Конда́къ 1

Взбра́нной Воево́дѣ, избра́вшей го́ру Поча́евскую въ мѣ́сто селе́нія своего́, похва́льная воспису́емъ Ти́, раби́ Твои́, Богоро́дице: я́ко отъ лѣ́тъ дре́внихъ просла́вила еси́ мѣ́сто сіе́ богоно́сное явле́ніемъ цѣльбоно́сныя стопы́ Твоея́ и Твоего́ боже́ственнаго о́браза чудодѣ́йствіемъ. Тѣ́мже, я́ко изба́вльшая иногда́ оби́тель Твою́ отъ наше́ствія ага́рянскаго, отъ вся́кихъ на́съ бѣ́дъ и напа́стей свободи́, да всегда́ Твое́ю по́мощію избавля́еміи изъ глубины́ душе́вныя вопіе́мъ Ти́:

Ра́дуйся, Похвало́ Поча́евская, Наде́ждо на́ша и Утѣше́ніе!

Икосъ 1

Ангели вси́ и человѣ́цы удиви́шася неизрече́нному снисхожде́нію Твоему́, Дѣ́во Чи́стая: я́коже бо Госпо́дь дре́вле яви́ся Моисе́ови на Сина́и, въ купинѣ́ горя́щей и несгара́емѣй, си́це яви́лася еси́, Ма́ти Чу́дная, на скалѣ́ Поча́евстѣй въ столпѣ́ о́гненнѣмъ стоя́щею, и зна́меніе ноги́ Твоея́ десны́я, водо́ю испо́лненное, благомо́щнѣ та́мо изобрази́ла еси́, да вси́ чу́до ви́дяще вопіе́мъ Ти́:

Ра́дуйся, Богороди́тельнице Чи́стая, назира́ющая ны́ съ высоты́ пренебе́снаго жили́ща Твоего́; ра́дуйся, блага́я Одиги́тріе, до коне́цъ земли́ во спасе́ніе на́ше досяза́ющая! Ра́дуйся, я́ко свѣтоно́снымъ явле́ніемъ Твои́мъ на горѣ́ Поча́евстѣй го́ру сію́ превы́ше мно́жества го́ръ, я́же во страна́хъ на́шихъ, вознесла́ еси́; ра́дуйся, я́ко въ снизхожде́ніи Твое́мъ та́ко оби́тели Поча́евстѣй сла́ву во все́мъ мíрѣ угото́вила еси́! Ра́дуйся, приснотеку́щій Исто́чниче, водо́ю цѣльбоно́сною стопу́ Твою́ Поча́евскую непреста́нно наполня́ющій; ра́дуйся, Наста́внице богому́драя, науча́ющая ны́ благоче́стно покланя́тися на мѣ́стѣ, идѣ́же стоя́стѣ Пречи́стыя но́зѣ Твои́!

Ра́дуйся, Похвало́ Поча́евская, Наде́ждо на́ша и Утѣше́ніе!

Конда́къ 2

Ви́дящи, Пресвята́я, не́мощь естества́ на́шего и болѣ́зни, одержа́щія при́сно ду́ши и тѣлеса́ на́ша, дарова́ла еси́, Пречи́стая, сто́почнѣй водѣ́ Твое́й на скалѣ́ Поча́евстѣй цѣльбоно́сную си́лу исцѣля́ти вся́къ неду́гъ и вся́ку я́зю въ лю́дехъ. Ея́же благода́ть вя́щши па́че дре́внія купѣ́ли о́вчія: та́ бо еди́ною въ лѣ́то и то́кмо пе́рвѣе входя́щимъ въ ню́ здра́віе тѣ́лу подава́ше, сія́ же, при́сно освяща́емая Твое́ю благода́тію, непреста́нно да́руетъ здра́віе душе́вное, ку́пно же и тѣле́сное всѣ́мъ съ вѣ́рою че́рплющимъ ю́, е́млющимъ и пію́щимъ отъ нея́, ма́жущимся е́ю, и пою́щимъ Бо́гу: Аллилу́ія!

Икосъ 2

Ра́зумомъ недоразумѣ́ннымъ не возмо́же благовѣ́рная Анна, строи́тельница оби́тели Поча́евскія, уразумѣ́ти испе́рва, ко́ль вели́кая благода́ть всели́ся въ хра́минѣ ея́, егда́ Неофи́тъ и́менемъ, митрополи́тъ гре́ческій, за сотворе́нное ему́ гостепріи́мство въ дому́ ея́, дарова́ е́й на благослове́ніе о́бразъ Тво́й честны́й, Влады́чице. Но Ты́ сама́, Ма́ти Всемогу́щаго, не уме́длила еси́ яви́ти сла́ву Его́ зна́меніями и чудесы́ мно́гими, да а́ки отъ жива́го исто́чника, отъ Твоея́ ико́ны благодѣя́ньми многоразли́чными наслажда́ющеся, вопіе́мъ Ти́ сицева́я:

Ра́дуйся, Дѣ́во Чи́стая, спасе́нія на́шего Хода́таице богоизбра́нная; ра́дуйся, Испору́чнице ро́ду человѣ́ческому во утѣше́ніе на́ше дарова́нная! Ра́дуйся, блага́я Домострои́тельнице, житіе́ на́ше до́брѣ устроя́ющая; ра́дуйся, Путеводи́тельнице прозорли́вая, ко оте́чествію небе́сному на́съ руководя́щая! Ра́дуйся, мно́гими отъ лѣ́тъ дре́внихъ ико́нами Свои́ми ди́вными Константинопо́ль гра́дъ благода́тнѣ снабдѣва́ющая; ра́дуйся, еди́ну отъ си́хъ, а́ки звѣзду́ пресвѣ́тлую, отъ восто́ка правосла́внаго до на́шего Ру́сскаго за́пада, во спасе́ніе на́ше, дарова́вшая!

Ра́дуйся, Похвало́ Поча́евская, Наде́ждо на́ша и Утѣше́ніе!

Конда́къ 3

Си́ла Вы́шняго осѣни́ тогда́ слѣпа́го отъ рожде́нія боля́рина Фили́ппа, егда́ теплосерде́чныя пролія́ше сле́зы предъ ико́ною Твое́ю, Богоро́дице: во е́же бы многомо́щною си́лою Твое́ю, Влады́чице, дарова́ла ему́ зрѣ́ніе. И се́, моля́щуся ему́, а́біе отверзо́стѣся о́чи его́, а́ки бы дре́вле отъ Христа́ слѣпорожде́нному, и то́й взира́я благода́рнѣ къ ди́вному ли́ку Твоему́, въ ра́дованіи се́рдца своего́ вопія́ше Бо́гу: Аллилу́ія!

Икосъ 3

Иму́щи благовѣ́рная Анна въ дому́ свое́мъ благода́тную ико́ну Твою́, чудесы́ неизрече́нными прославля́емую, размы́сли вои́стинну въ се́рдцѣ свое́мъ, я́ко недосто́йнѣ е́сть, да то́ль вели́кая святы́ня пребыва́етъ сокрове́нна въ хра́минѣ ея́. Тѣ́мже у́бо, созва́вши и́ноки со свяще́нники, и мно́жество наро́да правосла́внаго собра́вши, со свѣща́ми и пѣ́ніемъ благоговѣ́йнымъ принесе́ ту́ю ико́ну на го́ру Поча́евскую, идѣ́же въ пеще́рѣ обита́ющимъ и́нокомъ въ вѣ́чное хране́ніе предаде́, да благодѣ́ющей на́мъ во о́нѣй Тебѣ́, Ма́ти Дѣ́во, вопіе́мъ вси́ благода́рнѣ:

Ра́дуйся, по Бо́зѣ и Царѣ́ ца́рствующихъ Цари́це на́ша, Богоро́дице; ра́дуйся, по Влады́цѣ и Го́сподѣ госпо́дствующихъ Госпоже́ и Влады́чице! Ра́дуйся, явле́ніемъ чудотво́рныя ико́ны Твоея́ зе́млю оте́чественную на́шу просвѣти́вшая; ра́дуйся, луча́ми чуде́съ Твои́хъ благода́тнѣ, во спасе́ніе на́ше, во все́мъ мíрѣ возсія́вшая! Ра́дуйся, честно́е вмѣсти́лище богопросвѣще́ннаго ра́зума, проразумѣва́ющая всю́ду избра́нныя Своя́; ра́дуйся, теплото́ю Богома́тернія любве́ Твоея́ отъ любве́ земны́я къ небе́снѣй Бо́жіей любви́ на́съ приводя́щая!

Ра́дуйся, Похвало́ Поча́евская, Наде́ждо на́ша и Утѣше́ніе!

Конда́къ 4

Бу́рею, вну́трь страны́ на́шея свирѣ́пѣющею отъ вла́сти иновѣ́рныя, гони́мый уго́дникъ Тво́й Іовъ, игу́менъ Ду́бенскій, Богоро́дице, та́й оста́ви оби́тель свою́ Кре́стную, и во е́же сокры́тися отъ треволне́ній мíра сего́ преле́стнаго, со тща́ніемъ востече́ на го́ру Поча́евскую, и припа́дши къ чу́дному о́бразу Твоему́, все́ упова́ніе свое́ возлага́ше на Тя́: Ма́ти Бо́жія, - взыва́я, - сохрани́ на́съ подъ кро́вомъ Твои́мъ, да всегда́ Твое́ю по́мощію избавля́еми, пое́мъ Бо́гу, Спаси́телю на́шему: Аллилу́ія!

Икосъ 4

Слы́шана бы́сть во всѣ́хъ бли́жнихъ и да́льнихъ страна́хъ сла́ва Твоя́, Пречи́стая, егда́ наше́дшимъ исма́илитомъ на оби́тель Поча́евскую, еди́нъ отъ и́ноковъ монастыря́ сего́, отъ тата́рина обезгла́вленный, взя́тъ а́біе главу́ свою́ отсѣче́нную, и а́ки вторы́й Ареопаги́тъ, прине́съ ю́ до ико́ны Твоея́, положи́ сію́ предъ не́ю, идѣ́же ку́пно и ду́хъ сво́й въ ру́цѣ Бо́жіи предаде́, науча́я всѣ́хъ зва́ти Тебѣ́:

Ра́дуйся, до́брая Храни́тельнице на́ша во страда́ніихъ тѣле́сныхъ; ра́дуйся, Блюсти́тельнице неусы́пная въ печа́ли душе́внѣй! Ра́дуйся, я́ко посо́бствующей любви́ Твое́й, вси́ покланя́ющіися Тебѣ́ со смире́ніемъ бла́гъ мíра сего́ отрѣша́ются; ра́дуйся, я́ко жела́нію Твоему́ спослѣ́дствуя, избра́нніи Тобо́ю всѣ́хъ бла́гъ свы́ше сподобля́ются! Ра́дуйся, вѣ́рныхъ прибѣ́жище и огражде́ніе; ра́дуйся, благода́ти Бо́жія свѣ́тлое и неизрече́нное позна́ніе!

Ра́дуйся, Похвало́ Поча́евская, Наде́ждо на́ша и Утѣше́ніе!

Конда́къ 5

Боготе́чной звѣздѣ́, во мра́цѣ сія́ющей, уподо́бися свята́я ико́на Твоя́, Влады́чице, егда́ беззако́нный наслѣ́дникъ приснопа́мятныя строи́тельницы Поча́евскія, повелѣ́ си́лою исхи́тити о́бразъ Тво́й изъ оби́тели Поча́евскія, и се́й ку́пно со ины́ми вещьми́, во оби́тели погра́бленными, въ за́мку свое́мъ Кози́нскомъ заключи́: а́ще бо, - рече́, - возьму́ чудотво́рную ико́ну себѣ́, и́ноцы не возмо́гутъ обита́ти на мѣ́стѣ то́мъ, не вѣ́дый си́лы Бо́га Жива́го, ни е́же Тому́ еди́ному пѣ́ти: Аллилу́ія!

Икосъ 5

Ви́дящи посрамле́ніе святы́я ико́ны Твоея́, яви́ла еси́, Пречи́стая, си́лу вели́кую и пресла́вную въ дому́ вельмо́жи безбо́жнаго: егда́ бо то́й отъ ра́дости безу́мныя не вѣ́дый, что́ бо́лѣе твори́ти, облече́ въ ри́зы свяще́нныя во оби́тели Поча́евстѣй погра́бленныя супру́жницу свою́, и ку́пно съ не́ю и со ины́ми мно́гими на ве́чери у него́ су́щими, нача́тъ хули́ти Тебе́, о Богома́ти, въ чудотво́рнѣй ико́нѣ Твое́й, а́біе лю́тъ бѣ́съ истрясе́ злу́ю жену́ за беззако́ніе ея́, и́мже одержи́ма бѣ́, доне́лѣже свята́я ико́на Твоя́ Поча́евская не бѣ́ возвращена́ на мѣ́сто свое́ со вся́кою че́стію и пѣ́снію псало́мскою пресла́вною:

Ра́дуйся, Гра́де Царя́ Вели́каго некры́емый верху́ горы́ небе́сныя; ра́дуйся, Покро́ве мíру, ши́ршій о́блака, всю́ду присту́пный для на́шего притека́нія! Ра́дуйся, вѣ́ры правосла́вныя недви́жимое сохране́ніе; ра́дуйся, ерети́ческихъ полко́въ ско́рое и неумы́тное пораже́ніе! Ра́дуйся, я́ко Тобо́ю побѣжда́ется вся́кое возноше́ніе, взима́ющееся на ра́зумъ Бо́жій; ра́дуйся, я́ко снизхожде́ніемъ Твои́мъ утвержда́ется вся́къ у́мъ плѣня́ющь себе́ въ послуша́ніе Христо́во!

Ра́дуйся, Похвало́ Поча́евская, Наде́ждо на́ша и Утѣше́ніе!

Конда́къ 6

Ви́дѣна бы́ша ше́ствія Твоя́, Цари́це не́ба и земли́, ви́дѣна бы́ша ше́ствія Твоя́, Влады́чице, въ явле́ніи святы́я ико́ны Твоея́ на горѣ́ Поча́евстѣй: я́ко сію́ я́вѣ просла́вила еси́ во страна́хъ на́шихъ въ годи́ну искуше́нія, находя́щую на ны́ ку́пно съ порожде́ніемъ злоща́стныя о́ныя, глаго́лемыя Бересте́йскія у́ніи, да поне́ въ явле́ніи чуде́съ и зна́меньми многоразли́чными отъ цѣльбоно́снаго о́браза Твоего́ пода́си исповѣ́дникомъ вѣ́ры правосла́вныя и оте́ческаго дре́вняго благоче́стія побо́рникомъ небе́сную Свою́ отра́ду, облегче́ніе и утѣше́ніе, во е́же са́мимъ враго́мъ на́шимъ о Твое́мъ ко правосла́внымъ благоснисхожде́ніи чудя́щимся, пѣ́ти Бо́гу: Аллилу́ія!

Икосъ 6

Возсія́ со́лнца свѣтлѣ́йши на горѣ́ Поча́евстѣй та́ко просла́вленная и превознесе́нная, ди́вная ико́на Твоя́, Влады́чице: предъ не́ю же со смире́ніемъ припа́дающе и моля́щеся, со благодаре́ніемъ помина́емъ неисче́тныя си́лы и благодѣя́нія, Тобо́ю, Пречи́стая, отъ нея́ чуде́снѣ источа́емыя, пою́ще, вопію́ще и взыва́юще Тебѣ́ ра́достно:

Ра́дуйся, свѣ́томъ чуде́снымъ отъ святы́я ико́ны Твоея́ пеще́ру всеблаже́ннаго уго́дника Твоего́ и отца́ на́шего Іова Поча́евскаго, во еди́ну отъ но́щей моля́щуся ему́ предъ не́ю, благода́тнѣ озари́вшая; ра́дуйся, слѣпы́я мно́ги отъ омраче́нія тѣле́снаго, ку́пно же и душе́внаго, благомо́щно просвѣти́вшая! Ра́дуйся, му́жа уме́ршаго женѣ́ его́, по моли́твѣ о́ныя воскреси́вшая; ра́дуйся, ю́ношу, въ Поча́евскій глубо́кій кла́дезь упа́вшаго, на ве́рвіи посредѣ́ его́ чуде́снѣ удержа́вшая! Ра́дуйся, жидови́ну нѣ́коему свѣ́тъ па́че со́лнца отъ ико́ны Твоея́ показа́вшая; ра́дуйся, невѣ́ріе его́ въ вѣ́ру Христо́ву свѣ́томъ си́мъ благода́тнѣ претвори́вшая!

Ра́дуйся, Похвало́ Поча́евская, Наде́ждо на́ша и Утѣше́ніе!

Конда́къ 7

Хотя́ Христо́съ Госпо́дь и Сы́нъ Тво́й показа́ти въ Тебѣ́, Пречи́стая, но́вое зна́меніе благода́ти Своея́ на горѣ́ Поча́евстѣй, любо́вію разже́ а́біе къ о́бразу Твоему́ се́рдце имени́таго боля́рина Ѳео́дора и Евы благоро́дныя, жены́ его́, и́же иждиве́ніемъ свои́мъ созда́ша во оби́тели Поча́евстѣй Твое́й це́рковь но́вую, вели́кую, и сію́, я́коже Соломо́нъ дре́вле, потре́бами вся́кими удовли́ша и украси́ша, прославля́я еди́наго сла́вимаго въ це́рквахъ свои́хъ Бо́га, и Тому́ поя́ усе́рдно: Аллилу́ія!

Икосъ 7

Ди́вная и пресла́вная ви́дѣна бы́ша о Тебѣ́, Пресвята́я Дѣ́во, во оби́тели Твое́й во вре́мя бра́ни Зба́ражскія, егда́ яви́лася еси́ верху́ горы́ Поча́евскія, отъ наше́ствія и обложе́нія ага́рянскаго монасты́рь Поча́евскій избавля́я, и омофо́ромъ бѣлоблестя́щимся покрыва́я лю́ди Твоя́, внима́ла еси́ я́вѣ моли́твамъ одесну́ю Тебе́ стоя́щаго на о́блацѣхъ небе́сныхъ пресла́внаго Іова, чудотво́рца Поча́евскаго, и та́ко враги́ Твоя́ вспя́ть погна́ла еси́, науча́я всѣ́хъ благода́рнѣ помина́ющихъ несказа́нное явле́ніе сіе́, зва́ти Тебѣ́:

Ра́дуйся, Засту́пнице ро́да человѣ́ческаго твердѣ́йшая па́че адама́нта несокруши́маго; ра́дуйся, Защи́тнице наро́да правосла́внаго вѣ́рнѣйшая па́че вся́каго забра́ла необори́маго! Ра́дуйся, мо́лніе громоно́сная, стрѣла́ми неви́димыми при́сно поража́ющая враго́въ вѣ́ры христіа́нскія; ра́дуйся, стрѣ́лы ага́рянскія, на Тебе́ въ Поча́евѣ отъ тата́ровъ направля́емыя, на главу́ и́хъ вспя́ть обрати́вшая! Ра́дуйся, я́ко сего́ ра́ди мно́зи отъ ни́хъ, христіа́нскую пріе́мше вѣ́ру, на послуша́ніи монасты́рскомъ въ оби́тели Поча́евстѣй да́же до кончи́ны своея́ пребы́ша; ра́дуйся, я́ко правовѣ́рніи, Тобо́ю изба́вленніи, ра́достную Тебѣ́ пѣ́снь хвалы́ и благодаре́нія воспѣ́ша!

Ра́дуйся, Похвало́ Поча́евская, Наде́ждо на́ша и Утѣше́ніе!

Конда́къ 8

Стра́нно и стра́шно бѣ́ ви́дѣти Тебе́, Ма́ти Благослове́нная, тогда́ на возду́сѣ, со а́нгелами небе́сными, обнаже́нніи мечи́ держа́щими на защи́ту наро́да правосла́внаго. Сего́ ра́ди явле́ніемъ Твои́мъ устраша́еміи нечести́віи, а́біе спѣ́шнѣ отбѣго́ша отъ оби́тели Поча́евскія, во е́же всѣ́мъ о Тебѣ́, Влады́чице, пѣ́ти Бо́гу: Аллилу́ія!

Икосъ 8

Ве́сь сы́й испо́лненъ стра́ха и наде́жды на Тя́, Ма́ти многомо́щная, игу́менъ поча́евскій Іо́сифъ и про́чіи тогда́шніи поча́евстіи и́ноцы и мірстíи лю́діе, отъ тата́ровъ во оби́тели обложе́ніи, въ тузѣ́ серде́чнѣй вопія́ху къ Тебѣ́, Богоро́дице: не да́ждь ви́дѣти поги́бели служа́щихъ Тебѣ́ и покланя́ющихся чудотво́рнѣй ико́нѣ Твое́й, но помози́ и изми́ на́съ изъ ру́къ ага́рянскихъ, я́коже иногда́ спасла́ еси́ ца́рствующій гра́дъ Константино́поль отъ ски́ѳскаго воево́ды, и потопи́ла еси́ во́и его́, напа́дающія на гра́дъ се́й. Спаса́й и на́съ, мо́лимъ Тя́, Дѣ́во Чи́стая, отъ вся́каго зла́ и отъ всѣ́хъ ко́зней враго́въ на́шихъ ви́димыхъ и неви́димыхъ, да Твое́ю по́мощію избавля́еміи со умиле́ніемъ зове́мъ Ти́ сицева́я:

Ра́дуйся, оте́чествію на́шему Засту́пнице всеси́льная; ра́дуйся, земли́ рожде́нія на́шего Воево́до непобѣди́мая! Ра́дуйся, Храни́тельнице на́ша во искуше́ніихъ вѣ́ры отъ враго́въ правовѣ́рія; ра́дуйся, Спобо́рнице на́ша бо́дрѣйшая сопроти́въ вся́кія вла́сти чужды́я! Ра́дуйся, при́сная по́моще правосла́внымъ христіа́номъ во всѣ́хъ дѣ́лѣхъ и путѣ́хъ на́шихъ; ра́дуйся, все́й Ру́сской держа́вѣ тверды́не и забра́ло необори́мое!

Ра́дуйся, Похвало́ Поча́евская, Наде́ждо на́ша и Утѣше́ніе!

Конда́къ 9

Вся́кое естество́ удиви́ся неизрече́нному дѣ́йству си́лы Твоея́, Влады́чице Пренепоро́чная, е́юже многомо́щнѣ исхи́тила еси́ отъ нево́ли и́нока поча́евскаго, въ плѣне́ніи у безбо́жныхъ ага́ряновъ пребыва́ющаго. Въ то́й бо нево́ли су́щій на у́мъ себѣ́ приводя́ше пѣ́нія церко́вная и слу́жбы, па́че ме́да сладча́йшія, на горѣ́ Поча́евстѣй. И се́ моля́щуся ему́ еди́ною въ пра́здникъ Успе́нія Твоего́, Преблагослове́нная, а́біе обрѣ́теся во оби́тели Поча́евстѣй, вери́ги плѣне́нія на ру́цѣхъ свои́хъ нося́й, и съ пла́чемъ благода́ть Твою́, на себѣ́ бы́вшую исповѣ́дуя, и благода́рными усты́ поя́ Бо́гу: Аллилу́ія!

Икосъ 9

Вѣтíйствующіе многовѣща́нно клевре́ти иновѣ́рія и вла́сти чужды́я во страна́хъ на́шихъ недоумѣ́ютъ и до ны́нѣ, е́же ка́ко, яви́вши святу́ю ико́ну Твою́ на горѣ́ Поча́евстѣй, подъ сѣ́нію дре́вняго благоче́стія, а́ще по́слѣжди ту́ю въ ру́цѣ иносла́вныхъ преда́ти и соизво́лила еси́, оба́че па́ки сію́, си́лою Твое́ю, правосла́внымъ возврати́ла еси́. Мы́ же, неизрече́нному смотрѣ́нію Твоему́ дивя́щеся, вѣ́руемъ и исповѣ́дуемъ, я́ко сіе́ та́ко сотвори́ла еси́ въ науче́ніе на́ше, ку́пно же и вя́щшаго ра́ди прославле́нія о́браза Твоего́. Тѣ́мже и златы́ми, я́же отъ Ри́ма, діади́мами благоволи́ла еси́ увѣнча́нну бы́ти тому́, да отъ восто́къ со́лнца до за́падъ сла́вимому при́сно и́мени Твоему́ вопіе́мъ вси́ благолѣ́пно:

Ра́дуйся, заре́ та́инственнаго свѣ́та богосія́нная; ра́дуйся, свѣще́, отъ Боже́ственнаго пла́мене Восто́чнаго Правосла́вія, теплото́ю чуде́съ Твои́хъ неугаси́мо на́съ согрѣва́ющая! Ра́дуйся, Воево́до Поча́евская, се́рдце вельмо́жнаго гра́фа чуде́снѣ къ Себѣ́ обрати́вшая; ра́дуйся, но́вую Ти́ оби́тель, ку́пно же и хра́мъ во и́мя Твое́ на горѣ́ Поча́евстѣй воздви́гнути тому́ неизрече́нно внуши́вшая! Ра́дуйся, я́ко не то́чію во страна́хъ Ру́сскихъ, но и внѣ́ предѣ́ловъ оте́чествія на́шего призыва́ющимъ Тя́ отъ святы́я горы́ Твоея́ благопоспѣ́шно вспомоществу́еши; ра́дуйся, я́ко и во все́мъ мíрѣ благода́ть отъ святы́я ико́ны Твоея́ Поча́евскія вѣ́рнымъ неизрече́нно источа́еши!

Ра́дуйся, Похвало́ Поча́евская, Наде́ждо на́ша и Утѣше́ніе!

Конда́къ 10

Спасти́ хотя́ упова́ющихъ на Тя́, спасла́ еси́ оби́тель Твою́ отъ и́га иновѣ́рнаго, Богороди́тельнице, ку́пно же съ не́ю и богодарова́нную сла́ву пречи́стыя ико́ны Твоея́, егда́ благомо́щнѣ возрати́ла еси́ го́ру Поча́евскую во одержа́ніе правосла́внымъ: да въ на́съ па́ки чудодѣ́йствуя и отъ на́съ прославля́емая, яви́ши всѣ́мъ несказа́нно, я́ко вои́стину еди́на е́сть свята́я Це́рковь на́ша Правосла́вная, отъ нея́ же исхо́дитъ вся́кій исто́чникъ чудодѣ́йственныя благода́ти Бо́жія, напая́ющій всѣ́хъ вода́ми правовѣ́рія и еди́ному Бо́гу, Спаси́телю на́шему, науча́ющій пѣ́ти нело́жно: Аллилу́ія!

Икосъ 10

Стѣ́ну и заступле́ніе необори́мое вои́стину исповѣ́дуемъ Тя́, Дѣ́во Ма́ти, во всѣ́хъ потре́бахъ и обстоя́ніихъ благосты́нею Свое́ю при́сно на́съ огражда́ющую. Аще бо не бы́ Ты́ предста́ла, Влады́чице, моля́щися о на́съ, кто́ бы на́съ изба́вилъ отъ толи́кихъ бѣ́дъ? Кто́ же бы ны́ сохрани́лъ до ны́нѣ свобо́дны, въ держа́вѣ на́шей, на ло́нѣ святы́я Це́ркви Правосла́вныя? Тѣ́мже не таи́мъ Твои́хъ благодѣя́ній, но благода́рнѣ прославля́я ми́лости Твоя́, вопіе́мъ Ти́ отъ полноты́ серде́чныя:

Ра́дуйся, пома́заніемъ водо́ю отъ стопы́ Твоея́ цѣльбоно́сныя прозрѣ́ніе мно́гимъ дарова́вшая; ра́дуйся, ю́ношу отъ ядови́тыхъ стру́повъ на тѣ́лѣ уврачева́вшая! Ра́дуйся, младе́нца уме́ршаго, предъ ико́ною Твое́ю роди́телями его́ съ вѣ́рою положе́ннаго, къ жи́зни неизрече́нно возврати́вшая; ра́дуйся, врача́ иновѣ́рнаго, дерзну́вшаго ху́лити Тебе́ въ чудотво́рнѣй ико́нѣ Твое́й, умоизступле́ніемъ стра́шнымъ наказа́вшая! Ра́дуйся, возни́цу вельмо́жи разъяре́ннаго отъ неумы́тнаго разстрѣля́нія, по моли́твѣ къ То́й, несказа́нно изба́вившая; ра́дуйся, и ма́терь градо́въ Ру́сскихъ - Кíевъ отъ смертоно́снаго повѣ́трія си́лою Твое́ю отъ горы́ Твоея́ святы́я благопоспѣ́шно спа́сшая!

Ра́дуйся, Похвало́ Поча́евская, Наде́ждо на́ша и Утѣше́ніе!

Конда́къ 11

Пою́тъ Тя́ вси́ ро́ди земнíи и небе́сніи, Покрови́тельнице на́ша, за вся́ неисче́тныя благодѣя́нія, зна́менія же и чудеса́, я́же при́сно явля́еши всѣ́мъ почита́ющимъ Тя́, и покланя́ющимся ико́нѣ Твое́й. Тѣ́мже и мы́, а́ще и недосто́йни су́ще, прино́симъ Ти́, Ма́ти Благослове́нная, преи́скреннюю да́нь хвалы́ и умиле́нія, и въ весе́ліи се́рдца предъ Пречи́стымъ Твои́мъ о́бразомъ пое́мъ Бо́гу, ди́вная Тобо́ю творя́щему отъ горы́ Поча́евскія: Аллилу́ія!

Икосъ 11

Свѣтопріи́мную свѣщу́ зри́мъ Тебе́, Пресвята́я Дѣ́во, на святѣ́й ико́нѣ Твое́й, посредѣ́ ли́ка избра́нныхъ уго́дниковъ Твои́хъ луча́ми благода́ти Боже́ственныя неизрече́нно блиста́ющуюся. Отону́дуже во мра́цѣ грѣхо́въ свои́хъ просвѣща́еміи и на свѣ́тлую стезю́ добродѣ́тели и спасе́нія наставля́еміи, зва́ніи Тя́ почита́емъ си́ми:

Ра́дуйся, моли́твами первому́ченика Стефа́на, вѣнцу́ тезоимени́таго, вѣнча́ющая на́съ вѣнце́мъ ра́дованія во ско́рбѣхъ на́шихъ; ра́дуйся, заступле́ніемъ Авраа́міа, во и́ноцѣхъ затво́рника, избавля́ющая на́съ отъ суеты́ мíра сего́ многомяте́жнаго! Ра́дуйся, со Иліе́ю проро́комъ, и ревни́телемъ по Бо́зѣ, о́гнь несокруши́мыя ре́вности по вѣ́рѣ во искуше́ніихъ невѣ́рія и иновѣ́рія въ на́съ воспламеня́ющая; ра́дуйся, ку́пно съ му́ченикомъ Ми́ною стра́сти на́ша въ боре́ніихъ пло́ти побѣжда́ющая! Ра́дуйся, утѣше́ніе на́ше во всѣ́хъ печа́лѣхъ, предста́тельствомъ Екатери́ны великому́ченицы прехва́льныя; ра́дуйся, упова́ніе вѣ́рнымъ въ напа́стехъ и ско́рбѣхъ, хода́тайствы Ири́ны пречестны́я и Параске́вы преподобному́ченицы богоблаже́нныя!

Ра́дуйся, Похвало́ Поча́евская, Наде́ждо на́ша и Утѣше́ніе!

Конда́къ 12

Благода́тію, да́нною Ти́ отъ Сы́на и Бо́га Твоего́, чудодѣ́йствующи, Пречи́стая, на святѣ́й горѣ́ Твое́й Поча́евстѣй, не оставля́еши, Влады́чице, рабы́ Твоя́ и во вре́мя сіе́, но я́коже во дни́ дре́внія, си́це и ны́нѣ, во о́чію на́шею подае́ши при́сно неду́жнымъ здра́віе, слѣпы́мъ прозрѣ́ніе, скорбя́щимъ утѣше́ніе, оби́димымъ заступле́ніе, бѣсны́мъ отъ духо́въ лука́выхъ свобожде́ніе, и всѣ́мъ су́щимъ въ бѣда́хъ и обстоя́ніяхъ многоразли́чныхъ: отъ запале́нія о́гненнаго, отъ та́тей и разбо́йниковъ и та́йныхъ убíйцъ, отъ зла́го повѣ́трія губи́тельнаго и смертоно́сныя я́звы, и отъ тя́жкихъ круше́ній на пути́, въ мо́ри и на су́шѣ, изба́ву и сохране́ніе, иму́щи ку́пно о на́съ вели́каго хода́тая и моли́твенника неусы́пнаго - блаже́ннаго Іова, игу́мена и чудотво́рца Поча́евскаго, да тма́ми те́мъ притека́ющіи къ Тебѣ́, воспріи́мемъ вси́ блага́я и поле́зная душа́мъ на́шимъ, прославля́я Бо́га и Тому́ Еди́ному поя́ благода́рнѣ: Аллилу́ія!

Икосъ 12

Пою́ще Твоя́ ми́лости, Богоро́дице, и чудеса́ Тобо́ю во спасе́ніе на́ше, отъ святы́я горы́ Твоея́ Поча́евскія, въ цѣльбо́носнѣй стопѣ́ Твое́й и Твое́й чудотво́рнѣй ико́нѣ вы́ну на́мъ источа́емыя, хва́лимъ Тя́ вси́, я́ко тве́рдую Предста́тельницу и необори́мую Засту́пницу на́шу, и со умиле́ніемъ припа́дающе предъ ико́ною Твое́ю, мо́лимъ Твою́ благосты́ню: воздви́гни ру́цѣ Твои́ къ Сы́ну Твоему́ и Бо́гу на́шему, си́це на руку́ Твое́ю уми́льно держи́мому, да и въ се́й жи́зни и по кончи́нѣ на́шей милосе́рдіе Его́ неотсту́пно бу́детъ отъ на́съ, но кíйждо, по мѣ́рѣ вѣ́ры и любве́ своея́, воспріе́млетъ отъ Него́ поне́ нѣ́кую отра́ду, облегче́ніе и утѣше́ніе, да благодѣ́ющей Тебѣ́ и чудодѣ́йствующей во спасе́ніе на́ше во вѣ́ки вѣко́въ пое́мъ благода́рнѣ:

Ра́дуйся, моли́твами Твои́ми отъ святы́я горы́ Твоея́ ро́дъ человѣ́ческій спаса́ющая; ра́дуйся, всю́ вселе́нную благода́тію отъ ико́ны Твоея́ заступа́ющая! Ра́дуйся, всѣ́мъ во вся́кой потре́бѣ и ну́ждѣ водо́ю отъ стопы́ Твоея́ поле́зная подава́ющая; ра́дуйся, житіе́ на́ше, моли́твами уго́дника Твоего́ Іова Поча́евскаго, во всѣ́хъ ну́ждахъ и обстоя́ніихъ на́шихъ до́брѣ устроя́ющая! Ра́дуйся, ми́ренъ коне́цъ жи́зни на́шея въ преставле́ніи на́шемъ испроша́ющая; ра́дуйся, и по кончи́нѣ на́шей отъ му́къ а́дскихъ всѣ́хъ свобожда́ющая и въ Ца́рствіе Сы́на Твоего́ вѣ́чное превожда́ющая!

Ра́дуйся, Похвало́ Поча́евская, Наде́ждо на́ша и Утѣше́ніе!

Конда́къ 13

О, Всепѣ́тая Ма́ти, Цари́це не́ба и земли́! Воззри́ ми́лостивымъ о́комъ Твои́мъ на ны́, предстоя́щія предъ свято́ю ико́ною Твое́ю, и на вся́ лю́ди, Тебѣ́ моля́щіяся, и Твои́ми Богома́терними моли́твами изба́ви на́съ отъ вся́кихъ бѣ́дъ, напа́стей и скорбе́й, да безгрѣ́шно, ми́рно и благоче́стно пожи́вше въ ны́нѣшнемъ вѣ́цѣ, и въ бу́дущемъ сподо́бимся вси́ небе́сныхъ и вѣ́чныхъ бла́гъ отъ Го́спода и Спа́са и Судіи́ на́шего, пою́ще Ему́, прославля́щему Тя́ на святѣ́й горѣ́ Твое́й, и Тобо́ю отъ святы́я ико́ны Твоея́ и стопы́ Твоея́ прославля́емому во вѣ́ки вѣко́въ: Аллилу́ія!

Се́й конда́къ глаго́лется три́жды. Та́же Икосъ 1-й и Конда́къ 1-й

Моли́твы предъ цѣльбоно́сною стопо́ю Бо́жія Ма́тери

О, Пресвята́я Дѣ́во, Влады́чице Богоро́дице, благодарю́ Тя́ отъ всего́ се́рдца моего́, я́ко сподо́била мя́ еси́ грѣ́шнаго и недосто́йнаго раба́ Твоего́ предста́ти здѣ́ и покланя́тися на святѣ́й горѣ́ Твое́й! О, коли́кихъ бла́гъ удосто́ихся та́ко многогрѣ́шный а́зъ милосе́рдіемъ Твои́мъ! Ви́жду, Пречи́стая, и ужаса́юся и истаева́етъ ду́хъ мо́й, зря́щи во о́чію многоцѣле́бный се́й исто́чникъ благода́ти Твоея́, его́же издре́вле во слѣдѣ́ святы́я стопы́ Твоея́ неизрече́нно яви́ла еси́, и всеблагоговѣ́йно покланя́яся на мѣ́стѣ, идѣ́же стоя́стѣ Дѣви́честіи но́зѣ Твои́, молю́ Тя́, благослове́нная наде́ждо и спасе́ніе ду́шъ и тѣле́съ на́шихъ, омы́й мя́ цѣльбоно́сной водо́ю Твое́ю отъ вся́кія скве́рны пло́ти и ду́ха, утоли́ благода́тными струя́ми Твои́ми вся́ стра́сти моя́ серде́чныя, уврачу́й ка́плями отъ приснотеку́щаго исто́чника Твоего́ вся́ неду́ги моя́ тѣле́сныя, да Тобо́ю наставля́емый, врачу́емый и избавля́емый воспѣва́ю Тебѣ́ всеусе́рдно:

Ра́дуйся, исто́чниче ра́дости непреста́емыя; ра́дуйся, то́че добро́ты неизрече́нныя! Ра́дуйся, вожделѣ́ній нечи́стыхъ потопле́ніе; ра́дуйся, скве́рнъ вся́кихъ измове́ніе! Ра́дуйся, струе́ свѣтови́днѣйшая во здра́віе вѣ́рнымъ отъ горы́ пріосѣне́нныя ча́ши благода́ть исцѣле́ній подава́ющая; ра́дуйся, росо́ небе́сная свы́ше то́ки прему́дрости жа́ждущимъ и́стиннаго позна́нія низпосыла́ющая! Ра́дуйся, похвало́ Поча́евская, спаси́ ны́, моля́щихся Тебѣ́, Наде́ждо на́ша и Утѣше́ніе! Аминь.

Моли́тва втора́я

О, Всеми́лостивая Госпоже́, Цари́це и Влады́чице, отъ всѣ́хъ родо́въ избра́нная, и всѣ́ми ро́ды небе́сными и земны́ми ублажа́емая! Воззри́ ми́лостиво на предстоя́щій предъ свято́ю ико́ною Твое́ю и усе́рдно моля́щійся къ Тебѣ́ наро́дъ се́й, и сотвори́ предста́тельствомъ и заступле́ніемъ Твои́мъ у Сы́на Твоего́ и Бо́га на́шего, да никто́же изы́детъ отсю́ду упова́нія своего́ то́щъ и посра́мленъ въ наде́ждѣ свое́й, но да пріи́метъ кíйждо отъ Тебе́ вся́ по благо́му изволе́нію се́рдца своего́ и по ну́ждѣ и потре́бѣ свое́й, во спасе́ніе души́ и во здра́віе тѣ́лу. Наипа́че же осѣни́ и огради́ покро́вомъ Твои́мъ, милосе́рдая Ма́ти, вѣ́рное на́ше во́инство. При́зри благосе́рдіемъ, Всепѣ́тая Богоро́дице, и на оби́тель сію́, Твои́мъ и́менемъ нарица́ющуюся, ю́же отъ лѣ́тъ дре́внихъ возлюби́ла Еси́, избра́въ ю́ въ достоя́ніе Себѣ́, и неоску́дно источа́я то́ки исцѣле́ній отъ чудотво́рныя ико́ны Твоея́, и отъ приснотеку́щаго исто́чника, въ слѣдѣ́ стопы́ Твоея́ на́мъ откры́таго, и сохрани́ ю́, я́коже дре́вле сохрани́ла еси́ Твои́мъ явле́ніемъ цѣ́лу и неврежде́нну отъ лю́таго наше́ствія ага́рянскаго, отъ вся́каго прило́га и навѣ́та вра́жія, да вы́ну воспѣва́ется и сла́вится въ не́й пресвято́е и́мя Отца́ и Сы́на и Свята́го Ду́ха, и Твое́ пресла́вное успе́ніе, во вѣ́ки вѣко́въ. Ами́нь.

Тропа́рь поча́евскій, гла́съ 4

Предста́тельство христіа́нъ непосты́дное, хода́тайство ко Творцу́ непрело́жное, яви́лася еси́ вои́стину, Богоро́дице, въ цѣльбо́носнѣй Твое́й стопѣ́ и чудотво́рнѣй Твое́й ико́нѣ на горѣ́ Поча́евстѣй. Не пре́зри, у́бо Всепѣ́тая, грѣ́шныхъ моле́ній гла́сы, но предвари́ любо́вію Твое́ю Ма́тернею на по́мощь на́мъ, вѣ́рно зову́щимъ Ти́: ускори́ на моли́тву, я́коже дре́вле яви́лася еси́ на скалѣ́ Поча́евстѣй, въ столпѣ́ о́гненнѣмъ, цѣльбоно́сную во́ду отъ ка́мене, во спасе́ніе на́ше источа́ющи; потщи́ся на умоле́ніе, и Твое́ю благосты́нею покры́й и соблюди́ на́съ, я́коже иногда́ благопоспѣши́ла еси́ оби́тели Твое́й во спасе́ніе отъ наше́ствія ага́рянскаго, преста́тельствующи при́сно, Богоро́дице, чту́щихъ Тя́.

Инъ тропа́рь, гла́съ то́йже

Къ Богоро́дицѣ прилѣ́жно ны́нѣ притеце́мъ, грѣ́шніи и смире́нніи, и припаде́мъ къ ди́вному о́бразу Ея́, и́же на горѣ́ Поча́евстѣй, къ нему́же уми́льно взира́юще и моля́щеся, Цари́цѣ Влады́чицѣ изъ глубины́ душе́вныя вопіе́мъ: о, Пречу́дная Дѣ́во, Ма́ти Го́спода Вы́шняго, отъ лѣ́тъ дре́внихъ избра́вшая оби́тель Поча́евскую въ мѣ́сто селе́нія Своего́! Зе́млю оте́чественную на́шу въ правосла́віи и ми́рѣ утверди́, и спаси́ всѣ́хъ предстоя́щихъ и моля́щихся Тебѣ́ умиле́нною душе́ю и сокруше́ннымъ се́рдцемъ, предъ пречи́стымъ Твои́мъ о́бразомъ со слеза́ми. Не отврати́ рабы́ Твоя́ тщи́: Тя́ бо еди́ну наде́жду и́мамы.

Конда́къ, гласъ 8

Взбра́нной Воево́дѣ, избра́вшей го́ру Поча́евскую въ мѣ́сто селе́нія своего́, похва́льная воспису́емъ Ти́, раби́ Твои́, Богоро́дице: я́ко отъ лѣ́тъ дре́внихъ просла́вила еси́ мѣ́сто сіе́ богоно́сное явле́ніемъ цѣльбоно́сныя стопы́ Твоея́ и Твоего́ боже́ственнаго о́браза чудодѣ́йствіемъ. Тѣ́мже, я́ко изба́вльшая иногда́ оби́тель Твою́ отъ наше́ствія ага́рянскаго, отъ вся́кихъ на́съ бѣ́дъ и напа́стей свободи́, да всегда́ Твое́ю по́мощію избавля́еміи изъ глубины́ душе́вныя вопіе́мъ Ти́: ра́дуйся, Похвало́ Поча́евская, Наде́ждо на́ша и Утѣше́ніе.

Велича́ніе

Велича́емъ Тя́, Пресвята́я Дѣ́во, и чте́мъ е́же на скалѣ́ Поча́евстѣй въ столпѣ́ о́гненнѣмъ цѣльбоно́сною стопо́ю запечатлѣ́нное явле́ніе Твое́.

Ино велича́ніе

Велича́емъ Тя́, Пресвята́я Дѣ́во, и чте́мъ е́же на скалѣ́ Поча́евстѣй въ столпѣ́ о́гненнѣмъ, изъ ка́мени во́ду на́мъ цѣльбоно́сную источи́вшее явле́ніе Твое́.