Конда́къ 1

Взбра́ннѣй Воево́дѣ, Пренепоро́чнѣй Дѣ́вѣ Богоро́дицѣ, Засту́пницѣ на́шей и Предста́тельству христіа́нъ непосты́дному, явле́ніемъ чу́дныя ико́ны Своея́ ра́дованіе пода́вшей землѣ́ Россíйстѣй и вся́ вѣ́рная ча́да Це́ркве просвѣти́вшей, благодаре́ніе усе́рдно прино́симъ Ти́, Богоро́дице и, припа́дающе пречу́дному о́бразу Твоему́, уми́льно глаго́лемъ: спаси́, Госпоже́, и поми́луй рабы́ Твоя́, зову́щія:

Ра́дуйся, Ма́ти Бо́жія, Предста́тельнице и Засту́пнице на́ша усе́рдная.

Икосъ 1

Ангелъ Гавріи́лъ отъ Бо́га по́сланъ бы́сть во гра́дъ Назаре́тъ ко Пречи́стѣй Дѣ́вѣ Марíи, и вше́дъ къ Не́й рече́: Ра́дуйся, Благода́тная, Госпо́дь съ Тобо́ю, благослове́нна Ты́ въ жена́хъ! Ангельскому гла́су подража́юще, и мы́, грѣ́шніи, ра́дости и благодаре́нія въ се́рдцы свое́мъ испо́лнени, предъ явле́ннымъ о́бразомъ Твои́мъ благохвале́нія на́ша возноси́ти къ Тебѣ́ дерза́емъ, Пресвята́я Богоро́дице:

Ра́дуйся, о́трасле отъ ко́рене Дави́дова благослове́нная; ра́дуйся, обѣ́томъ роди́телей въ же́ртву Бо́гу принесе́нная. Ра́дуйся, святы́хъ пра́ведныхъ Іоаки́ма и Анны дщи́ богода́нная; ра́дуйся, тріе́хъ лѣ́тъ во хра́мъ Бо́жій введе́нная и та́мо воспита́нная. Ра́дуйся та́мо смире́ніемъ и чистото́ю всѣ́хъ удиви́вшая; ра́дуйся, та́мо а́нгельскія бесѣ́ды сподо́бльшаяся. Ра́дуйся, Дѣ́во, о зача́тіи Бо́га Сло́ва благовѣ́стіе во смире́ніи пріи́мшая; ра́дуйся, избра́нная Отрокови́це, къ зача́тію Бо́га Сло́ва си́лою свы́ше осѣне́нная. Ра́дуйся, та́йну воплоще́нія Сы́на Бо́жія, отъ вѣко́въ въ Бо́зѣ сокрове́нную, откры́вшая; ра́дуйся, Агнице, ро́ждшая Агнца Христа́, взе́мшаго грѣхи́ мíра. Ра́дуйся, Тобо́ю бо избавля́емся му́къ а́довыхъ; ра́дуйся, Тобо́ю бо сподобля́емся вѣ́чныя жи́зни.

Ра́дуйся, Ма́ти Бо́жія, Предста́тельнице и Засту́пнице на́ша усе́рдная.

Конда́къ 2

Ви́дя ико́ну Твою́, Пресвята́я Дѣ́во, на дре́вѣ стоя́щу, кня́зь благочести́вый Костромскíй у́жасомъ мно́гимъ содрога́шеся недоумѣ́я, что́ бы́сть видѣ́ніе сіе́? Хотя́щу же ему́ прія́ти ю́ и отъ сего́ свы́ше удержа́ну ему́ бы́вшу, не можа́ше; увѣ́дѣвъ, я́ко чу́дно е́сть ико́ны тоя́ явле́ніе, воззва́ къ Бо́гу: Аллилу́ія.

Икосъ 2

Ра́зумомъ жела́я разумѣ́ти кня́зь благочести́вый прише́ствіе пречу́днаго Твоего́ о́браза во гра́дъ Кострому́, Богоро́дице, душе́ю ра́дованія преиспо́лненною себе́ предаде́ води́тельству Бо́жію, и прекло́нь колѣ́на, со стра́хомъ вопія́ше Тебѣ́:

Ра́дуйся, Дѣ́во, я́вльшая о́бразъ Сво́й чу́дно; ра́дуйся, Благослове́нная, въ явле́ніи о́браза Своего́ милосе́рдіе на́мъ явля́ющая. Ра́дуйся, о всѣ́хъ чту́щихъ Сы́на Твоего́ промышля́ющая; ра́дуйся, всѣ́мъ прося́щимъ у Тебе́ да́ры, въ мѣ́ру вѣ́ры, ко спасе́нію подаю́щая. Ра́дуйся, пу́ть и́стины заблу́дшимъ показу́ющая; ра́дуйся, къ го́рнему мíру чудесы́ Твои́ми у́мъ на́шъ возводя́щая. Ра́дуйся, смуще́нія помышле́ній сумни́тельныхъ удаля́ющая; ра́дуйся, сла́вящихъ Тя́ всегда́ прославля́ющая. Ра́дуйся, чистото́ю Твое́ю чистотѣ́ на́съ науча́ющая; ра́дуйся, чистото́ю Твое́ю нечистоту́ на́шу облича́ющая. Ра́дуйся, моле́нія на́ша пріе́млющая; ра́дуйся, рыда́ній и сле́зъ не отмѣта́ющая.

Ра́дуйся, Ма́ти Бо́жія, Предста́тельнице и Засту́пнице на́ша усе́рдная.

Конда́къ 3

Си́лу Бо́жію благочести́вый кня́зь позна́въ въ восхожде́ніи о́браза чу́днаго Твоего́, Богома́ти, въ явле́ніи же ви́дѣвъ милосе́рдіе Твое́ ко всѣ́мъ спасе́ніе хотя́щимъ получи́ти, рече́: Аллилу́ія.

Икосъ 3

Имѣ́въ по́мыслъ стяжа́ти да́руемое небе́сное сокро́вище, ли́къ Тво́й свѣ́тлый, Богома́ти, второ́е простре́ держа́вный ру́ку къ о́бразу нисше́дшему; узрѣ́въ же па́ки его́ восхожде́ніе, ско́ро по́йде во гра́дъ и повѣ́да о бы́вшихъ ему́ освяще́нному собо́ру, да прише́дше и ви́дяще ико́ны Твоея́ явле́ніе возопію́тъ съ ни́мъ вѣ́рніи:

Ра́дуйся, Цари́це небесе́ и земли́; ра́дуйся, престо́ле Царя́ ца́рствующихъ. Ра́дуйся, Пренепоро́чная Дѣ́во; ра́дуйся, Ма́ти Непристу́пнаго Свѣ́та. Ра́дуйся, честнѣ́йшая херуви́мъ; ра́дуйся, сла́внѣйшая безъ сравне́нія серафи́мъ. Ра́дуйся, небе́сными си́лами велича́емая; ра́дуйся, отъ всѣ́хъ земноро́дныхъ ублажа́емая. Ра́дуйся, неизрече́нное весе́ліе а́нгеловъ; ра́дуйся, вѣ́нче ца́рственный всѣ́хъ проро́ковъ и апо́столовъ. Ра́дуйся, правосла́вія Христо́вы Це́ркве огражде́ніе; ра́дуйся, всѣ́хъ суему́дрыхъ уче́ній и е́ресей низложе́ніе.

Ра́дуйся, Ма́ти Бо́жія, Предста́тельнице и Засту́пнице на́ша усе́рдная.

Конда́къ 4

Бу́рю вну́трь имѣ́я помышле́ній недоумѣ́нныхъ, освяще́нный собо́ръ со псалмы́ и пѣ́сньми духо́вными а́біе притече́ ви́дѣти о́бразъ Тво́й, Неискусобра́чная. Узрѣ́въ же его́ на дре́вѣ ди́вно стоя́ща и благолѣ́пно красото́ю сія́юща, рече́: Аллилу́ія.

Икосъ 4

Слы́шаша лю́діе честны́я ико́ны Твоея́, Богоотрокови́це, прише́ствіе, и ко о́ной те́кше, поклоня́хуся, а́ки Самѣ́й Тебѣ́ су́щей, и со умиле́ніемъ и слеза́ми вопія́ху къ Тебѣ́:

Ра́дуйся, Дѣ́во, Благослове́нная въ жена́хъ, во чре́вѣ Твое́мъ Носи́теля вся́ческихъ носи́вшая; ра́дуйся, рожде́ніемъ Сы́на Твоего́ спасе́ніе мíру всему́ я́вльшая. Ра́дуйся, человѣ́ки съ Бо́гомъ соедини́вшая; ра́дуйся, превы́шшая небе́съ, изба́вльшая на́съ отъ кля́твы. Ра́дуйся, на́съ къ вѣ́чнѣй жи́зни руководя́щая; ра́дуйся, Влады́чице мíра. Ра́дуйся, Бо́жіе къ сме́ртнымъ благоволе́ніе; ра́дуйся, сме́ртныхъ къ Бо́гу дерзнове́ніе. Ра́дуйся, благи́хъ во бла́гости соблюда́ющая; ра́дуйся, лука́выхъ на пу́ть благíй обраща́ющая. Ра́дуйся, подъ сѣ́нь кро́ва Твоего́ прибѣга́ющихъ ми́лующая; ра́дуйся, упова́ющихъ на Тя́ вся́ потре́бная къ животу́ и благоче́стію да́рующая.

Ра́дуйся, Ма́ти Бо́жія, Предста́тельнице и Засту́пнице на́ша усе́рдная.

Конда́къ 5

Яко боготе́чную звѣзду́ узрѣ́ша лю́діе ико́ну Твою́, Безневѣ́стная Дѣ́во, и, я́ко многосвѣ́тлый свѣти́льникъ, поста́виша ю́ во святѣ́мъ собо́рнѣмъ хра́мѣ, ра́дующеся и вопію́ще Бо́гу: Аллилу́ія.

Икосъ 5

Ви́дѣвше жи́теліе гра́да Городца́ о́бразъ Тво́й, Влады́чице, во хра́мѣ гра́да Костромы́ стоя́щій, и на руку́ Твое́ю держи́ма Богомладе́нца Іису́са, ско́рбію одержи́ми бѣ́ша, зане́ отше́ствіе его́ бы́сть изъ гра́да и́хъ. Мы́ же, обра́довани благоволе́ніемъ Твои́мъ ко гра́ду на́шему, прино́симъ Ти́ да́ры, и, съ любо́вію лобыза́юще Тво́й святы́й о́бразъ, вопіе́мъ Ти́:

Ра́дуйся, Звѣздо́, Со́лнце пра́вды на́мъ я́вльшая; ра́дуйся, возлюби́вшая сію́ страну́. Ра́дуйся, обрѣ́теніе Тебе́ и́щущихъ; ра́дуйся, ра́достію неизрече́нною вѣ́рныхъ сердца́ исполня́ющая. Ра́дуйся, сокро́вище благода́ти неистощи́мое; ра́дуйся, ми́лости приснотеку́щій исто́чниче. Ра́дуйся, отъ тя́жкихъ бѣ́дъ спаса́ющая; ра́дуйся, отъ смертно́сныя я́звы избавля́ющая. Ра́дуйся, всего́ мíра Хода́таице; ра́дуйся всѣ́хъ неду́говъ Цѣли́тельнице. Ра́дуйся, Красото́ несравне́нная; ра́дуйся, Добро́то несказа́нная.

Ра́дуйся, Ма́ти Бо́жія, Предста́тельнице и Засту́пнице на́ша усе́рдная.

Конда́къ 6

Проповѣ́дницы богоно́сніи бы́ша ви́дѣвшіи о́бразъ Тво́й, Богоро́дице. Возвра́щся бо кíйждо во страну́ свою́, возвѣща́ше о прише́ствіи его́ и чудесѣ́хъ отъ него́ быва́емыхъ, воспѣва́я Бо́гу: Аллилу́ія.

Икосъ 6

Возсія́вша благода́ть отъ чу́днаго о́браза Твоего́, Чи́стая, вѣ́ру немощству́ющихъ утверди́, вѣ́рныхъ же возвесели́ сердца́ любо́вію. Сего́ ра́ди ра́дующеся вопіе́мъ Ти́:

Ра́дуйся, Пресвята́я Дѣ́во, свѣ́томъ небе́сныя и́стины на́съ озаря́ющая; ра́дуйся, мглу́ грѣхо́вную отъ на́съ отгоня́ющая. Ра́дуйся, чудесы́ Твои́ми къ боговѣ́дѣнію на́съ приводя́щая; ра́дуйся, всѣ́хъ ка́ющихся грѣ́шникъ ко благоче́стію подвиза́ющая. Ра́дуйся, всѣ́хъ притека́ющихъ къ Тебѣ́ крѣ́пкое заступле́ніе; ра́дуйся, немощству́ющихъ умо́мъ утвержде́ніе. Ра́дуйся, изнемога́ющихъ въ вѣ́рѣ возставля́ющая; ра́дуйся, ти́хое приста́нище въ мо́рѣ жите́йстѣмъ обурева́емымъ. Ра́дуйся, злы́я совѣ́ты сыно́въ поги́бельныхъ открыва́ющая; ра́дуйся, вознесе́нную горды́ню враго́въ оте́чества на́шего смиря́ющая. Ра́дуйся, правосла́вныхъ царе́й Держа́во; ра́дуйся, всѣ́хъ христіа́нъ Похвало́.

Ра́дуйся, Ма́ти Бо́жія, Предста́тельнице и Засту́пнице на́ша усе́рдная.

Конда́къ 7

Хотя́ просла́вити Сы́нъ Тво́й, Богоро́дице, святу́ю ико́ну Твою́ во гра́дѣ Костромѣ́, повелѣ́ ю́ въ де́нь Успе́нія Твоего́ свято́му великому́ченику Ѳео́дору Стратила́ту носи́ти по гра́ду сему́, да вси́, ви́дяще чу́до сіе́, благода́рнымъ се́рдцемъ возопію́тъ Ему́: Аллилу́ія.

Икосъ 7

Чу́до но́вое яви́ на́мъ Госпо́дь мольба́ми Твои́ми, Богоро́дице, егда́ сгорѣ́вшу хра́му, въ не́мже бѣ́ поста́вленъ святы́й о́бразъ Тво́й, сохрани́ его́ въ пе́плѣ невреди́ма отъ огня́, и та́ко мнѣ́вшихъ сгорѣ́вша его́ печа́ль въ ра́дость преложи́. Мы́ же, чу́до сіе́ вѣ́дяще, воспѣва́емъ Ти́ такова́я:

Ра́дуйся, Купино́ Неопали́мая; ра́дуйся, о́гненный сто́лпе, су́щія во тмѣ́ наставля́яй. Ра́дуйся, киво́те, Ду́хомъ позлаще́нный, невмѣсти́маго Бо́га вмѣсти́вшій; ра́дуйся, кади́льнице злата́я, я́ко ѳиміа́мъ благоуха́нный, моли́твы Твоя́ за ны́ къ Бо́гу Сы́ну при́сно вознося́щая. Ра́дуйся, же́зле Ааро́новъ, къ явле́нію въ мíръ Сы́на Твоего́ прозя́бшій; ра́дуйся, руно́ Гедео́ново, благода́тію Бо́жіею во спасе́ніе на́ше ороше́нное. Ра́дуйся, горо́ несѣко́мая, отъ нея́же отсѣче́ся краеуго́льный ка́мень - Христо́съ; ра́дуйся, хра́ме одушевле́нный, въ не́мже всели́ся Божество́ тѣле́снѣ. Ра́дуйся, дѣ́вства охране́ніе; ра́дуйся, супру́жества благослове́ніе. Ра́дуйся, па́че всѣ́хъ Го́спода возлюби́вшая; ра́дуйся, па́че всѣ́хъ отъ Него́ превознесе́нная.

Ра́дуйся, Ма́ти Бо́жія, Предста́тельнице и Засту́пнице на́ша усе́рдная.

Конда́къ 8

Стра́нное чу́до ви́дѣвше, на возду́сѣ ико́ну Богома́тери стоя́щу, а́ки рука́ми а́нгельскими держи́му, егда́ второ́е сгорѣ́ хра́мъ, въ не́мже стоя́ше явле́нная сія́ ико́на, отве́ржемся, лю́діе, мíра сего́, у́мъ на небеса́ прело́жше; сего́ бо ра́ди и даде́ся на́мъ чу́дная ико́на Богоро́дицы, да, взира́юще на ню́, го́рняя му́дрствуемъ, а не земна́я, вопію́ще къ Бо́гу: Аллилу́ія.

Икосъ 8

Въ вы́шнихъ пребыва́ющи селе́ніихъ, и ни́жнихъ не разлучи́лася еси́, Богоро́дице, чудесы́ Твои́ми всѣ́хъ просвѣща́ющи приходя́щихъ къ Тебѣ́ вѣ́рою, сего́ ра́ди и слы́шиши отъ на́съ сія́:

Ра́дуйся, Ма́ти Христа́ Бо́га на́шего, на небеси́ пребыва́ющая; ра́дуйся, на земли́ на́съ не оставля́ющая. Ра́дуйся, ра́ди вели́чества Твоего́ на небеси́ а́нгелы окруже́нная; ра́дуйся, ра́ди сла́вы Твоея́ на земли́ отъ человѣ́къ прославля́емая. Ра́дуйся, Тебѣ́ бо слу́жатъ вся́ небе́сныя си́лы; ра́дуйся, Тебѣ́ бо, по Бо́зѣ, хвале́ніе возно́сятъ херуви́ми и серафи́ми. Ра́дуйся, лице́ Бо́жіе вы́ну на небеси́ созерца́ющая; ра́дуйся, предъ престо́ломъ Сы́на Твоего́ Ма́тернія ру́цѣ Твои́, за ны́ моля́щися, простира́ющая. Ра́дуйся, на́съ, су́щихъ на земли́, отъ вся́каго зла́ омофо́ромъ Твои́мъ покрыва́ющая; ра́дуйся, вѣ́рныхъ отъ вся́кихъ душепа́губныхъ дѣ́лъ удаля́ющая. Ра́дуйся, рожде́ніемъ Сы́на Бо́жія две́ри Ца́рства Христо́ва на́мъ отве́рзшая; ра́дуйся, наде́ждою прія́тія небе́сныхъ бла́гъ вѣ́рныхъ ду́ши услажда́ющая.

Ра́дуйся, Ма́ти Бо́жія, Предста́тельнице и Засту́пнице на́ша усе́рдная.

Конда́къ 9

Вся́кое естество́ а́нгельское превозно́ситъ Тя́, Дѣ́во, вели́кія ра́ди любве́ Твоея́ къ ро́ду христіа́нскому; незри́ма бо и непристу́пна, я́ко Ма́ти Бо́га отъ земли́ къ небеси́ возше́дшая, пречи́стымъ Твои́мъ о́бразомъ зри́му и присту́пну Себе́ явля́еши всѣ́мъ воспѣва́ющимъ Сы́ну Твоему́: Аллилу́ія.

Икосъ 9

Вѣтíя многовѣща́нныя, я́ко ры́бы безгла́сны, зри́мъ о Тебѣ́, Богоро́дице: недоумѣ́ютъ бо глаго́лати о сла́вныхъ чудесѣ́хъ, отъ явле́нныя Твоея́ ико́ны быва́емыхъ. Мы́ же о́нѣмъ дивя́щеся благода́рно вопіе́мъ Ти́:

Ра́дуйся, слѣпы́хъ прозрѣ́ніе; ра́дуйся, хромы́хъ хожде́ніе. Ра́дуйся, отъ те́мныхъ и лука́выхъ духо́въ исцѣля́ющая; ра́дуйся, луча́ми отъ Твоего́ пречи́стаго о́браза изше́дшими враго́въ земли́ на́шея отгна́вшая. Ра́дуйся, больны́мъ видѣ́ніе Твое́ дарова́вшая; ра́дуйся, моля́щимся явле́ннѣй ико́нѣ Твое́й исцѣле́ніе подаю́щая. Ра́дуйся, разсла́бленныхъ отъ одра́ болѣ́зни воздвига́ющая; ра́дуйся, нѣмы́мъ разрѣша́ющая уста́. Ра́дуйся, отъ плѣ́на вра́жія возвраща́ющая; ра́дуйся, лю́тыя пло́ти стра́сти утоля́ющая. Ра́дуйся, ду́ши вѣ́рныхъ неизрече́ннымъ милосе́рдіемъ Твои́мъ умиля́ющая; ра́дуйся, неизглаго́ланнымъ Твои́мъ человѣколю́біемъ уныва́ющихъ ободря́ющая.

Ра́дуйся, Ма́ти Бо́жія, Предста́тельнице и Засту́пнице на́ша усе́рдная.

Конда́къ 10

Соблюсти́ хотя́щи въ чистотѣ́ домострои́тельство Це́ркве Правосла́вныя, Чи́стая, и, утверди́ти ски́петръ Держа́вы Россíйскія, чу́дною ико́ною Твое́ю вложи́ла еси́ въ се́рдце Благовѣ́рнаго Госуда́ря Михаи́ла Ѳео́доровича прія́ти вѣне́цъ ца́рскій земли́ Россíйскія, да вси́ ви́дящіи ви́дятъ, я́ко Вы́шній владѣ́етъ ца́рствомъ, и ему́же хо́щетъ дае́тъ е́, и возопію́тъ Ему́: Аллилу́ія.

Икосъ 10

Стѣна́ еси́ необори́мая, Богоро́дице Дѣ́во, всѣ́мъ къ Тебѣ́ прибѣга́ющимъ: никто́же бо притека́яй къ Тебѣ́ то́щь отхо́дитъ. Сего́ ра́ди ущедря́еми ми́лостію Твое́ю, во умиле́ніи души́ возглаша́емъ Тебѣ́:

Ра́дуйся, тве́рдая стѣно́, отъ вра́гъ ви́димыхъ и неви́димыхъ охраня́ющая; ра́дуйся, крѣ́пкая защи́то упова́ніе на Тя́ возложи́вшимъ. Ра́дуйся, позна́нія и́стины чи́стое зерца́ло; ра́дуйся, сохране́нія вѣ́ры крѣ́пкое забра́ло. Ра́дуйся, гра́ды и страны́ христіа́нскія предста́тельствомъ Твои́мъ отъ враго́въ спаса́ющая; ра́дуйся, царе́мъ благовѣ́рнымъ побора́ющая. Ра́дуйся, ми́ръ во градѣ́хъ селя́щая; ра́дуйся, благонра́внымъ благопоспѣша́ющая. Ра́дуйся, си́лою моли́твъ Твои́хъ злы́я по́мыслы въ ничто́же обраща́ющая; ра́дуйся, си́лы враго́въ бли́жняго сокруша́ющая. Ра́дуйся, ю́ности наставле́ніе; ра́дуйся ста́рости поддержа́ніе.

Ра́дуйся, Ма́ти Бо́жія, Предста́тельнице и Засту́пнице на́ша усе́рдная.

Конда́къ 11

Пѣ́ніе вся́кое побѣжда́ется спростре́тися тща́щееся мно́жеству мно́гихъ щедро́тъ Твои́хъ: равночи́сленныя бо песку́ морско́му пѣ́сни а́ще прино́симъ Ти́, Богоро́дице Дѣ́во, ничто́же соверша́емъ досто́йно, я́же дарова́ла еси́ на́мъ, вопію́щимъ къ Бо́гу: Аллилу́ія.

Икосъ 11

Свѣтопріе́мную свѣщу́, дре́вле я́вльшуюся, зри́мъ во святѣ́й ико́нѣ Твое́й, Богоро́дице Дѣ́во, егда́ гра́дъ на́шъ защити́ла еси́ отъ разоре́нія враго́въ земли́ на́шея луча́ми, отъ святы́я Твоея́ ико́ны исходя́щими. Сего́ ра́ди съ вѣ́рою припа́дающе къ не́й и съ любо́вію лобыза́юще ю́, вопіе́мъ Ти́:

Ра́дуйся, Ма́ти Превѣ́чнаго Свѣ́та Христа́, уче́ніемъ Его́ ду́ши просвѣща́ющая; ра́дуйся, благода́тію Бо́жіею невѣ́рующихъ къ вѣ́рѣ въ Бо́га приводя́щая. Ра́дуйся, путьше́ствующимъ спутеше́ствующая; ра́дуйся, ну́ждно пла́вающихъ Ко́рмчая. Ра́дуйся, отъ вся́кія ско́рби, гнѣ́ва и ну́жды спаса́ющая; ра́дуйся, отъ гла́да, губи́тельства, тру́са и огня́ сохраня́ющая. Ра́дуйся, избавля́ющая отъ иноплеме́нныхъ; ра́дуйся, охраня́ющая отъ междоусо́бныя бра́ни. Ра́дуйся, во святѣ́й ико́нѣ Твое́й, я́ко со́лнце, въ Костромски́хъ предѣ́лѣхъ возсія́вшая; ра́дуйся, здѣ́ о́трасль ца́рственную возвели́чившая. Ра́дуйся, Тобо́ю бо утвержда́ются ца́рства; ра́дуйся, Тобо́ю бо вѣнча́ются ца́ріе.

Ра́дуйся, Ма́ти Бо́жія, Предста́тельнице и Засту́пнице на́ша усе́рдная.

Конда́къ 12

Благода́ть прія́вшая отъ Бо́га Сы́на Твоего́, Дѣ́во Богоро́дице, и ту́ дре́вле излія́вшая на всѣ́хъ прибѣга́ющихъ къ о́бразу Твоему́, не лиши́ ны́нѣ и на́съ бога́тыя Твоея́ ми́лости, да́руй на́мъ покая́ніе о грѣсѣ́хъ, да чи́стымъ се́рдцемъ и устны́ взыва́емъ къ возлю́бленному Сы́ну Твоему́ и Бо́гу на́шему: Аллилу́ія.

Икосъ 12

Пою́ще Твоя́ ми́лости и чудеса́, хва́лимъ Тя́ вси́, Богоро́дице, и, я́ко дре́влій Изра́иль къ киво́ту Завѣ́та, притека́емъ ко о́бразу лица́ Твоего́, и изъ глубины́ души́ вопіе́мъ: воздви́гни ру́цѣ Твоя́ къ Сы́ну Твоему́, да пода́стъ на́мъ вся́ блага́я и спаси́тельная съ вѣ́рою и любо́вію вопію́щимъ Ти́:

Ра́дуйся, утѣше́ніе на́ше въ ско́рбехъ; ра́дуйся, утоле́ніе печа́лей на́шихъ. Ра́дуйся, ра́досте на́ша безконе́чная; ра́дуйся, свѣ́тлосте и отра́до серде́чная. Ра́дуйся, наде́ждо на́ша крѣ́пкая; ра́дуйся, си́рымъ прія́телище. Ра́дуйся, стра́ннымъ прибѣ́жище; ра́дуйся, оби́димымъ Покрови́тельнице. Ра́дуйся, оклевета́емыхъ оправда́ніе; ра́дуйся, благи́хъ защище́ніе. Ра́дуйся, тѣ́ла моего́ врачева́ніе; ра́дуйся, души́ моея́ спасе́ніе.

Ра́дуйся, Ма́ти Бо́жія, Предста́тельнице и Засту́пнице на́ша усе́рдная.

Конда́къ 13

О, Премилосе́рдая Засту́пнице на́ша! Вели́кія ра́ди ми́лости Твоея́ дарова́вшая оте́честву и гра́ду на́шему чудотво́рную ико́ну Твою́ во освяще́ніе, утѣше́ніе и огражде́ніе на́ше, ны́нѣшнее пріе́мши славосло́віе, отъ вся́каго зла́го обстоя́нія изба́ви рабы́ Твоя́. Ски́петръ благовѣ́рнаго Импера́тора на́шего утверди́, да́руй ему́ здра́віе и спасе́ніе, на враги́ побѣ́ду и одолѣ́ніе и всѣ́хъ на́съ вѣ́чныхъ му́къ свободи́, устна́ми, душе́ю же и се́рдцемъ вопію́щихъ: Аллилу́ія.

Се́й конда́къ глаго́лется три́жды. Та́же Икосъ 1-й и Конда́къ 1-й

Моли́тва пе́рвая

О, Пресвята́я Влады́чице Богоро́дице и Приснодѣ́во, Марíе, еди́ная наде́ждо на́мъ грѣ́шнымъ! Къ Тебѣ́ прибѣга́емъ и Тебе́ мо́лимъ, я́ко ве́ліе и́маши дерзнове́ніе къ Ро́ждшимуся отъ Тебе́ по пло́ти Го́споду Бо́гу и Спаси́телю на́шиму Іису́су Христу́. Не пре́зри сле́зъ на́шихъ, не возгнуша́йся воздыха́ній на́шихъ, не отри́ни ско́рби на́шея, не посрами́ упова́нія на́шего на Тя́, но Ма́терними моле́ніи Твои́ми умоли́ Го́спода Бо́га, да сподо́битъ на́съ, грѣ́шныхъ и недосто́йныхъ, свободи́тися отъ грѣхо́въ и страсте́й душе́вныхъ и тѣле́сныхъ, и мíру у́бо умре́ти, а Ему́ еди́ному жи́ти по вся́ дни́ жи́зни на́шея. О, Пресвята́я Влады́чице Богоро́дице! путьше́ствующимъ спутеше́ствуй и огражда́й и охраня́й о́ныя, изба́ви плѣне́нныхъ отъ плѣне́нія, свободи́ стра́ждущихъ отъ бѣ́дъ, утѣ́ши су́щихъ въ печа́ли, ско́рбехъ и напа́стехъ, облегчи́ нищету́ и вся́ко злострада́ніе тѣле́сное, и да́руй всѣ́мъ вся́ потре́бная къ животу́, благоче́стію и жи́зни вре́меннѣй. Благочести́вѣйшаго Госуда́ря Импера́тора [и́мярекъ] и ве́сь ца́рствующій До́мъ укрѣпи́ и утверди́, и пода́ждь Ему́ здра́віе и спасе́ніе, и на враги́ побѣ́ду и одолѣ́ніе. Спаси́, Влады́чице, вся́ страны́ и гра́ды и сію́ страну́ и се́й гра́дъ, и́мже сія́ чудотво́рная и свята́я ико́на Твоя́ даде́ся во утѣше́ніе и огражде́ніе; изба́ви я́ отъ гла́да, губи́тельства, тру́са, пото́па, огня́, меча́, наше́ствія иноплеме́нныхъ, междоусо́бныя бра́ни, и отврати́ вся́кій гнѣ́въ на ны́ пра́ведно дви́жимый. Да́руй на́мъ вре́мя на покая́ніе и обраще́ніе, изба́ви на́съ отъ внеза́пныя сме́рти, и во вре́мя исхо́да на́шего предста́ни на́мъ я́вльшися, Дѣ́во Богоро́дице, и изба́ви на́съ отъ возду́шныхъ мыта́рствъ, князе́й вѣ́ка сего́, сподо́би на Стра́шнѣмъ Судѣ́ Христо́вѣ ста́ти одесну́ю, и содѣ́лай на́съ наслѣ́дники вѣ́чныхъ бла́гъ, да сла́вимъ великолѣ́пое и́мя Сы́на Твоего́ и Бо́га на́шего со Безнача́льнымъ Его́ Отце́мъ и Святы́мъ и Благи́мъ и Животворя́щимъ Его́ Ду́хомъ, ны́нѣ и при́сно и во вѣ́ки вѣко́въ. Ами́нь.

Моли́тва втора́я

О, Премилосе́рдая Госпоже́, Цари́це, Богоро́дице! Пріими́ смире́нное моле́ніе на́ше, и не отри́ни на́съ, заступле́ніе и прибѣ́жище на́ше, и не возгнуша́йся на́съ, недосто́йныхъ, но́, я́ко Милосе́рдая Ма́ти, не преста́ни моля́щи, Его́же родила́ еси́, да да́руетъ на́мъ проще́ніе мно́гихъ согрѣше́ній на́шихъ, да спасе́тъ на́съ, и́миже вѣ́сть судьба́ми. Поми́луй на́съ, Влады́чице, поми́луй на́съ, нѣ́смь бо на́мъ спасе́нія отъ дѣ́лъ. Тѣ́мже вѣ́рно вопіе́мъ Ти́: поми́луй рабы́ Твоя́ и непло́дное се́рдце на́ше покажи́ плодоно́сно дѣ́лы благи́ми. При́зри на на́съ, недосто́йныхъ, Ты́ бо еси́ упова́ніе и покро́въ на́шъ, жи́знь и свѣ́тъ се́рдцу на́шему. Яко Невече́рній Свѣ́тъ отъ чре́ва Твоего́ воздви́гшая, озари́ ду́шу на́шу, и отжени́ вся́ку мглу́ отъ се́рдца на́шего. Да́руй на́мъ умиле́ніе, покая́ніе и сокруше́ніе серде́чное. Сподо́би на́съ по вся́ дни́ жи́зни на́шея твори́ти во́лю Сы́на Твоего́ и Бо́га на́шего и во все́мъ благоугожда́ти Ему́ Еди́ному. О, Богома́ти! Не преста́ни моля́щи Ро́ждшагося отъ Тебе́ за вся́, притека́ющія съ вѣ́рою къ сему́ свято́му о́бразу Твоему́, и подава́й и́мъ ско́рую по́мощь и утѣше́ніе въ ско́рбехъ и напа́стехъ и злострада́ніихъ, изба́ви и́хъ отъ клеветы́ и зло́бы человѣ́ческія, отъ вра́гъ ви́димыхъ и неви́димыхъ и вся́кія ну́жды и печа́ли. Спаси́ оте́чество на́ше, ца́рствующій гра́дъ на́шъ, гра́дъ се́й и вся́ гра́ды и страны́ отъ вся́кихъ бѣ́дъ и ну́ждъ и сотвори́ ми́лостива на́мъ бы́ти Бо́га на́шего, отврати́ вся́кій гнѣ́въ Его́, на ны́ дви́жимый, и изба́ви ны́ отъ належа́щаго и пра́веднаго Его́ преще́нія. О, Боголюби́вая Влады́чице, а́нгеловъ украше́ніе, му́чениковъ сла́во и всѣ́хъ святы́хъ ра́досте! Съ ни́ми моли́ Го́спода, да сподо́битъ на́съ въ покая́ніи сконча́ти жи́зни на́шея тече́ніе. Въ сме́рти же ча́съ, Пресвята́я Дѣ́во, изба́ви на́съ отъ вла́сти бѣсо́вскія и осужде́нія, и отвѣ́та, и стра́шнаго испыта́нія, и мыта́рствъ го́рькихъ, и огня́ вѣ́чнаго, да, сподо́бльшеся сла́внаго Ца́рствія Бо́жія, велича́емъ Тя́ и сла́вимъ вопло́щшагося отъ Тебе́ Христа́, Бо́га на́шего, Ему́же сла́ва со Отце́мъ и Святы́мъ Ду́хомъ, ны́нѣ, и при́сно, и во вѣ́ки вѣко́въ. Ами́нь.

Тропа́рь, гла́съ 4

Прише́ствіемъ честны́я Твоея́ ико́ны, Богоотрокови́це, обра́дованный дне́сь богохрани́мый гра́дъ Кострома́, я́коже дре́вній Изра́иль къ киво́ту Завѣ́та, притека́етъ къ изображе́нію лица́ Твоего́ и воплоти́вшагося отъ Тебе́ Бо́га на́шего, да Твои́мъ ма́тернимъ къ Нему́ предста́тельствомъ при́сно хода́тайствуеши всѣ́мъ, подъ сѣ́нь кро́ва Твоего́ прибѣга́ющимъ, ми́ръ и ве́лію ми́лость.

Конда́къ, гла́съ 8

Благода́рственная принося́ще Ти́, раби́ Твои́, Богороди́тельнице, о всѣ́хъ, и́миже благодѣ́яла еси́ гра́ду на́шему, изъ глубины́ души́ взыва́емъ Тебѣ́ и ми́ли ся дѣ́емъ: не преста́ни, Влады́чице, ма́терними къ Сы́ну Твоему́ и Бо́гу на́шему моли́твами подава́ти вся́ блага́я и спаси́тельная всѣ́мъ, вѣ́рою и любо́вію вопію́щимъ Ти́: ра́дуйся, Дѣ́во, христіа́нъ Похвало́.

Велича́ніе

Велича́емъ Тя́, Пресвята́я Дѣ́во, Богоизбра́нная Отрокови́це, и чте́мъ о́бразъ Тво́й святы́й, и́мже то́чиши исцѣле́нія всѣ́мъ съ вѣ́рою притека́ющимъ.