Конда́къ 1

Избра́нный архіере́ю и слуго́ Вели́каго Архіере́я Іису́са, преблаже́нне Алексíе! Яко сподо́бльшеся мно́гихъ твои́хъ благодѣя́ній, не имѣ́юще же что́ возда́ти, похва́льная воспису́емъ ти́ и отъ души́ взыва́емъ, проповѣ́дающе чудеса́ твоя́: испроси́ на́мъ отъ Царя́ Небе́снаго безбѣ́дно преити́ про́чее житія́ сего́ и дости́гнути го́рняго Іерусали́ма, да та́мо узрѣ́вше тя́ въ блаже́ннѣй ра́дости, воззове́мъ къ тебѣ́:

Ра́дуйся, Алексíе, вели́кій чудотво́рче и ско́рый помо́щниче.

Икосъ 1

Ангеле, отъ земли́ прозябы́й! Вели́каго cовѣ́та Ангелъ, прови́дѣвъ добро́ту души́ твоея́, пре́жде вѣ́къ избра́ тебе́, е́же благовѣсти́ти плѣне́ннымъ отпуще́ніе и слѣпы́мъ прозрѣ́ніе. Отню́дуже мы́, грѣ́шніи, свѣ́томъ дѣ́лъ твои́хъ получи́вше прозрѣ́ніе и грѣхо́въ отпуще́ніе, взыва́емъ:

Ра́дуйся, ко́рене блага́го о́трасль блажа́йшая; ра́дуйся, честны́хъ роди́телей добрѣ́йшій сы́не. Ра́дуйся, благоуха́ннаго са́да прозябе́ніе; ра́дуйся, духо́внымъ возрожде́ніемъ Бо́гу Отцу́ усыновле́нный. Ра́дуйся, мѵропома́заніемъ Свята́го Ду́ха запечатлѣ́нный; ра́дуйся, и́мя, я́ко мѵ́ро излія́нное, свы́ше воспрія́вый. Ра́дуйся, отъ пеле́нъ Бо́гу посвяще́нный; ра́дуйся, му́жественно и́го Христо́во на себе́ возложи́вый. Ра́дуйся, земна́я и мимотеку́щая, я́ко уме́ты, вмѣни́вый; ра́дуйся, его́же Человѣ́къ домови́тъ - Іису́съ у́тро ная́ дѣ́лателя въ виногра́дъ Сво́й. Ра́дуйся, о́бразъ Бо́жій и подо́біе свя́то соблю́дшій; ра́дуйся, красото́ душе́вныя и тѣле́сныя, всѣ́хъ о́чи увеселя́ющая.

Ра́дуйся, Алексíе, вели́кій чудотво́рче и ско́рый помо́щниче.

Конда́къ 2

Ви́дя открове́ніемъ Ду́ха Свята́го, я́ко не устоя́тъ нечести́віи на судѣ́ пра́ведномъ, но су́ть я́ко пра́хъ, его́же возмета́етъ вѣ́тръ, отъ млады́хъ ногте́й, преблаже́нне Алексíе, на совѣ́тъ и́хъ не ше́лъ еси́, ниже́ на пути́ грѣ́шныхъ человѣ́ковъ ста́лъ еси́, но, зако́ну Бо́жію усе́рдно поуча́яся, и про́чимъ внуша́лъ еси́ пѣ́ти: Аллилу́ія.

Икосъ 2

Ра́зумъ свы́ше пріе́мъ, ма́лъ дѣ́тищъ су́щъ, е́же не тружда́тися всу́е въ ловле́ніи пти́цъ, потща́лся еси́ вся́, я́же на земли́, кра́сная оста́вити. Тѣ́мже мы́ приглаша́емъ тебѣ́:

Ра́дуйся, на лови́тву человѣ́ковъ призва́нный; ра́дуйся, къ го́рнимъ я́ко на крила́хъ возлета́вый. Ра́дуйся, мо́ре жите́йское любому́дріемъ испыта́вый; ра́дуйся, волне́ніе его́ безопа́сно проше́дый. Ра́дуйся, земле́ блага́я, сѣ́мя сло́ва Бо́жія воспрія́вшая; ра́дуйся, земле́, пло́дъ стори́чный произрасти́вшая. Ра́дуйся, пшени́це, хлѣ́бъ небе́сный устро́ившая; ра́дуйся, въ жи́тницѣ небе́сной соблюде́нная. Ра́дуйся, обрѣты́й многоцѣ́нный би́серъ и его́ всѣ́мъ, ели́ка имѣ́лъ еси́, купи́вый; ра́дуйся, зѣ́льнымъ поще́ніемъ, я́ко благовку́сною пи́щею, отъ ю́ности пита́выйся. Ра́дуйся, всено́щнымъ стоя́ніемъ и непреста́нными моли́твами себе́ въ по́двигѣ укрѣпи́вый; ра́дуйся, въ мо́рѣ сле́зъ твои́хъ мно́жества де́моновъ потопи́вый.

Ра́дуйся, Алексíе, вели́кій чудотво́рче и ско́рый помо́щниче.

Конда́къ 3

Си́лою свы́ше, егда́ облече́ тя́ Ду́хъ Всесвяты́й, па́стыря Це́ркви Россíйстѣй поставля́я, тогда́ всѣ́мъ лю́демъ твои́мъ вдыха́лъ еси́ хвалу́: Аллилу́ія.

Икосъ 3

Подоба́ше, о́тче Алексíе, съ небесе́ пѣ́сни тебѣ́ воспѣва́емѣй бы́ти, а не отъ земли́: кто́ бо отъ человѣ́къ возмо́жетъ по досто́инству твоея́ святы́ни вели́чія повѣ́дати? Но мы́, любо́вію твое́ю побѣжда́еми, вопіе́мъ ти́ си́це:

Ра́дуйся, до́льняя и кра́сная мíра презрѣ́вый; ра́дуйся, вы́шнихъ красо́тъ жела́ніемъ воспале́нный. Ра́дуйся, еди́наго Христа́ отъ се́рдца возлюби́вый; ра́дуйся, Тому́ еди́ному все́ю душе́ю прилѣпи́выйся. Ра́дуйся, пра́вило вѣ́ры благочести́выя; ра́дуйся, благíй дѣ́лателю виногра́да Христо́ва. Ра́дуйся, дарова́нный тала́нтъ пріумно́живый; ра́дуйся, въ ра́дость Го́спода твоего́ вше́дый. Ра́дуйся, сла́достьми духо́вными на́съ насыща́ющій; ра́дуйся, благопрія́тное Бо́гу кади́ло. Ра́дуйся, благоуха́ніе моли́твы къ престо́лу Вы́шняго вознося́щій; ра́дуйся, любо́вный къ Бо́гу о на́съ предста́телю.

Ра́дуйся, Алексíе, вели́кій чудотво́рче и ско́рый помо́щниче.

Конда́къ 4

Бу́рю безмѣ́стныхъ по́мысловъ, отъ діа́вола непреста́нно воздвиза́емую, до конца́ укроти́лъ еси́ и, ра́дуяся таково́ю побѣ́дою, торже́ственнѣ Бо́гу воспѣва́лъ еси́: Аллилу́ія.

Икосъ 4

Слы́ша и ви́дя премно́гую твою́ добродѣ́тель, па́стыремъ тя́ Це́ркве Христо́вы избира́етъ сосло́віе правосла́вное, мы́ же, о се́мъ веселя́щееся, глаго́лемъ ти́:

Ра́дуйся, досто́йно возсѣ́дый на сѣда́лищѣ апо́стольскомъ; ра́дуйся, корми́ло корабля́ Христо́ва. Ра́дуйся, му́дрый наста́вниче; ра́дуйся, звѣздо́ непреле́стная, въ руцѣ́ Христо́вой содержи́мая. Ра́дуйся, въ по́двизѣ учи́тельства неутоми́мый; ра́дуйся, безвѣ́стныхъ и та́йныхъ прему́дрости Бо́жія проповѣ́дниче. Ра́дуйся, нелицепріе́мный и́стины побо́рниче; ра́дуйся, безбо́жныхъ и нечести́выхъ усте́нъ обличи́телю и загради́телю. Ра́дуйся, благовре́меннѣ и безвре́меннѣ въ уче́ніи апо́столу поревнова́вый; ра́дуйся, вла́стію, да́нною ти́ свы́ше, му́дрѣ и душеполе́знѣ человѣ́ки вяза́вый и рѣши́вый. Ра́дуйся, ка́ющихся утѣ́шителю; ра́дуйся, па́ствы твоея́ до́брый храни́телю.

Ра́дуйся, Алексíе, вели́кій чудотво́рче и ско́рый помо́щниче.

Конда́къ 5

Богото́чною кро́вію искупи́вшаго ро́дъ человѣ́ческій отъ зако́нныя кля́твы вѣ́рою зря́ Влады́ку и усе́рднѣ къ Нему́ любо́вію распала́емь, непреста́нно возглаша́лъ еси́: Аллилу́ія.

Икосъ 5

Ви́дѣвъ вели́кій кня́зь твое́ ве́ліе ду́ха му́жество и любо́вь къ оте́честву твоему́, умоли́ тя́ поити́ къ безбо́жному царю́ Вердеви́ру. Ты́ же а́біе ше́дъ благи́ми и кро́ткими словесы́ зѣ́льный гнѣ́въ его́ на ро́дъ христіа́нскій утоли́лъ еси́. Сія́ благодѣя́нія твоя́, о́тче на́шъ Алексíе, мы́, сы́нове россíйстіи, исповѣ́дующе, благода́рнѣ вопіе́мъ ти́:

Ра́дуйся, му́жественный Ду́ха во́ине; ра́дуйся, сто́лпе крѣ́пости на́шея отъ лица́ вра́жія. Ра́дуйся, ору́жіе, безъ ра́ти сопоста́ты побѣжда́ющее; ра́дуйся, щи́те, отъ напа́стей огражда́ющій. Ра́дуйся, я́ко ко́кошъ, птенцы́ своя́ охраня́ющій; ра́дуйся, же́зле, па́дающихъ подкрѣпля́ющій. Ра́дуйся, па́стырю, волко́въ отъ ста́да отгоня́ющій; ра́дуйся, ду́шу свою́ за о́вцы положи́ти не отрекíйся. Ра́дуйся, любве́ Христо́вы и́стый храни́телю; ра́дуйся, не я́же своя́, но я́же бли́жняго взыска́вый. Ра́дуйся, скорбя́щихъ ско́рое услы́шаніе; ра́дуйся, печа́льми обурева́емымъ ти́хое приста́нище.

Ра́дуйся, Алексíе, вели́кій чудотво́рче и ско́рый помо́щниче.

Конда́къ 6

Проповѣ́дницы твоея́ святы́ни на́мъ су́ть нетлѣ́нныя твоя́ честны́я мо́щи, чрезъ мно́га лѣ́та предъ оча́ми на́шими лежа́щія, и́же, а́ще и запеча́таннымъ су́щимъ усто́мъ твои́мъ молча́ніемъ, оба́че вопію́тъ непреста́нно: Аллилу́ія.

Икосъ 6

Возсія́ сла́ва мно́гихъ чуде́съ твои́хъ не то́кмо въ преслову́томъ гра́дѣ се́мъ, но и въ невѣ́рныхъ ага́рянѣхъ, отню́дуже нечести́вый ца́рь и́хъ Чжанибе́къ жела́ше, да помо́лишися о ослѣ́пшей цари́цѣ его́. Ты́ у́бо, всю́ наде́жду возложи́въ на Врача́ ду́шъ и тѣле́съ, си́лою моли́твъ твои́хъ зрѣ́ніе то́й испроси́лъ еси́. Мы́ же, уди́вльшеся таково́му пресла́вному чудеси́, взыва́емъ ти́:

Ра́дуйся, уго́дное чуде́съ Бо́жіихъ ору́діе; ра́дуйся, въ скуде́льномъ сосу́дѣ сокро́вище си́лы Бо́жія яви́вый. Ра́дуйся, предсказа́нія ева́нгельскаго исполни́телю; ра́дуйся, десни́ца чудотворе́нія Іису́сова. Ра́дуйся, язы́къ Христо́въ, сло́вомъ исцѣля́ющій; ра́дуйся, апо́стольскія си́лы сохрани́телю. Ра́дуйся, слѣпы́хъ просвѣти́телю; ра́дуйся, немощны́хъ цѣле́бниче. Ра́дуйся, та́йныхъ прови́дче; ра́дуйся, бѣсо́въ отъ человѣ́къ прогони́телю. Ра́дуйся, и невѣ́рнаго царя́ Це́рковь почти́ти и возвели́чити си́лою чуде́съ преклони́вый; ра́дуйся, не тѣле́сное то́кмо, но и душе́вное зрѣ́ніе подаю́щій.

Ра́дуйся, Алексíе, вели́кій чудотво́рче и ско́рый помо́щниче.

Конда́къ 7

Хотя́щу тебѣ́ благоугоди́ти Творцу́ твоему́, не седмы́й то́кмо де́нь освяща́лъ еси́, но всю́ седми́цу житія́ твоего́ во свя́тости провожда́лъ еси́, воспѣва́я Бо́гу: Аллилу́ія.

Икосъ 7

Но́вую тя́ показа́ тва́рь Зижди́тель, всеблаже́нне Алексíе, зе́мна а́нгела и небе́сна человѣ́ка. Тѣ́мже чудя́щеся воспѣва́емъ ти́:

Ра́дуйся, о́тче на́шъ, обита́яй ду́хомъ въ небеси́, а тѣ́ломъ на земли́ опочива́яй; ра́дуйся, ди́вная вели́чія Бо́жія всѣ́мъ повѣда́яй земноро́днымъ. Ра́дуйся, пло́ть ду́ху покори́вый; ра́дуйся, плѣни́вый ра́зумъ сво́й въ послуша́ніе вѣ́ры. Ра́дуйся, рыка́ющаго а́дскаго льва́ уста́ загради́вый; ра́дуйся, о́гнь по́хоти плотскíя погаси́вый. Ра́дуйся, сребролю́бія и́долъ сокруши́вый; ра́дуйся, надъ всѣ́ми ко́знями вра́жіими восторжествова́вый. Ра́дуйся, отвергíйся себе́ и во́лю свою́ во́лѣ Бо́жіей покори́вый; ра́дуйся, пита́выйся сокрове́ннымъ хлѣ́бомъ небе́снымъ. Ра́дуйся, алка́вый и жажда́вый еди́ныя пра́вды; ра́дуйся, Ца́рствіе Бо́жіе вну́трь себе́ всели́вый.

Ра́дуйся, Алексíе, вели́кій чудотво́рче и ско́рый помо́щниче.

Конда́къ 8

Стра́нное чу́до житіе́ твое́, святи́телю, явля́ется притека́ющимъ ко всечестны́мъ моще́мъ твои́мъ, при ни́хже и ма́лое моле́ніе принося́щимъ, ве́лія всегда́ благода́ть отъ Бо́га подае́тся, ю́же пріе́млюще, дру́гъ со дру́гомъ ра́достно Бо́гу возглаша́емъ: Аллилу́ія.

Икосъ 8

Ве́сь у́мъ сво́й имѣ́я въ вы́шнихъ впере́нъ, и ни́жнихъ, па́ству твою́, не оста́вилъ еси́, е́же моли́твы о ни́хъ возсыла́ти ко Всевы́шнему Влады́цѣ, преподо́бне Алексíе. Не забу́ди и ны́нѣ на́съ, приглаша́ющихъ тебѣ́ усе́рдно:

Ра́дуйся, горо́, добродѣ́тельми вы́ше небе́съ вознесе́нная; ра́дуйся, рѣко́, скве́рны на́ша омыва́ющая. Ра́дуйся, исто́чниче, жа́жду грѣхо́вную утоля́ющій; ра́дуйся, ка́меню драгíй, всю́ Россíйскую зе́млю украша́ющій. Ра́дуйся, зла́то, во вся́ концы́ блеща́ніе отъ себе́ испуща́ющее; ра́дуйся, сребро́, седмери́цею отъ скве́рнъ грѣхо́вныхъ очище́нное. Ра́дуйся, кимва́ле, всѣ́хъ на славосло́віе Бо́жіе созыва́ющій; ра́дуйся, свѣти́льниче, сѣдя́щихъ во тмѣ́ озаря́ющій. Ра́дуйся, дре́во, отъ жа́ра грѣхо́внаго осѣня́ющее; ра́дуйся, благоту́чная вѣ́тве лозы́ Христо́вы. Ра́дуйся, та́инственнаго тѣ́ла здра́вый чле́не; ра́дуйся, ча́до сла́вы воскресе́нія.

Ра́дуйся, Алексíе, вели́кій чудотво́рче и ско́рый помо́щниче.

Конда́къ 9

Вся́кое безмѣ́стныхъ страсте́й воста́ніе благода́тію Госпо́днею до конца́ потреби́лъ еси́ въ ме́ртвеннѣй пло́ти твое́й, святи́телю Алексíе! Тѣ́мже и бы́лъ еси́ я́ко дре́во, насажде́нное при исхо́дищахъ во́дъ, пло́дъ дая́ во вре́мя свое́ и поя́ Бо́гу: Аллилу́ія.

Икосъ 9

Вѣтíя многовѣща́нныя превозше́лъ еси́ духо́вною си́лою сло́ва твоего́, повѣ́дая лю́демъ ди́вная вели́чія Бо́жія и пита́я гла́дныя ду́ши хлѣ́бомъ съ небесе́. Мы́ же, такова́я се́рдцемъ объе́млюще, благода́рнѣ тебѣ́ зове́мъ:

Ра́дуйся, ке́дре, въ Це́ркви Христо́вѣ, я́ко въ Лива́нѣ, умно́женный; ра́дуйся, я́ко фи́никсъ, въ дому́ Бо́жіемъ процвѣты́й. Ра́дуйся, кипари́се, вѣ́рныхъ сердца́ благово́ніемъ исполня́ющій; ра́дуйся, виногра́де, сла́дкое благоче́стія вино́ на́мъ источа́ющій. Ра́дуйся, кри́не, го́рняя поля́ украша́ющій; ра́дуйся, смоко́внице благопло́дная. Ра́дуйся, пшени́це, чи́стымъ хлѣ́бомъ гла́дныя пита́ющая; ра́дуйся, ма́слино, еле́й ми́лости излива́ющая. Ра́дуйся, цвѣ́те, отъ ко́рене Христо́ва процвѣты́й; ра́дуйся, сла́дкое вино́, въ точи́лѣ Іису́совомъ изгнѣте́нное. Ра́дуйся, безсме́ртнымъ питіе́мъ дне́сь напаева́емый; ра́дуйся, и на́мъ трапе́зу небе́сную уготовля́ющій.

Ра́дуйся, Алексíе, вели́кій чудотво́рче и ско́рый помо́щниче.

Конда́къ 10

Спасти́ хотя́ ввѣ́ренныя ти́ лю́ди, Зако́нъ и Ева́нгеліе по вся́ дни́ проповѣ́далъ еси́: да, позна́вше мно́гая своя́ прегрѣше́нія, прибѣга́ютъ съ моле́ніемъ непреста́нно ко Христу́, Спаси́телю мíра, отъ Него́же пріе́млющихъ проще́ніе, науча́лъ еси́ и́хъ пѣ́ти: Аллилу́ія.

Икосъ 10

Стѣна́ еси́, всеблаже́нне Алексíе, го́рняго Іерусали́ма, отъ десяти́ за́повѣдей, я́ко отъ десяти́ ве́ліихъ ка́меній, Ду́хомъ Святы́мъ устро́енная! Имѣ́лъ бо еси́ зако́нъ Госпо́день посредѣ́ чре́ва твоего́, тѣ́мже и глаго́лемъ ти́:

Ра́дуйся, еди́наго Бо́га и Его́же посла́лъ е́сть Іису́са Христа́ позна́вый; ра́дуйся, я́ко не поклони́лся еси́ куми́ру вре́меннаго благополу́чія. Ра́дуйся, я́ко николи́же прія́лъ еси́ и́мене Го́спода Бо́га твоего́ всу́е; ра́дуйся, отъ ю́ности все́ вре́мя Бо́гови посвяти́вый. Ра́дуйся, я́ко всѣ́хъ, и́же отцы́ и ма́тери нари́чутся, почти́лъ еси́; ра́дуйся, до конца́ гнѣ́въ на бли́жняго уби́вый. Ра́дуйся, по́хоти плотскíя посто́мъ и труда́ми отъ себе́ прогна́вый; ра́дуйся, ру́цѣ свои́ отъ лихоима́нія и хище́нія всегда́ удержа́вый. Ра́дуйся, уста́ твоя́ отъ осужде́нія и клеветы́ обузда́вый; ра́дуйся, се́рдце свое́ отъ за́висти и не́нависти очи́стивый. Ра́дуйся, удали́выйся отъ надме́нія фарисе́йскаго; ра́дуйся, и́стый о́бразъ мытаре́ва смире́нія.

Ра́дуйся, Алексíе, вели́кій чудотво́рче и ско́рый помо́щниче.

Конда́къ 11

Пѣ́ніе а́нгельское соверша́шеся, егда́ свята́я твоя́ душа́ отъ земны́хъ преставля́шеся къ небе́снымъ, и́хже еди́нъ ли́къ по еди́номъ взыва́ше: Аллилу́ія.

Икосъ 11

Многосвѣ́тлыми луча́ми блиста́етъ житіе́ твое́, о́тче Алексíе! Отню́дуже мно́гимъ лико́мъ пра́ведныхъ духо́въ соприча́стна тя́ ви́дяще, вопіе́мъ ти́:

Ра́дуйся, проро́че, во́лю Госпо́дню на́мъ откры́вый; ра́дуйся, апо́столе, Ева́нгеліе Ца́рствія Бо́жія ка́ющимся благовѣсти́вый. Ра́дуйся, па́стырю, о сла́вѣ Бо́жіей ревнова́вый; ра́дуйся, му́чениче, изволе́ніемъ ду́шу свою́ за па́ству положи́вый. Ра́дуйся, по́стниче, взе́мшій кре́стъ сво́й на ра́мо и тѣ́снымъ путе́мъ въ слѣ́дъ за Христо́мъ ше́дый; ра́дуйся, свяще́нниче, безкро́вную же́ртву о лю́дехъ приноси́вый. Ра́дуйся, херуви́ме, на не́мже опочи́ Госпо́дь сла́вы; ра́дуйся, шестокрила́тый серафи́ме, вопія́й непреста́нно трисвяту́ю пѣ́снь Го́споду Савао́ѳу. Ра́дуйся, дѣ́вственниче ангелоподо́бный; ра́дуйся, мно́ги оби́тели на славосло́віе Бо́жіе устро́ивый. Ра́дуйся, дру́га Бо́жія, преподо́бнаго Се́ргія при́сный дру́же; ра́дуйся, я́ко его́же жела́лъ еси́ здѣ́ зрѣ́ти прее́мникомъ свои́мъ, того́ зри́ши дне́сь та́мо вку́пѣ съ тобо́ю престо́лу Бо́жію предстоя́ща.

Ра́дуйся, Алексíе, вели́кій чудотво́рче и ско́рый помо́щниче.

Конда́къ 12

Благода́ть, я́же бы́сть Іису́съ Христо́мъ, твои́ми пречи́стыми усты́ ца́рствующему гра́ду сему́ всегда́ бы́сть проповѣ́дана. Отню́дуже вси́, Христу́ покланя́ющеся, поя́ху: Аллилу́ія.

Икосъ 12

Пою́ще ве́лія твоя́, Алексíе досточу́дне, исправле́нія и по́двиги, недоумѣ́емъ вои́стинну, ка́ко нарече́мъ тя́? Отъ всѣ́хъ бо благи́хъ дѣ́лъ, я́ко гра́дъ красе́нъ, себе́ Творцу́ устро́илъ еси́. Тѣ́мже взыва́емъ ти́:

Ра́дуйся, Ада́мово паде́ніе благода́тію Христо́вою въ себѣ́ испра́вивый; ра́дуйся, по изгна́ніи изъ земна́го рая́ небе́сный ра́й улучи́вый. Ра́дуйся, Авелю, кро́вію Христо́вою окропле́нный; ра́дуйся, но́вый Ено́хъ, угоди́вый Го́сподеви. Ра́дуйся, Иліе́, о́гненною добродѣ́телей колесни́цею вознесе́нный; ра́дуйся, Елисе́е, сугу́бую благода́ть воспрія́вый. Ра́дуйся, Но́е, отъ пото́па беззако́ній благода́тію Христо́вою, я́ко ковче́гомъ дре́въ негнію́щихъ, спа́сшійся; ра́дуйся, Авраа́ме, не сы́на, но себе́ самаго́ въ же́ртву Бо́гу прине́сшій. Ра́дуйся, Иса́іе, на престо́лѣ высо́цѣ и превознесе́ннѣ лице́мъ къ лицу́ Го́спода зря́щій; ра́дуйся, Изра́илю, моли́твою укрѣпи́выйся съ Бо́гомъ и благослове́ніе вѣ́чное отъ Него́ пріе́мый. Ра́дуйся, Саму́иле, царе́мъ благослове́ніе подаваю́щій; ра́дуйся, наслѣ́дниче Бо́жій и сонаслѣ́дниче Христо́въ.

Ра́дуйся, Алексíе, вели́кій чудотво́рче и ско́рый помо́щниче.

Конда́къ 13

О, па́стырю на́шъ предо́брый и свѣти́льниче многосвѣ́тлый, всече́стне Алексíе! Пріими́ сіе́ ма́лое тебѣ́ хвале́ніе на́ше и испроси́ на́мъ у Христа́ Бо́га утвержде́ніе въ вѣ́рѣ, е́же ходи́ти во всѣ́хъ за́повѣдехъ и оправда́ніихъ Госпо́днихъ безпоро́чно, оте́честву же на́шему ми́ръ и благоде́нствіе, да сподо́бимся вѣ́чно въ ра́дости блаже́ннѣй воспѣва́ти Бо́гу: Аллилу́ія.

Се́й конда́къ глаго́лется три́жды. Та́же Икосъ 1-й и Конда́къ 1-й

Моли́тва и́же во святы́хъ отцу́ на́шему Алексíю, митрополи́ту Моско́вскому и всея́ Россíи чудотво́рцу

О, пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́мъ обита́лище, вели́кій архіере́е, те́плый на́шъ засту́пниче, святи́телю Алексíе! Предстоя́ у престо́ла всѣ́хъ Царя́, и наслажда́яся свѣ́та Единосу́щныя Тро́ицы, и херуви́мски со а́нгелы возглаша́я пѣ́снь трисвяту́ю, вели́ко и неизслѣ́дованное дерзнове́ніе имѣ́я ко Всеми́лостивому Влады́цѣ, моли́ся па́ствы твоея́ спасти́ лю́ди, единоро́дный ти́ язы́къ: помози́ во бранѣ́хъ Благочести́вѣйшему Самодержа́внейшему Вели́кому Госуда́рю на́шему Импера́тору [и́мярекъ] всея́ Россíи, и покори́ Ему́ вся́ проти́вныя враги́ подъ но́зѣ Его́, ми́рно и безмяте́жно ца́рствовати Ему́ устро́й; [или́: стра́ждущую страну́ Россíйскую отъ лю́тыхъ безбо́жникъ и вла́сти и́хъ Госпо́дь да свободи́тъ, и да возста́витъ престо́лъ правосла́вныхъ царе́й; вѣ́рныхъ рабо́въ Его́, въ ско́рби и печа́ли де́нь и но́щь вопію́щихъ къ Нему́, многоболѣ́зный во́пль да услы́шитъ и да изведе́тъ отъ поги́бели живо́тъ на́шъ;] благостоя́ніе святы́хъ це́рквей утверди́, архіере́и благолѣ́піемъ святи́тельства украси́; мона́шествующихъ къ подвиго́мъ до́браго тече́нія укрѣпи́; ца́рствующій гра́дъ [се́й и святу́ю оби́тель сію́,] и вся́ гра́ды и страны́ до́брѣ сохрани́ и вѣ́ру святу́ю непоро́чну соблюсти́ умоли́; мíръ ве́сь умири́, отъ гла́да и па́губы изба́ви ны́ и отъ нападе́нія иноплеме́нныхъ сохрани́ на́съ; ста́рыя утѣ́ши, ю́ныя накажи́, безу́мныя умудри́, вдови́цы поми́луй, сироты́ заступи́, младе́нцы возрасти́, плѣне́нныя возврати́, немощству́ющія исцѣли́ и вездѣ́ те́плѣ призыва́ющихъ тя́ и съ вѣ́рою притека́ющихъ къ ра́цѣ честны́хъ и многоцѣле́бныхъ моще́й твои́хъ, усе́рдно припа́дающихъ и моля́щихъ ти ся отъ вся́кихъ напа́стей и бѣ́дъ хода́тайствомъ твои́мъ свободи́, да зове́мъ ти́: о богоизбра́нный па́стырю, звѣздо́ всесвѣ́тлая мы́сленныя тве́рди, та́йнаго Сіо́на необори́мый сто́лпе, мѵродохнове́нный цвѣ́те ра́йскій, всезлата́я уста́ Сло́ва, моско́вская похвало́, всея́ Россíи украше́ніе! Моли́ о на́съ Всеще́драго и Человѣколюби́ваго Христа́ Бо́га на́шего, да въ де́нь стра́шнаго Прише́ствія Его́ шу́іяго стоя́нія изба́витъ на́съ и ра́дости святы́хъ прича́стники сотвори́тъ со всѣ́ми святы́ми во вѣ́ки. Ами́нь.

Тропа́рь на преставле́ніе [12 февраля́], гла́съ 8

Яко апо́столомъ сопресто́льна, и врача́ предо́бра, и служи́теля благопрія́тна, къ ра́цѣ твое́й честнѣ́й притека́юще, святи́телю Алексíе, богому́дре чудотво́рче, соше́дшеся, любо́вію въ па́мять твою́ свѣ́тло пра́зднуемъ, въ пѣ́снехъ и пѣ́ніихъ ра́дующеся и Христа́ сла́вяще, такову́ю благода́ть тебѣ́ дарова́вшаго исцѣле́ній и гра́ду твоему́ вели́кое утвержде́ніе.

Инъ тропа́рь, на обрѣ́теніе моще́й [20 ма́я], гла́съ 2

Яко сокро́вище пребога́тое, многолѣ́тно въ земли́ сокрове́нное, честны́я мо́щи твоя́ обрѣто́шася чудоточа́щія, всеблаже́нне о́тче святи́телю Алексíе: отъ ни́хже врачевство́ пріе́млюще, обогаща́емся и Христа́ славосло́вимъ, глаго́люще: сла́ва прославля́ющему святы́я Своя́.

Конда́къ на преставле́ніе [12 февраля́], гла́съ 8

Боже́ственнаго и пречестна́го святи́теля Христо́ва, но́ваго чудотво́рца Алексíя, вѣ́рно вси́ пою́ще, лю́діе, любо́вію да ублажи́мъ, я́ко па́стыря вели́каго, служи́теля же и учи́теля прему́дра земли́ Россíйстѣй. Дне́сь, въ па́мять его́ прите́кше, ра́достно возопіе́мъ пѣ́снь богоно́сному: я́ко имѣ́я дерзнове́ніе къ Бо́гу, многообра́зныхъ на́съ изба́ви обстоя́ній, да зове́мъ ти́: ра́дуйся утвержде́ніе гра́ду на́шему.

Инъ конда́къ, на обрѣ́теніе моще́й [20 ма́я], гла́съ 8

Яко со́лнце незаходи́мое, отъ гро́ба возсія́ на́мъ отъ мно́гъ лѣ́тъ сокрове́нны честны́я твоя́ мо́щи нетлѣ́нны, святи́телю Алексíе, тобо́ю благода́ть пріе́млемъ: всю́ бо страну́ сію́ и вся́ ны́ чудесы́ и добро́тою обогаща́еши, дѣ́йствомъ благода́ти, да пое́мъ ти́: ра́дуйся, о́тче, свѣти́ло Россíи.

Велича́ніе

Велича́емъ тя́, святи́телю о́тче Алексíе, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.