Кон­да́къ 1

Взбра́н­нѣй Во­е­во́­дѣ по­бѣ­ди́­тель­ная, я́ко из­ба́вль­ше­ся отъ вѣ́ч­ныя сме́р­ти бла­го­да́тію отъ Тебе́ ро́жд­ша­го­ся Хри­ста́ Бо́га на́­ше­го, и Тво­и́мъ Ма́­тер­нимъ предъ Ни́мъ хо­да́­тай­ствомъ, бла­го­да́р­ствен­ная во­с­пи­су́­емъ Ти́, раби́ Твои́: я́ко иму́­щая дер­жа́ву не­по­бѣ­ди́мую, отъ вся́кихъ на́съ бѣ́дъ и ско́рб­ныхъ обстоя́ній сво­бо­ди́, зо­ву́­щихъ:

Ра́дуй­ся, Бла­го­да́т­ная Бо­го­ро́­ди­це Дѣ́во, всѣ́хъ скорбя́щихъ Ра́­до­сте.

Икосъ 1

Ангелъ пред­ста́­тель по́­сланъ бы́сть съ не­бе­се́ рещи́ Бо­го­ро́­ди­це, - "ра́дуй­ся!", - воз­вѣ­ща́я Бо­же́­ствен­нымъ во­пло­ще́ніемъ Хри­сто́­вымъ хотя́щую ро­ди́­ти­ся отъ Нея́ ра́­дость все­му́ мíру, въ ско́р­би по­ги­ба́­ю­щу. Тѣ́м­же и мы́, грѣх­ми́ обре­ме­не́н­ніи, на­де́жду спа­се́нія въ Тебѣ́ улу­чи́в­ше, уми́ль­но взы­ва́­емъ Ти́:

Ра́дуй­ся, Бо́жіе ко грѣ́ш­нымъ бла­го­во­ле́ніе; ра́дуй­ся, ка́­ю­щих­ся предъ Го́­спо­демъ Бо́­гомъ крѣ́п­кое за­ступле́ніе. Ра́дуй­ся, па́д­ша­го Ада́­ма воз­зва́ніе; ра́дуй­ся, сле́зъ Еви­ныхъ из­ба­вле́ніе. Ра́дуй­ся, грѣ­хо́в­ную отъе́м­лю­щая скве́р­ну; ра́дуй­ся, ба́не, омы­ва́­ю­щая со́­вѣсть. Ра́дуй­ся, ро́жд­шая Из­ба́­ви­теля, без­за­ко́нія на́ша ту́не очи­ща́­ю­ща­го; ра́дуй­ся, все­чу́д­ное всѣ́хъ къ Бо́гу при­ми­ре́ніе. Ра́дуй­ся, мо́­сте, во­и́­стин­ну пре­во­дя́й на́съ отъ сме́р­ти къ жи­во­ту́; ра́дуй­ся, ми́ръ отъ по­то́­па грѣ­хо́в­на­го спа́с­шая. Ра́дуй­ся, лѣ́­стви­це не­бе́с­ная, е́юже Го­спо́дь къ на́мъ сни́­де; ра́дуй­ся, вина́ всѣ́хъ обо­же́нія.

Ра́дуй­ся, Бла­го­да́т­ная Бо­го­ро́­ди­це Дѣ́во, всѣ́хъ скорбя́щихъ Ра́­до­сте.

Кон­да́къ 2

Ви́дяще то́ки чу­де́съ, из­ли­ва́­е­мыя отъ святы́я Твоея́ ико́­ны, бла­га́я Бо­го­ро­ди́­тель­ни­це, я́ко Ты́ еси́ моля́щихся бла­га́я по­мо́щ­ни­ца, оби́­ди­мыхъ за­сту́п­ни­ца, не­на­дѣ́­ю­щих­ся на­де́­жда, пе­ча́ль­ныхъ утѣ­ше́ніе, а́лчу­щихъ кор­ми́­тель­ни­ца, на­ги́хъ одѣя́ніе, дѣ́в­ствен­ныхъ цѣ­ло­му́­дріе, стра́н­ныхъ на­ста́в­ни­ца, тру­жда́­ю­щих­ся по́­мощь, слѣ­пы́хъ про­зрѣ́­ніе, глу­хи́хъ бла­го­слы́­ша­ніе, боль­ны́хъ ис­цѣ­ле́ніе, бла­го­да́р­ствен­нѣ во­піе́мъ о Тебѣ́ Бо́гу: Алли­лу́ія.

Икосъ 2

Ра́зумъ не­до­разу­мѣ́н­ный находя́щихъ на ны́ лю́­тыхъ скор­бе́й разу­мѣ́­ти ища́, къ Тебѣ́ при­бѣ­га́­емъ, о Ма́ти и Дѣ́во, утѣ­ше́нія тре́буя. Ты́ же, яко Бла­га́я, нау­чи́ ны разу­мѣ́­ти въ ни́хъ Бла­га́­го Сы́на Тво­е­го́ ми­ло­се́р­дое про­мыш­ле́ніе во спа­се́ніе ду́шъ на́­шихъ и очи­ще́ніе мно́­гихъ со­грѣ­ше́ній, да взы­ва́­емъ Ти́ ра́­дост­но:

Ра́дуй­ся, обу­ре­ва́­е­мыхъ ти́­хое при­ста́­ни­ще; ра́дуй­ся, сумня́щихся извѣ́ст­ное утвер­жде́ніе. Ра́дуй­ся, еди́­на Ма́ти ми­ло­се́р­дія; ра́дуй­ся, ско́­рая по­мо́щ­ни­це су́­щимъ въ бѣ­да́хъ и на­па́­стехъ. Ра́дуй­ся, скорбь­ми́ грѣ­хи́ на́ша очи­ща́­ю­щая; ра́дуй­ся, пе­ча́лію на́ша не́­мо­щи ду­ше́в­ныя вра­чу́­ю­щая. Ра́дуй­ся, су́­ет­ныя ра́­до­сти мíра сего́ пре­зи­ра́­ти на́съ нау­ча́­ю­щая; ра́дуй­ся, отъ мíра къ премíрнымъ у́мъ на́шъ воз­во­дя́щая. Ра́дуй­ся, отъ люб­ве́ зем­ны́я къ не­бе́с­нѣй Бо́жіей люб­ви́ на́съ при­вле­ка́­ю­щая; ра́дуй­ся, въ са́­мыхъ стра­да́ніихъ на́­шихъ утѣ­ше́ніе и бла­го­да́т­ную жи́знь на́мъ по­да­ю́­щая. Ра́дуй­ся, обѣ­то­ва́ніе бла́гъ вѣ́ч­ныхъ; ра́дуй­ся, хо­да́­та­и­це вѣ́ч­ныя ра́­до­сти.

Ра́дуй­ся, Бла­го­да́т­ная Бо­го­ро́­ди­це Дѣ́во, всѣ́хъ скорбя́щихъ Ра́­до­сте.

Кон­да́къ 3

Си́лою свы́­ше укрѣ­пи́ мя, бла­га́я Вла­ды́­чи­це, не­ду́гую­ща тѣ́­ломъ и ду­ше́ю, и по­сѣ­ще́нія Тво­е­го́ спо­до́­би и про­мыш­ле́нія, мра́къ уны́­нія и ско́р­би, обле­жа́­щій мя́, отгоня́я, да спа­са́­е­мый То­бо́ю, вы́ну во­пію́ Бо́гу: Алли­лу́ія.

Икосъ 3

Иму́щи бо­га́т­ство ми­ло­се́р­дія не­из­ре­че́н­ное, всѣ́мъ скорбя́щимъ ру́ку по́­мо­щи про­сти­ра́­е­ши, не­ду́­ги вра­чу́­ю­щи, стра́­сти исцѣля́ющи. Не пре́­зри и мене́, бла­га́я Вла­ды́­чи­це, на одрѣ́ не́­мо­щи моея́ низ­ле­жа́­ща и во­пі­ю́­ща Ти́:

Ра́дуй­ся, ми́­ло­сти со­кро́­ви­ще мно­го­цѣ́н­ное; ра́дуй­ся, отча́янныхъ еди́­на на­де́­ждо. Ра́дуй­ся, тѣ́ла мо­е­го́ вра­че­ва́­ніе; ра́дуй­ся, души́ моея́ спа­се́ніе. Ра́дуй­ся, тве́р­дая крѣ́­по­сте не­мощ­ны́хъ; ра́дуй­ся, из­не­мо­га́­ю­щихъ за­сту́п­ни­це и укрѣп­ле́ніе. Ра́дуй­ся, гнѣ́въ Бо́жій Тво­и́мъ мо­ле́ніемъ ско́­ро утоля́ющая; ра́дуй­ся, стра́­сти на́ша си́­лою мо­ли́твъ Тво­и́хъ укро­ща́­ю­щая. Ра́дуй­ся, слѣ­пы́хъ зрѣ́­ніе, глу­хи́хъ слы́­ша­ніе; ра́дуй­ся, хро­мы́хъ хо­жде́ніе, не­мы́хъ гла­го́­ла­ніе. Ра́дуй­ся, боля́щихъ бла­го­на­де́ж­ное по­сѣ­ще́ніе; ра́дуй­ся, я́ко То­бо́ю по мѣ́рѣ вѣ́ры по­да­ю́т­ся бла­го­да́т­ная ис­цѣ­ле́нія всѣ́мъ не­мощ­ству́­ю­щимъ.

Ра́дуй­ся, Бла­го­да́т­ная Бо­го­ро́­ди­це Дѣ́во, всѣ́хъ скорбя́щихъ Ра́­до­сте.

Кон­да́къ 4

Бу́ря мно́­гихъ бѣ́дъ и на­па́­стей об­дер­жи́тъ мя́, и вол­не́нія не кто­му́ терп­лю́. Ты́ же, я́ко ми́­ло­сти­вая Ма́ти Спа́­са мо­е­го́ и Бо́га, воз­дви́г­ни ру́цѣ къ Сы́ну Тво­е­му́, моля́щи Его́, да при́­зритъ на лю́тую ско́рбь се́рд­ца мо­е­го́ и воз­дви́г­нетъ мя́ изъ пу­чи́­ны отча́янія, во­пі­ю́­ща­го Ему́: Алли­лу́ія.

Икосъ 4

Слы́­ша­щи, Пресвята́я Дѣ́во и Ма́ти, Си­ме­о́­на пра́­вед­на­го про­ре­че́ніе: "Тебѣ́ же Са­мо́й ду́шу про́й­детъ ору́жіе", сла­га́­ла еси́ въ се́рд­цы Тво­е́мъ вся́ гла­го́­лы сія́, разу­мѣ­ва́­ю­щи, я́ко ра́­дость ма́­тер­няго се́рд­ца о ча́­дѣхъ мно́­гихъ пе­ча́­лей въ мíрѣ се́мъ бы­ва́­етъ при­ча́ст­на. Тѣ́м­же, я́ко иску­ше́н­нѣй по вся́­че­скимъ и спо­стра­да́­ти ма́­тер­ней ско́р­би мо­гу́­щей, взы­ва́­емъ Ти́:

Ра́дуй­ся, ра́­дость мíру - Хри­ста́ Спа­си́­теля ро́жд­шая; ра́дуй­ся, мíръ отъ ско́р­бей из­ба­вля́ющая. Ра́дуй­ся, хуле́нія и кле­ве­ты́ на Сы́на Тво­е­го́ тер­пѣ́в­шая; ра́дуй­ся, стра­да́ніемъ Его́ спо­стра­да́в­шая. Ра́дуй­ся, ско́рб­ныхъ ма́­те­рей утѣ­ше́ніе; ра́дуй­ся, ча́дъ и́хъ бла­го­да́т­ное охра­не́ніе. Ра́дуй­ся, въ бѣ­да́хъ ско́­рое на́мъ за­ступле́ніе; ра́дуй­ся, за­блу́жд­шихъ ис­прав­ле́ніе. Ра́дуй­ся, мла­де́н­цевъ пи­та́ніе; ра́дуй­ся, ю́ныхъ на­ста́в­ле­ніе. Ра́дуй­ся, Ма́ти си­ротству́­ю­щихъ; ра́дуй­ся, вдо́въ за­ступле́ніе.

Ра́дуй­ся, Бла­го­да́т­ная Бо­го­ро́­ди­це Дѣ́во, всѣ́хъ скорбя́щихъ Ра́­до­сте.

Кон­да́къ 5

Бого­то́ч­ную Кро́вь Сы́на Тво­е­го́, на Кре­стѣ́ за спа­се́ніе на́ше из­ли­ва́­емую, зря́щи, я́ко Раба́ Го­спо́д­ня, сми­ре́н­но во́ли Отца́, Иже на не­бе­сѣ́хъ, по­ви­ну́­ю­щаяся, на́мъ о́бразъ зло­стра­да́нія и тер­пѣ́нія яви́ла еси́, да и мы́, въ пещи́ иску­ше́ній и бѣ́дъ су́щіи, во­піе́мъ сми­ре́н­но Бо́гу: Алли­лу́ія.

Икосъ 5

Ви́дя Тя́ Сы́нъ Тво́й и Бо́гъ при Кре­стѣ́ стоя́щую съ воз­лю́б­лен­нымъ уче­ни­ко́мъ, и се́рд­цемъ Ему́ сра­спи­на́­ю­щую­ся, гла­го́­ла­ше: "Же́но, се́ сы́нъ Тво́й", и уче­нику́: "се́, Ма́ти твоя́", всы­но­вля́я Тебѣ́ вся́ вѣ́рую­щія въ Него́. Мы́ же, я́ко о́бщ­ни­цы ско́р­би и стра­да́ній Сы́на Тво­е­го́, имѣ́­ю­ще въ Тебѣ́ бла­гу́ю Ма́­терь, на Тя́ все́ упо­ва́ніе въ ско́р­би воз­ла­га́­ю­ще, во­піе́мъ Ти́:

Ра́дуй­ся, Ма́ти ро́да хри­стіа́н­ска­го; ра́дуй­ся, усы­но­ви́в­шая на́съ при Кре­стѣ́ Сы́на Тво­е­го́. Ра́дуй­ся, Бо́га съ че­ло­вѣ́­ки со­е­ди­ни́в­шая; ра́дуй­ся, вѣ́р­ныхъ Го́­спо­де­ви со­че­та́в­шая. Ра́дуй­ся, Агни­це, ро́жд­шая Агнца, взе́м­ша­го грѣ­хи́ мíра; ра́дуй­ся, ча́ше, че́рп­лю­щая на́мъ ра́­дость отъ Исто́ч­ни­ка без­сме́р­тія. Ра́дуй­ся, спо­ру́ч­ни­це спа­се́нія грѣ́ш­ныхъ; ра́дуй­ся, взы­ска́ніе по­ги́б­шихъ. Ра́дуй­ся, неча́янная грѣ́ш­ныхъ ра́­до­сте; ра́дуй­ся, па́д­шихъ во­ста́ніе. Ра́дуй­ся, цѣ­ли́­тель­ни­це всѣ́хъ не́­мо­щей; ра́дуй­ся, уто­ле́ніе вся́кія пе­ча́­ли.

Ра́дуй­ся, Бла­го­да́т­ная Бо­го­ро́­ди­це Дѣ́во, всѣ́хъ скорбя́щихъ Ра́­до­сте.

Кон­да́къ 6

Про­по­вѣ́дуютъ ми́­ло­сти Твоя́, Бо­го­ма́­ти, вси́ кон­цы́ все­ле́н­ныя, и́бо чест­ны́мъ по­кро́­вомъ Тво­и́мъ по­кры­ва́­е­ши ве́сь ро́дъ хри­стіа́н­скій, о не́м­же не­пре­ста́н­но мо́­ли­ши­ся Хри­сту́ Спа­си́­те­лю на́­шему и из­ба­вля́еши отъ всѣ́хъ бѣ́дъ бла­гонра́в­ныя и бо­го­боя́щіяся рабы́, вѣ́р­но во­пію́­щія Бо́гу: Алли­лу́ія.

Икосъ 6

Возсія́ бла­го­да́ть свѣ­то­за́р­ная отъ пре­чу́д­ныя ико́­ны Твоея́, Бо­го­ма́­ти, предъ не́­ю­же со сле­за́­ми при­па́­да­ю­ще, мо́­лимъ Ти ся: от­же­ни́ о́блакъ на­ше́д­шихъ на ны́ иску­ше́ній, да во­піе́мъ Ти́ ра́­дост­но:

Ра́дуй­ся, при­но­ся́щая къ Сы́ну Тво­е­му́ и Бо́гу мо­ле́нія вѣ́р­ныхъ; ра́дуй­ся, и Сама́ у пре­сто́­ла Сы́на Тво­е­го́ вы́ну моля́щаяся о на́съ. Ра́дуй­ся, пред­ста́­тель­ни­це къ Бо́гу, мíръ отъ бѣ́дъ спа­са́­ю­щая; ра́дуй­ся, за­сту́п­ни­це ро́да хри­стіа́н­ска­го, отъ Бо́га на́мъ да­ро­ва́н­ная. Ра́дуй­ся, дре́­во бла­го­сѣн­но­ли́­ствен­ное, и́мже по­кры­ва́­ют­ся мно́­зи; ра́дуй­ся, дре́­во свѣт­ло­пло­до­ви́­тое, и́мже пи­та́­ют­ся вѣ́р­ніи. Ра́дуй­ся, по­кро́­ве мíру, ши́р­шій о́бла­ка; ра́дуй­ся, зе­мле́ обѣ­то­ва́нія, изъ нея́же те­че́тъ ме́дъ и мле­ко́. Ра́дуй­ся, свѣ́т­лый о́бла­че, вѣ́р­ныя не­пре­ста́н­но освѣ­ща́­ю­щій; ра́дуй­ся, сто́л­пе о́гнен­ный, на­став­ля́яй из­бра́н­ныя къ не­бе́с­но­му на­слѣ́дію. Ра́дуй­ся, ни́во, растя́щая оби́ліе ще­дро́тъ; ра́дуй­ся, по­да́­тель­ни­це вся́кія бла́­го­сти.

Ра́дуй­ся, Бла­го­да́т­ная Бо­го­ро́­ди­це Дѣ́во, всѣ́хъ скорбя́щихъ Ра́­до­сте.

Кон­да́къ 7

Хотя́щи яви́ти то́ки чу­де́съ отъ Своея́ ико́­ны, всѣ́хъ скорбя́щихъ Ра́­до­сти, по­ве­лѣ́­ла еси́, Вла­ды́­чи­це, боля́щей Евѳи́­міи мо­ле́б­ная пѣ́нія предъ то́ю со­вер­ша́­ти, и, полу­чи́в­ши ис­цѣ­ле́ніе, всѣ́мъ про­по­вѣ́­да­ти ми́­ло­сти, ра́ди тоя́ ико́­ны явле́н­ныя, да не со­кры́тъ бу́­детъ исто́ч­никъ бла­го­да́т­ныхъ ис­цѣ­ле́ній всѣ́мъ тре́бую­щимъ. Тѣ́м­же и мы́ не та­и́мъ Тво­и́хъ бла­го­дѣя́ній, но бла­го­да́р­ствен­нѣ про­слав­ля́юще Бо́га, во­піе́мъ Ему́: Алли­лу́ія.

Икосъ 7

Но́вая ку­пѣ́ль Сило­а́м­ская па́че о́ныя дре́в­нія яви́ся, Пре­чи́­стая Вла­ды́­чи­це, хра́мъ Тво́й, въ не́м­же по­кла­ня́емся чу­до­тво́р­нѣй ико́­нѣ Тво­е́й. Ибо не еди́­ною въ лѣ́то и то́­кмо пе́р­вѣе входя́щимъ здра́­віе тѣ́ла по­да­е́­ши, но все­гда́ вся́кій не­ду́гъ и вся́кую я́зву ду­ше́в­ную и тѣ­ле́с­ную вра­чу́­е­ши съ вѣ́­рою и лю­бо́­вію къ Тебѣ́ при­бѣ­га́­ю­щихъ. Сего́ ра́ди во­піе́мъ Ти́:

Ра́дуй­ся, ку­пѣ́ль, въ не́й­же вся́ ско́р­би на́ша по­гру­жа́­ют­ся; ра́дуй­ся, ча́ше, Еюже ра́­дость и спа­се́ніе вос­пріе́м­лемъ. Ра́дуй­ся, ка́­ме­ню, на­пои́в­шій жа́­ждущія жи́­зни; ра́дуй­ся, дре́­во, усла­жда́­ю­щее сла́­ныя во́ды жи­те́й­ска­го мо́ря. Ра́дуй­ся, жи­во­тво́р­ныя воды́ не­и­сто­щи́­мый исто́ч­ни­че; ра́дуй­ся, ба́не, омы­ва́­ю­щая грѣ­хо́в­ную скве́р­ну. Ра́дуй­ся, скор­бе́й на́­шихъ усла­жде́ніе; ра́дуй­ся, пе­ча́­лей на́­шихъ уто­ле́ніе. Ра́дуй­ся, бо­лѣ́­зней на́­шихъ вра­че­ва́­ніе; ра́дуй­ся, бѣ́дъ из­ба­вле́ніе. Ра́дуй­ся, де́­мо­новъ по­пра́ніе; ра́дуй­ся, вра­го́въ по­сра­мле́­ніе.

Ра́дуй­ся, Бла­го­да́т­ная Бо­го­ро́­ди­це Дѣ́во, всѣ́хъ скорбя́щихъ Ра́­до­сте.

Кон­да́къ 8

Стра́н­ни­ки и при­ше́ль­цы вси́ есмы́ на зе­мли́ се́й, по гла­го́­лу апо́­сто­лову: "бѣды́ отъ вра­го́въ, бѣды́ отъ сро́д­никъ, бѣды́ отъ лжебра́тіи" терпя́ще въ ли­ше́ніихъ мно́­гихъ и ско́р­бехъ. Ты́ же, Вла­ды́­чи­це, я́ко бла­га́я Оди­ги́­тріе, на­ста́­ви на́съ къ ти́­хому при­ста́­ни­щу, и моли́ Сы́на Тво­е­го́ про­ще́нію пре­грѣ­ше́ній на́мъ пре́­жде кон­ца́ да­ро­ва́­ти­ся, да вы́ну во­піе́мъ Бо́гу: Алли­лу́ія.

Икосъ 8

Все́ жи­тіе́ на́ше на зе­мли́ бо­лѣ́­знен­но и пе­ча́­ли ис­по́л­не­но отъ кле­ве­ты́, до­са­жде́нія, уко­ре́нія и ины́хъ мно­го­ви́д­ныхъ бѣ́дъ и на­па́­стей: не­мощ­ству́­етъ бо тѣ́ло, из­не­мо­га́­етъ и ду́хъ на́шъ. Къ Тебѣ́ у́бо при­бѣ­га́­емъ, Бо­го­ма́­ти, предъ пре­чи́­стою ико́­ною Тво­е́ю при­па́­да­ю­ще, ис­по́л­ни ра́­до­сти и ве­се́лія ско́рб­ная серд­ца́ на́ша, да во­піе́мъ Ти́:

Ра́дуй­ся, путе­во­ди́­тель­ни­це, къ не­бе́с­но­му оте́­че­ству на́съ ру­ко­во­дя́щая; ра́дуй­ся, Ца­ри́­це не́ба и зе­мли́, вра­та́ ра́й­ская на́мъ отвер­за́­ю­щая. Ра́дуй­ся, ми́­ло­сти­вая, на́съ ми́лую­щая; ра́дуй­ся, до­мо­стро­и́­тель­ни­це, жи­тіе́ на́ше до́­брѣ устроя́ющая. Ра́дуй­ся, руно́ оро­ше́н­ное, е́же Ге­де­о́нъ пре­дви́­дѣ; ра́дуй­ся, бла­же́н­ное чре́­во, не­вмѣ­сти́­ма­го всѣ́­ми Бо́га вмѣ­сти́в­шее. Ра́дуй­ся, ку­пи­но́ не­о­па­ли́­мая; ра́дуй­ся, не­ру­ши́­мая стѣ­но́. Ра́дуй­ся, жи­во­но́с­ный исто́ч­ни­че; ра́дуй­ся, цвѣ́­те неувяда́­е­мый. Ра́дуй­ся, умягче́ніе злы́хъ сер­де́цъ; ра́дуй­ся уми­ле́ніе бла­ги́хъ.

Ра́дуй­ся, Бла­го­да́т­ная Бо­го­ро́­ди­це Дѣ́во, всѣ́хъ скорбя́щихъ Ра́­до­сте.

Кон­да́къ 9

Вся́кая жи­те́й­ская въ мíрѣ се́мъ сла́­дость пе­ча́­ли бы­ва́­етъ при­ча́ст­на: сла́­ва не сто­и́тъ, бо­га́т­ство ми­мо­те­че́тъ, лѣ́­по­та и здра́­віе увяда́­ютъ, дру́­зи и и́скрен­ніи сме́р­тію отъе́м­лют­ся. Усла­ди́ у́бо на́ша ско́р­би, бла­ги́хъ ви­но́в­ная, Твою́ не­тлѣ́н­ную да­ю́­щи ра́­дость на́мъ, во­пі­ю́­щимъ Бо́гу: Алли­лу́ія.

Икосъ 9

Вѣтíя мно­го­вѣ­ща́н­ныя не­доу­мѣ́­ютъ, кíими сло­ве­сы́ скорбя́щія утѣ­ша́­ти, но Сама́, Вла­ды́­чи­це, воз­гла­го́­ли серд­ца́мъ на́­шимъ утѣ­ше́ніе, бла­го­да́­ти Твоея́ лу­ча́­ми о́блакъ ско́р­би на́шея и мра́къ уны́­нія раз­го­ня́ющи, да взы­ва́­емъ Ти́:

Ра́дуй­ся, обра́­до­вав­шая надѣ́яніемъ на Тя́ всѣ́хъ хри­стіа́нъ; ра́дуй­ся, ра́­дость и уми­ре́ніе мíру. Ра́дуй­ся, по­да́­тель­ни­це Бо­же́­ствен­ныя бла́­го­сти; ра́дуй­ся, на­де́­ждо бла́гъ вѣ́ч­ныхъ. Ра́дуй­ся, ко­ра­блю́ хотя́щихъ спа­сти́­ся; ра́дуй­ся, при­ста́­ни­ще жи­те́й­скихъ пла́­ва­ній. Ра́дуй­ся, вѣ́р­ная хра­ни́­тель­ни­це упо­ва́­ю­щихъ на Тя́ по Бо́зѣ; ра́дуй­ся, оде́­ждо на­ги́хъ дер­зно­ве́нія. Ра́дуй­ся, хра­ни́­тель­ни­це всѣ́хъ и утвер­жде́ніе; ра́дуй­ся, всѣ́хъ вѣ́р­ныхъ огра­жде́ніе и свяще́н­ное при­бѣ́­жи­ще. Ра́дуй­ся, по́­мо­ще вѣ́р­но моля́щихся Тебѣ́; ра́дуй­ся, свѣ́т­лое бла­го­да́­ти по­зна́ніе.

Ра́дуй­ся, Бла­го­да́т­ная Бо­го­ро́­ди­це Дѣ́во, всѣ́хъ скорбя́щихъ Ра́­до­сте.

Кон­да́къ 10

Спа­сти́ хотя́й ро́дъ че­ло­вѣ́­че­скій отъ вѣ́ч­ныя му́ки и не­пре­ста­ю́­щія ско́р­би, Че­ло­вѣ­ко­лю́­бецъ Го­спо́дь въ при­сно­дѣ́в­ствен­ную утро́бу Твою́ все­ли́ся и Тебе́, Ма́­терь Свою́, да­ро­ва́ по­ги­ба́­ю­щимъ въ по́­мощь, по­кро́въ и за­щи­ще́ніе, да бу́­де­ши пе­ча́ль­нымъ утѣ­ше́ніе, скорбя́щимъ ра́­до­ва­ніе, отча́яннымъ на­де́­жда, вѣ́ч­ныя му́ки Сво­и́мъ хо­да́­тай­ствомъ из­ба­вля́ющая и къ не­бе́с­но­му ве­се́лію при­во­дя́щая всѣ́хъ, вѣ́р­но во­пі­ю́­щихъ Сы́ну Тво­е­му́ и Бо́гу на́­шему: Алли­лу́ія.

Икосъ 10

Стѣна́ еси́ дѣ́­вамъ, Бо­го­ро́­ди­це Дѣ́во, и всѣ́мъ къ Тво­е­му́ по­кро́ву при­бѣ­га́­ю­щимъ. Тѣ́м­же мо́­лимъ Тя́: за­сту­пи́, по­кры́й и со­блю­ди́ всѣ́хъ си́­рыхъ и без­по́­мощ­ныхъ отъ иску­ше́ній, оз­ло­бле́ній и бѣ́дъ, Тебѣ́ съ лю­бо́­вію взы­ва́­ю­щихъ:

Ра́дуй­ся, сто́л­пе дѣ́в­ства; ра́дуй­ся, чи­сто­ты́ и цѣ­ло­му́­дрія со­су́­де из­бра́н­ный. Ра́дуй­ся, во́­ин­ствую­щимъ на пло́ть цѣ­ло­му́­дріемъ изря́дное вѣн­ча́­ніе; ра́дуй­ся, во и́но­че­ствѣ бла­го­скорбя́щимъ по­да́­тель­ни­це вѣ́ч­на­го ра́­до­ва­нія. Ра́дуй­ся, пла́­мень стра­сте́й измѣня́ющая; ра́дуй­ся, мра́къ иску­ше́ній про­го­ня́ющая. Ра́дуй­ся, на­ста́в­ни­це цѣ­ло­му́­дрія; ра́дуй­ся, чи­сто­ты́ огра­жде́ніе. Ра́дуй­ся, ис­прав­ле́ніе че­ло­вѣ́­ковъ; ра́дуй­ся, Еюже отъ па­де́нія во­ста́­хомъ. Ра́дуй­ся, тве́р­дое вѣ́ры утвер­жде́ніе; ра́дуй­ся, прія́тное мо­ли́­твы ка­ди́­ло.

Ра́дуй­ся, Бла­го­да́т­ная Бо­го­ро́­ди­це Дѣ́во, всѣ́хъ скорбя́щихъ Ра́­до­сте.

Кон­да́къ 11

Пѣ́ніе всеу­ми­ле́н­ное при­но́­симъ Ти́, раби́ Твои́, Бо­го­ро́­ди­це, я́ко все­си́ль­нѣй За­сту́п­ни­цѣ ро́да на́­ше­го: уто­ли́ бо­лѣ́­зни мно­го­воз­ды­ха́­ю­щія души́ моея́, укро­ти́ гнѣ́въ Бо́жій, пра́­вед­но на ны́ дви́­жи­мый грѣ́хъ ра́ди на́­шихъ, из­ба́­ви на́съ отъ вся́кія лю́тыя ско́р­би и бо­лѣ́­зни, во­пі­ю́­щихъ о Тебѣ́ Бо́гу: Алли­лу́ія.

Икосъ 11

Свѣ­то­пріе́м­ная свѣ­ща́, у́глемъ бла­го­да́­ти Бо́жія воз­жже́н­ная, яви́ся на́мъ пре­чест­на́я ико́­на Твоя́, Вла­ды́­чи­це, на освяще́ніе на́ше и утѣ­ше́ніе. Мы́ же, лю­бо́­вію чту́­ще ю́ и съ вѣ́­рою при­па́­да­ю­ще къ не́й, во­піе́мъ Ти́:

Ра́дуй­ся, си́ль­нымъ Тво­и́мъ за­ступле́ніемъ отъ всѣ́хъ бѣ́дъ на́съ из­ба­вля́ющая; ра́дуй­ся, отъ тру́­са и по­то́­па на́съ за­щи­ща́­ю­щая. Ра́дуй­ся, отъ гла́­да ду­ше́в­на­го и тѣ­ле́с­на­го на́съ сна­бдѣ­ва́­ю­щая; ра́дуй­ся, о́гнь ро­со́ю мо­ли́твъ Тво­и́хъ уга­ша́­ю­щая. Ра́дуй­ся, отъ сме́рт­на­го гу­би́­тель­ства на́съ спа­са́­ю­щая; ра́дуй­ся, въ бра́­нехъ крѣ́п­кая по­мо́щ­ни­це. Ра́дуй­ся, отъ на­ше́­ствія ино­пле­ме́н­ныхъ на́съ огра­жда́­ю­щая; ра́дуй­ся, отъ ме­ждоу­со́б­ныя бра́­ни охраня́ющая. Ра́дуй­ся, пла́­ва­ю­щихъ ле́г­кое по во­да́мъ пре­хо­жде́ніе; ра́дуй­ся, путь­ше́­ству­ю­щихъ до́­брая во­ди́­тель­ни­це. Ра́дуй­ся, плѣ́н­ныхъ сво­бо­жде́ніе; ра́дуй­ся, отъ на­ле­жа́­ща­го пра́­вед­на­го пре­ще́­нія Бо́жія ско́­рое из­ба­вле́ніе.

Ра́дуй­ся, Бла­го­да́т­ная Бо­го­ро́­ди­це Дѣ́во, всѣ́хъ скорбя́щихъ Ра́­до­сте.

Кон­да́къ 12

Бла­го­да́­ти за­ло́гъ вос­хо­тѣ́в­ши да́ти ро́ду на́­шему, цѣль­бо­но́с­ную ико́ну Твою́ яви́ла еси́ на́мъ, Бо­го­ма́­ти, отъ нея́же то́ки чу­де́съ съ вѣ́­рою при­хо­дя́щимъ исто­ча́­ют­ся, не­ду́­зи вра­чу́­ют­ся и ско́р­би утоля́ются. Сего́ ра́ди ра́­дост­но о Тебѣ́ во­піе́мъ Бо́гу: Алли­лу́ія.

Икосъ 12

Пою́ще Твоя́ ми́­ло­сти и чу­де­са́, Бо­го­ро­ди́­тель­ни­це, хва́­лимъ Тя́ вси́, я́ко тве́рдую Пред­ста́­тель­ни­цу на́шу, и со уми­ле́ніемъ по­кла­ня́емся Тебѣ́, моля́щейся о на́съ, и про́­симъ: воз­дви́г­ни ру́цѣ къ Сы́ну Тво­е­му́, да вы́ну въ се́й жи́­зни и по сме́р­ти на́­шей ми­ло­се́р­діе Его́ не­от­сту́п­но бу́­детъ отъ на́съ, взы­ва́­ю­щихъ Ти́:

Ра́дуй­ся, не­по­сты́д­ное на́ше упо­ва́ніе въ жи­во­тѣ́ и по пре­став­ле́ніи на́­шемъ; ра́дуй­ся, упо­ва́­ю­щимъ на Тя́ ми́­ренъ ко­не́цъ житія́ сего́ по­да­ю́­щая. Ра́дуй­ся, въ де́нь су́д­ный на́ша на­де́­ждо и за­щи­ще́ніе; ра́дуй­ся, Судіи́ пра́­вед­на­го умо­ле́ніе. Ра́дуй­ся, ге­е́н­ны вѣ́ч­ныя из­ба­вле́ніе; ра́дуй­ся, на­де́­ждо вѣ́ч­на­го спа­се́нія. Ра́дуй­ся, клю­чу́ Ца́рствія Хри­сто́­ва; ра́дуй­ся, две́­ре ра́й­ская. Ра́дуй­ся, мо́­сте, къ не­бе­се́мъ пре­во­дя́й; ра́дуй­ся, всѣ́хъ ка́­ю­щих­ся грѣ́ш­ни­ковъ при­бѣ́­жи­ще и бла­га́я за­сту́п­ни­це. Ра́дуй­ся, а́н­ге­ловъ ра́­до­сте; ра́дуй­ся, всѣ́хъ пра́­вед­ныхъ сла́­во и утѣ­ше́ніе.

Ра́дуй­ся, Бла­го­да́т­ная Бо­го­ро́­ди­це Дѣ́во, всѣ́хъ скорбя́щихъ Ра́­до­сте.

Кон­да́къ 13

О, Все­пѣ́­тая Бо­го­о­бра́­до­ван­ная Ма́ти, ро́жд­шая на ра́­дость не́бу и зе­мли́ Царя́ Хри­ста́, Бо́га на́­ше­го! Услы́­ши гла́съ скорбя́щихъ ра́бъ Тво­и́хъ, и пріе́м­ши сіе́ ма́­лое мо­ле́ніе на́ше, из­ба́­ви на́съ отъ вся́кихъ бѣ́дъ, скор­бе́й и на­па́­стей; не­ду́­ги на́ша ис­цѣ­ли́, на­пра́с­ныя кле­ве­ты́ по­тре­би́, вся́ку зло́бу и вра­жду́ от­же­ни́ отъ на́съ и бу́дущія изми́ му́ки о Тебѣ́ во­пі­ю́­щихъ: Алли­лу́ія.

Се́й кон­да́къ гла­го́­лет­ся три́­жды. Та́же Икосъ 1-й и Кон­да́къ 1-й

Мо­ли́­тва пе́р­вая

О, Пресвята́я Вла­ды́­чи­це Бо­го­ро́­ди­це, вы́ш­шая хе­ру­ви́мъ и чест­нѣ́й­шая се­ра­фи́мъ, Бо­го­из­бра́н­ная Отро­ко­ви́­це, всѣ́хъ скорбя́щихъ Ра́­до­сте! По­да́ждь утѣ­ше́ніе и на́мъ, въ ско́р­би су́­щимъ: ра́з­вѣ бо Тебе́ ино́­го при­бѣ́­жи­ща и по́­мо­щи не и́ма­мы. Ты́ еди́­на еси́ ра́­до­сти на́шея хо­да́­та­и­ца, и я́ко Ма́­терь Бо́жія и Ма́ти ми­ло­се́р­дія, пред­стоя́щи у пре­сто́­ла Пресвяты́я Тро́­и­цы, мо́­же­ши на́мъ по­мо­щи́: ни­кто́­же бо при­те­ка́яй къ Тебѣ́ по­сра́м­ленъ отхо́­дитъ. Услы́­ши у́бо и на́съ, ны́нѣ въ де́нь ско́р­би предъ Тво­е́ю ико́­ною при­па́­да­ю­щихъ и со сле­за́­ми Тебѣ́ моля́щихся: от­же­ни́ отъ на́съ на­ле­жа́­щія на на́съ ско́р­би и пе­ча́­ли въ се́й вре́­мен­нѣй жи́­зни, не ли­ше́­ны же ны́ со­тво­ри́ Тво­и́мъ все­си́ль­нымъ хо­да́­тай­ствомъ и вѣ́ч­ныя не­скон­ча́­е­мыя ра́­до­сти въ Ца́рствіи Сы́на Тво­е­го́ и Бо́га на́­ше­го, Ему́­же по­до­ба́­етъ вся́кая сла́­ва, че́сть и по­кло­не́ніе, со Без­на­ча́ль­нымъ Его́ Отце́мъ, и со Пресвяты́мъ и Бла­ги́мъ и Жи­во­тво­ря́щимъ Его́ Ду́­хомъ, ны́нѣ и при́­сно и во вѣ́ки вѣ­ко́въ. Ами́нь.

Мо­ли́­тва ина́я

Цари́­це моя́ Пре­бла­га́я, на­де́­ждо моя́ Бо­го­ро́­ди­це, прія́­те­ли­ще си́­рымъ, и стра́н­нымъ пред­ста́­тель­ни­це, скорбя́щимъ ра́­до­сте, оби́­ди­мымъ по­кро­ви́­тель­ни­це! Зри́­ши мою́ бѣду́, зри́­ши мою́ ско́рбь: по­мо­зи́ ми, я́ко не́­мощ­ну, окор­ми́ мя, я́ко стра́н­на. Оби́­ду мою́ вѣ́си, раз­рѣ­ши́ ту́, я́ко во́­ли­ши. Яко не и́мамъ ины́я по́­мо­щи, ра́з­вѣ Тебе́, ни ины́я пред­ста́­тель­ни­цы, ни благíя утѣ́­ши­тель­ни­цы, то́­кмо Тебе́, о Бо­го­ма́­ти, я́ко да со­хра­ни́­ши мя́ и по­кры́­е­ши во вѣ́ки вѣ­ко́въ. Ами́нь.

Тро­па́рь, гла́съ 4

Къ Бо­го­ро́­ди­цѣ при­лѣ́ж­но ны́нѣ при­те­це́мъ, грѣ́ш­ніи и сми­ре́н­ніи, и при­па­де́мъ, въ покая́ніи зо­ву́­ще изъ глу­би­ны́ души́: Вла­ды́­чи­це, по­мо­зи́, на ны́ ми­ло­се́р­до­вав­ши, по­тщи́­ся, по­ги­ба́­емъ отъ мно́­же­ства пре­грѣ­ше́ній, не отвра­ти́ Твоя́ рабы́ тщи́, Тя́ бо и еди́ну на­де́жду и́ма­мы.

Инъ тро­па́рь, гла́съ то́й­же

Не умол­чи́мъ ни­ко­гда́, Бо­го­ро́­ди­це, си́лы Твоя́ гла­го́­ла­ти, не­до­сто́й­ніи. Аще бо Ты́ не бы́ пред­стоя́ла, моля́щи, кто́ бы на́съ из­ба́­вилъ отъ то­ли́­кихъ бѣ́дъ? Кто́ же бы со­хра­ни́лъ до ны́нѣ сво­бо́д­ны? Не от­сту́­пимъ, Вла­ды́­чи­це, отъ Тебе́, Твоя́ бо рабы́ спа­са́­е­ши при́­сно отъ вся́кихъ лю́­тыхъ.

Кон­да́къ, гла́съ 6

Не и́ма­мы ины́я по́­мо­щи, не и́ма­мы ины́я на­де́­жды, ра́з­вѣ Тебе́, Вла­ды́­чи­це, Ты́ на́мъ по­мо­зи́, на Тебе́ на­дѣ́­ем­ся и То­бо́ю хва́­лим­ся, Твои́ бо есмы́ раби́, да не по­сты­ди́м­ся.

Ве­ли­ча́­ніе

Вели­ча́­емъ Тя́, Пресвята́я Дѣ́во, и чте́мъ о́бразъ Тво́й святы́й, и́мже то́­чи­ши ис­цѣ­ле́нія всѣ́мъ, съ вѣ́­рою при­те­ка́­ю­щимъ.