Конда́къ 1

Избра́нному пре́жде вѣ́къ содѣ́лать спасе́ніе мíра вели́каго совѣ́та Ангелу, Сы́ну Бо́жію Іису́су Христу́, пріиди́те, вѣ́рніи, поклони́мся и припаде́мъ Ему́, сла́вяще неизрече́нное о на́съ Боже́ственное смотре́ніе, и я́ко изба́вленіи отъ вѣ́чныя сме́рти вознесе́мъ Ему́, Спаси́телю на́шему и Бо́гу, благода́рственную пѣ́снь, душа́ми чи́стыми и нескве́рными устна́ми взыва́юще:

Сла́ва Тебѣ́, Го́споди, сла́ва Тебѣ́.

Икосъ 1

Ангеловъ и всѣ́хъ небе́сныхъ си́лъ ликостоя́нію подража́юще, превы́шнему престо́лу Вседержи́теля Бо́га предстоя́щихъ, и трисвяты́мъ гла́сомъ немо́лчно славосло́вящихъ всечестно́е и великолѣ́пое и́мя Его́, иску́пленніи раби́ Твои́, Христе́ Царю́, дерза́емъ а́ще и недосто́йно восхвали́ти Тя́, Спа́са и Изба́вителя на́шего Бо́га. Ты́ же, я́ко Всеблагíй и Милосе́рдый, обы́чнымъ Твои́мъ призрѣ́въ на на́съ благоутро́біемъ, пріими́ отъ на́съ возноси́мую Тебѣ́ хвалу́, боголѣ́пно и всече́стно Тебѣ́ вопію́щихъ:

Сла́ва Тебѣ́, Го́споди, Сы́не Бо́жій Единоро́дный. Сла́ва Тебѣ́, Го́споди, всемогу́щая тво́рческая Си́ло. Сла́ва Тебѣ́, Го́споди, великоимени́тая Ѵпоста́сная Прему́дросте. Сла́ва Тебѣ́, Го́споди, всесвятѣ́йшая боже́ственная Пра́вдо. Сла́ва Тебѣ́, Го́споди, Сы́не нетлѣ́нно рожде́нный отъ Отца́ пре́жде всѣ́хъ вѣ́къ. Сла́ва Тебѣ́, Го́споди, Сія́ніе сла́вы Отчей и Образе ѵпоста́си Его́. Сла́ва Тебѣ́, Го́споди, Еди́ный Свѣ́те отъ Трисо́лнечнаго Свѣ́та. Сла́ва Тебѣ́, Го́споди, Истинный Бо́же отъ Истиннаго Бо́га. Сла́ва Тебѣ́, Го́споди, Безнача́льному Отцу́ и Присносу́щному Ду́ху Собезнача́льный и Соприсносу́щный. Сла́ва Тебѣ́, Го́споди, во еди́номъ со Отце́мъ и Ду́хомъ Божествѣ́, Ца́рствѣ, си́лѣ и вла́сти исповѣ́дуемый. Сла́ва Тебѣ́, Го́споди, еди́ною со Отце́мъ и Ду́хомъ Боже́ственною сла́вою отъ всѣ́хъ небе́сныхъ си́лъ воспѣва́емый и превозноси́мый. Сла́ва Тебѣ́, Го́споди, отъ всѣ́хъ земноро́дныхъ, я́ко Еди́ный отъ Тро́ицы, боголѣ́пно покланя́емый и сла́вимый.

Сла́ва Тебѣ́, Го́споди, сла́ва Тебѣ́.

Конда́къ 2

Ви́дящи вся́ у́мная тва́рь дѣла́ ру́къ Твои́хъ, небеса́ повѣ́дающія сла́ву Твою́, и зе́млю испо́лненную ми́лости и щедро́тъ Твои́хъ, богогла́сно прославля́етъ Тя́, Христе́, Содѣ́теля и Творца́ вся́ческихъ. Тѣ́мже и мы́, зря́ще въ творе́ніи неисповѣди́мое вели́чіе Твое́ и бога́тство прему́дрости и бла́гости Твоея́, славосло́вимъ Тя́, небесе́ и земли́ Творца́, и, я́ко о́бщницы Боже́ственныхъ даро́въ Твои́хъ, благода́рными гла́сы взыва́емъ къ Тебѣ́: Аллилу́ія.

Икосъ 2

Ра́зумъ земноро́дныхъ изнемога́етъ тща́щися уразумѣ́ти прему́дрость и си́лу, и́миже устро́ися мíръ, и позна́ти сокрове́нныя зако́ны и та́йны естества́. Мы́ же, вѣ́дуще Тя́ Творца́ и Зижди́теля всѣ́хъ, и вѣ́рою разумѣва́юще Твое́ непостижи́мое о вся́кой тва́ри промышле́ніе, благоговѣ́йно зове́мъ:

Сла́ва Тебѣ́, Го́споди, содѣ́тельная и содержи́тельная всѣ́хъ Бо́жія Му́дросте и Си́ло. Сла́ва Тебѣ́, Го́споди, вся́ прему́дростію сотвори́вый и вся́ческая глаго́ломъ си́лы Твоея́ нося́й. Сла́ва Тебѣ́, Го́споди, небесе́ и земли́ Зижди́телю, ви́димыхъ же всѣ́хъ и неви́димыхъ. Сла́ва Тебѣ́, Го́споди, арха́нгеловъ, а́нгеловъ и всѣ́хъ небе́сныхъ си́лъ Тво́рче и Влады́ко. Сла́ва Тебѣ́, Го́споди, въ нача́лѣ небеса́ сло́вомъ Твои́мъ утверди́вый и сія́ющими свѣти́лами вселе́нную просвѣти́вый. Сла́ва Тебѣ́, Го́споди, зе́млю на тве́рди ея́ непоколеби́мо основа́вый, и су́шу и мо́ре на не́й раздѣли́вый. Сла́ва Тебѣ́, Го́споди, древеса́ и плоды́ произрасти́вый, и зе́млю живу́щихъ тва́рей испо́лнивый. Сла́ва Тебѣ́, Го́споди, изъ пе́рсти человѣ́ка созда́вый, и о́бразомъ Твои́мъ Боже́ственнымъ украси́вый. Сла́ва Тебѣ́, Го́споди, я́ко влады́ку его́ надъ дѣ́лы ру́къ Твои́хъ поста́вивый и вся́ подъ но́зѣ его́ покори́вый. Сла́ва Тебѣ́, Го́споди, Боже́ственное благослове́ніе Твое́ ро́ду человѣ́ческому дарова́вый и всю́ зе́млю и́мъ напо́лнивый. Сла́ва Тебѣ́, Го́споди, я́ко устрое́ніе, чи́нъ и красоту́ мíра неизмѣ́нно и неруши́мо сохраня́еши. Сла́ва Тебѣ́, Го́споди, я́ко вся́, я́же тре́буемъ, подае́ши на́мъ, дожди́ благовре́менны и времена́ плодоно́сна съ небесе́ посыла́я, и пи́щею и весе́ліемъ сердца́ на́ша исполня́я.

Сла́ва Тебѣ́, Го́споди, сла́ва Тебѣ́.

Конда́къ 3

Си́лою вседержа́вныя десни́цы Твоея́ созда́вый человѣ́ка и о́бразомъ Твои́мъ Боже́ственнымъ почты́й, вве́лъ еси́ его́ въ ра́й сла́дости, безсме́ртіе и наслажде́ніе благи́хъ Твои́хъ обѣща́въ ему́, и па́дшаго и согрѣши́вшаго Тебѣ́ не погуби́лъ еси́, но человѣколю́бно поми́ловалъ еси́, провозвѣсти́въ ему́ гряду́щее спасе́ніе, е́же и прія́тъ съ вѣ́рою, въ покая́ніи возопи́: Аллилу́ія.

Икосъ 3

Имѣ́яй тве́рдую любо́вь къ па́дшему созда́нію Твоему́, и не хотя́й сме́рти грѣ́шника, но е́же обрати́тися и жи́ву бы́ти ему́, благоизво́лилъ еси́ спасти́ человѣ́ка. Сего́ ра́ди Хода́тай Бо́гу и человѣ́комъ бы́въ, вше́лъ еси́, Перворо́дне, во вселе́нную, и предъ лице́мъ всѣ́хъ люде́й угото́валъ еси́ спасе́ніе Твое́. Тѣ́мже, благодаря́ще, славосло́вимъ Тя́, и во умиле́ніи души́ взыва́емъ Ти́ си́це:

Сла́ва Тебѣ́, Го́споди, Агнче Бо́жій, за спасе́ніе мíра пре́жде сложе́ніе мíра закла́нный. Сла́ва Тебѣ́, Го́споди, Боже́ственный Хода́таю, да́вый Себе́ избавле́ніе за всѣ́хъ. Сла́ва Тебѣ́, Го́споди, обѣтова́ніемъ спасе́нія па́дшихъ пра́отцевъ возвесели́вый. Сла́ва Тебѣ́, Го́споди, та́йну смотрѣ́нія Твоего́ ро́ду гряду́щему откры́вый. Сла́ва Тебѣ́, Го́споди, му́жа по се́рдцу Твоему́, Авраа́ма, избра́вый и отца́ вѣ́рующихъ его́ сотвори́вый. Сла́ва Тебѣ́, Го́споди, сѣ́мя его́ благослови́вый и, возрасти́въ въ язы́къ ве́лій, въ наслѣ́діе Себѣ́ избра́вый. Сла́ва Тебѣ́, Го́споди, рабо́мъ Твои́мъ Моисе́омъ зако́нъ да́вый и во́лю Твою́ лю́демъ Изра́илевымъ возвѣсти́вый. Сла́ва Тебѣ́, Го́споди, зна́менія и чудеса́ на зе́млю посла́вый, и въ лю́дехъ си́лу Твою́ и сла́ву Твою́ сказа́вый. Сла́ва Тебѣ́, Го́споди, гряду́щее спасе́ніе мíру та́йно предобрази́вый, и зако́нную сѣ́нь свѣ́томъ благода́ти спаси́тельныя всѣ́мъ человѣ́комъ предосія́вый. Сла́ва Тебѣ́, Го́споди, вѣ́рою пра́отцы оправда́вый и тѣ́ми Це́рковь отъ язы́къ предобручи́вый. Сла́ва Тебѣ́, Го́споди, многоча́стнѣ и многообра́знѣ во проро́цѣхъ глаго́лавый, и дни́ избавле́нія на́шего предвозвѣсти́вый. Сла́ва Тебѣ́, Го́споди, въ послѣ́докъ днíй и Са́мъ явле́йся на земли́, Ца́рствіе Бо́жіе проповѣ́давый и спаси́тельно дѣ́ло Небе́снаго Бо́га Отца́ соверши́вый.

Сла́ва Тебѣ́, Го́споди, сла́ва Тебѣ́.

Конда́къ 4

Бу́ря злы́хъ обдержи́тъ на́съ, Влады́ко Христе́, я́ко въ беззако́ніихъ зача́хомся и во грѣсѣ́хъ роди́хомся. Но Ты́, Прише́дый грѣ́шныя спасти́, и отъ Безневѣ́стныя и Пречи́стыя Дѣ́вы Марíи Воплоти́выйся, спаси́ на́съ отъ вся́кихъ бѣ́дъ предста́тельствомъ Ма́тере Твоея́, да вы́ну милосе́рдіе Твое́ сла́вяще, зове́мъ: Аллилу́ія.

Икосъ 4

Слы́ша и возвесели́ся Сіо́нъ, и возра́довася суде́бъ ра́ди Твои́хъ, Го́споди, егда́ возсія́ звѣзда́ отъ Іа́кова, вѣ́дущи, я́ко пріи́де избавля́яй, Святы́й Изра́илевъ, тѣ́мъ и вопія́ше съ весе́ліемъ: "дне́сь спасе́ніе мíру бы́сть". Сего́ ра́ди и мы́, ча́да но́ваго Изра́иля, чту́ще Твое́, Пребоже́ственный Іису́се, во пло́ти къ на́мъ прише́ствіе и рождество́ отъ Пренепоро́чныя и Пречи́стыя Дѣ́вы, съ вѣ́рою и любо́вію зове́мъ:

Сла́ва Тебѣ́, Го́споди, спасе́нія на́шего ра́ди отъ Отчихъ и Боже́ственныхъ нѣ́дръ истощи́вый Себе́ и съ небесе́ отъ превы́шняго Престо́ла сла́вы на зе́млю сше́дый. Сла́ва Тебѣ́, Го́споди, во утро́бу Дѣ́вы Марíи всели́выйся и, отъ Нея́ пречи́стую пло́ть воспрія́въ, непрело́жно вочеловѣ́чивыйся. Сла́ва Тебѣ́, Го́споди, смире́нія ра́ди кра́йняго зра́къ раба́ пріе́мый и во я́слѣхъ Виѳлее́мскихъ, я́ко а́гнецъ возлегíй. Сла́ва Тебѣ́, Го́споди, а́нгельскимъ гла́сомъ ве́лію благоче́стія та́йну па́стыремъ проповѣ́давый, и ты́я зрѣ́ти Тя́, я́ко младе́нца, сподо́бивый. Сла́ва Тебѣ́, Го́споди, спаси́тельное прише́ствіе Твое́ явле́ніемъ звѣзды́ мíру возвѣсти́вый и волхвы́ съ честны́ми да́ры на поклоне́ніе Тебѣ́ призва́вый. Сла́ва Тебѣ́, Го́споди, зако́на сы́й Творе́цъ, я́ко подзако́нный, зако́нъ испо́лнивый и пло́тію обрѣ́заніе воспріе́мый. Сла́ва Тебѣ́, Го́споди, Безнача́льное Сло́во, я́ко младе́нецъ четыредесятодне́венъ, Ма́терію Свое́ю въ хра́мъ принесе́нный и отъ пра́веднаго Симео́на и проро́чицы Анны я́ко Изба́витель мíра проповѣ́данный. Сла́ва Тебѣ́, Го́споди, на земли́ во двою́ естеству́, я́ко Бо́гъ и Человѣ́къ, нераздѣ́льно и несли́тно яви́выйся и съ человѣ́ки пожи́вый. Сла́ва Тебѣ́, Го́споди, обѣтова́нное спасе́ніе мíру прише́ствіемъ Твои́мъ соверши́вый. Сла́ва Тебѣ́, Го́споди, сѣ́нь зако́нную Боже́ственнымъ явле́ніемъ Твои́мъ упраздни́вый и свѣ́томъ благода́ти вселе́нную просвѣти́вый. Сла́ва Тебѣ́, Го́споди, рѣ́чи проро́ковъ и гада́нія, воплоще́ніе Твое́ прояви́вшія испо́лнивый. Сла́ва Тебѣ́, Го́споди, ми́лость, ми́ръ и проще́ніе грѣхо́въ человѣ́комъ отъ Небе́снаго Бо́га Отца́ дарова́вый.

Сла́ва Тебѣ́, Го́споди, сла́ва Тебѣ́.

Конда́къ 5

Боготе́чную струю́ спаси́тельныхъ уче́ній излія́лъ еси́, Христе́, Прему́дросте Бо́жія, егда́ яви́лся еси́ вселе́ннѣй, благовѣству́я во́лю посла́вшаго Тя́ Небе́снаго Бо́га Отца́ и проповѣ́дуя грѣ́шникомъ покая́ніе. Отню́дуже духоно́сніи апо́столи Твои́ и вси́ лю́діе, позна́вше Тя́ и́стиннаго бы́ти Сы́на Бо́жія, и вѣ́ровавше во Ева́нгеліе, боголѣ́пно возопи́ша: Аллилу́ія.

Икосъ 5

Ви́дѣвъ Тя́ Іоа́ннъ гряду́ща на Креще́ніе, глаго́ла лю́демъ: "се́ Агнецъ Бо́жій, взе́мляй грѣхи́ мíра"; и́же и кре́щшася и свы́ше свидѣ́тельствована Тя́ исповѣ́да, я́ко Еди́нъ еси́ отъ Тро́ицы, освяща́яй во́ды и крестя́й Ду́хомъ Святы́мъ. Тѣ́мже и мы́, я́ко прича́стницы Боже́ственнаго креще́нія и даро́въ Свята́го Ду́ха, благода́рными гла́сы взыва́емъ къ Тебѣ́:

Сла́ва Тебѣ́, Го́споди, на Іорда́нъ я́ко человѣ́къ прише́дый и Креще́ніе безгрѣ́шный прія́ти изво́ливый. Сла́ва Тебѣ́, Го́споди, вы́ю Твою́ подъ ру́ку раба́, Госпо́дь сы́й всѣ́хъ и Влады́ка, преклони́вый. Сла́ва Тебѣ́, Го́споди, Ду́хомъ Святы́мъ, я́ко пода́тель ду́ха благода́ти, извѣствова́нный. Сла́ва Тебѣ́, Го́споди, гла́сомъ Небе́снаго Бо́га Отца́ Сы́нъ Его́ Возлю́бленный свидѣ́тельствованный. Сла́ва Тебѣ́, Го́споди, вода́ми человѣ́ческій грѣ́хъ потопи́вый и Креще́ніемъ па́дшее естество́ на́ше обнови́вый. Сла́ва Тебѣ́, Го́споди, ба́нею пакибытія́ вѣ́рующія въ Тя́ возроди́вый и неви́димымъ явле́ніемъ Свята́го Ду́ха освяти́вый. Сла́ва Тебѣ́, Го́споди, врага́ искуси́теля въ пусты́ни посрами́вый и па́губныя ко́зни его́ побѣдоно́сно разруши́вый. Сла́ва Тебѣ́, Го́споди, смире́нныя ученики́ Себѣ́ избра́вый и боже́ственныя Твоя́ апо́столы нарекíй. Сла́ва Тебѣ́, Го́споди, Ева́нгеліе Ца́рствія мíру проповѣ́давый и во́лю Небе́снаго Бо́га Отца́ боже́ственнымъ сло́вомъ Твои́мъ возвѣсти́вый. Сла́ва Тебѣ́, Го́споди, пу́ть спасе́нія лю́демъ показа́вый и свѣ́томъ богоразу́мія мíръ озари́вый. Сла́ва Тебѣ́, Го́споди, суему́дріе фарисе́евъ и кни́жниковъ посрами́вый, и мытаре́й и блудни́цъ покая́ніемъ и вѣ́рою оправда́вый. Сла́ва Тебѣ́, Го́споди, избавле́ніе человѣ́ческому ро́ду и ми́ръ проповѣ́давый, и я́ко Ты́ еси́ вои́стину Спа́съ мíру Христо́съ, боже́ственнымъ Твои́мъ уче́ніемъ и вла́стію засвидѣ́тельствовавый.

Сла́ва Тебѣ́, Го́споди, сла́ва Тебѣ́.

Конда́къ 6

Проповѣ́дникъ сла́вы Бо́жія яви́лся еси́ на земли́, Единоро́дный Сы́не Отчій, возвѣща́я всю́ду, я́ко прибли́жися Ца́рствіе небе́сное. Тѣ́мже и обте́клъ еси́ пречи́стыми но́гъ Твои́хъ стопа́ми вся́ гра́ды и ве́си Изра́илевы, проявля́я Свою́ Боже́ственную вла́сть и си́лу, и исцѣля́я вся́къ неду́гъ и вся́ку я́зю. Еже ви́дѣвше лю́діе, хвалу́ возда́ша въ вы́шнихъ Бо́гу, творя́щему ди́вная и пресла́вная чудеса́, вопію́ще: Аллилу́ія.

Икосъ 6

Возсія́вый пре́жде вѣ́къ отъ Отца́ и въ послѣ́дняя лѣ́та отъ Дѣ́вы Ма́тере, изше́лъ еси́ во спасе́ніе люде́й Твои́хъ, Іису́се, благовѣству́я ни́щимъ, исцѣля́я сокруше́нныя се́рдцемъ, проповѣ́дуя плѣне́ннымъ отпуще́ніе и слѣпы́мъ прозрѣ́ніе. Отню́ду же вси́, ви́дѣвше Твоя́ чудеса́, сла́вляху Бо́га глаго́люще, я́ко Проро́къ ве́лій воста́ и я́ко посѣти́ Бо́гъ люде́й Свои́хъ. Мы́ же, вѣ́дуще Тя́ Бо́га Предвѣ́чнаго, Ему́же вся́ повину́ются, я́ко Творцу́ и Го́споду и, прославля́я безмѣ́рное милосе́рдіе Твое́, почита́емъ Тя́ си́ми благохвале́ньми:

Сла́ва Тебѣ́, Го́споди, Всемогу́щее Сло́во и Вседержа́вная Боже́ственная Си́ло. Сла́ва Тебѣ́, Го́споди, неистощи́мое бла́гости бога́тство и человѣколю́бія неизслѣ́димая бе́здно. Сла́ва Тебѣ́, Го́споди, небесе́ и земли́ Влады́ко, Его́же ма́ніемъ побѣжда́ется естества́ чи́нъ, Иже и твори́ши, ели́ка хо́щеши. Сла́ва Тебѣ́, Го́споди, ди́вная чудеса́ сотвори́вый, и пресла́вная зна́менія мíру показа́вый. Сла́ва Тебѣ́, Го́споди, боля́щія исцѣли́вый, разсла́бленныя съ одра́ возста́вивый, прокаже́нныя очи́стивый. Сла́ва Тебѣ́, Го́споди, слѣпы́я просвѣти́вый, бѣ́сы отъ человѣ́къ всеси́льнымъ сло́вомъ Твои́мъ отгна́вый. Сла́ва Тебѣ́, Го́споди, дще́рь Іаи́рову уме́ршую воскреси́вый и сы́на вдови́ча изъ гро́ба воздви́гнувый. Сла́ва Тебѣ́, Го́споди, въ пусты́ни пятію́ хлѣ́бы пя́ть ты́сящь и седмію́ четы́ре ты́сящи муже́й насы́тивый. Сла́ва Тебѣ́, Го́споди, по вода́мъ, а́ки по су́ху, ходи́вый, и утопа́вшему Петру́ просте́ръ ру́ку Твою́ боже́ственную, спасе́ніе пода́вый. Сла́ва Тебѣ́, Го́споди, вѣ́тру еди́нымъ сло́вомъ Твои́мъ запрети́вый и во́лны морскíя ути́шивый. Сла́ва Тебѣ́, Го́споди, на Ѳаво́рѣ избра́ннымъ ученико́мъ Твои́мъ сла́ву Божества́ Твоего́ показа́вый, и въ вѣ́рѣ и́хъ, я́ко Ты́ еси́ вои́стинну Отчее Сія́ніе, утверди́вый. Сла́ва Тебѣ́, Го́споди, Ла́заря четверодне́вна повелѣ́ніемъ Твои́мъ изъ гро́ба воздви́гнувый, и тѣ́мъ тридне́вное воскресе́ніе Твое́ пресла́вно и богосвѣ́тло предобрази́вый.

Сла́ва Тебѣ́, Го́споди, сла́ва Тебѣ́.

Конда́къ 7

Хотя́ сокрове́нную отъ вѣ́ка та́йну откры́ти и глаго́лы проро́къ предвозвѣсти́вшія Твое́ Боже́ственное смотре́ніе испо́лнити, прише́лъ еси́ во Іерусали́мъ, возсѣдя́, я́ко Ца́рь Кро́токъ и Спаса́яй, на жребя́ти о́сли, и преда́въ Себе́ на во́льное заколе́ніе, я́ко Же́ртва Бо́гу Отцу́ прине́слся еси́, Агнче Бо́жій, спаса́я всѣ́хъ, съ вѣ́рою взыва́ющихъ къ Тебѣ́, Содѣ́лавшему спасе́ніе посредѣ́ земли́: Аллилу́ія.

Икосъ 7

Но́ваго Изра́иля Хода́тай и лу́чшаго Завѣ́та Испору́чникъ Іису́съ, егда́ возлеже́ на ве́чери со обѣмана́десяте апо́столы, та́йно, за я́же хотя́ше умре́ти, Себе́ предпожре́, претворя́я хлѣ́бъ и вино́ въ Свое́ Боже́ственное Тѣ́ло и Кро́вь, и глаго́ля апо́столомъ: "яди́те Тѣ́ло Мое́", и "пíйте Кро́вь Мою́ во оставле́ніе грѣхо́въ". Къ Нему́ же и мы́, я́ко прича́стницы жи́зни вѣ́чныя, вѣ́рою утверди́вшеся, возопіи́мъ:

Сла́ва Тебѣ́, Го́споди, спаси́тельную та́йну Но́ваго Завѣ́та на ве́чери соверши́вый и Твое́ Боже́ственное Тѣ́ло и Пречи́стую Кро́вь въ снѣ́дь вѣ́рнымъ дарова́вый. Сла́ва Тебѣ́, Го́споди, но́ги ученико́мъ Твои́мъ, прекло́нься, умы́вый и пу́ть добрѣ́йшій смире́нія мíру показа́вый. Сла́ва Тебѣ́, Го́споди, въ вертогра́дѣ Геѳсима́нстѣмъ троекра́тно съ во́племъ крѣ́пкимъ и со слеза́ми моли́тву Единосу́щному Отцу́ Твоему́ прине́сшій, и явле́ніемъ а́нгела въ по́двизѣ Твое́мъ укрѣпле́нный. Сла́ва Тебѣ́, Го́споди, лука́вымъ ученико́мъ Твои́мъ пре́данный, и я́ко а́гнецъ незло́бивый, не отверза́я у́стъ на заколе́ніе веде́нный. Сла́ва Тебѣ́, Го́споди, въ совѣ́тѣ архіере́евъ и ста́рцевъ людски́хъ непра́ведно осужде́нный, оплева́нный, зауше́нный и біе́нный. Сла́ва Тебѣ́, Го́споди, въ прето́ріи Пила́та отъ во́иновъ пору́ганный и, я́ко злодѣ́й, на сме́рть осужде́нный. Сла́ва Тебѣ́, Го́споди, стра́шныя Стра́сти и Кре́стъ за спасе́ніе мíра претерпѣ́вый и Боже́ственною кро́вію Твое́ю грѣхи́ на́ша очи́стивый. Сла́ва Тебѣ́, Го́споди, покая́ніе благоразу́мнаго разбо́йника, позна́вшаго Тя́ Бо́га, пріе́мый и вхо́дъ и́же въ ра́й ему́ путесотвори́вый. Сла́ва Тебѣ́, Го́споди, на Крестѣ́ сме́рть пло́тію вкуси́вый и мно́га тѣлеса́ успо́шихъ святы́хъ изъ гро́бъ возста́вивый. Сла́ва Тебѣ́, Го́споди, стра́шныя зна́менія мíру въ сме́рти Твое́й показа́вый и со́тника и́стиннаго Тя́ Сы́на Бо́жія исповѣ́дати научи́вый. Сла́ва Тебѣ́, Го́споди, во гро́бѣ пло́тію лежа́, душе́ю во а́дъ сше́дый и иму́щаго держа́ву сме́рти упраздни́вый. Сла́ва Тебѣ́, Го́споди, за спасе́ніе мíра я́ко человѣ́къ пострада́вый и живо́тъ вѣ́чный на́мъ, я́ко Бо́гъ, дарова́вый.

Сла́ва Тебѣ́, Го́споди, сла́ва Тебѣ́.

Конда́къ 8

Стра́нное и пресла́вное та́инство ви́дѣвше на земли́, удиви́шася а́нгельстіи чи́ни, егда́ на Ло́бнѣмъ мѣ́стѣ за ны́ пожре́нъ бы́сть Христо́съ: Кресто́мъ бо Его́ разруши́ся кля́тва, умертви́ся сме́рть, раззори́ся а́дъ, въ не́мже отъ вѣ́ка содержи́міи ю́зницы, пра́отцы, проро́цы и вси́ свидѣ́тельствованніи въ вѣ́рѣ соше́дша къ ни́мъ Изба́вителя и Бо́га, прекло́ншеся, срѣто́ша, и безмѣ́рное Его́ благоутро́біе велича́юще, съ весе́ліемъ возопи́ша: Аллилу́ія.

Икосъ 8

Вся́ исполня́яй Неопи́санный, во гро́бѣ пло́тски бы́лъ еси́, Христе́, во а́дѣ же съ душе́ю, я́ко Бо́гъ, въ раи́ же съ разбо́йникомъ и на Престо́лѣ со Отце́мъ и Ду́хомъ, воскре́съ же изъ ме́ртвыхъ, я́ко Всеси́ленъ, держа́ву сме́рти разруши́лъ еси́, и живо́тъ и нетлѣ́ніе мíру дарова́лъ еси́. Сего́ ра́ди покланя́ется Тебѣ́ вся́ко колѣ́но небе́сныхъ, и земны́хъ, и преиспо́днихъ, исповѣ́дуя, я́ко Ты́ еси́ еди́нъ Госпо́дь Іису́съ Христо́съ въ сла́ву Бо́га Отца́. Тѣ́мже и мы́, чту́ще Твою́ спаси́тельную Стра́сть и е́же изъ ме́ртвыхъ Твое́ Воскресе́ніе, съ вѣ́рою и любо́вію прино́симъ Тебѣ́, Спаси́телю на́шему, благода́рственную пѣ́снь:

Сла́ва Тебѣ́, Го́споди, я́ко Человѣ́къ пло́тію уме́рый, и я́ко Бо́гъ тридне́венъ изъ ме́ртвыхъ воскресы́й. Сла́ва Тебѣ́, Го́споди, запеча́танный ка́мень отъ две́рій гро́ба Твоего́ сше́дшимъ съ небесе́ а́нгеломъ отвали́вый и стрегу́щія Тя́ во́ины свѣ́томъ сла́вы его́ устраши́вый. Сла́ва Тебѣ́, Го́споди, мѵроно́сицамъ жена́мъ Воскресе́ніе Твое́ отъ а́нгела проповѣ́давый и апо́столомъ Твои́мъ возвѣсти́ти е́ повелѣ́вый. Сла́ва Тебѣ́, Го́споди, по Воскресе́ніи Твое́мъ Самого́ Себе́ и́мъ я́ко Жива́го Бо́га показа́вый и ра́дости неизрече́нныя сердца́ и́хъ испо́лнивый. Сла́ва Тебѣ́, Го́споди, отве́ргшагося Тебе́ Петра́ явле́ніемъ Твои́мъ утѣ́шивый, и пла́чь его́ на ра́дость преложи́вый. Сла́ва Тебѣ́, Го́споди, дву́мъ, ше́дшимъ въ Еммау́съ, ученико́мъ Твои́мъ та́йну Креста́ и Сме́рти Твоея́ боже́ственными словесы́ отъ зако́на и проро́къ уясни́вый, и въ преломле́ніи хлѣ́ба позна́на Себе́ сотвори́вый. Сла́ва Тебѣ́, Го́споди, собра́ннымъ ученико́мъ Твои́мъ я́влься, ми́ръ и́мъ пода́вый, и пречи́стыя ру́цѣ и но́зѣ Твои́ и прободе́нное ре́бро показа́вый. Сла́ва Тебѣ́, Го́споди, во осмы́й де́нь воста́нія Твоего́ вку́пѣ бы́вшимъ ученико́мъ па́ки я́влься, Ѳому́ невѣ́ровавшаго Воскресе́нію Твоему́ увѣ́ривый, и всѣ́хъ не ви́дѣвшихъ, но вѣ́ровавшихъ блаже́нными нарекíй. Сла́ва Тебѣ́, Го́споди, на мо́ри Тиверіа́дстѣмъ въ лови́твѣ ры́бъ апо́столомъ Твои́мъ Себе́ Учи́теля и́хъ и Го́спода показа́вый, и пока́явшагося Петра́ па́ки къ ли́ку апо́стольскому причты́й. Сла́ва Тебѣ́, Го́споди, на горѣ́ Галиле́йстѣй изъ ме́ртвыхъ Воскресе́ніе Твое́ па́ки явле́ніемъ Свои́мъ утверди́вый, и вла́сть Твою́ на небеси́ и на земли́ воспрія́тую отъ Отца́ проповѣ́давый. Сла́ва Тебѣ́, Го́споди, я́ко ученики́ Твоя́ содѣ́лалъ еси́ апо́столы и проповѣ́дники Ца́рствія Бо́жія, и посла́лъ еси́ я́ на про́повѣдь, ми́ръ Тво́й тѣ́ми подая́ вселе́ннѣй. Сла́ва Тебѣ́, Го́споди, я́ко повелѣ́лъ еси́ проповѣ́дати покая́ніе и отпуще́ніе грѣхо́въ во всѣ́хъ язы́цѣхъ, и обѣща́лъ еси́ спасе́ніе пріе́млющимъ креще́ніе и вѣ́рующимъ въ Тя́, Спа́са на́шего и Бо́га.

Сла́ва Тебѣ́, Го́споди, сла́ва Тебѣ́.

Конда́къ 9

Ве́сь ли́къ Боже́ственныхъ апо́столъ Твои́хъ, восходя́щу Ти́, Спа́се, на Елео́нъ, послѣ́дова Тебѣ́, я́ко Влады́цѣ и Го́споду, внима́я глаго́ломъ Твои́мъ, я́же о Ца́рствіи Бо́жіи. Узрѣ́вше же но́вое и пресла́вное чу́до, егда́ возноси́лся еси́ на не́бо, со стра́хомъ и вѣ́рою поклони́шася Тебѣ́, восходя́щему къ Отцу́ Твоему́ и Бо́гу, и отъ а́нгеловъ пріе́мше вѣ́сть о второ́мъ сла́вномъ прише́ствіи Твое́мъ, возврати́шася во Іерусали́мъ, ра́дующеся и пою́ще Бо́гу: Аллилу́ія.

Икосъ 9

Витíйственный язы́къ не мо́жетъ исповѣ́дати та́йны чуде́съ Твои́хъ, Христе́, ка́ко самовла́стно изъ ме́ртвыхъ воскре́слъ еси́, и съ пло́тію возне́слся еси́ на не́бо, идѣ́же а́нгели со всѣ́ми го́рними си́лами зря́ще Тя́ Бо́га и Творца́, во о́бразѣ человѣ́ка восше́дша на Престо́лъ Божества́ и сѣ́дша одесну́ю Бо́га Отца́, съ тре́петомъ возопи́ша: "Свя́тъ, Свя́тъ, Свя́тъ еси́, Го́споди си́лъ и Царю́ сла́вы". Пріими́ у́бо и отъ на́съ, до́льнихъ, недосто́йное на́ше хвале́ніе Тебѣ́, Творцу́ и Искупи́телю на́шему, благода́рно взыва́ющихъ:

Сла́ва Тебѣ́, Го́споди, все́ Оте́ческое смотрѣ́ніе пресла́вно испо́лнивый и земна́я съ небе́сными совокупи́вый. Сла́ва Тебѣ́, Го́споди, пострада́вый за на́съ и воскресы́й, и на небеса́ къ Безнача́льному Отцу́ Твоему́ восше́дый. Сла́ва Тебѣ́, Го́споди, на Престо́лѣ Божества́ одесну́ю Отца́ сѣды́й, и еди́ное съ Ни́мъ ца́рство, и си́лу, и сла́ву воспріе́мый. Сла́ва Тебѣ́, Го́споди, естество́ человѣ́ческое обожи́вый, и превы́ше херуви́мовъ и серафи́мовъ въ Твое́мъ Боже́ственномъ Лицѣ́ превознесы́й. Сла́ва Тебѣ́, Го́споди, Небе́снаго Отца́ Твоего́, я́ко Хода́тай Бо́га и человѣ́ковъ, умоли́вый, и ученико́въ Твои́хъ на земли́ си́рыхъ не оста́вивый. Сла́ва Тебѣ́, Го́споди, Ду́ха Свята́го апо́столомъ Твои́мъ ниспосла́вый и свѣ́томъ боговѣ́дѣнія умы́ и́хъ озари́вый. Сла́ва Тебѣ́, Го́споди, некни́жныя ученики́ Твоя́ Ду́хомъ и́стины умудри́вый и учи́тели и па́стыри ста́да Твоего́ содѣ́лавый. Сла́ва Тебѣ́, Го́споди, Ева́нгеліе Ца́рствія тѣ́ми всему́ мíру проповѣ́давый, и духоно́сными вѣща́ніи и́хъ вселе́нную просвѣти́вый. Сла́ва Тебѣ́, Го́споди, и́дольскую ле́сть обличи́вый и упраздни́вый, и заблу́дшія лю́ди во и́стиннѣй вѣ́рѣ наста́вивый. Сла́ва Тебѣ́, Го́споди, къ Свѣтонача́льнику, Отцу́ Твоему́, отъ тмы́ невѣ́дѣнія на́съ приведы́й, и досто́йно покланя́тися и служи́ти Ему́ научи́вый. Сла́ва Тебѣ́, Го́споди, помышле́ньми и дѣ́лы до́лу прекло́ншихся на́съ возста́вивый, и го́рняя му́дрствовати, а не земна́я повелѣ́вый. Сла́ва Тебѣ́, Го́споди, неизрече́нныя бла́га лю́бящимъ Тя́ обѣща́вый и житіе́ на́мъ на небесѣ́хъ, отону́дуже и Тя́ Спаси́теля на́шего жде́мъ, предопредѣли́вый.

Сла́ва Тебѣ́, Го́споди, сла́ва Тебѣ́.

Конда́къ 10

Спасти́ хотя́ лю́ди, я́же стяжа́лъ еси́ честно́ю Твое́ю Кро́вію, отъ искуше́ній и бѣ́дъ, во е́же непоро́чно служи́ти Тебѣ́, Бо́гу Жи́ву и Истинну, излія́лъ еси́ бога́тно Боже́ственную благода́ть Пресвята́го Ду́ха, и Са́мъ, я́ко Влады́ка и Госпо́дь, обѣща́лся еси́ неви́димо и неотсту́пно пребыва́ти съ вѣ́рными, я́коже апо́столомъ ре́клъ еси́: "се́ Азъ съ ва́ми е́смь во вся́ дни́ до сконча́нія вѣ́ка". Его́же гла́са Твоего́ и мы́ утвержде́ніе наде́жди иму́ще, ра́дуяся вопіе́мъ: Аллилу́ія.

Икосъ 10

Стѣна́ неодоли́мая и враты́ а́довы показа́ся Це́рковь Твоя́, Христе́, ея́же си́лою побѣжда́ются вси́ врази́, и низлага́ется вся́ко взима́ющееся на ра́зумъ Бо́жій возноше́ніе человѣ́къ, растлѣ́нныхъ умо́мъ и неиску́сныхъ о вѣ́рѣ, вѣ́рніи же обрѣта́ютъ спасе́ніе душа́мъ во вся́комъ дѣ́лѣ бла́зѣ, плодонося́ще и возраста́юще въ ра́зумѣ Бо́жіи. Тѣ́мже и мы́, су́щіи ча́да святы́я Твоея́ Це́ркве, утверди́вшеся на ка́мени вѣ́ры, и держа́щеся до́браго исповѣ́данія, восхваля́емъ Тя́, согла́сно зову́ще:

Сла́ва Тебѣ́, Го́споди, на земли́ Це́рковь Твою́, я́же е́сть сто́лпъ и утвержде́ніе и́стины, основа́вый. Сла́ва Тебѣ́, Го́споди, всеси́льною Твое́ю благода́тію разшири́вый ю́ и удобри́вый. Сла́ва Тебѣ́, Го́споди, Боже́ственнымъ про́мысломъ Твои́мъ неразруши́му сохраня́яй ю́ и соблюда́яй. Сла́ва Тебѣ́, Го́споди, краегуго́льный Ка́меню, на не́мже Це́рковь Твоя́ неподви́жно утвержда́ется. Сла́ва Тебѣ́, Го́споди, пренебе́сная Главо́, е́юже та́инственное тѣ́ло Це́ркве управля́ется и освяща́ется. Сла́ва Тебѣ́, Го́споди, вели́кій Архіере́ю и Па́стырю до́брый, положи́вый ду́шу Твою́ за о́вцы, и еди́нѣмъ приноше́ніемъ соверши́вый во вѣ́ки освяща́емыхъ. Сла́ва Тебѣ́, Го́споди, исто́чники Боже́ственныхъ даро́въ Твои́хъ, та́йны святы́я въ Це́ркви Твое́й устро́ивый и тѣ́ми спаси́тельную благода́ть на вѣ́рныя лю́ди Твоя́ излива́яй. Сла́ва Тебѣ́, Го́споди, па́стыри и учи́тели въ созида́ніе тѣ́ла Це́ркве Твоея́ поста́вивый, и вла́сть, е́же вяза́ти и рѣши́ти грѣхи́ люде́й, тѣ́мъ по непрело́жному сло́ву Твоему́ дарова́вый. Сла́ва Тебѣ́, Го́споди, я́ко призва́лъ еси́ въ Це́рковь Твою́ святу́ю и на́съ, недосто́йныхъ рабо́въ Твои́хъ. Сла́ва Тебѣ́, Го́споди, я́ко возроди́лъ еси́ на́съ ба́нею пакибытія́ и обновле́нія Ду́ха Свята́го. Сла́ва Тебѣ́, Го́споди, я́ко пита́еши на́съ Боже́ственнымъ сло́вомъ Твои́мъ и насыща́еши отъ безсме́ртныя трапе́зы Пречи́стаго Тѣ́ла и Кро́ве Твоея́. Сла́ва Тебѣ́, Го́споди, я́ко очища́еши грѣхи́ на́ша покая́ніемъ, и спаса́еши на́съ, Ца́рствія небе́снаго наслѣ́дники содѣ́ловая.

Сла́ва Тебѣ́, Го́споди, сла́ва Тебѣ́.

Конда́къ 11

Пѣ́ніе го́рнихъ у́мныхъ си́лъ не довлѣ́етъ вели́честву Твоему́, сѣдя́й въ сла́вѣ на Престо́лѣ Божества́, Іису́се Сы́не Бо́жій, а́ще и немо́лчными гла́сы славосло́вятъ Тя́, я́ко Творца́ своего́ и Бо́га. Мы́ же, грѣ́шніи, ко́е досто́йное благодаре́ніе и ку́ю че́сть принесе́мъ Тебѣ́ за вся́, я́же возда́лъ еси́ на́мъ блага́я? Оба́че вѣ́дуще Тя́ ми́лостива и благосе́рда, Иже и страда́ти о на́съ изво́лившаго, мо́лимъ Тя́, Человѣколю́бче, услы́ши и на́съ, вѣ́рующихъ въ Тя́, и во умиле́ніи се́рдца велича́ющихъ безмѣ́рное милосе́рдіе Твое́, пою́ще а́нгельскую пѣ́снь: Аллилу́ія.

Икосъ 11

Свѣтоза́рное Со́лнце, изъ гро́ба возсія́вшее и на небеса́ восше́дшее просвѣща́ти а́нгельскія чи́ны и ду́хи пра́ведныхъ, Христо́съ Бо́гъ на́шъ, уста́вилъ е́сть вели́кій и просвѣще́нный де́нь, въ о́ньже и́мать па́ки пріити́ на зе́млю во сла́вѣ, я́коже мо́лнія исхо́дитъ отъ восто́къ и явля́ется до за́падъ, и Су́дъ пра́ведный сотвори́ти живу́щимъ на лицы́ всея́ земли́. Ча́юще у́бо втора́го сла́внаго Прише́ствія Его́, возведе́мъ о́чи свои́ на не́бо и рече́мъ: "помяни́ и на́съ, Го́споди, егда́ пріи́деши во Ца́рствіи Твое́мъ", сицева́я Тебѣ́ вопію́щихъ:

Сла́ва Тебѣ́, Го́споди, кончи́ну вѣ́ка сло́вомъ Твои́мъ предвозвѣсти́вый. Сла́ва Тебѣ́, Го́споди, гото́вымъ бы́ти на́мъ и жда́ти Тебе́, Судію́ Пра́веднаго, повелѣ́вый. Сла́ва Тебѣ́, Го́споди, зна́менія прише́ствія Твоего́ во свято́мъ Ева́нгеліи показа́вый. Сла́ва Тебѣ́, Го́споди, я́ко хо́щеши пріити́ на зе́млю во сла́вѣ Отца́ Своего́ со а́нгелы святы́ми. Сла́ва Тебѣ́, Го́споди, я́ко и́маши въ прише́ствіе Твое́ обнови́ти лице́ земли́. Сла́ва Тебѣ́, Го́споди, я́ко благоволи́ши сме́ртнымъ нетлѣ́ніе и безсме́ртіе дарова́ти. Сла́ва Тебѣ́, Го́споди, я́ко обѣща́еши отъ вѣ́ка уме́ршихъ всеси́льнымъ сло́вомъ Твои́мъ воздви́гнути. Сла́ва Тебѣ́, Го́споди, я́ко хо́щеши пра́ведный Су́дъ сотвори́ти и коему́ждо по дѣло́мъ его́ возда́ти. Сла́ва Тебѣ́, Го́споди, я́ко наде́жду и упова́ніе на Тя́, Спаси́теля на́шего, возлага́емъ. Сла́ва Тебѣ́, Го́споди, я́ко ми́лость и проще́ніе на Судѣ́ Твое́мъ получи́ти ча́емъ. Сла́ва Тебѣ́, Го́споди, я́ко жи́знь на́шу, по милосе́рдію Твоему́ продолжа́еши и вре́мя на покая́ніе на́мъ да́руеши. Сла́ва Тебѣ́, Го́споди, я́ко исправле́нія на́шего ми́лостивно ожида́еши, и е́же избѣжа́ти на́мъ вѣ́чнаго осужде́нія, я́ко Благíй и Человѣколю́бецъ, хо́щеши.

Сла́ва Тебѣ́, Го́споди, сла́ва Тебѣ́.

Конда́къ 12

Благода́ть Небе́снаго Бо́га Отца́ провозвѣсти́въ мíру, Соприсносу́щное Сло́во и Сы́нъ Бо́жій заповѣ́да вѣ́рнымъ Свои́мъ жи́ти цѣлому́дренно, и пра́ведно, и благоче́стно въ ны́нѣшнемъ вѣ́цѣ, отве́ргшеся нече́стія и мірски́хъ похоте́й, я́ко да изгна́нніи изъ рая́ преслуша́нія ра́ди, оправди́вшеся вѣ́рою наслѣ́дятъ гряду́щее Ца́рство небе́сное, е́же во своя́ времена́ яви́тъ Блаже́нный и еди́нъ Си́льный Ца́рь ца́рствующихъ и Госпо́дь госпо́дствующихъ жду́щимъ блаже́ннаго упова́нія и явле́нія сла́вы Его́, и глаго́лющимъ: Аллилу́ія.

Икосъ 12

Пою́ще и превознося́ще неисповѣди́мое человѣколю́біе Твое́, Спа́се на́шъ, Иже за милосе́рдіе безприкла́дныя ми́лости Твоея́, прише́дъ, содѣ́лалъ еси́ спасе́ніе на́ше Кресто́мъ и Воскресе́ніемъ Твои́мъ, и па́ки гряды́й и́маши яви́ти сла́ву Ца́рствія Твоего́, прино́симъ Ти́, превозноси́мому отце́въ Го́споду, раби́ Твои́, ча́ющіи жи́зни бу́дущаго вѣ́ка и прича́стія наслѣ́дія святы́хъ во свѣ́тѣ, благода́рную и хвале́бную моли́тву, прося́ще у Тебе́ ми́ра и спасе́нія зову́щимъ:

Сла́ва Тебѣ́, Го́споди, во свѣ́тѣ живы́й непристу́пнемъ и ца́рствуяй въ сла́вѣ вели́чества Твоего́ непостижи́мѣй. Сла́ва Тебѣ́, Го́споди, Его́же Ца́рство е́сть ца́рство всѣ́хъ вѣко́въ и влады́чество во вся́комъ ро́дѣ и ро́дѣ. Сла́ва Тебѣ́, Го́споди, мно́жества небе́сныхъ си́лъ Боже́ственною сла́вою Твое́ю облистава́яй, и зрѣ́ніемъ велелѣ́пныя красоты́ Ца́рства Твоего́ у́мныя о́чи и́хъ насыща́яй. Сла́ва Тебѣ́, Го́споди, отъ сложе́нія мíра Ца́рство въ наслѣ́діе человѣ́комъ угото́вавый и мно́ги оби́тели въ дому́ Отца́ Твоего́ избра́ннымъ Твои́мъ сотвори́вый. Сла́ва Тебѣ́, Го́споди, я́ко предуста́вилъ еси́ по второ́мъ Прише́ствіи Твое́мъ, разлучи́ти до́брыхъ отъ злы́хъ, я́коже ове́цъ отъ ко́злищь. Сла́ва Тебѣ́, Го́споди, я́ко опредѣли́лъ еси́ по пра́ведномъ Судѣ́ Твое́мъ, врага́ на́шего діа́вола съ клевре́ты его́ осуди́ти и вѣ́чному муче́нію преда́ти. Сла́ва Тебѣ́, Го́споди, я́ко и́маши благослове́нныя Отца́ Твоего́ въ Ца́рство небе́сное призва́ти и въ сожи́тельствѣ съ безпло́тными а́нгелы я́ всели́ти. Сла́ва Тебѣ́, Го́споди, я́ко хо́щеши лю́бящія Тя́ вѣ́чныя сла́вы и блаже́нныя жи́зни наслажде́нія во свѣ́тѣ лица́ Твоего́ сподо́бити. Сла́ва Тебѣ́, Го́споди, я́ко сла́вѣ Ца́рствія Твоего́ и ра́дости избра́нныхъ Твои́хъ не бу́детъ предѣ́ла. Сла́ва Тебѣ́, Го́споди, я́ко наслажде́ніямъ рая́ и блаже́нству пра́ведныхъ у Тебе́, Исто́чника живота́, не бу́детъ конца́. Сла́ва Тебѣ́, Го́споди, я́ко и на́мъ, грѣ́шнымъ, две́рь сла́внаго Ца́рствія Твоего́ покая́ніемъ и вѣ́рою отверза́еши. Сла́ва Тебѣ́, Го́споди, я́ко и мы́, недосто́йніи, а́ще бу́демъ ходи́ти во свѣ́тѣ за́повѣдей Твои́хъ въ черто́гъ Боже́ственныя сла́вы Твоея́, идѣ́же е́сть всѣ́хъ веселя́щихся жили́ще, совни́ти упова́емъ.

Сла́ва Тебѣ́, Го́споди, сла́ва Тебѣ́.

Конда́къ 13

О, великоимени́тая Ѵпоста́сная Прему́дросте Бо́жія, Пресвяты́й и Премилосе́рдый Го́споди Іису́се Христе́, Спаси́телю на́шъ, приклони́вый небеса́ неизрече́ннымъ Твои́мъ схожде́ніемъ, приклони́ся благоутро́бно на моли́тву на́съ, недосто́йныхъ рабо́въ Твои́хъ, вѣ́рою и любо́вію принося́щихъ Тебѣ́ благода́рственную сію́ хвалу́, и ниспосли́ на́мъ Боже́ственную благода́ть, да изба́вльшеся отъ бѣ́дъ и скорбе́й, па́че же грѣхо́вныхъ страсте́й, поживе́мъ Тебѣ́, на́шему Влады́цѣ и Благодѣ́телю, и та́ко сподо́бимся и на небеси́, я́коже на земли́, вку́пѣ со а́нгелами и всѣ́ми святы́ми пѣ́ти Тебѣ́: Аллилу́ія.

Се́й конда́къ глаго́лется три́жды. Та́же Икосъ 1-й и Конда́къ 1-й

Моли́тва Спаси́телю на́шему, Го́споду Іису́су Христу́

Влады́ко Многоми́лостиве, Го́споди Іису́се Христе́, Безнача́льнаго Отца́ Собезнача́льный и Соприсносу́щный Сы́не, Непостижи́мая Му́дросте, Непристу́пный Свѣ́те, Вседѣ́тельная и Всесодержи́тельная Си́ло, всемогу́щимъ сло́вомъ Твои́мъ отъ несу́щихъ во е́же бы́ти приведы́й вся́ческая и вседержа́вною во́лею Твое́ю управля́яй и устроя́яй всѣ́мъ благопотре́бная и поле́зная! Благода́рно исповѣ́дуемъ Твое́ Боже́ственное о на́съ промышле́ніе, велича́емъ непостижи́мую та́йну Твоего́ смотре́нія и съ вѣ́рою пріе́млемъ спаси́тельную благода́ть Твою́. Ты́ бо, Неизглаго́ланная Благосты́не, не по беззако́ніемъ на́шимъ творя́й на́мъ, но по безмѣ́рному благоутро́бію Твоему́ ми́луяй и спаса́яй на́съ, благоизво́лилъ еси́, исполня́я совѣ́тъ и изволе́ніе Отчее, истощи́въ Себе́, сни́ти на зе́млю и немощно́е естество́ человѣ́ческое воспрія́ти, въ не́мже пострада́въ во́лею, закла́лся еси́ на крестѣ́, я́ко а́гнецъ непоро́чный, за грѣхи́ мíра, и, си́мъ стра́шнымъ и спаси́тельнымъ священнодѣ́йствіемъ преклони́въ пра́вду Боже́ственную на ми́лость, Хода́тай Бо́гу и человѣ́комъ яви́лся еси́, и па́дшее и растлѣ́нное естество́ на́ше возста́вилъ еси́, и обнови́лъ и освяти́лъ еси́, я́ко бы́ти вѣ́рующимъ въ Тя́ и Небе́снаго Бо́га Отца́ святы́мъ и непоро́чнымъ, въ наслѣ́діе нетлѣ́нно и неувяда́емо, соблюде́но на небесѣ́хъ. Тѣ́мже мо́лимся Тебѣ́, Спаси́телю на́шъ, при́зри ми́лостивно на на́съ, и пріими́ на́ше исповѣ́даніе, хвалу́ и благодаре́ніе за вся́, я́же возда́лъ и угото́валъ еси́ на́мъ, вѣ́рующимъ въ Тя́ и исповѣ́дующимъ всесвято́е и́мя Твое́. Спаси́, Го́споди, лю́ди Твоя́ и благослови́ достоя́ніе Твое́. Помяни́ въ щедро́тахъ Твои́хъ Це́рковь Твою́ святу́ю, ю́же стяжа́лъ еси́ честно́ю Твое́ю Кро́вію, утверди́, умири́, разшири́ и сохрани́ ю́ непреобори́му и непоколеби́му и а́довыми враты́, но да сокруша́тся предъ не́ю и изче́знутъ вся́ сопроти́вныя си́лы и да расточа́тся вси́ врази́, ви́димо и неви́димо ополча́ющіися, е́же озло́бити достоя́ніе Твое́ и разори́ти завѣ́тъ святы́й Тво́й. Осѣни́ Боже́ственнымъ благослове́ніемъ Твои́мъ держа́ву Россíйскую [и Благочести́вѣйшаго Самодержа́внѣйшаго Вели́каго Госуда́ря Импера́тора [и́мярекъ] со всѣ́мъ ца́рствующимъ До́момъ, сохраня́я и́хъ въ ми́рѣ, благоде́нствіи и тишинѣ́, побѣ́ду же и одолѣ́ніе на супоста́ты и́мъ да́руя]. Отжени́ отъ правовѣ́рнаго Оте́чества на́шего вся́каго ду́ха ле́стча, внося́щаго къ на́мъ пле́велы ло́жныхъ уче́ній и си́лящагося водвори́ти у на́съ нра́вы и обы́чаи, проти́вныя святы́мъ за́повѣдемъ Твои́мъ; утверди́ на́съ въ правосла́вномъ исповѣ́даніи вѣ́ры и содѣ́лай ны́ ревни́телями оте́ческихъ преда́ній и вся́кихъ до́брыхъ христіа́нскихъ дѣ́лъ, да вы́ну сія́етъ въ оте́чествѣ на́шемъ свѣ́тъ и́стинный и сла́вится въ ро́дъ и ро́дъ пречестно́е и пребоже́ственное и́мя Твое́. Спаси́, Го́споди, и поми́луй гра́дъ се́й, въ не́мже живе́мъ, и вся́ гра́ды и ве́си, и всю́ страну́ благослове́нныя па́ствы Россíйскія; всѣ́хъ правосла́вно вѣ́рующихъ въ Тя́ въ ми́рѣ, тишинѣ́ и благоде́нствіи соблюди́, Це́ркви святѣ́й и вся́кому нача́лу и вла́сти послу́шныхъ и благопоко́рныхъ содѣ́лай и всѣ́ми христіа́нскими добродѣ́тельми украси́, отпа́дшія же и проти́вящіяся къ едине́нію съ свято́ю Правосла́вною Це́рковію спаси́тельною Твое́ю благода́тію призови́, боже́ственнымъ сло́вомъ Твои́мъ просвѣти́ и обрати́, я́ко Благíй и Человѣколю́бецъ. Спаси́, Го́споди, и святы́й хра́мъ се́й, его́же поста́вилъ и утверди́лъ еси́, я́ко сто́лпъ крѣ́пости, да́же до сего́ дне́ неразруши́мо и невреди́мо сохраня́я, въ не́мже въ моли́твахъ призыва́емъ Тя́ и слу́жимъ Тебѣ́, живу́щему на небеси́ Царю́ вѣко́въ, и́мже украша́ется и освяща́ется гра́дъ на́шъ и низпосыла́ется Твоя́ Боже́ственная благода́ть на вся́ гра́ды и ве́си страны́ на́шея. Да пребу́детъ на не́мъ, мо́лимъ Тя́, Го́споди, и во пре́дняя въ ро́дъ и ро́дъ Твое́ Боже́ственное благослове́ніе, да прино́сится въ не́мъ вы́ну благопрія́тная Тебѣ́ моли́тва и да излива́ется чрезъ него́ на всѣ́хъ моля́щихся и съ вѣ́рою призыва́ющихъ Тя́ Твоя́ спаси́тельная благода́ть, ми́лующая и избавля́ющая на́съ отъ всѣ́хъ бѣ́дъ. Помяни́, Го́споди, во Ца́рствіи Твое́мъ ра́бъ Твои́хъ, воздви́гшихъ Тебѣ́ се́й святы́й и приснопа́мятный до́мъ на земли́, и, прости́въ и́мъ вся́, я́же содѣ́лаша, я́ко человѣ́цы, прегрѣше́нія, вѣ́ры ра́ди и любве́ къ Тебѣ́, Бо́гу и Спаси́телю на́шему, возда́ждь и́мъ небе́сными и вѣ́чными благи́ми въ пренебе́сномъ и боже́ственной дому́ Твое́мъ. Помяни́ въ щедро́тахъ Твои́хъ, Ми́лостиве, преосвяще́нныхъ іера́рховъ, отъ созда́нія хра́ма сего́ благоукраше́нію его́ усе́рдно послужи́вшихъ, и всѣ́хъ правосла́вныхъ христіа́нъ, съ вѣ́рою и любо́вію плодоноси́вшихъ и добродѣ́явшихъ въ не́мъ, и ны́нѣ святы́ми же́ртвами и благотворе́ніями поревнова́вшихъ къ благолѣ́пію и сла́вѣ его́, и о́нѣмъ блаже́нное упокое́ніе и вѣ́чное ра́дованіе въ Ца́рствіи небе́снѣмъ, си́мъ же здра́віе, благоде́нствіе и въ вѣ́рѣ и благи́хъ дѣла́хъ преспѣ́яніе ко спасе́нію ду́шъ всеми́лостивно да́руй.

Прему́дрый и Всеблагíй Го́споди, Спаси́телю на́шъ! Просвѣти́вый сія́ніемъ прише́ствія Твоего́ мíра концы́ и сопризва́вый на́съ въ Це́рковь Твою́ святу́ю съ обѣтова́ніемъ наслѣ́дія нетлѣ́нныхъ и вѣ́чныхъ бла́гъ, при́зри ми́лостивно и на на́съ, недосто́йныхъ рабо́въ Твои́хъ, и не помяни́ беззако́ній на́шихъ, но по безмѣ́рному благоутро́бію Твоему́ осла́би, оста́ви, прости́ на́мъ вся́ прегрѣше́нія на́ша. Аще бо и преступа́емъ святу́ю во́лю Твою́, но не отмета́емся Тебе́, Бо́га и Спа́са на́шего: Тебѣ́ еди́ному согрѣша́емъ, но и Тебѣ́ еди́ному слу́жимъ, въ Тя́ еди́наго вѣ́руемъ, къ Тебѣ́ еди́ному прибѣга́емъ и Твои́ то́чію раби́ бы́ти хо́щемъ. Помяни́ не́мощь естества́ на́шего и обдержа́щія на́съ повсю́ду искуше́нія врага́ и пре́лести и собла́зны мíра, и́хже ра́ди безъ Тебе́, я́коже ре́клъ еси́, не мо́жемъ твори́ти ничесо́же, и Са́мъ очи́сти и спаси́ на́съ, Са́мъ просвѣти́ умы́ на́ша, е́же непоколеби́мо вѣ́ровати въ Тя́, Еди́наго Спа́са и Изба́вителя на́шего, Са́мъ подви́гни сердца́ на́ша, е́же всецѣ́ло люби́ти Тя́, еди́наго Бо́га и Творца́ на́шего, Са́мъ напра́ви стопы́ на́ша, е́же непреткнове́нно ходи́ти во свѣ́тѣ за́повѣдей Твои́хъ. Ей, Го́споди, Спаси́телю на́шъ, яви́ на́мъ вели́кую и бога́тую ми́лость Твою́, Иже по неизглаго́ланной любви́ Твое́й и страда́ти за на́съ изво́лилъ еси́, и всеси́льною Боже́ственною Твое́ю благода́тію, предста́тельствомъ же Пречи́стыя и Пренепоро́чныя Святы́я Ма́тере Твоея́ Марíи, Ея́же честно́е и блаже́нное Успе́ніе и къ Тебѣ́, Сы́ну и Бо́гу, Пренебе́сное возше́ствіе ны́нѣ пра́зднуемъ, и моли́твами уго́дниковъ Твои́хъ, страну́ на́шу честны́ми тѣлесы́ освяща́ющихъ и вы́ну предъ Тобо́ю за на́съ хода́тайствующихъ, сотвори́, да въ преподо́біи и пра́вдѣ поживе́мъ вся́ дни́ живота́ на́шего, и та́ко досто́йни бу́демъ во второ́е сла́вное Прише́ствіе Твое́ услы́шати отъ Тебе́ ми́лостивое призыва́ніе въ Ца́рствіе небе́сное, е́же получи́ти сподо́би на́съ, грѣ́шныхъ и недосто́йныхъ рабо́въ Твои́хъ, и въ наслажде́ніи неизрече́нныхъ красо́тъ его́ сла́вити Тя́ вку́пѣ съ Безнача́льнымъ Твои́мъ Отце́мъ и Присносу́щнымъ Боже́ственнымъ Ду́хомъ во вѣ́ки вѣко́въ. Ами́нь.

Тропа́рь Ѵпоста́сной Прему́дрости, гласъ 1

На престо́лѣ огнезра́чнѣмъ въ вы́шнихъ сѣдя́й со Отце́мъ Безнача́льнымъ и Боже́ственнымъ Твои́мъ Ду́хомъ, благоволи́лъ еси́ яви́тися на земли́, я́ко человѣ́къ, исполня́я предвѣ́чный о на́съ совѣ́тъ Святы́я Тро́ицы, Христе́ Іису́се; сего́ ра́ди и пострада́лъ еси́ пло́тію, да спасе́ши мíръ и вознесе́ши избра́нныя Твоя́, идѣ́же при́сно, я́ко Бо́гъ, во сла́вѣ ца́рствуеши. Сла́ва всеблаго́му Твоему́ совѣ́ту, сла́ва прему́дрому смотре́нію Твоему́, сла́ва неизрече́нному снизхожде́нію Твоему́, Еди́не Человѣколю́бче.

Конда́къ, гла́съ 8

Избра́нному пре́жде вѣ́къ содѣ́лати спасе́ніе мíра, Вели́каго совѣ́та Ангелу, Сы́ну Бо́жію, Іису́су Христу́, пріиди́те, вѣ́рніи, поклони́мся и припаде́мъ Ему́, сла́вяще неизрече́нное о на́съ Боже́ственное смотрѣ́ніе, и, я́ко изба́вленніи отъ вѣ́чныя сме́рти, вознесе́мъ Ему́, Спаси́телю на́шему и Бо́гу, благода́рственную пѣ́снь, душа́ми чи́стыми и нескве́рными устна́ми взыва́юще: сла́ва Тебѣ́, Го́споди, сла́ва Тебѣ́.

Велича́ніе

Велича́емъ Тя́, Единоро́дный Сы́не Бо́жій, Іису́се Христе́, вся́ прему́дростію Твое́ю въ нача́лѣ сотво́ршаго и человѣ́ческій па́дшій ро́дъ отъ вѣ́чныя сме́рти всеми́лостивно искупи́вшаго.