Все тексты на сегодня представлены в соответствии с указаниями Типикона. Специальные чтения обозначены только для Великих и бденных праздников.
Порядок чтений Псалтири святого пророка и царя Давида
Понедельник, 19 мая 2025 г. (6 мая ст.ст.)
Седмица 5-я по Пасхе Прав. Иова Многострадального (ок. 2000-1500 до Р.Х.)
Богослужебные указания для священно- и церковнослужителей
Пс.24:1 К Тебе, Господи, воздвигох душу мою, Боже мой, на Тя уповах, да не постыжуся во век, ниже да посмеютмися врази мои:
Пс.24:2 ибо вси терпящии Тя не постыдятся.
Пс.24:3 Да постыдятся беззаконнующии вотще.
Пс.24:4 Пути Твоя, Господи, скажи ми и стезям Твоим научи мя.
Пс.24:5 Настави мя на истину Твою и научи мя: яко Ты еси Бог спас мой, и Тебе терпех весь день.
Пс.24:6 Помяни щедроты Твоя, Господи, и милости Твоя, яко от века суть.
Пс.24:7 Грех юности моея и неведения моего не помяни: по милости Твоей помяни мя Ты, ради благости Твоея, Господи.
Пс.24:8 Благ и прав Господь, сего ради законоположит согрешающым на пути.
Пс.24:9 Наставит кроткия на суд, научит кроткия путем Своим.
Пс.24:10 Вси путие Господни милость и истина, взыскающым завета Его и свидения Его.
Пс.24:11 Ради имене Твоего, Господи, и очисти грех мой, мног бо есть.
Пс.24:12 Кто есть человек бояйся Господа? Законоположит ему на пути, егоже изволи.
Пс.24:13 Душа его во благих водворится, и семя его наследит землю.
Пс.24:14 Держава Господь боящихся Его, и завет Его явит им.
Пс.24:15 Очи мои выну ко Господу, яко Той исторгнет от сети нозе мои.
Пс.24:16 Призри на мя и помилуй мя, яко единород и нищ есмь аз.
Пс.24:17 Скорби сердца моего умножишася, от нужд моих изведи мя.
Пс.24:18 Виждь смирение мое и труд мой, и остави вся грехи моя.
Пс.24:19 Виждь враги моя, яко умножишася, и ненавидением неправедным возненавидеша мя.
Пс.24:20 Сохрани душу мою и избави мя, да не постыжуся, яко уповах на Тя.
Пс.24:21 Незлобивии и правии прилепляхуся мне, яко потерпех Тя, Господи.
Пс.24:22 Избави, Боже, Израиля от всех скорбей его.
Пс.25:1 Суди ми, Господи, яко аз незлобою моею ходих: и на Господа уповая не изнемогу.
Пс.25:2 Искуси мя, Господи, и испытай мя, разжжи утробы моя и сердце мое.
Пс.25:3 Яко милость Твоя пред очима моима есть, и благоугодих во истине Твоей.
Пс.25:4 Не седох с сонмом суетным, и со законопреступными не вниду.
Пс.25:5 Возненавидех церковь лукавнующих, и с нечестивыми не сяду.
Пс.25:6 Умыю в неповинных руце мои, и обыду жертвенник Твой, Господи,
Пс.25:7 еже услышати ми глас хвалы Твоея и поведати вся чудеса Твоя.
Пс.25:8 Господи, возлюбих благолепие дому Твоего и место селения славы Твоея.
Пс.25:9 Да не погубиши с нечестивыми душу мою и с мужи кровей живот мой,
Пс.25:10 ихже в руку беззакония, десница их исполнися мзды.
Пс.25:11 Аз же незлобою моею ходих: избави мя, Господи, и помилуй мя.
Пс.25:12 Нога моя ста на правоте: в церквах благословлю Тя, Господи.
Пс.26:1 Господь просвещение мое и спаситель мой, кого убоюся? Господь защититель живота моего, от кого устрашуся?
Пс.26:2 Внегда приближатися на мя злобующым, еже снести плоти моя, оскорбляющии мя и врази мои, тии изнемогоша и падоша.
Пс.26:3 Аще ополчится на мя полк, не убоится сердце мое: аще востанет на мя брань, на него аз уповаю.
Пс.26:4 Едино просих от Господа, то взыщу: еже жити ми в дому Господни вся дни живота моего, зрети ми красоту Господню и посещати храм Святый Его.
Пс.26:5 Яко скры мя в селении Своем в день зол моих, покры мя в тайне селения Своего, на камень вознесе мя.
Пс.26:6 И ныне се, вознесе главу мою на враги моя: обыдох и пожрох в селении Его жертву хваления и воскликновения: пою и воспою Господеви.
Пс.26:7 Услыши, Господи, глас мой, имже воззвах, помилуй мя и услыши мя.
Пс.26:8 Тебе рече сердце мое: Господа взыщу, взыска Тебе лице мое, лица Твоего, Господи, взыщу.
Пс.26:9 Не отврати лица Твоего от мене и не уклонися гневом от раба Твоего: помощник мой буди, не отрини мене и не остави мене, Боже, Спасителю мой.
Пс.26:10 Яко отец мой и мати моя остависта мя, Господь же восприят мя.
Пс.26:11 Законоположи ми, Господи, в пути Твоем, и настави мя на стезю правую враг моих ради.
Пс.26:12 Не предаждь мене в душы стужающих ми: яко восташа на мя свидетеле неправеднии, и солга неправда себе.
Пс.26:13 Верую видети благая Господня на земли живых.
Пс.26:14 Потерпи Господа, мужайся, и да крепится сердце твое, и потерпи Господа.
Пс.27:1 К Тебе, Господи, воззову, Боже мой: да не премолчиши от мене: да не когда премолчиши от мене, и уподоблюся низходящым в ров.
Пс.27:2 Услыши, Господи, глас моления моего, внегда молитимися к Тебе, внегда воздети ми руце мои ко храму святому Твоему.
Пс.27:3 Не привлецы мене со грешники, и с делающими неправду не погуби мене, глаголющими мир с ближними своими, злая же в сердцах своих.
Пс.27:4 Даждь им, Господи, по делом их и по лукавству начинаний их, по делом руку их даждь им, воздаждь воздаяние их им.
Пс.27:5 Яко не разумеша в дела Господня и в дела руку Его: разориши я и не созиждеши я.
Пс.27:6 Благословен Господь, яко услыша глас моления моего.
Пс.27:7 Господь помощник мой и защититель мой: на Него упова сердце мое, и поможе ми, и процвете плоть моя: и волею моею исповемся Ему.
Пс.27:8 Господь утверждение людий Своих и защититель спасений Христа Своего есть.
Пс.27:9 Спаси люди Твоя, и благослови достояние Твое, и упаси я, и возми я до века.
Пс.28:1 Принесите Господеви, сынове Божии, принесите Господеви сыны овни, принесите Господеви славу и честь:
Пс.28:2 принесите Господеви славу имени Его: поклонитеся Господеви во дворе святем Его.
Пс.28:3 Глас Господень на водах, Бог славы возгреме, Господь на водах многих.
Пс.28:4 Глас Господень в крепости, глас Господень в великолепии.
Пс.28:5 Глас Господа, сокрушающаго кедры: и стрыет Господь кедры Ливанския,
Пс.28:6 и истнит я яко телца Ливанска: и возлюбленный яко сын единорожь.
Пс.28:7 Глас Господа, пресецающаго пламень огня.
Пс.28:8 Глас Господа, стрясающаго пустыню: и стрясет Господь пустыню Каддийскую.
Пс.28:9 Глас Господень, свершающий елени, и открыет дубравы: и в храме Его всякий глаголет славу.
Пс.28:10 Господь потоп населяет, и сядет Господь царь в век.
Пс.28:11 Господь крепость людем Своим даст, Господь благословит люди Своя миром.
Пс.29:1 Псалом песни обновления дому Давидова.
Пс.29:2 Вознесу Тя, Господи, яко подъял мя еси, и не возвеселил еси врагов моих о мне.
Пс.29:3 Господи Боже мой, воззвах к Тебе, и изцелил мя еси.
Пс.29:4 Господи, возвел еси от ада душу мою, спасл мя еси от низходящих в ров.
Пс.29:5 Пойте Господеви, преподобнии Его, и исповедайте память святыни Его:
Пс.29:6 яко гнев в ярости Его, и живот в воли Его: вечер водворится плачь, и заутра радость.
Пс.29:7 Аз же рех во обилии моем: не подвижуся во век.
Пс.29:8 Господи, волею Твоею подаждь доброте моей силу: отвратил же еси лице Твое, и бых смущен.
Пс.29:9 К Тебе, Господи, воззову, и к Богу моему помолюся.
Пс.29:10 Кая польза в крови моей, внегда сходити ми во истление? Еда исповестся Тебе персть? Или возвестит истину Твою?
Пс.29:11 Слыша Господь и помилова мя: Господь бысть помощник мой.
Пс.29:12 Обратил еси плачь мой в радость мне, растерзал еси вретище мое и препоясал мя еси веселием,
Пс.29:13 яко да воспоет Тебе слава моя, и не умилюся. Господи Боже мой, во век исповемся Тебе.
Пс.30:1 В конец, псалом Давиду, изступления.
Пс.30:2 На Тя, Господи, уповах, да не постыжуся во век: правдою Твоею избави мя и изми мя.
Пс.30:3 Приклони ко мне ухо Твое, ускори изъяти мя: буди ми в Бога защитителя и в дом прибежища, еже спасти мя.
Пс.30:4 Яко держава моя и прибежище мое еси Ты: и имене Твоего ради наставиши мя и препитаеши мя.
Пс.30:5 Изведеши мя от сети сея, юже скрыша ми: яко Ты еси защититель мой, Господи.
Пс.30:6 В руце Твои предложу дух мой: избавил мя еси, Господи Боже истины.
Пс.30:7 Возненавидел еси хранящыя суеты вотще: аз же на Господа уповах.
Пс.30:8 Возрадуюся и возвеселюся о милости Твоей, яко призрел еси на смирение мое, спасл еси от нужд душу мою
Пс.30:9 и неси мене затворил в руках вражиих, поставил еси на пространне нозе мои.
Пс.30:10 Помилуй мя, Господи, яко скорблю: смятеся яростию око мое, душа моя и утроба моя.
Пс.30:11 Яко изчезе в болезни живот мой, и лета моя в воздыханиих: изнеможе нищетою крепость моя, и кости моя смятошася.
Пс.30:12 От всех враг моих бых поношение, и соседом моим зело, и страх знаемым моим: видящии мя вон бежаша от мене.
Пс.30:13 Забвен бых яко мертв от сердца: бых яко сосуд погублен.
Пс.30:14 Яко слышах гаждение многих живущих окрест: внегда собратися им вкупе на мя, прияти душу мою совещаша.
Пс.30:15 Аз же на Тя, Господи, уповах, рех: Ты еси Бог мой.
Пс.30:16 В руку Твоею жребии мои: избави мя из руки враг моих и от гонящих мя.
Пс.30:17 Просвети лице Твое на раба Твоего: спаси мя милостию Твоею.
Пс.30:18 Господи, да не постыжуся, яко призвах Тя: да постыдятся нечестивии, и снидут во ад.
Пс.30:19 Немы да будут устны льстивыя, глаголющыя на праведнаго беззаконие, гордынею и уничижением.
Пс.30:20 Коль многое множество благости Твоея, Господи, юже скрыл еси боящымся Тебе, соделал еси уповающым на Тя, пред сыны человеческими:
Пс.30:21 скрыеши их в тайне лица Твоего от мятежа человеческа, покрыеши их в крове от пререкания язык.
Пс.30:22 Благословен Господь, яко удиви милость Свою во граде ограждения.
Пс.30:23 Аз же рех во изступлении моем: отвержен есмь от лица очию Твоею: сего ради услышал еси глас молитвы моея, внегда воззвах к Тебе.
Пс.30:24 Возлюбите Господа, вси преподобнии Его: яко истины взыскает Господь и воздает излише творящым гордыню.
Пс.30:25 Мужайтеся, и да крепится сердце ваше, вси уповающии на Господа.
Пс.31:1 Блажени, ихже оставишася беззакония, и ихже прикрышася греси.
Пс.31:2 Блажен муж, емуже не вменит Господь греха, ниже есть во устех его лесть.
Пс.31:3 Яко умолчах, обетшаша кости моя, от еже звати ми весь день,
Пс.31:4 яко день и нощь отяготе на мне рука Твоя: возвратихся на страсть, егда унзе ми терн.
Пс.31:5 Беззаконие мое познах и греха моего не покрых, рех: исповем на мя беззаконие мое Господеви: и Ты оставил еси нечестие сердца моего.
Пс.31:6 За то помолится к Тебе всяк преподобный во время благопотребно: обаче в потопе вод многих к нему не приближатся.
Пс.31:7 Ты еси прибежище мое от скорби обдержащия мя: радосте моя, избави мя от обышедших мя.
Пс.31:8 Вразумлю тя, и наставлю тя на путь сей, в оньже пойдеши: утвержу на тя очи Мои.
Пс.31:9 Не будите яко конь и меск, имже несть разума: броздами и уздою челюсти их востягнеши, не приближающихся к тебе.
Пс.31:10 Многи раны грешному: уповающаго же на Господа милость обыдет.
Пс.31:11 Веселитеся о Господе и радуйтеся праведнии, и хвалитеся, вси правии сердцем.
Пс.32:1 Радуйтеся, праведнии, о Господе: правым подобает похвала.
Пс.32:2 Исповедайтеся Господеви в гуслех, во псалтири десятоструннем пойте Ему:
Пс.32:3 воспойте Ему песнь нову, добре пойте Ему со восклицанием:
Пс.32:4 яко право слово Господне, и вся дела Его в вере.
Пс.32:5 Любит милостыню и суд Господь, милости Господни исполнь земля.
Пс.32:6 Словом Господним небеса утвердишася, и духом уст Его вся сила их:
Пс.32:7 собираяй яко мех воды морския, полагаяй в сокровищих бездны.
Пс.32:8 Да убоится Господа вся земля, от Негоже да подвижутся вси живущии по вселенней:
Пс.32:9 яко Той рече, и быша: Той повеле, и создашася.
Пс.32:10 Господь разоряет советы языков, отметает же мысли людий и отметает советы князей.
Пс.32:11 Совет же Господень во век пребывает, помышления сердца Его в род и род.
Пс.32:12 Блажен язык, емуже есть Господь Бог Его, людие, яже избра в наследие Себе.
Пс.32:13 С небесе призре Господь, виде вся сыны человеческия:
Пс.32:14 от готоваго жилища Своего призре на вся живущыя на земли:
Пс.32:15 создавый на едине сердца их, разумеваяй на вся дела их.
Пс.32:16 Не спасается царь многою силою, и исполин не спасется множеством крепости своея.
Пс.32:17 Ложь конь во спасение, во множестве же силы своея не спасется.
Пс.32:18 Се, очи Господни на боящыяся Его, уповающыя на милость Его:
Пс.32:19 избавити от смерти душы их, и препитати я в глад.
Пс.32:20 Душа же наша чает Господа, яко помощник и защититель наш есть:
Пс.32:21 яко о Нем возвеселится сердце наше, и во имя святое Его уповахом.
Пс.32:22 Буди, Господи, милость Твоя на нас, якоже уповахом на Тя.
Пс.33:1 Псалом Давиду, внегда измени лице свое пред Авимелехом: и отпусти его, и отъиде.
Пс.33:2 Благословлю Господа на всякое время, выну хвала Его во устех моих.
Пс.33:3 О Господе похвалится душа моя: да услышат кротцыи и возвеселятся.
Пс.33:4 Возвеличите Господа со мною, и вознесем имя Его вкупе.
Пс.33:5 Взысках Господа, и услыша мя и от всех скорбей моих избави мя.
Пс.33:6 Приступите к Нему и просветитеся, и лица ваша не постыдятся.
Пс.33:7 Сей нищий воззва, и Господь услыша и, и от всех скорбей его спасе и.
Пс.33:8 Ополчится Ангел Господень окрест боящихся Его и избавит их.
Пс.33:9 Вкусите и видите, яко благ Господь: блажен муж, иже уповает Нань.
Пс.33:10 Бойтеся Господа, вси святии Его, яко несть лишения боящымся Его.
Пс.33:11 Богатии обнищаша и взалкаша: взыскающии же Господа не лишатся всякаго блага.
Пс.33:12 Приидите, чада, послушайте мене, страху Господню научу вас.
Пс.33:13 Кто есть человек хотяй живот, любяй дни видети благи?
Пс.33:14 Удержи язык твой от зла и устне твои, еже не глаголати льсти.
Пс.33:15 Уклонися от зла и сотвори благо: взыщи мира и пожени и.
Пс.33:16 Очи Господни на праведныя, и уши Его в молитву их.
Пс.33:17 Лице же Господне на творящыя злая, еже потребити от земли память их.
Пс.33:18 Воззваша праведнии, и Господь услыша их и от всех скорбей их избави их.
Пс.33:19 Близ Господь сокрушенных сердцем, и смиренныя духом спасет.
Пс.33:20 Многи скорби праведным, и от всех их избавит я Господь.
Пс.33:21 Хранит Господь вся кости их, ни едина от них сокрушится.
Пс.33:22 Смерть грешников люта, и ненавидящии праведнаго прегрешат.
Пс.33:23 Избавит Господь душы раб Своих, и не прегрешат вси уповающии на Него.
Пс.34:1 Суди, Господи, обидящыя мя, побори борющыя мя.
Пс.34:2 Приими оружие и щит и востани в помощь мою:
Пс.34:3 изсуни мечь и заключи сопротив гонящих мя: рцы души моей: спасение твое есмь Аз.
Пс.34:4 Да постыдятся и посрамятся ищущии душу мою, да возвратятся вспять и постыдятся мыслящии ми злая.
Пс.34:5 Да будут яко прах пред лицем ветра, и Ангел Господень оскорбляя их:
Пс.34:6 да будет путь их тма и ползок, и Ангел Господень погоняяй их:
Пс.34:7 яко туне скрыша ми пагубу сети своея, всуе поносиша души моей.
Пс.34:8 Да приидет ему сеть, юже не весть, и ловитва, юже скры, да обымет и, и в сеть да впадет в ню.
Пс.34:9 Душа же моя возрадуется о Господе, возвеселится о спасении Его.
Пс.34:10 Вся кости моя рекут: Господи, Господи, кто подобен Тебе? Избавляяй нища из руки крепльших его, и нища, и убога от расхищающих его.
Пс.34:11 Воставше на мя свидетеле неправеднии, яже не ведях, вопрошаху мя.
Пс.34:12 Воздаша ми лукавая воз благая, и безчадие души моей.
Пс.34:13 Аз же, внегда они стужаху ми, облачахся во вретище и смирях постом душу мою, и молитва моя в недро мое возвратится.
Пс.34:14 Яко ближнему, яко брату нашему, тако угождах: яко плачя и сетуя, тако смиряхся.
Пс.34:15 И на мя возвеселишася и собрашася: собрашася на мя раны, и не познах: разделишася, и не умилишася.
Пс.34:16 Искусиша мя, подражниша мя подражнением, поскрежеташа на мя зубы своими.
Пс.34:17 Господи, когда узриши? Устрой душу мою от злодейства их, от лев единородную мою.
Пс.34:18 Исповемся Тебе в церкви мнозе, в людех тяжцех восхвалю Тя.
Пс.34:19 Да не возрадуются о мне враждующии ми неправедно, ненавидящии мя туне и помизающии очима:
Пс.34:20 яко мне убо мирная глаголаху, и на гнев лести помышляху.
Пс.34:21 Разшириша на мя уста своя, реша: благоже, благоже, видеша очи наши.
Пс.34:22 Видел еси, Господи, да не премолчиши: Господи, не отступи от мене.
Пс.34:23 Востани, Господи, и вонми суду моему, Боже мой и Господи мой, на прю мою.
Пс.34:24 Суди ми, Господи, по правде Твоей, Господи Боже мой, и да не возрадуются о мне.
Пс.34:25 Да не рекут в сердцах своих: благоже, благоже души нашей: ниже да рекут: пожрохом его.
Пс.34:26 Да постыдятся и посрамятся вкупе радующиися злом моим: да облекутся в студ и срам велеречующии на мя.
Пс.34:27 Да возрадуются и возвеселятся хотящии правды моея: и да рекут выну, да возвеличится Господь, хотящии мира рабу Его.
Пс.34:28 И язык мой поучится правде Твоей, весь день хвале Твоей.
Пс.35:1 В конец, отроку Господню Давиду.
Пс.35:2 Глаголет пребеззаконный согрешати в себе: несть страха Божия пред очима его:
Пс.35:3 яко ульсти пред ним обрести беззаконие свое, и возненавидети.
Пс.35:4 Глаголы уст его беззаконие и лесть: не восхоте разумети еже ублажити.
Пс.35:5 Беззаконие помысли на ложи своем: предста всякому пути неблагу, о злобе же не негодова.
Пс.35:6 Господи, на небеси милость Твоя, и истина Твоя до облак:
Пс.35:7 правда Твоя яко горы Божия, судьбы Твоя бездна многа: человеки и скоты спасеши, Господи.
Пс.35:8 Яко умножил еси милость Твою, Боже: сынове же человечестии в крове крилу Твоею надеятися имут.
Пс.35:9 Упиются от тука дому Твоего, и потоком сладости Твоея напоиши я.
Пс.35:10 Яко у Тебе источник живота, во свете Твоем узрим свет.
Пс.35:11 Пробави милость Твою ведущым Тя и правду Твою правым сердцем.
Пс.35:12 Да не приидет мне нога гордыни, и рука грешнича да не подвижит мене.
Пс.35:13 Тамо падоша вси делающии беззаконие: изриновени быша, и не возмогут стати.
Пс.36:1 Не ревнуй лукавнующым, ниже завиди творящым беззаконие.
Пс.36:2 Зане яко трава скоро изсшут, и яко зелие злака скоро отпадут.
Пс.36:3 Уповай на Господа и твори благостыню: и насели землю, и упасешися в богатстве ея.
Пс.36:4 Насладися Господеви, и даст ти прошения сердца твоего.
Пс.36:5 Открый ко Господу путь твой и уповай на Него, и Той сотворит.
Пс.36:6 И изведет яко свет правду твою и судьбу твою яко полудне.
Пс.36:7 Повинися Господеви и умоли Его. Не ревнуй спеющему в пути своем, человеку творящему законопреступление.
Пс.36:8 Престани от гнева и остави ярость: не ревнуй, еже лукавновати,
Пс.36:9 зане лукавнующии потребятся, терпящии же Господа, тии наследят землю.
Пс.36:10 И еще мало, и не будет грешника: и взыщеши место его и не обрящеши.
Пс.36:11 Кротцыи же наследят землю и насладятся о множестве мира.
Пс.36:12 Назирает грешный праведнаго и поскрежещет нань зубы своими:
Пс.36:13 Господь же посмеется ему, зане прозирает, яко приидет день его.
Пс.36:14 Мечь извлекоша грешницы, напрягоша лук свой, низложити убога и нища, заклати правыя сердцем.
Пс.36:15 Мечь их да внидет в сердца их, и луцы их да сокрушатся.
Пс.36:16 Лучше малое праведнику, паче богатства грешных многа.
Пс.36:17 Зане мышцы грешных сокрушатся, утверждает же праведныя Господь.
Пс.36:18 Весть Господь пути непорочных, и достояние их в век будет.
Пс.36:19 Не постыдятся во время лютое и во днех глада насытятся, яко грешницы погибнут.
Пс.36:20 Врази же Господни, купно прославитися им и вознестися, изчезающе яко дым изчезоша.
Пс.36:21 Заемлет грешный и не возвратит: праведный же щедрит и дает.
Пс.36:22 Яко благословящии Его наследят землю, кленущии же Его потребятся.
Пс.36:23 От Господа стопы человеку исправляются, и пути Его восхощет зело.
Пс.36:24 Егда падет, не разбиется, яко Господь подкрепляет руку его.
Пс.36:25 Юнейший бых, ибо состарехся, и не видех праведника оставлена, ниже семене его просяща хлебы.
Пс.36:26 Весь день милует и взаим дает праведный, и семя его во благословение будет.
Пс.36:27 Уклонися от зла и сотвори благо, и вселися в век века.
Пс.36:28 Яко Господь любит суд и не оставит преподобных Своих: во век сохранятся: беззаконницы же изженутся, и семя нечестивых потребится.
Пс.36:29 Праведницы же наследят землю и вселятся в век века на ней.
Пс.36:30 Уста праведнаго поучатся премудрости, и язык его возглаголет суд.
Пс.36:31 Закон Бога его в сердце его, и не запнутся стопы его.
Пс.36:32 Сматряет грешный праведнаго и ищет еже умертвити его:
Пс.36:33 Господь же не оставит его в руку его, ниже осудит его, егда судит ему.
Пс.36:34 Потерпи Господа и сохрани путь Его, и вознесет тя еже наследити землю: внегда потреблятися грешником, узриши.
Пс.36:35 Видех нечестиваго превозносящася и высящася яко кедры Ливанския:
Пс.36:36 и мимо идох, и се, не бе, и взысках его, и не обретеся место его.
Пс.36:37 Храни незлобие и виждь правоту, яко есть останок человеку мирну.
Пс.36:38 Беззаконницы же потребятся вкупе: останцы же нечестивых потребятся.
Пс.36:39 Спасение же праведных от Господа, и защититель их есть во время скорби:
Пс.36:40 и поможет им Господь и избавит их, и измет их от грешник и спасет их, яко уповаша на Него.
Пс.37:1 Псалом Давиду, в воспоминание о субботе.
Пс.37:2 Господи, да не яростию Твоею обличиши мене, ниже гневом Твоим накажеши мене:
Пс.37:3 яко стрелы Твоя унзоша во мне, и утвердил еси на мне руку Твою.
Пс.37:4 Несть изцеления в плоти моей от лица гнева Твоего, несть мира в костех моих от лица грех моих.
Пс.37:5 Яко беззакония моя превзыдоша главу мою, яко бремя тяжкое отяготеша на мне.
Пс.37:6 Возсмердеша и согниша раны моя, от лица безумия моего.
Пс.37:7 Пострадах и слякохся до конца, весь день сетуя хождах:
Пс.37:8 яко лядвия моя наполнишася поруганий, и несть изцеления в плоти моей.
Пс.37:9 Озлоблен бых и смирихся до зела, рыках от воздыхания сердца моего.
Пс.37:10 Господи, пред Тобою все желание мое, и воздыхание мое от Тебе не утаися.
Пс.37:11 Сердце мое смятеся, остави мя сила моя, и свет очию моею, и той несть со мною.
Пс.37:12 Друзи мои и искреннии мои прямо мне приближишася и сташа.
Пс.37:13 И ближнии мои отдалече мене сташа, и нуждахуся ищущии душу мою: и ищущии злая мне глаголаху суетная, и льстивным весь день поучахуся.
Пс.37:14 Аз же яко глух не слышах, и яко нем не отверзаяй уст своих:
Пс.37:15 и бых яко человек не слышай и не имый во устех своих обличения.
Пс.37:16 Яко на Тя, Господи, уповах, Ты услышиши, Господи Боже мой.
Пс.37:17 Яко рех: да не когда порадуютмися врази мои: и внегда подвижатися ногам моим, на мя велеречеваша.
Пс.37:18 Яко аз на раны готов, и болезнь моя предо мною есть выну.
Пс.37:19 Яко беззаконие мое аз возвещу и попекуся о гресе моем.
Пс.37:20 Врази же мои живут и укрепишася паче мене, и умножишася ненавидящии мя без правды:
Пс.37:21 воздающии ми злая воз благая оболгаху мя, зане гонях благостыню.
Пс.37:22 Не остави мене, Господи Боже мой, не отступи от мене:
Пс.37:23 вонми в помощь мою, Господи спасения моего.
Пс.38:1 В конец, Идифуму, песнь Давиду.
Пс.38:2 Рех: сохраню пути моя, еже не согрешати ми языком моим: положих устом моим хранило, внегда востати грешному предо мною.
Пс.38:3 Онемех и смирихся, и умолчах от благ, и болезнь моя обновися.
Пс.38:4 Согреяся сердце мое во мне, и в поучении моем разгорится огнь: глаголах языком моим:
Пс.38:5 скажи ми, Господи, кончину мою и число дний моих, кое есть, да разумею, что лишаюся аз.
Пс.38:6 Се, пяди положил еси дни моя, и состав мой яко ничтоже пред Тобою: обаче всяческая суета всяк человек живый.
Пс.38:7 Убо образом ходит человек, обаче всуе мятется: сокровищствует, и не весть, кому соберет я.
Пс.38:8 И ныне кто терпение мое? Не Господь ли? И состав мой от Тебе есть.
Пс.38:9 От всех беззаконий моих избави мя: поношение безумному дал мя еси.
Пс.38:10 Онемех и не отверзох уст моих, яко Ты сотворил еси.
Пс.38:11 Отстави от мене раны Твоя: от крепости бо руки Твоея аз изчезох.
Пс.38:12 Во обличениих о беззаконии наказал еси человека, и истаял еси яко паучину душу его: обаче всуе всяк человек.
Пс.38:13 Услыши молитву мою, Господи, и моление мое внуши, слез моих не премолчи: яко преселник аз есмь у Тебе и пришлец, якоже вси отцы мои.
Пс.38:14 Ослаби ми, да почию, прежде даже не отиду, и ктому не буду.
Пс.39:1 В конец, псалом Давиду.
Пс.39:2 Терпя потерпех Господа, и внят ми и услыша молитву мою:
Пс.39:3 и возведе мя от рова страстей и от брения тины, и постави на камени нозе мои и исправи стопы моя:
Пс.39:4 и вложи во уста моя песнь нову, пение Богу нашему. Узрят мнози и убоятся, и уповают на Господа.
Пс.39:5 Блажен муж, емуже есть имя Господне упование его, и не призре в суеты и неистовления ложная.
Пс.39:6 Многа сотворил еси Ты, Господи Боже мой, чудеса Твоя, и помышлением Твоим несть кто уподобится Тебе: возвестих и глаголах: умножишася паче числа.
Пс.39:7 Жертвы и приношения не восхотел еси, тело же свершил ми еси: всесожжений и о гресе не взыскал еси.
Пс.39:8 Тогда рех: се, прииду: в главизне книжне писано есть о мне:
Пс.39:9 еже сотворити волю Твою, Боже мой, восхотех, и закон Твой посреде чрева моего.
Пс.39:10 Благовестих правду в церкви велицей, се, устнам моим не возбраню: Господи, Ты разумел еси.
Пс.39:11 Правду Твою не скрых в сердцы моем, истину Твою и спасение Твое рех, не скрых милость Твою и истину Твою от сонма многа.
Пс.39:12 Ты же, Господи, не удали щедрот Твоих от мене: милость Твоя и истина Твоя выну да заступите мя.
Пс.39:13 Яко одержаша мя злая, имже несть числа: постигоша мя беззакония моя, и не возмогох зрети: умножишася паче влас главы моея, и сердце мое остави мя.
Пс.39:14 Благоволи, Господи, избавити мя: Господи, во еже помощи ми, вонми.
Пс.39:15 Да постыдятся и посрамятся вкупе ищущии душу мою, изъяти ю: да возвратятся вспять и постыдятся хотящии ми злая.
Пс.39:16 Да приимут абие студ свой глаголющии ми: благоже, благоже.
Пс.39:17 Да возрадуются и возвеселятся о Тебе вси ищущии Тебе, Господи, и да рекут выну, да возвеличится Господь, любящии спасение Твое.
Пс.39:18 Аз же нищ есмь и убог, Господь попечется о мне: помощник мой и защититель мой еси ты, Боже мой, не закосни.
Пс.40:1 В конец, псалом Давиду.
Пс.40:2 Блажен разумеваяй на нища и убога, в день лют избавит его Господь.
Пс.40:3 Господь да сохранит его и живит его, и да ублажит его на земли и да не предаст его в руки врагов его.
Пс.40:4 Господь да поможет ему на одре болезни его: все ложе его обратил еси в болезни его.
Пс.40:5 Аз рех: Господи, помилуй мя, изцели душу мою, яко согреших Ти.
Пс.40:6 Врази мои реша мне злая: когда умрет, и погибнет имя его?
Пс.40:7 И вхождаше видети, всуе глаголаше сердце его: собра беззаконие себе, исхождаше вон и глаголаше вкупе.
Пс.40:8 На мя шептаху вси врази мои, на мя помышляху злая мне.
Пс.40:9 Слово законопреступное возложиша на мя: еда спяй не приложит воскреснути?
Пс.40:10 Ибо человек мира моего, на негоже уповах, ядый хлебы моя, возвеличи на мя запинание.
Пс.40:11 Ты же, Господи, помилуй мя и возстави мя, и воздам им.
Пс.40:12 В сем познах, яко восхотел мя еси, яко не возрадуется враг мой о мне.
Пс.40:13 Мене же за незлобие приял, и утвердил мя еси пред Тобою в век.
Пс.40:14 Благословен Господь Бог Израилев от века и до века: буди, буди.
Пс.41:1 В конец, в разум сынов Кореовых, псалом Давиду.
Пс.41:2 Имже образом желает елень на источники водныя, сице желает душа моя к Тебе, Боже.
Пс.41:3 Возжада душа моя к Богу крепкому, живому: когда прииду и явлюся лицу Божию?
Пс.41:4 Быша слезы моя мне хлеб день и нощь, внегда глаголатися мне на всяк день: где есть Бог твой?
Пс.41:5 Сия помянух, и излиях на мя душу мою: яко пройду в место селения дивна, даже до дому Божия, во гласе радования и исповедания, шума празднующаго.
Пс.41:6 Вскую прискорбна еси, душе моя? И вскую смущаеши мя? Уповай на Бога, яко исповемся Ему, спасение лица моего и Бог мой.
Пс.41:7 Ко мне самому душа моя смятеся: сего ради помянух Тя от земли Иордански и Ермониимски, от горы Малыя.
Пс.41:8 Бездна бездну призывает во гласе хлябий Твоих: вся высоты Твоя и волны Твоя на мне преидоша.
Пс.41:9 В день заповесть Господь милость Свою, и нощию песнь Его от мене, молитва Богу живота моего.
Пс.41:10 Реку Богу: заступник мой еси, почто мя забыл еси? И вскую сетуя хожду, внегда оскорбляет враг?
Пс.41:11 Внегда сокрушатися костем моим, поношаху ми врази мои, внегда глаголати им мне на всяк день: где есть Бог твой?
Пс.41:12 Вскую прискорбна еси, душе моя? И вскую смущаеши мя? Уповай на Бога, яко исповемся Ему, спасение лица моего и Бог мой.
Пс.42:1 Суди ми, Боже, и разсуди прю мою: от языка не преподобна, от человека неправедна и льстива избави мя.
Пс.42:2 Зане Ты еси, Боже, крепость моя, вскую отринул мя еси? И вскую сетуя хожду, внегда оскорбляет враг?
Пс.42:3 Посли свет Твой и истину Твою: та мя настависта, и введоста мя в гору святую Твою и в селения Твоя.
Пс.42:4 И вниду к жертвеннику Божию, к Богу веселящему юность мою: исповемся Тебе в гуслех, Боже, Боже мой.
Пс.42:5 Вскую прискорбна еси, душе моя? И вскую смущаеши мя? Уповай на Бога, яко исповемся Ему, спасение лица моего и Бог мой.
Пс.43:1 В конец, сынов Кореовых, в разум, псалом.
Пс.43:2 Боже, ушима нашима услышахом, и отцы наши возвестиша нам дело, еже соделал еси во днех их, во днех древних.
Пс.43:3 Рука Твоя языки потреби, и насадил я еси: озлобил еси люди и изгнал еси я.
Пс.43:4 Не бо мечем своим наследиша землю, и мышца их не спасе их, но десница Твоя и мышца Твоя и просвещение лица Твоего, яко благоволил еси в них.
Пс.43:5 Ты еси сам Царь мой и Бог мой, заповедаяй спасения Иаковля.
Пс.43:6 О Тебе враги нашя избодем роги, и о имени Твоем уничижим востающыя на ны.
Пс.43:7 Не на лук бо мой уповаю, и мечь мой не спасет мене:
Пс.43:8 спасл бо еси нас от стужающих нам, и ненавидящих нас посрамил еси.
Пс.43:9 О Бозе похвалимся весь день, и о имени Твоем исповемыся во век.
Пс.43:10 Ныне же отринул еси и посрамил еси нас, и не изыдеши, Боже, в силах наших.
Пс.43:11 Возвратил еси нас вспять при вразех наших, и ненавидящии нас расхищаху себе.
Пс.43:12 Дал еси нас яко овцы снеди, и во языцех разсеял ны еси.
Пс.43:13 Отдал еси люди Твоя без цены, и не бе множество в восклицаниих наших.
Пс.43:14 Положил еси нас поношение соседом нашым, подражнение и поругание сущым окрест нас.
Пс.43:15 Положил еси нас в притчу во языцех, покиванию главы в людех.
Пс.43:16 Весь день срам мой предо мною есть, и студ лица моего покры мя,
Пс.43:17 от гласа поношающаго и оклеветающаго, от лица вражия и изгонящаго.
Пс.43:18 Сия вся приидоша на ны, и не забыхом Тебе, и не неправдовахом в завете Твоем,
Пс.43:19 и не отступи вспять сердце наше: и уклонил еси стези нашя от пути Твоего,
Пс.43:20 яко смирил еси нас на месте озлобления, и прикры ны сень смертная.
Пс.43:21 Аще забыхом имя Бога нашего, и аще воздехом руки нашя к богу чуждему,
Пс.43:22 не Бог ли взыщет сих? Той бо весть тайная сердца.
Пс.43:23 Зане Тебе ради умерщвляемся весь день, вменихомся яко овцы заколения.
Пс.43:24 Востани, вскую спиши, Господи? Воскресни, и не отрини до конца.
Пс.43:25 Вскую лице Твое отвращаеши? Забываеши нищету нашу и скорбь нашу?
Пс.43:26 Яко смирися в персть душа наша, прильпе земли утроба наша.
Пс.43:27 Воскресни, Господи, помози нам, и избави нас имене ради Твоего.
Пс.44:1 В конец, о изменяемых сыном Кореовым в разум, песнь о возлюбленнем.
Пс.44:2 Отрыгну сердце мое слово благо, глаголю аз дела моя Цареви: язык мой трость книжника скорописца.
Пс.44:3 Красен добротою паче сынов человеческих, излияся благодать во устнах Твоих: сего ради благослови Тя Бог во век.
Пс.44:4 Препояши мечь Твой по бедре Твоей, Сильне,
Пс.44:5 красотою Твоею и добротою Твоею: и наляцы, и успевай, и царствуй истины ради и кротости и правды: и наставит Тя дивно десница Твоя.
Пс.44:6 Стрелы Твоя изощрены, Сильне: людие под Тобою падут в сердцы враг Царевых.
Пс.44:7 Престол Твой, Боже, в век века: жезл правости жезл царствия Твоего.
Пс.44:8 Возлюбил еси правду и возненавидел еси беззаконие: сего ради помаза Тя, Боже, Бог Твой елеем радости паче причастник Твоих.
Пс.44:9 Смирна и стакти и касиа от риз Твоих, от тяжестей слоновых, из нихже возвеселиша Тя.
Пс.44:10 Дщери царей в чести Твоей: предста царица одесную Тебе, в ризах позлащенных одеяна преиспещрена.
Пс.44:11 Слыши, дщи, и виждь, и приклони ухо твое, и забуди люди твоя и дом отца твоего:
Пс.44:12 и возжелает Царь доброты твоея, зане Той есть Господь твой, и поклонишися Ему,
Пс.44:13 и дщи Тирова с дары: лицу Твоему помолятся богатии людстии.
Пс.44:14 Вся слава дщере Царевы внутрь: рясны златыми одеяна и преиспещрена.
Пс.44:15 Приведутся Царю девы вслед ея, искренния ея приведутся Тебе:
Пс.44:16 приведутся в веселии и радовании, введутся в храм Царев.
Пс.44:17 Вместо отец Твоих быша сынове Твои: поставиши я князи по всей земли.
Пс.44:18 Помяну имя Твое во всяком роде и роде: сего ради людие исповедятся Тебе в век и во век века.
Пс.45:1 В конец, о сынех Кореовых, о тайных, псалом.
Пс.45:2 Бог нам прибежище и сила, помощник в скорбех обретших ны зело.
Пс.45:3 Сего ради не убоимся, внегда смущается земля, и прелагаются горы в сердца морская.
Пс.45:4 Возшумеша и смятошася воды их, смятошася горы крепостию его.
Пс.45:5 Речная устремления веселят град Божий: освятил есть селение свое Вышний.
Пс.45:6 Бог посреде его, и не подвижится: поможет ему Бог утро заутра.
Пс.45:7 Смятошася языцы, уклонишася царствия: даде глас Свой Вышний, подвижеся земля.
Пс.45:8 Господь сил с нами, заступник наш Бог Иаковль.
Пс.45:9 Приидите и видите дела Божия, яже положи чудеса на земли:
Пс.45:10 отъемля брани до конец земли, лук сокрушит и сломит оружие, и щиты сожжет огнем.
Пс.45:11 Упразднитеся и разумейте, яко Аз есмь Бог: вознесуся во языцех, вознесуся на земли.
Пс.45:12 Господь сил с нами, заступник наш Бог Иаковль.
Пс.119:1 Ко Господу, внегда скорбети ми, воззвах, и услыша мя.
Пс.119:2 Господи, избави душу мою от устен неправедных и от языка льстива.
Пс.119:3 Что дастся тебе, или что приложится тебе к языку льстиву?
Пс.119:4 Стрелы сильнаго изощрены, со угльми пустынными.
Пс.119:5 Увы мне, яко пришелствие мое продолжися, вселихся с селении Кидарскими:
Пс.119:6 много пришелствова душа моя: с ненавидящими мира бех мирен:
Пс.119:7 егда глаголах им, боряху мя туне.
Пс.120:1 Возведох очи мои в горы, отнюдуже приидет помощь моя.
Пс.120:2 Помощь моя от Господа, сотворшаго небо и землю.
Пс.120:3 Не даждь во смятение ноги твоея, ниже воздремлет храняй тя:
Пс.120:4 се, не воздремлет, ниже уснет храняй Израиля.
Пс.120:5 Господь сохранит тя, Господь покров твой на руку десную твою.
Пс.120:6 Во дни солнце не ожжет тебе, ниже луна нощию.
Пс.120:7 Господь сохранит тя от всякаго зла, сохранит душу твою Господь:
Пс.120:8 Господь сохранит вхождение твое и исхождение твое, отныне и до века.
Пс.121:1 Возвеселихся о рекших мне: в дом Господень пойдем.
Пс.121:2 Стояще бяху ноги нашя во дворех твоих, Иерусалиме.
Пс.121:3 Иерусалим зиждемый яко град, емуже причастие его вкупе.
Пс.121:4 Тамо бо взыдоша колена, колена Господня, свидение Израилево, исповедатися имени Господню:
Пс.121:5 яко тамо седоша престоли на суд, престоли в дому Давидове.
Пс.121:6 Вопросите же яже о мире Иерусалима: и обилие любящым тя.
Пс.121:7 Буди же мир в силе твоей, и обилие в столпостенах твоих.
Пс.121:8 Ради братий моих и ближних моих глаголах убо мир о тебе.
Пс.121:9 Дому ради Господа Бога нашего взысках благая тебе.
Пс.122:1 К Тебе возведох очи мои, Живущему на небеси.
Пс.122:2 Се, яко очи раб в руку господий своих, яко очи рабыни в руку госпожи своея: тако очи наши ко Господу Богу нашему, дондеже ущедрит ны.
Пс.122:3 Помилуй нас, Господи, помилуй нас, яко помногу исполнихомся уничижения:
Пс.122:4 наипаче наполнися душа наша поношения гобзующих и уничижения гордых.
Пс.123:1 Яко аще не Господь бы был в нас, да речет убо Израиль:
Пс.123:2 яко аще не Господь бы был в нас, внегда востати человеком на ны, убо живых пожерли быша нас:
Пс.123:3 внегда прогневатися ярости их на ны, убо вода потопила бы нас.
Пс.123:4 Поток прейде душа наша:
Пс.123:5 убо прейде душа наша воду непостоянную.
Пс.123:6 Благословен Господь, иже не даде нас в ловитву зубом их.
Пс.123:7 Душа наша яко птица избавися от сети ловящих: сеть сокрушися, и мы избавлени быхом.
Пс.123:8 Помощь наша во имя Господа, сотворшаго небо и землю.
Пс.124:1 Надеющиися на Господа, яко гора Сион: не подвижится в век живый во Иерусалиме.
Пс.124:2 Горы окрест его, и Господь окрест людий Своих, отныне и до века.
Пс.124:3 Яко не оставит Господь жезла грешных на жребий праведных, яко да не прострут праведнии в беззакония рук своих.
Пс.124:4 Ублажи, Господи, благия и правыя сердцем.
Пс.124:5 Уклоняющыяся же в развращения отведет Господь с делающими беззаконие: мир на Израиля.
Пс.125:1 Внегда возвратити Господу плен Сионь, быхом яко утешени.
Пс.125:2 Тогда исполнишася радости уста наша, и язык наш веселия: тогда рекут во языцех: возвеличил есть Господь сотворити с ними.
Пс.125:3 Возвеличил есть Господь сотворити с нами: быхом веселящеся.
Пс.125:4 Возврати, Господи, пленение наше, яко потоки югом.
Пс.125:5 Сеющии слезами, радостию пожнут.
Пс.125:6 Ходящии хождаху и плакахуся, метающе семена своя: грядуще же приидут радостию, вземлюще рукояти своя.
Пс.126:1 Аще не Господь созиждет дом, всуе трудишася зиждущии: аще не Господь сохранит град, всуе бде стрегий.
Пс.126:2 Всуе вам есть утреневати: востанете по седении ядущии хлеб болезни, егда даст возлюбленным Своим сон.
Пс.126:3 Се, достояние Господне сынове, мзда плода чревняго.
Пс.126:4 Яко стрелы в руце сильнаго, тако сынове оттрясенных.
Пс.126:5 Блажен, иже исполнит желание свое от них: не постыдятся, егда глаголют врагом своим во вратех.
Пс.127:1 Блажени вси боящиися Господа, ходящии в путех Его:
Пс.127:2 труды плодов твоих снеси: блажен еси, и добро тебе будет.
Пс.127:3 Жена твоя яко лоза плодовита в странах дому твоего: сынове твои яко новосаждения масличная окрест трапезы твоея.
Пс.127:4 Се, тако благословится человек бояйся Господа.
Пс.127:5 Благословит тя Господь от Сиона, и узриши благая Иерусалима вся дни живота твоего,
Пс.127:6 и узриши сыны сынов твоих: мир на Израиля.
Пс.128:1 Множицею брашася со мною от юности моея, да речет убо Израиль:
Пс.128:2 множицею брашася со мною от юности моея, ибо не премогоша мя.
Пс.128:3 На хребте моем делаша грешницы, продолжиша беззаконие свое.
Пс.128:4 Господь праведен ссече выя грешников.
Пс.128:5 Да постыдятся и возвратятся вспять вси ненавидящии Сиона:
Пс.128:6 да будут яко трава на здех, яже прежде восторжения изсше:
Пс.128:7 еюже не исполни руки своея жняй, и недра своего рукояти собираяй:
Пс.128:8 и не реша мимоходящии: благословение Господне на вы, благословихом вы во имя Господне.
Пс.129:1 Из глубины воззвах к Тебе, Господи:
Пс.129:2 Господи, услыши глас мой. Да будут уши Твои внемлюще гласу моления моего.
Пс.129:3 Аще беззакония назриши, Господи, Господи, кто постоит?
Пс.129:4 (129:3) Яко у Тебе очищение есть.
Пс.129:5 (129:4) Имене ради Твоего потерпех Тя, Господи, потерпе душа моя в слово Твое: упова душа моя на Господа.
Пс.129:6 (129:5) От стражи утренния до нощи, от стражи утренния да уповает Израиль на Господа:
Пс.129:7 (129:6) яко у Господа милость, и многое у Него избавление:
Пс.129:8 (129:6) и Той избавит Израиля от всех беззаконий его.
Пс.130:1 Господи, не вознесеся сердце мое, ниже вознесостеся очи мои: ниже ходих в великих, ниже в дивных паче мене.
Пс.130:2 Аще не смиреномудрствовах, но вознесох душу мою, яко отдоеное на матерь свою, тако воздаси на душу мою.
Пс.130:3 Да уповает Израиль на Господа отныне и до века.
Пс.131:1 Помяни, Господи, Давида и всю кротость его:
Пс.131:2 яко клятся Господеви, обещася Богу Иаковлю:
Пс.131:3 аще вниду в селение дому моего, или взыду на одр постели моея:
Пс.131:4 аще дам сон очима моима, и веждома моима дремание, и покой скраниама моима:
Пс.131:5 дондеже обрящу место Господеви, селение Богу Иаковлю.
Пс.131:6 Се, слышахом я во Евфрафе, обретохом я в полях Дубравы:
Пс.131:7 внидем в селения Его, поклонимся на место, идеже стоясте нозе Его.
Пс.131:8 Воскресни, Господи, в покой Твой, Ты и кивот святыни Твоея.
Пс.131:9 Священницы Твои облекутся правдою, и преподобнии Твои возрадуются.
Пс.131:10 Давида ради раба Твоего, не отврати лице помазаннаго Твоего.
Пс.131:11 Клятся Господь Давиду истиною, и не отвержется ея: от плода чрева твоего посажду на престоле твоем.
Пс.131:12 Аще сохранят сынове твои завет Мой и свидения Моя сия, имже научу я, и сынове их до века сядут на престоле твоем.
Пс.131:13 Яко избра Господь Сиона, изволи и в жилище Себе.
Пс.131:14 Сей покой Мой во век века, зде вселюся, яко изволих и.
Пс.131:15 Ловитву его благословляяй благословлю, нищыя его насыщу хлебы:
Пс.131:16 священники его облеку во спасение, и преподобнии его радостию возрадуются.
Пс.131:17 Тамо возращу рог Давидови, уготовах светилник помазанному Моему.
Пс.131:18 Враги его облеку студом, на немже процветет святыня моя.
Пс.132:1 Се, что добро, или что красно, но еже жити братии вкупе?
Пс.132:2 Яко миро на главе, сходящее на браду, браду Аароню, сходящее на ометы одежды его:
Пс.132:3 яко роса Аермонская сходящая на горы Сионския: яко тамо заповеда Господь благословение и живот до века.
Пс.133:1 Се, ныне благословите Господа, вси раби Господни, стоящии в храме Господни, во дворех дому Бога нашего.
Пс.133:2 В нощех воздежите руки вашя во святая и благословите Господа.
Пс.133:3 Благословит тя Господь от Сиона, сотворивый небо и землю.