Конда́къ 1

Избра́ннѣй Бо́гомъ отъ человѣ́ческаго ро́да послужи́ти воплоще́нію Предвѣ́чнаго Сло́ва, Преблагослове́ннѣй Дѣ́вѣ Богоро́дицѣ, досто́йно воспѣва́емой отъ а́нгелъ на небеси́, мы́, грѣ́шніи, на земли́ дерза́емъ приноси́ти хвале́бное пѣ́ніе. Еже ми́лостиво отъ на́съ пріе́мши, всеми́лующая Цари́це Богоро́дице, отъ вся́кихъ бѣ́дъ на́съ спаси́ и вѣ́чныхъ му́къ свободи́, да зове́мъ Ти́:

Ра́дуйся, христіа́номъ Помо́щнице и милосе́рдая о грѣ́шныхъ Предста́тельнице.

Икосъ 1

Арха́нгелъ Гавріи́лъ съ небесе́ по́сланъ бы́сть отъ Тебе́, Богоро́дице, къ смире́нному послу́шнику горы́ Аѳо́нскія, въ пусты́ннѣй ке́ліи воспѣва́ющему Ти́ хвале́бныя пѣ́сни предъ свято́ю Твое́ю ико́ною, да научи́тъ его́ пѣ́ти пѣ́снь небе́сную, е́юже славосло́вятъ Тя́ а́нгели въ Сіо́нѣ го́рнемъ. Тѣ́мже и мы́, до́льніи, воспомина́я таково́е Твое́ о лю́дехъ благопомышле́ніе, со благодаре́ніемъ вопіе́мъ Ти́ си́це:

Ра́дуйся, досто́йно восхваля́емая отъ арха́нгелъ и а́нгелъ; ра́дуйся, ублажа́емая отъ всѣ́хъ небе́сныхъ си́лъ. Ра́дуйся, Присноблаже́нная и Пренепоро́чная; ра́дуйся, Ма́терь Бо́га на́шего. Ра́дуйся, Честнѣ́йшая херуви́мъ; ра́дуйся, Сла́внѣйшая безъ сравне́нія серафи́мъ. Ра́дуйся, безъ истлѣ́нія Бо́га Сло́ва ро́ждшая; ра́дуйся, вои́стину су́щая Богоро́дице. Ра́дуйся, велича́емая на небеси́ и на земли́; ра́дуйся, воспѣва́емая го́рними и до́льними. Ра́дуйся, еди́на благослове́нная въ жена́хъ; ра́дуйся, израсти́вшая на́мъ Пло́дъ живота́.

Ра́дуйся, христіа́номъ Помо́щнице и милосе́рдая о грѣ́шныхъ Предста́тельнице.

Конда́къ 2

Ви́дѣвъ послу́шникъ пусты́нный ди́внаго прише́льца, въ ке́лію его́ прише́дшаго и пѣ́снь пресла́дкую Тебѣ́, Влады́чице, воспѣ́вшаго, не уразумѣ́ въ не́мъ а́нгела бы́ти, но зѣло́ услади́ся пѣ́ніемъ его́ небе́снымъ и проси́, да напи́шетъ ему́ словеса́ пое́мыя пѣ́сни. Егда́ же узрѣ́, я́ко подъ пе́рстомъ его́ ка́менная дска́ умягчи́ся, и пи́шемая словеса́ на не́й углуби́шася я́ко на песцѣ́, позна́ въ се́мъ чуде́сное дѣ́йство, и возопи́ къ Ро́ждшемуся отъ Тебе́ Бо́гу Сло́ву: Аллилу́ія.

Икосъ 2

Ра́зумомъ богоозаре́ннымъ но́вую пѣ́снь открыва́я, рече́ арха́нгелъ послу́шнику, я́ко та́ко воспѣва́ютъ Тя́, Богоро́дице, а́нгеловъ ли́цы въ оби́телехъ го́рнихъ, и повелѣ́ ему́, да возвѣсти́тъ человѣ́комъ словеса́ пѣ́сни небе́сныя и научи́тъ и́хъ ангелопо́добно пѣ́ти Тебѣ́:

Ра́дуйся, благода́тная Марíе; ра́дуйся, я́ко Госпо́дь съ Тобо́ю. Ра́дуйся, благослове́нная въ жена́хъ; ра́дуйся, неискусобра́чная Роди́тельнице Бо́га Сло́ва. Ра́дуйся, непоро́чное селе́ніе Ду́ха Свята́го; ра́дуйся, зача́тіе несказа́нное яви́вшая. Ра́дуйся, рождество́ нетлѣ́нное показа́вшая; ра́дуйся, Ма́терію и Дѣ́вою пребы́вшая. Ра́дуйся, во обою́ непоро́чно и свя́то Себе́ сохра́ншая; ра́дуйся, а́нгеловъ чистото́ю Твое́ю превзоше́дшая. Ра́дуйся, го́рнихъ умо́въ непрестаю́щее удивле́ніе; ра́дуйся, человѣ́ческаго ро́да возвыше́ніе.

Ра́дуйся, христіа́номъ Помо́щнице и милосе́рдая о грѣ́шныхъ Предста́тельнице.

Конда́къ 3

Си́лою Бо́жіею Гавріи́лъ арха́нгелъ тве́рдый ка́мень въ мя́гкій во́скъ претвори́ и на не́мъ пе́рстомъ свои́мъ написа́ словеса́ пѣ́сни хвале́бныя Тебѣ́, Богоро́дице, да вси́ позна́ютъ вели́кое чу́до и несумнѣ́нно увѣ́руютъ, я́ко та́ко вои́стину воспѣва́ютъ Тя́ горѣ́ си́лы небе́сныя, и́мже подража́юще, и мы́ пое́мъ вели́чія Твоя́, Дѣ́во, и въ ра́дости духо́внѣй вопіе́мъ просла́вльшему Тя́ Бо́гу: Аллилу́ія.

Икосъ 3

Имѣ́я простоту́ душе́вную и непоро́чное се́рдце, послу́шникъ смире́нный сподо́бися а́нгельскія бесѣ́ды и лицезрѣ́нія чинонача́льника го́рнихъ си́лъ. Мы́ же, лука́вствомъ и зло́бою потемне́нніи, со тре́петомъ взира́юще на святу́ю ико́ну Твою́, Влады́чице, мо́лимъ Ти ся прилѣ́жно: обрати́ ны отъ зло́бъ на́шихъ и научи́ на́съ во смире́ніи и кро́тости ду́ха глаго́лати Тебѣ́:

Ра́дуйся, го́ру Аѳо́нскую освяти́вшая Твои́мъ благода́тнымъ прису́тствіемъ; ра́дуйся, хо́лмы и де́бри ея́ испо́лнившая сла́вою Твои́хъ чуде́съ. Ра́дуйся, а́нгельскаго явле́нія сподо́бльшая пустынножи́тельство Аѳо́нское; ра́дуйся, оби́тели и́ноческія въ не́мъ умно́жившая во спасе́ніе ду́шъ человѣ́ческихъ. Ра́дуйся, и всѣ́мъ въ постѣ́ и моли́твѣ обѣща́вшая Твое́ заступле́ніе; ра́дуйся, отъ треволне́нія мо́ря жите́йскаго спаса́ющая ка́ющихся. Ра́дуйся, благода́ть Сы́на Твоего́ и Бо́га низводя́щая на мѣста́, Тебѣ́ посвяща́емыя; ра́дуйся, ра́й мы́сленный показа́вшая хра́мы Бо́жіи. Ра́дуйся, приста́нище небу́рное содѣва́ющая въ о́нѣхъ и́щущимъ спасе́нія; ра́дуйся, всѣ́мъ потре́бнымъ ко благоче́стію на́съ снабдѣва́ющая. Ра́дуйся, жи́тельствующимъ богоуго́дно Пода́тельнице бла́гъ вре́менныхъ и вѣ́чныхъ; ра́дуйся, Хода́таице на́мъ Ца́рствія небе́снаго.

Ра́дуйся, христіа́номъ Помо́щнице и милосе́рдая о грѣ́шныхъ Предста́тельнице.

Конда́къ 4

Бу́ря недоумѣ́нія смути́ ста́рца и́нока, егда́ услы́ша пѣ́снь но́ву и чу́дну изъ у́стъ своего́ ученика́, и узрѣ́ дску́ ка́менну, я́ко во́скъ, начерта́ніе пріи́мшу. Егда́ же увѣ́да о посѣще́ніи ди́внаго посѣти́теля, Гавріи́ломъ наре́кшагося, уразумѣ́, я́ко то́й се́й е́сть, и́же дре́вле благовѣсти́ Тебѣ́, Дѣ́во, безсѣ́менное зача́тіе Бо́га Сло́ва. Тѣ́мже, велича́я вели́чія Твоя́, Цари́це го́рнихъ и до́льнихъ, воспѣва́ше ра́достно а́нгеловъ и человѣ́ковъ Творцу́: Аллилу́ія.

Икосъ 4

Слы́шавше о посѣще́ніи арха́нгеловѣ и́ноцы горы́ Аѳо́нскія, стека́хуся ви́дѣти дску́, на не́йже преесте́ственно начерта́на бы́ша письмена́ пѣ́сни небе́сныя, и воспѣва́ху Тя́ благоговѣ́йно предъ свято́ю ико́ною Твое́ю, Влады́чице, предъ не́юже воспѣ́тъ Тя́ арха́нгелъ. Пріими́ у́бо и на́ша приноси́мыя Тебѣ́ моли́твы съ пѣ́ніемъ таковы́мъ:

Ра́дуйся, я́ко о Тебѣ́ ра́дуется а́нгельскій собо́ръ; ра́дуйся, я́ко о Тебѣ́ торжеству́етъ человѣ́ческій ро́дъ. Ра́дуйся, на руку́ Твое́ю носи́вшая Нося́щаго вся́ческая; ра́дуйся, вмѣсти́вшая во чре́вѣ Твое́мъ Невмѣсти́маго всѣ́мъ мíромъ. Ра́дуйся, Созда́телю Твоему́ пло́ть заимода́вшая; ра́дуйся, Краснѣ́йшаго па́че всѣ́хъ сыно́въ человѣ́ческихъ ро́ждшая. Ра́дуйся, млеко́мъ пита́вшая Пита́ющаго вся́ческая; ра́дуйся, попече́ніе имѣ́вшая о Сы́нѣ Твое́мъ, су́щемъ Промысли́телѣ всея́ тва́ри. Ра́дуйся, похвало́ дѣ́вства; ра́дуйся, ма́терей сла́во. Ра́дуйся, въ рождествѣ́ дѣ́вство сохра́ньшая; ра́дуйся, рождество́ съ дѣ́вствомъ сочета́вшая.

Ра́дуйся, христіа́номъ Помо́щнице и милосе́рдая о грѣ́шныхъ Предста́тельнице.

Конда́къ 5

Богови́децъ Моисе́й иногда́ на ка́менныхъ скрижа́лехъ Зако́нъ Бо́жій, начерта́нный пе́рстомъ Бо́жіимъ, получи́, и́ноцы же горы́ Аѳо́нскія пѣ́снь небе́сную во сла́ву Богома́тере, на дскѣ́ ка́меннѣй начерта́нную, отъ арха́нгела прія́ша и, си́мъ науче́нніи а́нгельское славосло́віе Тебѣ́ приноси́ти, воспѣ́ша та́ко благоволи́вшему о ни́хъ Бо́гу: Аллилу́ія.

Икосъ 5

Ви́дѣвше нача́льницы горы́ Аѳо́нскія чу́до ве́ліе въ явле́ніи арха́нгеловѣ и пѣ́сни но́вѣй, дску́ съ начерта́нными отъ а́нгела письмены́ препроводи́ша къ царю́ и патріа́рху Царягра́да, во увѣре́ніе и́стины пресла́внаго сего́ чудесе́. Тíи же ра́достно прія́ша ю́, я́ко зало́гъ благоволе́нія Бо́жія во все́й Це́ркви Правосла́внѣй, узако́ниша воспѣва́ти пѣ́снь а́нгельскую въ похвалу́ Тебѣ́, Богоро́дице, и взыва́ху Ти́ во умиле́ніи си́це:

Ра́дуйся, преукраше́нная лѣ́потамнъ всѣ́хъ добродѣ́телей, Дѣ́во; ра́дуйся, Невѣ́сто неневѣ́стная. Ра́дуйся, возрасти́вшая Цвѣ́тъ неувяда́емый - Христа́; ра́дуйся, раю́ слове́сный, Дре́во жи́зни на́мъ прозя́бшая. Ра́дуйся, сѣ́не небе́сная, отъ зно́я страсте́й на́съ сохраня́ющая; ра́дуйся, покро́ве мíру, ши́ршій о́блака. Ра́дуйся, дре́во благосѣнноли́ственное, прохла́ду спаси́тельную вѣ́рнымъ подаю́щее; ра́дуйся, исто́чниче воды́ живы́я, отъ нея́же пія́й ктому́ не умира́етъ. Ра́дуйся, Судіи́ пра́веднаго умоле́ніе; ра́дуйся, грѣхо́въ на́шихъ проще́ніе. Ра́дуйся, во сла́вѣ небе́снѣй одесну́ю Бо́га пребыва́ющая; ра́дуйся, земноро́дныхъ милосе́рдіемъ Твои́мъ не оставля́ющая.

Ра́дуйся, христіа́номъ Помо́щнице и милосе́рдая о грѣ́шныхъ Предста́тельнице.

Конда́къ 6

Проповѣ́дуетъ свята́я Це́рковь вели́чіе чуде́съ Твои́хъ, Марíе Богоро́дице, и свѣ́тло красу́ется, воспѣва́я Ти́ пѣ́снь а́нгельскую, отъ небе́съ на зе́млю принесе́нную чинонача́льникомъ го́рнихъ си́лъ Гавріи́ломъ. Съ ни́мже помоли́ся, Госпоже́ Пречи́стая, къ Сы́ну Твоему́ и Бо́гу, да незы́блему во благоче́стіи сохрани́тъ Це́рковь Свою́ и посрами́тъ вся́ воста́нія ерети́ческая и раско́льническая, на́съ же, ча́дъ Ея́, сподо́битъ неосужде́нно воспѣва́ти Ему́: Аллилу́ія.

Икосъ 6

Возсія́ла еси́ мно́гими луча́ми чуде́съ, о ми́лостивая Богома́ти, чре́зъ святу́ю ико́ну Твою́, Влады́чице, и си́ми не то́чію го́ру Аѳо́нскую, но и мно́жайшіи мѣста́ озари́ла еси́, да научи́мся зва́ти Тебѣ́:

Ра́дуйся, Ра́досте на́ша, услажда́ющая ско́рбныя сердца́, къ Тебѣ́ отве́рстыя; ра́дуйся, блага́я Засту́пнице, на по́мощь къ на́мъ ускоря́ющая. Ра́дуйся, зало́гъ спаси́тельный на́мъ въ ико́нѣ Твое́й дарова́вшая; ра́дуйся, Аѳо́нскую го́ру и мно́гія стра́ны е́ю просла́вльшая. Ра́дуйся, Наде́ждо на́ша извѣ́стная; ра́дуйся, упова́ніе на́ше непосты́дное. Ра́дуйся, скорбе́й на́шихъ разрѣше́ніе; ра́дуйся, печа́лей на́шихъ утоле́ніе. Ра́дуйся, вѣ́ры правосла́вныя утвержде́ніе; ра́дуйся, невѣ́рія и зловѣ́рія посрамле́ніе. Ра́дуйся, любве́ Боже́ственныя явле́ніе; ра́дуйся, чуде́съ пресла́вныхъ соверше́ніе.

Ра́дуйся, христіа́номъ Помо́щнице и милосе́рдая о грѣ́шныхъ Предста́тельнице.

Конда́къ 7

Хотя́щимъ жа́ти спасе́ніе ми́лостивая Покрови́тельница и Помо́щница явля́ешися, Ма́ти Бо́жія, и при́сно хода́тайствуеши за ни́хъ къ Сы́ну Твоему́ и Бо́гу. Аще бо кто́ и па́даетъ въ нѣ́кое согрѣше́ніе, не́мощію пло́ти обложе́нъ, оба́че Тобо́ю возста́ніе получа́етъ во спасе́ніе, я́ко всѣ́мъ хо́щеши спасти́ся и въ ра́зумъ и́стины пріити́ воспѣва́ющимъ Христу́ Бо́гу: Аллилу́ія.

Икосъ 7

Но́во не́бо и нова́ земля́ угото́ваны отъ Сы́на Твоего́ и Бо́га лю́бящимъ Его́, Госпоже́ Всеблага́я, къ ни́мже стяжа́хомъ Тя́ Путеводи́тельницу изря́дну. Тѣ́мже мо́лимъ Тя́, не попусти́ на́съ поги́бнути въ де́брехъ грѣхо́вныхъ, но приведи́ на́съ стезе́ю пра́вою въ страну́ свѣ́та и ра́дости вѣ́чныя, да Тебѣ́ вопіе́мъ хвале́бно:

Ра́дуйся, Сіо́на го́рняго пе́рвѣйшее украше́ніе; ра́дуйся, оби́телей до́льнихъ присногото́вое заступле́ніе. Ра́дуйся, земле́ блага́я, Кла́съ спаси́тельный мíру израсти́вшая; ра́дуйся, ни́во неора́нная, оплодотворе́нная Ду́хомъ Святы́мъ. Ра́дуйся, о́гнь Божества́ во чре́во Твое́ пріе́мшая; ра́дуйся, гла́дъ па́дшаго человѣ́чества Хлѣ́бомъ жи́зни утоли́вшая. Ра́дуйся, престо́ле Царя́ сла́вы; ра́дуйся, пала́то преукраше́нная Вседержи́теля. Ра́дуйся, хра́ме одушевле́нный Тріѵпоста́снаго Бо́га; ра́дуйся, две́ре Госпо́дня, е́юже Сы́нъ Бо́жій про́йде къ на́мъ.

Ра́дуйся, христіа́номъ Помо́щнице и милосе́рдая о грѣ́шныхъ Предста́тельнице.

Конда́къ 8

Стра́нное явле́ніе арха́нгела, на горѣ́ Аѳо́нстѣй иногда́ бы́вшее, смотре́ніе бы́сть боже́ственное, и́мже просла́вися всепѣ́тое и́мя Твое́, Марíе Богоро́дице, и вси́ вѣ́рніи научи́шася ангелоподо́бно воспѣва́ти Тя́, херуви́мовъ Честнѣ́йшую и серафи́мовъ Сла́внѣйшую Ма́терь Бо́га на́шего, о Не́йже ра́дуется вся́кая тва́рь, и ро́дъ человѣ́ческій благода́рно взыва́етъ ко Го́споду: Аллилу́ія.

Икосъ 8

Все́ упова́ніе на́ше на Тя́ возлага́емъ, Ма́ти Бо́жія, и въ ско́рбехъ на́шихъ къ святѣ́й ико́нѣ Твое́й усе́рдно притека́емъ, ча́юще отъ нея́ утѣше́ніе благода́тное получи́ти. Помози́ у́бо на́мъ, Влады́чице, съ терпѣ́ніемъ и благодаре́ніемъ вся́кія ско́рби переноси́ти и вмѣ́сто ро́пота малоду́шнаго благоумиле́нно взыва́ти Тебѣ́:

Ра́дуйся, всѣ́хъ скорбя́щихъ Ра́досте; ра́дуйся, всѣ́хъ печа́льныхъ Утѣше́ніе. Ра́дуйся, тружда́ющихся и обремене́нныхъ сла́дкій Поко́е; ра́дуйся, болѣ́знующихъ и огорче́нныхъ живи́тельная Отра́до. Ра́дуйся, въ ча́съ ско́рбныхъ недоумѣ́ній мы́сль благу́ю на се́рдце полага́ющая; ра́дуйся, во дни́ уны́нія наде́ждою вѣ́чныхъ бла́гъ воодушевля́ющая. Ра́дуйся, искуша́емымъ ру́ку по́мощи простира́ющая; ра́дуйся, гнѣ́въ Бо́жій отъ гла́въ на́шихъ отводя́щая. Ра́дуйся, ми́рное устрое́ніе обурева́емымъ напа́стьми подаю́щая; ра́дуйся, во благи́хъ жела́нія на́ша ди́вно исполня́ющая. Ра́дуйся, терпѣли́выхъ страда́льцевъ дара́ми благода́тными увѣнчава́ющая; ра́дуйся, всѣ́хъ благоподвиза́ющихся блаже́нства ра́йскаго сподобля́ющая.

Ра́дуйся, христіа́номъ Помо́щнице и милосе́рдая о грѣ́шныхъ Предста́тельнице.

Конда́къ 9

Вси́ а́нгели небе́сніи немо́лчными похвала́ми Тя́ ублажа́ютъ, Цари́це и Влады́чице всея́ тва́ри, мы́ же, земнíи и пе́рстніи, ку́ю похвалу́ досто́йную принесе́мъ Ти́, Всепѣ́тая? Оба́че надѣ́ющеся на милосе́рдіе Твое́ неисче́тное, любо́вію къ Тебѣ́ понужда́еми, пое́мъ чудеса́ Твоя́, проповѣ́дуемъ благодѣя́нія Твоя́, славосло́вимъ и́мя Твое́ и, усе́рдно припа́дая ко святѣ́й ико́нѣ Твое́й, ра́бски вопіе́мъ изображе́нному на не́й вку́пѣ съ Тобо́ю Богомладе́нцу Христу́: Аллилу́ія.

Икосъ 9

Витíй ри́торскіи глаго́лы недово́льны къ пѣ́нію чуде́съ Твои́хъ, Богоро́дице, оба́че блага́я су́щи, вѣ́ру на́шу вмѣ́сто ри́торскаго благослове́сія ми́лостиво пріими́, вѣ́си бо и любо́вь на́шу, е́юже сердца́ на́ша къ Тебѣ́ испо́лнены. Тѣ́мже благоутро́бно услы́ши нехи́тростныя на́ша пѣ́сни, и́миже дерза́емъ благохвали́ти Тя́ си́це:

Ра́дуйся, сопресто́льное Отцу́ Сло́во въ ложесна́хъ Твои́хъ вмѣсти́вшая; ра́дуйся, Свѣ́тъ незаходи́мый ро́ждшая. Ра́дуйся, жи́знь вѣ́чную мíру дарова́вшая рождество́мъ Твои́мъ; ра́дуйся, Превѣ́чнаго, я́ко Младе́нца, на руку́ Твое́ю носи́вшая. Ра́дуйся, гра́де одушевле́нный Всецаря́; ра́дуйся, ски́ніе освяще́нная Жива́го Бо́га. Ра́дуйся, ни́жняя сочета́вшая съ вы́шними; ра́дуйся, Миротво́рице, Боже́ственнаго ми́ра преиспо́лненная. Ра́дуйся, до́брыхъ вино́вная; ра́дуйся, злы́хъ премѣне́ніе. Ра́дуйся, ору́жіе на враги́ всекрѣ́пкое; ра́дуйся, щи́те вѣ́рныхъ несокруши́мый.

Ра́дуйся, христіа́номъ Помо́щнице и милосе́рдая о грѣ́шныхъ Предста́тельнице.

Конда́къ 10

Спаси́тельное прибѣ́жище отъ суе́тъ мíра преле́стнаго яви́ся жре́бій Тво́й земны́й, свята́я вои́стину гора́ Аѳо́нская, Богоро́дице Дѣ́во, ознаменова́нная мно́гими Твои́ми чудесы́. Но и на вся́комъ мѣ́стѣ съ любо́вію призыва́ющихъ Тя́ услы́ши и заступи́. Сы́на же Твоего́ умоля́ти не преста́й, Всеблага́я, да не отсту́пна пребыва́етъ благода́ть Его́ отъ мѣ́стъ, идѣ́же въ собра́ніи вѣ́рныхъ пое́тся Ему́ хвале́бная пѣ́снь: Аллилу́ія.

Икосъ 10

Стѣна́ еси́ дѣ́вственникомъ, Преблагослове́нная Дѣ́во, и сто́лпъ крѣ́покъ отъ лица́ вра́жія всѣ́мъ подви́жникомъ благоче́стія: Тебѣ́ бо даде́ся ве́лія си́ла, те́мныя а́дскія си́лы побѣжда́ти и отъ искуше́ній и́хъ душепа́губныхъ человѣ́ки избавля́ти, наипа́че же тѣ́хъ, и́же цѣлому́дренно и свя́то на земли́ пребыва́ютъ. Сего́ ра́ди дѣ́вства и цѣлому́дрія рачи́тели согла́сно Тебѣ́ зову́тъ:

Ра́дуйся, чистото́ю сія́ющая па́че со́лнца; ра́дуйся, дѣ́вства нача́ло и освяще́ніе. Ра́дуйся, кри́не, облагоуха́вшій па́дшее человѣ́чество; ра́дуйся, во смире́ніи Твое́мъ осѣне́нная благоволе́ніемъ Всевы́шняго. Ра́дуйся, вѣ́рная рабо́ Госпо́дня; ра́дуйся, я́ко Тя́ блажа́тъ вси́ ро́ди. Ра́дуйся, я́ко сотвори́ Ти́ вели́чіе Си́льный; ра́дуйся, я́ко соца́рствуеши съ Сы́номъ Твои́мъ во сла́вѣ вѣ́чнѣй. Ра́дуйся, Хода́таице Бо́жія къ лю́демъ благоволе́нія; ра́дуйся, грѣ́шныхъ къ Бо́гу дерзнове́ніе окриля́ющая. Ра́дуйся, неистощи́мый исто́чниче ми́лостей и щедро́тъ; ра́дуйся, преиспо́лненная сострада́нія къ стра́ждущимъ.

Ра́дуйся, христіа́номъ Помо́щнице и милосе́рдая о грѣ́шныхъ Предста́тельнице.

Конда́къ 11

Пѣ́ніе на́ше, а́ще бы́ло бы и тмочи́сленное, не довлѣ́ло бы къ досто́йному прославле́нію ми́лостей Твои́хъ, Преблагослове́нная Ма́ти Бо́жія, я́же непреста́нно излива́еши ро́ду на́шему. Оба́че, да не неблагода́рни яви́мся предъ Тобо́ю, по си́лѣ на́шей похва́льная воспису́емъ Ти́ съ вѣ́рою и любо́вію и, воспомина́я неисче́тная чудотворе́нія Твоя́, вопіе́мъ верхо́вному Творцу́ чуде́съ Бо́гу: Аллилу́ія.

Икосъ 11

Свѣтопода́тельными луча́ми чуде́съ ико́на Твоя́, о Всеми́лостивая Влады́чице, на святѣ́й горѣ́ Аѳо́нстѣй и повсю́ду немерца́емо сія́етъ и ве́сь мíръ правосла́вный благода́тно просвѣща́етъ. Сего́ ра́ди гряду́тъ къ не́й отъ лѣ́тъ дре́внихъ на поклоне́ніе правосла́вныхъ собо́ри, умиле́нно воспѣва́я предъ не́ю благохвале́нія Ти́ такова́я:

Ра́дуйся, Царя́ Христа́ мíру яви́вшая; ра́дуйся, на ико́нѣ Твое́й вку́пѣ съ Ни́мъ изображе́нная. Ра́дуйся, клеще́ таи́нственная, Иса́іею прови́дѣнная; ра́дуйся, купино́ неопали́мая, богови́дцемъ Моисе́емъ предзри́мая. Ра́дуйся, руно́ ороше́нное Гедео́на; ра́дуйся, ча́ще пріосѣне́нная, Авваку́момъ воспѣ́тая. Ра́дуйся, две́ре затворе́нная, Іезекіи́лю показа́нная; ра́дуйся, горо́ несѣко́мая, Даніи́лу явле́нная. Ра́дуйся, многообра́знѣ отъ проро́къ предвозвѣще́нная; ра́дуйся, проро́ческихъ рече́ній сбытіе́ яви́вшая.

Ра́дуйся, христіа́номъ Помо́щнице и милосе́рдая о грѣ́шныхъ Предста́тельнице.

Конда́къ 12

Благода́ти прича́стная Твоя́ ико́на, Богоро́дице Дѣ́во, я́ко сокро́вище драгоцѣ́нное, Це́ркви Христо́вой отъ Тебе́ подаде́ся, въ не́й бо обѣща́лася еси́ съ на́ми бы́ти до сконча́нія вѣ́ка, ре́кши о первонапи́саннѣй Твое́й ико́нѣ: "Съ не́ю благода́ть Моя́ и си́ла!" Вѣ́руемъ, Всепѣ́тая, я́ко не оскудѣ́етъ глаго́лъ Тво́й се́й, и я́ко во ико́нѣ Твое́й святѣ́й на вся́цѣмъ мѣ́стѣ и здѣ́ съ на́ми пребыва́еши, идѣ́же вѣ́рно пое́тся Сы́ну Твоему́ и Бо́гу хвале́бная пѣ́снь: Аллилу́ія.

Икосъ 12

Пою́ще чудеса́ Твоя́, Богоро́дице, припа́даемъ усе́рдно ко святѣ́й ико́нѣ Твое́й, лобза́емъ ю́ съ серде́чною любо́вію, и я́ко при́сно су́щей съ на́ми, мо́лимъ Ти ся: воззри́ на ны́ милосе́рдіемъ Твои́мъ, Ма́ти Бо́жія, и я́коже Тя́ зри́мъ ны́нѣ на ико́нѣ изображе́нную, та́ко сподо́би на́съ узрѣ́ти Тя́ въ ча́съ гро́зный сме́ртный, отъ руки́ діа́воли на́съ исхища́ющую и въ Ца́рствіе Христо́во приводя́щую ны́, держа́вною десни́цею Твое́ю, да Тебѣ́ благода́рственно взыва́емъ:

Ра́дуйся, по Бо́зѣ пе́рвое на́ше прибѣ́жище и покро́ве; ра́дуйся, ма́тернею любо́вію Твое́ю ве́сь мíръ христіа́нскій объе́млющая. Ра́дуйся, во свято́мъ житіи́ вѣ́рныя утвержда́ющая; ра́дуйся, благу́ю христіа́нскую кончи́ну и́мъ подаю́щая. Ра́дуйся, отъ вла́сти лю́таго міроде́ржца упова́ющія на Тя́ избавля́ющая; ра́дуйся, на мыта́рствахъ возду́шныхъ заступа́ющая сла́вящихъ Тя́. Ра́дуйся, врата́ ра́йская на́мъ отверза́ющая; ра́дуйся, Ца́рствіе небе́сное лю́бящимъ Тя́ хода́тайствующая. Ра́дуйся, во сла́вѣ небе́снѣй присѣдя́щая Сы́ну Твоему́ и Бо́гу; ра́дуйся, во обще́ніе сла́вы Его́ и чту́щія Тя́ вводя́щая. Ра́дуйся, тѣле́съ на́шихъ здра́віе; ра́дуйся, ду́шъ на́шихъ спасе́ніе.

Ра́дуйся, христіа́номъ Помо́щнице и милосе́рдая о грѣ́шныхъ Предста́тельнице.

Конда́къ 13

О, Всепѣ́тая Ма́ти, ро́ждшая святы́хъ Святѣ́йшее Сло́во, отъ а́нгелъ воспѣва́емая на небеси́ и отъ человѣ́къ сла́вимая на земли́! Пріими́ ми́лостиво сіе́ ма́лое моле́ніе на́ше и да́руй душе́вное спасе́ніе и тѣле́сное здра́віе всѣ́мъ, вѣ́рно чту́щимъ Тя́ и пою́щимъ Бо́гу: Аллилу́ія.

Се́й конда́къ глаго́лется три́жды. Та́же Икосъ 1-й и Конда́къ 1-й

Моли́тва ко Пресвятѣ́й Богоро́дицѣ "Ми́лующей"

О, Пресвята́я и Преми́лостивая Влады́чице Богоро́дице! Припа́дая къ святѣ́й ико́нѣ Твое́й, смире́нно мо́лимся Тебѣ́: вонми́ гла́су моле́нія на́шего, ви́ждь ско́рби, ви́ждь бѣды́ на́ша и, я́ко любвеоби́льная Ма́ти, потщи́ся на по́мощь на́мъ безпомо́щнымъ, умоли́ Сы́на Твоего́ и Бо́га на́шего, да не погу́битъ на́съ за беззако́нія на́ша, но яви́тъ на́мъ человѣколю́бно Свою́ ми́лость. Испроси́ на́мъ, Влады́чице, у бла́гости Его́ тѣле́сное здра́віе и душе́вное спасе́ніе, и ми́рное житіе́, земли́ плодоно́сіе, возду́ха благорастворе́ніе, и благослове́ніе свы́ше на вся́ блага́я дѣла́ и начина́нія на́ша. Правосла́вному же Импера́тору на́шему [и́мярекъ] на вся́ враги́ побѣ́ду и одолѣ́ніе. И, я́коже дре́вле призрѣ́ла еси́ ми́лостиво на смире́нное славосло́віе послу́шника аѳо́нскаго, воспѣва́вшаго Тя́ предъ пречи́стою ико́ною Твое́ю и посла́ла еси́ къ нему́ а́нгела научи́ти его́ пѣ́ти пѣ́снь небе́сную, е́юже славосло́вятъ Тя́ а́нгели, та́ко и ны́нѣ пріими́ на́ше усе́рдное молитвосло́віе, Тебѣ́ приноси́мое. О, Цари́це Всепѣ́тая! Простри́ ко Го́споду богоно́сныя Твоя́ ру́цѣ, и́миже Богомладе́нца Іису́са Христа́ носи́ла еси́, и умоли́ Его́ изба́вити на́съ отъ вся́каго зла́. Яви́, Влады́чице, Твою́ ми́лость къ на́мъ: боля́щія исцѣли́, скорбя́щія утѣ́ши, бѣ́дствующимъ помози́ и сподо́би на́съ благоче́стно житіе́ сіе́ земно́е соверши́ти, христіа́нскую непосты́дную кончи́ну получи́ти и небе́сное Ца́рствіе наслѣ́дити ма́тернимъ хода́тайствомъ Твои́мъ къ Ро́ждшемуся отъ Тебе́ Христу́ Бо́гу на́шему. Ему́же со Безнача́льнымъ Его́ Отце́мъ и Пресвяты́мъ Ду́хомъ подоба́етъ вся́кая сла́ва, че́сть и поклоне́ніе, ны́нѣ и при́сно, и во вѣ́ки вѣко́въ. Ами́нь.

Тропа́рь, гла́съ 4

Притеце́мъ, вѣ́рніи, со дерзнове́ніемъ къ ми́лующей Цари́цѣ Богоро́дицѣ и умиле́нно воззове́мъ къ Не́й: низпосли́ на ны́ ми́лости Твоя́ бога́тыя: благовѣ́рнаго Импера́тора на́шего во здра́віи и благоде́нствіи соблюди́, гра́дъ се́й изба́ви отъ вся́каго обстоя́нія, ми́ръ да́руй мíрови и спасе́ніе душа́мъ на́шимъ.

Инъ тропа́рь, гла́съ то́йже

Отце́въ собери́теся всеаѳо́нское мно́жество, вѣ́рно пра́зднующе, дне́сь, ра́дующеся и свѣ́тло восклица́юще вси́ въ весе́ліи: Бо́жія бо Ма́ти ны́нѣ отъ а́нгела пресла́вно воспѣва́ется. Тѣ́мже, я́ко Богоро́дицу, при́сно Сію́ сла́вимъ.

Конда́къ, гла́съ 8

Арха́нгельскій гла́съ вопіе́мъ Ти́, Всецари́цѣ: досто́йно е́сть, я́ко вои́стину, блажи́ти Тя́, Богоро́дицу, Присноблаже́нную и Пренепоро́чную и Ма́терь Бо́га на́шего.

Инъ конда́къ, гла́съ 4

Пра́зднуетъ дне́сь ве́сь Аѳо́нъ, я́ко пѣ́снь прія́тъ отъ а́нгела чу́дно Тебѣ́, Чи́стѣй Богома́тери, Юже вся́ тва́рь чти́тъ, сла́вящи.

Велича́ніе

Досто́йно е́сть велича́ти Тя́, Богоро́дице, Честнѣ́йшую херуви́мъ и Сла́внѣйшую безъ сравне́нія серафи́мъ.