Кон­да́къ 1

Избра́н­ный чу­до­тво́р­че, ве­ли́кій уго́д­ни­че Хри­сто́въ, святи́­те­лю о́тче Ѳе­о­до́­сіе, не­тлѣ́ніемъ мо­ще́й тво­и́хъ и мно́­же­ствомъ чу­де́съ отъ Бо́га про­сла́в­лен­ный, въ пѣ́­снехъ ра́­дост­ныхъ убла­жа́­емъ тя́, за­сту́п­ни­ка на́­ше­го. Ты́ же, я́ко имѣ́яй дер­зно­ве́ніе ко Го́­спо­ду, отъ вся́кихъ на́съ бѣ́дъ сво­бо­жда́й, да зо­ве́мъ ти́:

Ра́дуй­ся, уго́д­ни­че Бо́жій, святи́­те­лю Ѳе­о­до́­сіе, чу­до­тво́р­че пре­сла́в­ный.

Икосъ 1

Ангелъ во пло́­ти яви́лся еси́, бо­го­му́­дре Ѳе­о­до́­сіе, а́н­гель­ски­ми нра́­вы из­мла́­да себе́ укра­ша́я, тѣ́м­же и а́н­гелъ це́р­кве Чер­ни́­говскія до­сто́й­нѣ по­ста́в­ленъ бы́лъ еси́ отъ Бо́га, всѣ́хъ на­став­ля́я ко спа­се́нію и всѣ́мъ явля́я въ себѣ́ пра́­ви­ло вѣ́ры и о́бразъ кро́­то­сти, воз­дер­жа́нія же и люб­ве́. Сего́ ра́ди, ча́да твоя́ су́ще, лю­бо́­вію во­піе́мъ ти́ си́це:

Ра́дуй­ся, а́н­ге­ле зем­ны́й и че­ло­вѣ́­че не­бе́с­ный; ра́дуй­ся, не­бе́с­ныхъ си́лъ со­бе­сѣ́д­ни­че и со­слу­жи́­те­лю. Ра́дуй­ся, въ жи­тіи́ тво­е́мъ без­пло́т­нымъ по­ре­вно­ва́­вый; ра́дуй­ся, и по сме́р­ти съ ни́ми во­дво­ри́­вый­ся. Ра́дуй­ся, отъ ю́но­сти Хри­ста́ всѣ́мъ се́рд­цемъ тво­и́мъ воз­лю­би́­вый; ра́дуй­ся, отъ у́тра жи́­зни твоея́ Тому́ еди́­ному по­ра­бо́­та­вый. Ра́дуй­ся, вся́ за́­по­вѣ­ди Го­спо́д­ни вѣ́р­но и не­по­ро́ч­но со­хра­ни́­вый; ра́дуй­ся, мно́гъ пло́дъ ду­хо́в­ный о Хри­стѣ́ со­тво­ри́­вый. Ра́дуй­ся, усе́рд­ною мо­ли́­твою ду́хъ тво́й окри­ли́­вый; ра́дуй­ся, чту́­щихъ лю­бо́­вію па́мять твою́ отъ бѣ́дъ по­кры­ва́­ю­щій.

Ра́дуй­ся, уго́д­ни­че Бо́жій, святи́­те­лю Ѳе­о­до́­сіе, чу­до­тво́р­че пре­сла́в­ный.

Кон­да́къ 2

Ви́дѣвъ суету́ мíра сего́ ско­ро­ги́б­нущую, всѣ́мъ се́рд­цемъ воз­же­ла́лъ еси́, о́тче Ѳе­о­до́­сіе, мíръ се́й оста́­ви­ти и во и́но­че­ствѣ Бо́гу по­слу­жи́­ти. Тѣ́м­же и́го Хри­сто́­во бла­го́е и ле́г­кое усе́рд­нѣ вос­прія́въ, и́нокъ святы́я оби́­те­ли Кíево-Пе­че́р­скія сми­ре́нъ и по­слуш­ли́въ бы́лъ еси́, вос­пѣ­ва́я всѣ́хъ Тво­р­цу́ а́н­гель­скую пѣ́снь: Алли­лу́ія.

Икосъ 2

Ра́зумъ бо­го­про­свѣ­ще́н­ный тво́й ви́­дѣвъ, святи́­тель Кíев­скій Діо­ни́­сій по­ста́­ви тя́, Ѳе­о­до́­сіе, ар­хи­діа́­ко­на со­бо́р­ныя це́р­кве Софíи Пре­му́­дро­сти Бо́жіей, да слу­жи́­ши ал­та­рю́ Го­спо́д­ню при со­вер­ше́ніи та́­инъ Бо́жіихъ. Мы́ же, въ тебѣ́ из­бра́н­ный со­су́дъ Ду́ха Свята́го вѣ́ду­ще, со уми­ле́ніемъ зо­ве́мъ ти́ си­це­ва́я:

Ра́дуй­ся, подъ кро́­вомъ чу­до­тво́рцевъ Пе­че́р­скихъ на­ча́­ло по́­дви­говъ тво­и́хъ по­ло­жи́­вый; ра́дуй­ся, отъ ю́но­сти до­бро­дѣ́­тель­ми мо­на́­ше­ска­го житія́ пре­и­з­ря́дно себе́ укра­си́­вый. Ра́дуй­ся, и́но­ковъ пре­свѣ́т­лая кра­со­то́; ра́дуй­ся, по́ст­ни­ковъ пре­сла́в­ная по­хва­ло́. Ра́дуй­ся, святи́­те­лей бла­го­го­вѣ́й­ныхъ лю­би́­мый со­бе­сѣ́д­ни­че; ра́дуй­ся, по­слу­ша́­нія не­ли­це­мѣ́р­ный ра­чи́­те­лю. Ра́дуй­ся, по­дви́ж­ни­че сми­ре́н­ный, на Го́­спо­да все́ упо­ва́ніе воз­ло­жи́­вый; ра́дуй­ся, уе­ди­не́н­на­го житія́ до́­брый ре­вни́­те­лю. Ра́дуй­ся, из­бра́н­ни­че Хри­сто́въ пре­бла­же́н­ный; ра́дуй­ся, Бо́­гомъ да́н­ный на́мъ за­сту́п­ни­че не­пре­о­бо­ри́­мый.

Ра́дуй­ся, уго́д­ни­че Бо́жій, святи́­те­лю Ѳе­о­до́­сіе, чу­до­тво́р­че пре­сла́в­ный.

Кон­да́къ 3

Си́ла Бо́жія осѣ­ни́ тя́, о́тче Ѳе­о­до́­сіе, егда́ во іере́я посвяще́нъ бы́лъ еси́ отъ святи́­теля Діо­ни́­сія и во игу́­ме­на оби́­те­ли Кор­су́н­скія отъ него́ по­ста́в­ленъ, да па­се́­ши Хри­сто́­во ста́­до и ру­ко­во­ди́­ши и́но­ки ко спа­се́нію, вос­пѣ­ва́я ку́п­но съ ни́ми хва­ле́б­ную пѣ́снь въ Тро́­и­цѣ сла́­ви­мо­му Бо́гу: Алли­лу́ія.

Икосъ 3

Имѣ́я сми­ре́ніе не­ли­це­мѣ́р­ное, пра́хъ и пе́­пелъ себе́ име­но­ва́лъ еси́, пре­бла­же́н­не Ѳе­о­до́­сіе, и за­пре­ще́­ніе отъ ар­хіе­ре́я, не­по­ви́­ненъ сы́й, безро́­пот­но по­не́слъ еси́. Тѣ́м­же и мы́, убла­жа́­ю­ще та­ко­во́е, во­и́­стину хри­сто­по­дра­жа́­тель­ное, незло́­біе твое́, вос­пѣ­ва́­емъ тебѣ́ си́це:

Ра́дуй­ся, а́гн­че незло́­би­вый, ни­кому́­же зла́ за зло́ воз­да́­вый; ра́дуй­ся, я́ко за­пре­ще́­ніе ар­хіе­ре́й­ское нося́, по­слу­ша́­ніе ве­ли́­кое яви́лъ еси́. Ра́дуй­ся, я́ко то­гда́ и епи­тра­хи́­ли кос­ну́­ти­ся не дер­за́лъ еси́; ра́дуй­ся, сми­ре́ніемъ и пре­да́ніемъ себе́ въ во́лю Бо́жію вра­га́ по­бѣ­ди́­вый. Ра́дуй­ся, и́но­че бо­го­лю­бе́з­ный, пре­по­до́­біемъ и кро́­то­стію бла­гоу­кра­ше́н­ный; ра́дуй­ся, по́ст­ни­че­скимъ жи­тіе́мъ, я́ко без­кро́в­нымъ му́­че­ни­че­ствомъ увѣн­ча́н­ный. Ра́дуй­ся, мо­на́­ше­ствую­щимъ оте́цъ и на­ста́в­никъ бо­го­му́­дрый; ра́дуй­ся, оби́­те­лей и́но­че­скихъ мно­го­о́пыт­ный ру­ко­во­ди́­те­лю. Ра́дуй­ся, пре­сто́­ла Бо́жія вѣ́р­ный и бла­го­го­вѣ́й­ный слу­жи́­те­лю; ра́дуй­ся, предъ Бо́­гомъ те́­плый о на́съ хо­да́­таю.

Ра́дуй­ся, уго́д­ни­че Бо́жій, святи́­те­лю Ѳе­о­до́­сіе, чу­до­тво́р­че пре­сла́в­ный.

Кон­да́къ 4

Бу́рю го­не́ній на Це́р­ковь Бо́жію во гра́­дѣ Кíевѣ воз­дви́­же му­дро­ва́ніе ла­ти́н­ское. Ты́ же, бо­го­му́­дре Ѳе­о­до́­сіе, во игу́­ме­на оби́­те­ли Вы́ду­бецкія то­гда́ по­ста́в­ленъ бы́въ, сію́ отъ лжеу­че́нія огра­ди́лъ еси́, утвер­жда́я бра́тію свою́ въ пра­во­сла́в­нѣй вѣ́рѣ не­по­ро́ч­но вос­пѣ­ва́­ти Бо́гу: Алли­лу́ія.

Икосъ 4

Слы́­шавъ бо­гоу­го́д­ное жи­тіе́ твое́, о́тче Ѳе­о­до́­сіе, святи́­тель Бо́жій Ла́­зарь, при­зва́ тя́ отъ Кíева въ Чер­ни́­говъ и, по­ста́­вивъ во ар­химан­дри́­та пре­чест­ны́я оби́­те­ли Еле́цкія, со­тво­ри́ по­мо́щ­ни­ка себѣ́ во управ­ле́ніи цер­ко́в­нѣмъ. Ты́ же съ лю­бо́­вію сы­но́в­нею по­слу­жи́лъ еси́ ему́ и во­и́­стину до­сто́­инъ яви́лся еси́, да вос­пѣ­ва́­емъ ти́ си­це­ва́я:

Ра́дуй­ся, ста́р­цу святи́­те­лю съ лю­бо́­вію по­слу­жи́­вый; ра́дуй­ся, я́ко сы́нъ отцу́ во все́мъ ему́ по­слу́­шенъ бы́­вый. Ра́дуй­ся, ста́­рость его́ упо­ко́­и­вый; ра́дуй­ся, тру­ды́ святи́­тель­скія ему́ облег­чи́­вый. Ра́дуй­ся, бла­го­лѣ́пія цер­ко́в­на­го усе́рд­ный ра­чи́­те­лю; ра́дуй­ся, пре­да́ній апо́­столь­скихъ вѣ́р­ный хра­ни́­те­лю. Ра́дуй­ся, пра́­вды ре́­вност­ный блю­сти́­те­лю; ра́дуй­ся, до́л­га па́­стыр­ска­го не­по­ко­ле­би́­мый ис­пол­ни́­те­лю. Ра́дуй­ся, алтаря́ Го­спо́д­ня слу­жи́­те­лю не­по­ро́ч­ный; ра́дуй­ся, па́­сты­ремъ свѣ́т­лый о́бра­зе.

Ра́дуй­ся, уго́д­ни­че Бо́жій, святи́­те­лю Ѳе­о­до́­сіе, чу­до­тво́р­че пре­сла́в­ный.

Кон­да́къ 5

Бого­те́ч­ную звѣз­ду́, къ го́р­не­му Іеру­са­ли́му путе­во­дя́щую и до­бро­дѣ́­тель­ми свѣ́т­ло сія́ющую, зря́ще тя́, пре­ди́в­ный Ѳе­о­до́­сіе, и́но­цы же и мірстíи съ лю­бо́­вію по­слѣ́­до­ваху тебѣ́, вни­ма́­ю­ще тво­е­му́ уче́нію ду­ше­по­ле́з­но­му и взи­ра́­ю­ще на о́бразъ чи́­ста­го житія́ тво­е­го́, поу­ча́хуся взы­ва́­ти съ то­бо́ю Бо́гу, ди́в­но­му во святы́хъ Сво­и́хъ: Алли­лу́ія.

Икосъ 5

Ви́дѣвъ себе́ святи́­тель Ла́­зарь ста́­ро­стію пре­тру­жде́­на и въ си́­лахъ тѣ­ле́с­ныхъ из­не­мо́г­ша, воз­же­ла́ имѣ́­ти тя́, Ѳе­о­до́­сіе, пре­е́м­ни­ка по себѣ́ во святи́­тель­ствѣ, и про­си́ святѣ́й­ша­го па­тріа́р­ха Мо­ско́в­ска­го посвяти́ти тя́ во ар­хіе­пи́­ско­па. Мы́ же въ се́мъ Бо́жіе зва́ніе, е́же на тебѣ́, уразу­мѣ­ва́­ю­ще, лю­бо́­вію про­слав­ля́емъ тя́ си́це:

Ра́дуй­ся, ар­хіе­ре́ю Бо́жій, отъ Пред­вѣ́ч­на­го Ар­хіе­ре́я ди́в­но предъ­из­бра́н­ный; ра́дуй­ся, апо́­сто­ловъ до­сто́й­ный пре­е́м­ни­че и усе́рд­ный ре­вни́­те­лю. Ра́дуй­ся, святи́­те­лю Хри­сто́въ, отъ со­бо́­ра святи́­те­лей Россíйскихъ освяще́н­ный; ра́дуй­ся, іе­ра́р­ше благíй и ни­ще­лю­би́­вый. Ра́дуй­ся, ар­хи­па́­сты­рю, ми́­ло­сти­вый и со­стра­да́­тель­ный; ра́дуй­ся, святи́­те­лемъ Ми­тро­фа́­ну и Ди­ми́­трію со­бе­сѣ́д­ни­че и со­пре­сто́ль­ни­че. Ра́дуй­ся, ар­хіе­ре́­евъ пра­во­сла́в­ныхъ кра­со­то́; ра́дуй­ся, па́­сты­рю до́­брый, ду́шу твою́ за о́вцы по­ло­жи́­ти го­то́­вый. Ра́дуй­ся, учи́­те­лю зла­то­сло­ве́с­ный; ра́дуй­ся, бо­го­свѣ́т­лый свѣ­ти́ль­ни­че Це́р­кве Хри­сто́­вы, во тмѣ́ вѣ́ка сего́ возсія́вшій.

Ра́дуй­ся, уго́д­ни­че Бо́жій, святи́­те­лю Ѳе­о­до́­сіе, чу­до­тво́р­че пре­сла́в­ный.

Кон­да́къ 6

Про­по­вѣ́д­никъ не сло́­вомъ то́­чію, но и дѣ́­ломъ яви́лся еси́ Хри­сто́­ва уче́нія, святи́­те­лю Ѳе­о­до́­сіе, я́ко па́­стырь до́­брый, по о́бразу Па­сты­ре­на­ча́ль­ни­ка Хри­ста́ всѣ́хъ съ лю­бо́­вію на­став­ля́я ко спа­се́нію, всѣ́мъ о́бразъ житія́ по за́­по­вѣ­демъ Хри­сто́­вымъ по­да­ва́я и всѣ́хъ поу­ча́я взы­ва́­ти при́­сно Бо́гу: Алли­лу́ія.

Икосъ 6

Возсія́лъ еси́, я́ко у́тро свѣ­то­за́р­ное, стра­нѣ́ Чер­ни́­говстѣй, святи́­те­лю Бо́жій Ѳе­о­до́­сіе, и па́­ству, тебѣ́ ввѣ́­рен­ную, свѣ́­томъ до­бро­дѣ́­те­лей тво­и́хъ оза­ри́лъ еси́, сми­ре́ніемъ вы­со́­кая стяжава́я и ни­ще­ту́ и́но­че­скую со­блю­да́я: вся́ бо, я́же имѣ́лъ еси́, не­и­му́­щимъ усе́рд­нѣ раз­да­ва́лъ еси́. О се́мъ дивя́щеся, я́ко ни­ще­лю́б­ца со­вер­ше́н­на­го убла­жа́­емъ тя́, зо­ву́­ще:

Ра́дуй­ся, ми­ло­се́р­дія исто́ч­ни­че не­ис­чер­па́­е­мый; ра́дуй­ся, си́­рымъ при­бѣ́­жи­ще бла­го­на­де́ж­ное. Ра́дуй­ся, вдо­ви́­цамъ ми́­ло­сти­вый по­кро­ви́­те­лю; ра́дуй­ся, а́лчу­щихъ не­о­ску́д­ный пи­та́­те­лю. Ра́дуй­ся, оби́­ди­мымъ ско́­рый за­сту́п­ни­че; ра́дуй­ся, скорбя́щимъ бла­го­на­де́ж­ный утѣ́­ши­те­лю. Ра́дуй­ся, су́­щимъ въ бѣ­да́хъ го­то́­вый по­мо́щ­ни­че; ра́дуй­ся, мла­де́н­цемъ до́­брый во­спи­та́­те­лю. Ра́дуй­ся, ю́но­шамъ и дѣ́­вамъ въ цѣ­ло­му́­дріи на­ста́в­ни­че; ра́дуй­ся, ста́рцемъ и не­мощ­ны́мъ тве́р­дое укрѣп­ле́ніе.

Ра́дуй­ся, уго́д­ни­че Бо́жій, святи́­те­лю Ѳе­о­до́­сіе, чу­до­тво́р­че пре­сла́в­ный.

Кон­да́къ 7

Хотя́ всѣ́мъ се́рд­цемъ тво­и́мъ еди́­ному Го́­спо­ду бла­гоу­го­жда́­ти, по́­дви­гомъ до́­брымъ до кон­ца́ по­дви­за́л­ся еси́, Ѳе­о­до́­сіе, тру­ды́ къ тру­до́мъ во сми­ре́ніи при­ла­га́я, по­сто́мъ и бдѣ́ніемъ съ мо­ли́­твою пло́ть твою́ умерщ­вля́я и лю­бо́­вію всѣ́хъ со­грѣ­ва́я. Тѣ́м­же и спо­до́­бил­ся еси́ еще́ на зе­мли́ до­сто́й­но и пра́­вед­но вос­пѣ­ва́­ти а́н­гель­скую пѣ́снь Бо́гу: Алли­лу́ія.

Икосъ 7

Но́ва­го тя́ мо­ли́­твен­ни­ка и чу­до­тво́р­ца пре­ди́в­на­го яви́ Го­спо́дь въ стра­нѣ́ Россíйстѣй, святи́­те­лю о́тче Ѳе­о­до́­сіе. Тѣ́м­же и свѣ́т­ло красу́­ет­ся то­бо́ю Це́р­ковь Пра­во­сла́в­ная, я́ко дер­зно­ве́ніе ве́ліе ко Хри­сту́ и́ма­ши, Ему́­же мо­ли́ся, святи́­те­лю, о на́съ грѣ́ш­ныхъ, лю­бо́­вію тебѣ́ во­пі­ю́­щихъ си­це­ва́я:

Ра́дуй­ся, пре­свѣ́т­лый свѣ­ти́ль­ни­че вѣ́ры пра­во­сла́в­ныя; ра́дуй­ся, пра­во­сла́­вія стра́­же не­у­сы­па́­ю­щій. Ра́дуй­ся, бла­го­че́­стія ре́­вност­ный по­бо́р­ни­че; ра́дуй­ся, Це́р­кве Бо́жія сто́л­пе не­по­ко­ле­би́­мый. Ра́дуй­ся, хра́­ми­но до­бро­дѣ́­те­лей преу­кра­ше́н­ная; ра́дуй­ся, без­стра́­стія и чи­сто­ты́ ре­вни́­те­лю пре­и­з­ря́дный. Ра́дуй­ся, мо­ли́­твы со­кро́­ви­ще не­и­сто­щи́­мое; ра́дуй­ся, та́­инъ Бо́жіихъ вѣ́р­ный стро­и́­те­лю. Ра́дуй­ся, па́­ству твою́ въ вѣ́рѣ и бла­го­че́­стіи со­блю­да́яй; ра́дуй­ся, со святы́ми сли­ко­ва́нія въ не­бе́с­номъ Ца́рствіи спо­до́­би­вый­ся.

Ра́дуй­ся, уго́д­ни­че Бо́жій, святи́­те­лю Ѳе­о­до́­сіе, чу­до­тво́р­че пре­сла́в­ный.

Кон­да́къ 8

Стра́н­ствіе зем­но́е бо­гоу­го́д­нѣ со­вер­ши́въ, святи́­те­лю о́тче Ѳе­о­до́­сіе, свя́то и пра́­вед­но по­чи́лъ еси́ о Го́­спо­дѣ сно́мъ сме́р­ти, я́же бы́сть тебѣ́ про­хо­жде́ніе отъ тру­до́въ на по­ко́й вѣ́ч­ный: прія́лъ бо еси́ отъ Хри­ста́ Бо́га вѣ­не́цъ сла́­вы не­тлѣ́н­ный и во­дво­ри́л­ся еси́ со святы́ми вос­пѣ­ва́­ти Ему́ вѣ́ч­но хва­ле́б­ную пѣ́снь: Алли­лу́ія.

Икосъ 8

Ве́сь еси́ лю­бо́вь не­о­ску­дѣ­ва́­ю­щая, святи́­те­лю Бо́жій Ѳе­о­до́­сіе: я́коже бо въ жи­тіи́ се́мъ, та́ко и по пре­став­ле́ніи къ Бо́гу ча́дъ тво­и́хъ не остав­ля́еши, на всѣ́хъ, къ тебѣ́ вѣ́­рою при­те­ка́­ю­щихъ, ми́­ло­стив­нѣ при­зи­ра́­е­ши, боля́щимъ ис­цѣ­ле́ніе по­да­ва́я, скорбя́щихъ утѣ­ша́я, отъ бѣ́дъ из­ба­вля́я. Сего́ ра́ди, бла­го­да́р­ни су́ще, вос­пѣ­ва́­емъ ти́ си́це:

Ра́дуй­ся, ни­ще­ту́ ду­хо́в­ную отъ ю́но­сти воз­лю­би́­вый; ра́дуй­ся, Хри­сту́ въ ме́нь­шихъ бра́тіяхъ его́ вѣ́р­но по­слу­жи́­вый. Ра́дуй­ся, две́­ри ми­ло­се́р­дія Бо́жія на́мъ отвер­за́­ю­щій; ра́дуй­ся, гнѣ́въ Бо́жій, пра́­вед­но на ны́ дви́­жи­мый, на ми́­лость пре­ла­га́­ю­щій. Ра́дуй­ся, по от­ше́­ствіи тво­е́мъ къ Бо́гу съ на́ми пре­бы­ва́­ю­щій; ра́дуй­ся, умерщ­вле́н­ныя грѣ­ха́­ми ду́ши бла­го­да́тію Хри­сто́­вою оживля́ющій. Ра́дуй­ся, исто́ч­ни­че со­стра­да́нія, къ лю́­демъ при­сно­те­ку́щій; ра́дуй­ся, омра­че́н­ныхъ за­блу­жде́ніями бла́­гост­ный про­свѣ­ти́­те­лю. Ра́дуй­ся, съ не­бе́с­ныхъ вы­со́тъ на ско́р­би на́ши при­зи­ра́­ю­щій; ра́дуй­ся, всѣ́хъ на́съ лю­бо́­вію тво­е́ю объе́млю­щій.

Ра́дуй­ся, уго́д­ни­че Бо́жій, святи́­те­лю Ѳе­о­до́­сіе, чу­до­тво́р­че пре­сла́в­ный.

Кон­да́къ 9

Вси́ лю́діе Чер­ни́­говстіи про­сла́­ви­ша Бо́га, егда́ услы́­ша­ша о пре­сла́в­номъ явле́ніи тво­е́мъ, святи́­те­лю Ѳе­о­до́­сіе, пре­е́м­нику тво­е­му́ ар­хіе­пи́­ско­пу Іо­а́н­ну, его́­же отъ не­ду́­га тя́жка ис­цѣ­ли́лъ еси́, явля́я дер­зно­ве́ніе твое́ ко Го́­спо­ду. Сего́ ра́ди и по­тща́­ся гро́бъ тво́й бла­гоу­кра­си́­ти и по­до́­біе лица́ тво­е­го́ надъ ни́мъ по­ста́­ви­ти, зо­вы́й ди́в­но­му во святы́хъ Сво­и́хъ Бо́гу: Алли­лу́ія.

Икосъ 9

Вѣтíи мно­го­вѣ­ща́ніи не воз­мо́гутъ вос­хва­ли́­ти тя́ по достоя́нію вѣ́ч­ныя сла́­вы до­сто́й­на­го, святи́­те­лю о́тче Ѳе­о­до́­сіе. И кто́ мо́­жетъ по­вѣ́­да­ти мно́­гая и пре­сла́в­ная чу­де­са́ твоя́, я́же исто­чи́лъ еси́ отъ не­тлѣ́н­ныхъ мо­ще́й и ико́нъ тво­и́хъ святы́хъ? О се́мъ у́бо ра́ду­ю­ще­ся, и Бо́га, святы́хъ Сво­и́хъ про­слав­ля́­ю­ща­го, сла́вяще, во­піе́мъ ти́ си́це:

Ра́дуй­ся, въ пре­свѣ́т­лыхъ ра́й­скихъ чер­то́­зѣхъ оби­та́­ю­щій; ра́дуй­ся, не­тлѣ́ніемъ мо­ще́й тво­и́хъ зарю́ о́бща­го во­скре­се́нія на́мъ пред­по­ка­зу́­ю­щій. Ра́дуй­ся, въ ви­дѣ́­ніихъ во бла́­го вѣ́рую­щимъ явля́­ю­щій­ся; ра́дуй­ся, въ со́ніяхъ на мо­ли́тву къ тво­е­му́ хо­да́­тай­ству при­зы­ва́­ю­щій. Ра́дуй­ся, сле́­зы и воз­ды­ха́нія скорбя́щихъ съ лю­бо́­вію утоля́ющій; ра́дуй­ся, про­ше́нія тру­жда́­ю­щих­ся и обре­ме­не́н­ныхъ ско́­ро ис­пол­ня́ющій. Ра́дуй­ся, отъ вне­за́п­ныя сме́р­ти вѣ́р­ныхъ из­ба­вля́ющій; ра́дуй­ся, да́н­ныя Бо́гу обѣ́­ты ис­пол­ня́ти по­бу­жда́­ю­щій. Ра́дуй­ся, слѣ­пы́мъ про­зрѣ́­ніе, глу­хи́мъ слы́­ша­ніе по­да­ю́­щій; ра́дуй­ся, о́тче ча­до­лю­би́­вый, я́коже ко́­кошъ подъ кри­лѣ́, ду­хо́в­ныя ча́да твоя́ у гро́­ба тво­е­го́ со­би­ра́­ю­щій.

Ра́дуй­ся, уго́д­ни­че Бо́жій, святи́­те­лю Ѳе­о­до́­сіе, чу­до­тво́р­че пре­сла́в­ный.

Кон­да́къ 10

Спа­се́ніе вѣ́ч­ное уна­слѣ́­до­валъ еси́, святи́­те­лю Ѳе­о­до́­сіе, и свѣ́т­ло ны́нѣ ли­ку́­е­ши со а́н­ге­лы и всѣ́­ми святы́ми, при́­сно со­зер­ца́я пре­свѣ́т­лое лице́ Хри­ста́ Бо́га на́­ше­го, Его́­же мо­ли́­ти не пре­ста́й за ны́ грѣ́ш­ныя, да тво­и́мъ за­ступле́ніемъ спо­до́­бим­ся ку́п­но съ то­бо́ю вос­пѣ­ва́­ти Ему́: Алли­лу́ія.

Икосъ 10

Стѣна́ огра­жде́нія въ Це́р­кви Пра­во­сла́в­нѣй явля́ешися, святи́­те­лю Бо́жій, мно́­же­ствомъ ди́в­ныхъ чу­де́съ тво­и́хъ вѣ́р­ныя утвер­жда́­ю­щая и явле́ніемъ си́лы Бо́жіей вся́ ере­ти́­че­ская му­дро­ва́нія отра­жа́­ю­щая: на­ста́в­ни­ковъ бо ра­ско́­ла не­тлѣ́ніемъ мо­ще́й тво­и́хъ зѣло́ уди­ви́лъ еси́ и ис­по­вѣ́­да­ти и́стину пра­во­сла́­вія воз­бу­ди́лъ еси́. Тѣ́м­же со стра́­хомъ и бла­го­го­вѣ́ніемъ вку́­пѣ съ вѣ́р­ны­ми взы­ва́­ху ти́ си́це:

Ра́дуй­ся, про­слав­ле́ніемъ мо­ще́й тво­и́хъ всѣ́хъ на́съ ра́­до­сти ис­по́л­ни­вый; ра́дуй­ся, не­тлѣ́ніемъ тѣ­ле­се́ тво­е­го́ не­вѣ́ріе гла­го́­ле­мыхъ ста­ро­о­бря́д­цевъ въ вѣ́ру пре­тво­ри́­вый. Ра́дуй­ся, е́ресь шту́н­ды чу­де­сы́ пре­сла́в­ны­ми по­сра­ми́­вый; ра́дуй­ся, жену́ отъ лю́­то­ро­вы е́ре­се кре́ст­ное зна́­ме­ніе пра­во­сла́в­нѣ по­ла­га́­ти нау­чи́­вый. Ра́дуй­ся, мла­де́н­цу слѣ­по́му у мо­ще́й тво­и́хъ вне­за́­пу про­зрѣ́­ніе да­ро­ва́­вый; ра́дуй­ся, нѣ­мотству́­ю­щій язы́къ по­ма́­за­ніемъ еле́я отъ лампа́­ды твоея́ раз­рѣ­ши́­вый. Ра́дуй­ся, тѣ́мъ же еле́­емъ стру́­пы не­ис­цѣ́ль­ныя исцѣля́яй; ра́дуй­ся, близъ сме́р­ти су́­щихъ боля́щихъ къ жи́­зни воз­вра­ща́яй. Ра́дуй­ся, я́ко ли­ше́н­ніи ра́зу­ма у мо­ще́й тво­и́хъ бла­го­да́тію Хри­сто́­вою исцѣля́ются; ра́дуй­ся, я́ко и пе­ле­ны́ отъ гро́­ба тво­е­го́ чу­до­дѣ́й­ствуютъ.

Ра́дуй­ся, уго́д­ни­че Бо́жій, святи́­те­лю Ѳе­о­до́­сіе, чу­до­тво́р­че пре­сла́в­ный.

Кон­да́къ 11

Пѣ́ніе мо­ли́­твен­ное не умол­ка́­ше у мо­ще́й тво­и́хъ, святи́­те­лю Ѳе­о­до́­сіе, отъ дне́ по­гре­бе́нія да́же до дне́ про­слав­ле́нія тво­е­го́ со святы́ми, егда́ со­бо́ръ святи́­те­лей Це́р­кве Россíйскія со сла́­вою изъ пе­ще́­ры мо́щи твоя́ из­не­се́ и въ со­бо́р­нѣй це́р­кви гра́­да Чер­ни́­го­ва на о́бщее по­кло­не́ніе че́ст­нѣ по­ло­жи́. Пріи­ми́ у́бо и на́ше сми­ре́н­ное пѣ́ніе хва­ле́б­ное и по­мо­зи́ на́мъ покая́ніемъ очи́­сти­ти­ся, да во ис­пол­не́ніи за́­по­вѣ­дей Хри­сто́­выхъ преуспѣ­ва́­ю­ще и то­бо́ю на­став­ля́еми, съ то­бо́ю бла­го­да́р­ствен­нѣ во­піе́мъ Бо́гу: Алли­лу́ія.

Икосъ 11

Свѣ­ти́ль­никъ бла­го­да́т­ный бы́въ въ жи­тіи́ тво­е́мъ, святи́­те­лю Ѳе­о­до́­сіе, ти́­химъ свѣ́­томъ сми­ре́нія и люб­ве́ на свѣ́щ­ни­цѣ Це́р­кве Хри­сто́­вы сія́ющій, и по пре­став­ле́ніи тво­е́мъ возсія́лъ еси́, я́ко со́лн­це, пре­ди́в­ны­ми чу­де­сы́ мглу́ ра­ско́­ла и е́ре­сей раз­го­ня́я и вѣ́р­ныхъ серд­ца́ къ Бо́гу обра­ща́я. Тѣ́м­же, съ лю­бо́­вію пра́здну­ю­ще святу́ю па́мять твою́, во­піе́мъ ти́:

Ра́дуй­ся, звѣз­до́ лу­че­за́р­ная, надъ зе­мле́ю Чер­ни́­говскою возсія́вшая; ра́дуй­ся, и всю́ страну́ Россíйскую свѣ́­томъ сво­и́мъ оза­ри́в­шая. Ра́дуй­ся, гра́­да Чер­ни́­го­ва сла́­во и огра­жде́ніе; ра́дуй­ся, всея́ зе­мли́ на́шея стра́­же не­у­сы́п­ный и те́­плый мо­ли́­твен­ни­че. Ра́дуй­ся, у пре­сто́­ла Царя́ ца́рству­ю­щихъ за царя́ на́­ше­го пред­ста́­тель­ствую­щій; ра́дуй­ся, я́ко и́мя твое́ по все́й стра­нѣ́ на́­шей отъ кон­ца́ въ ко­не́цъ про­слав­ля́ется. Ра́дуй­ся, я́ко явле́ніи тво­и́­ми не­вѣ́р­ныя въ вѣ́ру пра­во­сла́в­ную обра­ща́­е­ши; ра́дуй­ся, я́ко чу­де­сы́ тво­и́­ми ино­сла́в­ныя къ пра­во­сла́­вію на­став­ля́еши. Ра́дуй­ся, я́ко съ не­бе́с­ны­ми си́­ла­ми при́­сно Бо́гу вос­пѣ­ва́­е­ши; ра́дуй­ся, я́ко на не­бе­сѣ́хъ вы́ну сла́ву Его́ со­зер­ца́­е­ши.

Ра́дуй­ся, уго́д­ни­че Бо́жій, святи́­те­лю Ѳе­о­до́­сіе, чу­до­тво́р­че пре­сла́в­ный.

Кон­да́къ 12

Бла­го­да́­ти Бо́жіей со­су́дъ из­бра́н­ный бы́лъ еси́, святи́­те­лю Ѳе­о­до́­сіе: бла­го­да́ть Бо́жію и въ по́­мощь не́­мо­щи на́­шей ис­про­си́ у Го́­спо­да, да се́ю бла­го­да́тію спа­са́­е­ми, при­сно­бо­рю́­щія ны́ стра́­сти по­бѣ­ди́мъ, и то́ю укрѣп­ля́еми, по­да́­теля всѣ́хъ бла́гъ Го́­спо­да Іису́­са все­гда́ съ то­бо́ю про­слав­ля́емъ, зо­ву́­ще Ему́: Алли­лу́ія.

Икосъ 12

Пою́ще мно́­гая и пре­сла́в­ная чу­де­са́ твоя́ и про­слав­ля́юще ве­ли́кія по́­дви­ги твоя́, святи́­те­лю о́тче на́шъ Ѳе­о­до́­сіе, со уми­ле́ніемъ се́рд­ца сла́­вимъ, хва́­лимъ и ве­ли­ча́­емъ воз­ве­ли́­чив­ша­го тя́ Го́­спо­да, въ тебѣ́ я́вль­ша­го на́мъ но́­вое зна́­ме­ніе Сво­е­го́ бла­го­во­ле́нія къ Це́р­кви Пра­во­сла́в­нѣй, я́ко вѣ́ч­ному стол­пу́ и утвер­жде́нію и́сти­ны. Тебѣ́ же, я́ко те́­пло­му пред­ста́­те­лю на́­шему предъ Бо́­гомъ, воз­гла­ша́­емъ си­це­ва́я:

Ра́дуй­ся, въ вер­то­гра́­дѣ Го­спо́д­ни отъ у́тра до ве́­че­ра жи́­зни твоея́ до́­брѣ по­тру­ди́­вый­ся; ра́дуй­ся, въ ра́­дость Го́­спо­да сво­е­го́, я́ко ра́бъ благíй и вѣ́р­ный, вше́­дый. Ра́дуй­ся, жи­тіе́мъ тво­и́мъ пу́ть въ оби́­те­ли не­бе́с­ныя на́мъ по­ка­за́­вый; ра́дуй­ся, вѣн­це́мъ без­сме́р­тія и сла́­вы не­бе́с­ныя увѣн­ча́н­ный. Ра́дуй­ся, не́ба цер­ко́в­на­го звѣз­до́ пре­свѣ́т­лая; ра́дуй­ся, зе­мли́ Россíйскія по­хва­ло́ пре­чу́д­ная. Ра́дуй­ся, я́ко со всѣ́­ми святы́ми въ го́р­нихъ оби­та́­е­ши; ра́дуй­ся, я́ко и на́съ грѣ́ш­ныхъ на зе­мли́ лю­бо́­вію по­сѣ­ща́­е­ши. Ра́дуй­ся, и́мже Хри­сто́съ про­сла́­вися; ра́дуй­ся, и́мже са­та­на́ по­сра­ми́­ся.

Ра́дуй­ся, уго́д­ни­че Бо́жій, святи́­те­лю Ѳе­о­до́­сіе, чу­до­тво́р­че пре­сла́в­ный.

Кон­да́къ 13

О, ве­ли́кій уго́д­ни­че Бо́жій и чу­до­тво́р­че, святи́­те­лю о́тче на́шъ Ѳе­о­до́­сіе! Пріи­ми́ сіе́ ма́­лое мо­ле́ніе на́ше, въ по­хва­лу́ тебѣ́, а́ще и не­до­сто́й­нѣ, оба́­че съ лю­бо́­вію сы­но́в­нею при­но­си́­мое, и умо­ли́ Го́­спо­да Бо́га из­ба́­ви­ти­ся на́мъ отъ вся́кихъ бѣ́дъ, скор­бе́й и на­па́­стей, отъ ме­ждоу­со́б­ныя бра́­ни и вне­за́п­ныя сме́р­ти, и отъ му­че́ній вѣ́ч­ныхъ въ бу́ду­щемъ вѣ́цѣ, и спо­до́­би­ти­ся въ вѣ́ч­нѣй жи́­зни съ то­бо́ю вос­пѣ­ва́­ти Ему́: Алли­лу́ія.

Се́й кон­да́къ гла­го́­лет­ся три́­жды. Та́же Икосъ 1-й и Кон­да́къ 1-й

Мо­ли́­тва святи́­те­лю Ѳе­о­до́­сію, ар­хіе­пи́­ско­пу Чер­ни́­говскому и всея́ Россíи чу­до­тво́р­цу

О, свяще́н­ная гла­во́, крѣ́п­кій на́шъ мо­ли́­твен­ни­че и за­сту́п­ни­че, святи́­те­лю Ѳе­о­до́­сіе! Услы́­ши на́съ, съ вѣ́­рою при­зы­ва́­ю­щихъ тя́ и усе́рд­но при­па́­да­ю­щихъ къ ра́цѣ чест­ны́хъ и мно­го­цѣ­ле́б­ныхъ мо­ще́й тво­и́хъ [или́: ко святѣ́й ико́­нѣ тво­е́й]. По­ми­на́й на́съ у пре­сто́­ла Все­дер­жи́­те­ле­ва и не пре­ста́й моля́ся о на́съ ко Хри­сту́ Бо́гу: тебѣ́ бо да­де́ся бла­го­да́ть мо­ли́­ти­ся за ны́. Ис­про­си́ пред­ста́­тель­ствомъ Тво­и́мъ у все­ми́­ло­сти­ва­го Бо́га на́­ше­го ми́ръ Це́р­кви Его́, па́­сты­ремъ ея́ си́лу ре́­вност­но по­дви­за́­ти­ся о спа­се́ніи лю­де́й, Бла­го­че­сти́­вѣй­шему же Го­су­да́­рю на́­шему, Импе­ра́­то­ру [и́мярекъ] бла­го­по­спѣ­ше́ніе во устро­е́­ніи ца́р­ства Его́, и все­му́ ца́рству­ю­щему До́му ми́­лость Бо́жію и дол­го­де́н­ствіе. Умо­ли́ не­бе́с­на­го Отца́ и всѣ́мъ на́мъ по­да́­ти да́ръ, ко­е­му́­ждо бла­го­по­тре́­бенъ, вѣ́ру и́стин­ную, на­де́жду тве́рдую и лю­бо́вь не­о­ску­дѣ­ва́­ю­щую, гра­до́въ на́­шихъ утвер­жде́ніе, мíра уми­ре́ніе, отъ гла́­да и па́­гу­бы из­ба­вле́ніе, отъ на­ше́­ствія ино­пле­ме́н­ни­ковъ со­хра­не́ніе, ю́нымъ и мла­де́н­цемъ бла­го́е въ вѣ́рѣ воз­ра­ста́ніе, ста́­рымъ и не­мощ­ны́мъ утѣ­ше́ніе и под­крѣп­ле́ніе, боля́щимъ ис­цѣ­ле́ніе, си­ро­та́мъ и вдо­ви́­цамъ ми́­лость и за­ступле́ніе, за­блу́жд­шимъ ис­прав­ле́ніе, бѣ́д­ствую­щимъ бла­го­вре́­мен­ную по́­мощь, и всѣ́хъ упра́­ви въ ми́рѣ и покая́ніи не­по­сты́д­но скон­ча́­ти жи­тіе́ свое́ и Ца́рствія Бо́жія на­слѣ́д­ни­ки бы́ти, идѣ́­же ты́ ны́нѣ во­дво­ря́ешися со а́н­ге­лы и всѣ́­ми святы́ми, про­слав­ля́я Бо́га, въ Тро́­и­цѣ сла́­ви­ма­го, Отца́ и Сы́на и Свята́го Ду́ха, во вѣ́ки вѣ­ко́въ. Ами́нь.

Тро­па́рь, гла́съ 4

Преу­до­бре́нъ во ар­хіе­ре́­ехъ, святи́­те­лю Ѳе­о­до́­сіе, бы́лъ еси́ свѣ­ти́­ло сво­е­му́ ста́­ду, та́же пре­ста́­вил­ся еси́ въ вѣ́ч­ныя оби́­те­ли. Умо­ли́ у пре­сто́­ла Царя́ сла́­вы из­ба́­ви­ти­ся на́мъ отъ находя́щихъ на ны́ зо́лъ и спа­сти́­ся ду­ша́мъ на́­шимъ, свя́те, мо­ли́­тва­ми тво­и́­ми.

Кон­да́къ, гла́съ 4

Па́сты­рей На­ча́ль­нику Хри­сту́ тру­ди́л­ся еси́, святи́­те­лю Ѳе­о­до́­сіе, на па́­жи­ти ду­хо́в­нѣй сло­ве́с­ныя твоя́ о́вцы пита́я, и цѣ­ле́­бенъ да́ръ отъ Хри­ста́ Спа́­са прія́лъ еси́, во е́же не́­мо­щи ду­ше́в­ныя и тѣ­ле́с­ныя цѣ­ли́­ти всѣ́хъ, съ вѣ́­рою къ цѣ­ле́б­нымъ тво­и́мъ мо­ще́мъ при­хо­дя́щихъ. Тѣ́м­же и ны́нѣ, свя́тe, мо­ли́ся всѣ́мъ и́мя твое́ при­зы­ва́­ю­щимъ отъ на­вѣ́­товъ вра́жіихъ спа­сти́­ся и по­ми́­ло­ва­ти­ся ду­ша́мъ на́­шимъ.

Ве­ли­ча́­ніе

Вели­ча́­емъ тя́, святи́­те­лю о́тче Ѳе­о­до́­сіе, и чте́мъ святу́ю па́мять твою́, ты́ бо мо́­ли­ши за на́съ Хри­ста́ Бо́га на́­ше­го.