Конда́къ 1

Возбра́нный въ бѣда́хъ и ско́рбѣхъ, засту́пниче, благоутро́бія неистощи́мое сокро́вище, святи́телю о́тче Инноке́нтіе! Вели́каго тя́ предъ Го́сподомъ хода́тая, и чуде́съ мно́жествомъ свидѣ́тельствованна помо́щника иму́щіи, къ тебѣ́ во обстоя́ніи отъ вся́кихъ ну́ждъ и зо́лъ съ вѣ́рою и любо́вію притека́емъ, и та́ко ти́ во упова́ніи зове́мъ:

Ра́дуйся, Инноке́нтіе, вели́кій въ ско́рбѣхъ помо́щниче.

Икосъ 1

Ангеломъ уподо́бился еси́ непоро́чнымъ твои́мъ на земли́ житіе́мъ, соиме́нный неви́нности, святи́телю о́тче Инноке́нтіе, и сего́ ра́ди а́нгеловъ соприча́стія сподо́бился еси́ на небеси́, въ немо́лчномъ и́хъ славосло́віи Го́спода Сла́вы. Вонми́ у́бо и отъ на́шихъ благода́рныхъ усте́нъ приноси́мое тебѣ́ привѣ́тствіи си́ми хвале́ніе:

Ра́дуйся, непоро́чностію се́рдца, Непоро́чнаго, Иса́іемъ пронарече́ннаго, Агнца въ себѣ́ о́бразъ яви́вый; ра́дуйся, неви́нности, во все́мъ житіи́ твое́мъ сохране́ніемъ, грѣха́ неприча́стному, а́нгеловъ житію́ подража́тель бы́вый. Ра́дуйся, Архіере́я, вы́ше небе́съ бы́вшаго, досто́йный въ преподо́біи и незло́біи намѣ́стниче; ра́дуйся, Це́ркви, невѣ́сты Христо́вы непоро́чныя, драго́е украше́ніе. Ра́дуйся, свя́тости житія́ и непоро́чности нра́вовъ, соиме́нный неви́нности, учи́телю; ра́дуйся, чистоты́ и цѣлому́дрія ре́вностный, въ твои́хъ ча́дѣхъ духо́вныхъ, храни́телю.

Ра́дуйся, Инноке́нтіе, вели́кій въ ско́рбѣхъ помо́щниче.

Конда́къ 2

Ви́дя Госпо́дь Бо́гъ благопотре́бенъ тя́ бы́ти сосу́дъ ко прія́тію многоразли́чныхъ даро́въ благода́ти, со оби́ліемъ отъ щедро́тъ Свои́хъ, излія́ въ твое́ се́рдце ду́ха прему́дрости и ра́зума, во е́же просвѣща́ти язы́ки, во тьмѣ́ и сѣ́ни сме́ртнѣй сѣдя́щія; ду́ха совѣ́та и крѣ́пости, во е́же превозмога́ти надъ враги́ спасе́нія, ви́димыми и неви́димыми; ду́ха вѣ́дѣнія и благоче́стія, во е́же Христо́во ста́до пасти́ уче́ніемъ и житіе́мъ. Мы́ же, тя́ на спасе́ніе люде́й та́ко пріугото́ванна уразумѣ́вше, со умиле́ніемъ Пода́телю всѣ́хъ бла́гъ Бо́гу зове́мъ: Аллилу́ія.

Икосъ 2

Ра́зумъ благопотре́бенъ къ дѣ́ланію прія́тыхъ тобо́ю отъ Бо́га тала́нтовъ стяжа́ти хотя́й, еще́ ю́нъ сы́й, водвори́лся еси́ въ вертогра́дѣ духо́вныя му́дрости пресла́внаго гра́да Кíева; соверше́нъ же въ житіи́ хотя́й, по за́повѣди Христа́ Спаси́теля, бы́ти, сожи́тельство воспрія́лъ еси́ въ ли́кѣ и́ноковъ Свя́то-Пече́рскія Ла́вры, оболче́нъ во вся́ ору́жія Бо́жія; идѣ́же преобразу́яся отъ сла́вы въ сла́ву я́коже отъ Госпо́дня Ду́ха, дости́глъ еси́ въ му́жа соверше́нна, въ мѣ́ру во́зраста исполне́нія Христо́ва. Мы́ же, твое́ зва́ніе и избра́ніе на служе́ніе язы́комъ отдале́ннымъ разсмотря́юще, со удивле́ніемъ зове́мъ ти́:

Ра́дуйся, са́да боже́ственнаго розго́ виногра́да, плода́ми Ду́ха, въ Ма́лой Россíи, пріумно́женная, да и́хъ оби́ліемъ обши́рныя страны́ Сиби́ри наслади́ши; ра́дуйся, сладкоуха́нный кри́не Госпо́день, во благорастворе́нномъ ю́гѣ неувяда́емою неви́нностію процвѣ́тшій, да то́ю страны́ сѣ́вера среди́ снѣго́въ и мра́за облагоуха́еши и украси́ши. Ра́дуйся, въ земно́мъ учи́лищѣ небе́сной му́дрости, отъ Самаго́, Христо́мъ обѣтова́ннаго Наста́вника навы́кшій, да е́ю язы́ки, Бога невѣ́дущія, на пу́ть и́стины и спасе́нія наста́виши; ра́дуйся, примѣ́ромъ житія́ святы́хъ чудотво́рцевъ Пече́рскихъ на высоту́ добродѣ́телей поста́вленный, да на се́й, я́ко на свѣ́щницѣ свѣти́льникъ, мглу́ неподо́бнаго житія́ во изгна́ніи су́щихъ разго́ниши. Ра́дуйся, вѣ́рный учениче́ Спа́са на́шего, неотсту́пный стопа́мъ Его́ послѣ́дователю, во апо́стола язы́ковъ предъизбра́нный; ра́дуйся, ча́до послушли́вое ма́тери Це́ркви Правосла́вныя, во отца́ и первосвяти́теля ирку́тскія па́ствы пронарече́нный.

Ра́дуйся, Инноке́нтіе, вели́кій въ ско́рбѣхъ помо́щниче.

Конда́къ 3

Си́лою свы́ше тя́ облече́нна уразумѣ́вше Благовѣ́рный Ца́рь и святы́й Собо́ръ, избра́ша тя́ во апо́стольское служе́ніе, проповѣ́дати Ева́нгеліе Ца́рства Христо́ва въ землѣ́ язы́ковъ чужды́хъ, невѣ́дущихъ пѣ́ти во Святѣ́й Тро́ицѣ еди́ному Бо́гу: Аллилу́ія.

Икосъ 3

Имѣ́я ре́вность апо́стольскую о спасе́ніи ду́шъ человѣ́ческихъ, подви́глся еси́ кра́сными нога́ми твои́ми на вся́ труды́ и бѣды́ пу́тнаго ше́ствія въ да́льнія страны́ ца́рства хи́новъ; къ его́же предѣ́ломъ, чрезъ го́ры же и рѣ́ки, де́бри и пусты́ни, ма́ло не лѣ́тнему соверши́вшуся кругу, дости́гъ, въ Селенги́нскѣ препокое́ніе обрѣ́лъ еси́; идѣ́же тя́, отъ трудо́въ стра́нствія апо́стольскаго, ма́лое ста́до при́сныхъ ти́ по вѣ́рѣ привѣ́тствіи срѣ́тиша си́ми:

Ра́дуйся, но́вый апо́столе язы́ковъ, со Ева́нгеліемъ Христо́вымъ, на просвѣще́ніе язы́ковъ, во странѣ́ и сѣ́ни сме́ртнѣй сѣдя́щихъ, необозри́мыя стра́ны прете́кшій; ра́дуйся, въ ше́ствіихъ пу́тныхъ, я́коже и Па́велъ, язы́ковъ апо́столъ, бѣды́ въ рѣка́хъ, бѣды́ въ пусты́ни, бѣды́ отъ язы́къ, бѣды́ отъ лжебра́тіи, вся́ Христа́ ра́ди и Ева́нгелія бо́дрѣ срѣ́тивый. Ра́дуйся, лучеза́рное Це́ркви Христо́вы свѣти́ло, не отъ восто́къ, но на просвѣще́ніе, неозаре́ннаго свѣ́томъ Христо́вымъ, восто́ка возше́дшее; ра́дуйся, боже́ственнаго огня́ многовмѣсти́мое носи́ло, теплоту́ любве́ Христо́вы во страны́ сту́жи и мра́за въ себѣ́ прине́сшее. Ра́дуйся, ду́хомъ ре́вности апо́стольскія дви́жимый, препокое́ніе вся́чески отри́нувъ, на труды́ апо́стольскія, къ язы́комъ монго́льскимъ поспѣши́вый; ра́дуйся, во изгна́ніи стра́ждущимъ и тя́жкими рабо́тами обремене́ннымъ поко́й душа́мъ во благо́мъ и́гѣ Христо́вомъ указа́вый.

Ра́дуйся, Инноке́нтіе, вели́кій въ ско́рбѣхъ помо́щниче.

Конда́къ 4

Бу́рю за́висти дре́вній человѣ́ческихъ ду́шъ прельсти́тель воздви́же въ ми́рныхъ къ на́мъ и́здревле сердца́хъ хи́новъ сопроти́въ тебя́, во страну́ и́хъ гряду́щаго, благовѣ́стника ми́ра Христо́ва; и возста́ви на тя́, я́коже дре́вле на Па́вла, язы́ковъ апо́стола, лжебра́тію, во е́же въ предѣ́лы хи́новъ твое́ возбрани́ти вхожде́ніе, да не навы́кнутъ хи́нове, я́коже и правосла́вніи, изве́дшему ны́ изъ тьмы́ во свѣ́тъ Сво́й чу́дный Христу́ Бо́гу пѣ́ти: Аллилу́ія.

Икосъ 4

Услы́шавъ ухищре́нныя хи́новъ глаго́лы, я́ко не подоба́етъ ти́, іера́рху вели́кому Го́спода, бы́ти прія́ту въ и́хъ ца́рство, да не посрами́тся тобо́ю вели́кій и́хъ, бѣсо́въ служи́тель, Хуту́хта, обрати́лся еси́ па́ки со Ева́нгеліемъ ко язы́комъ своего́ ца́рства монго́льскимъ, е́же ви́дяще, глаго́лами живота́ тобо́ю дото́лѣ насыща́еміи, съ ве́ліею ра́достію тя́, я́ко своего́ апо́стола, прія́вше, возопи́ша ти́ такова́я:

Ра́дуйся, хи́нами, я́коже и Христо́съ дре́вле гадаря́нцами, по кова́рству еди́наго и того́жде спасе́нія врага́ въ и́хъ ца́рство не прія́тый, ко прія́тію же сами́ми а́нгелы въ небе́сное Ца́рство досто́йный; ра́дуйся, не ро́ду чуждо́му хи́новъ, но своего́ ца́рства язы́комъ монго́льскимъ, по прему́дрому строе́нію свы́ше, во апо́стола угото́ванный. Ра́дуйся, я́ко возбране́ніемъ тебѣ́ благовѣ́стія въ предѣ́лахъ язы́ковъ чужды́хъ, ве́ліе бла́го язы́комъ родна́го на́мъ ца́рства устро́ися; ра́дуйся, я́ко про́повѣдію Ева́нгелія, тобо́ю къ язы́комъ монго́льскимъ принесе́нною, злоухищре́ніе [врага́] ду́шъ человѣ́ческихъ же́стоко посрами́ся. Ра́дуйся, я́ко твоего́ ра́ди среди́ на́съ вселе́нія, невѣ́дущіи Бо́га въ позна́ніе и́стины приведу́тся, противля́ющіися же и́стинѣ облича́тся; ра́дуйся, я́ко на о́бразъ свята́го житія́ твоего́ взира́юще, грѣ́шніи пока́ются, беззако́нніи же уцѣлому́дрятся.

Ра́дуйся, Инноке́нтіе, вели́кій въ ско́рбѣхъ помо́щниче.

Конда́къ 5

Богото́чный прему́дрости исто́чникъ отъ оби́лія прису́щей ти́ благода́ти прото́ржеся въ пусты́ни монго́льски, егда́ неразу́мніи хи́нове, хитросплете́нными свои́ми опло́ты загради́ша то́ки ея́ въ предѣ́лы и́хъ омраче́ннаго ца́рства: ре́вностію бо апо́стольскою дви́жимь и во служе́ніи па́стырскомъ тружда́яся, о́во просвѣща́лъ еси́ свѣ́томъ Ева́нгелія Христо́ва невѣ́рующія язы́ки мого́льски, о́во утвержда́лъ еси́ вѣ́рующія въ послуша́ніи Правосла́вныя Це́ркве уста́вамъ; и та́ко науча́лъ еси́ и невѣ́рные и вѣ́рные вку́пѣ воспѣва́ти Еди́ному всѣ́хъ человѣ́ковъ Спаси́телю Бо́гу: Аллилу́ія.

Икосъ 5

Ви́дѣвше поста́вленніи въ предѣ́лахъ язы́ковъ а́нгели, ца́рства же Хи́нскаго и язы́ка Монго́льскаго, обличе́нна тя́ си́лою свы́ше, стоя́ша проти́ву дру́гъ-дру́га, я́коже дре́вле а́нгели ца́рства Пе́рсскаго и язы́ка Іуде́йскаго, да тя́ испро́сятъ у Вы́шняго на просвѣще́ніе: о́въ у́бо ца́рства Хи́нскаго, о́въ же язы́ка Монго́льскаго. И моли́твами сего́ дарова́ тя́ Вы́шній въ первосвяти́теля Ирку́тскія Це́ркве и учи́теля язы́ковъ восто́чнаго ца́рства Сиби́ри; е́же мы́ ны́нѣ, ча́да твои́ духо́вніи, ра́достно воспомина́юще, си́це зове́мъ ти́:

Ра́дуйся, первоа́нгеле Ирку́тскія Це́ркве, благовѣ́стіемъ Христо́ва Ева́нгелія, послѣ́дніе Ру́сскаго ца́рства предѣ́лы огласи́вый; ра́дуйся, свято́е нача́ло святи́телей Ирку́тскія па́ствы, про́чимъ, о́во сконча́ніемъ здѣ́ живота́, о́во на другíя па́ствы преведе́ніемъ, премѣня́емымъ, еди́ный ея́ несмѣ́нный блюсти́телю. Ра́дуйся, о́тче, святы́хъ оте́цъ въ насажде́ніи дре́вняго благоче́стія и искорене́ніи душевре́днаго нече́стія подража́телю; ра́дуйся, въ насажде́нномъ тобо́ю вертогра́дѣ па́стырскому служе́нію уготовля́емыхъ трудолюби́вый учи́телю. Ра́дуйся, па́стырю до́брый, изнемо́гшее подъя́вый, боля́щее уврачева́вый, сокруше́нное обяза́вый, заблу́дшее обрати́вый, поги́бшее взыска́вый, гото́вый и ду́шу твою́ положи́ти за о́вцы твоя́; ра́дуйся, неусы́пный стра́же, ввѣ́ренныя ти́ ду́ши, Кро́вію Христо́вою иску́пленныя, бдѣ́ннымъ моле́ніемъ и пу́тнымъ, человѣ́ческія си́лы превосходя́щимъ обхожде́ніемъ, до́брѣ я́ сохрани́вый.

Ра́дуйся, Инноке́нтіе, вели́кій въ ско́рбѣхъ помо́щниче.

Конда́къ 6

Богопроповѣ́дниковъ Христо́выхъ апо́столовъ труды́ на ся́ подъе́мъ, о́ныхъ наслѣ́довалъ еси́ не то́чію по́двиги и лише́нія, но и ско́рби и озлобле́нія: о́во прекосло́віемъ и враждова́ніемъ препина́емъ, о́во кова́рствомъ и клевета́ми озлобля́емъ; но вся́, ра́ди Христа́ и Ева́нгелія, до́блественно поне́слъ еси́, и вся́ ны́, не то́чію благоду́шствующія, но и скорбя́щія, научи́лъ еси́ пѣ́ти Бо́гу: Аллилу́ія.

Икосъ 6

Возсія́ла е́сть па́че со́лнца, во огни́ искуше́ній и скорбе́й очище́нная, душа́ твоя́, до́блественный подви́жниче Христо́въ: а́ще бо въ не́мощехъ и болѣ́знѣхъ претружде́но бя́ше тѣ́ло твое́, но ду́хомъ при́сно сы́й бо́дръ, всегда́ побѣжда́лъ еси́ враги́ Христо́вы Це́ркви. Сего́ ра́ди и мы́, тобо́ю въ ско́рбѣхъ утѣша́еми, побѣ́дная ти́ си́це вопіе́мъ:

Ра́дуйся, во́ине Христо́въ, во всеору́жіи Бо́жіи проти́ву нача́лъ и власте́й и міродержи́телей тьмы́ вѣ́ка сего́, духо́въ зло́бы поднебе́сныхъ, тве́рдыми стопа́ми ста́вый; ра́дуйся, и́стиною а́ки поясомъ по чреслѣ́хъ препоя́санный, злочести́выя язы́ковъ шата́нія стягну́вый. Ра́дуйся, пра́вдою а́ки въ броня́ оболче́нный, вся́ су́етная навѣ́тникъ клеветы́ недѣ́йственны сотвори́вый; радуйся, но́зѣ во благовѣствова́ніе ми́ра обуве́нны имѣ́вый, главу́, тя́ уязвля́вшаго въ пя́ту, дре́вняго змíя попра́вый. Ра́дуйся, вѣ́рою а́ки щито́мъ покрове́нный, вся́ разжже́нныя лука́ваго стрѣ́лы угаси́вый; ра́дуйся, шле́мъ спасе́нія и ме́чь духо́вный, и́же е́сть глаго́лъ Бо́жій, воспрія́вый, и вся́ враги́ три́ - пло́ть, мíра и діа́вола, а́ки воево́да возбра́нный, побѣди́тельно низложи́вый.

Ра́дуйся, Инноке́нтіе, вели́кій въ ско́рбѣхъ помо́щниче.

Конда́къ 7

Хотя́й милосе́рдый Госпо́дь не то́чію па́ствѣ Ирку́тстѣй, но и вся́кому бли́жнему же и да́льнему тя́ дарова́ти въ ско́рбѣхъ утѣ́шителя, въ бѣда́хъ ско́раго помо́щника и отъ болѣ́зней цѣли́теля, ускори́ тя́ разрѣши́ти, не у соверши́вшимся пяти́ лѣ́томъ твоего́ служе́нія, отъ у́зъ сея́ бре́нныя пло́ти, да свобо́денъ бы́въ отъ нея́, по всѣ́мъ градо́мъ и ве́семъ чудесы́ и исцѣле́ньми Бо́га просла́виши и вся́ Ему́ воздви́гнеши пѣ́ти: Аллилу́ія.

Икосъ 7

Къ но́вому и нестарѣ́ющемуся на небесѣ́хъ жи́тельству уготовля́я тво́й восхо́дъ, писа́ніемъ со одра́ болѣ́зни всесмире́нно проси́лъ еси́ вся́ іере́и гра́да Ирку́тска со христіа́ны правосла́вными, да воспою́тъ во хра́мѣхъ Богоро́дицѣ пара́клисисъ; чада́ же твоя́ духо́вная, скорбя́ о твое́мъ отъ ни́хъ разлуче́ніи, прите́кше ко одру́ твоему́, тебѣ́ си́це со слеза́ми и во упова́ніи воззва́ша:

Ра́дуйся, ратобо́рче Христо́въ неутоми́мый, по́двигомъ до́брымъ проти́ву враго́въ Це́ркве Христо́вы подвиза́выйся; ра́дуйся, быстротеку́щій о́рле, тече́ніе твое́ къ превы́спреннимъ селе́ніямъ, быстрото́ю, вся́ упрежда́ющею, сконча́вый. Ра́дуйся, во́ине Царя́ Небе́снаго, вся́ обѣ́ты Христу́ Царю́ и Бо́гу на́шему, отъ креще́нія до положе́нія живота́ твоего́, вѣ́рно соблюды́й; ра́дуйся, я́ко про́чее уже́ вѣне́цъ пра́вды въ рука́хъ а́нгеловъ, при́сныхъ твоего́ по́двига свидѣ́телей, тебѣ́ соблюда́ется. Ра́дуйся, воззыва́емый къ го́рнему Іерусали́му во оби́тели Отца́ Небе́снаго, ко упокое́нію, не оставля́й посѣща́ти на́шъ гра́дъ и оби́тель сію́ и по вселе́ніи твое́мъ въ го́рнія оби́тели; ра́дуйся, те́плый о на́съ при́сно у престо́ла Бо́жія моли́твенниче, не оскудѣ́вай о на́съ и та́мо, у сама́го престо́ла Царя́ Небе́снаго хода́тайствовати.

Ра́дуйся, Инноке́нтіе, вели́кій въ ско́рбѣхъ помо́щниче.

Конда́къ 8

Стра́нное всѣ́мъ чу́до показа́ся, [егда́] древя́нная це́рковь, въ не́йже ты́, свя́тче Бо́жій, приноси́лъ еси́ о лю́дѣхъ твои́хъ безкро́вную же́ртву, и подъ ея́же олтаре́мъ почива́лъ еси́ отъ трудо́въ сего́ вре́меннаго житія́, среди́ бо всея́ оби́тели запале́нія, я́ко дре́вняя купина́, огне́мъ опаля́ема, не сгара́ше. Чту́щіи же па́мять твою́, я́вѣ уразумѣ́вше, я́ко твои́хъ ра́ди, храни́мыхъ подъ спу́домъ ея́ святы́хъ моще́й, соверша́ется сіе́ чу́до, со стра́хомъ и ра́достію, храня́щему ю́ Бо́гу, мно́жицею взыва́ху: Аллилу́ія.

Икосъ 8

Вси́ лю́діе, прите́кшіи во оби́тель твою́ и це́рковь, въ не́йже почива́ху мо́щи твоя́, огне́мъ опаля́ему ви́дяще, приступи́вше ко архипа́стырю, ту́ бы́вшему, те́плѣ его́ моля́ху, да изнесу́тъ изъ нея́ ра́ку святы́хъ моще́й твои́хъ; о́нъ же, ду́хомъ вѣ́ры испо́лнь, не то́чію моще́й огню́ не прикоснове́ніемъ, но ра́ди моще́й и всея́ це́ркви сохране́ніемъ всѣ́хъ ободря́ше. Лю́діе же, сбытіе́ слове́съ архипа́стыря а́біе узрѣ́вше, благода́рными ти́ гла́сы, чудотво́рче, воззва́ша:

Ра́дуйся, свѣти́льниче Це́ркве неугаси́мый, изъ-подъ спу́да, чудесы́, па́че блиста́нія о́гненнаго, возсія́вый; ра́дуйся, несгара́ніемъ, огне́мъ опаля́емаго храни́лища моще́й твои́хъ, о нетлѣ́ніи ихъ пресла́вно провозвѣсти́вый. Ра́дуйся, таковы́мъ среди́ на́съ зна́меніемъ о твое́мъ, и по отше́ствіи въ премíрныя селе́нія, съ на́ми сопребыва́ніи, удостовѣ́ривый; ра́дуйся, еди́ныя то́кмо це́ркви, въ не́йже почива́ху мо́щи твоя́, отъ запале́нія о́гненнаго сохране́ніемъ, еди́наго тя на́мъ, па́че всѣ́хъ, отъ бѣ́дъ засту́пника, откры́вый. Ра́дуйся, и гра́да на́шего, среди́ быва́емыхъ въ не́мъ запале́ній о́гненныхъ, мно́гажды удоборазумѣва́емый храни́телю; ра́дуйся, наипа́че о избавле́ніи на́съ отъ огня́ гее́нскаго при́сный на́шъ предъ Го́сподемъ хода́таю.

Ра́дуйся, Инноке́нтіе, вели́кій въ ско́рбѣхъ помо́щниче.

Конда́къ 9

Вся́ ли́кы а́нгеловъ да́ша сла́ву, че́сть и благодаре́ніе Сѣдя́щему на Престо́лѣ, Живу́щему во вѣ́ки вѣко́въ Бо́гу и Агнцу, егда́, убѣле́нная свѣ́тлостію непоро́чности, душа́ твоя́, соиме́нный неви́нности, святи́телю Христо́въ Инноке́нтіе, вознесе́на бы́сть а́нгелами на не́бо, въ сожи́тельство а́нгеловъ. Мы́ же, прославле́нія на землѣ́ святы́хъ моще́й твои́хъ о твое́й на небесѣ́хъ сла́вѣ уразумѣ́вше, съ весе́ліемъ просла́вльшему тя́ Бо́гу при́сно взыва́емъ пѣ́снь: Аллилу́ія.

Икосъ 9

Вѣтíямъ любому́дрымъ на се́рдце не взы́де, я́же ти́, Христо́въ уго́дниче, преблагíй и преще́дрый Госпо́дь угото́ва во оби́телѣхъ небе́сныхъ. Мы́ же, пра́зднующе твое́ на небеси́ преди́вное прославле́ніе, си́це тя́ на земли́ ублажа́юще, зове́мъ:

Ра́дуйся, мно́гую на небесѣ́хъ, ра́ди многообра́знаго твоего́ на землѣ́ служе́нія, мзду́ воспріе́мый; ра́дуйся, неви́нности соиме́нный дѣ́вственниче, безъ поро́ка предъ престо́ломъ Бо́жіимъ предста́вый, и сего́ ра́ди въ пе́рвенцы Бо́гу и Агнцу впи́санный. Ра́дуйся, страда́льче, отъ ско́рби ве́лія возше́дый на не́бо, и та́мо въ ри́захъ бѣ́лыхъ, со увѣнча́нными ста́рцы, предъ престо́ломъ спасе́ніе и сла́ву пою́щій; ра́дуйся, апо́столе язы́ковъ, престо́ломъ апо́cтольскимъ, со двѣмана́десятію и седми́десятію апо́столами на небеси́ почте́нный. Ра́дуйся, па́стырю научи́вый и сотвори́вый, и сего́ ра́ди ве́ліимъ во Ца́рствіи небе́снѣмъ отъ Самаго́ Пастыренача́льника Христа́ нарече́нный; ра́дуйся, воево́до возбра́нный, враго́мъ спасе́нія побѣди́тельный, сосѣде́нія Побѣди́телю а́да и сме́рти на престо́лѣ Его́ удосто́енный.

Ра́дуйся, Инноке́нтіе, вели́кій въ ско́рбѣхъ помо́щниче.

Конда́къ 10

Спасе́нія посредѣ́ земли́ содѣ́лавый, Человѣколю́бецъ Госпо́дь посѣти́ и сію́ страну́ дале́кую, изгна́нныхъ су́щу населе́ніе, Свое́ю ми́лостію и щедро́тами: въ ра́кѣ бо моще́й твои́хъ, вели́кій уго́дниче Христо́въ, откры́лъ е́сть на́мъ исто́чникъ неоску́дный утѣше́нія; е́же, я́ко зна́меніе извѣ́стное твоего́ те́плаго о на́съ на небеси́ хода́тайства пріи́мши, вся́ страна́ Сиби́рская, еди́нѣми уста́ми и се́рдцемъ пое́тъ Бо́гу: Аллилу́ія.

Икосъ 10

Стѣна́ еси́ необори́мая, засту́пниче на́шъ, гра́ду сему́ и странѣ́ се́й отъ нахожде́ній вся́кихъ зо́лъ и скорбе́й: явле́ніемъ бо непреста́нныхъ чуде́съ твои́хъ увѣ́рихомся, я́ко ве́ліе стяжа́лъ еси́ дерзнове́ніе у Го́спода. Сего́ ра́ди, вѣ́рою утвержда́еми о твое́мъ о на́съ заступле́ніи, си́це зове́мъ ти́:

Ра́дуйся, а́нгеле страны́ Сиби́рскія, вы́ну ви́дяй на небеси́ лице́ Отца́ небе́снаго, и на́шъ богодарова́нный храни́телю и засту́пниче, хода́таю и помо́щниче; ра́дуйся, я́ко а́нгелъ, во вся́ ве́си и гра́ды отъ Бо́га посыла́емый въ служе́ніе за хотя́щихъ наслѣ́довати спасе́ніе, и всѣ́мъ стра́ждущимъ и во озлобле́ніи су́щимъ неоску́дное сы́й утѣше́ніе. Ра́дуйся, благода́тію бога́тый, о́тче на́шъ, драгоцѣ́нное на́мъ, ча́дамъ твои́мъ, въ ра́кѣ моще́й твои́хъ наслѣ́діе, по сконча́ніи твое́мъ, оста́вивый; ра́дуйся, благопопечи́тельный домувлады́ка, въ до́мѣ твое́мъ, его́же я́вѣ са́мъ во оби́тели Вознесе́нстѣй указа́лъ еси́, всѣ́хъ притека́ющихъ къ тебѣ́ срѣта́яй съ любо́вію. Ра́дуйся, и на вся́комъ мѣ́стѣ, на мо́ри и на су́ши, въ гора́хъ же и де́бряхъ, тя́ съ вѣ́рою призыва́ющимъ, я́ко ско́рый помо́щникъ явля́яйся; ра́дуйся, и не и́щущимъ тя́, и невѣ́дущимъ, въ со́ніяхъ и видѣ́ніяхъ, я́ко до́брый наста́вникъ, вра́чь же и покрови́тель мно́гажды познава́емый.

Ра́дуйся, Инноке́нтіе, вели́кій въ ско́рбѣхъ помо́щниче.

Конда́къ 11

Пѣ́ніе вся́кое не довлѣ́етъ отъ на́съ къ прославле́нію чуде́съ твои́хъ, чудотво́рче преди́вный, и́миже не то́чію вѣ́рныя, но и невѣ́рныя пресла́вно удивля́еши; вѣ́руемъ же и надѣ́емся, я́ко твои́ми моли́твами и во мра́цѣ идолослуже́нія су́щіи изъ тьмы́ и сѣ́ни сме́ртныя изы́дутъ и съ на́ми ку́пно просла́вльшему тя́ Бо́гу воззову́тъ: Аллилу́ія.

Икосъ 11

Свѣти́льникъ не поставля́ется подъ спу́домъ, но на свѣ́щникъ возлага́ютъ, да входя́щіи ви́дятъ свѣ́тъ его́: сего́ ра́ди и твоя́ святы́я мо́щи, а́ще и чрезъ се́дьмдесятъ и три́ лѣ́та скрыва́емывя, руко́ю крѣ́пкою чуде́съ изведе́ изъ-подъ спу́да Госпо́дь, я́ко да входя́щіи во оби́тель твою́, отъ сего́ чу́днаго свѣ́та, не то́кмо вѣ́рою просвѣща́ются, но и моли́твами твои́ми согрѣва́ются, и исцѣле́ньми отъ тебе́ оживля́ются; и та́ко си́ми моли́твенно тебѣ́ воззову́тъ:

Ра́дуйся, наста́вниче прему́дрый, мы́сли бла́ги и хотѣ́нія свя́та на се́рдце полага́яй; ра́дуйся, вождю́ благонаде́жный, отъ стропотнаго пути грѣха на пу́ть спасе́нія направля́яй. Ра́дуйся, дерзнове́нный у Го́спода предста́телю о спасе́ніи ду́шъ на́шихъ хода́тайствуяй; ра́дуйся, ско́рый о Бо́зѣ помо́щниче, отъ нахожде́нія зо́лъ и скорбе́й сохраня́яй. Ра́дуйся, врачу́ сострада́тельный, отъ болѣ́зней душе́вныхъ же и тѣле́сныхъ всецѣ́ло свобожда́яй; ра́дуйся, оста́вленныхъ врача́ми и къ твое́й по́мощи съ вѣ́рою притека́ющихъ отъ одра́ сме́рти ско́ро воздвига́яй.

Ра́дуйся, Инноке́нтіе, вели́кій въ ско́рбѣхъ помо́щниче.

Конда́къ 12

Благода́тію Бо́жіею испо́лненъ тя́ сосу́дъ позна́вше не то́чію бли́зъ су́щіи, но и во страна́хъ да́льнихъ обита́ющіи, съ вѣ́рою притека́ютъ къ цѣльбоно́снѣй ра́цѣ моще́й твои́хъ; ты́ же, святи́телю Христо́въ, вне́мля и́хъ моле́ніямъ, не оскудѣва́й напу́тствовати всѣ́хъ дара́ми исцѣле́ній и чуде́съ твои́хъ, да отъ восто́къ со́лнца до за́падъ вси́ воспою́тъ чудодѣ́йствующему тобо́ю Бо́гу: Аллилу́ія.

Икосъ 12

Пою́ще чудеса́ твоя́, и́миже по преставле́ніи, па́че же по обрѣ́теніи святы́хъ моще́й твои́хъ, Бо́га просла́вилъ еси́, благода́рно тебѣ́ си́це зове́мъ:

Ра́дуйся, жи́лами разсла́бленныя и неду́гами одержи́мыя со одра́ болѣ́зни возста́вивый; ра́дуйся, сокруше́ніемъ но́гъ и ру́къ болѣ́зненно стра́ждущія, а́ки николи́же страда́вшія устро́ивый. Ра́дуйся, стру́пами, а́ки прока́зою, покры́тыя и ра́нами неисцѣ́льными уязвле́нныя, цѣ́лы и здра́вы содѣ́лавый; ра́дуйся, зрѣ́ніе слѣпы́мъ возврати́вый и изумле́нныя на здра́вый смы́слъ наста́вивый. Ра́дуйся, во отча́яніи живота́ отъ до́лгаго страда́нія су́щія и къ сме́рти уже́ уготовля́емыя къ жи́зни па́ки возврати́вый; ра́дуйся, ни еди́нѣй же болѣ́зни ко исцѣле́нію тебѣ́ бы́ти неудо́бнѣй, чуде́съ мно́жествомъ засвидѣ́тельствовавый.

Ра́дуйся, Инноке́нтіе, вели́кій въ ско́рбѣхъ помо́щниче.

Конда́къ 13

О, вели́кій Христо́въ уго́дниче, ми́лостивый на́шъ наста́вниче, благоутро́бія сокро́вище, правовѣ́рія учи́телю, архіере́евъ похвало́, безпо́мощныхъ засту́пниче, о́тче на́шъ іера́рше Инноке́нтіе! Моли́ Христа́ Бо́га, да не разлучи́тъ на́съ отъ тебе́, къ тебѣ́ съ вѣ́рою притека́ющія, на́шъ Пра́ведный Судія́, егда́ со а́нгелы Свои́ми во сла́вѣ пріи́детъ, и, я́ко Па́стырь, разлучи́ти и́мать Своя́ о́вцы отъ ко́злищь на Стра́шномъ Свое́мъ судѣ́, но да съ тобо́ю ку́пно, я́ко отце́мъ на́шимъ, сподо́бимся Ему́ пѣ́ти во вѣ́ки вѣко́въ: Аллилу́ія.

Се́й конда́къ глаго́лется три́жды. Та́же Икосъ 1-й и Конда́къ 1-й

Тропа́рь, гла́съ 3

Свѣти́льниче Це́ркве пресвѣ́тлый, озари́вый луча́ми добро́тъ твои́хъ страну́ сію́, и исцѣле́ньми мно́гими притека́ющихъ къ ра́цѣ твое́й съ вѣ́рою Бо́га просла́вивый, мо́лимъ тя́, святи́телю о́тче Инноке́нтіе, огражда́й моли́твами твои́ми гра́дъ се́й отъ всѣ́хъ бѣ́дъ и печа́ли.

Конда́къ, гла́съ 4

Непоро́чности соиме́ннаго па́стыря, проповѣ́дника вѣ́ры въ язы́цѣхъ монго́льскихъ, сла́ву и украше́ніе Ирку́тскія па́ствы, любо́вію восхва́лимъ вси́ вѣ́рніи: то́й бо е́сть храни́тель страны́ сея́, и моли́твенникъ о душа́хъ на́шихъ.

Велича́ніе

Велича́емъ тя́, святи́телю о́тче Инноке́нтіе, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.