Кон­да́къ 1

Взбра́н­ной Во­е­во́­дѣ, Пре­чи́­стой и Бо­го­о­бра́­до­ван­ной Дѣ́вѣ Бо­го­ро́­ди­цѣ, огне­зра́ч­ныя ико́­ны Своея́ явле́ніемъ обра́­до­вав­шей Це́р­ковь Хри­сто́ву и е́ю отъ о́гнен­на­го за­па­ле́нія за­щи­ща́­ю­щей вѣ́р­ныя, по­хва́ль­ное воз­гла­ша́­емъ пѣ́ніе. Ты́ же, о Бо­го­ма́­ти, Ку­пи­но́ Не­о­па­ли́­мая име­ну́­е­мая на́ми, я́ко иму́­щая дер­жа́ву не­по­бѣ­ди́мую и ми­ло­се́р­діе мно́­гое, уско­ри́ на по́­мощь къ на́мъ, тре́бую­щимъ Тво­е­го́ за­ступле́нія, и отъ вся́кихъ бѣ́дъ сво­бо­ди́ зо­ву́­щихъ Ти́:

Ра́дуй­ся, Бла­го­да́т­ная, Ку­пи­но́ Не­о­па­ли́­мая, о́гнен­на­го за­па­ле́нія на́съ из­ба­вля́ющая.

Икосъ 1

Анге­ловъ Ца­ри́­це и всея́ тва́­ри Вла­ды́­чи­це Го­спо­же́ Бо­го­ро́­ди­це, отъ а́н­гель­скихъ ли­ко́въ горѣ́ пріе́м­лю­щая хва­ле́б­ное пѣ́ніе, спо­до́­би и на́съ, зем­ны́хъ и пе́рст­ныхъ, воз­но­си́­ти къ Тебѣ́ гла́­сы хва­лы́ бла­го­да­ре́нія за пре­мно́­гую ми́­лость Твою́ къ ро́ду че­ло­вѣ́­че­ско­му. И а́ще не­до­сто́й­ны есмы́ пѣ́ти Тя́ по достоя́нію, оба́­че Ты́, я́ко Бла­га́я, не воз­гну­ша́й­ся на́­шихъ не­до­влѣ́­ю­щихъ по­хва́лъ, и я́ко Сы́нъ Тво́й двѣ́ ле́­птѣ вдо­ви́­цы ми́­ло­стив­но прія́тъ, та́ко лю­бо­бла­гоутро́б­но услы́­ши на́съ, со уми­ле́ніемъ къ Тебѣ́ во­пі­ю́­щихъ:

Ра́дуй­ся, Огнь Бо­же­ства́ во чре́­вѣ Тво­е́мъ не­о­па́ль­но но­си́в­шая; ра́дуй­ся, Спа­си́­теля па́д­ше­му че­ло­вѣ́­че­ству ро́жд­шая. Ра́дуй­ся, си́лу а́до­ву пре­чи́­стымъ Ро­жде­ство́мъ Тво­и́мъ упразд­ни́в­шая; ра́дуй­ся, Ада́­ма и Еву дре́в­няго прокля́тія сво­бо­ди́в­шая. Ра́дуй­ся, во­че­ло­вѣ́­че­нію Еди́­на­го отъ Тро́­и­цы не­по­ро́ч­но по­слу­жи́в­шая; ра́дуй­ся, Твор­ца́ не­бе­се́ и зе­мли́ без­сѣ́­мен­но во­пло­ти́в­шая.

Ра́дуй­ся, Бла­го­да́т­ная, Ку­пи­но́ Не­о­па­ли́­мая, о́гнен­на­го за­па­ле́нія на́съ из­ба­вля́ющая.

Кон­да́къ 2

Ви́дя Мо­исе́й на Си­на́и купи­ну́, огне́мъ го­рѣ́в­шую и не сго­ра́в­шую, ужа­се́­ся, и се́ бы́сть гла́съ къ нему́ Бо­же́­ствен­ный отъ ку­пи­ны́: "из­зу́й са­по́гъ отъ ногу́ тво­е́ю, мѣ́­сто бо, на не́м­же ты́ сто­и́­ши, земля́ свята́ е́сть". Сего́ по­слу́­шая, и мы́ сми­ре́н­ніи та́­ин­ство во­пло­ще́нія Бо́га Сло́­ва отъ Пре­чи́­стыя Дѣ́вы, чу́­домъ не­о­па­ли́­мыя ку­пи­ны́ про­о­бра­зо­ва́н­ное, ис­по­вѣ́дуемъ и со стра́­хомъ по­кла­ня́емся мѣ́сту явле́нія Бо́жія, зо­ву́­ще Зи­жди́­те­лю вся́­че­скихъ: Алли­лу́ія.

Икосъ 2

Ра́зумъ че­ло­вѣ́­че­скій не мо́­жетъ по­сти́г­нути та́­ин­ство смо­тре́нія Бо́жія, отъ сло­же́нія мíра искупле́ніе па́д­ша­го че­ло­вѣ́­че­ства пре­до­пре­дѣ­ли́в­ша­го въ со­вѣ́­тѣ пред­вѣ́ч­номъ Тріѵ­по­ста́с­на­го Бо­же­ства́, оба́­че Ду́­хомъ Святы́мъ вдох­но­ве́н­ніи святíи Бо́жіи про­ро́­цы из­да­ле́­че пред­зря́ще чу́до чу­де́съ, я́ко Тво­ре́цъ ра́­бій зра́къ вос­пріи́­метъ, спа­сти́ хотя́ дѣ́ло ру́къ Сво­и́хъ отъ по­ги́­бе­ли вѣ́ч­ныя, воз­вѣ­ща́­ху про­о́бра­зы и про­ро́­че­ствы не­ло́ж­ны­ми, иму́­щее со­вер­ши́­те­ся искупле́ніе ро́да че­ло­вѣ́­ча обѣ­то­ва́н­нымъ Иску­пи́­те­лемъ. Ему́­же Ты́, Все­чи́­стая, пло́ть вза­и­мо­да́в­ши, спо­до́­би­ла­ся еси́ бы́ти Ма́­те­рію Го́­спо­да Тво­е­го́, вну­ша́­ю­ща­го на́мъ во­пи́­ти къ Тебѣ́:

Ра́дуй­ся, огне­зра́ч­ная па­ла́­то на хе­ру­ви́­мѣхъ Сѣдя́щаго; ра́дуй­ся, свѣ­то­но́с­ная ло́ж­ни­це се­ра­фи́­мы По­ве­лѣ­ва́­ю­ща­го. Ра́дуй­ся, о́дре Царя́ Ве­ли́­ка­го вер­ху́ горы́ не­бе́с­ныя; ра́дуй­ся, пре­сто́­ле оду­шев­ле́н­ный Обла­да́­ю­ща­го го́р­ни­ми и до́ль­ни­ми. Ра́дуй­ся, кі­во́­те освяще́н­ный Бо­же­ства́, свята́я святы́хъ бо́ль­шій; ра́дуй­ся, ста́м­но все­зла­та́я, въ не́й­же ма́н­на спа­си́­тель­ная уго­то́­ва­ся - пло́ть и кро́вь Бо­же́­ствен­на­го Агнца.

Ра́дуй­ся, Бла­го­да́т­ная, Ку­пи­но́ Не­о­па­ли́­мая, о́гнен­на­го за­па­ле́нія на́съ из­ба­вля́ющая.

Кон­да́къ 3

Си́лою Все­вы́ш­няго дѣ́й­ствуя, Вла­ды́­чи­це Пре­бла­га́я, си́лу есте­ства́ о́гнен­на­го укро­ща́­е­ши свято́ю ико́­ною Тво­е́ю и мно́­га чу­де­са́ е́ю со­дѣ­ва́­е­ши во все­ле́н­нѣй. Тѣ́м­же ро́дъ хри­стіа́н­скій убла­жа́­етъ Тя́ гла́­сы хва­ле́б­ны­ми и въ бѣ­да́хъ вне­за́п­ныхъ, на­и­па́­че же во вре́мя о́гнен­на­го за­па­ле́нія къ Тебѣ́ мо­ли́­твен­но при­те­ка́­етъ, пріе́мля по́­мощь отъ Тебе́ бла­го­вре́­мен­ну. Сего́ ра́ди бла­го­да́р­ствен­но во­піе́мъ про­сла́вль­шему Тя́ Царю́ сла́­вы, Хри­сту́: Алли­лу́ія.

Икосъ 3

Имѣ́я лю­бо́вь ве́лію къ лю́­демъ иску́­плен­нымъ чест­но́ю кро́­вію Сы́на Тво­е­го́ и Бо́га, Бо­го­ма́­ти пре­чи́­стая, прія́ла еси́ отъ Него́ вла́сть стро́­и­ти и по­кры­ва́­ти ро́дъ хри­стіа́н­скій: Ты́ бо грѣ́ш­ни­комъ еси́ спо­ру́ч­ни­ца покая́нія и́хъ предъ Тво­рце́мъ, не­на­де́ж­нымъ на­де́­ждо спа­се́нія, бѣ́д­ствую­щимъ по́­мо­ще ско́­рая, по­ги́б­шимъ взы­ска́ніе дер­жа́в­ное и все­му́ мíру по­кро́въ. Тебѣ́, ми­ло­се́р­дой и бла­го­лю­би́­вой За­сту́п­ни­цѣ на́­шей, за лю­бо́вь лю­бо́­вію воз­да­ва́я, сми­рен­но­му́­дрен­но гла­го́­лемъ:

Ра́дуй­ся, ра́­до­сте всемíрная, е́юже сле́­зы отъе́м­лют­ся отъ оче́съ стра́жду­щихъ и скорбя́щихъ; ра́дуй­ся, при­бѣ́­жи­ще бла­го­о­ти́ш­ное, въ не́м­же спа­са́­ют­ся обу­ре­ва́­еміи бу́­рею стра­сте́й жи­те́й­ска­го мо́ря. Ра́дуй­ся, уто­ли́­тель­ни­це все­мо­гу́­щая пра́­вед­но дви́­жи­ма­го на на́съ гнѣ́­ва Бо́жія; ра́дуй­ся, пла́­мень огня́ уга­ша́­ю­щая ро­со́ю мо­ли́твъ Тво­и́хъ у пре­сто́­ла Все­дер­жи́­теля. Ра́дуй­ся, отъ гро́­ма и мо́лніи со­блю­да́­ю­щая пред­ста́­тель­ствомъ Тво­и́мъ не­бе́с­нымъ; ра́дуй­ся, по́­мощь Твою́ святу́ю бла­го­вре́­мен­но по­да­ю́­щая вся́кой души́, вѣ́р­но Тебѣ́ моля́щейся.

Ра́дуй­ся, Бла­го­да́т­ная, Ку­пи­но́ Не­о­па­ли́­мая, о́гнен­на­го за­па­ле́нія на́съ из­ба­вля́ющая.

Кон­да́къ 4

Бу́ря о́гнен­ная егда́ на́й­детъ на на́съ вне­за́п­но и пла́­мень гра́­ды и ве́си на́ша обы́­метъ, то­гда́, Го­спо­же́ все­ми́­ло­сти­вая, уско­ри́ на по́­мощь къ на́мъ без­по­мо́щ­нымъ и ико́­ною Тво­е́ю чест­но́ю за­щи­ти́ и из­ба́­ви на́съ отъ о́гнен­на­го на­ка­за́нія, его́­же со­тво­ри́­хом­ся до­сто́й­ни грѣ́хъ ра́ди на́­шихъ. Тебе́ бо грѣ́ш­ніи и́ма­мы За­сту́п­ни­цу не­по­сты́д­ную, на Тя́ упо­ва́ніе на́ше воз­ла­га́­емъ и, про­слав­ля́я си́лу мо­ли́твъ Тво­и́хъ, Ро́жд­ше­муся отъ Тебе́ Спа́су мíра зо­ве́мъ: Алли­лу́ія.

Икосъ 4

Слы́­шимъ и ви́­димъ чу­де­са́ ве́лія отъ ико́­ны Твоея́ бы­ва́­е­мыя, Ца­ри́­це на́ша все­бла­га́я, ю́же да­ро­ва́­ла еси́ на́мъ во утѣ­ше́ніе и за­щи́ту въ несча́­стіяхъ: се́ бо и всепояда́­ю­щіи о́гнь из­не­мо­га́­етъ въ си́лѣ сво­е́й предъ си́­лою бла­го­да́т­ною Тво­е­го́ пре­чи́­ста­го о́бра­за, я́коже мно́­га­жды ви́­дѣ­хомъ и ис­пы­та́­хомъ, Не­о­па­ли́­мою Ку­пи­но́ю Тя́ име­ну́я въ изо­бра­же́ніи сего́ Тво­е­го́ о́бра­за, и предъ ни́мъ Тебѣ́ вос­пѣ­ва́я гла́­сы хва­ле́б­ны­ми си́це:

Ра́дуй­ся, мо­ли́­твен­ни­це не­у­сы­па́­ю­щая ко Хри­сту́ Бо́гу, на ми́­лость къ на́мъ Его́ пре­кло­ня́ющая; ра́дуй­ся, ка́ру Бо́жію за без­за­ко́нія на́ша отъ гла́въ на́­шихъ отводя́щая. Ра́дуй­ся, ри́­зою Тво­е́ю чест­но́ю отъ вся́кихъ несча́­стій на́съ со­хра­ня́ющая; ра́дуй­ся, ма́­тер­нимъ по­кро́­вомъ ще­дро́тъ Тво­и́хъ жи­ли́­ща на́ша отъ огня́ и гро́­ма со­блю­да́­ю­щая. Ра́дуй­ся, все­ми́­ло­сти­вая услы́­ша­тель­ни­ца гла́­совъ на́­шихъ мо­ле́б­ныхъ въ ско́р­би и обстоя́ніи; ра́дуй­ся, дер­жа́в­ная cко­ро­по­мо́щ­ни­це на́ша во дни́ тя́ж­кихъ ис­пы­та́ній.

Ра́дуй­ся, Бла­го­да́т­ная, Ку­пи­но́ Не­о­па­ли́­мая, о́гнен­на­го за­па­ле́нія на́съ из­ба­вля́ющая.

Кон­да́къ 5

Бого­те́ч­ная звѣз­да́, ико́­на Твоя́ все­чест­на́я, Бо­го­ро́­ди­це Дѣ́во, во все́мъ мíрѣ чу­де́съ мно́­же­ствомъ бла­го­да́т­но сія́етъ и про­свѣ­ща́­етъ ду́ши и серд­ца́ че­ло­вѣ́­че­скія къ по­зна́нію ве́лія Тво­е­го́ ми­ло­се́р­дія, и́мже ро́дъ хри­стіа́н­скій по­кры­ва́­е­ши и за­сту­па́­е­ши, я́ко Ма́ти бла­го­се́р­дая. О се́мъ ра́ду­ю­ще­ся, бла­го­да­ри́мъ Хри­ста́ Бо́га, Тебе́, Ма́­терь Свою́ по пло́­ти, и на́мъ въ Ма́­терь по ду́ху да­ро­ва́в­ша­го и зо­ве́мъ Ему́ во уми­ле́ніи глу­бо́­цѣмъ: Алли­лу́ія.

Икосъ 5

Ви́димъ ико́ну Твою́, Вла­ды́­чи­це, я́ко во­и́­стин­ну Купи­ну́ Не­о­па­ли́мую, во огни́ не­сго­ра́­ю­щую, и при­су́т­ствіемъ сво­и́мъ жи­ли́­ща че­ло­вѣ́­че­скія въ пла́­ме­ни не­сга­ра́­е­мы­ми со­дѣ́­ло­ва­ю­щую: Тебѣ́ бо да­де́ся бла­го­да́ть свы́­ше, си́лу есте­ства́ о́гнен­на­го укро­ща́­ти, Огнь Бо­же­ства́ во чре́­вѣ Тво­е́мъ не­о­па́ль­но вмѣ­сти́в­шей. Сея́ же бла­го­да́­ти и о́бразъ по­до́­бія Тво­е­го́ при­ча́­стенъ по­ка­за́­ся, тѣ́м­же отъ вѣ́р­ныхъ Не­о­па­ли́­мою Ку­пи­но́ю на­и­ме­но­ва́ся, его́­же мы́ че­ству́­емъ бла­го­лѣ́п­но, и Тебѣ́ хва­ле́б­но во­піе́мъ:

Ра́дуй­ся, свѣ­ще́ не­у­га­си́­мая, въ мо­ли́­твахъ за на́съ у пре­сто́­ла Го­спо́д­ня при­сно­го­ря́щая; ра́дуй­ся, огне́мъ люб­ве́ Бо́жія и на́ша хла́д­ная серд­ца́ вос­пла­ме­ня́ющая. Ра́дуй­ся, сѣ́нію мо­ли́твъ Тво­и́хъ зно́й стра­сте́й на́­шихъ про­хла­жда́­ю­щая; ра́дуй­ся, въ ча́съ ско́р­би и не­доу­мѣ́нія по́­мы­слы ду­ше­по­ле́з­ныя на́мъ низ­по­сы­ла́­ю­щая. Ра́дуй­ся, во вре́мя без­по­мо́щія на́­ше­го, егда́ бѣ́д­ствуемъ и не и́ма­мы по­мо­га́­ю­ща­го, на по́­мощь къ на́мъ ускоря́ющая; ра́дуй­ся, въ го­ди́ну несча́­стій вне­за́п­ныхъ дер­жа́в­ною руко́ю Тво­е́ю отъ по­ги́­бе­ли на́съ ис­хи­ща́­ю­щая.

Ра́дуй­ся, Бла­го­да́т­ная, Ку­пи­но́ Не­о­па­ли́­мая, о́гнен­на­го за­па­ле́нія на́съ из­ба­вля́ющая.

Кон­да́къ 6

Про­по­вѣ́дуетъ Це́р­ковь Хри­сто́­ва чу­де­са́ Твоя́, Бо­го­ро­ди́­тель­ни­це, я́же па́че пе­ска́ мор­ска́­го и звѣ́здъ не­бе́с­ныхъ мно́­жае су́ть: отъ во­сто́­ка бо и до за́­па­да хва́ль­но и́мя Твое́ чу­де­сы́, и нѣ́сть гра́­да или́ стра­ны́, идѣ́­же не со­вер­ши́­ся То­бо́ю дѣ́й­ство си́лы Бо́жія во из­ба­вле́ніе и спа­се́ніе, про­свѣ­ще́ніе и ис­цѣ­ле́ніе лю­де́й хри­сто­и­ме­ни́­тыхъ. На­и­па́­че же чрезъ ико́­ны Твоя́ святы́я обы́­кла еси́ чу­до­тво­ри́­ти, из­ли­ва́я отъ ни́хъ струи́ ми́­ло­сти и ще­дро́тъ бѣ́д­ству­ю­щему и боля́щему че­ло­вѣ́­че­ству. Сего́ ра́ди сла­во­сло́­вимъ Тя́ гла́­сы пѣ́­сней ду­хо́в­ныхъ и во­піе́мъ Сы́ну Тво­е­му́ и Бо́гу на́­шему: Алли­лу́ія.

Икосъ 6

Возсія́ла еси́ въ свѣ­то­ли́тіи Бо­же́­ствен­ныя сла́­вы, Дѣ́во Бо­го­о­тро­ко­ви́­це, Мла­де́н­ца Пред­вѣ́ч­на­го, Го́­спо­да Іису́­са Хри­ста́ на руку́ Тво­е́ю дер­жа́­щи, и ли́­комъ си́лъ а́н­гель­скихъ окру­жа́­е­мая, я́коже Тя́ ви́­димъ на ико́­нѣ изо­бра­же́н­ную, Мо­исе́й­скую Не­о­па­ли́мую Купи­ну́ та́­ин­ствен­но про­на­ре­че́н­ную, отъ нея́же да́ры бла­го­да́т­ныя вѣ́р­нымъ да́руе­ши, отъ огня́ и гро́­ма спа­са́­е­ши, не­ду́ж­ныя вра­чу́­е­ши, скорбя́щія утѣ­ша́­е­ши и всѣ́мъ вся́ бла­га́я и ду­ше­по­ле́з­ная низ­по­сы­ла́­е­ши, во е́же пѣ́ти Тебѣ́ гла́­сы не­мо́лч­ны­ми си́це:

Ра́дуй­ся, о Не́й­же ра́дует­ся и тор­же­ству́­етъ а́н­гель­скій со­бо́ръ и че­ло­вѣ́­че­скій ро́дъ; ра́дуй­ся, Ея́же сла́­ва пре­вос­хо́­дитъ по­хва­лы́ зем­ны́я и не­бе́с­ныя. Ра́дуй­ся, отъ го́р­нихъ вы­со́тъ всю́ все­ле́н­ную ма́­тер­нею лю­бо́­вію Тво­е́ю на­зи­ра́­ю­щая; ра́дуй­ся, юдо́ль зем­ну́ю мно­го­ско́рб­ную бла­го­дѣя́ніи Тво­и́­ми по­сѣ­ща́­ю­щая. Ра́дуй­ся, не­ис­че́т­ною бла­го­сты́­нею Тво­е́ю не остав­ля́ющая са́­мыхъ пре­зрѣ́н­ныхъ и отве́р­жен­ныхъ; ра́дуй­ся, сер­до­бо́ліемъ Тво­и́мъ отъ ро́ва по­ги́­бель­на­го ис­хи­ща́­ю­щая без­на­де́ж­ныхъ.

Ра́дуй­ся, Бла­го­да́т­ная, Ку­пи­но́ Не­о­па­ли́­мая, о́гнен­на­го за­па­ле́нія на́съ из­ба­вля́ющая.

Кон­да́къ 7

Хотя́ Го­спо́дь яви́ти лю­бо́вь Свою́ къ лю́­демъ, искупле́н­нымъ Его́ кро́­вію, да­ро­ва́ на́мъ въ по­кро́въ и за­щи́ту Ма́­терь Свою́ Пре­не­по­ро́ч­ную, и Сію́ со­тво­ри́ при­бѣ́­жи­ще бла­го­о­ти́ш­ное вся́кой души́ хри­стіа́н­стѣй, скорбя́щей и оз­ло́б­лен­нѣй, по́­мо­щи и ми́­ло­сти тре́бу­ю­щей. Вѣ́ду­ще у́бо о та­ко­вѣ́мъ ми­ло­се́р­домъ служе́ніи Тво­е́мъ ро́ду че­ло­вѣ́­че­ско­му, Вла­ды́­чи­це все­бла­га́я, къ Тебѣ́ о́чи на́ши въ ско́р­бехъ воз­во́­димъ, и ру́цѣ мо­ле́б­но про­сти­ра́­емъ, утѣ­ше́нія отъ Тебе́ еди́­ныя прося́ще, да спа­се́­ши на́съ пред­ста́­тель­ствомъ Тво­и́мъ отъ скор­бе́й вре́­мен­ныхъ и вѣ́ч­ныхъ и спо­до́­би­ши на зе­мли́ жи­вы́хъ, въ ра́­до­сти святы́хъ пѣ́ти Бо́гу: Алли­лу́ія.

Икосъ 7

Ди́вно про­сла́­ви­ла еси́ чу­де­сы́ ико́ну Твою́ святу́ю Не­о­па­ли́мую Купи­ну́ име­ну́­емую, Бо­го­ро́­ди­це Дѣ́во, е́юже гра́­ды и ве́си отъ за­па­ле́нія о́гнен­на­го и мол­ніе­но́с­на­го гро́­ма со­блю­да́­е­ши и до́мы вѣ́р­ныхъ бла­го­слов­ля́еши, въ ни́х­же че­ству́­ет­ся бла­го­го­вѣ́й­но пре­чи́­ста­го ли́ка Тво­е­го́ по­до́­біе. Сего́ ра́ди я́ко да́ръ мно­го­цѣ́­ненъ, о́бразъ Тво́й бла­го­да́т­ный ра́­дост­но пріе́м­лемъ, до­сто­до́лж­нымъ по­кло­не́ніемъ по­чи­та́­емъ, и Тя́ по до́лгу убла­жа́­емъ бла­го­хва­ле́ніи си́ми:

Ра́дуй­ся, ала­ва́стре вра­че­ва́­нія, на вся́къ не­ду́гъ вра­чев­ство́ со­дер­жа́­щій; ра́дуй­ся, мѵро­по­ло́ж­ни­це бла­гоу­ха́нія Хри­сто́­ва, обла­гоу­ха́в­шая па́д­шее че­ло­вѣ́­че­ство. Ра́дуй­ся, у́зы грѣ­хо́в­ныя раз­рѣ­ша́­ю­щая ка́­ю­щим­ся грѣ́ш­ни­комъ; ра́дуй­ся, пле­ни́­цы стра­сте́й со­кру­ша́­ю­щая по­дви­за́­ю­щим­ся о чи­сто­тѣ́. Ра́дуй­ся, дѣ́въ мла­до­пи­та́­тель­ни­це и ма́­те­рей ти́­хое ве­се́ліе; ра́дуй­ся, вдо́въ за­сту́п­ни­це и си­ро́тъ бла­го­се́р­дое при­зрѣ́­ніе.

Ра́дуй­ся, Бла­го­да́т­ная, Ку­пи­но́ Не­о­па­ли́­мая, о́гнен­на­го за­па­ле́нія на́съ из­ба­вля́ющая.

Кон­да́къ 8

Стра́н­но е́сть ви́­дѣ­ти, я́ко ико́­на Твоя́, Вла­ды́­чи­це, на дсцѣ́ на­пи́­сан­ная и по есте­ству́ сво­е­му́ о́гнен­но­му дѣ́й­ству по­две́р­жен­ная, си́лу па́че есте́­ствен­ную явля́етъ и при­су́т­ствіемъ сво­и́мъ си́лу огня́ укро­ща́­етъ. Въ се́мъ по­зна­ва́я си́лу Бо́жію и Тво­и́хъ мо­ли́твъ дѣ́й­ство, ве­ли­ча́­емъ воз­ве­ли́­чив­ша­го Тя́ Зи­жди́­теля, вся́­че­скихъ Бо́га, во отра́ду и утѣ­ше́ніе на́мъ да­ро­ва́в­ша­го о́бразъ Тво́й чу­до­тво́р­ный и си́мъ спа­са́­ю­ща­го на́съ отъ о́гнен­на­го за­па­ле́нія, да при́­сно зо­ве́мъ Ему́ бла­го­да́р­ствен­но и хва­ле́б­но: Алли­лу́ія.

Икосъ 8

Ве́сь мíръ хри­стіа́н­скій сла́­витъ и́мя Твое́, пре­бла­го­сло­ве́н­ная Марíе Бо­го­ро́­ди­це, и вся́кому вѣ́р­ному сла́­дост­но и утѣ́­ши­тель­но взи­ра́­ти на пре­чи́­ста­го ли́ка Тво­е­го́ по­до́­біе, и́мже обы́­кла еси́ явля́ти мно́­гая и пре­сла́в­ная чу­де­са́. Се́ и мы́, сми­ре́н­ніи, Твою́ святу́ю ико́ну ви́дяще, бо­го­лѣ́п­но е́й по­кла­ня́емся и съ лю­бо́­вію ю́ ло­бы­за́­емъ, ча́­ю­ще отъ нея́ по́­мо­щи и за­ступле́нія Тво­е­го́ дер­жа́в­на­го, на­и­па́­че во вре́мя без­по­мо́щія на́­ше­го, егда́ грѣ́хъ ра́ди на́­шихъ о́гнен­ное за­па­ле́ніе на ны́ на́й­детъ вне­за́п­но, да спа­са́­е­ми То­бо́ю отъ по­ги́­бель­на­го пла́­ме­ни бла­го­да́р­ны­ми усты́ Тебѣ́ во­піе́мъ:

Ра́дуй­ся, не­руко­тво­ре́н­ная ски́ніе Бо́га Сло́­ва, хе­ру­ви́­мы пре­вы­ша́­ю­щая и се­ра­фи́­мы пре­вос­хо­дя́щая святы́­нею и чи­сто­то́ю; ра́дуй­ся, о́бла­че ле́г­кій Со́лн­ца пра́­вды, и́мже Не­бе́с­ный къ зем­ны́мъ пріи́­де, да на не́бо съ Со­бо́ю на́съ воз­ве­де́тъ. Ра́дуй­ся, ра́й­скія две́­ри отве́рз­шая па́д­ше­му че­ло­вѣ́­че­ству Ро­жде­ство́мъ Тво­и́мъ святы́мъ; ра́дуй­ся, не́бо и зе́­млю во еди́­но со­во­ку́пль­шая пѣ́ти Тебѣ́ и Ро́жд­ше­муся отъ Тебе́ не­мо́лч­ныя хва­лы́. Ра́дуй­ся, Бо­же́­ствен­ный исто́ч­ни­че, Во́ду Жи́­зни исто­чи́в­шій, отъ нея́же пію́­щіи къ тому́ не уми­ра́­ютъ; ра́дуй­ся, гро́здь спа­се́нія воз­ра­сти́в­шая бла­го­сло­ве́н­ная лозо́, вино́ без­сме́р­тія иска́­па­ю­щій че­ло­вѣ́­комъ.

Ра́дуй­ся, Бла­го­да́т­ная, Ку­пи­но́ Не­о­па­ли́­мая, о́гнен­на­го за­па­ле́нія на́съ из­ба­вля́ющая.

Кон­да́къ 9

Вся́ку по­хва­лу́ пре­вос­хо́­дитъ сла́­ва Твоя́, пре­бла­го­сло­ве́н­ная и пре­про­сла́в­лен­ная Ма́­терь Го́­спо­да на́­ше­го: не­доу­мѣ­ва́­ютъ бо и умы́ без­пло́т­ніи пѣ́ти Тя́ по достоя́нію, тѣ́мъ па́че на́мъ, зем­ны́мъ и пе́рст­нымъ, сіе́ не­у­до́б­но е́сть, но лю­бо́­вію къ Тебѣ́ по­бѣ­жда́­е­ми, дер­за́­емъ при­но­си́­ти Тебѣ́ по­си́ль­ное пѣ́ніе хва­лы́ и бла­го­да­ре́нія, за пре­мно́­гую ми́­лость Твою́ къ ро́ду че­ло­вѣ́­че­ско­му, его́­же воз­лю­би́­ла еси́ и ему́­же бла­го­тво­ри́­ти не пре­ста­е́­ши, по­дви­за́я вся́къ во́з­растъ вѣ́р­ныхъ взы­ва́­ти ро́жд­ше­муся отъ Тебе́ Спа́су Хри­сту́: Алли­лу́ія.

Икосъ 9

Витíи че­ло­вѣ́­че­скія из­не­мо­га́­ютъ по­сти́г­нути ве́лію та́й­ну Тво­е­го́ при­сно­дѣ́в­ства, Бо­го­ро­ди́­тель­ни­це, ю́же утаи́ Го­спо́дь отъ пре­му́­дрыхъ вѣ́ка сего́, и вѣ́­рою откры́ сми­ре́н­нымъ и бла­го­го­вѣ́й­нымъ, пы­т­ли́­ва­го ис­пы­та́нія чу́­ждымъ, отъ ни́х­же пра­во­сла́в­но и не­со­мнѣ́н­но до ро­жде­ства́, и въ ро­жде­ствѣ́, и по ро­жде­ствѣ́ Дѣ́­вою про­по­вѣ́дуе­ши­ся. Пріи­ми́ у́бо, о Ма́ти и Дѣ́во, и на́ше о се́мъ ис­по­вѣ́­да­ніе все­ду­ше́в­ное и укрѣ­пи́ на́съ по­слѣ́­до­ва­ти Тебѣ́ жи­тіе́мъ не­по­ро́ч­нымъ и сер­де́ч­ною чи­сто­то́ю, да воз­мо́­жемъ бла­гоу­го́д­но вос­пѣ­ва́­ти Тебѣ́ пѣ́­сни си­це­вы́я:

Ра́дуй­ся, кри́­не бѣ­лоснѣ́ж­ный дѣ́в­ства и чи­сто­ты́, неувяда́­е­мо цвѣ­ту́щій горѣ́; ра́дуй­ся, къ дѣ́в­ству и чи­сто­тѣ́ не­ви́­ди­мо ру­ко­во́д­ствую­щая жи­ву́­щихъ до́лѣ. Ра́дуй­ся, ма́­тер­ство и дѣ́в­ство въ Себѣ́ чу́д­но со­че­та́в­шая; ра́дуй­ся, во обою́ не­по­ро́ч­но и свя́то Себе́ со­блю́д­шая. Ра́дуй­ся, и́но­че­скихъ ли­ко́въ пред­во­ди́­тель­ни­це въ дѣ́в­ствѣ бо­гоу­го́д­номъ; ра́дуй­ся, дѣ́в­ствен­ныхъ пол­ко́въ на­ча́ль­ни­це въ чи­сто­тѣ́ души́ и тѣ́ла.

Ра́дуй­ся, Бла­го­да́т­ная, Ку­пи­но́ Не­о­па­ли́­мая, о́гнен­на­го за­па­ле́нія на́съ из­ба­вля́ющая.

Кон­да́къ 10

Спа­се́ніе че­ло­вѣ́­че­ское устроя́я Еди́нъ отъ Тро́­и­цы во­пло­ти́­ти­ся отъ Тебе́ из­во́­ли, Бо­го­не­вѣ́­сто Вла­ды́­чи­це, есте­ство́ че­ло­вѣ́­че­ское про­сла́­вивъ сѣ­дѣ́ніемъ оде­сну́ю Отца́ на пре­сто́­лѣ Бо­же­ства́, я́ко Сы́нъ Еди­но­ро́д­ный, То́й­же и Сы́нъ Тво́й по пло́­ти бы́сть, и Тебе́ съ Со­бо́ю про­сла́­ви сла́­вою пре­вы́ш­шею вся́кія сла́­вы, ея́же до­бро́­тою осѣня́ема, не за­бы­ва́­е­ши ми́­ло­стив­но ро́дъ че­ло­вѣ́­че­скій, но мо­ли́­твен­но пред­ста́­тель­ствуе­ши предъ Тво­рце́мъ въ Тро́­и­цѣ Еди́­нымъ, о всѣ́хъ вѣ́р­но по­ю́­щихъ Ему́ сла­во­сло́­вія пѣ́снь: Алли­лу́ія.

Икосъ 10

Стѣна́ еси́ дѣ́в­ствен­нымъ ли­ко́мъ и и́но­че­скимъ со­бо́­рамъ, Бо­го­ро́­ди­це Дѣ́во, и всѣ́мъ усе́рд­но къ Тебѣ́ въ мо­ли́­твахъ при­те­ка́­ю­щимъ, ико́ну же Твою́ святу́ю бла­го­го­вѣ́й­но че­ству́­ю­щимъ: Тебѣ́ бо еди́­нѣй да­ро­ва́ся отъ Го́­спо­да бла­го­да́ть всемíрнаго за­ступле́нія, и вѣ́р­ныхъ въ дѣ́в­ствѣ и чи­сто­тѣ́ утвер­жде́нія. Тѣ́м­же не­по­ро́ч­на­го житія́ ра­чи́­теліе подъ ма́­тер­ній по­кро́въ Тво́й отъ бу́ри стра­сте́й при­бѣ­га́­ютъ и бла­го­о­ти́­шіе ду­ше́в­ное на­хо́дятъ, со­гла́с­но къ Тебѣ́ взы­ва́я:

Ра́дуй­ся, и́но­ковъ и и́но­кинь бла­го­че­сти́­выхъ изря́дная по­кро­ви́­тель­ни­це и те́­плая къ Бо́гу о ни́хъ хо­да́­та­и­це; ра́дуй­ся, та́й­ныхъ сре­ди́ мíра ра­бо́въ Бо́жіихъ все­гда́ш­няя по­мо́щ­ни­це и въ по́­дви­зѣхъ ду­хо́в­ныхъ ру­ко­во­ди́­тель­ни­це. Ра́дуй­ся, ю́ныхъ на­ста́в­ни­це цѣ­ло­му́­дрія и воз­дер­жа́нія; ра́дуй­ся, ста́рцевъ бла­го­го­вѣ́й­ныхъ упо­ко­е́­ніе и отра́­до. Ра́дуй­ся, до́мы и се­ме́й­ства хри­стіа́н­скія осѣня́ющая бла­ги́мъ Тво­и́мъ по­кро́­вомъ; ра́дуй­ся, вся́къ во́з­растъ вѣ́р­ныхъ спо­до­б­ля́ющая Тво­е­го́ бла­го­се́р­да­го по­пе­че́нія.

Ра́дуй­ся, Бла­го­да́т­ная, Ку­пи­но́ Не­о­па­ли́­мая, о́гнен­на­го за­па­ле́нія на́съ из­ба­вля́ющая.

Кон­да́къ 11

Пѣ́ніе хва­ле́б­ное при­но́­ситъ Тебѣ́ не­мо́лч­но свята́я Хри­сто́­ва Це́р­ковь, все­пѣ́­тая Вла­ды́­чи­це, воз­вѣ­ща́я ми́­ло­сти Твоя́ и чу­де­са́, и́ми­же обо­га­ти́­ся вся́ все­ле́н­ная. Во­и́­стин­ну, кто́ бо я́ко Ты́ ско­ро­по­слуш­ли́въ е́сть къ мо­ли́­твен­нымъ про­ше́ніямъ на́­шимъ? Но и са́мыя про­ше́нія обы́­кла еси́ пред­ва­ря́ти, ми́луя и ущедря́я тре́бу­ю­щихъ по́­мо­щи Твоея́ святы́я, ея́же не лиши́ и на́съ, сми­ре́н­ныхъ, въ ча́съ се́й по­ю́­щихъ во сла́ву и́ме­ни Тво­е­го́, и во­пі­ю́­щихъ Бо́гу: Алли­лу́ія.

Икосъ 11

Свѣ­то­за́р­ная Твоя́ ико́­на, Бо­го­ма́­ти пре­чи́­стая, про­свѣ­ща́­етъ по­тем­не́н­ныя грѣ­ха́­ми ду́ши на́ша сія́ніемъ Бо­же́­ствен­ныхъ чу­де́съ, въ ни́х­же по­зна­е́мъ Бо́жія все­мо­гу́­ще­ства си́лу и Твое́ ми­ло­се́р­діе не­ис­че́т­ное, при́­сно го­то́­вое спо­со́б­ство­ва­ти на́мъ въ покая́ніи и обра­ще́ніи отъ злы́хъ дѣ́лъ на пу́ть спа­се́нія. Мо́­лимъ у́бо Тебе́, Все­бла­га́я, не оста́­ви на́съ за­блу­жда́­ти въ де́­брехъ грѣ­хо́въ и стра­сте́й, но при­ве­ди́ къ ти́­хому при­ста́­ни­щу бла­го­че́ст­на­го и бо­гоу­го́д­на­го житія́, да воз­мо́­жемъ до­сто́й­но при­но­си́­ти Тебѣ́ сія́ пѣ́­снен­ныя да́ры:

Ра́дуй­ся, вра­ги́ на́ша не­ви́­ди­мыя за­пи­на́­ю­щая бо́­дрен­ною Тво­е́ю мо­ли́­твою; ра́дуй­ся, не по­пу­ска́­ю­щая обла­да́­ти и́мъ надъ на́ми на­си́ліемъ сме́рт­на­го сего́ тѣ­ле­си́. Pа́дуй­ся, я́ко бѣ́сы и́ме­ни Тво­е­го́ свята́го боя́тся и тре­пе́щутъ; ра́дуй­ся, я́ко ико́­на Твоя́ чест­на́я вся́ку си́лу діа́­во­лю при­су́т­ствіемъ сво­и́мъ про­го́­нитъ. Pа́дуй­ся, по­дви́ж­ни­ковъ бла­го­че́­стія укрѣп­ля́ющая въ бра́­ни ду­хо́в­ной со вра­га́­ми спа­се́нія че­ло­вѣ́­че­ска­го; ра́дуй­ся, въ ча́съ кон­чи́­ны по­мо­га́­ю­щая лю­бо́вь и вѣ́ру къ Тебѣ́ иму́­щимъ.

Ра́дуй­ся, Бла­го­да́т­ная, Ку­пи­но́ Не­о­па­ли́­мая, о́гнен­на­го за­па­ле́нія на́съ из­ба­вля́ющая.

Кон­да́къ 12

Бла­го­да́­ти Бо́жія при­ча́ст­ну ис­по­вѣ́дуемъ Твою́ святу́ю ико́ну, бо­го­бла­го­да́т­ная Дѣ́во, и свѣ́т­ло тор­же­ству́­емъ пра́з­дникъ ея́ явле́нія: во о́бра­зѣ со не­о­па­ли́­мыя ку­пи­ны́ сея́ я́вль­ши­ся, то́­жде и дѣ́й­ство по­ка­зу́­етъ сво­и́­ми чу­де­сы́, отъ о́гнен­на­го пла́­ме­ни со­хра­ня́я и со­блю­да́я жи­ли́­ща на́ша сво­и́мъ при­су́т­ствіемъ. Сію́ у́бо, я́ко щи́тъ и за­бра́­ло, иму́­ще, Тебе́, по­мо́щ­ни­цу на́шу дер­жа́в­ную хва­ла́­ми пѣ́­снен­ны­ми убла­жа́­емъ и Ро́жд­ше­муся отъ Тебе́ Спа­си́­те­лю на́­шему во­піе́мъ: Алли­лу́ія.

Икосъ 12

Пое́мъ Тя́, Бо­го­ро­ди́­тель­ни­це, еди́ну на­де́жду и упо­ва́ніе на́ше, про­по­вѣ́дуемъ ми́­ло­сти Твоя́ и не та­и́мъ чу­де́съ Тво­и́хъ, про­слав­ля́емъ не­ис­че́т­ную бла́­гость Твою́ къ ро́ду хри­стіа́н­ско­му, бла­го­слов­ля́емъ и́мя Твое́ свято́е, е́же во­и́­стин­ну мѵ́ро излія́нное е́сть для лю́бящихъ Тя́, бла­гоу­ха́ніемъ ду­хо́в­нымъ ис­пол­ня́ющее бла­го­че­сти́­выя ду́ши. Обла­гоу­ха́й у́бо и на́съ, Вла­ды́­чи­це, смердя́щихъ страсть­ми́ грѣ­хо́в­ны­ми, и спо­до́­би чи́­стымъ се́рд­цемъ и не­скве́р­ны­ми усты́ взы­ва́­ти къ Тебѣ́:

Ра́дуй­ся, мѵ́ро исто­ча́­ю­щая сла́­дост­ное и ду­ше­спа­си́­тель­ное, и́мже ума­ща́­ют­ся серд­ца́ бо­го­лю­би́­вая; ра́дуй­ся, не­ду́­ги ду­ше́в­ныя и тѣ­ле́с­ныя вра­чу́­ю­щая еди́­нымъ при­кос­но­ве́ніемъ къ ико́­нѣ Тво­е́й святѣ́й. Ра́дуй­ся, во­ди́­тель­ни­це бла­га́я, на пу́ть бо­гоу­го­жде́нія и спа­се́нія на­прав­ля́ющая ка́­ю­щих­ся грѣ́ш­ни­ковъ; ра́дуй­ся, лѣ́­стви­цею до­бро­дѣ́­те­лей воз­во­дя́щая по­дви́ж­ни­ковъ Хри­сто́­выхъ ко вра­та́мъ Ца́рствія не­бе́с­на­го. Ра́дуй­ся, сми­ре́н­ныхъ и тер­пѣ­ли́­выхъ стра­да́ль­цевъ вѣн­ча́­ю­щая утѣ­ше́ніемъ бла­го­да́т­нымъ; ра́дуй­ся, из­гна́н­ныхъ и го­ни́­мыхъ без­ви́н­но, усла­жда́­ю­щая пред­вку­ше́ніемъ бла­же́н­ства ра́й­ска­го.

Ра́дуй­ся, Бла­го­да́т­ная, Ку­пи­но́ Не­о­па­ли́­мая, о́гнен­на­го за­па­ле́нія на́съ из­ба­вля́ющая.

Кон­да́къ 13

О, Все­пѣ́­тая Ма́ти, ро́жд­шая всѣ́хъ святы́хъ Святѣ́й­шее Сло́­во и Не­о­па­ли́­мою Ку­пи­но́ю име­ну́­е­мая отъ на́съ не­до­сто́й­ныхъ, вон­ми́ гла́су мо­ле́ній и пѣ́ній на́­шихъ, предъ свято́ю ико́­ною Тво­е́ю усе́рд­но Тебѣ́ воз­но­си́­мому, и те́­плою мо­ли́­твою Тво­е́ю ко Го́­спо­ду огня́ вре́­мен­на­го и вѣ́ч­на­го из­ба́­ви на́съ, хва́лящихъ и́мя Твое́ и про­слав­ля́­ю­щихъ чу­де­са́ Твоя́, Сы́ну же Тво­е­му́ и Бо́гу на́­шему во­пі­ю́­щихъ: Алли­лу́ія.

Се́й кон­да́къ гла­го́­лет­ся три́­жды. Та́же Икосъ 1-й и Кон­да́къ 1-й

Мо­ли́­тва Бо́жіей Ма́­те­ри предъ ико́­ною Ея́ "Не­о­па­ли́­мая Купи­на́"

О, Пресвята́я и Пре­бла­го­сло­ве́н­ная Ма́ти слад­ча́й­ша­го Го́­спо­да на́­ше­го Іису́­са Хри­ста́, при­па́­да­емъ и по­кла­ня́емся Тебѣ́ предъ свято́ю и пре­чест­но́ю ико́­ною Тво­е́ю, е́юже ди́в­ная и пре­сла́в­ная чу­де­са́ со­дѣ­ва́­е­ши, отъ о́гнен­на­го за­па­ле́нія и мол­ніе­но́с­на­го гро́­ма жи­ли́­ща на́ша спа­са́­е­ши, не­ду́ж­ныя исцѣля́еши и вся́ко бла­го́е про­ше́ніе на́ше во бла́­го ис­пол­ня́еши. Сми­ре́н­но мо́­лимъ Тя́, все­си́ль­ная ро́да на́­ше­го За­сту́п­ни­це: спо­до́­би на́съ, не­мощ­ны́хъ и грѣ́ш­ныхъ, Тво­е­го́ ма́­тер­няго уча́­стія и бла­го­по­пе­че́нія. Спа­си́ и со­хра­ни́, Вла­ды́­чи­це, подъ кро́­вомъ ми́­ло­сти Твоея́ Бла­го­вѣ́р­на­го Го­су­да́ря на́­ше­го, Импе­ра́­то­ра [и́мярекъ] всея́ Россíи, Це́р­ковь святу́ю, [оби́­тель сію́], всю́ страну́ на́шу пра­во­сла́в­ную, и вся́ ны́ при­па́­да­ю­щія къ Тебѣ́ съ вѣ́­рою и лю­бо́­вію, и уми­ле́н­но прося́щія со сле­за́­ми Тво­е­го́ за­ступле́нія. Ей, Го­спо­же́ Все­ми́­ло­сти­вая, уми­ло­се́р­ди­ся на на́съ, обу­ре­ва́­е­мыхъ грѣ­ха́­ми мно́­ги­ми и не иму́­щихъ дер­зно­ве́нія ко Хри­сту́ Го́­спо­ду про­си́­ти Его́ о по­ми́­ло­ва­ніи и про­ще́ніи, но Тебе́ пред­ла­га́­емъ къ Нему́ на умо­ле́ніе, Ма́­терь Его́ по пло́­ти. Ты́ же, Все­бла­га́я, про­стри́ къ Нему́ бо­го­пріи́м­ніи ру́цѣ Твои́ и пред­ста́­тель­ствуй за на́съ предъ бла́­го­стію Его́, прося́ на́мъ про­ще́нія пре­грѣ­ше́ній на́­шихъ, бла­го­че́ст­на­го ми́р­на­го житія́, благíя хри­стіа́н­скія кон­чи́­ны и до́­бра­го отвѣ́­та на стра́ш­нѣмъ судѣ́ Его́. На­и­па́­че же въ ча́съ гро́з­на­го по­сѣ­ще́нія Бо́жія, егда́ огне́мъ воз­го­ря́тся до́мы на́ша или́ мол­ніе­но́с­нымъ гро́­момъ устра­ша́­е­ми бу́­демъ, яви́ на́мъ ми́­ло­стив­ное Твое́ за­ступле́ніе и дер­жа́в­ное вспо­мо­же́ніе, да спа­са́­е­ми все­си́ль­ны­ми Тво­и́­ми ко Го́­спо­ду мо­ли́­тва­ми, вре́­мен­на­го на­ка­за́нія Бо́жія здѣ́ из­бѣ́г­немъ, вѣ́ч­ное бла­же́н­ство ра́й­ское та́мо уна­слѣ́дуемъ, и со всѣ́­ми святы́ми вос­по­е́мъ пре­чест­но́е и ве­ли­ко­лѣ́­пое и́мя по­кла­ня́емыя Тро́­и­цы, Отца́ и Сы́на и Свята́го Ду́ха, и Твое́ ве́ліе къ на́мъ ми­ло­се́р­діе, во вѣ́ки вѣ­ко́въ. Ами́нь.

Тро­па́рь, гла́съ 4

Иже во огни́ ку­пи­ны́ не­о­па­ли́­мыя, дре́в­ле Мо­исе́­емъ ви́­дѣн­ныя, та́й­ну во­пло­ще́нія Сво­е­го́ отъ не­и­ску­со­бра́ч­ныя Дѣ́вы Марíи Про­о­бра­зо­ва́­вый, То́й и ны́нѣ, я́ко чу­де́съ Тво­ре́цъ и всея́ тва́­ри Со­зда́­тель, ико́ну Ея́ святу́ю чу­де­сы́ мно́­ги­ми про­сла́­ви, да­ро­ва́въ ю́ вѣ́р­нымъ во ис­цѣ­ле́ніе не­ду́­гомъ и въ за­щи­ще́ніе отъ о́гнен­на­го за­па­ле́нія. Сего́ ра́ди во­піе́мъ Пре­бла­го­сло­ве́н­нѣй: на­де́­ждо хри­стіа́нъ, отъ лю́­тыхъ бѣ́дъ, огня́ и гро́­ма из­ба́­ви на Тя́ упо­ва́­ю­щихъ, и спа­си́ ду́ши на́ша, я́ко ми­ло­се́р­да.

Кон­да́къ, гла́съ 8

Пре­до­чи́­стимъ чу́в­ствія ду́шъ и тѣ­ле́съ на́­шихъ, да ви́­димъ та́­ин­ство Бо­же́­ствен­ное, обра́з­но явле́н­ное дре́в­ле ве­ли́­кому во про­ро́­цѣхъ Мо­исе́ю ку­пи­но́ю, го­рѣ́в­шею огне́мъ и не сга­ра́в­шею, въ не́й­же Тво­е­го́ без­сѣ́­мен­на­го Ро­жде­ства́, Бо­го­ро́­ди­це, пред­воз­вѣ­ще́ніе ис­по­вѣ́дуемъ и, бла­го­го­вѣ́й­но по­кла­ня́ющеся Тебѣ́ и ро́жд­ше­муся отъ Тебе́ Спа́су на́­шему, со стра́­хомъ во­піе́мъ: ра́дуй­ся, Вла­ды́­чи­це, по­кро́­ве, и при­бѣ́­жи­ще, и спа­се́ніе ду́шъ на́­шихъ.

Ве­ли­ча́­ніе

Вели­ча́­емъ Тя́, Пресвята́я Дѣ́во, Ма́ти Хри­ста́ Бо́га на́­ше­го, и чте́мъ Тво́й о́бразъ святы́й, отъ не­го́­же исто­ча́­е­ши ис­цѣ­ле́нія всѣ́мъ, съ вѣ́­рою къ Тебѣ́ при­те­ка́­ю­щимъ.