Конда́къ 1

Взбра́ннѣй Воево́дѣ, Влады́чицѣ на́шей Богоро́дицѣ, зна́меніемъ ико́ны Ея́ святы́я ди́вную побѣ́ду лю́демъ Новагра́да дарова́вшей, благода́рственное возглаша́емъ пѣ́ніе. Ты́ же, Всеблага́я Засту́пнице на́ша, я́ко иму́щая держа́ву непобѣди́мую, отъ вся́кихъ на́съ бѣ́дъ свободи́ и отъ вра́гъ ви́димыхъ и неви́димыхъ защити́, да зове́мъ Ти́:

Ра́дуйся, Влады́чице, зна́меніе ми́лости Твоея́ на́мъ явля́ющая.

Икосъ 1

Ангеловъ Цари́це и всея́ тва́ри Влады́чице, Пречи́стая Дѣ́во Богоро́дице, пресла́внымъ зна́меніемъ ико́ны Твоея́ святы́я всю́ страну́ Россíйскую благода́тно озари́ла еси́ и струи́ чуде́съ отъ нея́ источи́ла еси́ вѣ́рнымъ. Тѣ́мже, со усе́рдіемъ и любо́вію припа́дающе ко пречестно́му Твоему́ о́бразу, со умиле́ніемъ прино́симъ Ти́ благохвале́нія сицева́я:

Ра́дуйся, освяще́нное селе́ніе Бо́га Сло́ва; ра́дуйся, благода́тію Бо́жіею и на́съ освяща́ющая. Ра́дуйся, спасе́нію па́дшаго ро́да человѣ́ческа непоро́чно послужи́вшая; ра́дуйся, всѣ́хъ Творца́ и Го́спода, Чи́стая, Ду́хомъ Боже́ственнымъ въ ложесна́хъ заче́нши, безъ истлѣ́нія роди́вшая. Ра́дуйся, ма́тернимъ Твои́мъ попече́ніемъ всѣ́хъ на́съ объе́млющая; ра́дуйся, въ бѣ́дахъ и напа́стехъ ско́рая на́мъ Помо́щнице. Ра́дуйся, злы́я стра́сти на́ша неви́димо укроща́ющая; ра́дуйся, въ христіа́нскихъ добродѣ́телехъ преуспѣва́ти на́мъ помога́ющая. Ра́дуйся, неду́ги на́ша безме́здно врачу́ющая; ра́дуйся, на стези́ покая́нія на́съ прему́дро наставля́ющая. Ра́дуйся, Дѣ́во, христіа́нъ похвало́; ра́дуйся, я́ко блажа́тъ Тя́ вси́ ро́ди.

Ра́дуйся, Влады́чице, зна́меніе ми́лости Твоея́ на́мъ явля́ющая.

Конда́къ 2

Ви́дѣвъ озлобле́ніе Новагра́да, крѣ́пцѣ вою́емаго отъ во́евъ су́ждальскихъ, святи́тель Христо́въ Іоа́ннъ сле́зно моля́шеся о избавле́ніи и спасе́ніи гра́да, и услы́ша гла́съ свы́ше, да и́детъ во хра́мъ Преображе́нія Госпо́дня и, взе́мъ та́мо ико́ну Пресвяты́я Богоро́дицы, да изнесе́тъ ю́ на забра́ла гра́да про́тиву по́лчищъ, его́ вою́ющихъ. Таково́е велѣ́ніе Бо́жіе услы́шавъ, святи́тель благода́рственно возопи́ Спа́су Христу́: Аллилу́ія.

Икосъ 2

Разумѣ́въ во́лю Бо́жію во гла́сѣ небе́снѣмъ, святи́тель Христо́въ Іоа́ннъ пріи́де ко хра́му Преображе́нія Госпо́дня взя́ти ико́ну Богома́тере, и егда́ моля́шеся предъ не́ю, подви́жеся ико́на отъ мѣ́ста своего́ на ру́цѣ его́ честны́я, и то́й съ пѣ́ніемъ моле́бнымъ изнесе́ ю́ на забра́ла гра́да, глаго́ля наро́ду: дерза́йте, Ма́ти Бо́га на́шего съ на́ми е́сть. Сего́ ра́ди, ви́дѣвше Твое́ къ ни́мъ благоволе́ніе, въ прише́ствіи чуде́снѣмъ ико́ны Твоея́ явле́нное, въ пѣ́снехъ возглаша́емъ благохвале́нія сицева́я:

Ра́дуйся, Наде́жде христіа́нъ ненаде́жныхъ; ра́дуйся, скорбя́щихъ Ра́досте и Заступле́ніе. Ра́дуйся, безпо́мощнымъ ско́рую по́мощь Твою́ явля́ющая; ра́дуйся, утѣсня́емымъ осла́бу и свобо́ду да́рующая. Ра́дуйся, правосла́внымъ во́емъ Предводи́тельница къ побѣ́дамъ; ра́дуйся, ра́тей непрія́тельскихъ всекрѣ́пкое низложе́ніе. Ра́дуйся, Вели́кій Новгра́дъ благоволе́ніемъ Твои́мъ осѣни́вшая; ра́дуйся, на забра́ла его́, я́ко Взбра́нная Воево́да, во ико́нѣ Твое́й прише́дшая. Ра́дуйся, ненака́занныхъ ми́лостивая Наказа́тельнице; ра́дуйся, неразу́мныхъ прему́драя Вразуми́тельнице. Ра́дуйся, оби́дящихъ всегро́зная Устраши́тельнице; ра́дуйся, оби́димыхъ Всеблага́я Засту́пнице.

Ра́дуйся, Влады́чице, зна́меніе ми́лости Твоея́ на́мъ явля́ющая.

Конда́къ 3

Си́лою Бо́жіею укрѣпле́нъ, святи́тель Христо́въ Іоа́ннъ вознесе́ святу́ю ико́ну Твою́, Влады́чице Богоро́дице, посредѣ́ са́мыя бра́ни, идѣ́же стрѣ́лы отъ сопроти́вныхъ, я́ко до́ждь, па́даху, и еди́на отъ ни́хъ честны́й ли́къ Тво́й на ико́нѣ устрѣли́; а́біе же ико́на Твоя́ ли́къ сво́й отъ полко́въ вражде́бныхъ отврати́ и сле́зы отъ оче́съ источи́, и́хже собира́я въ фело́нь свою́, святи́тель Христо́въ Іоа́ннъ наро́домъ дерза́ти повелѣ́; они́ же, я́ко крѣ́пка нѣ́коего храни́теля иму́ще, на сопроти́вныя устреми́шася и до конца́ побѣди́ша тѣ́хъ, зову́ще Го́споду си́лъ: Аллилу́ія.

Икосъ 3

Имѣ́яше Тя́ вои́стину Вели́кій Новгра́дъ Вои́тельницу держа́вную, Богороди́тельнице Всеблага́я, егда́, па́че надѣ́янія, зна́меніемъ ико́ны Твоея́ святы́я побѣди́ти си́льныя полки́ сопроти́вныхъ лю́демъ Новагра́да помогла́ еси́. Тѣ́мже, пѣ́ніе побѣ́дное Тебѣ́ принося́ще, взыва́емъ си́це:

Ра́дуйся, умире́ніе мíру святы́мъ Рождество́мъ Твои́мъ прине́сшая; ра́дуйся, средостѣ́ніе вражды́ дре́внія разруши́вшая. Ра́дуйся, непра́ведно вражду́ющія наказу́ющая; ра́дуйся, зна́меньми и чудесы́ Твои́ми христолюби́выя лю́ди утѣша́ющая. Ра́дуйся, отъ стрѣлы́ вра́жія я́зву на лицы́ ико́ны Твоея́ пріе́мшая; ра́дуйся, сле́зы благода́тныя отъ нея́ ди́вно источи́вшая. Ра́дуйся, во́и сопроти́вныхъ слѣпото́ю и бѣ́гствомъ порази́вшая; ра́дуйся, полки́ крѣ́пкія безси́льны содѣ́лавшая. Ра́дуйся, во бра́нехъ крѣ́пкая Помо́щнице; ра́дуйся, враго́въ посрамле́ніе. Ра́дуйся, лю́ди Твоя́ ди́вною побѣ́дою увѣнча́вшая; ра́дуйся, Непобѣди́мая Воево́до вожде́й и во́инствъ христіа́нскихъ.

Ра́дуйся, Влады́чице, зна́меніе ми́лости Твоея́ на́мъ явля́ющая.

Конда́къ 4

Бу́ря недоумѣ́нія смуща́етъ ми́ у́мъ: ка́ко возмогу́ недосто́йными усты́ воспѣ́ти чудеса́ Твоя́, Богома́ти Влады́чице, я́же свято́ю ико́ною зна́менія Твоего́ въ Новѣгра́дѣ яви́ла еси́, дарова́въ ю́ въ по́мощь и заступле́ніе всѣ́мъ правосла́внымъ лю́демъ отъ вра́гъ ви́димыхъ и неви́димыхъ? Тѣ́мже, велича́юще неисче́тныя ми́лости Твоя́ къ на́мъ, смиренному́дреннѣ воспѣва́емъ просла́вльшему Тя́ Сы́ну Твоему́ и Бо́гу: Аллилу́ія.

Икосъ 4

Слы́шавше о ди́внѣмъ чудеси́ святы́я ико́ны Зна́менія Твоего́ въ Новѣгра́дѣ, Пречи́стая Дѣ́во, ка́ко лю́діе новогра́дстіи, иму́ще сію́, си́лою Твое́ю и посо́біемъ Боже́ственнаго зра́ка Твоего́ пресла́вное одолѣ́ніе на сопроти́вныя показа́ша, со благоговѣ́ніемъ и ра́достію покланя́емся сему́ чу́дному о́бразу Твоему́ и хвале́бнѣ зове́мъ Ти́:

Ра́дуйся, Невѣ́сто Отца́ Безнача́льнаго; ра́дуйся, неискусобра́чная Роди́тельнице Превѣ́чнаго Сло́ва. Ра́дуйся, селе́ніе прекра́сное Ду́ха Свята́го; ра́дуйся, Живонача́льныя и Единосу́щныя Тро́ицы благода́тію осѣне́нная. Ра́дуйся, дре́вле проро́ки многообра́знѣ предрѣче́нная; ра́дуйся, а́нгельскія собо́ры чистото́ю Твое́ю превозше́дшая. Ра́дуйся, человѣ́ческаго ро́да возвыше́ніе; ра́дуйся, па́дшихъ сыно́въ Ада́млихъ благода́тное возста́ніе. Ра́дуйся, я́ко изъ Тебе́ въ пло́ть облече́ся Одѣва́яй не́бо о́блаки; ра́дуйся, я́ко млеко́мъ Твои́мъ пита́ла еси́ Пита́теля вселе́нныя. Ра́дуйся, Всеблагослове́нная Богоро́дице, Чи́стая Приснодѣ́во; ра́дуйся, Ра́досте на́ша и спасе́ніе ду́шъ на́шихъ. Ра́дуйся, Засту́пнице на́ша, отъ Бо́га на́мъ дарова́нная; ра́дуйся, всѣ́хъ вѣ́рныхъ огражде́ніе и свяще́нное прибѣ́жище.

Ра́дуйся, Влады́чице, зна́меніе ми́лости Твоея́ на́мъ явля́ющая.

Конда́къ 5

Богосвѣ́тлая звѣзда́ - ико́на Зна́менія Твоего́, Богоро́дице Дѣ́во, Вели́кій Новгра́дъ сія́ніемъ мно́гихъ чуде́съ духо́вно просвѣти́, неоску́дно источа́ющи благода́тныя исцѣле́нія всѣ́мъ вѣ́рнымъ, со усе́рдіемъ къ не́й притека́ющимъ. Не лиши́ и на́съ благода́тнаго Твоего́ озаре́нія и ми́лосердныхъ щедро́тъ Твои́хъ, боголѣ́пнымъ поклоне́ніемъ че́ствующихъ чудотво́рную ико́ну Твою́, да благода́рственно воспѣва́емъ Бо́гу: Аллилу́ія.

Икосъ 5

Ви́дѣвше чудеса́ пресла́вная, отъ ико́ны зна́менія Твоего́ бы́вшая, Влады́чице Преблага́я, лю́діе Новагра́да со усе́рдіемъ къ не́й притека́ху и въ неду́зѣхъ свои́хъ исцѣле́нія благода́тная отъ нея́ пріе́мляху. Къ не́йже ны́нѣ приходя́ще, покланя́емся, и че́ствуемъ, и отъ жела́нія се́рдца цѣлу́емъ, исцѣле́ній благода́ть почерпа́юще, и неду́гъ тѣле́сныхъ, и душе́вныхъ страсте́й свобожда́емся, зову́ще Ти́ и глаго́люще:

Ра́дуйся, скорбя́щихъ Ра́досте и оби́димыхъ Засту́пнице; ра́дуйся, печа́льныхъ Утѣше́ніе и бѣ́дствующихъ Помо́щнице. Ра́дуйся, боля́щихъ немздопріи́мная Цѣли́тельнице; ра́дуйся, ни́щихъ и убо́гихъ некра́домое бога́тство. Ра́дуйся, терпѣли́выхъ страда́льцевъ да́рами благода́тными ущедря́ющая; ра́дуйся, отча́янныхъ и безнаде́жныхъ отъ ро́ва поги́бели избавля́ющая. Ра́дуйся, вдови́цъ и си́рыхъ благосе́рдая Попечи́тельнице; ра́дуйся, цѣлому́дрія и воздержа́нія ю́ныхъ Наста́внице. Ра́дуйся, ста́рцевъ благоговѣ́йныхъ сла́дкое Успокое́ніе; ра́дуйся, ста́рицъ боголюби́выхъ ти́хое Прибѣ́жище. Ра́дуйся, ка́ющихся грѣ́шниковъ вѣ́рная Спору́чнице; ра́дуйся, даро́въ духо́вныхъ ще́драя Пода́тельнице.

Ра́дуйся, Влады́чице, зна́меніе ми́лости Твоея́ на́мъ явля́ющая.

Конда́къ 6

Проповѣ́дуетъ Новгра́дъ пресла́вное заступле́ніе Твое́, Пречи́стая Влады́чице, ка́ко во дни́ наше́ствія враго́въ си́льныхъ и вооруже́нныхъ отъ святы́я ико́ны Зна́менія Твоего́ по́мощь Твою́ благода́тную лю́демъ Твои́мъ дарова́ла еси́, вражде́бныя полки́ со студо́мъ вспя́ть обрати́ла еси́, гра́дъ же Тво́й цѣ́лъ и невреди́мь отъ ни́хъ сохра́ньши, да вси́ пою́тъ Спаси́телю Бо́гу: Аллилу́ія.

Икосъ 6

Возсія́ла еси́ луча́ми вели́кихъ чуде́съ въ Новѣгра́дѣ, Богоро́дице Дѣ́во, и ико́ну Зна́менія Твоего́ благода́тнымъ истече́ніемъ сле́зъ ди́вно просла́вила еси́, неизче́тныя ми́лости отъ нея́ ще́дро подава́ющи всѣ́мъ скорбя́щимъ и обремене́ннымъ. Посѣти́ у́бо и ду́ши на́ша, неду́гующія страстьми́ грѣхо́вными, Госпоже́ Всеблага́я, и бу́ди на́мъ Помо́щница во спасе́ніе, да благода́рственно Тебѣ́ зове́мъ:

Ра́дуйся, Моли́твеннице благопрія́тная за на́съ къ Бо́гу; ра́дуйся, Предста́тельнице всемо́щная, гнѣ́въ Бо́жій на ми́лость прелага́ющая. Ра́дуйся, ру́цѣ Твои́ богоно́снѣ на умоле́ніе ко Творцу́ вы́ну простира́ющая; ра́дуйся, я́ко Ма́ти Сы́на, Судію́ Пра́веднаго, о все́мъ мíрѣ умоля́ющая. Ра́дуйся, покро́вомъ ма́терняго Твоего́ заступле́нія всѣ́хъ на́съ покрыва́ющая; ра́дуйся, су́щихъ въ бѣда́хъ и ско́рбехъ благода́тію смире́нія и терпѣ́нія снабдѣва́ющая. Ра́дуйся, стра́ждущія и безпо́мощныя неви́димо укрѣпля́ющая; ра́дуйся, боля́щія и безнаде́жныя отъ одра́ болѣ́зни возставля́ющая. Ра́дуйся, вѣ́рою моля́щимся Тебѣ́ вели́кія ми́лости явля́ющая; ра́дуйся, во благи́хъ проше́нія на́ша ди́вно исполня́ющая. Ра́дуйся, струи́ благода́тныхъ исцѣле́ній оби́льно на́мъ источа́ющая; ра́дуйся, всѣ́мъ вся́ поле́зная да́рующая.

Ра́дуйся, Влады́чице, зна́меніе ми́лости Твоея́ на́мъ явля́ющая.

Конда́къ 7

Хотя́щи яви́ти, Влады́чице, не то́кмо Вели́кому Новугра́ду, но и всему́ правосла́вному Россíйскому жи́тельству пресла́вная чудеса́ Твоя́ отъ ико́ны Зна́менія Твоего́, сію́ во мно́гихъ градѣ́хъ, оби́телехъ и ве́сехъ отъ лѣ́тъ дре́внихъ до днíй на́шихъ ди́вными чудесы́ просла́вила еси́, слѣпы́мъ прозрѣ́ніе, разсла́бленнымъ укрѣпле́ніе и мно́гимъ боля́щимъ исцѣле́ніе ми́лостивно отъ нея́ да́рующи и си́мъ подвиза́ющи лю́ди велича́ти Тя́, возвели́чившую ро́дъ на́шъ, и пѣ́ти Христу́ Бо́гу: Аллилу́ія.

Икосъ 7

Новгра́дъ и всю́ зе́млю Россíйскую ди́вная ико́на Зна́менія Твоего́, Богоро́дице Дѣ́во, чудесы́ благода́тными осія́, ми́лости Твоя́ бога́тыя вѣ́рнымъ прояви́вши. Сію́ у́бо боголѣ́пнымъ поклоне́ніемъ че́ствующе, хвале́бнѣ Тебѣ́, Влады́чице, взыва́емъ:

Ра́дуйся, скоропредста́тельная Помо́щнице усе́рдно къ Тебѣ́ притека́ющихъ; ра́дуйся, благосе́рдая Услы́шательнице моле́ній на́шихъ. Ра́дуйся, Вели́кій Новгра́дъ благослове́ніемъ Твои́мъ осѣни́вшая; ра́дуйся, въ предѣ́лѣхъ его́ ико́ну зна́менія Твоего́ чудесы́ просла́вльшая. Ра́дуйся, дѣ́въ ликостоя́нія прославле́ніемъ ико́ны Твоея́ духо́вно возвесели́вшая; [ра́дуйся, всеси́льными Твои́ми къ Бо́гу моли́твами и на́съ ко блаже́нству ра́йскому возводя́щая]. Ра́дуйся, и вся́ страны́ Правосла́вныя покро́вомъ ми́лости Твоея́ осѣня́ющая; ра́дуйся, мно́гихъ мѣ́стъ и оби́телей сокро́вище исцѣле́ній неоску́дное. Ра́дуйся, и́ноковъ и и́нокинь благоподвиза́ющихся всемо́щная Покрови́тельнице; ра́дуйся, и въ мíрѣ благоче́стно живу́щихъ усе́рдная Засту́пнице. Ра́дуйся, веду́щимъ бра́нь проти́ву мíра, пло́ти и діа́вола до́брая Споспѣ́шнице; ра́дуйся, за всѣ́хъ на́съ ми́лостивая къ Сы́ну Твоему́ и Бо́гу Хода́таице.

Ра́дуйся, Влады́чице, зна́меніе ми́лости Твоея́ на́мъ явля́ющая.

Конда́къ 8

Стра́нствующе въ юдо́ли се́й земнѣ́й, многоско́рбнѣй и многомяте́жнѣй, го́рняго гра́да, Іерусали́ма небе́снаго взыску́емъ, и Тебе́, Влады́чице, мо́лимъ: путево́дствуй на́мъ по стези́ за́повѣдій Христо́выхъ и сохрани́ на́съ отъ паде́ній грѣхо́вныхъ, удиви́ на на́съ ми́лость Твою́ и осѣни́ на́съ Твои́мъ заступле́ніемъ, да, Твое́ю по́мощію спаса́еми, сподо́бимся ку́пно со всѣ́ми святы́ми воспѣва́ти Бо́гу: Аллилу́ія.

Икосъ 8

Всѣ́хъ скорбя́щихъ Утѣ́шительнице и бѣ́дствующихъ Помо́щнице, Всеблага́я Богороди́тельнице, не пре́зри на́съ, припа́дающихъ къ Тебѣ́ предъ пречи́стымъ о́бразомъ Твои́мъ, но посѣти́ на́съ ми́лостивно щедро́тами Твои́ми: и, я́коже дре́вле отце́мъ на́шимъ по́мощь Твою́ держа́вную яви́ла еси́, та́ко и на́съ, смире́нныхъ, не лиши́ Твоего́ заступле́нія во вре́мя благопотре́бно, да не постыди́мся во упова́ніи на́шемъ, е́же по Бо́зѣ крѣ́пко на Тя́ возлага́емъ, и зове́мъ Ти́:

Ра́дуйся, богосвѣ́тлая свѣще́, свѣ́томъ Христо́вымъ озаря́ющая вѣ́рныя ду́ши; ра́дуйся, многоцѣ́нный алава́стръ, мѵ́ромъ Бо́жія благода́ти умаща́яй боголюби́выя сердца́. Ра́дуйся, у́мнаго Со́лнца Ма́ти, вѣ́рныя просвѣща́ющаго, невѣ́рныя же помрача́ющаго; ра́дуйся, сла́во небе́сныхъ и упова́ніе земны́хъ. Ра́дуйся, Наде́жде на́ша и Засту́пнице всѣ́хъ притека́ющихъ къ Тебѣ́ съ вѣ́рою; ра́дуйся, лю́бящія и чту́щія Тя́ отъ вся́кихъ бѣ́дъ избавля́ющая. Ра́дуйся, обѣтова́ніи благи́ми ду́ши вѣ́рныхъ благода́тно веселя́щая; ра́дуйся, дѣ́вственныхъ ли́ковъ сла́во и похвало́. Ра́дуйся, подви́жниковъ благоче́стія къ го́рнему Сіо́ну путево́дствующая; ра́дуйся, вѣ́рныхъ къ небе́сному Іерусали́му приводя́щая. Ра́дуйся, омраче́нныя сердца́ свѣ́томъ и́стиннаго боговѣ́дѣнія просвѣща́ющая; ра́дуйся, и всѣ́хъ на́съ благода́тными луча́ми вели́кія Своея́ ми́лости покрыва́ющая.

Ра́дуйся, Влады́чице, зна́меніе ми́лости Твоея́ на́мъ явля́ющая.

Конда́къ 9

Вси́ а́нгельскія во́инства благоговѣ́йно Тебѣ́ слу́жатъ, небесе́ и земли́ Цари́це, человѣ́ческій же ро́дъ немо́лчныя хвалы́ Тебѣ́ прино́ситъ, го́рнихъ и до́льныхъ Влады́чице, и Твою́ святу́ю ико́ну поклоне́ніемъ досточе́стнымъ почита́етъ. Сію́ бо во отра́ду и утѣше́ніе на́мъ дарова́ла еси́, Всеблага́я, и зна́менія ма́тернія любве́ Твоея́ о́ною на́мъ при́сно явля́еши, да пое́мъ Тобо́ю благодѣ́ющему на́мъ Бо́гу: Аллилу́ія.

Икосъ 9

Вѣтíи суему́дренніи человѣ́честіи не мо́гутъ пости́гнути Боже́ственную та́йну приснодѣ́вства Твоего́, Марíе Богоро́дице, ка́ко въ рождествѣ́ и по рождествѣ́ ключи́ дѣ́вства Твоего́ цѣ́лы сохрани́ла еси́, а́нгеловъ и человѣ́ковъ удиви́вши. Тѣ́мже Тя́ благоче́стно Ма́терь и Дѣ́ву исповѣ́дующе, при́сно Тя́ ублажа́емъ и хвале́бно Тебѣ́ воспѣва́емъ:

Ра́дуйся, возвели́чившая ро́дъ человѣ́ческъ непоро́чною Твое́ю чистото́ю; ра́дуйся, освяти́вшая зе́млю Всесвяты́мъ Твои́мъ рождество́мъ. Ра́дуйся, дѣ́вство и рождество́ въ Себѣ́ ди́вно сочета́вшая; ра́дуйся, во обою́ непоро́чно Себе́ сохра́ньшая. Ра́дуйся, ве́ліе вселе́нныя чу́до; ра́дуйся, непостижи́мая человѣ́ческими умы́ та́йно. Ра́дуйся, а́нгельскихъ ли́ковъ удивле́ніе; ра́дуйся, святы́хъ Бо́жіихъ уго́дниковъ при́сное ра́дованіе. Ра́дуйся, мíра го́рняго пе́рвѣйшее украше́ніе; ра́дуйся, мíра до́льняго благонаде́жное заступле́ніе. Ра́дуйся, де́моновъ низложе́ніе; ра́дуйся, а́да попра́ніе.

Ра́дуйся, Влады́чице, зна́меніе ми́лости Твоея́ на́мъ явля́ющая.

Конда́къ 10

Спаси́теля па́дшему человѣ́честву родила́ еси́, Пречи́стая Дѣ́во, и Сего́, я́ко Младе́нца, во объя́тіихъ Твои́хъ носи́ла еси́, Его́же боже́ственное изображе́ніе и на ико́нѣ Зна́менія Твоего́ на́мъ явля́еши, и мно́гія ми́лости и щедро́ты Твоя́ на́мъ да́руеши. Сего́ ра́ди со благоговѣ́ніемъ и вѣ́рою че́ствуемъ о́бразъ чудотво́рный Тво́й, Влады́чице, и мо́лимся Тебѣ́ приле́жно: бу́ди на́мъ покро́въ и защи́та въ де́нь Су́дный, да Твои́мъ ма́тернимъ предста́тельствомъ поми́луетъ на́съ Судія́ Пра́ведный, Сы́нъ Тво́й и Бо́гъ, и сподо́битъ на́съ десна́го стоя́нія и пѣ́нія Ему́ со избра́нными: Аллилу́ія.

Икосъ 10

Стѣна́ необори́мая и исто́чникъ чуде́съ ико́на Твоя́ свята́я яви́ся, Богоро́дице Дѣ́во, не то́кмо Вели́кому Новугра́ду, но и все́й странѣ́ Россíйстѣй. Сію́, я́ко зна́меніе побѣ́дное, иму́ще, во́инства правосла́вныя враго́въ побѣжда́ютъ, ца́ріе и святи́теліе е́ю благоукраша́ются, и вся́къ возра́стъ вѣ́рныхъ утѣше́ніе благода́тное отъ нея́ пріе́млетъ. Утѣ́ши и на́съ Твои́мъ, Всеми́лостивая Влады́чице, благоволе́ніемъ и ми́лостію, да хвале́бно взыва́емъ къ Тебѣ́:

Ра́дуйся, крѣ́пкое на́ше Упова́ніе; ра́дуйся, несумнѣ́нная на́ша Наде́жде. Ра́дуйся, Вели́каго Новагра́да многопѣ́тая сла́во; ра́дуйся, ца́рства Правосла́вно-Россíйскаго благода́тное огражде́ніе. Ра́дуйся, во дни́ бра́ни побѣди́тельная на враги́ Помо́щнице; ра́дуйся, во дни́ ми́ра ко благоче́стію до́брая Наста́внице. Ра́дуйся, и́ноческихъ оби́телей покро́въ и снабдѣ́ніе; ра́дуйся, благочести́выхъ домо́въ и супру́жествъ благослове́ніе. Ра́дуйся, дѣ́вства и чистоты́ Побо́рнице; ра́дуйся, оби́димыхъ и гони́мыхъ Предста́тельнице. Ра́дуйся, наги́хъ одѣя́ніе; ра́дуйся, боля́щихъ исцѣле́ніе.

Ра́дуйся, Влады́чице, зна́меніе ми́лости Твоея́ на́мъ явля́ющая.

Конда́къ 11

Пѣ́ніе на́ше смире́нное не пре́зри, всеми́лостивая Цари́це, и утро́бу щедро́тъ Твои́хъ не затвори́ на́мъ, всеще́драя Влады́чице: се́ бо, обнища́вше въ до́брыхъ дѣ́лѣхъ, къ сокро́вищницѣ ми́лости Твоея́, чудотво́рнѣй ико́нѣ Твое́й, со усе́рдіемъ притека́емъ, Всеблага́я, и припа́дающе, мо́лимся: озари́ на́съ свѣ́томъ Боже́ственныя благода́ти Твоея́ и научи́ на́съ вѣ́рно исполня́ти за́повѣди Сы́на Твоего́ и Бо́га, да досто́йно возмо́жемъ пѣ́ти Ему́: Аллилу́ія.

Икосъ 11

Свѣ́та невече́рняго прія́телище, свѣ́тлыми луча́ми чуде́съ Твои́хъ просвѣща́еши на́съ, помраче́нныхъ грѣхо́вною мгло́ю, Богороди́тельнице Пречи́стая, и приво́диши къ немо́лчному славосло́вію Твоего́ пресвята́го и́мене. Зна́меніемъ ико́ны Твоея́ святы́я вои́стину яви́ла еси́ воево́дство Твое́ держа́вное, Госпоже́ Всеблага́я, его́же свѣ́тло пра́зднующе, ра́достно зове́мъ Ти́:

Ра́дуйся, возвели́ченная Бо́гомъ па́че земны́хъ и небе́сныхъ; ра́дуйся, еди́на Чи́стая и Благослове́нная въ жена́хъ. Ра́дуйся, Цари́це и Влады́чице небесе́ и земли́; ра́дуйся, порфи́ро Царя́ царе́й. Ра́дуйся, черто́же безсѣ́меннаго уневѣ́щенія; ра́дуйся, глави́зно спасе́нія человѣ́ческаго. Ра́дуйся, упова́ющія на Тя́ несрамля́ющая; ра́дуйся, прося́щія Твоея́ святы́я по́мощи отъ бѣ́дъ избавля́ющая. Ра́дуйся, сто́лпе и утвержде́ніе дѣ́вства; ра́дуйся, щи́те и огражде́ніе вѣ́ры Правосла́вныя. Ра́дуйся, боголѣ́пное украше́ніе святы́я Христо́вы Це́ркве; ра́дуйся, покрыва́ющая всѣ́хъ на́съ ма́тернимъ Твои́мъ покро́вомъ.

Ра́дуйся, Влады́чице, зна́меніе ми́лости Твоея́ на́мъ явля́ющая.

Конда́къ 12

Благода́ть и ми́лость свы́ше пода́ждь на́мъ, Влады́чице, отъ ико́ны Твоея́ святы́я, ю́же въ зна́меніе заступле́нія Твоего́ на́мъ дарова́ла еси́, чудесы́, отъ нея́ быва́ющими, Правосла́вную вѣ́ру въ на́съ утвержда́ющи, невѣ́ріе же посрамля́ющи. Тѣ́мже покланя́емся Тебѣ́ и мо́лимся: въ Правосла́віи соблюди́ на́съ, Всеблага́я, и сподо́би до издыха́нія коне́чнаго на́шего вѣ́рно пѣ́ти Бо́гу: Аллилу́ія.

Икосъ 12

Пою́ще чудеса́ Твоя́, отъ ико́ны Зна́менія Твоего́ явле́нная, Богоро́дице Дѣ́во, хва́лимъ, сла́вимъ и велича́емъ Тя́, честнѣ́йшую вои́стину херуви́мъ и сла́внѣйшую безъ сравне́нія серафи́мъ. Ты́ же, Всеблага́я Засту́пнице на́ша, покры́й на́съ держа́внымъ Твои́мъ покро́вомъ и изба́ви на́съ отъ вся́кихъ бѣ́дъ и искуше́ній вра́жіихъ, да воспѣва́емъ Тебѣ́ непреста́нно гла́сомъ хвале́нія:

Ра́дуйся, богообра́дованная и непоро́чная Приснодѣ́во; ра́дуйся, нетлѣ́нная и неискусобра́чная Агнца и Па́стыря Ма́ти. Ра́дуйся, увѣнча́нная діади́мою ца́рскою отъ Тріеди́наго Бо́га; ра́дуйся, святолѣ́пная и свѣтоно́сная пала́то святы́хъ Святѣ́йшаго Сло́ва. Ра́дуйся, одесну́ю стоя́щая Сы́на Твоего́ и Го́спода; ра́дуйся, всегда́ моля́щаяся Ему́ за ро́дъ христіа́нскій. Ра́дуйся, Вино́внице благода́тнаго человѣ́ковъ обновле́нія; ра́дуйся, ка́ющихся грѣ́шныхъ къ Бо́гу примире́ніе. Ра́дуйся, стра́ждущихъ отъ бѣ́дъ избавле́ніе; ра́дуйся, Взыска́ніе поги́бшихъ. Ра́дуйся, тѣле́съ на́шихъ врачева́ніе; ра́дуйся, ду́шъ на́шихъ спасе́ніе.

Ра́дуйся, Влады́чице, зна́меніе ми́лости Твоея́ на́мъ явля́ющая.

Конда́къ 13

О, Всепѣ́тая Ма́ти Сладча́йшаго Спаси́теля на́шего, Го́спода Іису́са Христа́! Ны́нѣшнее на́ше пріе́мши приноше́ніе, отъ вся́кія изба́ви на́съ напа́сти и ско́рби, и вѣ́чныя изми́ му́ки всѣ́хъ предъ свято́ю ико́ною Твое́ю съ вѣ́рою и любо́вію покланя́ющихся и о Тебѣ́ благода́рно зову́щихъ Бо́гу: Аллилу́ія.

Се́й конда́къ глаго́лется три́жды. Та́же Икосъ 1-й и Конда́къ 1-й

Моли́тва Пресвятѣ́й Богоро́дицѣ, честно́му Ея́ Зна́менію, е́же въ Вели́цѣмъ Новѣгра́дѣ

О, Пресвята́я и Преблагослове́нная Ма́ти Сладча́йшаго Го́спода на́шего Іису́са Христа́! Припа́даемъ и покланя́емся Тебѣ́ предъ свято́ю чудотво́рною ико́ною Твое́ю, воспомина́юще ди́вное зна́меніе Твоего́ заступле́нія, Вели́кому Новугра́ду отъ нея́ явле́нное во дни́ ра́тнаго на се́й гра́дъ наше́ствія. Смире́нно мо́лимъ Тя́, всеси́льная ро́да на́шего Засту́пнице: я́коже дре́вле отце́мъ на́шимъ на по́мощь тогда́ ускори́ла еси́, та́ко и ны́нѣ на́съ, немощны́хъ и грѣ́шныхъ, сподо́би Твоего́ ма́терняго заступле́нія и благопопече́нія. Спаси́ и сохрани́, Влады́чице, подъ кро́вомъ ми́лости Твоея́ Благочести́вѣйшаго Госуда́ря на́шего Импера́тора [и́мярекъ] всея́ Россíи, все́ христолюби́вое Его́ во́инство, Це́рковь святу́ю, гра́дъ Тво́й, [оби́тель Твою́], всю́ страну́ на́шу правосла́вную и всѣ́хъ на́съ, припа́дающихъ къ Тебѣ́ съ вѣ́рою и любо́вію умиле́нно прося́щихъ со слеза́ми Твоего́ заступле́нія. Ей, Госпоже́ Всеми́лостивая! Умилосе́рдися на ны́, обурева́емыя грѣсьми́ мно́гими, простри́ ко Христу́ Го́споду богопріе́мныя ру́цѣ Твоя́ и предста́тельствуй за на́съ предъ бла́гостію Его́, прося́щи на́мъ проще́нія прегрѣше́ній на́шихъ, благоче́стнаго ми́рнаго житія́, благíя христіа́нскія кончи́ны и до́браго отвѣ́та на стра́шнѣмъ судѣ́ Его́, да, спаса́еми всеси́льными Твои́ми къ Нему́ моли́твами, блаже́нство ра́йское унаслѣ́дуемъ и со всѣ́ми святы́ми воспое́мъ пречестно́е и великолѣ́пое и́мя достопокланя́емыя Тро́ицы, Отца́ и Сы́на и Свята́го Ду́ха, и Твое́ ве́ліе къ на́мъ милосе́рдіе во вѣ́ки вѣко́въ. Ами́нь.

Тропа́рь, гла́съ 4

Яко необори́мую стѣ́ну и исто́чникъ чуде́съ стяжа́вше Тя́ раби́ Твои́, Богоро́дице Пречи́стая, сопроти́вныхъ ополче́нія низлага́емъ. Тѣ́мже мо́лимъ Тя́: ми́ръ гра́ду Твоему́ да́руй и душа́мъ на́шимъ ве́лію ми́лость.

Конда́къ, гла́съ 4

Честна́го о́браза Твоего́ зна́меніе пра́зднующе лю́діе Твои́, Богороди́тельнице, и́мже ди́вную побѣ́ду на сопроти́вныхъ гра́ду Твоему́ дарова́ла еси́. Тѣ́мже Тебѣ́ вѣ́рою взыва́емъ: ра́дуйся, Дѣ́во, христіа́нъ похвало́.

Велича́ніе

Велича́емъ Тя́, Пресвята́я Дѣ́во, богоизбра́нная Отрокови́це, и чте́мъ о́бразъ Тво́й святы́й, и́мже ди́вную побѣ́ду на сопроти́вныя гра́ду Твоему́ дарова́ла еси́.