Конда́къ 1

Избра́ннѣй отъ всѣ́хъ родо́въ Бо́жіей Ма́тери и Цари́цѣ, предъ пречи́стымъ Ея́ о́бразомъ, со умиле́ніемъ хвале́бная пѣ́нія прино́симъ, Ты́ же, я́ко иму́щая къ ро́ду христіа́нскому милосе́рдіе неизрече́нное, отъ бѣ́дъ и скорбе́й изба́ви всѣ́хъ на́съ, Тебѣ́ зову́щихъ:

Ра́дуйся, Невѣ́сто неневѣ́стная!

Икосъ 1

Арха́нгеловъ и а́нгеловъ чи́ни благоговѣ́йно Тебѣ́ слу́жатъ и вся́ небе́сныя си́лы немо́лчными гла́сы Тя́, Богоро́дице Дѣ́во, воспѣва́ютъ, я́ко ро́ждшую небе́сныхъ во́инствъ Царя́. Мы́ же, земноро́дніи, со тре́петомъ предстоя́ще чудотво́рному Твоему́ ли́ку, бре́нными устна́ми вопіе́мъ Ти́ си́це:

Ра́дуйся, отъ всѣ́хъ родо́въ ко искупле́нію ро́да на́шего избра́нная; ра́дуйся, Ду́ха Свята́го дарова́ній преиспо́лненная! Ра́дуйся, херуви́мовъ и серафи́мовъ превозше́дшая; ра́дуйся, та́инству спасе́нія ро́да человѣ́ческаго послужи́вшая! Ра́дуйся, свято́е вмѣсти́лище Сло́ва Бо́жія; ра́дуйся, неопи́санное Сло́во Отчее въ ложесна́хъ Свои́хъ носи́вшая! Ра́дуйся, проро́ческихъ глаго́ловъ нело́жное исполне́ніе; ра́дуйся, вину́ прароди́телей ро́да на́шего Рождество́мъ Твои́мъ искупи́вшая! Ра́дуйся, предста́тельство ро́ду христіа́нскому отъ Бо́га дарова́нное; ра́дуйся, спасе́нія ро́да человѣ́ческаго нача́ло! Ра́дуйся, лѣ́ствице Боже́ственнаго снисхожде́нія; ра́дуйся, мо́сте отъ земли́ къ небеси́ земноро́дныхъ возводя́й.

Ра́дуйся, Невѣ́сто неневѣ́стная!

Конда́къ 2

Ви́дящи Пречи́стая съ высоты́ небе́снаго жили́ща Своего́, идѣ́же съ Сы́номъ Свои́мъ во сла́вѣ пребыва́етъ, озлобле́ніе проти́ву святы́нь христіа́нскихъ во странѣ́ Грузи́нстѣй, попуще́ніемъ Бо́жіимъ во дни́ о́ны бы́вшее отъ пе́рсскаго царя́ Абба́са, Грузи́нскую страну́ разори́вшаго и хра́мы ея́ христіа́нскія оскверни́вшаго, и храня́щи святу́ю ико́ну отъ такова́го поруга́нія, страны́ Россíйскія му́жу вѣ́рну и благоговѣ́йну Стефа́ну благопромысли́тельнѣ вда́ти ю́ вспомоществова́ла еси́, Влады́чице. Стяжа́въ у́бо се́й вѣ́рный ра́бъ святы́ню Твою́, во умиле́ніи се́рдца возопи́ Бо́гу: Аллилу́ія!

Икосъ 2

Разумѣ́ти хотя́ благоговѣ́йный му́жъ Гео́ргій недоумѣ́нную та́йну открове́нія Твоего́, Влады́чице, о нѣ́коемъ безцѣ́ннѣмъ би́серѣ, приста́вникомъ имѣ́нія его́ во странѣ́ Перси́дстѣй пріобрѣте́ннѣмъ, съ патріа́рхомъ Филаре́томъ совѣща́шеся. Мы́ же та́инственному вразумле́нію Преблагослове́нныя, свы́ше вѣ́рнымъ рабо́мъ подава́емому, дивя́щеся, благоговѣ́йно вопіе́мъ къ Не́й:

Ра́дуйся, сокрове́нныя та́йны благода́ти Бо́жія вѣ́рнымъ открыва́ющая; ра́дуйся, устна́ми правосла́вныхъ хвалу́ Бо́гови соверша́ющая! Ра́дуйся, невѣ́рныхъ ага́рянъ, святы́ню Твою́ презрѣ́вшихъ, посрамля́ющая; ра́дуйся, сла́вою чуде́съ Твои́хъ вѣ́рныхъ смы́слы озаря́ющая! Ра́дуйся, почита́нію святы́хъ ико́нъ на́съ наставля́ющая; ра́дуйся, Христо́ву вѣ́ру во странѣ́ на́шей утвержда́ющая! Ра́дуйся, оби́тель и́ноковъ Кра́сныя горы́ святы́мъ Твои́мъ о́бразомъ освяща́ющая; ра́дуйся, де́нь принесе́нія честны́я Твоея́ ико́ны исцѣле́ніемъ и́нока зна́меновавшая! Ра́дуйся, безцѣ́нный би́серъ, святу́ю Твою́ ико́ну, я́коже рекла́ еси́, на́мъ дарова́вшая; ра́дуйся, безцѣ́нный би́серъ, Христа́, на спасе́ніе на́ше ро́ждшая! Ра́дуйся, честны́мъ Твои́мъ о́бразомъ страну́ на́шу посѣти́вшая; ра́дуйся, ми́рную оби́тель и́ноковъ неотъе́млемымъ бога́тствомъ обогати́вшая.

Ра́дуйся, Невѣ́сто неневѣ́стная!

Конда́къ 3

Си́ла Вы́шняго осѣня́етъ вы́ну съ вѣ́рою притека́ющихъ къ держа́вному покро́ву Твоему́, Влады́чице, и благоговѣ́йно чту́щихъ чудотво́рную ико́ну Твою́, Богома́ти: е́й бо даде́ся благода́ть отъ Бо́га вся́къ неду́гъ и вся́ку я́зю въ лю́дехъ врачева́ти, тѣ́мже благода́рственно вопіе́мъ Бо́гу: Аллилу́ія!

Икосъ 3

Имѣ́ющи промышле́ніе те́плое о лю́дехъ страны́ зи́мнія полу́нощи, гору́ Кра́сную подъ кро́въ Тво́й, Богома́ти, прія́ла еси́, и оби́тели и́ноковъ тоя́ честны́й о́бразъ Тво́й ми́лостивно дарова́ла еси́, да зря́ще то́ки чуде́съ, преизоби́льно на моля́щихся Тебѣ́ съ вѣ́рою излива́емыя, во умиле́ніи вопію́тъ Тебѣ́, Влады́чице:

Ра́дуйся, смире́нную оби́тель и́ноковъ Кра́сныя горы́ держа́внымъ покро́вомъ Твои́мъ осѣня́ющая; ра́дуйся, чудеса́ми отъ святы́я Твоея́ ико́ны гору́ Кра́сную прославля́ющая! Ра́дуйся, подо́біе благода́тнаго Аѳо́на на зи́мнѣй полу́нощи яви́вшая; ра́дуйся, гору́ Кра́сную житію́ и́ноческому чу́дно указа́вшая! Ра́дуйся, въ щи́тъ и огражде́ніе мѣ́ста того́ цѣльбоно́сную ико́ну Твою́ дарова́вшая; ра́дуйся, посели́вшимся на се́й святѣ́й горѣ́ и́нокомъ оби́тель ти́хую созда́вшая! Ра́дуйся, житіе́ чи́на и́ноческаго во спасе́ніе ду́шъ устроя́ющая; ра́дуйся, всѣ́мъ хотя́щимъ улучи́ти спасе́ніе спобо́рствующая! Ра́дуйся, Кра́сную гору́ и обита́ющихъ на не́й благода́тнымъ Твои́мъ омофо́ромъ покрыва́ющая; ра́дуйся, притека́ющихъ къ Твоему́ покро́ву и заступле́нію не оставля́ющая! Ра́дуйся, сла́быхъ на пути́ добродѣ́тели укрѣпля́ющая; ра́дуйся, заблу́ждшихъ на пу́ть и́стинный наставля́ющая!

Ра́дуйся, Невѣ́сто неневѣ́стная!

Конда́къ 4

Бу́рю вну́трь имѣ́я помышле́ній сумни́тельныхъ слѣпе́цъ Питири́мъ, егда́ озаре́нъ бѣ́ сія́ніемъ свѣ́та, я́ко со́лнечнымъ, смяте́ся и стра́хомъ обдержи́мь бѣ́, мня́ше о се́мъ, я́ко о наважде́ніи бѣсо́встѣмъ: мно́га бо лѣ́та слѣ́пъ бѣ́, съ моли́твою зна́меніе креста́ сотвори́, обра́щься ко хра́му и узрѣ́ чу́дную Твою́, Влады́чице, ико́ну, свѣтоза́рными луча́ми во хра́мѣ блиста́вшую, а́біе уразумѣ́, я́ко отверзо́шася о́чи его́ и слу́хъ его́ откры́ся, благода́рственное прине́съ Бо́гу, ди́вному въ дѣ́лѣхъ, пѣ́ніе: Аллилу́ія!

Икосъ 4

Слы́шавъ благовѣ́рный Ца́рь всея́ Россíи Алексíй, я́ко отъ святы́я ико́ны Твоея́, Влады́чице, я́же на горѣ́ Кра́снѣй, цѣльбы́ многоразли́чныхъ неду́гъ оби́льно подаю́тся, даде́ повелѣ́ніе игу́мену оби́тели по градо́мъ и ве́семъ вели́кія держа́вы своея́ съ че́стію подоба́ющею ю́ обноси́ти; да пріе́млютъ стра́ждущіи врачевство́ неду́говъ тѣле́сныхъ и душе́вныхъ и во умиле́ніи серде́цъ взыва́ютъ Тебѣ́, Влады́чице:

Ра́дуйся, Христа́ Бо́га на́шего освяще́нный хра́ме; ра́дуйся, неизрече́нныя Его́ сла́вы вмѣсти́лище! Ра́дуйся, Царя́ ца́рствующихъ одушевле́нный гра́де; ра́дуйся, пала́то и черто́же небе́сный! Ра́дуйся, Це́ркве правосла́вныя похвало́; ра́дуйся, ски́птра и держа́вы Россíйскія крѣ́посте и утвержде́ніе! Ра́дуйся, градо́въ и ве́сей на́шихъ благода́тное охране́ніе; ра́дуйся, всѣ́хъ христіа́нъ, къ Тебѣ́ притека́ющихъ, непосты́дное упова́ніе! Ра́дуйся, отъ всѣ́хъ родо́въ досто́йно ублажа́емая; ра́дуйся, всѣ́хъ на́съ отъ бѣ́дъ и ско́рбей прише́ствіемъ честна́го Твоего́ о́браза избавля́ющая! Ра́дуйся, су́щихъ въ стра́нствіи ко взыска́нію го́рняго гра́да направля́ющая; ра́дуйся, путеводи́тельнице на́ша къ вѣ́чнымъ оби́телемъ!

Ра́дуйся, Невѣ́сто неневѣ́стная!

Конда́къ 5

Боготе́чнѣй звѣздѣ́ подо́бна яви́ся Твоя́, Богома́ти, ико́на, по во́ли Твое́й святѣ́й отъ восто́ка на са́мую полу́нощь принесе́нная, ю́же, я́ко да́ръ небе́сный, воспріи́мше и́ноцы красного́рстіи, поста́виша въ собо́рную це́рковь оби́тели, и въ весе́ліи поя́ху благи́хъ Пода́телю Бо́гу: Аллилу́ія!

Икосъ 5

Ви́дящи среброкова́ча Гавріи́ла, зѣ́льнѣ пла́чуща предъ Твои́мъ чудотво́рнымъ о́бразомъ, Влады́чице, я́коже бо тогда́ умилосе́рдися, сы́на его́ на одрѣ́ болѣ́зни лежа́ща воздви́гла и здра́ва сотвори́ла еси́, си́це и о мнѣ́ умилосе́рдися, Преблагослове́нная Богоро́дице, и грѣхми́ умерщвле́нную мою́ ду́шу воскреси́, зову́щу:

Ра́дуйся, Ма́ти Царя́ живота́ и Побѣди́теля сме́рти; ра́дуйся, благоволе́ніе Сы́на Твоего́, Христа́ Бо́га на́шего, на́мъ стяжа́вшая! Ра́дуйся, свѣ́тлыми луча́ми чуде́съ отъ святы́я Твоея́ ико́ны страну́ Россíйскую озаря́ющая; ра́дуйся, бога́тыя да́ры исцѣле́ній и ми́лостей прося́щимъ у Тя́ предъ чу́дною Твое́ю ико́ною источа́ющая! Ра́дуйся, моле́нія на́ша, приноси́мая Тебѣ́ съ вѣ́рою и любо́вію, ми́лостивно пріе́млющая; ра́дуйся, тѣле́сныя неду́ги вѣ́рно почита́ющихъ Тя́ ско́ро исцѣля́ющая! Ра́дуйся, печа́ль на́шу въ ра́дость претворя́ющая; ра́дуйся, отъ сле́зъ и скорбе́й на́съ избавля́ющая! Ра́дуйся, ско́рбныхъ о ча́дѣхъ роди́телей утѣше́ніе; ра́дуйся, ча́дъ и́хъ благода́тное охране́ніе и спасе́ніе! Ра́дуйся, покро́ве на́мъ въ животѣ́ и по сме́рти; ра́дуйся, спасе́ніе на́ше на пра́веднѣмъ судѣ́ Бо́жіемъ!

Ра́дуйся, Невѣ́сто неневѣ́стная!

Конда́къ 6

Проповѣ́дника творя́щи купца́ Гео́ргія воли́ Своея́, рекла́ еси́ къ нему́, Влады́чице: приста́вникъ имѣ́нія твоего́ Стефа́нъ, сы́й въ Перси́дѣ, купи́ тебѣ́ безцѣ́нный би́серъ; егда́ же принесе́тъ къ тебѣ́, ты́ посли́ о́ный въ Дви́нскую о́бласть, на Чермну́ю гору́. Позна́въ у́бо о се́мъ Гео́ргій Твое́, Пречи́стая, къ мѣ́сту тому́ осо́бое благоволе́ніе, воспряну́ воспѣ́ти къ ро́ждшемуся отъ Тебе́ Бо́гу: Аллилу́ія!

Икосъ 6

Возсія́ла сла́ва Бо́жія на святѣ́й горѣ́ Кра́снѣй отъ пречу́дныя Твоея́ ико́ны, Богома́ти, предъ не́юже предстоя́ще, со умиле́ніемъ мо́лимся Ти́, услы́ши на́съ, вопію́щихъ Тебѣ́ усе́рдно:

Ра́дуйся, гору́ полу́нощную прише́ствіемъ чудотво́рнаго Твоего́ о́браза осѣни́вшая; ра́дуйся, чуде́съ неоскудѣва́ющій исто́чникъ на не́й яви́вшая! Ра́дуйся, милосе́рдіе и любо́вь Твою́ ко оби́тели и́ноковъ показа́вшая; ра́дуйся, благо́е о не́й промышле́ніе Свое́ яви́вшая! Ра́дуйся, тѣле́сныя неду́ги на́ша врачу́ющая; ра́дуйся, въ душе́вныхъ ско́рбехъ на́съ утѣша́ющая! Ра́дуйся, благоче́стія наста́внице; ра́дуйся, и́ноческаго житія́ руководи́тельнице! Ра́дуйся, до́брыя ко спасе́нію ду́шъ обѣ́ты пріе́млющая; ра́дуйся, благи́мъ намѣ́реніемъ и начина́ніемъ на́шимъ спосо́бствующая! Ра́дуйся, злы́я отъ наважде́нія врага́ быва́емая по́мыслы отъ на́съ отгоня́ющая; ра́дуйся, вра́жія ко́зни, я́ко паучи́ну, расторга́ющая!

Ра́дуйся, Невѣ́сто неневѣ́стная!

Конда́къ 7

Хотя́ да́ти благослове́ніе новоустро́еннѣй оби́тели и́ноковъ, Раи́ѳскою нарече́ннѣй, архипа́стырь Каза́нскій Лавре́нтій, ли́къ Тво́й, Влады́чице, отъ чудотво́рнаго Твоего́ Красного́рскаго о́браза то́ждественно списа́въ, торже́ственно съ моле́бнымъ пѣ́ніемъ, во оби́тель Раи́ѳскую внесе́. Свидѣ́телемъ же бы́въ соверши́вшихся отъ сея́ святы́я Твоея́, Влады́чице, ико́ны зна́меній и чуде́съ, ра́достно возопи́ Бо́гу: Аллилу́ія!

Икосъ 7

Но́вую купѣ́ль Силоа́мскую зри́мъ, Пречи́стая Богоро́дице, хра́мъ Тво́й, и́же въ Раи́ѳѣ: вся́къ бо неду́гъ и вся́ку я́зю душе́вную и тѣле́сную врачу́еши съ вѣ́рою и любо́вію къ Тебѣ́ притека́ющихъ и благоговѣ́йно чту́щихъ и лобыза́ющихъ святы́й о́бразъ Тво́й. Сего́ ра́ди, иму́ще но́вое неизрече́нное сокро́вище Твои́хъ ми́лостей, ра́достно вопіе́мъ Ти́, Пречи́стая:

Ра́дуйся, купѣ́ль, въ не́йже душе́вныя неду́ги на́ша врачу́ются; ра́дуйся, исто́чниче, жа́ждущимъ во́ду жи́зни источи́вшій! Ра́дуйся, слѣпы́мъ тѣле́сныма очи́ма зрѣ́ніе подава́ющая; ра́дуйся, глухи́мъ слу́хъ отверза́ющая! Ра́дуйся, разсла́бленныя тѣ́ломъ укрѣпля́ющая; ра́дуйся, лежа́щія на одрѣ́ болѣ́зней возставля́ющая! Ра́дуйся, пла́вающія по вода́мъ отъ бу́рь и потопле́нія спаса́ющая; ра́дуйся, вла́ющіяся въ пучи́нѣ жите́йскаго мо́ря къ ти́хому приста́нищу спасе́нія направля́ющая! Ра́дуйся, ору́жіе, и́мже устраша́ются полки́ де́монскія; ра́дуйся, щи́те, и́мже покрыва́ются оби́тели и́ноковъ! Ра́дуйся, ти́хое пустынножи́телей весе́ліе; ра́дуйся, ти́хое обурева́емыхъ въ се́мъ вѣ́цѣ приста́нище!

Ра́дуйся, Невѣ́сто неневѣ́стная!

Конда́къ 8

Стра́нно слы́шати и неудо́бно разумѣ́ти злы́мъ невѣ́ріемъ омраче́ннымъ, ка́ко отъ святы́хъ ико́нъ Твои́хъ, Влады́чице, зна́менія и чудеса́ быва́ютъ; на́мъ же, те́плѣ вѣ́рующимъ словеси́, Тобо́ю къ первоначерта́ннѣй благовѣ́стникомъ ева́нгельскихъ та́инъ святѣ́й ико́нѣ рече́нному, - благода́ть Ро́ждшагося отъ Мене́ и Моя́ съ си́мъ о́бразомъ да бу́детъ, - удо́бно е́сть разумѣ́ти и пра́ведно упова́ти, я́ко и со свято́ю Твое́ю ико́ною Грузи́нскою, благода́ть Твоя́ и си́ла пребыва́ютъ вы́ну. Сего́ ра́ди съ благоговѣ́йнымъ стра́хомъ предстоя́ще, чте́мъ и воздае́мъ е́й че́сть, я́ко Тебѣ́ Само́й, на́мъ прису́щей, ра́достно пою́ще Бо́гу: Аллилу́ія!

Икосъ 8

Вся́ при́сно горѣ́ су́щи и съ небе́сными си́лами вы́ну пребыва́ющи, на́съ, земноро́дныхъ, не оставля́еши, Богома́ти, те́плымъ предста́тельствомъ предъ Сы́номъ и Бо́гомъ Твои́мъ: ма́тернее бо дерзнове́ніе къ Нему́ и́маши. Сего́ ра́ди, предстоя́ще пречи́стому Твоему́ о́бразу, со слеза́ми покая́нія вопіе́мъ Ти́, Богороди́тельнице:

Ра́дуйся, путеводи́тельнице вѣ́рная, къ небе́сному оте́честву до́брѣ на́съ направля́ющая; ра́дуйся, Ма́ти Царя́ небеси́ и земли́, врата́ ра́йскіе на́мъ отверза́ющая! Ра́дуйся, домострои́тельнице, житіе́ на́ше къ небе́сному устроя́ющая; ра́дуйся, вѣ́чная бла́га Сы́на Твоего́ на́мъ явля́ющая! Ра́дуйся, отъ ско́рбей и бѣ́дъ здѣ́ на́съ спаса́ющая; ра́дуйся, вѣ́чныхъ му́къ и огня́ гее́ннскаго по сме́рти на́съ избавля́ющая! Ра́дуйся, всѣ́хъ притека́ющихъ съ вѣ́рою и любо́вію къ Тебѣ́ сугу́бо ми́лующая; ра́дуйся, моли́твы на́ша, приноси́мыя Тебѣ́ предъ чудотво́рнымъ Твои́мъ о́бразомъ, ко престо́лу Сы́на Твоего́ и Бо́га на́шего вознося́щая! Ра́дуйся, блага́я на́ша помо́щнице; ра́дуйся, непосты́дное на́ше упова́ніе и вѣ́рное спасе́ніе!

Ра́дуйся, Невѣ́сто неневѣ́стная!

Конда́къ 9

Вся́каго естества́ арха́нгельскаго и а́нгельскаго превы́шшая, херуви́мъ и серафи́мъ честнѣ́йшая, Пресвята́я Дѣ́во: Бо́га бо Царя́ небе́сныхъ си́лъ, пло́тію родила́ еси́, Невмѣсти́маго во утро́бѣ Свое́й вмѣсти́ла еси́, Нося́щаго ве́сь мíръ дла́нію на рука́хъ носи́ла еси́, и вся́кое естество́ Пита́ющаго млеко́мъ пита́ла еси́. Тѣ́мже вои́стинну Ма́терь Бо́жію и хода́таицу ро́да христіа́нскаго Тя́ вѣ́дуще, со дерзнове́ніемъ вопіе́мъ Бо́гу: Аллилу́ія!

Икосъ 9

Вѣтíи многовѣща́нніи не вѣ́дятъ, кíими словесы́ благохва́льными подоба́етъ велича́ти Тя́, Богома́ти, по достоя́нію, недоумѣ́етъ бо вся́къ язы́къ досто́йно пѣ́ти Тя́, Богоро́дице; оба́че, Блага́я су́щи, пріими́ ми́лостивно, а́ще и немощны́ми смы́слы сложе́нная, но отъ чи́стаго се́рдца приноси́мая Тебѣ́ въ похвалу́ сицева́я пѣ́нія:

Ра́дуйся, пренепоро́чная Отрокови́це, превѣ́чнымъ совѣ́томъ ко спасе́нію ро́да на́шего избра́нная; ра́дуйся, Же́но, Ея́же сѣ́мя сокруши́ главу́ дре́вняго змíя! Ра́дуйся, въ жена́хъ преблагослове́нная; ра́дуйся, благода́ть у Бо́га обрѣ́тшая! Ра́дуйся, арха́нгельское вѣща́ніе о воплоще́ніи Еди́наго отъ Святы́я Тро́ицы смире́нно прія́вшая; ра́дуйся, кро́ткая раба́ Госпо́дня! Ра́дуйся, сосу́де, Ду́хомъ Бо́жіимъ освяще́нный; ра́дуйся, си́лою Всевы́шняго осѣне́нная! Ра́дуйся, Спаси́теля на́шихъ ду́шъ ро́ждшая; ра́дуйся, па́дшій ро́дъ на́шъ съ правосу́діемъ Бо́жіимъ примири́вшая! Ра́дуйся, Еде́мъ затворе́нный Рождество́мъ Твои́мъ мíру отве́рзшая; ра́дуйся, отъ плѣне́нія а́да Рождество́мъ Твои́мъ свободи́вшая!

Ра́дуйся, Невѣ́сто неневѣ́стная!

Конда́къ 10

Спасти́ хотя́щи мно́гія лю́ди отъ бѣ́дъ и ско́рбей, всю́ду явля́еши, Богома́ти, ро́ду на́шему неоскудѣва́емый отъ своея́ ико́ны Грузи́нскія исто́чникъ ми́лости: Красного́рскую бо оби́тель отъ запале́нія о́гненнаго во дни́ о́ны неврежде́нну сохрани́ла еси́, угаси́вши свирѣпѣ́ющую о́крестъ ея́ си́лу о́гненную, въ ца́рствующемъ же гра́дѣ Москвѣ́ и въ пусты́ни Раи́ѳстѣй благода́ти струи́ отъ ико́ны Твоея́ источа́еши всѣ́мъ, съ вѣ́рою покланя́ющимся Тебѣ́, и во ины́хъ градѣ́хъ и ве́сехъ на́шихъ чту́щимъ Тя́ поле́зное подае́ши. Тѣ́мже, прославля́юще Бо́га, дарова́вшаго на́мъ о Тебѣ́ благода́ть такову́ю, при́сно вопіе́мъ Ему́: Аллилу́ія!

Икосъ 10

Стѣна́ еси́ крѣ́пкая, Богоро́дице Дѣ́во, оби́тели Красного́рскія и пусты́ни Раи́ѳскія огра́да несокруши́мая, чи́ну же и́ноческому украше́ніе и сла́ва. Сего́ ра́ди, моля́щеся, вопіе́мъ Ти́, Пречи́стая: покры́й съ вѣ́рою покланя́ющіяся Тебѣ́ предъ Твои́мъ чудотво́рнымъ о́бразомъ отъ бѣ́дъ и ско́рбей, съ любо́вію Тебѣ́ вопію́щихъ:

Ра́дуйся, крѣ́пкая отъ находя́щихъ на ны́ напа́стей и бѣ́дъ храни́тельнице; ра́дуйся, оби́телей и́ноческихъ неусы́пная блюсти́тельнице! Ра́дуйся, отъ свирѣпѣ́ющаго пла́мене, во дни́ о́ны, оби́тель Красного́рскую, по те́плому моле́нію и́ноковъ, ди́вно сохрани́вшая; ра́дуйся, благорастворе́ніе возду́ховъ и спаси́тельный до́ждь благовре́менно то́й ниспосла́вшая! Ра́дуйся, житія́ чи́на и́ноческаго украше́ніе и добро́то; ра́дуйся, въ бу́рю искуше́ній и бѣ́дъ на́съ спаса́ющая! Ра́дуйся, помышле́нія на́ша освяща́ющая; ра́дуйся, сердца́ на́ша очища́ющая! Ра́дуйся, душегуби́тельный пла́мень страсте́й на́шихъ угаша́ющая; ра́дуйся, мра́къ сатани́нскихъ искуше́ній разсѣява́ющая! Ра́дуйся, житію́ на́шему благослове́ніе Бо́жіе низводя́щая; ра́дуйся, мы́сленная очеса́ на́ша къ го́рнимъ оби́телемъ направля́ющая!

Ра́дуйся, Невѣ́сто неневѣ́стная!

Конда́къ 11

Пѣ́ніе хвале́бное прино́сятъ Ти́, Влады́чице, лю́діе богоспаса́емаго гра́да Арха́нгельска, егда́ гра́дъ и́хъ еди́ною въ лѣ́то освяща́ется прише́ствіемъ Твоего́ чудотво́рнаго о́браза, и со свѣти́льники и кади́льницы гряду́ще во срѣ́теніе его́, ра́достно вопію́тъ Бо́гу: Аллилу́ія!

Икосъ 11

Свѣтоза́рными луча́ми чуде́съ ико́на Твоя́, Влады́чице, на святѣ́й горѣ́ Кра́снѣй немерца́емо сія́етъ и Россíйскую страну́ на́шу правосла́вную благода́тно озаря́етъ, прогоня́ющи вся́кое те́мное дѣ́йство вра́жіе си́лою Бо́жіею, побужда́ющи на́съ предъ не́ю Тебѣ́, богоизбра́нная Отрокови́це, хвале́бная пѣ́нія возноси́ти:

Ра́дуйся, на пути́ на́шего спасе́нія неугаса́емый свѣти́льниче вѣ́ры и благоче́стія; ра́дуйся, луче́ незаходи́маго Со́лнца! Ра́дуйся, немерца́ющая во странѣ́ на́шей правосла́вія звѣздо́; ра́дуйся, добродѣ́тели пу́ть освѣща́ющая! Ра́дуйся, заре́, Со́лнце пра́вды явля́ющая; ра́дуйся, свѣ́те, мра́къ невѣ́дѣнія отгоня́ющая! Ра́дуйся, купино́ неопали́мая, Бо́га яви́вшая; ра́дуйся, престо́ле о́гненный Вседержи́теля! Ра́дуйся, чистоты́ сокро́вище; ра́дуйся, цвѣ́те неувяда́емыя сла́вы! Ра́дуйся, Вы́шняго освяще́нное боже́ственное селе́ніе; ра́дуйся, я́ко Тобо́ю даде́ся ра́дость всѣ́мъ, Тя́, Богоро́дице, зову́щимъ!

Ра́дуйся, Невѣ́сто неневѣ́стная!

Конда́къ 12

Благода́ти Твоея́ никогда́же оскудѣва́ющія неизсяка́емый исто́чникъ яви́ла еси́, Богороди́тельнице, чудотво́рную Твою́ ико́ну, отъ нея́же вси́ скорбя́щіи и обремене́нніи грѣхи́ мно́гими спасе́ніе и цѣльбы́ во вся́ времена́ пріе́млютъ и ра́достно о Тебѣ́ воспѣва́ютъ Всеблаго́му Бо́гу: Аллилу́ія!

Икосъ 12

Пою́ще Твоя́ пресла́вная чудеса́, Богома́ти, отъ святы́я Твоея́ ико́ны неоску́дно на́мъ подава́емая, и все́ упова́ніе на́ше на Тя́, Засту́пнице, возлага́юще, со умиле́ніемъ вопіе́мъ Ти́:

Ра́дуйся, непосты́дное христіа́нъ упова́ніе въ бу́дущемъ вѣ́цѣ; ра́дуйся, въ дѣ́ланіи за́повѣдій Сы́на Твоего́ пребыва́ющихъ спаса́ющая! Ра́дуйся, въ животѣ́ се́мъ на́съ во здра́віи сохраня́ющая; ра́дуйся, въ стра́шный ча́съ сме́рти на́съ не оставля́ющая! Ра́дуйся, вѣ́рнымъ рабо́мъ Твои́мъ христіа́нскую кончи́ну устроя́ющая; ра́дуйся, на судѣ́ пра́веднѣмъ Сы́на Твоего́ вѣ́рнымъ слуга́мъ Твои́мъ вожделѣ́нный гла́съ Его́ слы́шати сподобля́ющая! Ра́дуйся, всѣ́мъ, хотя́щимъ спасти́ся и въ ра́зумъ и́стины пріити́, блага́я одиги́тріе; ра́дуйся, всѣ́хъ, въ сокруше́ніи серде́чнѣмъ ка́ющихся грѣ́шниковъ, несомнѣ́нное спасе́ніе! Ра́дуйся, Рождество́мъ Твои́мъ две́ри рая́ мíру отве́рзшая; ра́дуйся, земноро́дныхъ съ небе́сными къ вѣ́чному весе́лію сочета́вшая! Ра́дуйся, отъ а́нгелъ при́сно воспѣва́емая; ра́дуйся, и отъ земноро́дныхъ досто́йно ублажа́емая!

Ра́дуйся, Невѣ́сто неневѣ́стная!

Конда́къ 13

О, Всепѣ́тая Ма́ти, Пресвята́я Госпоже́, Дѣ́во Богоро́дице! Не отри́ни смире́нно приноси́мое Тебѣ́ ны́нѣ предъ чудотво́рнымъ о́бразомъ Твои́мъ сіе́ ма́лое моле́ніе на́ше. Презира́ющи бе́здну грѣхо́въ на́шихъ, изба́ви всѣ́хъ на́съ отъ бѣ́дъ и ско́рбей въ животѣ́ се́мъ, и гряду́щія вѣ́чныя изми́ му́ки нелицемѣ́рно о Тебѣ́ вопію́щихъ Бо́гу: Аллилу́ія!

Се́й конда́къ глаго́лется три́жды. Та́же Икосъ 1-й и Конда́къ 1-й

Моли́тва ко Пресвятѣ́й Госпожѣ́ Влады́чицѣ на́шей Дѣ́вѣ Богоро́дицѣ

Къ Тебѣ́, Богоизбра́нная Отрокови́це, Пресвята́я Дѣ́во Богоро́дице, небесе́ и земли́ Цари́це, припа́дающе вопіе́мъ: услы́ши моле́ній на́шихъ гла́съ и не отврати́ лица́ Твоего́ отъ на́съ, недосто́йныхъ. Пріими́, Всеблага́я, отъ недосто́йныхъ ра́бъ Твои́хъ, чту́щихъ всечестно́е и́мя Твое́, и съ вѣ́рою покланя́ющихся Тебѣ́ предъ чудотво́рнымъ Твои́мъ о́бразомъ, приноси́мое ны́нѣ те́плое моле́ніе на́ше. Вознеси́ е́ къ престо́лу Сы́на Твоего́, Христа́ Бо́га на́шего, да ми́лостивъ бу́детъ къ непра́вдамъ на́шимъ и не возда́стъ на́мъ по дѣло́мъ на́шимъ, но да проба́витъ щедро́ты Своя́. Вѣ́мы, я́ко нѣ́смы досто́йни, по грѣхо́мъ на́шимъ, отъ Него́ поми́ловани бы́ти, а́ще не Ты́, Влады́чице, умо́лиши Его́ о на́съ: вся́ бо мо́жеши испроси́ти у Него́, ма́тернее бо къ Нему́ и́маши дерзнове́ніе. Сего́ ра́ди къ Тебѣ́, я́ко Всемо́щнѣй и Всеблаго́й Засту́пницѣ на́шей прибѣга́емъ, усе́рдно моля́щеся: испроси́ у ро́ждшагося отъ Тебе́ Единоро́днаго Сы́на Бо́жія, Христа́ Бо́га на́шего, всѣ́мъ на́мъ въ святооте́честѣй правосла́внѣй вѣ́рѣ тве́рдое, до конца́ днíй на́шихъ пребыва́ніе и во всѣ́хъ за́повѣдехъ Госпо́днихъ неукло́нное хожде́ніе, да про́чее вре́мя живота́ на́шего пожи́вше во вся́комъ благоче́стіи и чистотѣ́, сподо́бимся ми́рныя христіа́нскія кончи́ны и до́браго отвѣ́та на стра́шнѣмъ судѣ́ Сы́на Твоего́ и Бо́га на́шего. И та́ко дости́гнемъ, подъ кро́вомъ Твоея́ по́мощи, живота́ вѣ́чнаго во Ца́рствіи Отца́ свѣ́товъ, Ему́же, ку́пно со Единоро́днымъ Его́ Сы́номъ и Святы́мъ Ду́хомъ, подоба́етъ сла́ва, че́сть и поклоне́ніе, ны́нѣ и при́сно и во вѣ́ки вѣко́въ. Ами́нь.

Тропа́рь, гла́съ 4

Отъ святы́я ико́ны твоея́, о, Влады́чице Богоро́дице, спасе́ніе и цѣльбы́ подаю́тся оби́льно, съ вѣ́рою и любо́вію всѣ́мъ приходя́щимъ, е́юже и мою́ не́мощь посѣти́, и ду́шу мою́ поми́луй, Блага́я, и тѣ́ло мое́ исцѣли́ благода́тію Твое́ю, Пречи́стая.

Инъ тропа́рь, гла́съ то́йже

Дне́сь свѣ́тло красу́ется оби́тель Красного́рская, и съ не́ю ликовству́етъ Раи́ѳская пу́стыня, я́ко зарю́ со́лнечную, отъ восто́ка возсія́вшую, воспріи́мши, Влады́чице, чудотво́рную Твою́ ико́ну, е́юже разгоня́еши мглу́ искуше́ній и бѣ́дъ отъ вопію́щихъ вѣ́рно: изба́ви оби́тель на́шу и вся́ страны́ христіа́нскія отъ всѣ́хъ навѣ́тъ вра́жіихъ, и спаси́ ду́ши на́ша, я́ко милосе́рдая Засту́пница ро́да христіа́нскаго.

Конда́къ, гла́съ 8

Тебѣ́, избра́ннѣй отъ всѣ́хъ родо́въ, Бо́жіей Ма́тери, благода́рственная пѣ́нія прино́симъ, прише́ствіемъ честны́я Твоея́ ико́ны, раби́ Твои́, Богоро́дице, озаря́еми, но, я́ко иму́щая держа́ву непобѣди́мую, отъ вся́кихъ на́съ бѣ́дъ свободи́, да зове́мъ Ти́: ра́дуйся, Невѣ́сто неневѣ́стная.

Велича́ніе

Велича́емъ Тя́, Пресвята́я Дѣ́во, Ма́ти Христа́ Бо́га на́шего, и чте́мъ Тво́й о́бразъ святы́й, отъ него́же источа́еши исцѣле́нія всѣ́мъ, съ вѣ́рою къ Тебѣ́ притека́ющимъ.