Конда́къ 1

Взбра́нной Воево́дѣ, Боголюби́вой Цари́цѣ, превы́сшей вся́каго созда́нія, Дѣ́вѣ и Ма́тери Христа́ Бо́га, похва́льная воспису́емъ Ти́ раби́ Твои́, Богоро́дице! Ты́ же, я́ко Боголюби́вая и Всеми́лостивая Ма́ти, благоизво́лившая яви́ти пресвѣ́тлый Сво́й ли́къ благовѣ́рному на́шему кня́зю Андре́ю, идѣ́же ны́нѣ е́сть Боголюби́вая оби́тель, отъ вся́кихъ бѣ́дъ и скорбе́й сохрани́ ны́ и оби́тель Твою́ сію́, да зове́мъ Ти́:

Ра́дуйся, Боголюби́вая Цари́це Богоро́дице, Наде́ждо и Прибѣ́жище на́ше.

Икосъ 1

Ангеловъ превы́сшую, вся́ небе́сныя си́лы велича́ютъ Тя́, Богоро́дицу Цари́цу, мы́ же, грѣ́шніи, на земли́, дивя́щеся чу́дному Бо́жію о Тебѣ́ смотрѣ́нію, все́ю душе́ю, се́рдцемъ и устна́ми дерза́емъ глаго́лати:

Ра́дуйся, благослове́нная въ жена́хъ Дѣ́во Благода́тная. Pа́дуйся, Ма́ти Всевы́шняго, Ду́ха Свята́го пребыва́ніе. Ра́дуйся, Цари́це небесе́ и земли́ и всѣ́хъ небе́сныхъ си́лъ вы́сшая. Pа́дуйся, а́нгелы чти́мая, отъ серафи́мъ воспѣва́емая. Ра́дуйся, благословля́емая на небеси́ и сла́вимая на земли́. Pа́дуйся, вои́стинну Присноблаже́нная и Пренепоро́чная.

Ра́дуйся, Боголюби́вая Цари́це Богоро́дице, Наде́ждо и Прибѣ́жище на́ше.

Конда́къ 2

Ви́дящи Премилосе́рдная Ма́терь Бо́жія земно́е ско́рбное житіе́ на́ше, не́мощи и болѣ́зни, благоизво́ли яви́ти чу́до, избра́въ сосу́дъ благода́ти и ми́лостей Свои́хъ къ на́мъ - благочести́ваго кня́зя Андре́я. Оба́че и мы́ съ несказа́нною ра́достію припа́даемъ къ Тебѣ́, Влады́чице, и изъ глубины́ души́ благодари́мъ Тя́, на́шу ди́вную Засту́пницу, воспѣва́юще Бо́гу: Аллилу́ія.

Икосъ 2

Разумѣ́ти хотя́ чу́до, явле́нное ми́лостію Твое́ю, Пресвята́я Богоро́дице, егда́ ко́ни, ве́зшіи святы́й о́бразъ, ста́ша и лю́діе не возмого́ша подви́гнути и́хъ къ ше́ствію, благовѣ́рный кня́зь Андре́й нача́ со слеза́ми моли́тися къ Тебѣ́, Влады́чице, да пока́жеши, Пречи́стая, святу́ю во́лю Свою́, Ты́ же въ видѣ́ніи благоволи́ла еси́ откры́ти преблагíй совѣ́тъ Тво́й. Тѣ́мже и мы́, воспомина́юще чу́до сіе́, прекло́ньше колѣ́на, взыва́емъ си́це:

Ра́дуйся, просла́вившая мѣ́сто оби́тели сея́ ди́внымъ чудодѣ́йствіемъ и въ се́мъ преизоби́льную ми́лость на́мъ показа́вшая. Pа́дуйся, Влади́мірскую страну́ свѣ́томъ Свои́мъ озари́вшая и лучи́ свѣ́та на всѣ́хъ на́съ простира́ющая. Ра́дуйся, всеблага́я на́ша Наста́внице, любо́вію на́съ привлека́ющая. Pа́дуйся, Охрани́тельнице на́ша отъ бѣ́дъ и болѣ́зней. Ра́дуйся, у Го́спода спасе́нія на́шего Хода́таице, Цари́це на́ша Небе́сная. Pа́дуйся, науча́ющая на́съ благодаре́нію за всѣ́ Твои́ благодѣя́нія.

Ра́дуйся, Боголюби́вая Цари́це Богоро́дице, Наде́ждо и Прибѣ́жище на́ше.

Конда́къ 3

Си́ла Вы́шняго осѣня́етъ всѣ́хъ, съ вѣ́рою и благоговѣ́ніемъ притека́ющихъ къ Тебѣ́, Пречи́стая Госпоже́ Богоро́дице, и упова́ющихъ на Твою́ ми́лость, поне́же вся́кое благо́е проше́ніе пріе́млеши те́плѣ. Благовѣ́рный кня́зь моля́ше Тя́, Влады́чице, яви́ти во́лю Твою́, преиспо́лнився тре́пета предъ та́инствомъ Твоего́ о не́мъ произволе́нія. Та́кожде и мы́ прибѣга́емъ къ Тебѣ́, Пречи́стая, умиле́нно вопію́ще: Всеми́лостивая Покрови́тельнице на́ша, научи́ и на́съ прославля́ти всечестно́е и всехва́льное и́мя Твое́ и досто́йно воспѣва́ти Бо́гу: Аллилу́ія.

Икосъ 3

Имѣ́яй на пути́, я́ко боготе́чную звѣзду́, честны́й о́бразъ Тво́й, Влады́чице, благовѣ́рный кня́зь въ приле́жнѣй моли́твѣ свое́й предъ чудотво́рною Твое́ю ико́ною сподо́бися узрѣ́ти Тя́ я́вѣ, Цари́цу Небе́сную, и те́плое хода́тайство Твое́ Бо́гу приноша́ше о мѣ́стѣ се́мъ и о все́мъ мíрѣ. О, Бо́жія Ма́ти, Пречи́стая Богоро́дице! Со умиле́ніемъ припада́емъ и, ожида́я бога́тыя Твоея́ ми́лости, уми́льно вопіе́мъ Ти́:

Ра́дуйся, Ра́досте на́ша и крѣ́пкая Засту́пнице. Pа́дуйся, Покро́ве на́шъ и на́ше Утѣше́ніе. Ра́дуйся, Охрани́тельнице на́ша и на́ше Упова́ніе. Pа́дуйся, Отра́до на́ша и ди́вное о на́съ Попече́ніе. Ра́дуйся, Похвало́ на́ша, чудесы́ на́съ удивля́ющая. Pа́дуйся, Прибѣ́жище на́ше и зало́гъ вѣ́чнаго спасе́нія.

Ра́дуйся, Боголюби́вая Цари́це Богоро́дице, Наде́ждо и Прибѣ́жище на́ше.

Конда́къ 4

Недоумѣва́етъ у́мъ на́шъ, ка́ко досто́йно е́сть восхвали́ти Тя́ и ди́вное явле́ніе Твое́, Пресвята́я Влады́чице: я́ко со́лнце лучи́ испуща́ющи, предста́ла еси́ моля́щемуся кня́зю и та́ко рекла́ еси́: "не хощу́, да о́бразъ Мо́й несе́ши въ Росто́въ, но во Влади́мірѣ поста́ви Его́. На се́мъ мѣ́стѣ во и́мя Моего́ Рождества́ це́рковь воздви́гни и обита́лище и́нокомъ соста́ви". И, воздѣ́вши Свои́ боже́ственныя ру́ки ко Влады́чнему о́бразу, скры́ся отъ духо́вныхъ оче́съ его́. Преклоня́емъ и мы́ колѣ́на предъ Тобо́ю, Боголюби́вая Ма́ти, и помина́юще Твоя́ чу́дная явле́нія и велѣ́нія, изъ глубины́ души́ воспѣва́емъ Бо́гу: Аллилу́ія.

Икосъ 4

Слы́ша Госпо́дь моле́нія Твоя́, Богоизбра́нная Цари́це Небе́сная, обѣща́ вы́ну исполня́ти, я́ко Преблагíя Ма́тере, проше́нія Твоя́. Ты́ же, о Влады́чице, тогда́ рекла́ еси́ ко Го́споду усты́ Свои́ми: "Влады́ко Многоми́лостиве, Го́споди Іису́се Христе́, Сы́не и Бо́же Мо́й, молю́ Тя́, да пребу́детъ Боже́ственная благода́ть на лю́дехъ Твои́хъ, и свѣтоза́рный лу́чъ сла́вы Твоея́ да нисхо́дитъ всегда́ на мѣ́сто сіе́, Мно́ю избра́нное". Истинно исповѣ́дуемъ, о Пречи́стая, я́ко ско́ро помога́еши съ вѣ́рою къ Тебѣ́ прибѣга́ющимъ и, со умиле́ніемъ воспѣва́юще Тебѣ́, зове́мъ си́це:

Ра́дуйся, Моли́твеннице на́ша предъ Го́сподемъ и Сы́номъ Твои́мъ. Pа́дуйся, Засту́пнице всего́ ро́да человѣ́ческаго и Защи́тнице наро́да правосла́внаго. Ра́дуйся, всегда́ ма́тернюю любо́вь Твою́ на́мъ явля́ющая и вся́ блага́я на́мъ дару́ющая. Pа́дуйся, ра́дости на́мъ, благода́ти же и сла́вы, вѣ́чная Хода́таице, ди́вная на́ша Утѣ́шительнице. Ра́дуйся, бытіе́ оби́тели здѣ́ и ниспосла́ніе на ню́ благода́ти предвозвѣсти́вшая. Pа́дуйся, въ па́мять Твоего́ явле́нія хра́мъ во сла́ву Твоего́ Рождества́ устро́ити указа́вшая и та́мо яви́вшая це́ркви Христо́вой ди́вное украше́ніе.

Ра́дуйся, Боголюби́вая Цари́це Богоро́дице, Наде́ждо и Прибѣ́жище на́ше.

Конда́къ 5

Яко лучеза́рную звѣзду́, явле́нную въ предѣ́лѣхъ Влади́мірскихъ, узрѣ́ кня́зь Андре́й пресвѣ́тлый о́бразъ Тво́й, Влады́чице, и въ се́мъ явле́ніи уразумѣ́въ зна́меніе осо́беннаго попече́нія Бо́жія о мѣ́стѣ явле́нія сего́, даде́ ему́ и́мя "Боголюби́вое". О, Цари́це и Влады́чице! Освѣти́ и на́съ свѣ́томъ Твои́мъ небе́снымъ, сохраня́я на́съ подъ кро́вомъ Твои́мъ благи́мъ, услы́ши всеумиле́нныя моли́твы восхваля́ющихъ Тя́ и воспѣва́ющихъ Бо́гу: Аллилу́ія.

Икосъ 5

Видѣ́ніе чу́дное Богома́тере и свята́я словеса́ Ея́ пріе́мля съ ра́достнымъ тре́петомъ, благовѣ́рный кня́зь умиле́нно со слеза́ми паде́ на зе́млю и сла́достно возблагодари́ Всевы́шняго, я́ко сподо́бися узрѣ́ти Тя́, Пресвяту́ю Богоро́дицу. Посе́мъ ускори́ це́рковь заложи́ти, идѣ́же ны́нѣ Боголюби́вая оби́тель, и́менемъ Твои́мъ красу́яся, мо́лится за ве́сь мíръ предъ Пречи́стымъ Твои́мъ о́бразомъ. Созерца́юще въ таково́мъ собы́тіи зна́меніе благода́ти, дерза́емъ воспѣва́ти си́це:

Ра́дуйся, Ми́лостивая, я́ко устро́ила ти́хое приста́нище и́щущимъ спасе́нія. Pа́дуйся, Пресвѣ́тлая, я́ко свѣ́тъ подава́еши всѣ́мъ хотя́щимъ жи́ти въ преподо́біи, и тѣ́мъ показу́еши пра́выя стези́ Ца́рствія небе́снаго. Ра́дуйся, те́плая Хода́таице о живу́щихъ въ оби́телехъ Твои́хъ, ми́лость Свою́ вы́ну и́мъ обѣща́вшая. Pа́дуйся, я́ко во и́ноческихъ трудѣ́хъ и́мъ всегда́ помога́еши и къ трудолю́бію дае́ши поощре́ніе. Ра́дуйся, я́ко въ мона́шескихъ ке́лліяхъ на моли́тву вразумля́еши и къ добродѣ́тельному житію́ ре́вностно возбужда́еши. Pа́дуйся, Храни́тельнице ди́вная об́ителей святы́хъ, я́ко Твое́ю благода́тною си́лою о́ныя зи́ждятся и преуспѣва́ютъ въ благоче́стіи.

Ра́дуйся, Боголюби́вая Цари́це Богоро́дице, Наде́ждо и Прибѣ́жище на́ше.

Конда́къ 6

Проповѣ́дуетъ бога́тыя ми́лости Твоя́, Влады́чице, вcя́ земля́ Россíйская и ди́вное благода́тное кня́зя Андре́я вразумле́ніе. Сему́ послѣ́дуя, благовѣ́рный кня́зь повелѣ́ о́бразъ написа́ти тѣ́мъ подо́біемъ, я́ко же ему́ яви́ся Пречи́стая, и, обрѣ́тъ святу́ю ико́ну, поклони́ся ра́достно, со слеза́ми благодаря́ Бо́га и ско́рую на́шу Помо́щницу, взыва́я: Аллилу́ія.

Икосъ 6

Возсія́ неизрече́нная благода́ть отъ цѣльбо́носныя ико́ны Твоея́, Пресвята́я и Боголюби́вая Ма́ти. Слы́шимъ и ви́димъ вели́чіе чуде́съ, отъ нея́ быва́емое, со удивле́ніемъ взира́емъ на сію́ ико́ну, я́ко на Пресвѣ́тлое лице́ Само́й Пречи́стой Дѣ́вы. О, Госпоже́, Цари́це и Влады́чице! Ты́ вы́ну воздвиза́еши ру́цѣ Твои́ на моле́ніе за на́съ предъ Сы́номъ Твои́мъ, не пре́зри и вопію́щихъ Ти́ похва́льная сія́:

Ра́дуйся, утѣше́ніе на́мъ дарова́вшая, о́бразъ Тво́й чудотво́рный. Pа́дуйся, но́вую ми́лость и но́вую благода́ть си́мъ въ Це́ркви явля́ющая и тѣ́мъ пу́ть спасе́нія показу́ющая. Ра́дуйся, Покрови́тельнице на́ша, отъ бѣ́дъ на́съ спаса́ющая и въ ско́рбехъ бы́строе облегче́ніе на́мъ посыла́ющая. Pа́дуйся, сострада́тельнѣйшая къ болѣ́знемъ на́шимъ, ско́рую по́мощь на́мъ подаю́щая.

Ра́дуйся, Боголюби́вая Цари́це Богоро́дице, Наде́ждо и Прибѣ́жище на́ше.

Конда́къ 7

Хотя́ благовѣ́рный кня́зь досто́йно почти́ти пресвяту́ю во́лю Твою́, Влады́чице, собра́ архіере́и, свяще́нники и люде́й мно́жество, да ублажа́тъ Тя́ хвале́бно собо́ромъ. О, чу́днаго торжества́! О, прему́дрости суде́бъ Твои́хъ, Влады́чице! Пресла́вно прено́сится чудотво́рная Твоя́ ико́на въ ди́вный хра́мъ всечестна́го Твоего́ Рождества́. Чудодѣ́йствіемъ прославля́ется це́рковь Твоя́, о Госпоже́ Богоро́дице! И вси́ предстоя́щіи, прекло́нше колѣ́на, испо́лненые ра́дости и умиле́нія, цѣлу́ютъ Тво́й пречи́стый о́бразъ и взыва́ютъ: О, Ма́ти Боголюби́вая, осѣни́ и на́съ всеси́льною Твое́ю десни́цею, воспѣва́ющихъ Бо́гу: Аллилу́ія.

Икосъ 7

Ди́вна дѣла́ Твоя́, Влады́чице! Вси́ лю́діе, здра́віи и боля́щіи, бога́тіи и ни́щіи, вси́ прибѣга́емъ къ Тебѣ́, сострада́тельнѣйшей Ма́тери на́шей. Не отри́ни на́съ отъ лица́ Твоего́, бу́ди ми́лостива къ на́мъ, недосто́йнымъ рабо́мъ Твои́мъ, во всѣ́хъ путе́хъ жи́зни на́шея, защити́ и поми́луй, отъ всея́ души́ любо́вію вопію́щихъ Тебѣ́ такова́я:

Ра́дуйся, ненадѣ́ющихся надѣ́яніе и печа́льныхъ утѣше́ніе. Pа́дуйся, о скорбя́щихъ попече́ніе и бѣ́дствующимъ по́моще. Ра́дуйся, а́лчущихъ корми́тельнице и ни́щихъ одѣя́ніе. Pа́дуйся, убо́гихъ засту́пнице и боля́щихъ исцѣле́ніе. Ра́дуйся, ста́рцевъ покрови́тельнице и ю́ныхъ воспита́тельнице. Pа́дуйся, вражду́ющихъ примире́ніе и оби́димыхъ защи́тнице.

Ра́дуйся, Боголюби́вая Цари́це Богоро́дице, Наде́ждо и Прибѣ́жище на́ше.

Конда́къ 8

Ди́вное чу́до перенесе́нія пресла́вныя Твоея́ ико́ны, Влады́чице, торже́ственно вси́ честву́емъ и ежего́дно въ се́й свѣ́тлый пра́здникъ благода́рнѣ воспомина́емъ вся́ неизче́тная благодѣя́нія чуде́съ, Тобо́ю, Пречи́стая, отъ нея́ ди́вно источа́емыхъ. И тебе́, уго́дниче Бо́жій Лео́нтіе, въ по́мощь призыва́емъ, чту́ще съ любо́вію честну́ю па́мять твою́, да сподо́бимся моли́твами твои́ми у Пречи́стыя обрѣсти́ благода́ть, е́же непреста́нно воспѣва́ти Го́споду: Аллилу́ія.

Икосъ 8

Все́ вели́чіе чуде́съ Твои́хъ, Пречи́стая, нѣ́сть исчи́слити возмо́жно, егда́ безбо́жный ца́рь Баты́й со мно́гою ра́тію, разоря́я гра́ды и ве́си и сожига́я хра́мы, прибли́зися и ко святѣ́й оби́тели Твое́й, Пречи́стая, вни́де въ це́рковь и, обрѣ́тъ чудотво́рную ико́ну, де́рзостно положи́ ру́ку на драгíя ри́зы ея́, и хра́мъ со всѣ́мъ бога́тствомъ огню́ предаде́, то́чію еди́нъ о́бразъ Тво́й, Влады́чице, цѣ́лъ обрѣ́теся и ничи́мже поврежде́нъ бы́сть. О, ве́ліе чу́до! О, ко́ль ди́вны зна́менія благода́ти явля́еши на́мъ, Пречи́стая! Кто́ не ублажи́тъ Тя́? Кто́ не воспое́тъ Твоя́ сла́вная чудеса́? И мы́, грѣ́шніи, со умиле́ніемъ взира́юще на святу́ю ико́ну Твою́, то́ль чуде́сно отъ поги́бельнаго пла́мене сохрани́вшуюся, со слеза́ми взыва́емъ си́це:

Ра́дуйся, я́ко купина́, огне́мъ горѣ́вшая и неопа́льна пребы́вшая. Pа́дуйся, я́ко благода́ть Тебѣ́ даде́ся си́лу о́гненную угаша́ти. Ра́дуйся, въ годи́ну напа́стей и испыта́ній оста́вившая на́мъ святу́ю ико́ну Свою́ во утѣше́ніе. Pа́дуйся, я́ко благосты́нею Свое́ю угаша́еши въ на́съ о́гнь нече́стія пла́менемъ огня́ Боже́ственнаго. Ра́дуйся, просла́вившая чудесы́ ико́ну Твою́. Pа́дуйся, я́ко моли́твою и цѣлова́ніемъ ико́ны Твоея́ вси́ мы́ пріе́млемъ благода́тное утѣше́ніе.

Ра́дуйся, Боголюби́вая Цари́це Богоро́дице, Наде́ждо и Прибѣ́жище на́ше.

Конда́къ 9

Все́ упова́ніе возлага́емъ на Твою́ бла́гость, Пресвята́я Влады́чице! Милосе́рдію Твоему́ нѣ́сть конца́, вели́чіе же Твое́ кто́ исповѣ́сть? Предстоя́щи съ мольбо́ю у престо́ла Всевы́шняго, ко́ль мно́гое мно́жество чуде́съ явля́ла еси́ на́мъ, Пречи́стая, ко́ль ди́вно спасла́ сла́вный гра́дъ Москву́ отъ гро́знаго врага́ Тамерла́на? Ко́ль чу́дно объя́тъ его́ вели́кій стра́хъ прише́ствіемъ Твои́мъ въ ма́терь ру́сскихъ градо́въ и пону́ди а́біе отступи́ти со всѣ́мъ во́инствомъ. Не умолчи́мъ никогда́, Засту́пнице на́ша пресла́вная, о всѣ́хъ Твои́хъ благодѣя́ніихъ, да не бу́детъ подъ спу́домъ свѣ́тъ чуде́съ Твои́хъ, и предстоя́ще ны́нѣ предъ пречи́стымъ Твои́мъ о́бразомъ и моля́щеся умиле́нною душе́ю и сокруше́ннымъ се́рдцемъ, взыва́емъ Бо́гу: Аллилу́ія.

Икосъ 9

Вѣтíя многовѣща́нныя не довлѣ́ютъ по достоя́нію воспѣ́ти хвалу́ и благодаре́ніе Пречи́стѣй, ка́ко ца́рственный гра́дъ сохрани́ отъ тата́рскихъ по́лчищъ. Егда́ вся́ ра́ть вра́жія отступа́ше отъ предѣ́лъ Моско́вскихъ, ца́рь Іоа́ннъ со ско́рбію и слеза́ми отпусти́ чудотво́рный о́бразъ Тво́й, Боголюби́вая Влады́чице, въ и́збранную оби́тель Твою́, идѣ́же со умиле́ніемъ и неизрече́нною ра́достію лю́діе срѣто́ша его́, и отъ ма́ла до вели́ка, вси́, прекло́нше колѣ́на, срѣта́ху и ублажа́ху Тя́, Пречи́стая. И мы́ сея́ ра́дости мы́сленнѣ причаща́ющеся, Цари́цѣ Небе́снѣй вопіе́мъ благода́рнѣ:

Ра́дуйся, премилосе́рдая Утѣ́шительнице на́ша, святу́ю ико́ну да́ти на́мъ изво́лившая. Pа́дуйся, отъ наше́ствія враго́въ иноплеме́нныхъ на́съ ди́вно спа́сшая. Ра́дуйся, несокруши́мый щи́те царе́й на́шихъ и оте́чества благонаде́жное утвержде́ніе. Ра́дуйся, во́инства крѣ́пкая защи́та, отъ меча́ враго́въ сохраня́ющая. Pа́дуйся, отъ разоре́нія, плѣ́на и лю́тыя сме́рти избавля́ющая свято́ю десни́цею Твое́ю всѣ́хъ упова́ющихъ на Тя́.

Ра́дуйся, Боголюби́вая Цари́це Богоро́дице, Наде́ждо и Прибѣ́жище на́ше.

Конда́къ 10

Спасти́ хотя́ свою́ ду́шу, благочести́вый ца́рь Ѳео́доръ, любо́вію Боже́ственною разжига́емъ, до́брѣ подвиза́ся, пребыва́я въ постѣ́ и въ моли́твѣ, и, вельми́ любя́ше Боголюби́вую оби́тель и ча́сто посѣща́ше ю́. Еди́ножды же съ те́плою моли́твою предъ чудотво́рною Твое́ю ико́ною, Боголюби́вая Ма́ти, отъ усе́рдія своего́ въ да́ръ Тебѣ́ принесе́ носи́мый на пе́рсехъ свои́хъ честны́й кре́стъ, каме́ньми драги́ми укра́шенный. Взира́юще на сіе́ ди́вное украше́ніе Твоея́ ико́ны, о Пречи́стая, ра́дуемся вси́ духо́вно о се́мъ, ка́ко Тя́, Цари́цу и Влады́чицу, сла́вятъ и чту́тъ вси́ вѣ́рніи, и моля́щеся вопіе́мъ Бо́гу: Аллилу́ія.

Икосъ 10

Стѣна́ еси́ Ты́, огражда́ющая ны́ отъ вся́кихъ болѣ́зней. Пресвята́я Богоро́дице, егда́ со умиле́нною моли́твою призыва́емъ мы́ въ по́мощь на́шу Твое́ Ма́тернее милосе́рдіе. Аще бо Ты́ не бы́ предстоя́ла, Боголюби́вая Ма́ти, моля́щи о на́съ, кто́ бы на́съ изба́вилъ отъ смертоно́сныхъ ра́нъ и я́звъ всегуби́тельныхъ! Со умиле́ніемъ созерца́емъ, ка́ко на пути́ благода́тнаго ше́ствія Твоего́ вси́ боля́щіи чуде́сно исцѣля́хуся и стру́пи на тѣлесѣ́хъ во мгнове́ніе о́ка врачева́хуся. Тѣ́мже и мы́, припа́дающе къ цѣльбоно́сной ико́нѣ Твое́й, мо́лимъ Тя́, Влады́чице: не оста́ви ны́ пребога́тою ми́лостію, изба́ви ны́ отъ вся́кихъ болѣ́зней, наипа́че же отъ смертоно́сныя я́звы и па́губы. О, Пресвята́я Богоро́дице! Благопоспѣ́шно спаси́ на́съ и поми́луй съ вѣ́рою и любо́вію вопію́щихъ Ти́ изъ глубины́ души́:

Ра́дуйся, страны́ на́шея правосла́вныя ди́вная Покрови́тельнице, мно́гажды отъ бѣ́дъ и напа́стей ю́ избавля́вшая. Ра́дуйся, страда́льцевъ благода́тнымъ утѣше́ніемъ вѣнча́ющая и разсла́бленнымъ ско́рое возставле́ніе даю́щая. Ра́дуйся, слѣпы́мъ прозрѣ́ніе и хромы́мъ отъ неду́га и́хъ ди́вное избавле́ніе. Ра́дуйся, пораже́нныхъ разли́чными неду́гами и болѣ́знями чуде́сно исцѣля́ющая. Ра́дуйся, скорбя́щихъ роди́телей въ лише́ніи ча́дъ и́хъ утѣша́ющая благода́тною Твое́ю по́мощію. Pа́дуйся, Цѣли́тельнице на́ша въ страда́ніихъ тѣле́сныхъ и блага́я Утѣ́шительнице въ печа́лехъ на́шихъ душе́вныхъ.

Ра́дуйся, Боголюби́вая Цари́це Богоро́дице, Наде́ждо и Прибѣ́жище на́ше.

Конда́къ 11

Пѣ́ніе всеумиле́нно-благода́рственное прино́ситъ Тебѣ́, Боголюби́вая Ма́ти, вся́ страна́ Россíйская за чу́дное избавле́ніе отъ смертоно́сныя я́звы, то́ль ги́бельно ю́ порази́вшія. Свѣ́тлые дни́ ди́вныхъ исцѣле́ній наче́ртаны на сердца́хъ вѣ́рующихъ, и те́плыя моле́нія возно́сятся ежего́дно въ па́мять сего́ ра́достнаго торжества́, егда́ свята́я ико́на Твоя́, Влады́чице, съ пѣ́ніи духо́вными прино́сится въ сла́вный гра́дъ Влади́міръ. Красу́йся и лику́й, благослове́нный гра́де! Торжеству́йте, правовѣ́рніи, зря́ще несо́мую ико́ну Влады́чицы, источа́ющую неизче́тныя исцѣле́нія всѣ́мъ притека́ющимъ къ не́й съ вѣ́рою и любо́вію! Преклоня́емъ и мы́ колѣ́на предъ Тобо́ю, Пресвята́я Богоро́дице, велича́емъ Тя́ и мо́лимъ: пріими́ ми́лостивно и отъ на́съ же́ртву хвалы́ и прославле́нія, приноси́мую Тебѣ́ отъ недосто́йныхъ ра́бъ Твои́хъ, вопію́щихъ Бо́гу: Аллилу́ія.

Икосъ 11

Свѣтоза́рную ико́ну Твою́, Боголюби́вая Ма́ти, съ благоговѣ́ніемъ мы́ зри́мъ въ Боже́ственныхъ хра́мѣхъ Твои́хъ, ра́дующеся. Кто́ не прибѣга́лъ къ Тебѣ́, Влады́чице? Кто́ не покланя́лся, кто́ не лобыза́лъ Твои́ Пречи́стыя стопы́? Кто́ не умоля́лъ Тя́, Засту́пницу на́шу? О, Пресвята́я Дѣ́во, пріими́ вѣ́ру и усе́рдіе на́ше, напра́ви на стези́ и́стины пу́ть на́шъ, умоли́ Го́спода и Сы́на Твоего́, да спасе́тъ на́съ, и́миже вѣ́сть судьба́ми, да не поги́бнемъ въ нераска́яніи о на́шихъ грѣхопаде́ніяхъ, и услы́ши моле́нія къ Тебѣ́ взыва́ющихъ:

Ра́дуйся, Благода́тная, всѣ́ми добродѣ́тельми преукраше́нная, Свое́ю благода́тію на́съ не оставля́ющая. Pа́дуйся, Храни́тельнице на́ша, въ ча́съ сме́ртный тму́ вра́жію отгоня́ющая и по сме́рти на́съ упокоева́ющая. Ра́дуйся, Ми́лостивая, ми́лость Свою́ на́мъ явля́ющая въ де́нь испыта́нія, въ о́ньже откры́ются дѣла́ на́ша, до́брая же и зла́я. Pа́дуйся, Милосе́рдая, осо́бое заступле́ніе на́мъ посыла́ющая и тѣ́мъ въ бу́дущемъ вѣ́чныя ра́дости сподобля́ющая.

Ра́дуйся, Боголюби́вая Цари́це Богоро́дице, Наде́ждо и Прибѣ́жище на́ше.

Конда́къ 12

Благода́тію Боже́ственною осѣня́ема, свята́го Іоа́нна Предте́чу съ ли́ки арха́нгелъ зри́мъ стоя́ща о́крестъ Пречи́стыя Ма́тере Боголюби́выя. Вку́пѣ же ублажа́емъ и тя́, уго́дниче Бо́жій, помози́ на́мъ, немощны́мъ, имѣ́ти вѣ́ру непоколеби́му, у́мъ чи́стъ, си́лы и произволе́ніе освяща́ть ду́ши на́ша посто́мъ и моли́твою, и вы́ну полага́ть хране́ніе усто́мъ на́шимъ, да сподо́бимся моли́твами Влады́чицы и твои́ми досто́йно воспѣ́ти Бо́гу на́шему: Аллилу́ія.

Икосъ 12

Пою́ще неисче́тная зна́менія и чудеса́ Твоя́, Пресвята́я Богоро́дице, умиле́нно припа́даемъ къ пречи́стому о́бразу Твоему́, Боголюби́вая Ма́ти, лобыза́юще его́ со стра́хомъ и тре́петомъ, хва́лимъ Тя́ а́ки неисчерпа́емый исто́чникъ благода́ти, и мо́лимъ: бу́ди Хода́таица о на́съ, воздви́гни ру́ки къ Сы́ну Твоему́, да вы́ну въ жи́зни се́й и въ бу́дущей милосе́рдіе Его́ неотсту́пно бу́детъ съ на́ми, взыва́ющими Тебѣ́:

Ра́дуйся, Присноблаже́нная, па́че земноро́дныхъ вѣ́дущая блаже́нство пребыва́ти съ Бо́гомъ. Pа́дуйся, содѣ́лывающая и на́съ уча́стниками сего́ блаже́нства. Ра́дуйся, Пренепоро́чная Дѣ́во, всецѣ́ло стяжа́вшая чистоту́, смире́ніе и непоро́чность. Pа́дуйся, дару́ющая на́мъ блага́я сія́, да бу́демъ уго́дны Тебѣ́ и Бо́гу. Ра́дуйся, Всеми́лостивая Цари́це, простира́ющая на на́съ, грѣ́шныхъ, ми́лость Свою́ во вся́кое вре́мя живота́ на́шего. Pа́дуйся, чадолюби́вая Ма́ти, дару́ющая на́мъ Свое́ Ма́тернее заступле́ніе въ ча́съ сме́рти.

Ра́дуйся, Боголюби́вая Цари́це Богоро́дице, Наде́ждо и Прибѣ́жище на́ше.

Конда́къ 13

О, Ма́ти Боголюби́вая, Цари́це Небе́сная, Всемо́щная на́ша Предста́тельнице! Ма́лыя сія́ услы́шавши смире́нныя мольбы́ на́ша, при́зри на ны́ ми́лостивымъ Твои́мъ о́комъ; бу́ди на́мъ ско́рая Засту́пница въ де́нь кончи́ны на́шея и въ ча́съ сме́ртный яви́ся на́мъ Сама́, Пречи́стая, простира́я ру́ку по́мощи, отгоня́я духо́въ зло́бы, и́щущихъ поглоти́ти ду́шу на́шу при разлуче́ніи отъ тѣ́ла, и сподо́би на́съ въ бу́дущей жи́зни въ весе́ліи и ра́дованіи возвели́чить Тя́, я́ко Преблагу́ю на́шу Покрови́тельницу, да, спасе́нніи Тобо́ю, въ безконе́чнѣмъ вѣ́цѣ вопіе́мъ Бо́гу: Аллилу́ія.

Се́й конда́къ глаго́лется три́жды. Та́же Икосъ 1-й и Конда́къ 1-й

Моли́тва пе́рвая

О, Пречи́стая Госпоже́ Богоро́дице, Ма́ти Боголюби́вая, наде́ждо на́шего спасе́нія! Воззри́ ми́лостиво на предстоя́щія съ вѣ́рою и любо́вію и покланя́ющіяся пречи́стому о́бразу Твоему́, пріими́ на́ше хвале́бное пѣ́ніе сіе́ и проле́й те́плую Твою́ моли́тву о на́съ, грѣ́шныхъ, ко Го́споду, да, презрѣ́въ вся́ на́ша согрѣше́нія, спасе́тъ и поми́луетъ на́съ. О, Преди́вная Влады́чице, покажи́ на на́съ чу́дныя ми́лости Твоя́! Сохрани́ и поми́луй Благочести́вѣйшаго Госуда́ря Импера́тора [и́мярекъ] и ве́сь ца́рствующій До́мъ, да́руй и́мъ здра́віе и спасе́ніе, сохрани́ и па́стырей Це́ркви и все́ христолюби́вое во́инство. Мо́лимъ Тя́ умиле́нно, изба́ви на́съ отъ вся́кія ско́рби, наста́ви на пу́ть вся́кія добродѣ́тели и благосты́ни, спаси́ отъ искуше́ній, бѣ́дъ и болѣ́зней, изми́ отъ на́съ оклевета́нія и ссо́ры, сохрани́ отъ молніено́снаго гро́ма, отъ запале́нія о́гненнаго, отъ гла́да, тру́са, пото́па и смертоно́сныя я́звы. Пода́й на́мъ Свою́ ми́лостивную по́мощь на пути́ въ мо́ри и на су́шѣ, да не поги́бнемъ лю́тѣ. О, Всеми́лостивая, Боголюби́вая Ма́ти, съ тве́рдымъ упова́ніемъ возсыла́емъ къ Тебѣ́ на́шу смире́нную моли́тву! Не отри́ни на́шихъ сле́зъ и воздыха́ніи, не забу́ди на́съ во вся́ дни́ живота́ на́шего, но всегда́ пребыва́й съ на́ми, и Твои́мъ заступле́ніемъ и хода́тайствомъ у Го́спода пода́ждь на́мъ отра́ду, утѣше́ніе, защи́ту и по́мощь, да вы́ну сла́вимъ и велича́емъ преблагослове́нное и всепѣ́тое и́мя Твое́. Ами́нь.

Моли́тва втора́я

О, чу́дная и вы́сшая всѣ́хъ тва́рей Цари́це Богоро́дице, небе́снаго Царя́ Христа́ Бо́га на́шего Ма́ти! Услы́ши на́съ, грѣ́шныхъ и недосто́йныхъ ра́бъ Твои́хъ, въ ча́съ се́й моля́щихся и припа́дающихъ къ Тебѣ́ съ воздыха́ніемъ и слеза́ми, и уми́льно глаго́лющихъ: изведи́ на́съ отъ ро́ва страсте́й, Влады́чице, изба́ви на́съ отъ вся́кія ско́рби и печа́ли, огради́ отъ вся́кія напа́сти и злы́хъ клеве́тъ, отъ непра́ведного и лю́таго навѣ́та вра́жія. Мо́жеши бо, о Благода́тная Ма́терь на́ша, не то́чію отъ вся́каго зла́ сохрани́ти лю́ди Твоя́, но и вся́кимъ благодѣя́ніемъ снабди́ти и спасти́. Ра́звѣ Тебе́ ины́я Предста́тельницы въ бѣда́хъ и обстоя́ніяхъ и те́плыя Хода́таицы о на́съ, грѣ́шныхъ, не и́мамы къ Сы́ну Твоему́, Христу́ Бо́гу на́шему. Его́же умоли́, Влады́чице, да спасе́нніи Тобо́ю сла́вимъ и въ бу́дущемъ вѣ́цѣ всесвято́е и́мя Сы́на Твоего́ и Бо́га на́шего, ку́пно со Отце́мъ и Святы́мъ Ду́хомъ, ны́нѣ и въ безконе́чныя вѣ́ки. Ами́нь.

Тропа́рь, гла́съ 1

Боголюби́вая Цари́це, Неискусому́жная Дѣ́во, Богоро́дице Марíе, моли́ за ны́ Тебе́ Возлюби́вшаго и ро́ждшагося отъ Тебе́ Сы́на Твоего́, Христа́ Бо́га на́шего, пода́ти на́мъ оставле́ніе прегрѣше́ній, мíрови ми́ръ, благопло́дію изоби́ліе, Импера́тору на́шему [и́мярекъ] и наслѣ́дію его здра́віе, на враги́ же одолѣ́ніе. Па́стыремъ святы́ню и всему́ человѣ́чу ро́ду спасе́ніе. Гра́ды на́ша и страны́ Россíйскія отъ нахожде́нія иноплеме́нныхъ заступи́ и отъ междоусо́бныя бра́ни сохрани́. О, Ма́ти Боголюби́вая Дѣ́во! О, Цари́це Всепѣ́тая! Ри́зою Свое́ю покры́й на́съ отъ вся́каго зла́, отъ ви́димыхъ и неви́димыхъ вра́гъ защити́ и спаси́ ду́ши на́ша.

Конда́къ, гла́съ 8

Дѣ́во и Ма́ти Боголюби́вая, Цари́це Марíе Богоро́дице, Ми́лостивая Хода́таице къ Сы́ну Своему́ и Бо́гу на́шему за ны́, рабы́ Твоя́! Ты́, Отрокови́це, благоизво́лила еси́ Твоему́ пречу́дному о́бразу, его́же написа́ богоглаго́ливый Лука́, пе́рвѣе отъ страны́ гре́ческія, пото́мъ же и отъ ца́рствующаго гра́да Кíева изы́ти, по умоле́нію благовѣ́рнаго кня́зя Андре́я, и яви́ти ми́лость Свою́ новопросвѣще́ннымъ лю́демъ страны́ сея́, но, не изво́ливши дости́гнути гра́да Росто́ва, возлюби́ла еси́ пребыва́ти въ предѣ́лѣхъ Влади́мірскихъ, идѣ́же и яви́лася еси́ вѣ́рному рабу́ Твоему́, кня́зю Андре́ю, моля́щися о лю́дехъ Твои́хъ Сы́ну и Бо́гу Твоему́, я́коже дре́вле свято́му Андре́ю въ хра́мѣ Влахе́рнскомъ. Тѣ́мже святы́й кня́зь Андре́й, новописа́въ Тебе́, Моли́твенницу о лю́дехъ Твои́хъ, оста́ви на́мъ се́й моли́твенный ли́къ Тво́й, Боголюби́вая Ма́ти, и основа́ оби́тель въ мѣ́стѣ Твоего́ явле́нія, изъ нея́же отъ чудотво́рныя Твоея́ ико́ны и по все́й странѣ́ Россíйстѣй ми́лость, и по́мощь, и исцѣле́ніе подае́ши съ вѣ́рою приходя́щимъ къ Тебѣ́: я́ко о Тебѣ́, Богоро́дице, вся́ тва́рь ра́дуется.

Велича́ніе

Велича́емъ Тя́, Пресвята́я Дѣ́во, и чте́мъ о́бразъ Тво́й святы́й, его́же благовѣ́рный кня́зь Андре́й даде́ на́мъ на враги́ въ побѣ́ду и всѣ́мъ вѣ́рнымъ во спасе́ніе.