Конда́къ 1

Взбра́нной Воево́дѣ, Пресвятѣ́й Влады́чицѣ на́шей, хвале́бную пѣ́снь воспѣва́емъ смире́нніи раби́ Твои́, взира́юще на первопи́санный о́бразъ Тво́й, Богома́ти, съ Предвѣ́чнымъ Младе́нцемъ Іису́сомъ, на руку́ Твое́ю сѣдя́щимъ, поклоня́емся Ти́ съ любо́вію и мо́лимъ Тя́, Пресвята́я Богоро́дице. Ты́ же, я́ко иму́щая держа́ву непобѣди́мую, сохрани́ и спаси́ ны́, умиле́нно Тебѣ́ вопію́щія:

Ра́дуйся, Пресвята́я Влады́чице Богоро́дице, благода́ть и ми́лость ико́ною Твое́ю на́мъ явля́ющая.

Икосъ 1

Арха́нгелъ и а́нгелъ ли́цы сопредста́ша о́крестъ святы́я ико́ны Твоея́, Небе́сная Цари́це, благода́тно Тобо́ю осѣне́нныя: егда́ бо святы́й евангели́стъ Лука́ пе́рвѣе о́бразъ тво́й написа́ и принесе́ къ Тебѣ́, Пречи́стая, Ты́ же, о Госпоже́ Цари́це, возра́довалася еси́ спасе́нія на́шего ра́ди и прорекла́ еси́ пречи́стыми усты́ Твои́ми: "съ си́мъ о́бразомъ благода́ть Моя́ и си́ла да пребу́дутъ". Тѣ́мже у́бо взира́юще на ико́ну Твою́ въ Боже́ственныхъ хра́мѣхъ, благолѣ́пно преукра́шенную, ублажа́емъ честно́е и благода́тное происхожде́ніе ея́, преклоня́емъ колѣ́на предъ вели́чествомъ Твои́мъ, Влады́чице, и со слеза́ми воспѣва́емъ си́це:

Ра́дуйся, Небе́сная Цари́це, Ма́ти Бо́га и Го́спода небесе́ и земли́; ра́дуйся, арха́нгеловъ и а́нгеловъ Влады́чице. Ра́дуйся, Боже́ственныя бла́гости Пода́тельнице; ра́дуйся, ро́да христіа́нскаго Засту́пнице. Ра́дуйся, Всеми́лостивая, первопи́санный о́бразъ Тво́й отъ апо́стола пріи́мшая; ра́дуйся, то́й да́ти на спасе́ніе ро́да человѣ́ческаго изво́лившая. Ра́дуйся, я́ко благоволи́ла еси́ ему́ пребыва́ти сохра́нно на земли́; ра́дуйся, я́ко дарова́ла еси́ тому́ благода́ть исцѣле́ній. Ра́дуйся, ико́ною Твое́ю отъ вся́каго зла́ на́съ сохраня́ющая; ра́дуйся, то́ю исто́чники чуде́съ всю́ду источа́ющая. Ра́дуйся, я́ко Твои́мъ хода́тайствомъ вся́кихъ бла́гъ наслажда́емся; ра́дуйся, я́ко Тебѣ́ и Сы́ну Твоему́ предъ честно́ю ико́ною Твое́ю благоговѣ́йно поклоня́емся.

Ра́дуйся, Пресвята́я Влады́чице Богоро́дице, благода́ть и ми́лость ико́ною Твое́ю на́мъ явля́ющая.

Конда́къ 2

Ви́дя чуде́съ мно́жество, быва́емое во хра́мѣ отъ принесе́нныя въ Вышгра́дъ святы́я Твоея́, Пречи́стая, ико́ны, я́же иногда́ возвыша́шеся и стоя́ше на возду́сѣ, иногда́ же ноша́шеся во хра́мѣ сю́ду и сю́ду, благовѣ́рный кня́зь Андре́й, возгорѣ́вся ду́хомъ пла́меннаго усе́рдія, паде́ на земли́ предъ чудотво́рною ико́ною Твое́ю, и внеза́пу осѣне́нъ бы́сть ве́ліимъ свѣ́томъ отъ ли́ка Твоего́, Пресвята́я Богоро́дице, тѣ́мже умоля́ше Тя́, да яви́ши святу́ю во́лю Твою́, и да благослови́ши его́ отъити́ въ предѣ́лы своя́. И мы́ у́бо подъ пречи́стый покро́въ Тво́й прибѣга́емъ и те́плѣ вопіе́мъ: помози́ на́мъ, Всеблага́я Ма́ти, досто́йно прейти́ земно́е по́прище жи́зни, да обря́щемъ страну́ свѣтоно́сную и безпредѣ́льную, восхваля́юще Тя́ и пою́ще Го́сподеви: Аллилу́ія.

Икосъ 2

Ра́зумъ не доразумѣва́етъ досто́йно пѣ́сньми духо́вными восхваля́ти Тя́, небе́сная Цари́це, егда́ мно́гое мно́жество чуде́съ отъ ико́ны Твоея́, несе́нныя во гра́дъ Росто́въ, яви́ла еси́: мно́зи бо боля́щіи исцѣли́шася; человѣ́къ нѣ́кій, утопа́яй и уже́ во глубину́ погрузи́выйся, отъ потопле́нія ди́вно Тобо́ю изба́вися; пресви́тера нѣ́коего жена́ уме́ршая оживѣ́ и здра́ва бы́сть. Благода́ть Твоя́, Влады́чице, не престае́тъ и до ны́нѣ оби́льно чудодѣ́йствовати, точа́щи, я́ко отъ исто́чника, отъ пречи́стыя Твоея́ ико́ны вся́кихъ неду́говъ исцѣле́нія. Тѣ́мже у́бо прославля́емъ Тя́ благоче́стнымъ предъ святы́мъ о́бразомъ Твои́мъ поклоне́ніемъ, умиле́нно пою́ще Ти́:

Ра́дуйся, Всеми́лостивая, сла́вою ди́внаго врачева́нія ше́ствіе ико́ны Твоея́ знаменова́вшая; ра́дуйся, мно́гія немощны́я исцѣли́вшая. Ра́дуйся, Всеблага́я, благо́ю по́мощію упова́ющихъ на Тя́ не оставля́ющая; ра́дуйся, отча́ющимся наде́жду возвраща́ющая. Ра́дуйся, Засту́пнице на́ша, упова́ніе на́съ, недосто́йныхъ, не отверга́ющая; ра́дуйся, на́ша усе́рдныя моли́твы пріе́млющая. Ра́дуйся, Всеблаже́нная, безмѣ́рныя Твоя́ щедро́ты на на́съ излива́ющая; ра́дуйся, Твое́ю благосты́нею на́мъ благодѣ́ющая. Ра́дуйся, всемо́щная Помо́щнице на́ша, во вся́кой ну́ждѣ моля́щимся Ти́ ско́ро помога́ющая; ра́дуйся, отъ напра́сныя сме́рти на́съ спаса́ющая. Ра́дуйся, Богоблагода́тная, стра́хъ Бо́жій въ сердца́ на́ша вселя́ющая; ра́дуйся, и́стинно на́съ моли́тися науча́ющая.

Ра́дуйся, Пресвята́я Влады́чице Богоро́дице, благода́ть и ми́лость ико́ною Твое́ю на́мъ явля́ющая.

Конда́къ 3

Си́лою, да́нною отъ Тебе́, Влады́чице, честна́я Твоя́ ико́на не на пути́ то́чію цѣльбоно́сно просла́вися, но и чу́днымъ проявле́ніемъ святы́я во́ли Твоея́: егда́ бо благовѣ́рный кня́зь но́щію предъ ико́ною Твое́ю пла́меннѣ моля́шеся, Ты́ Сама́, небе́сная Цари́це, Боже́ственнымъ свѣ́томъ сія́ющи, яви́лася еси́ ему́, глаго́лющи, не отходи́ти отъ предѣ́лъ Влади́мірскихъ; о́нъ же со благоговѣ́ніемъ и ра́достію возблагодари́ Тя́, я́ко сподо́бися узрѣ́ти Ма́терь Бо́жію, и того́жде дне́ повелѣ́ це́рковь заложи́ти и, велелѣ́пно украси́въ ю́, внесе́ въ ню́ торже́ственнѣ чудотво́рную Твою́ ико́ну, нарече́нную "Влади́мірскою". Мы́ же вси́, смире́нно припа́дающе предъ чу́дною Твое́ю ико́ною, восхваля́емъ ди́вная дѣла́ Твоя́, и́миже отъ дре́внихъ време́нъ страна́ сія́ сла́вно прославля́ется, и благода́рнѣ воспѣва́емъ Тя́, я́ко устро́ила еси́ и здѣ́, во хра́мѣ се́мъ, благода́тное утвержде́ніе, изъ глубины́ души́ хва́ляще Тя́ и взыва́юще ко Го́споду: Аллилу́ія.

Икосъ 3

Иму́щи премно́гую ми́лость къ ро́ду человѣ́ческому, Пресвята́я Влады́чице, не оста́вила еси́ страну́ Россíйскую въ де́нь бра́ни со враги́, прише́дшими отъ брего́въ Во́лжскихъ, при кня́зѣ Андрѣ́е, и́же, исходя́ на бра́нь, сле́зно умоля́ше Тя́, та́кожде и вси́ во́ини вопія́ху Ти́, да отъ ру́къ вра́жіихъ изба́виши я́. Ты́ же, Пресвята́я Богома́ти, не отри́нула еси́ и́хъ усе́рдныя моли́твы, и ди́внымъ отъ чудотво́рныя Твоея́ ико́ны явле́ніемъ сла́вную побѣ́ду надъ враги́ предзнаменова́ла еси́, озари́вши ве́ліимъ свѣ́томъ и о́гненными лучи́ все́ во́инство христолюби́вое. Тѣ́мже и мы́, прекло́ньше колѣ́на, мо́лимъ Тя́: охраня́й и ны́нѣ оте́чество на́ше, спаси́ Благочести́вѣйшаго Госуда́ря на́шего Импера́тора [и́мярекъ], огради́ и Его́ въ годи́ну бра́ни, укрѣпи́ Его́ мы́шщу, и возвы́си десни́цу, покори́ подъ но́зѣ Его́ вся́каго врага́ и супоста́та, да въ ми́рѣ и тишинѣ́ воспѣва́емъ Ти́ си́це:

Ра́дуйся, Засту́пнице, Твои́мъ всемо́щнымъ заступле́ніемъ отъ меча́ иноплеме́нныхъ на́съ избавля́ющая; ра́дуйся, усе́рдныя моли́твы о на́съ ко Го́споду принося́щая. Ра́дуйся, предста́тельствомъ Твои́мъ пра́ведно дви́жимый гнѣ́въ Бо́жій утоля́ющая; ра́дуйся, хода́тайствомъ Твои́мъ предъ Го́сподемъ на ми́лость къ на́мъ Его́ преклоня́ющая. Ра́дуйся, я́ко смире́ннымъ моле́ніемъ на́шимъ вне́млеши; ра́дуйся, я́ко ско́рое утѣше́ніе на́мъ пода́ти поспѣша́еши. Ра́дуйся, я́ко ико́ною Твое́ю отъ вся́каго бѣ́дствія на́съ покрыва́еши; ра́дуйся, я́ко То́ю отъ вся́каго зла́го обстоя́нія на́съ соблюда́еши. Ра́дуйся, въ годи́ну бра́ни Твое́ю по́мощію упова́ющихъ на Тя́ не оставля́ющая; ра́дуйся, ти́хое и безмо́лвное житіе́ на́мъ да́рующая. Ра́дуйся, ски́птры благочести́выхъ царе́й утвержда́ющая; ра́дуйся, отъ всѣ́хъ вра́жіихъ си́лъ и ко́зней на́съ защища́ющая.

Ра́дуйся, Пресвята́я Влады́чице Богоро́дице, благода́ть и ми́лость ико́ною Твое́ю на́мъ явля́ющая.

Конда́къ 4

Бу́рею го́рдости одержи́мъ бы́въ, и презрѣ́въ стра́хъ Бо́жій и святы́ню гра́да Влади́міра, влады́ка Ѳео́доръ неразу́мная словеса́ изрече́ на святу́ю ико́ну Твою́, Пресвята́я Богоро́дице, це́рковь, идѣ́же та́ пребыва́ше, дерзну́ затвори́ти, и та́ко Бо́га прогнѣ́ва, и а́біе пра́веднымъ судо́мъ Бо́жіимъ на сме́рть осужде́нъ бы́сть. Мы́ же, таково́е вразумле́ніе Твое́ непочита́ющимъ Тя́ ви́дяще, и чудотво́рному о́бразу Твоему́ покланя́ющеся, умиле́нное благоговѣ́ніе съ вѣ́рою и любо́вію прино́симъ Ти́, и упова́юще на ми́лость Твою́, смире́нно мо́лимъ Тя́: ми́лостива къ на́мъ пребу́ди, Влады́чице, и изба́ви ны́ отъ вся́кія бѣды́ и напа́сти, да вы́ну сла́вимъ и восхваля́емъ Твое́ милосе́рдіе, взыва́юще Бо́гу: Аллилу́ія.

Икосъ 4

Слы́шавше внеза́пу вѣ́сть о убіе́ніи благовѣ́рнаго кня́зя Андре́я, бу́йніи мяте́жницы отъ наро́да, дви́жиміи безнача́ліемъ и убíйцами, ри́нушася гра́дъ Влади́міръ опустоша́ти и расхища́ти. Ли́къ же свяще́нниковъ и вси́ благочести́віи лю́діе притеко́ша къ Тебѣ́, Богома́ти, и нося́ще чудотво́рную Твою́ ико́ну, сле́зныя мольбы́ на сто́гнахъ гра́да вознесо́ша Ти́, да прекрати́ши безу́мное умо́въ движе́ніе, и ми́ръ во гра́дѣ водвори́ши. Тогда́ у́бо ди́вное зрѣ́лище бы́сть, идѣ́же бо святу́ю ико́ну Твою́ пронесо́ша, толпы́ наро́да смиря́хуся и, па́дше на колѣ́на, со слеза́ми и рыда́ніемъ моля́хуся. Мы́ же, ви́дяще толи́ко чу́дную си́лу сердца́ жесто́кія умягча́ти, смире́нно мо́лимъ Тя́, Пресвята́я Влады́чице, умилосе́рдися на ны́, грѣ́шныя и непотре́бныя, уврачу́й ду́ши на́ша на стро́потнѣмъ пути́ грѣха́ и страсте́й, обурева́ющихъ ны́, и пріими́ сію́ хвале́бную пѣ́снь:

Ра́дуйся, Путеводи́тельнице, ше́ствовати по пути́ благоче́стія христіа́номъ помога́ющая; ра́дуйся, въ до́брыхъ дѣ́лѣхъ преуспѣва́ющихъ укрѣпля́ющая. Ра́дуйся, оте́чество на́ше отъ междоусо́бныя бра́ни охраня́ющая; ра́дуйся, зла́я начина́нія и ко́зни вра́жія расторга́ющая. Ра́дуйся, отъ па́губнаго ду́ха вѣ́ка сего́ на́съ отклоня́ющая; ра́дуйся, повинова́тися власте́мъ на́съ науча́ющая. Ра́дуйся, дерзнове́нно возстаю́щихъ проти́ву богопоста́вленныя вла́сти облича́ющая; ра́дуйся крамо́лы нечести́выхъ сыно́въ поги́бельныхъ разруша́ющая. Ра́дуйся, ю́ныя умы́ отъ заблужде́ній на пу́ть пра́вый направля́ющая; ра́дуйся, душевре́дная уче́нія низлага́ющая. Ра́дуйся, житіе́ на́ше на земли́ до́брѣ устроя́ющая; ра́дуйся, къ Ца́рствію небе́сному пу́ть на́мъ показу́ющая.

Ра́дуйся, Пресвята́я Влады́чице Богоро́дице, благода́ть и ми́лость ико́ною Твое́ю на́мъ явля́ющая.

Конда́къ 5

Боготе́чнѣй звѣздѣ́ уподо́бившися, ико́на Твоя́, Богома́ти, луча́ми чуде́съ освѣща́етъ страну́ на́шу правосла́вную. Кто́ бо исчи́слитъ вся́ благодѣя́нія, я́же отъ нея́ подае́ши всѣ́мъ тре́бующимъ? Ка́ко яви́ла еси́ чу́до но́вое и пресла́вное, охраня́ющи гра́дъ Тво́й отъ вели́кихъ бѣ́дствій, ка́ко неви́димою всемогу́щею десни́цею изгна́ла еси́ безчи́сленная по́лчища вра́жія, и предста́тельствомъ Твои́мъ вручи́ла еси́ держа́ву благочести́вому кня́зю Михаи́лу, и та́ко благодѣ́ющи, всеси́льнымъ Твои́мъ заступле́ніемъ не оста́вила еси́ поги́бнути упова́ющихъ на Тя́. Сего́ ра́ди съ усе́рдіемъ поклоня́емся пречестнѣ́й ико́нѣ Твое́й, и досто́йно славосло́вимъ Тя́, пою́ще Бо́гу: Аллилу́ія.

Икосъ 5

Ви́дѣвше лю́діе гра́да Влади́міра ико́ну Твою́, Влады́чице, и ве́сь гра́дъ сво́й на возду́сѣ, съ умиле́ніемъ уразумѣ́ша, я́ко въ чу́дномъ видѣ́ніи прояви́ся вели́кое Твое́, Богома́ти, благоволе́ніе къ избра́нію на престо́лъ Влади́мірскій благовѣ́рнаго кня́зя Все́волода, благоче́стія ра́ди его́. Ди́вна си́ла Твоя́, Богоро́дице, я́ко со́лнце свѣ́тиши въ явле́ніи Твое́мъ на о́блацѣхъ небе́сныхъ и тѣ́мъ показу́еши святу́ю во́лю Твою́. Благоволи́ у́бо, Пречи́стая, ниспосла́ти на́мъ съ благода́тію и си́лу моли́твы, да, бо́дрствующе со благодаре́ніемъ, воспѣва́емъ хвалы́ сія́:

Ра́дуйся, Всеблага́я, я́ко любо́вь ко благоче́стію въ вѣ́рныхъ вселя́еши; ра́дуйся, я́ко благоче́стіе въ земли́ на́шей огражда́еши. Ра́дуйся, я́ко сохраня́еши и защища́еши Правосла́віе; ра́дуйся, я́ко науча́еши и соблюда́еши па́стырей Це́ркви. Ра́дуйся, Всесвята́я, я́ко святу́ю спаси́тельную вѣ́ру на земли́ утвержда́еши; ра́дуйся, я́ко е́реси и раско́лы облича́еши. Ра́дуйся, Благода́тная, живоно́сный исто́чникъ благода́ти вѣ́рующимъ источа́ющая; ра́дуйся, сло́во прему́дрости прося́щимъ да́рующая. Ра́дуйся, маловѣ́рныя и суевѣ́рныя вразумля́ющая; ра́дуйся, невѣ́рныхъ смы́слы Боже́ственнымъ свѣ́томъ озаря́ющая. Ра́дуйся, бла́га земна́я и су́етная презира́ти науча́ющая; ра́дуйся, къ небе́снымъ и нетлѣ́ннымъ сокро́вищамъ умы́ и сердца́ на́ша направля́ющая.

Ра́дуйся, Пресвята́я Влады́чице Богоро́дице, благода́ть и ми́лость ико́ною Твое́ю на́мъ явля́ющая.

Конда́къ 6

Проповѣ́дуетъ чудеса́ Твоя́ и вели́кія Твоя́ ми́лости вся́ земля́ правосла́вная, я́ко ди́вно огради́ла еси́ святы́мъ покро́вомъ чудотво́рную Твою́ ико́ну отъ о́гненнаго пла́мене, объя́вшаго собо́рный хра́мъ, въ не́мже свята́я ико́на пребыва́ше. Тѣ́мже и мы́ Тебѣ́ вопіе́мъ: о, Пресвята́я Влады́чице, при́зри всеми́лостивымъ о́комъ Твои́мъ и на ны́, со слеза́ми предстоя́щія предъ чудотво́рнымъ Твои́мъ о́бразомъ, и моли́твами Твои́ми предъ престо́ломъ Всевы́шняго изба́ви ны́ отъ пла́мене огня́ вѣ́чнаго, да съ весе́ліемъ благода́рственныя хвалы́ прино́симъ Ти́, воспѣва́юще Го́сподеви: Аллилу́ія.

Икосъ 6

Возсія́ па́ки свѣ́томъ чуде́съ пречестна́я ико́на Твоя́, Влады́чице, во вре́мя наше́ствія тата́рскаго, егда́ бо нечести́выя по́лчища Баты́я, вше́дше во святы́й хра́мъ, нача́ша вся́ разруша́ти, зла́то, сребро́ и друга́я украше́нія съ просла́вленнаго о́браза Твоего́ похища́ти, и предава́ти вся́ мечу́ и огню́. Тогда́ пресла́вное чу́до показа́ся всѣ́мъ правосла́внымъ христіа́номъ: свята́я ико́на Твоя́ па́ки въ пла́мени пребы́сть неврежде́нна. Та́ко увѣ́рившеся о Твое́мъ покро́вѣ, Пречи́стая, сохраня́ющемъ и защища́ющемъ страну́ Россíйскую, благода́рственнѣ прославля́емъ вели́кая чудеса́ Твоя́, и отъ глубины́ серде́чныя вопіе́мъ Ти́:

Ра́дуйся, святу́ю ико́ну Твою́ во спасе́ніе на́ше изъ пла́мене чуде́сно сохрани́вшая; ра́дуйся, сію́ премно́гими чудесы́ по все́й вселе́ннѣй просла́вившая. Ра́дуйся, я́ко моля́щимся предъ свято́ю ико́ною Твое́ю душе́вное и тѣле́сное здра́віе подае́ши; ра́дуйся, я́ко всѣ́мъ упова́ющимъ на Тя́ спасе́ніе да́руеши. Ра́дуйся, я́ко Ты́ еси́ святы́хъ хра́мовъ пе́рвѣйшее украше́ніе; ра́дуйся, я́ко Ты́ еси́ всѣ́хъ домо́въ благослове́ніе. Ра́дуйся, я́ко Ты́ еси́ святы́хъ оби́телей покро́въ и защище́ніе; ра́дуйся, я́ко Ты́ еси́ подви́жниковъ ди́вное укрѣпле́ніе. Ра́дуйся, всѣ́хъ благочести́выхъ всевеселя́щее ра́дованіе; ра́дуйся, всего́ ро́да христіа́нскаго заступле́ніе. Ра́дуйся, Путеводи́тельнице на́ша, вводя́щая мно́гихъ въ черто́гъ Ца́рства небе́снаго; ра́дуйся, Засту́пнице, престо́лу Сы́на Твоего́ и Бо́га предстоя́щая и о на́съ хода́тайствующая.

Ра́дуйся, Пресвята́я Влады́чице Богоро́дице, благода́ть и ми́лость ико́ною Твое́ю на́мъ явля́ющая.

Конда́къ 7

Хотя́ вели́кій кня́зь Васи́лій пренести́ святу́ю ико́ну Твою́, Влады́чице, въ Москву́ на защище́ніе сто́льному гра́ду, егда́ бы́сть вели́кое наше́ствіе ага́рянское, посла́ во Влади́міръ отъ духо́внаго чи́на лю́ди за честно́ю ико́ною Твое́ю, нарица́емою "Влади́мірскою", крѣ́пкое бо заступле́ніе отъ тоя́ позна́. Приближа́ющейся же святѣ́й ико́нѣ, въ срѣ́теніе ея́ изыдо́ша са́мъ кня́зь съ боя́ры, и святи́тель Бо́жій Кипріа́нъ со всѣ́мъ свяще́ннымъ собо́ромъ и мно́жествомъ наро́да, и поклони́шася предъ не́ю до земли́, я́ко Само́й Тебѣ́, Пречи́стая Богоро́дице, къ ни́мъ приходя́щей. И вси́, взира́юще на о́бразъ Тво́й, мно́ги сле́зы пролива́ху, свята́я же Це́рковь ра́достно взыва́ше: "пріиди́те, Россíйстіи собо́ри, пріиди́те, вѣ́рныхъ совокупле́нія, во срѣ́теніе Цари́цы Богоотрокови́цы!" И ны́нѣ вси́ правосла́вніи лю́діе, притека́я къ цѣльбоно́снѣй Твое́й ико́нѣ, съ любо́вію Тя́ сла́вятъ, пою́ще Бо́гу: Аллилу́ія.

Икосъ 7

Ди́вная чудеса́ бы́ша отъ Тебе́, Засту́пнице, въ наше́ствіе ага́рянское, того́жде бо дне́, въ о́ньже въ Москву́ принесе́на бы́сть честна́я ико́на Твоя́, яви́лася еси́ вождю́ ага́рянскому съ а́нгелы небе́сными, обнаже́нныя мечи́ держа́щими, и си́мъ видѣ́ніемъ устраши́вши вра́жія полки́, заста́вила еси́ я́ спѣ́шно бѣжа́ти отъ предѣ́лъ Моско́вскихъ. Кто́ же возмо́жетъ изрещи́ Твою́ къ на́мъ любо́вь, Богоро́дице? Кто́ возглаго́летъ си́лы Твоя́, дарова́нныя ико́нѣ Твое́й? Сего́ ра́ди пѣ́снь хвалы́ и благодаре́нія воспѣва́емъ Ти́ си́це:

Ра́дуйся, во гра́дѣ Москвѣ́ чудотво́рною Твое́ю ико́ною пребыва́ти благоволи́вшая; ра́дуйся, и гра́дъ Влади́міръ, по пренесе́ніи ико́ны, Твои́мъ заступле́ніемъ не оста́вившая. Ра́дуйся, ико́ною Твое́ю гра́дъ Москву́ освяти́вшая; ра́дуйся, то́ю упова́ющихъ на Тя́ возвесели́вшая. Ра́дуйся, я́ко мольбы́ наро́да, во срѣ́теніе святы́я ико́ны изше́дшаго услы́шала еси́; ра́дуйся, я́ко сле́зныя во́згласы его́: "о, Ма́ти Бо́жія, спаси́ зе́млю Россíйскую", прія́ла еси́. Ра́дуйся, я́ко явле́ніемъ со святи́тели моско́вскими и мно́жествомъ вооруже́нныхъ а́нгеловъ врага́ устраши́ла еси́; ра́дуйся, я́ко отъ предѣ́лъ Моско́вскихъ отъити́ гро́зно ему́ повелѣ́ла еси́. Ра́дуйся, сла́вную побѣ́ду надъ враги́ безъ бра́ни пода́вшая; ра́дуйся, безъ проли́тія кро́ве одолѣ́ніе правосла́вному во́инству дарова́вшая. Ра́дуйся, гра́дъ Москву́ отъ раззоре́нія изба́вльшая; ра́дуйся, страну́ на́шу отъ порабоще́нія спа́сшая.

Ра́дуйся, Пресвята́я Влады́чице Богоро́дице, благода́ть и ми́лость ико́ною Твое́ю на́мъ явля́ющая.

Конда́къ 8

Стра́ннѣй и преди́внѣй соверши́вшейся по́мощію Твое́ю, Влады́чице, побѣ́дѣ, вси́ концы́ земли́ удиви́шася и хвалу́ воспѣ́ша Ти́; вели́кій же кня́зь узрѣ́въ чудотво́рную Твою́ ико́ну, во срѣ́теніе его́ изъ гра́да изнесе́нную, со слеза́ми припаде́ къ не́й и возблагодари́ Тя́ си́це: "о, Всепѣ́тая, непосты́дная христіа́нъ Засту́пнице! Ты́ яви́ла еси́ на́мъ ве́ліе милосе́рдіе, па́че упова́нія изба́вльши ны́ отъ безбо́жныхъ враго́въ". Тѣ́мже и свята́я Це́рковь прославля́етъ сію́ ди́вную па́мять, свяще́нно соверша́ющи ю́. Мы́ же вѣ́руемъ и надѣ́емся, я́ко не пре́зриши и ны́нѣ гла́съ моле́нія рабо́въ Твои́хъ, и́мя Твое́ на по́мощь призыва́ющихъ и воспѣва́ющихъ Бо́гу: Аллилу́ія.

Икосъ 8

Вси́ правосла́вніи лю́діе сла́вятъ и́мя Твое́, о Всепѣ́тая Ма́ти, честны́мъ бо предста́тельствомъ Твои́мъ мно́гое мно́жество чуде́съ яви́ла еси́, страну́ Россíйскую сохраня́ющи, и мно́жество враго́въ, напада́ющихъ на ню́, устраша́ющи и дале́че отъ нея́ отгоня́ющи. Нѣ́сть числа́ ми́лостемъ Твои́мъ, Влады́чице: ди́вна су́ть дѣла́ Твоя́, и ди́вна пречестна́я Твоя́ ико́на, предъ не́юже припа́дающе, съ вѣ́рою и упова́ніемъ глаго́лемъ Ти́ си́це:

Ра́дуйся, Засту́пнице усе́рдная, моли́твы святи́теля Іо́ны о спасе́ніи гра́да Москвы́ услы́шавшая; ра́дуйся и святы́ни его́ невреди́мо сохрани́вшая. Ра́дуйся, моле́нія уго́дника Бо́жія и́нока Анто́нія ми́лостивно прія́вшая; ра́дуйся, чрезъ него́ побѣ́ду надъ враги́ предвозвѣсти́вшая. Ра́дуйся, во святы́й гра́дъ нечести́вое во́инство не допусти́вшая; ра́дуйся, святы́я хра́мы отъ поруга́нія изба́вившая. Ра́дуйся, я́ко Россíйскую держа́ву и ны́нѣ защища́еши; ра́дуйся, христолюби́вому во́инству россíйскому си́лу и му́жество дару́ющая. Ра́дуйся, Твои́мъ заступле́ніемъ враги́ на́ша устраша́ющая; ра́дуйся, полки́ чуждíя въ бѣ́гство обраща́ющая. Ра́дуйся, гра́ды и ве́си Россíйскія отъ разруше́нія спаса́ющая; ра́дуйся, земно́е на́ше житіе́ до́брѣ устроя́ющая.

Ра́дуйся, Пресвята́я Влады́чице Богоро́дице, благода́ть и ми́лость ико́ною Твое́ю на́мъ явля́ющая.

Конда́къ 9

Вся́кое естество́ а́нгельское, ви́дя Тя́, Богороди́тельнице, у престо́ла Сы́на Твоего́ предстоя́щую, и за страну́ Россíйскую и за вся́ христіа́ны моля́щуюся, восхваля́етъ Тя́. Лю́діе же гра́да Москвы́, ви́дѣвше, ка́ко вели́кимъ кня́земъ Іоа́нномъ ди́вно побѣжде́нъ бы́сть ха́нъ орды́ тата́рскія, и си́лою Твоего́ предста́тельства безчи́сленная по́лчища его́ бѣжа́ша, со слеза́ми сла́ву благодаре́нія Ти́ принесо́ша, я́ко всемогу́щѣй Засту́пницѣ и всеси́льной Помо́щницѣ. И мы́ у́бо, въ се́мъ ми́лость къ на́мъ Бо́жію и моли́твъ Твои́хъ дѣ́йство разумѣва́юще, прославля́емъ Всевы́шняго Го́спода, чудотво́рную си́лу ико́нѣ Твое́й дарова́вшаго, и Ею на́съ отъ тата́рскаго ра́бства изба́вльшаго, воспѣва́юще Ему́: Аллилу́ія.

Икосъ 9

Витíйство человѣ́ческое не возмо́жетъ по достоя́нію благохвали́ти Тя́, Пресвята́я Богоро́дице, и воспѣ́ти неисче́тная чудеса́ Твоя́, отъ первопи́санныя Твоея́ ико́ны явля́емая, и́миже Це́рковь святу́ю благоукраша́еши, гра́ды Россíйскія отъ бѣ́дъ избавля́еши, и вся́ христіа́ны отъ вся́каго зла́ невреди́мы соблюда́еши. Оба́че, Блага́я су́щи, пріими́ отъ на́съ, за премно́гую любо́вь къ на́мъ и ми́лость Твою́, сіе́ хвале́бное пѣ́ніе, да сохраня́еми Твои́мъ всемо́щнымъ заступле́ніемъ, благода́рственнѣ вопіе́мъ Ти́:

Ра́дуйся, Храни́тельнице на́ша, я́ко моли́твы первосвяти́телей россíйскихъ Петра́, Алексíя и Іо́ны прія́ла еси́; ра́дуйся, я́ко сожещи́ гра́дъ Москву́ врагу́ возбрани́ла еси́. Ра́дуйся, я́ко сле́зныя мольбы́ блаже́ннаго Васи́лія услы́шала еси́; ра́дуйся, я́ко тому́ чуде́сное видѣ́ніе яви́ла еси́. Ра́дуйся, я́ко моле́бное пѣ́ніе святы́хъ Се́ргія и Варлаа́ма прія́ти благоволи́ла еси́; ра́дуйся, я́ко хода́тайствомъ Твои́мъ правосу́діе Бо́жіе уми́лостивила еси́. Ра́дуйся, я́ко Ты́ еси́ держа́вы на́шея пресла́вная Защи́тнице; ра́дуйся, я́ко Ты́ еси́ призыва́ющихъ Тя́ непосты́дное упова́ніе. Ра́дуйся, я́ко Ты́ еси́ всѣ́хъ тружда́ющихся по́мощь и укрѣпле́ніе; ра́дуйся, те́плая предъ Бо́гомъ о ка́ющихся грѣ́шницѣхъ Предста́тельнице.

Ра́дуйся, Пресвята́я Влады́чице Богоро́дице, благода́ть и ми́лость ико́ною Твое́ю на́мъ явля́ющая.

Конда́къ 10

Спасти́ хотя́ ду́шу свою́ и сокруше́ніе имы́й о свои́хъ прегрѣше́ніихъ, вели́кій кня́зь Васи́лій съ моли́твою и слеза́ми притека́ше къ Тебѣ́, Пресвята́я Влады́чице, наипа́че же при концѣ́ житія́ своего́ умиле́нно предъ чудотво́рною Влади́мірскою ико́ною Твое́ю моля́шеся, сле́зныма очи́ма взира́я на ню́, и та́ко ти́хую и непосты́дную кончи́ну прія́тъ. Тѣ́мже и мы́, прекло́ньше колѣ́на предъ Твои́мъ пречестны́мъ о́бразомъ, мо́лимъ Тя́, небе́сная Цари́це, не тщу́ сотвори́ти наде́жду на́шу на по́мощь Твою́, и хода́тайствомъ Твои́мъ изба́вити ны́ отъ лю́тыя сме́рти, да во утѣше́ніи зове́мъ Спаси́телю Бо́гу: Аллилу́ія.

Икосъ 10

Стѣна́ еси́ и заступле́ніе всѣ́мъ, съ вѣ́рою и любо́вію прибѣга́ющимъ къ Тебѣ́, Пречи́стая Влады́чице, я́ко чуде́снѣ изба́вила еси́ ца́рство Россíйское отъ по́лчищъ тата́ръ кры́мскихъ и каза́нскихъ, вне́млющи моли́твамъ вѣнцено́снаго о́трока Іоа́нна, и́же умиле́нно предъ свято́ю ико́ною Твое́ю взыва́ше къ Тебѣ́: "о, Пресвята́я Госпоже́ Богоро́дице, покажи́ ми́лость Твою́ на ро́дѣ христіа́нстѣмъ и изба́ви ны́ отъ наше́ствія невѣ́рныхъ". Сего́ ра́ди, осѣня́еми Твои́мъ, Богома́ти, заступле́ніемъ, и къ Твоему́ взира́юще пречи́стому о́бразу, благода́рственнѣ вопіе́мъ Ти́:

Ра́дуйся, Ма́ти Бо́жія, ма́тернею любо́вію на́съ, грѣ́шныхъ, возлюби́вшая; ра́дуйся, свято́ю ико́ною Твое́ю, я́ко о́блакомъ свѣ́тлымъ, на́съ огражда́ющая. Ра́дуйся, Милосе́рдая, милосе́рдія две́ри на́мъ отверза́ющая; ра́дуйся, къ дѣло́мъ милосе́рдія и благотворе́нія на́съ возбужда́ющая. Ра́дуйся, Всесвята́я, святы́я за́повѣди испо́лняти на́съ науча́ющая; ра́дуйся, е́же люби́ти дру́гъ дру́га по за́повѣди Госпо́дни на́съ наставля́ющая. Ра́дуйся, Пренепоро́чная, въ непоро́чнѣмъ житіи́ вѣ́рныхъ укрѣпля́ющая; ра́дуйся, на́съ, грѣ́шныхъ, къ покая́нію призыва́ющая. Ра́дуйся, Богоблагода́тная, благода́тію Сы́на Твоего́ и Бо́га мра́къ грѣха́ въ на́съ разгоня́ющая; ра́дуйся, осѣне́ніемъ святы́я Твоея́ ико́ны злы́хъ духо́въ отъ на́съ отгоня́ющая. Ра́дуйся, Присноблаже́нная, блаже́нныя оби́тели на́мъ уготовля́ющая; ра́дуйся, моли́твами Твои́ми две́ри ра́йскія на́мъ отверза́ющая.

Ра́дуйся, Пресвята́я Влады́чице Богоро́дице, благода́ть и ми́лость ико́ною Твое́ю на́мъ явля́ющая.

Конда́къ 11

Пѣ́ніе вся́кое не довлѣ́етъ къ прославле́нію вели́чества Твоего́, Влады́чице, я́ко изба́вила еси́ гра́дъ Москву́ отъ о́гненнаго разруше́нія: егда́ бо пла́мень о́гненный гра́дъ обнима́ше и приближа́шеся ко хра́му, идѣ́же чу́дная сія́ ико́на Твоя́ стоя́ше, мно́зи благочести́віи лю́діе ко хра́му устреми́шася, во е́же спасти́ ю́ отъ о́гненнаго пла́мене, но не возмого́ша подъя́ти ю́ и изнести́ изъ хра́ма; то́ю бо ты́ Сама́, Засту́пнице, огради́ла еси́ святы́й хра́мъ и укроти́ла еси́ бу́рю о́гненную во гра́дѣ, я́вльшися верху́ хра́ма во свѣтоза́рнѣмъ одѣя́ніи, и ри́зами Твои́ми святы́й хра́мъ и гра́дъ покрыва́ющи. Тѣ́мже, ди́вная дѣла́ Твоя́ помина́юще, мо́лимъ Тя́, Пресвята́я Богоро́дице, и ны́нѣ воздви́гни ру́цѣ Твои́ къ Сы́ну Твоему́ и Бо́гу на́шему, да милосе́рдіе Его́ неотсту́пно бу́детъ отъ на́съ, вопію́щихъ Ему́: Аллилу́ія.

Икосъ 11

Свѣтоза́рнѣ сія́етъ свята́я Твоя́ ико́на, Пречи́стая Влады́чице, явле́нными чудесы́ утѣша́ющи правосла́вныя лю́ди россíйскія, и́же притека́ютъ къ Тебѣ́ съ моли́твою въ тру́дныхъ обстоя́ніихъ, упова́юще на Твое́ заступле́ніе. Ца́рь же Іоа́ннъ, исходя́ на бра́нь ко гра́ду Каза́ни, все́ ца́рство свое́ подъ покро́въ Тво́й поручи́; Ты́ же не отри́нула еси́ моли́твъ его́, и по́мощію Твое́ю сла́вная побѣ́да надъ вра́ги дарова́ся. И мы́ у́бо, припа́дающе къ Твоему́ свято́му о́бразу, и все́ упова́ніе на Тя́ возложи́вше, воспѣва́емъ ми́лость Твою́ си́це:

Ра́дуйся, усе́рдная Засту́пнице, заступле́ніе во всѣ́хъ путе́хъ жи́зни на́мъ подава́ющая; ра́дуйся, отъ вся́кія бѣды́ и напа́сти избавля́ющая. Ра́дуйся, Храни́тельнице на́ша, отъ нападе́нія злы́хъ разбо́йниковъ и та́йныхъ убíйцъ на́съ охраня́ющая; ра́дуйся, отъ граби́телей и та́тей жили́ща и достоя́нія на́ша огражда́ющая. Ра́дуйся, Путеводи́тельнице, путеше́ствующимъ по мо́рю ти́хое приста́нище дару́ющая; ра́дуйся, стра́шныя бу́ри и во́лны морскíя моли́твами Твои́ми укроща́ющая. Ра́дуйся, Покрови́тельнице, отъ о́гненнаго пла́мене на́съ покрыва́ющая; ра́дуйся, отъ тру́са и потопле́нія на́съ сохраня́ющая. Ра́дуйся, ско́рая Засту́пнице, отъ навѣ́та клеветнико́въ и поноше́нія человѣ́ческаго на́съ защища́ющая; ра́дуйся, въ сердца́хъ на́шихъ зло́бы и вражды́ искореня́ющая. Ра́дуйся, те́плая Моли́твеннице, моли́твами Твои́ми тлетво́рныя вѣ́тры и смертоно́сныя я́звы прекраща́ющая; ра́дуйся, отъ бездо́ждія, гра́да и гла́да на́съ спаса́ющая.

Ра́дуйся, Пресвята́я Влады́чице Богоро́дице, благода́ть и ми́лость ико́ною Твое́ю на́мъ явля́ющая.

Конда́къ 12

Благода́тію Твое́ю, Пресвята́я Богоро́дице, я́коже дре́вле, и дне́сь притека́ющія къ цѣльбоно́снѣй Твое́й ико́нѣ не оставля́еши и призыва́ющимъ Тя́ благопоспѣ́шнѣ вспомоществу́еши. И я́коже услы́шала еси́ моле́нія ско́рбнаго святи́теля Іова, сле́знѣ взыва́вшаго къ Тебѣ́, да спасе́ши въ земли́ Россíйстѣй Правосла́віе, си́це и отъ на́съ, грѣ́шныхъ, пріими́ умиле́нная моле́нія, не оста́ви ми́лость Твою́ отъ на́съ, припа́дающихъ къ пречестно́му о́бразу Твоему́, изба́ви же на́съ отъ вся́кія бѣды́ и въ печа́лехъ бѣ́дствующимъ ско́ро помози́, да Твои́мъ пречи́стымъ хода́тайствомъ спаса́еми, благода́рными усты́ пое́мъ Бо́гови: Аллилу́ія.

Икосъ 12

Пою́ще ди́вная Твоя́ чудеса́, умиле́нно припа́даемъ предъ пречи́стымъ о́бразомъ Твои́мъ, Влады́чице, и благоговѣ́йно лобыза́юще его́, благода́рственнѣ воспомина́емъ заступле́ніе Твое́ ца́рствующему гра́ду въ наше́ствіе ля́ховъ. Услы́шала бо еси́ ско́рбныя моли́твы вѣ́рныхъ рабо́въ Твои́хъ и предвозвѣсти́ла еси́ и́мъ ско́рое освобожде́ніе отъ враго́въ; и та́ко Тобо́ю изба́вленніи, мно́гія сле́зы благодаре́нія предъ свято́ю ико́ною Твое́ю приноша́ху Ти́. Пріими́ и отъ на́съ похва́льную пѣ́снь сію́:

Ра́дуйся, всемо́щная Влады́чице, благода́тною Твое́ю си́лою отъ вра́гъ ви́димыхъ и неви́димыхъ на́съ избавля́ющая; ра́дуйся, отъ смертоно́сныхъ я́звъ и тя́жкихъ неду́говъ свобожда́ющая. Ра́дуйся, Ма́ти Свѣ́та, слѣпы́мъ очеса́ отверза́ющая; ра́дуйся, и́стиннымъ Свѣ́томъ су́щихъ во тмѣ́ и сѣ́ни сме́ртнѣй озаря́ющая. Ра́дуйся, разсла́бленнымъ утвержде́ніе и хромы́мъ хожде́ніе дару́ющая; ра́дуйся, па́дшихъ благода́тію Твое́ю возсталя́ющая. Ра́дуйся, Ма́ти Сло́ва, нѣмы́мъ и косноязы́чнымъ словеса́ открыва́ющая; ра́дуйся, невѣ́рующихъ, е́же прославля́ти Бо́га и воспѣва́ти Тя́, науча́ющая. Ра́дуйся, Врача́ ро́ждшая, оста́вленныхъ врача́ми на ру́цѣ Свои́ пріе́млющая; ра́дуйся, нераска́янныхъ грѣ́шниковъ къ покая́нію обраща́ющая. Ра́дуйся, всѣ́хъ По́моще, ско́рбнымъ вдови́цамъ и си́рымъ помога́ющая; ра́дуйся, а́лчущихъ и жа́ждущихъ пра́вды къ Бо́гу приводя́щая.

Ра́дуйся, Пресвята́я Влады́чице Богоро́дице, благода́ть и ми́лость ико́ною Твое́ю на́мъ явля́ющая.

Конда́къ 13

О, Всепѣ́тая и Всеми́лостивая Ма́ти, Пречи́стая Госпоже́ Богоро́дице! Пріими́ ма́лое сіе́ моле́ніе ны́нѣ Тебѣ́ приноси́мое отъ на́съ, грѣ́шныхъ и недосто́йныхъ рабо́въ Твои́хъ, къ чудотво́рному о́бразу Твоему́ припа́дающихъ; при́зри ми́лостивно на вѣ́ру и упова́ніе на́ше, изба́ви ны́ отъ вся́кихъ бѣ́дъ и скорбе́й, пода́ждь на́мъ въ жи́зни се́й ру́ку по́мощи, испроси́ у Сы́на Твоего́ и Бо́га на́шего премно́гимъ грѣхо́мъ на́шимъ проще́ніе, и въ ча́съ сме́ртный сподо́би ны́ прія́ти кончи́ну живота́ на́шего ми́рну, непосты́дну, и вни́ти въ Ца́рствіе небе́сное, да вы́ну прославля́емъ безмѣ́рное милосе́рдіе Бо́жіе и Твое́ ди́вное о на́съ заступле́ніе, воспѣва́юще вѣ́чно Бо́гу: Аллилу́ія.

Се́й конда́къ глаго́лется три́жды. Та́же Икосъ 1-й и Конда́къ 1-й

Моли́тва ко Пресвятѣ́й Богоро́дицѣ

О, всеми́лостивая Госпоже́ Богоро́дице, небе́сная Цари́це, всемо́щная Засту́пнице, непосты́дное на́ше Упова́ніе! Благодари́мъ Тя́ о всѣ́хъ вели́кихъ благодѣя́ніихъ, россíйскимъ лю́демъ отъ Тебе́ бы́вшихъ, отъ дре́вле и до дне́сь отъ чудотво́рныя ико́ны Твоея́ явле́нныхъ. И ны́нѣ, преблага́я Влады́чице, при́зри на ны́, грѣ́шныя и недосто́йныя рабы́ Твоя́, яви́ на́мъ ми́лость Твою́ и моли́ Сы́на Твоего́, Христа́ и Бо́га на́шего, о е́же изба́витися на́мъ отъ вся́каго зла́ и сохрани́тися ца́рствующимъ градо́мъ, вся́кому гра́ду и ве́си, и все́й странѣ́ на́шей отъ гла́да, губи́тельства, тру́са, пото́па, огня́, меча́, наше́ствія иноплеме́нникъ и междоусо́бныя бра́ни. Испроси́ Благочести́вѣйшему, Самодержа́внѣйшему, Вели́кому Госуда́рю на́шему Импера́тору [и́мярекъ] и всему́ Ца́рствующему До́му благоде́нственное и ми́рное житіе́, здра́віе, долгоде́нствіе, во все́мъ благо́е поспѣше́ніе и спасе́ніе. [или́: стра́ждущую же страну́ Россíйскую отъ лю́тыхъ безбо́жникъ и вла́сти и́хъ Госпо́дь да свободи́тъ, и да возста́витъ престо́лъ правосла́вныхъ царе́й; вѣ́рныхъ рабо́въ Его́, въ ско́рби и печа́ли де́нь и но́щь вопію́щихъ къ Нему́, многоболѣ́зный во́пль да услы́шитъ и да изведе́тъ отъ поги́бели живо́тъ на́шъ.] Сохрани́ и умудри́ па́стырей Це́ркви, е́же досто́йно пасти́ ста́до Христо́во и пра́во пра́вити сло́во и́стины; укрѣпи́ христолюби́вое всероссíйское во́инство, пода́ждь ду́хъ совѣ́та и ра́зума военача́льникомъ, градонача́льникомъ и всѣ́мъ, и́же во вла́сти су́ть; ниспосли́ свято́е Твое́ благослове́ніе и всѣ́мъ правосла́внымъ христіа́намъ, покланя́ющимся и моля́щимся Ти́ предъ цѣльбоно́сною Твое́ю ико́ною. Бу́ди на́мъ Засту́пница и Хода́таица предъ престо́ломъ Всевы́шняго, идѣ́же предстои́ши. Къ кому́ у́бо прибѣ́гнемъ, а́ще не къ Тебѣ́, Влады́чице? Кому́ принесе́мъ сле́зы и воздыха́нія, а́ще не къ Тебѣ́, Пресвята́я Богоро́дице? Не и́мамы бо ины́я по́мощи, не и́мамы ины́я наде́жды, ра́звѣ Тебе́, небе́сная Цари́це. Подъ Тво́й покро́въ притека́емъ, моли́твами Твои́ми ниспосли́ на́мъ ми́ръ, здра́віе, земли́ плодоно́сіе, возду́ха благорастворе́ніе, изба́ви ны́ отъ вся́кихъ бѣ́дъ и скорбе́й, отъ вся́кихъ неду́говъ и болѣ́зней, отъ внеза́пныя сме́рти и отъ всѣ́хъ озлобле́ній враго́въ ви́димыхъ и неви́димыхъ. Вразуми́ и научи́ ны́, о Всеми́лостивая Засту́пнице, ка́ко безгрѣ́шно прейти́ пу́ть земна́го сего́ житія́: Ты́ вѣ́си не́мощи на́ша, вѣ́си и согрѣше́нія на́ша, но и вѣ́ру вѣ́си, и упова́ніе ви́диши; да́руй же на́мъ исправле́ніе грѣхо́вныя жи́зни и умягчи́ зла́я сердца́ на́ша. Укрѣпи́ въ на́съ пра́вую вѣ́ру, вложи́ въ сердца́ на́ша ду́хъ стра́ха Бо́жія, ду́хъ благоче́стія, ду́хъ смире́нія, терпѣ́нія и любве́, въ до́брыхъ дѣ́лѣхъ преуспѣ́яніе, изба́ви же ны́ отъ искуше́ній, отъ па́губныхъ душевре́дныхъ уче́ній, отъ невѣ́рія, развраще́нія и поги́бели вѣ́чныя. Тебе́ у́бо про́симъ, Пречи́стая Влады́чице, и припа́дающе предъ свято́ю Твое́ю ико́ною, мо́лимся, умилосе́рдися на ны́ и поми́луй ны́, въ стра́шный же де́нь Суда́ хода́тайствомъ и заступле́ніемъ Твои́мъ сподо́би ны́ ста́ти одесну́ю Сы́на Твоего́, Христа́ Бо́га на́шего, Ему́же подоба́етъ вся́кая сла́ва, че́сть и поклоне́ніе, со безнача́льнымъ Его́ Отце́мъ, и Пресвяты́мъ и Благи́мъ и Единосу́щнымъ Его́ Ду́хомъ, ны́нѣ и при́сно и во вѣ́ки вѣко́въ. Ами́нь.

Тропа́рь, гла́съ 4

Дне́сь свѣ́тло красу́ется сла́внѣйшій гра́дъ Москва́, я́ко зарю́ со́лнечную, воспріе́мши, Влады́чице, чудотво́рную Твою́ ико́ну, къ не́йже ны́нѣ мы́ притека́юще и моля́щеся Тебѣ́, взыва́емъ си́це: о пречу́дная Влады́чице Богоро́дице! Моли́ся изъ Тебе́ воплоще́нному Христу́ Бо́гу на́шему, да изба́витъ гра́дъ се́й и вся́ гра́ды и страны́ христіа́нскія невреди́мы отъ всѣ́хъ навѣ́тъ вра́жіихъ и спасе́тъ ду́ши на́ша, я́ко Милосе́рдъ.

Конда́къ, гла́съ 8

Взбра́нной Воево́дѣ побѣди́тельная, я́ко изба́вльшеся отъ злы́хъ прише́ствіемъ Твоего́ честна́го о́браза, Влады́чице Богоро́дице, свѣ́тло сотворя́емъ празднество́ срѣ́тенія Твоего́, и обы́чно зове́мъ Ти́: ра́дуйся, Невѣ́сто неневѣ́стная.

Велича́ніе

Велича́емъ Тя́, Пресвята́я Дѣ́во, и чте́мъ о́бразъ Тво́й святы́й, и́мже то́чиши исцѣле́нія всѣ́мъ, съ вѣ́рою притека́ющимъ.