ­ли́­те­лю. Ра́дуй­ся, сло́­ва Бо́жія не­ло́ж­ный истол­ко­ва́­те­лю; ра́дуй­ся, ере­се́й мо́щ­ный об­ли­чи́­те­лю. Ра́дуй­ся, глу­бо́­кій кла́дязю и́стин­на­го бо­го­сло́­вія; ра́дуй­ся, я́ко притяжа́лъ еси́ па́­ствы серд­ца́, люб­ве́ къ тебѣ́ ис­по́л­нен­ная.

Ра́дуй­ся, святи́­те­лю ве­ли́кій Іо­а́н­не Зла­тоу́­сте.

Кон­да́къ 6

Про­по­вѣ́д­никъ покая́нія на­и­па́­че яви́лся еси́, Іо­а́н­не, егда́ лю́діе ан­тіо­хíйстіи, царя́ по­до́­біе низ­ве́рг­ше, гнѣ́ву того́ до­сто́й­но под­па­до́­ша. Бо́жіимъ бо ми­ло­се́р­діемъ утѣ­ша́я, ко ис­прав­ле́нію житія́ сло­ве­сы́ тво­и́­ми вле́клъ еси́ вся́, во е́же се́рд­цемъ чи́­стымъ пѣ́ти Бо́гу: Алли­лу́ія.

Икосъ 6

Возсія́ Ан­тіо­хíя ра́­до­стію, егда́ по сло­ве­си́ тво­е­му́ без­за­ко́нія своя́ опла́­кав­ши, ца­ре́­во про­ще́ніе полу­чи́. Оба́­че ско́р­бію омра­чи́­ся вско́­рѣ, съ то­бо́ю раз­лу­ча́­е­ма: во ар­хіе­пи́­ско­па бо Ца­рю­гра́ду при́­званъ бы́лъ еси́, Іо­а́н­не. Тѣ́м­же тебѣ́ во­піе́мъ:

Ра́дуй­ся, а́ки Иса́ія, скорбь­ми́ гра́­да оте́­че­ска­го по­бо­лѣ́­вый; ра́дуй­ся, а́ки Іеремíя, злон­ра́­віе люд­ско́е опла́­ка­вый. Ра́дуй­ся, а́ки Іе­зе­кіи́ль, без­за­ко́н­ни­ки ко обра­ще́нію при­зы­ва́­вый; ра́дуй­ся, мо́лніе, гор­ды́­ню низ­ло­жи́в­шая. Ра́дуй­ся, гро́­ме, без­за­ко́н­но жи́в­шія устра­ши́­вый; ра́дуй­ся, ко­ры­сто­лю́­бія об­ли­чи́­те­лю. Ра́дуй­ся, па́­губу тще­сла́­вія по­ка­за́­вый; ра́дуй­ся, сту́д­на­го е́л­лин­ска­го мно­го­бо́жія по­сра­ми́­те­лю. Ра́дуй­ся, смяте́н­ныхъ сер­де́цъ уми­ри́­те­лю; ра́дуй­ся, спо­спѣ́ш­ни­че епи́­ско­пу Фла­віа́ну, ста́р­цу пра́­вед­но­му. Ра́дуй­ся, со пу­стынно­жи́­те­ли ца́р­скія при­ста́в­ни­ки на ми́­лость пре­кло­ни́­вый; ра́дуй­ся, Іо́нѣ, Ниневíю спа́с­ше­му, ра́в­ный.

Ра́дуй­ся, святи́­те­лю ве­ли́кій Іо­а́н­не Зла­тоу́­сте.

Кон­да́къ 7

Хотя́ це́р­ковь Ца­ре­гра́д­скую, а́ки не­вѣ́сту Хри­сто́ву, до­сто́й­но укра­си́­ти, во бла­го­лѣ́піе вся́ при­ве́лъ еси́, Іо­а́н­не. Все­но́щ­ны­ми бо бдѣ́ніи отъ сбо́­рищъ аріа́н­скихъ вѣ́р­ныя отвра­ти́лъ еси́ и чи́нъ Бо­же́­ствен­ныя Литургíи му́­дрѣ устро́­илъ еси́, я́ко бла­го­во́н­ное мѵ́ро, исто­чи́въ мо­ли́­твы, и́ми­же на­зи­да́­ю­ще­ся, о тебѣ́ Бо́­го­ви по­е́мъ: Алли­лу́ія.

Икосъ 7

Но́вое зна́­ме­ніе ми́­ло­сти Бо́жія бы́сть о тебѣ́, святи́­те­лю: мо­ли́­тва­ми бо тво­и́­ми вѣ́р­ніи всѣ́хъ вре­ме́нъ, Бо́­го­ви бе­сѣ́ду­ю­ще, во спа­се́ніе умудря́ются. Пріи­ми́ у́бо отъ на́съ си­це­вы́я хва­лы́:

Ра́дуй­ся, а́ки Да­ви́дъ, сло­ве­сы́ мо­ли́­твен­ны­ми Це́р­ковь Бо́жію обо­га­ти́­вый; ра́дуй­ся, а́ки бра́тъ Бо́жій Іа́­ковъ, чи́нъ Бо­же́­ствен­ныя Литургíи на­пи­са́­вый. Ра́дуй­ся, въ то́м­же Ве­ли́­кому Ва­си́лію по­дра­жа́­вый; ра́дуй­ся, Ду́ха Свята́го прія́­те­ли­ще. Ра́дуй­ся, то­бо́ю бо Ду́хъ Святы́й на­пи­са́ сло­ве­са́ спа­си́­тель­ная; ра́дуй­ся, я́ко мо­ли́­тва­ми тво­и́­ми, отъ сна́ во­ста́в­ше, Отца́ бла­го­да­ри́мъ. Ра́дуй­ся, я́ко тво­и́­ми сло­ве­сы́, ко сну́ гряду́ще, отъ Ду́ха Свята́го пре­грѣ­ше́ній остав­ле́нія про́­симъ; ра́дуй­ся, я́ко усты́ тво­и́­ми Сы́на Бо́жія умоля́емъ, да не въ су́дъ при­ча́­стіе Бо­же́­ствен­ныхъ Та́­инъ пріи́­мемъ. Ра́дуй­ся, ра́бе Бо́жій, уни­чи­же́н­ныя на ве́­че­рю Хри­сто́ву гла­ша́яй; ра́дуй­ся, про­по­вѣ́д­ни­че Распя́таго на Кре­стѣ́ за мірскíй жи­во́тъ и спа­се́ніе. Ра́дуй­ся, я́ко въ сло́­во твое́, а́ки въ ри́зы по­зла­ще́­ны, та́й­ны вѣ́ры одѣ́яшася; ра́дуй­ся, пѣ­сно­тво́р­че и витíя ди́в­ный.

Ра́дуй­ся, святи́­те­лю ве­ли́кій Іо­а́н­не Зла­тоу́­сте.

Кон­да́къ 8

Стра́н­никъ во юдо́­ли зем­нѣ́й бы́въ, сми­ре́нія, воз­дер­жа́нія и чи­сто­ты́ о́бразъ по­ка­за́лъ еси́, Іо­а́н­не, жи­тіе́мъ во ца́рству­ю­щемъ гра́­дѣ: та́мо бо оби́­те­ли и́но­че­скія об­но­ви́лъ и со­зда́лъ еси́, и уста́­вы житія́ мо­на́­ше­ска­го да́лъ еси́ дѣ́­вамъ не­по­ро́ч­нымъ; отъ ни́х­же, а́ки ѳиміа́мъ бла­го­во́н­ный, воз­не­се́­ся Бо́­го­ви пѣ́снь ве­ли́­кая: Алли­лу́ія.

Икосъ 8

Все́ю ду­ше́ю Хри­сто́­ви ра­бо́­тая, че­ло­вѣ́­комъ уго­жда́­ти не вос­хо­тѣ́лъ еси́, Іо­а́н­не. Име­ни́­тымъ бо ве́­че­ри устроя́ти пре­ста́въ, убо́­гимъ тра­пе́­зы умно́­жилъ еси́, стран­но­пріи́м­ни­цы же и без­ме́з­дныя вра­че́б­ни­цы не­ду́ж­нымъ со­зда́въ, нау­чи́лъ еси́ пѣ́ти тебѣ́:

Ра́дуй­ся, Ни­ко­ла́я, святи́­теля Мѵрли­кíйска­го, со­ре­вно­ва́­те­лю; ра́дуй­ся, стяжа́­вый сми­ре́ніемъ вы­со́­кая. Ра́дуй­ся, пріо­брѣ­ты́й ни­ще­то́ю бо­га́­тая; ра́дуй­ся, си́ми до­бро­дѣ́­тель­ми и́но­комъ о́бразъ бы́­вый. Ра́дуй­ся, гла́д­ныхъ пи­та́­те­лю; ра́дуй­ся, а́ки Авра­а́мъ, стра́н­ныя пріи­ма́­вый. Ра́дуй­ся, без­прію́т­ныхъ си­ро́тъ прія́­те­ли­ще; ра́дуй­ся, без­по́­мощ­ныхъ ста́рцевъ и ста́­рицъ по­пе­чи́­те­лю. Ра́дуй­ся, из­бы́т­ки своя́ не­и­му́­щимъ рас­то­чи́­вый; ра́дуй­ся, я́ко ко­е­му́­ждо въ го́­ре­стехъ, а́ки а́н­гелъ-утѣ́­ши­тель, явля́лся еси́. Ра́дуй­ся, ру́ки бо­га́­тыхъ на бла­го­дѣя́нія отвер­за́­вый; ра́дуй­ся, я́ко о глу­би­нѣ́ ми­ло­се́р­дія тво­е­го́ Ма́ти Бо́жія воз­ра́­до­ва­ся.

Ра́дуй­ся, святи́­те­лю ве­ли́кій Іо­а́н­не Зла­тоу́­сте.

Кон­да́къ 9

Вся́къ язы́къ спа­сти́ хотя́, про­по­вѣ́д­ни­ки Ева́н­гелія ко ски́­ѳомъ, пра́­о­тцемъ на́­шимъ, по­сла́лъ еси́ Іо­а́н­не, изъ Кон­стан­ти́­на гра́­да, въ не́м­же хра́мъ во и́мя апо́­сто­ла Па́­вла со­зда́лъ еси́ го́­тѳомъ, да и тíи, е́ресь а́ріеву отве́рг­ше, пра­во­сла́в­ны­ми усты́ по­ю́тъ Бо́­го­ви: Алли­лу́ія.

Икосъ 9

Витíи Пра­во­сла́­вія къ не­вѣ́р­нымъ по­сла́въ, къ це́р­квамъ вѣ́р­ныхъ, во Асíи су́­щимъ, са́мъ по­дви́глся еси́, Іо­а́н­не, и ты́я по­сѣ­ща́я, не­ра­ди́­выя об­ли­ча́я, усе́рд­ныя же по­хва­ля́я, вся́ смо­три́­тель­нѣ устро́­илъ еси́. Тѣ́м­же тя́ сла́­вимъ:

Ра́дуй­ся, Пра­во­сла́­вія свѣ­ти́­ло; ра́дуй­ся, па́­сты­рю до́­брый, о за­блу́жд­шихъ ов­ца́хъ попекíйся. Ра́дуй­ся, я́ко въ зе­мли́ ски́­ѳстѣй дне́сь и́мя твое́ про­слав­ля́ется; ра́дуй­ся, я́ко во и́мя твое́ це́р­кви Бо́жія здѣ́ воз­дви­за́­ют­ся. Ра́дуй­ся, служе́нія апо́­столь­ска­го при­ча́ст­ни­че; ра́дуй­ся, по сло­ве­си́ апо́­сто­ла Пе­тра́ ста́­до Бо́жіе па­сы́й. Ра́дуй­ся, не ну́­ждею, но во́­лею и по Бо́зѣ сіе́ по­сѣ­ща́­вый; ра́дуй­ся, мздо­и́м­ства тве́р­дый иско­ре­ни́­те­лю. Ра́дуй­ся, пра́­вилъ цер­ко́в­ныхъ не­лице­прія́тный блю­сти́­те­лю; ра́дуй­ся, лѣ­ни́­выя рабы́ пра́­вед­но из­гна́­вый. Ра́дуй­ся, я́ко во бла­го́е тру­ди́в­шіися отъ тебе́ по­хва­ли́­ша­ся и укрѣ­пи́­ша­ся; ра́дуй­ся, Це́р­кве ис­пы́тан­ный упра́­ви­те­лю.

Ра́дуй­ся, святи́­те­лю ве­ли́кій Іо­а́н­не Зла­тоу́­сте.

Кон­да́къ 10

Спа­се́нію па́­ствы твоея́ слу­жи́­ти не пре­ста́лъ еси́ Іо­а́н­не, отъ Асíи въ Царь­гра́дъ воз­вра­ти́в­ся. Егда́ же ца­ри́­цы и име­ни́­тыхъ злон­ра́в­ное жи­тіе́ об­ли­ча́­ти безбоя́знен­нѣ на­ча́лъ еси́, ско́р­би мно́­ги прія́лъ еси́: то­бо́ю бо об­ли­ча́­еміи, не мо­гу́­ще а́біе я́вѣ за­гра­ди́­ти пра́­вед­ная уста́ твоя́, та́й­но ко́вы дѣ́яху, во е́же по­гу­би́­ти тя́, чи́­стѣ Бо́­го­ви взы­ва́­ю­ща: Алли­лу́ія.

Икосъ 10

Стѣна́ не­ви́н­но го­ни́­мымъ и́но­комъ яви́лся еси́, Іо­а́н­не: сего́ ра́ди я́вѣ об­на­жи́­ся зло́­ба ве́лія, ю́же вра­зи́ на тя́ имѣ́яху. Льсти́­вый бо Ѳе­о́­филъ со ца­ри́­цею не­че­сти́­во на со­бо́­ри­щи обол­га́ и низ­ло­жи́ тя, не помяну́въ тру­до́въ тво­и́хъ во бла́­го оте́­че­ствія. Мы́ же сія́ бла­го­да́р­нѣ вос­по­ми­на́­емъ, гла­го́­лю­ще:

Ра́дуй­ся, ди́в­ную лю­бо́вь ко оте́­че­ству зем­но́­му по­ка­за́­вый; ра́дуй­ся, Царягра́­да отъ ва́р­вар­ско­го на­ше́­ствія сво­бо­ди́­те­лю. Ра́дуй­ся, Га­и́­ны, гро́з­на­го вождя́ го́­тѳска­го, укро­ти́­те­лю; ра́дуй­ся, ми́­ло­стей дре́в­нихъ, Це́р­кви царь­ми́ да­ро­ва́н­ныхъ, охра­ни́­те­лю. Ра́дуй­ся, Евтро́­пію вла́ст­ному убѣ́­жи­ще цер­ко́в­ное отъя́ти не по­пу­ска́­вый; ра́дуй­ся, по­слѣ­ди́ въ се́мъ убѣ́­жи­щи то­го́­жде Евтро́­пія го­ни́­ма спа­сы́й. Ра́дуй­ся, огра­жде́нія ра́ди Нитрíйскихъ и́но­ковъ не­пра́­вды со­бо́­ри­ща без­за­ко́н­на­го кро́т­цѣ пре­тер­пѣ́­вый; ра́дуй­ся, я́ко сло́­во Пи­са́нія: Любы́ дол­го­тер­пи́тъ, - на тебѣ́ оправ­да́ся. Ра́дуй­ся, опол­ча́­ти­ся за тя́ при́­снымъ вос­пре­ти́­вый; ра́дуй­ся, меча́ про­ти́ву вра­го́въ не­подъ­е́­мый. Ра́дуй­ся, вла­сте́мъ по­ви­ну́­вый­ся и сего́ ра́ди во́­лею въ ру́ки во́­и­новъ но́щію пре­да́­вый­ся; ра́дуй­ся, изъ оте́­че­ствія пра́­вды ра́ди из­гна́н­ный.

Ра́дуй­ся, святи́­те­лю ве­ли́кій Іо­а́н­не Зла­тоу́­сте.

Кон­да́къ 11

Пѣ́ніемъ ра́­дост­нымъ из­мѣ­ни́­ся вско́­рѣ пла́чь па́­ствы твоея́, до́блій стра­да́ль­че: во из­гна́ніе бо вле­ко́му ти́, вне­за́­пу гро́мъ воз­гре­мѣ́, мо́лнія воз­бли­ста́ и, вѣ́­тромъ шумя́щимъ, земля́ по­ко­ле­ба́­ся. Яже ви́дящи и тре­пе́щу­щи, ца­ри́­ца ра­ска́яся и че́ст­нѣ тя́ воз­вра­ти́, сми­ре́н­но во­пі­ю́­щи Бо́гу: Алли­лу́ія.

Икосъ 11

Свѣ́т­лую Пра­во­сла́­вія свѣ­щу́, сугу́­бо ца­ри́­ца воз­не­на­ви́­дѣ тя́ вско́­рѣ, егда́ об­ли­чи́лъ еси́ ю́, по­до́­біе свое́ близъ хра́­ма по­ста́вль­шую: сего́ ра́ди, сто­ри́­цею осу­жде́н­ный, въ Куку́­зѣ, ве́си да́ль­ней и ма́­лѣй, за­то­че́нъ бы́лъ еси́, Іо­а́н­не. Пріи­ми́ у́бо отъ на́съ си­це­вы́я хва­лы́:

Ра́дуй­ся, по сло­ве­си́ Іеремíину отъ ю́но­сти яре́мъ Бо́жій подъ­е́­мый; ра́дуй­ся, по гла­го́­лу Хри­сто́ву, ру́ку дѣ́­ла­нія на ра́ло ду­хо́в­ное воз­ло­жи́­вый. Ра́дуй­ся, до кон­ца́ вспя́ть не отвра­ти́­вый­ся; ра́дуй­ся, про­ти́ву ца­ри́­цы злон­ра́в­ныя воз­гре­мѣ́­вый. Ра́дуй­ся, то́ю, а́ки Кре­сти́­тель Иро­діа́дою, воз­не­на­ви́­дѣн­ный; ра́дуй­ся, отъ убíйцъ не­зри́­мо а́н­ге­ломъ спа­се́н­ный. Ра́дуй­ся, въ дому́ тво­е́мъ лю­бо́­вію па́­ствы твоея́ хра­ни́­мый; ра́дуй­ся, кле­вре́­та­ми не­пра́­вед­ныхъ суде́й уни­чи­же́н­ный. Ра́дуй­ся, въ за­то­че́ніе со сми­ре́ніемъ безро́­пот­но ше́­дый; ра́дуй­ся, вѣ́р­ны­ми опла́­кан­ный. Ра́дуй­ся, за Го́­спо­да распя́таго изъя́з­влен­ный и зау­ше́н­ный; ра́дуй­ся, я́ко му́­че­ни­цы со Пред­те́­чею на не­бе­сѣ́хъ о тер­пѣ́ніи тво­е́мъ ли­ко­ва́ху.

Ра́дуй­ся, святи́­те­лю ве­ли́кій Іо­а́н­не Зла­тоу́­сте.

Кон­да́къ 12

Бла­го­да́ть Бо́жія и во из­гна́ніи со­блю­да́­ше тя́, Іо­а́н­не: та́мо бо, а́ки Па́­велъ святы́й во у́захъ, финикíяномъ и пе́р­сомъ Ева́н­геліе воз­вѣ­ща́лъ еси́, по­сла́нь­ми вѣ́р­ныя утѣ­ша́я. И та́ко упа́слъ еси́ Це́р­ковь да́же до дне́, въ о́нь­же зла­та́я уста́ твоя́ из­ре­ко́­ша сло­ве­са́ по­слѣ́д­няя: Сла́­ва Бо́гу за вся́! Душа́ же твоя́ на не­бе­са́ пре­не­се́­на бы́сть святы́ми а́н­ге­лы, по­бѣ́д­нѣ во­пі­ю́­щи­ми: Алли­лу́ія.

Икосъ 12

Пою́ще ра́­дост­но, вѣ́р­ніи пре­не­со́­ша святы́я мо́щи твоя́, Іо­а́н­не, въ Царь­гра́дъ, от­ню́ду­же сла́­ва твоя́ про́й­де до по­слѣ́д­нихъ зе­мли́ и обы́­де всю́ все­ле́н­ную, уча́­щи всѣ́хъ пѣ́ти тебѣ́ си́це:

Ра́дуй­ся, стра́н­ни­че, во оте́­че­ствіе не­бе́с­ное вше́­дый; ра́дуй­ся, всѣ́хъ цер­кве́й мо­ли́­тва­ми на­пу́т­ство­ван­ный. Ра́дуй­ся, на пути́ въ Пи­ѳіу́нтъ да́ль­ній въ Ко­ма́­нѣхъ те­че́ніе скон­ча́­вый; ра́дуй­ся, я́ко кон­чи́­ну ти́ пред­ре­че́ священ­но­му́­че­никъ Ва­сили́скъ. Ра́дуй­ся, отъ сего́ услы́­ша­вый: бра́­те, зау́тра ку́п­но обря́щемся; ра́дуй­ся, Святы́хъ Та́­инъ прія́тіемъ къ вос­хо­жде́нію въ ра́й укрѣ­пи́­вый­ся. Ра́дуй­ся, я́ко душа́ твоя́ отъ мно­го­тру́д­на­го тѣ­ле­се́ ти́хо раз­лу­чи́­ся; ра́дуй­ся, я́ко тлѣ́ніе не при­кос­ну́ся ко­сте́мъ тво­и́мъ. Ра́дуй­ся, я́ко на си́хъ во хра́­мѣхъ же́р­тва без­кро́в­ная дне́сь воз­но́­сит­ся; ра́дуй­ся, не­бе́с­ныхъ вы­со́тъ оби­та́­те­лю, свѣ́­томъ не­ве­че́р­нимъ осія́нный. Ра́дуй­ся, я́ко со святы́ми Ва­си́ліемъ Ве­ли́­кимъ и Гри­го́ріемъ Бо­го­сло́­вомъ я́влься, вос­хва­ля́ти тя́ ку́п­но со о́нѣ­ми вся́ нау­чи́лъ еси́; ра́дуй­ся, сла́­во Це́р­кве все­ле́н­скія.

Ра́дуй­ся, святи́­те­лю ве­ли́кій Іо­а́н­не Зла­тоу́­сте.

Кон­да́къ 13

О, святи́­те­лю ве­ли́кій Іо­а́н­не Зла­тоу́­сте! При́­зри съ не­бе́с­ныхъ вы­со́тъ на ны́, до́лу по­ве́р­жен­ныя, и пріе́мъ сіе́ отъ люб­ве́ на́шея при­но­си́­мое ти́ хва­ле́ніе, умо­ли́ Го́­спо­да Бо́га, да из­ліе́тъ на ны́ бла­го­да́ть Свою́, не­мощ­на́я вра­чу́­ю­щую, су́щія во Пра­во­сла́­віи укрѣ­пи́тъ, отпа́д­шія же отъ Це́р­кве па́ки въ ло́но тоя́ при­ве­де́тъ, бла­гоутро́­біемъ Сво­и́мъ оску­дѣ­ва́­ю­щая вос­пол­ня́я, и всѣ́хъ спо­до́­битъ съ то­бо́ю и всѣ́­ми святы́ми пѣ́ти Ему́ во вѣ́ки: Алли­лу́ія, ал­ли­лу́ія, ал­ли­лу́ія.

Се́й кон­да́къ гла­го́­лет­ся три́­жды. Та́же Икосъ 1-й и Кон­да́къ 1-й

Мо­ли́­тва

О, святи́­те­лю ве­ли́кій Іо­а́н­не Зла­тоу́­сте! Мно́­гая и раз­ли́ч­ная да­ро­ва́нія отъ Го́­спо­да прія́лъ еси́ и, я́ко ра́бъ благíй и вѣ́р­ный, вся́ да́н­ныя тебѣ́ та­ла́н­ты до́­брѣ умно́­жилъ еси́: сего́ ра́ди во­и́­стину все­ле́н­скій учи́­тель бы́лъ еси́, я́ко вся́къ во́з­растъ и вся́ко зва́ніе отъ тебе́ поу­ча́­ет­ся. Ты́ еси́ отро­ко́мъ - по­слу­ша́­нія о́бразъ, ю́нымъ - цѣ­ло­му́­дрія свѣ­ти́­ло, муже́мъ - тру­до­лю́­бія на­ста́в­никъ, ста́­рымъ - незло́­бія учи́­тель, и́но­комъ - воз­дер­жа́нія пра́­ви­ло, моля́щимся - во́ждь отъ Бо́га вдох­но­ве́н­ный, му́­дро­сти и́щу­щимъ - ума́ про­свѣ­ти́­тель, витíямъ до­бро­гла­го́­ли­вымъ - сло́­ва жи­ва́­го исто́ч­никъ не­ис­чер­па́­е­мый, бла­го­тво­ря́щимъ - ми­ло­се́р­дія звѣз­да́, на­ча́ль­ствую­щимъ - прав­ле́нія му́­дра­го о́бразъ, пра́­вды ре­вни́­те­лемъ - дер­зно­ве́нія вдох­но­ви́­тель, пра́­вды ра́ди го­ни́­мымъ - тер­пѣ́нія на­ста́в­никъ: всѣ́мъ вся́ бы́лъ еси́, да вся́ко нѣ́кія спа­се́­ши. Надъ всѣ́­ми же си́ми стяжа́лъ еси́ лю­бо́вь, я́же е́сть соу́зъ со­вер­ше́н­ства, и то́ю, я́ко си́­лою Бо­же́­ствен­ною, вся́ да­ро­ва́нія во еди́­нѣмъ лицѣ́ тво­е́мъ во еди́­но со­во­ку­пи́лъ еси́, и ту́­ю­жде лю­бо́вь, раз­дѣ­ле́н­ная при­ми­ря́ющую, въ тол­ко­ва́ніи сло­ве́съ апо́­столь­скихъ всѣ́мъ вѣ́р­нымъ про­по­вѣ́­далъ еси́. Мы́ же, грѣ́ш­ніи, по еди́­ному кíйждо свое́ да­ро­ва́ніе иму́­ще, еди­не́нія ду́ха въ со­ю́­зѣ ми́ра не и́ма­мы, бы­ва́­емъ тще­сла́в­ни, дру́гъ дру́­га раз­дра­жа́­ю­ще, дру́гъ дру́гу за­ви́дяще: сего́ ра́ди да­ро­ва́нія на́ша раз­дѣ­ле́н­ная не въ ми́ръ и спа­се́ніе, но во вра­жду́ и осу­жде́ніе на́мъ явля́ются. Тѣ́м­же къ тебѣ́, святи́­те­лю Бо́жій, при­па́­да­емъ, раз­до́­ромъ обу­ре­ва́­е­ми, и въ со­кру­ше́ніи се́рд­ца про́­симъ: мо­ли́­тва­ми тво­и́­ми от­же­ни́ отъ сер­де́цъ на́­шихъ вся́ку го́р­дость и за́­висть, на́съ раз­дѣ­ля́ющія, да во мно́­зѣхъ у́дѣхъ еди́­но тѣ́ло цер­ко́в­ное бу́­детъ, да по сло­ве­си́ тво­е­му́ мо­ли́­твен­но­му воз­лю́­бимъ дру́гъ дру́­га и еди­но­мы́­сліемъ ис­по­вѣ́­мы Отца́ и Сы́на и Свята́го Ду́ха, Тро́­и­цу Еди­но­су́щ­ную и Не­раз­дѣ́ль­ную, ны́нѣ и при́­сно и во вѣ́ки вѣ­ко́въ. Ами́нь.

Тро­па́рь, гласъ 8

Устъ тво­и́хъ, я́коже свѣ́т­лость огня́ возсія́вши, бла­го­да́ть все­ле́н­ную про­свѣ­ти́: не сре­бро­лю́­бія мíрови со­кро́­ви­ща сни­ска́, вы­со­ту́ на́мъ сми­рен­но­му́­дрія по­ка­за́, но, тво­и́­ми сло­ве­сы́ на­ка­зу́я, о́тче Іо­а́н­не Зла­тоу́­сте, моли́ Сло́­ва Хри­ста́ Бо́га спа­сти́­ся ду­ша́мъ на́­шимъ.

Сла́­ва, и ны́нѣ, бо­го­ро́­ди­ченъ

Иже на́съ ра́ди ро­жде́й­ся отъ Дѣ́вы, и распя́тіе пре­тер­пѣ́въ, Благíй, ис­про­ве́р­гій сме́р­тію сме́рть и Во­скре­се́ніе явле́й я́ко Бо́гъ, не пре́­зри, я́же со­зда́лъ еси́ руко́ю Тво­е́ю, яви́ че­ло­вѣ­ко­лю́­біе Твое́, Ми́­ло­сти­ве. Пріи­ми́ ро́жд­шую Тя́, Бо­го­ро́­ди­цу, моля́щуюся за ны́, и спа­си́, Спа́­се на́шъ, лю́ди отча́янныя.

Кон­да́къ, гла́съ 6

Отъ не­бе́съ прія́лъ еси́ Бо­же́­ствен­ную бла­го­да́ть и тво­и́­ми уст­на́­ми вся́ учи́­ши по­кла­ня́тися въ Тро́­и­цѣ еди́­ному Бо́гу, Іо­а́н­не Зла­тоу́­сте, все­бла­же́н­не пре­по­до́б­не, до­сто́й­но хва́­лимъ тя́: еси́ бо на­ста́в­никъ, я́ко бо­же́­ствен­ная явля́я.

Ве­ли­ча́­ніе

Вели­ча́­емъ тя́, святи́­те­лю о́тче Іо­а́н­не, и чте́мъ святу́ю па́мять твою́, ты́ бо мо́­ли­ши за на́съ Хри­ста́ Бо́га на́­ше­го.