Конда́къ 1
Взбра́нной Воево́дѣ, Влады́чицѣ на́шей Богоро́дицѣ, осѣни́вшей страну́ Россíйскую огнезра́чнымъ Своея́ ико́ны на То́лгѣ явле́ніемъ, похва́льное возглаша́емъ пѣ́ніе. Ты́ же, о Богома́ти, я́ко иму́щая держа́ву непобѣди́мую, отъ вся́кихъ бѣ́дъ изба́ви на́съ, зову́щихъ:
Ра́дуйся, Ра́досте на́ша, ико́ною Твое́ю на́съ при́сно утѣша́ющая.
Икосъ 1
Ангелъ земны́й и человѣ́къ небе́сный, святи́тель Христо́въ Три́фонъ, свы́ше предъизбра́нъ бы́сть послужи́ти святы́я ико́ны Твоея́ на То́лгѣ явле́нію, Влады́чице Преблага́я: то́й бо, пу́ть творя́ отъ Бѣлое́зера по рѣцѣ́ Во́лгѣ, въ нощи́ сто́лпъ о́гненный узрѣ́ на бре́зѣ ея́ пусты́нномъ и, дости́гнувъ мѣ́ста, Тобо́ю избра́ннаго, ви́дѣ святу́ю ико́ну Твою́ на возду́сѣ стоя́щую и свѣ́томъ небе́снымъ сія́ющую, къ не́йже моле́бно припа́дая, со слеза́ми те́плыми си́це къ Тебѣ́ возглаша́ше:
Ра́дуйся, свѣще́ богопріе́мная, темноту́ ду́шъ на́шихъ озаря́ющая; ра́дуйся, заре́ невече́рняя, мглу́ грѣхо́въ на́шихъ разгоня́ющая. Ра́дуйся, чу́дно прія́вшая Христа́ Бо́га, я́ко у́гль горя́щій съ небе́снаго же́ртвенника; ра́дуйся, купино́ неопали́мая, законополо́жникомъ Моисе́емъ предзри́мая. Ра́дуйся, сто́лпе о́гненный, но́ваго Изра́иля путеводя́щій; ра́дуйся, о́блаче росоно́сный, зно́й страсте́й на́шихъ утоля́ющій. Ра́дуйся, Предста́тельнице всемогу́щая, ту́чи гнѣ́ва Бо́жія отъ гла́въ на́шихъ отводя́щая; ра́дуйся, Засту́пнице усе́рдная, отъ поги́бели вѣ́чныя на́съ избавля́ющая. Ра́дуйся, о́бразъ Тво́й честны́й въ зало́гъ спасе́нія на́мъ дарова́вшая; ра́дуйся, огнезра́чнымъ явле́ніемъ его́ на То́лгѣ страну́ Россíйскую благослови́вшая.
Ра́дуйся, Ра́досте на́ша, ико́ною Твое́ю на́съ при́сно утѣша́ющая.
Конда́къ 2
Ви́дя то́ки чуде́съ и исцѣле́ній отъ святы́я ико́ны Твоея́, Пренепоро́чная Дѣ́во, недоумѣва́емъ пѣсносло́вити Тя́ по достоя́нію: кíй бо язы́къ человѣ́ческій возмо́жетъ изрещи́ вели́чія Твоя́, о ди́вная Пала́то Влады́чня? Оба́че, любо́вію Твое́ю побѣжда́еми, дерза́емъ проповѣ́дати чудеса́ Твоя́, на То́лгѣ явле́нная, и хвале́бно пѣ́ти всѣ́хъ Творцу́: Аллилу́ія.
Икосъ 2
Разумѣ́въ посѣще́ніе Бо́жіе, чу́дный святи́тель со стра́хомъ сле́зно моля́шеся предъ огнезра́чною Твое́ю ико́ною, Богома́ти Пречи́стая, и смотрѣ́ніемъ Бо́жіимъ оста́ви же́злъ сво́й святи́тельскій на о́номъ бре́зѣ, идѣ́же моля́шеся. На у́тріе же спу́тницы святи́теля, и́щуще жезла́ его́, обрѣто́ша вмѣ́стѣ съ ни́мъ та́мо Твою́ небоявле́нную ико́ну, на земли́ среди́ древе́съ стоя́щую. И та́ко всѣ́мъ явле́нъ бы́сть зало́гъ Бо́жія благода́ти, странѣ́ Россíйской свы́ше дарова́нный благоволе́ніемъ Вседержи́теля, внуша́ющаго на́мъ хвале́бно вопи́ти къ Тебѣ́:
Ра́дуйся, дѣ́вства цвѣ́те неувяда́емый и благово́нный; ра́дуйся, бѣлоснѣ́жный кри́не, росо́ю Свята́го Ду́ха напое́нный. Ра́дуйся, Ма́ти Бо́га Вы́шняго, милосе́рдіемъ Твои́мъ и ни́жнихъ не оставля́ющая; ра́дуйся, Цари́це небесе́ и земли́, Ейже вся́ стихíи покоря́ются. Ра́дуйся, мо́сте Боже́ственный, и́мже вѣ́рніи благонаде́жно прехо́дятъ мо́ря жите́йскаго лю́тую пучи́ну; ра́дуйся, Путеводи́тельнице блага́я, на стези́ спаси́тельныя на́съ наставля́ющая. Ра́дуйся, гра́де Царя́ Вели́каго, въ не́мъ же стра́нники земны́я убѣ́жище благоти́шное обрѣта́ютъ; ра́дуйся, приста́нище ти́хое обурева́емыхъ. Ра́дуйся, стѣно́ огражде́нія ро́ду христіа́нскому; ра́дуйся, покро́ве мíру, ши́ршій о́блака.
Ра́дуйся, Ра́досте на́ша, ико́ною Твое́ю на́съ при́сно утѣша́ющая.
Конда́къ 3
Си́ла благода́тная, ико́нѣ Твое́й дарова́нная, Пресвята́я Госпоже́ Богоро́дице, созыва́етъ вѣ́рныхъ собо́ры пѣ́сньми духо́вными сла́вити Тя́, Честнѣ́йшую херуви́мовъ и серафи́мовъ. Ибо, ро́ждши нетлѣ́нно Еди́наго отъ Тро́ицы, предстои́ши ны́нѣ предъ престо́ломъ Тріѵпоста́снаго Божества́, идѣ́же во́инства го́рнія съ тре́петомъ вопію́тъ: Аллилу́ія.
Икосъ 3
Имѣ́я попече́ніе о созда́ніи хра́ма Бо́жія и оби́тели и́ноческія на мѣ́стѣ явле́нія чу́дныя ико́ны Твоея́ на То́лгѣ, Влады́чице Всеми́лостивая, святи́тель Три́фонъ вку́пѣ съ насе́льники гра́да Яросла́вля, со усе́рдіемъ мно́гимъ, обыде́нно хра́мъ Бо́жій воздвига́ютъ, и та́ко созида́ютъ но́вую оби́тель святу́ю, въ не́йже немо́лчно воспѣва́ются Тебѣ́ благохвале́нія сицева́я:
Ра́дуйся, страну́ Россíйскую въ жре́бій достоя́нія Себѣ́ избра́вшая; ра́дуйся, ико́ны Твои́ чудотво́рныя, я́ко звѣ́зды въ не́й умно́жившая. Ра́дуйся, сія́ніемъ чуде́съ Твои́хъ ве́сну спасе́нія на́мъ возвѣща́ющая; ра́дуйся, теплото́ю милосе́рдія Твоего́ оледенѣ́лая сердца́ на́ша согрѣва́ющая. Ра́дуйся, щедро́тами Твои́ми вся́къ во́зрастъ вѣ́рныхъ снабдѣва́ющая; ра́дуйся, младе́нцы ми́лостивно окормля́ющая. Ра́дуйся, ста́рцы любвеоби́льно упокоева́ющая; ра́дуйся, вдови́цы и сироты́ благосострада́тельно призрѣва́ющая. Ра́дуйся, ка́ющихся грѣ́шниковъ Спору́чнице держа́вная; ра́дуйся, и́стинныхъ рабо́въ Бо́жіихъ Помо́щнице всеизря́дная.
Ра́дуйся, Ра́досте на́ша, ико́ною Твое́ю на́съ при́сно утѣша́ющая.
Конда́къ 4
Бу́ря скорбе́й Тобо́ю утоля́ется и свирѣ́пыя страсте́й во́лны въ тишину́ прелага́ются, Преблагослове́нная Дѣ́во, и́бо Тебѣ́ даде́ся ве́лія благода́ть всемíрнаго заступле́нія. Тѣ́мже на святу́ю ико́ну Твою́ умиле́нно взира́я, въ ско́рбехъ отра́ду, въ неду́зѣхъ врачевство́, оби́льно отъ нея́ почерпа́емъ и зове́мъ гла́сы хвале́бными на не́й изображе́нному вку́пѣ съ Тобо́ю Сы́ну Твоему́ и Бо́гу: Аллилу́ія.
Икосъ 4
Слы́шавше бли́жніи и да́льніи, я́ко чуде́съ исто́чникъ яви́ся на То́лгѣ, свята́я и пречи́стая ико́на Твоя́, Цари́це и Влады́чице всея́ тва́ри, со усе́рдіемъ мно́гимъ притека́ху къ цѣле́бному Твоему́ о́бразу, пріе́мля отъ него́ дары́ неисче́тныхъ Твои́хъ щедро́тъ. Тѣ́мже и мы́, недосто́йніи, стезе́ю отце́въ на́шихъ ше́ствуя, съ вѣ́рою и любо́вію припа́даемъ къ Твое́й чудотво́рнѣй ико́нѣ и Тебѣ́ отъ глубины́ серде́чныя вопіе́мъ:
Ра́дуйся, я́ко ико́на Твоя́, а́нгелами неви́димо окружа́емая, возду́хъ освяти́; ра́дуйся, я́ко ико́на Твоя́, огнезра́чно на То́лгѣ яви́вшаяся, всю́ страну́ просвѣти́. Ра́дуйся, я́ко ико́ною Твое́ю человѣ́цы въ неду́зѣхъ и ско́рбехъ по́мощь ско́рую обрѣта́ютъ; ра́дуйся, я́ко свѣ́томъ ико́ны Твоея́ де́моны прогоня́ются. Ра́дуйся, я́ко ико́на Твоя́ гра́ду Яросла́влю и предѣ́ломъ его́ свы́ше въ наслѣ́діе спаси́тельное дарова́ся; ра́дуйся, я́ко ико́ною Твое́ю оби́тель Твоя́ на То́лгѣ свѣ́тло красу́ется. Ра́дуйся, я́ко предъ Твое́ю ико́ною ца́ріе и святи́тели благоговѣ́йно покланя́ются; ра́дуйся, я́ко ико́ну Твою́ все́ мно́жество правосла́вно вѣ́рующихъ боголѣ́пно че́ствуетъ. Ра́дуйся, богому́дрыхъ и́ноковъ блага́я Помо́щнице во спасе́ніе; ра́дуйся, богопросвѣще́нныя Россíи крѣ́пкое заступле́ніе.
Ра́дуйся, Ра́досте на́ша, ико́ною Твое́ю на́съ при́сно утѣша́ющая.
Конда́къ 5
Боготе́чная звѣзда́, ико́на Твоя́ честна́я, Госпоже́ Богома́ти, страну́ на́шу полу́нощную сія́ніемъ пресла́вныхъ чуде́съ просвѣти́, ю́же, я́ко да́ръ Боже́ственный, Россíя воспріе́мши, прославля́етъ и воспѣва́етъ Твоя́ щедро́ты. Ты́ же, Всеще́драя и Всеблага́я ро́да на́шего Засту́пнице, озари́ и на́ша сердца́ свѣ́томъ благода́тнымъ, да возмо́жемъ богопрія́тно пѣ́ти Го́споду на́шему серафи́мскую пѣ́снь: Аллилу́ія.
Икосъ 5
Ви́дѣвше чу́до пресла́вное, ка́ко внеза́пу отъ ико́ны Твоея́ святы́я, Пречи́стая Дѣ́во, отъ десны́я Твоея́ руки́ и отъ лѣ́выя ноги́ Тобо́ю держи́маго Богомладе́нца, двѣ́ струи́ мѵ́ра благоуха́ющаго и цѣле́бнаго истеко́ша, благоговѣ́йный игу́менъ Ге́рманъ съ бра́тіею у́жаса и ра́дости испо́лнишася и, помазу́яся мѵ́ромъ тѣ́мъ благода́тнымъ, Тебѣ́ сія́ ра́достныя приноша́ху глаго́лы:
Ра́дуйся, алава́стре драгоцѣ́нный, Христо́ва благоуха́нія испо́лненный; ра́дуйся, мѵрохрани́лище исцѣле́ній, никогда́же оскудѣва́ющее. Ра́дуйся, вели́чіемъ чуде́съ Твои́хъ превосходя́щая ра́зумъ человѣ́ческій; ра́дуйся, отъ дски́ сухíя мѵ́ро цѣле́бное пачеесте́ственно излива́ющая. Ра́дуйся, тѣ́мъ мѵ́ромъ неду́ги мно́гія врачу́ющая; ра́дуйся, мѵ́ра излія́ніемъ отъ ико́ны Твоея́ святы́я милосе́рдіе Твое́ къ на́мъ показу́ющая. Ра́дуйся, ду́ши на́ша ороша́ющая къ плодоноше́нію духо́вному; ра́дуйся, сердца́ на́ша увеселя́ющая Твои́мъ боже́ственнымъ о на́съ благопромышле́ніемъ. Ра́дуйся, ста́мно всезлата́я, ма́нну небе́сную храня́щая; ра́дуйся, ски́ніе Жива́го Бо́га.
Ра́дуйся, Ра́досте на́ша, ико́ною Твое́ю на́съ при́сно утѣша́ющая.
Конда́къ 6
Проповѣ́дники богопросвѣще́нніи, апо́столи Христо́вы, егда́ узрѣ́ша въ Ли́ддѣ, на стѣнѣ́ хра́ма Твоего́, нерукотворе́нно изобрази́вшуюся ико́ну Твою́, со благоговѣ́ніемъ е́й поклони́шася, Богома́ти Пречи́стая, и́мже подража́юще, и мы́, смире́нніи, колѣ́на на́ша предъ ди́внымъ и многоцѣле́бнымъ о́бразомъ Твои́мъ, его́же на То́лгѣ огневи́дно яви́ти благоволи́ла еси́, усе́рдно преклоня́емъ, и съ любо́вію воспѣва́емъ ро́ждшемуся отъ Тебе́ Спаси́телю мíра хвале́бную пѣ́снь: Аллилу́ія.
Икосъ 6
Возсія́ на́мъ на То́лгѣ немерца́ющая заря́ вели́кихъ чуде́съ, ико́на Твоя́ боже́ственная, Богоро́дице Дѣ́во, въ не́йже зало́гъ несомнѣ́нный Бо́жія благоволе́нія и Твоего́ небе́снаго заступле́нія, странѣ́ Россíйской ниспосла́ся отъ щедрода́тельныя руки́ Вседержи́теля Бо́га. Тѣ́мже, ра́дующеся, славосло́вимъ Твое́ милосе́рдіе и пѣ́сненно Тебѣ́ вопіе́мъ:
Ра́дуйся, Храни́тельнице на́ша и Утвержде́ніе; ра́дуйся, Помо́щнице на́ша и Похвало́. Ра́дуйся, ни́щихъ и убо́гихъ изоби́льное бога́тство; ра́дуйся, не гнуша́ющаяся сами́хъ презрѣ́нныхъ и отве́рженныхъ. Ра́дуйся, отъ ро́ва поги́бельнаго исхища́ющая взыва́ющихъ грѣ́шниковъ; ра́дуйся, отъ вра́тъ сме́ртныхъ возраща́ющая опа́сно больны́хъ. Ра́дуйся, Бо́гомъ дарова́нная отра́да стра́ждущихъ; ра́дуйся, ско́рое услы́шаніе вѣ́рно Тебѣ́ моля́щихся. Ра́дуйся, благода́тное утѣше́ніе всѣ́хъ скорбя́щихъ; ра́дуйся, несокруши́мое защище́ніе на Тя́ упова́ющихъ.
Ра́дуйся, Ра́досте на́ша, ико́ною Твое́ю на́съ при́сно утѣша́ющая.
Конда́къ 7
Хотя́ Человѣколю́бецъ Христо́съ яви́ти ве́лію любо́вь Свою́ къ лю́демъ, иску́пленнымъ честно́ю Его́ Кро́вію, Тебе́, Ма́терь Свою́ Пренепоро́чную, въ покро́въ и защи́ту ро́ду христіа́нскому дарова́. Ты́ бо вои́стинну сердобо́льная Ма́ти явля́ешися всѣ́мъ съ вѣ́рою и упова́ніемъ прибѣга́ющимъ къ Твоему́ те́плому заступле́нію, его́же не лиши́ и на́съ, сла́вящихъ пречестно́е и́мя Твое́ и покланя́ющихся чудотво́рному о́бразу Твоему́, Сы́ну же Твоему́ зову́щихъ: Аллилу́ія.
Икосъ 7
Но́вое и преди́вное чу́до яви́ всѣ́хъ чуде́съ Творе́цъ и всея́ тва́ри Влады́ка, егда́ во вре́мя пожа́ра оби́тели Твоея́ на То́лгѣ, попуще́ніемъ Бо́жіимъ сгорѣ́вшу внеза́пу и хра́му Твоему́, ико́на Твоя́ свята́я неопали́ма и невреди́ма въ не́мъ сохрани́ся, а́нгельскима рука́ма неви́димо пронесе́нная изъ заключе́ннаго и огне́мъ пыла́ющаго хра́ма, внѣ́ монастыря́, въ лѣсну́ю дубра́ву, идѣ́же на дре́вѣ стоя́щая и свѣ́томъ сія́ющая обрѣ́тена бы́сть, Твои́мъ благопромышле́ніемъ, Пречи́стая и Преблагослове́нная Дѣ́во, слы́шащая отъ на́съ сія́ достодо́лжныя похвалы́:
Ра́дуйся, сія́ющая благода́тію и сла́вою преди́вныхъ чуде́съ; ра́дуйся, облече́нная въ свѣ́тлую оде́жду ми́лостей и щедро́тъ. Ра́дуйся, си́лою Твое́ю боже́ственною си́лу естества́ о́гненнаго побѣди́вшая; ра́дуйся, ико́ну Твою́ честну́ю несгара́ему въ огни́ содѣ́лавшая. Ра́дуйся, зало́гу Твоего́ къ на́мъ благоволе́нія безвре́менно поги́бнути непопусти́вшая; ра́дуйся, а́нгельскима рука́ма его́ изъ пла́мене исхити́вшая. Ра́дуйся, свѣ́тъ ти́хій и ра́достный отъ многочуде́снаго о́браза Твоего́ возсія́вшая; ра́дуйся, ско́рбная сердца́ и́ноковъ оби́тели Твоея́ обрѣ́теніемъ его́ возвесели́вшая. Ра́дуйся, сѣ́тованіе и́хъ на ликова́ніе преложи́вшая; ра́дуйся, лише́ніе и́хъ щедрода́тельно воспо́лнившая.
Ра́дуйся, Ра́досте на́ша, ико́ною Твое́ю на́съ при́сно утѣша́ющая.
Конда́къ 8
Стра́нники мы́ и прише́льцы въ мíрѣ се́мъ скороте́чнѣмъ, пу́ть творя́ къ вѣ́чному небе́сному Оте́чествію на́шему, Тебе́, благу́ю Одиги́трію, мо́лимъ и про́симъ: руково́дствуй на́съ стезе́ю спаси́тельною за́повѣдей Христо́выхъ къ свѣ́тлому гра́ду Іерусали́му го́рнему, и не попусти́ уклони́тися въ де́бри грѣхо́вныя, веду́щія къ темни́цѣ а́дской, да спаса́еми по́мощію Твое́ю держа́вною, сподо́бимся на земли́ живы́хъ пѣ́ти Созда́телю на́шему вѣ́чно хвале́бную пѣ́снь: Аллилу́ія.
Икосъ 8
Всѣ́мъ вся́ блага́я и спаси́тельная да́руеши отъ святы́я чудотво́рныя ико́ны Твоея́, Богома́ти Пречи́стая, ю́же я́ко сокро́вище многоцѣ́нное зря́ще, со гла́сомъ ра́дованія и благодаре́нія взыва́емъ Ти́:
Ра́дуйся, скорбе́й и печа́лей благода́тная Утоли́тельнице; ра́дуйся, неду́говъ душе́вныхъ и тѣле́сныхъ до́брая Цѣле́бнице. Ра́дуйся, утопа́ющихъ скоропредста́тельная Избави́тельнице; ра́дуйся, путеше́ствующихъ благонаде́жная Храни́тельнице. Ра́дуйся, слѣпы́хъ просвѣще́ніе; ра́дуйся, хромы́хъ правохожде́ніе. Ра́дуйся, нѣмы́хъ ясноглаго́ланіе; ра́дуйся, прокаже́нныхъ очище́ніе. Ра́дуйся, глухи́хъ благослы́шаніе; ра́дуйся, мертвецо́въ оживле́ніе.
Ра́дуйся, Ра́досте на́ша, ико́ною Твое́ю на́съ при́сно утѣша́ющая.
Конда́къ 9
Вся́ страна́ на́ша правосла́вная ми́лостями Твои́ми, Богома́ти, облагода́тствованная, немо́лчно сла́витъ и́мя Твое́ и благоговѣ́йно почита́етъ пречи́стаго ли́ка Твоего́ изображе́ніе, и́мже ди́вная и пресла́вная обы́кла еси́ явля́ти на́мъ чудеса́. Тѣ́мже сы́нове Россíйстіи ико́ну Твою́ въ щи́тъ и огражде́ніе отъ враго́въ ви́димыхъ и неви́димыхъ при́сно имѣ́ютъ, и по́мощію Твое́ю свято́ю побѣжда́я супоста́ты своя́, вопію́тъ Царю́ небесе́ и земли́: Аллилу́ія.
Икосъ 9
Витíйство на́ше пѣ́сненное не довлѣ́етъ ко изглаго́ланію всѣ́хъ чуде́съ, Тобо́ю, Влады́чице, явле́нныхъ и присноявля́емыхъ на́мъ отъ многоцѣле́бныя ико́ны Твоея́ на То́лгѣ. Но Ты́, я́ко Блага́я и Милосе́рдая Ма́ти, не возгнуша́йся на́шихъ недовлѣ́ющихъ и недосто́йныхъ похва́лъ и ми́лостивно преклони́ся къ Тебѣ́ вопію́щимъ:
Ра́дуйся, Обра́дованная и Преблагослове́нная Дѣ́во; ра́дуйся, я́ко Госпо́дь съ Тобо́ю и Тобо́ю съ на́ми. Ра́дуйся, еди́на избра́нная и до́брая въ жена́хъ; ра́дуйся, ро́ду человѣ́ческому отве́рзшая вхо́дъ въ Ца́рствіе го́рнее. Ра́дуйся, пло́дъ возрасти́вшая на́мъ - спасе́ніе; ра́дуйся, Спа́са ро́ждшая ду́шъ на́шихъ. Ра́дуйся, во объя́тіяхъ Твои́хъ держа́вшая Вседержи́теля; ра́дуйся, на руку́ Твое́ю носи́вшая всѣ́хъ Творца́. Ра́дуйся, млеко́мъ Твои́мъ пита́вшая Пита́теля вселе́нныя; ра́дуйся, одушевле́нный хра́ме Бо́га Сло́ва.
Ра́дуйся, Ра́досте на́ша, ико́ною Твое́ю на́съ при́сно утѣша́ющая.
Конда́къ 10
Спаси́тельное и ти́хое приста́нище отъ треволне́ній мо́ря жите́йскаго, ви́димъ святу́ю оби́тель Твою́ на То́лгѣ, въ не́й же ико́на Твоя́, Влады́чице, луча́ми чуде́съ вѣ́рныя просвѣща́я, всѣ́хъ руково́дствуетъ на пу́ть благоче́стія и спасе́нія. Сего́ ра́ди прославля́емъ Твою́ благосты́ню, я́ко неотсту́пно съ на́ми ико́ною Твое́ю пребыва́еши, ду́ши и тѣлеса́ на́ша е́ю благода́тно врачу́еши, и вы́ну хода́тайствуеши за на́съ у престо́ла Пресвяты́я Тро́ицы, идѣ́же ли́цы святы́хъ ра́достно возглаша́ютъ: Аллилу́ія.
Икосъ 10
Стѣна́ и покро́въ гра́ду Яросла́влю даде́ся свята́я ико́на Твоя́ отъ щедро́тъ Человѣколю́бца Бо́га, Ему́же въ человѣколю́біи подража́я, Цари́це и Влады́чице на́ша Всеми́лостивая, мно́жицею гра́дъ се́й отъ разоре́нія ра́тнаго сохрани́ла еси́, и во вре́мя па́губнаго бездо́ждія до́ждь изоби́ленъ ему́ дарова́ла еси́, прише́ствіемъ честна́го Твоего́ о́браза, и́мже и ны́нѣ на́съ ми́лостивно посѣща́еши и благоутро́бно пріе́млеши предъ ни́мъ возноси́мыя Тебѣ́ отъ се́рдца на́ша моли́твы, съ пѣ́ніемъ таковы́мъ:
Ра́дуйся, сле́зы го́рестныя отира́ющая отъ оче́съ стра́ждущихъ и печа́льныхъ; ра́дуйся, ско́рбная сердца́ услажда́ющая Твои́мъ благода́тнымъ уча́стіемъ. Ра́дуйся, ме́ртва о́трока воскреси́вшая, къ ра́дости пла́кавшихъ предъ ико́ною Твое́ю его́ роди́телей; ра́дуйся, четѣ́ непло́дныхъ супру́говъ чадоро́діе дарова́вшая. Ра́дуйся, дѣви́цу, одержи́мую злы́мъ ду́хомъ, отъ муче́нія де́монскаго свободи́вшая; ра́дуйся, му́жа, изсо́хшія но́зѣ имѣ́вшаго, ско́ро исцѣли́вшая. Ра́дуйся, въ разбо́йники впа́дшаго и Тя́ на по́мощь призва́вшаго отъ сме́рти го́рькія изба́вившая; ра́дуйся, іере́я, глухото́ю болѣ́зновавшаго, я́сно слы́шати устро́ившая. Ра́дуйся, оскудѣ́ніе бра́шенъ въ святѣ́й оби́тели Твое́й чуде́сно воспо́лнившая; ра́дуйся, святота́тца, достоя́ніе оби́тели Твоея́ похи́тившаго, гро́зно наказа́вшая.
Ра́дуйся, Ра́досте на́ша, ико́ною Твое́ю на́съ при́сно утѣша́ющая.
Конда́къ 11
Пѣ́нія и моле́нія на́ша смире́нныя, предъ свято́ю и чудотво́рною Твое́ю ико́ною, отъ любве́ те́плыя Тебѣ́ возноси́мыя, не пре́зри, Госпоже́ Всеми́лостивая, но благопослушли́ва бу́ди къ на́мъ, покланя́ющимся со благоговѣ́ніемъ и вѣ́рою Твоему́ боже́ственному о́бразу, и прося́щимъ со слеза́ми ми́лостивнаго Твоего́ заступле́нія, его́же си́ла вои́стинну превосхо́дитъ вся́кое разумѣ́ніе, и созыва́етъ а́нгеловъ и человѣ́ковъ собо́ры, вку́пѣ хвали́ти Творца́ богокра́сною пѣ́снію: Аллилу́ія.
Икосъ 11
Свѣтопода́тельную лампа́ду, еле́емъ ми́лости испо́лненную и преизлива́ющуюся, созерца́емъ Тя́ оча́ми вѣ́ры, Богоизбра́нная Богоотрокови́це, и, кро́ткимъ сія́ніемъ Твои́мъ озаря́еми, любо́вію же Твое́ю при́сно согрѣва́еми, Тебѣ́, Благо́й Засту́пницѣ на́шей, ико́ною Твое́ю ди́вныя щедро́ты Твоя́ на́мъ ниспосыла́ющей, благода́рственно и умиле́нно глаго́лемъ:
Ра́дуйся, во вся́кихъ ну́ждахъ и бѣда́хъ ско́рое вспоможе́ніе на́мъ да́рующая; ра́дуйся, въ ско́рбехъ и печа́лехъ небе́сную отра́ду въ сердца́ на́ша пролива́ющая. Ра́дуйся, кли́рика оби́тели Твоея́ отъ потопле́нія во́днаго изба́вившая; ра́дуйся, жену́ уме́ршую къ жи́зни возврати́вшая. Ра́дуйся, бѣснова́тыхъ мно́гажды исцѣли́вшая; ра́дуйся, изступле́нныхъ умо́мъ смы́сломъ здра́вымъ одари́вшая. Ра́дуйся, оча́ми болѣ́зновавшихъ врачева́вшая; ра́дуйся, слѣпца́ прозрѣ́ти предъ ико́ною Твое́ю сотвори́вшая. Ра́дуйся, хрома́го и нича́щаго пря́мо ходи́ти устро́ившая; ра́дуйся, главо́ю болѣ́зновавшему явле́ніемъ Твои́мъ во снѣ́ исцѣле́ніе пода́вшая.
Ра́дуйся, Ра́досте на́ша, ико́ною Твое́ю на́съ при́сно утѣша́ющая.
Конда́къ 12
Благода́ти Бо́жія свято́е и непоро́чное жили́ще, Ма́ти Го́спода вы́шнихъ си́лъ, облагодати́ на́шъ по́мыслъ, благоче́стно воспѣва́ти Твоя́ чудеса́, на То́лгѣ отъ честны́я ико́ны Твоея́ явле́нная, и Твои́мъ невече́рнимъ сія́ніемъ озари́ на́ша те́мныя ду́ши, приводя́ и́хъ къ свѣ́ту Трисія́ннаго Божества́, идѣ́же ра́дость и блаже́нство вѣ́чное угото́вано всѣ́мъ пра́веднымъ, пою́щимъ немо́лчную пѣ́снь Вседержи́телю: Аллилу́ія.
Икосъ 12
Пое́мъ пѣ́снь хвалы́ и благодаре́нія Тебѣ́, Богора́дованная Дѣ́во, проповѣ́дуемъ велегла́сно вели́чіе чуде́съ Твои́хъ и бога́тство ми́лости Твоея́, на на́съ въ оте́чествіи на́шемъ явле́нныхъ, и отъ глубины́ серде́чныя прино́симъ Ти́ со смире́ніемъ и вѣ́рою сія́ похва́льныя да́ры:
Ра́дуйся, блага́я Ма́ти любо́вію всѣ́хъ чту́щихъ Тя́ и покланя́ющихся честно́му о́бразу Твоему́; ра́дуйся, до́брая Младопита́тельнице дѣ́въ и безма́тернихъ сиро́тъ. Ра́дуйся, ски́птра ца́рскаго крѣ́посте несокруши́мая; ра́дуйся, держа́вы Россíйскія защище́ніе необори́мое. Ра́дуйся, святы́я Правосла́вныя Це́ркве многопѣ́тая сла́во; ра́дуйся, святи́телей и свяще́нниковъ благода́тное удобре́ніе. Ра́дуйся, и́нокомъ благоподвиза́ющимся Хода́таице вѣ́чного ра́дованія; ра́дуйся, и въ мíрѣ благоче́стно живу́щихъ не лиша́ющая Твоего́ заступле́нія. Ра́дуйся, тѣлеса́ на́ша врачу́ющая отъ болѣ́зней многоразли́чныхъ; ра́дуйся, ду́ши на́ша избавля́ющая отъ враго́въ неви́димыхъ.
Ра́дуйся, Ра́досте на́ша, ико́ною Твое́ю на́съ при́сно утѣша́ющая.
Конда́къ 13
О, Всепѣ́тая Ма́ти, ро́ждшая Ра́дость Вѣ́чную - Го́спода на́шего Іису́са Христа́, земны́мъ и небе́снымъ Спаси́теля! Пріими́ благоутро́бно моле́бное пѣ́ніе на́ше, предъ чудотво́рною ико́ною Твое́ю съ вѣ́рою и благоговѣ́ніемъ Тебѣ́ возноси́мое, и всеси́льными моли́твами Твои́ми изба́ви на́съ отъ вре́менныхъ бѣ́дъ и вѣ́чныя му́ки, сподо́би же въ благоче́стіи и правовѣ́ріи пожи́ти здѣ́, въ земно́мъ житіи́, и та́мо - въ бу́дущемъ вѣ́цѣ въ ра́дости ра́йской, со всѣ́ми святы́ми, вѣ́чно воспѣва́ти Созда́телю на́шему: Аллилу́ія.
Се́й конда́къ глаго́лется три́жды. Та́же Икосъ 1-й и Конда́къ 1-й
Моли́тва пе́рвая
О, Пресвята́я Госпоже́, Дѣ́во Богоро́дице, вы́шшая херуви́мовъ и серафи́мовъ и святѣ́йшая всѣ́хъ святы́хъ! Ты́, Всеблага́я, на То́лгѣ ико́ну Твою́ многоцѣле́бную блаже́нному святи́телю Три́фону огневи́дно яви́ти благоволи́ла еси́, и е́ю мно́гая и неизрече́нная чудеса́ содѣ́лала еси́, и ны́нѣ содѣва́еши, по Твоему́ неизрече́нному къ на́мъ милосе́рдію. Тебѣ́, предъ пречи́стымъ о́бразомъ Твои́мъ, припа́даемъ и мо́лимся, Преблагослове́нная ро́да на́шего Засту́пнице: въ стра́нствіи се́мъ земно́мъ, многоско́рбномъ и многомяте́жномъ, не лиши́ на́съ Твоего́ заступле́нія и покро́ва держа́внаго. Спаси́ и защити́ на́съ, Влады́чице, отъ разжже́нныхъ стрѣ́лъ лука́ваго врага́ спасе́нія на́шего. Укрѣпи́ немощну́ю во́лю на́шу къ дѣ́ланію за́повѣдей Христо́выхъ, умягчи́ окаменѣ́лая сердца́ на́ша любо́вію къ Бо́гу и бли́жнимъ на́шимъ, да́руй на́мъ сокруше́ніе серде́чное и покая́ніе и́стинное, да очи́стившеся отъ скве́рны грѣхо́вныя, возмо́жемъ принести́ Творцу́ благоуго́дныя Ему́ плоды́ до́брыхъ дѣ́лъ, и сподо́битися ми́рныя христіа́нскія кончи́ны и отвѣ́та пра́ваго на стра́шномъ и нелицепрія́тномъ судѣ́ Его́. Ей, Госпоже́ Всеми́лостивая! Въ ча́съ гро́зный, сме́ртный наипа́че яви́ на́мъ Твое́ многомо́щное заступле́ніе, ускори́ тогда́ на по́мощь къ на́мъ, безпомо́щнымъ, и держа́вною руко́ю Твое́ю исхити́ на́съ изъ вла́сти лю́таго міроде́ржца, и́бо вои́стинну мно́го мо́жетъ моли́тва Твоя́ предъ лице́мъ Го́спода, и ничто́же невозмо́жно хода́тайству Твоему́, а́ще то́кмо восхо́щеши. Тѣ́мже на святы́й о́бразъ Тво́й умиле́нно взира́я, и предъ ни́мъ, я́ко живѣ́й Ти́ су́щей съ на́ми, покланя́яся съ упова́ніемъ благи́мъ, са́ми себе́, и дру́гъ дру́га, и ве́сь живо́тъ на́шъ Тебѣ́ по Бо́зѣ моли́твенно предае́мъ, и Тя́ велича́емъ съ ро́ждшимся отъ Тебе́ Спаси́телемъ на́шимъ, Го́сподемъ Іису́сомъ Христо́мъ, Ему́же, со Безнача́льнымъ Его́ Отце́мъ и Пресвяты́мъ Ду́хомъ подоба́етъ вся́кая сла́ва, че́сть и поклоне́ніе, ны́нѣ и при́сно, и во вѣ́ки вѣко́въ. Ами́нь.
Моли́тва втора́я
Пріими́, о Всеблагослове́нная и Всемо́щная, Пречи́стая Госпоже́ Влады́чице, Богоро́дице Дѣ́во, сія́ моли́твы, со слеза́ми Тебѣ́ ны́нѣ приноси́мыя отъ на́съ, недосто́йныхъ рабо́въ Твои́хъ, къ цѣльбоно́сному о́бразу Твоему́ со умиле́ніемъ притека́ющихъ, я́ко Тебѣ́ Само́й ту́ су́щей, и слы́шащей моле́нія на́ша, и подаю́щей съ вѣ́рою прося́щимъ по коему́ждо проше́нію исполне́ніе. Скорбя́щимъ бо ско́рби облегча́еши, немощны́мъ здра́віе да́руеши, разсла́бленныхъ и неду́жныхъ исцѣля́еши, отъ бѣ́сныхъ бѣ́сы прогоня́еши, оби́димыя отъ оби́дъ избавля́еши и наси́луемыя спаса́еши, грѣ́шныхъ ка́ющихся проща́еши, прокаже́нныхъ очища́еши, ма́лыхъ дѣте́й ми́луеши, отъ у́зъ и темни́цъ свобожда́еши, и вся́кія многоразли́чныя стра́сти врачу́еши Ты́, Госпоже́ Влады́чице Богоро́дице. Вся́ бо су́ть возмо́жна ходата́йствомъ Твои́мъ къ Сы́ну Твоему́, Христу́ Бо́гу на́шему. О, Всепѣ́тая Ма́ти, Пресвята́я Богоро́дице Дѣ́во Марíе! Не преста́й моли́тися о на́съ, недосто́йныхъ рабѣ́хъ Твои́хъ, сла́вящихъ Тя́ и почита́ющихъ, и покланя́ющихся пречи́стому о́бразу Твоему́, и наде́жду иму́щихъ невозвра́тну и вѣ́ру несумнѣ́нну къ Тебѣ́, Приснодѣ́вѣ Пресла́внѣй и непоро́чнѣй, ны́нѣ и при́сно, и во вѣ́ки вѣко́въ. Ами́нь.
Тропа́рь, гла́съ 4
Дне́сь свѣ́тло сія́етъ на То́лгѣ о́бразъ Тво́й, Пречи́стая Дѣ́во Богоро́дице, и, я́ко со́лнце незаходи́мое, всегда́ вѣ́рнымъ подаде́ся, Его́же ви́дѣвъ на возду́сѣ, неви́димо а́нгелы, я́ко ники́мъ, держи́ма, преосвяще́нный епи́скопъ гра́да Росто́ва Три́фонъ тече́ ко явле́нному свѣтя́щемуся столпу́ о́гненну, и по вода́мъ, я́ко по су́ху, пре́йде, и моля́шеся Ти́ вѣ́рно о па́ствѣ и о лю́дехъ. И мы́, къ Тебѣ́ притека́юще, зове́мъ: Пресвята́я Дѣ́во Богоро́дице, вѣ́рно Тя́ сла́вящихъ спаса́й, Импе́ратора на́шего [и́мярекъ], архіере́евъ и вся́ Россíйскія наро́ды отъ всѣ́хъ бѣ́дъ избавля́й по вели́цѣй Твое́й ми́лости.
Конда́къ, гла́съ 8
Чу́дное и богопрія́тное свѣтоно́снаго зра́ка Твоего́ явле́ніе, Пречи́стая Дѣ́во, съ вѣ́рою взира́ющимъ быва́етъ извѣ́стное ча́яніе спасе́нія, столпо́мъ бо о́гненнымъ явля́юще предста́тельство, неусы́пное и те́плое за ны́ къ Бо́гу возсыла́еши моле́ніе, и́мже Благовѣ́рнаго Импера́тора на́шего [и́мярекъ] и все́ наслѣ́діе Его́ отъ вся́кихъ бѣ́дъ изба́ви, мо́лимся, да ра́достными усты́ вопіе́мъ Ти́ вси́: ра́дуйся, Предводи́тельнице вѣ́чнаго блаже́нства.
Инъ конда́къ, гла́съ 4
Стра́нное и богопрія́тное свѣтоно́снаго зра́ка Твоего́ явле́ніе, Пречи́стая Дѣ́во, съ вѣ́рою взира́ющимъ быва́етъ извѣ́стное ча́яніе спасе́нія, столпо́мъ бо о́гненнымъ явля́ющи предста́тельство, неусы́пное и те́плое за ны́ къ Бо́гу возсыла́еши моле́ніе, и́мже Благовѣ́рнаго Импера́тора на́шего [и́мярекъ] и все́ наслѣ́діе Его́ отъ вся́кихъ бѣ́дъ изба́ви, мо́лимся, да ра́достными усты́ вопіе́мъ Ти́ вси́: ра́дуйся, Хода́таице вѣ́чнаго блаже́нства.
Велича́ніе
Велича́емъ Тя́, Пресвята́я Дѣ́во, и чте́мъ о́бразъ Тво́й святы́й, и́мже то́чиши исцѣле́нія всѣ́мъ, съ вѣ́рою притека́ющимъ.
