Конда́къ 1

Взбра́нной Воево́дѣ, Влады́чицѣ на́шей Богоро́дицѣ, похва́льная пѣ́нія прино́симъ Ти́ раби́ Твои́, я́ко прише́ствіемъ честна́го о́браза Твоего́ стяжа́вшіи щи́тъ крѣ́пкій, стѣ́ну необори́мую и стра́жа неусы́пна. Ты́ же, я́ко иму́щая держа́ву непобѣди́мую, покры́й и защити́ на́съ, Влады́чице, отъ всѣ́хъ враго́въ ви́димыхъ и неви́димыхъ и изба́ви отъ вся́каго вре́да, душе́внаго и тѣле́снаго, да зове́мъ Ти́:

Ра́дуйся, блага́я Врата́рнице, две́ри ра́йскія вѣ́рнымъ отверза́ющая.

Икосъ 1

Ангелъ предста́тель по́сланъ бы́сть рещи́ Богоро́дицѣ, егда́ паде́ Ей жре́бій апо́стольскаго служе́нія въ земли́ Иверстѣй: "Не разлуча́йся Іерусали́ма, жре́бій же, Тебѣ́ па́дшій, просвѣти́тся въ послѣ́днія дни́, Ты́ же и́маши потруди́тися въ земли́, ю́же Тебѣ́ Бо́гъ изво́литъ". Тѣ́мже [зове́мъ Ти́]:

Ра́дуйся, Еюже Ева́нгеліе благовѣсти́тся; ра́дуйся, Еюже и́дольская пре́лесть упраздни́тся. Ра́дуйся, Еюже вла́сть кня́зя тмы́ разруши́тся; pа́дуйся, Еюже Ца́рство Христо́во утверди́тся. Ра́дуйся, па́дшихъ во тму́ идолослуже́нія къ свѣ́ту Ева́нгелія воззва́ніе; ра́дуйся, отъ ра́бства діа́волу въ свобо́ду сла́вы ча́дъ Бо́жіихъ приведе́ніе. Ра́дуйся, гото́вая служи́тельнице Сы́на Своего́ и Бо́га; ра́дуйся, послуша́ніемъ преслуша́ніе Евы исцѣля́ющая. Ра́дуйся, высото́ добродѣ́телей; ра́дуйся, глубино́ смиренному́дрія. Ра́дуйся, Еюже невѣ́рніи познаю́тъ Творца́; ра́дуйся, Еюже вѣ́рніи усыновля́ются Отцу́.

Ра́дуйся, блага́я Врата́рнице, две́ри ра́йскія вѣ́рнымъ отверза́ющая.

Конда́къ

Ви́дящи Свята́я Дѣ́ва ди́вное и но́вое о Себѣ́ промышле́ніе Бо́жіе, я́ко раба́ Госпо́дня, при́сно гото́вая твори́ти во́лю Его́, возопи́: Аллилу́ія.

Икосъ 2

Ра́зумъ недоразумѣва́емый глаго́ла а́нгельскаго разу́менъ Тебѣ́, Пречи́стая, творя́ Госпо́дь, упра́ви ше́ствіе Твое́ къ горѣ́ Аѳо́нстѣй, идѣ́же проповѣ́дася Тобо́ю Ева́нгеліе, и та́ко яви́ся жре́бій Тво́й. Мы́ же ра́достно вопіе́мъ:

Ра́дуйся, освяти́вшая Аѳо́нъ Свои́мъ прише́ствіемъ; ра́дуйся, низложи́вшая та́мо и́доловъ. Ра́дуйся, насади́вшая та́мо вѣ́ру и́стинную; ра́дуйся, невѣ́ріе отгна́вшая. Ра́дуйся, въ жре́бій Себѣ́ го́ру сію́ избра́вшая; ра́дуйся, благода́ть сему́ мѣ́сту обѣща́вшая. Ра́дуйся, вѣ́рнымъ, живу́щимъ въ не́й, пода́тельнице земны́хъ бла́гъ; ра́дуйся, спору́чнице вѣ́чнаго и́хъ спасе́нія. Ра́дуйся, те́плая хода́таице о живу́щихъ въ жре́біи Твое́мъ; ра́дуйся, всѣ́хъ враго́въ и́хъ устраше́ніе. Ра́дуйся, ми́лость Сы́на Своего́ до сконча́нія вѣ́ка мѣ́сту сему́ обѣща́вшая; ра́дуйся, благода́ть Его́ неотсту́пною бы́ти предре́кшая.

Ра́дуйся, блага́я Врата́рнице, две́ри ра́йскія вѣ́рнымъ отверза́ющая.

Конда́къ 3

Си́ла Вы́шняго заступле́ніемъ Богома́тере осѣни́ Святу́ю Го́ру, и удо́лія и де́бри ея, я́ко село́ простра́нное показа́, всѣ́мъ въ и́ноческой жи́зни хотя́щимъ жа́ти спасе́ніе, внегда́ пѣ́ти си́це: Аллилу́ія.

Икосъ 3

Имѣ́я промышле́ніе о жре́біи Свое́мъ, лю́дехъ Иверскія земли́, устро́ила еси́ въ мѣ́стѣ, идѣ́же Сама́ къ Аѳо́ну приста́ла еси́, оби́тель ро́ду и́хъ, въ ти́хое приста́нище и́щущимъ спасе́нія, хотя́ дарова́ти е́й въ щи́тъ и огражде́ніе ико́ну Свою́, да вси́ взыва́ютъ:

Ра́дуйся, посла́вшая проповѣ́дницу Ева́нгелія въ зе́млю Иверскую; ра́дуйся, обрати́вшая сію́ страну́ отъ пре́лести и́дольской къ свѣ́ту Христо́ву. Ра́дуйся, о́трасли неувяда́емыя розго́, ди́вную лозу́ Ни́нѣ дарова́вшая; ра́дуйся, отъ нея́ произрасти́вшая гро́здіе чуде́съ и благíя вѣ́ры. Ра́дуйся, са́дъ духо́вный на Аѳо́нѣ насади́вшая; ра́дуйся, струю́ изъ него́ просвѣще́нія духо́внаго странѣ́ Иверстѣй источи́вшая. Ра́дуйся, Евѳи́мія златослове́сныя уста́; ра́дуйся, Торни́кія непобѣди́мая крѣ́посте. Ра́дуйся, царе́й благочести́выхъ укрѣпле́ніе; ра́дуйся, и́ноковъ огражде́ніе. Ра́дуйся, ти́хое приста́нище и́щущихъ спасе́нія; ра́дуйся, вѣ́чный поко́й и́мъ уготовля́ющая.

Ра́дуйся, блага́я Врата́рнице, две́ри ра́йскія вѣ́рнымъ отверза́ющая.

Конда́къ 4

Бу́рю вну́трь имѣ́я помышле́ній сумни́тельныхъ, честна́я вдови́ца, я́же въ Нике́и, смяте́ся, зря́ копіе́мъ во́ина иконобо́рца прободе́ну святу́ю и чти́мую ико́ну Богома́тере и а́біе источи́вшу кро́вь и, стра́хомъ обдержи́ма, да не пору́гана бу́детъ свята́я ико́на, съ моли́твою слезоточа́щи вве́рже въ мо́ре. Уви́дѣвъ же ю́ пря́мо верху́ воды́ пу́ть творя́щу и теку́щу къ за́паду, возопи́ съ весе́ліемъ: Аллилу́ія.

Икосъ 4

Ви́дѣша и́ноцы Святы́я Горы́ я́вльшійся въ мо́ри я́ко пла́мень, я́ко сто́лпъ о́гненъ, его́же ве́рхъ досяза́ше небеси́, я́ко со́лнце сія́ющее, и въ нощи́ притеко́ша къ кра́ю мо́ря и, ви́дѣвше святу́ю ико́ну Богома́тере, по мо́рю носи́мую си́лою свы́ше, возопи́ша Благода́тнѣй:

Ра́дуйся, купино́, Законополо́жникомъ предзри́мая; ра́дуйся, сто́лпе о́гненный, наставля́яй су́щія во тмѣ́. Ра́дуйся, лѣ́ствице, досяза́ющая до небе́съ, е́юже сни́де Бо́гъ; ра́дуйся, мо́сте, преводя́й су́щихъ отъ земли́ на не́бо. Ра́дуйся, заре́ та́инственнаго дне́; ра́дуйся, звѣздо́, явля́ющая Со́лнце. Ра́дуйся, Свѣ́тъ неизрече́нный роди́вшая; ра́дуйся, е́же ка́ко ни еди́наго же научи́вшая. Ра́дуйся, облече́нная въ со́лнце, сія́ющая благода́тію и сла́вою все́й вселе́ннѣй; ра́дуйся, мо́лніе, ду́ши просвѣща́ющая и вѣ́рныхъ смы́слы озаря́ющая. Ра́дуйся, свѣ́тлосте, во тмѣ́ свѣтя́щая; ра́дуйся, я́ко многосвѣ́тлое возсіява́еши просвѣще́ніе.

Ра́дуйся, блага́я Врата́рнице, две́ри ра́йскія вѣ́рнымъ отверза́ющая.

Конда́къ 5

Боготе́чную ико́ну Свою́ да́ти хотя́ Иверстѣй оби́тели, рекла́ еси́, Богома́ти, преподо́бному Гавріи́лу: "Иди́ съ ли́комъ и́ноковъ къ бре́гу мо́ря, сни́ди въ пучи́ну и пріими́ ико́ну Мою́". Онъ же, вѣ́рою и любо́вію окриля́емь, по водѣ́, а́ки по су́ху ходя́, прія́тъ ю́ во объя́тія своя́ и, дости́гши сокро́вища, ины́мъ недостижи́маго, въ достоя́ніе и́ноковъ ро́да своего́ и́верскаго, веселя́ся поя́ше: Аллилу́ія.

Икосъ 5

Ви́дѣша и́ноцы и́верстіи мно́гажды ико́ну Богома́тере изъ хра́ма въ верху́ вра́тъ монасты́рскихъ на стѣ́ну гра́да незри́мою си́лою изнесе́нную, ужаса́хуся и стоя́ху, зову́ще къ не́й такова́я:

Ра́дуйся, святу́ю ико́ну да́ти на́мъ изво́лившая; ра́дуйся, покро́въ ю́ бы́ти на́мъ обѣща́вшая. Ра́дуйся, любо́вь Твою́ къ оби́тели на́шей показа́вшая; ра́дуйся, благо́е о не́й промышле́ніе яви́вшая. Ра́дуйся, по́мощь на́ша въ чужде́й странѣ́; ра́дуйся, въ стра́нствіи на́шемъ утѣше́ніе. Ра́дуйся, Бо́жіе къ на́мъ благоволе́ніе; ра́дуйся, на́ше къ Бо́гу дерзнове́ніе. Ра́дуйся, сле́зъ на́шихъ избавле́ніе; ра́дуйся, си́рыхъ на́съ защи́тнице. Ра́дуйся, огражде́ніе на́ше; ра́дуйся, еди́на ра́досте на́ша.

Ра́дуйся, блага́я Врата́рнице, две́ри ра́йскія вѣ́рнымъ отверза́ющая.

Конда́къ 6

Проповѣ́дника творя́ Гавріи́ла во́ли Своея́, рекла́ еси́ къ нему́, Влады́чице: "Не пріидо́хъ храни́ма бы́ти отъ ва́съ, но да бу́ду Азъ храни́тельница ва́ша не то́кмо въ настоя́щемъ, но и въ бу́дущемъ вѣ́цѣ. Се́ даю́ ва́мъ зна́меніе: до́ндеже зрите́ въ монастырѣ́ ико́ну Мою́, не оскудѣ́етъ ва́мъ благода́ть Сы́на Моего́ и ми́лость", да вопію́тъ Ему́ вси́: Аллилу́ія.

Икосъ 6

Возсія́ ра́дость ве́лія слы́шавшимъ Твоя́, Богома́ти, обѣтова́нія, и Тебѣ́, небе́снѣй Врата́рницѣ, хра́мъ на вратѣ́хъ оби́тели съ весе́ліемъ и́ноцы воздвиго́ша и возопи́ша та́ко:

Ра́дуйся, храни́тельнице на́ша въ настоя́щемъ вѣ́цѣ; ра́дуйся, предста́тельнице на́ша въ бу́дущемъ. Ра́дуйся, стра́ху Бо́жію на́съ науча́ющая; ра́дуйся, на пу́ть добродѣ́тели наставля́ющая. Ра́дуйся, дерзнове́ніе на́ше и наде́ждо; ра́дуйся, упова́ніе на́ше и покро́въ. Ра́дуйся, благоутро́біе Сы́на Своего́ къ на́мъ преклони́вшая; ра́дуйся, благода́ть Его́ неоску́дно пребыва́ти съ на́ми возвѣща́ющая. Ра́дуйся святу́ю ико́ну зало́гомъ ми́лости да́вшая; ра́дуйся, да́ръ чудодѣ́йствія е́й дарова́вшая. Ра́дуйся, прило́гъ вся́каго зла́ отъ оби́тели отража́ющая; ра́дуйся, всему́ благо́му вхо́дъ отверза́ющая.

Ра́дуйся, блага́я Врата́рнице, две́ри ра́йскія вѣ́рнымъ отверза́ющая.

Конда́къ 7

Хотя́щу иногда́ злочести́вому Ами́рѣ оби́тель Иверскую разори́ти и ста́до и́ноковъ, та́мо собра́нное, разсѣ́яти, ско́ро позна́ крѣ́пкое оби́тели заступле́ніе отъ Богома́тере, уви́дѣвъ корабли́ своя́ въ пучи́нѣ мо́ря погря́зшія и ра́тники изги́бшія. И прише́дъ со смире́ніемъ, сребро́ и зла́то въ оби́тель дая́ше, моли́твы прося́. Иноцы же, ви́дѣвше сія́, возопи́ша къ Бо́гу: Аллилу́ія.

Икосъ 7

Но́выя и безчи́сленныя чудеса́ показа́ Богома́терь, въ оби́тели оскудѣ́ніе вина́, муки́ и еле́я восполня́ющи, бѣсну́ющія исцѣля́я, хромы́мъ да́руя хожде́ніе, слѣпы́мъ прозрѣ́ніе и вся́къ неду́гъ врачу́я, да, ви́дяще чудеса́ сія́, воспѣва́ютъ Тебѣ́:

Ра́дуйся, Взбра́нная Воево́до, враги́ побѣжда́ющая; ра́дуйся, ско́рая на по́мощь призыва́ющимъ Тя́. Ра́дуйся, не презира́ющая моле́нія на́шего; ра́дуйся, обѣща́нія Своего́ не отступа́ющая. Ра́дуйся, ско́рбь оби́тели въ ра́дость претворя́ющая; ра́дуйся, оскудѣ́ніе оби́тели восполня́ющая. Ра́дуйся, слѣпыхъ прозрѣніе; ра́дуйся, хромыхъ хожденіе. Ра́дуйся, всѣ́хъ немощны́хъ цѣли́тельнице; ра́дуйся, всѣ́хъ ско́рбныхъ утѣ́шительнице. Ра́дуйся, я́ко не престае́ши промышля́ющи и спаса́ющи на́съ; ра́дуйся, я́ко отъ толи́кихъ бѣ́дъ избавля́еши на́съ.

Ра́дуйся, блага́я Врата́рнице, две́ри ра́йскія вѣ́рнымъ отверза́ющая.

Конда́къ 8

Стра́нно покрыва́емую отъ ико́ны Богома́тере оби́тель Иверскую слы́шавъ патріа́рхъ Ни́конъ, вожделѣ́ и Россíйстѣй странѣ́ благода́ти Ея стяжа́ти прича́стіе, сего́ ра́ди, созда́въ оби́тель въ че́сть сла́внаго о́браза, со тща́ніемъ испроси́ изображе́ніе чудотво́рнаго о́браза Богома́тере, да, покро́вомъ Ея́ защища́еми, вопію́тъ Бо́гу: Аллилу́ія.

Икосъ 8

Вся́ су́щи въ вы́шнихъ, но и ни́жнихъ не отступа́я, благоизво́лила еси́, Богома́ти, я́коже дре́вле Анто́нію дарова́ся благослове́ніе горы́ Аѳо́нскія на утвержде́ніе оби́тели Пече́рскія, дарова́ти и но́вой оби́тели въ странѣ́ Россíйстѣй Свою́ благода́ть, е́юже благослови́ла еси́ Аѳо́нъ, въ подо́біи честна́го о́браза Твоего́. Тѣ́мже взыва́емъ Ти́:

Ра́дуйся, страны́ Россíйскія покро́ве, ши́ршій о́блака; ра́дуйся, правосла́вныя вѣ́ры въ не́й огражде́ніе и утвержде́ніе. Ра́дуйся, Правосла́вныя Це́ркве непоколеби́мый сто́лпе; ра́дуйся, ересе́й и раско́ловъ обличе́ніе. Ра́дуйся, свѣ́тлыми луча́ми чудотво́рныхъ ико́нъ всю́ страну́ озаря́ющая; ра́дуйся, да́ры исцѣле́ній и ми́лостей отъ ни́хъ источа́ющая. Ра́дуйся, ски́птры царе́й на́шихъ утвержде́ніе; ра́дуйся, враго́въ устраше́ніе. Ра́дуйся, святи́телей весе́ліе; ра́дуйся, іере́евъ похвало́. Ра́дуйся, и́ноковъ наста́внице; ра́дуйся, всего́ ро́да на́шего спасе́ніе.

Ра́дуйся, блага́я Врата́рнице, две́ри ра́йскія вѣ́рнымъ отверза́ющая.

Конда́къ 9

Вся́ко тща́ніе иму́ще о написа́ніи честна́го о́браза ми́лостивыя Врата́рницы, со́нмъ по́стниковъ и́верскихъ моле́бная пѣ́нія соверша́етъ, водо́ю отъ чу́дныя ико́ны омыва́етъ дску́, на не́йже и́мать изобрази́тися честны́й о́бразъ, и преподо́бнаго Іамвли́ха освяща́етъ, и́же подвиза́вся въ постѣ́, моли́твѣ и бдѣ́ніи со все́ю бра́тіею, списа́ ва́пы, свято́ю водо́ю и моща́ми освяще́нными, честно́е изображе́ніе Богома́тере, вы́ну моля́ся и вопія́ Бо́гу: Аллилу́ія.

Икосъ 9

Витíя многовѣща́нныя, я́ко ры́бы безгла́сныя, ви́димъ о Тебѣ́, Богоро́дице, недоумѣ́ютъ бо, ка́ко по досто́инству похвали́ти вся́ чудеса́ Твоя́, явле́нная ро́ду на́шему отъ святы́я Твоея́ ико́ны: еще́ бо на пути́ въ Россíйскую страну́ чудодѣ́йствоваше, благочести́вому Ману́илу повелѣва́я вы́купъ да́ти невѣ́рнымъ, возбраня́ющимъ ше́ствіе святы́я ико́ны въ страну́ Ру́сскую, и сугу́бо ему́ по́слѣжде отда́вши. Мы́ же, дивя́щеся, вѣ́рно вопіе́мъ Ти́:

Ра́дуйся, исто́чниче чуде́съ неисчерпа́емый; ра́дуйся, вся́кія ми́лости пода́тельнице. Ра́дуйся, всегда́ те́плая о на́съ хода́таице къ Бо́гу; ра́дуйся, промышле́нія Его́ о на́съ сокро́вище. Ра́дуйся, су́щимъ въ бѣда́хъ прибѣ́жище; ра́дуйся, скорбя́щихъ утѣше́ніе. Ра́дуйся, больны́хъ исцѣле́ніе; ра́дуйся, немощны́хъ укрѣпле́ніе. Ра́дуйся, вдо́въ заступле́ніе; ра́дуйся, сиро́тствующихъ милосе́рдая Ма́ти. Ра́дуйся, заблужда́ющихъ на пу́ть и́стины обраще́ніе; ра́дуйся, грѣ́шниковъ къ покая́нію воззва́ніе.

Ра́дуйся, блага́я Врата́рнице, две́ри ра́йскія вѣ́рнымъ отверза́ющая.

Конда́къ 10

Спасти́ хотя́ мно́гія лю́ди отъ бѣ́дъ и скорбе́й, источа́еши, Богома́ти, неоску́дный исто́чникъ ми́лости отъ Своея́ ико́ны ро́ду на́шему: се́ бо и въ ца́рствующемъ гра́дѣ Москвѣ́, блага́я Врата́рница, явля́ешися всѣ́мъ покланя́ющимся Тебѣ́, ско́рое вспоможе́ніе подава́я, и въ но́вой оби́тели Иверстѣй благода́ти струи́ отъ ико́ны Твоея́ испуща́еши, и во ины́хъ градѣ́хъ, оби́телехъ и ве́сехъ чту́щимъ Тя́ поле́зное проше́ніе исполня́я. Тѣ́мже, прославля́я Бо́га, да́вшаго на́мъ благода́ть такову́ю, вопіе́мъ Ему́: Аллилу́ія.

Икосъ 10

Стѣна́ еси́ и́ноческому чи́ну, Богоро́дице, и всѣ́мъ, къ Тебѣ́ прибѣга́ющимъ, и́бо небесе́ и земли́ Творе́цъ, все́лься въ дѣ́вственной утро́бѣ Твое́й, научи́ всѣ́хъ чистоты́ и цѣлому́дрія ревни́телей возглаша́ти Тебѣ́:

Ра́дуйся, дѣ́вства сосу́де избра́нный; ра́дуйся, чистѣ́йшій о́бразе цѣлому́дрія. Ра́дуйся, черто́же безсѣ́меннаго уневѣ́щенія; ра́дуйся, Невѣ́сто неневѣ́стная. Ра́дуйся, Сѣ́ятеля чистоты́ ро́ждшая; ра́дуйся, вѣ́рныхъ Го́сподеви сочета́вшая. Ра́дуйся, въ бу́ри искуше́ній ско́рая помо́щнице; ра́дуйся, прило́ги врага́ отража́ющая. Ра́дуйся, мглу́ душевре́дныхъ страсте́й отгоня́ющая; ра́дуйся, по́мыслы очища́ющая. Ра́дуйся, земны́я сла́сти презира́ти науча́ющая; ра́дуйся, къ го́рнему умы́ и сердца́ направля́ющая.

Ра́дуйся, блага́я Врата́рнице, две́ри ра́йскія вѣ́рнымъ отверза́ющая.

Конда́къ 11

Пѣ́ніе вся́кое побѣжда́ется, спростре́тися тща́щееся ко мно́жеству мно́гихъ щедро́тъ Твои́хъ: равночи́сленныя бо песка́ пѣ́сни а́ще прино́симъ Ти́, Влады́чице на́ша Богоро́дице, ничто́же соверша́емъ досто́йно, я́же подава́еши на́мъ, о Тебѣ́ вопію́щимъ: Аллилу́ія.

Икосъ 11

Свѣтопріе́мную свѣщу́, су́щимъ во тмѣ́ бѣ́дъ я́вльшуюся, зри́мъ святу́ю ико́ну Богома́тере: невеще́ственный бо о́гнь благода́ти пріе́млющи, луча́ми чуде́съ всѣ́хъ озаря́етъ, науча́я си́це взыва́ти Благослове́ннѣй:

Ра́дуйся, во вся́кихъ ну́ждахъ ско́рое вспоможе́ніе; ра́дуйся, въ печа́лехъ бы́строе услы́шаніе. Ра́дуйся, отъ огня́, меча́ и наше́ствія иноплеме́нныхъ на́съ избавля́ющая; ра́дуйся, отъ гла́да и напра́сныя сме́рти на́съ свобожда́ющая. Ра́дуйся, отъ я́звы и всегуби́тельства сме́ртнаго на́съ соблюда́ющая; ра́дуйся, бѣ́дствующимъ въ пути́, на су́шѣ и на вода́хъ внеза́пное вспоможе́ніе. Ра́дуйся, я́звъ душе́вныхъ и тѣле́сныхъ врачева́ніе; ра́дуйся, оста́вленныхъ врача́ми въ Свои́ ру́ки пріе́млющая. Ра́дуйся, милосе́рдая утѣ́шительнице всѣ́хъ скорбя́щихъ и обремене́нныхъ; ра́дуйся, не отверга́ющая всѣ́хъ презрѣ́нныхъ и отве́рженныхъ. Ра́дуйся, са́мыхъ отча́янныхъ изъ ро́ва поги́бели исхища́ющая; ра́дуйся, и мене́, обнаже́ннаго до́брыхъ дѣ́лъ, не оставля́ющая Свои́мъ покро́вомъ и заступле́ніемъ.

Ра́дуйся, блага́я Врата́рнице, две́ри ра́йскія вѣ́рнымъ отверза́ющая.

Конда́къ 12

Благода́ть да́ти восхотѣ́въ долго́въ дре́внихъ, всѣ́хъ долго́въ Рѣши́тель человѣ́комъ, пріи́де Собо́ю ко отше́дшимъ Того́ благода́ти и, раздра́въ рукописа́ніе, дарова́ на́мъ крѣ́пкое Богоблагода́тныя хода́тайство, да вопіе́мъ вси́ моли́твами Ея́: Аллилу́ія.

Икосъ 12

Пою́ще Твоя́ чудеса́, явля́емая на́мъ въ жи́зни се́й, хва́лимъ Тя́, Богоро́дице, я́ко неисчерпа́емый исто́чникъ ми́лости. Но, припа́дая къ Тебѣ́ предъ чудотво́рною ико́ною Твое́ю, мо́лимъ Тя́ смире́нно, бу́ди на́мъ покро́въ и защище́ніе и въ де́нь кончи́ны на́шея, и егда́ и́мамы предста́ти на су́дъ стра́шному престо́лу Сы́на Твоего́, да вопіе́мъ Ти́:

Ра́дуйся, во сла́вѣ присѣдя́щая престо́лу Сы́на Твоего́ и та́мо на́съ воспомина́ющая; ра́дуйся, съ Сы́номъ Твои́мъ и Бо́гомъ вѣ́чно ца́рствующая и о на́съ хода́тайствующая. Ра́дуйся, упова́ющимъ на Тя́ коне́цъ живота́ непосты́денъ даю́щая; ра́дуйся, безболѣ́зненную и ми́рную кончи́ну устроя́ющая. Ра́дуйся, мыта́рствъ го́рькихъ избавле́ніе; ра́дуйся, отъ вла́сти кня́зя возду́шнаго свобожде́ніе. Ра́дуйся, грѣхо́въ на́шихъ непоминове́ніе; ра́дуйся, по Го́сподѣ упова́ніе на́мъ блаже́нныя жи́зни. Ра́дуйся, упова́ющимъ на Тя́, одесну́ю Сы́на Твоего́ стояніе устроя́ющая; ра́дуйся, блаже́ннаго гла́са о́наго, небе́снаго Ца́рствія наслѣ́діе обѣща́ющаго, слы́шати сподобля́ющая. Ра́дуйся, блага́я Ма́ти, всѣ́хъ чту́щихъ Тя́ жи́ти съ Собо́ю вселя́ющая; ра́дуйся, крѣ́пкая наде́ждо вѣ́чнаго спасе́нія всѣ́мъ христіа́номъ.

Ра́дуйся, блага́я Врата́рнице, две́ри ра́йскія вѣ́рнымъ отверза́ющая.

Конда́къ 13

О, Всепѣ́тая Ма́ти, Пресвята́я Госпоже́ Дѣ́во Богоро́дице! При́зри на на́съ, принося́щихъ смире́нно со слеза́ми ма́лыя сія́ моли́твы предъ пречи́стымъ Твои́мъ о́бразомъ и все́ упова́ніе и наде́жду возложи́вшихъ на Тя́, и изба́ви на́съ всѣ́хъ бѣ́дъ и напа́стей въ животѣ́ се́мъ и бу́дущія изми́ му́ки, да спаса́еміи Тобо́ю, вопіе́мъ вы́ну: Аллилу́ія.

Се́й конда́къ глаго́лется три́жды. Та́же Икосъ 1-й и Конда́къ 1-й

Моли́тва ко Пресвятѣ́й Богоро́дицѣ

О, Пресвята́я Дѣ́во, Ма́ти Го́спода, Цари́це небесе́ и земли́! Вонми́ многоболѣ́зненному воздыха́нію души́ на́шея, при́зри съ высоты́ святы́я Твоея́ на на́съ, съ вѣ́рою и любо́вію покланя́ющихся пречи́стому о́бразу Твоему́. Се́ бо, грѣхми́ погружа́еміи и скорбьми́ обурева́еміи, взира́я на Тво́й о́бразъ, я́ко живѣ́й Ти́ су́щей съ на́ми, прино́симъ смире́нная моле́нія на́ша. Не и́мамы бо ни ины́я по́мощи, ни ина́го предста́тельства, ни утѣше́нія, то́кмо Тебе́, о Ма́ти всѣ́хъ скорбя́щихъ и обремене́нныхъ! Помози́ на́мъ, немощны́мъ, утоли́ ско́рбь на́шу, наста́ви на пу́ть пра́вый на́съ, заблужда́ющихъ, уврачу́й и спаси́ безнаде́жныхъ, да́руй на́мъ про́чее вре́мя живота́ на́шего въ ми́рѣ и тишинѣ́ проводи́ти, пода́ждь христіа́нскую кончи́ну и на Стра́шнѣмъ судѣ́ Сы́на Твоего́ яви́ся на́мъ милосе́рдая Засту́пница, да всегда́ пое́мъ, велича́емъ и сла́вимъ Тя́, я́ко благу́ю Засту́пницу ро́да христіа́нскаго, со всѣ́ми угоди́вшими Бо́гу. Ами́нь.

Тропа́рь Богоро́дицѣ, гла́съ 1

Де́рзость ненави́дящихъ о́бразъ Госпо́день и держа́ва нечести́выхъ безбо́жно въ Нике́ю пріи́де, и по́сланніи безчеловѣ́чно вдови́цу, благоче́стно чту́щую ико́ну Богома́тере, истязу́ютъ. Но та́я но́щію съ сы́номъ ико́ну въ мо́ре пусти́, вопію́щи: сла́ва Тебѣ́, Чи́стая, я́ко непроходи́мое мо́ре плещи́ своя́ подаде́; сла́ва правоше́ствію Твоему́, еди́на Нетлѣ́нная.

Инъ тропа́рь, гла́съ то́йже

Отъ святы́я ико́ны Твоея́, о Влады́чице Богоро́дице, исцѣле́нія и цѣльбы́ подаю́тся оби́льно, съ вѣ́рою и любо́вію приходя́щимъ къ не́й. Та́ко и мою́ не́мощь посѣти́ и ду́шу мою́ поми́луй, Блага́я, и тѣ́ло исцѣли́ благода́тію Твое́ю, Пречи́стая.

Конда́къ, гла́съ 8

Аще и въ мо́ре вве́ржена бы́сть свята́я ико́на Твоя́, Богоро́дице, отъ вдови́цы, не могу́щія спасти́ сію́ отъ враго́въ, но яви́лася е́сть храни́тельница Аѳо́на и врата́рница оби́тели Иверскія, враги́ устраша́ющая и въ правосла́внѣй Россíйстѣй странѣ́ чту́щія Тя́ отъ всѣ́хъ бѣ́дъ и напа́стей избавля́ющая.

Велича́ніе

Велича́емъ Тя́, Пресвята́я Дѣ́во, Богоизбра́нная Отрокови́це, и чте́мъ о́бразъ Тво́й святы́й, и́мже то́чиши исцѣле́нія всѣ́мъ, съ вѣ́рою притека́ющимъ.