Кон­да́къ 1

Уго­то́­ван­ная Го́­спо­домъ къ рав­ноа­по́­столь­но­му служе́нію, свята́я Марíе Ма­гда­ли́­но, воз­лю́б­лен­но­му ти́ Хри­сту́ по­слѣ́­до­ва­ла еси́, тѣ́м­же пѣ́снь­ми съ лю­бо́­вію вос­хва­ля́емъ тя́. Ты́ же, я́ко иму́­щая дер­зно­ве́ніе ве́ліе ко Го́­спо­ду, отъ вся́кихъ на́съ бѣ́дъ мо­ли́­тва­ми тво­и́­ми из­ба́­ви, да съ ра́­до­стію вы́ну зо­ве́мъ ти́:

Ра́дуй­ся, свята́я рав­ноа­по́­столь­ная Марíе Ма­гда­ли́­но, па́че всѣ́хъ бла́гъ слад­ча́й­ша­го Го́­спо­да Іису́­са воз­лю­би́в­шая.

Икосъ 1

Анге­ловъ Тво́р­че и Го́­спо­ди си́лъ, преду­вѣ́­дѣ­вый бла­го́е про­из­во­ле́ніе твое́, свята́я мѵ­ро­но́­си­це, отъ гра́­да Ма­гда́­лы из­бра́ тя́, сво­бо­ди́въ отъ діа́­воль­скія сѣ́ти. Ты́ же по си́хъ вѣ́р­ная слу­жи́­тель­ни­ца Го́­спо­де­ви яви́­ла­ся еси́, ре­вну́­ю­щи о про­слав­ле́ніи Его́ жи­тіе́мъ и служе́ніемъ. Мы́ же, чудя́щеся та­ко­во́му о тебѣ́ Бо́жію смо­тре́нію, во уми­ле́ніи сер­де́цъ зо­ве́мъ ти́:

Ра́дуй­ся, отъ Сы́на Бо́жія изъ тмы́ діа́­воль­скія въ чу́д­ный свѣ́тъ Его́ при­зва́н­ная. Ра́дуй­ся, Того́ бла­го­да́тію тѣ́­ломъ и ду́­хомъ до кон­ца́ чи­ста́ пре­бы́в­шая. Ра́дуй­ся, съ чи­сто­то́ю се́рд­ца и ни­ще­ту́ ду­хо́в­ную до кон­ца́ со­хра­ни́в­шая. Ра́дуй­ся, пе́р­вѣе всѣ́хъ во­скре́с­ша­го Хри­ста́ узрѣ́­ти спо­до́­бив­шаяся. Ра́дуй­ся, си́лу вра́жію до́­брѣ по­бѣ­ди́в­шая. Ра́дуй­ся, крѣ́п­кою вѣ́­рою и те́­плою лю­бо́­вію ко Хри­сту́ Бо́гу просія́вшая. Ра́дуй­ся, всѣ́мъ се́рд­цемъ Спа́­са Хри­ста́ воз­лю­би́в­шая. Ра́дуй­ся, вѣ́р­но Тому́ да́же до сме́р­ти по­слу­жи́в­шая. Ра́дуй­ся, ду­ше́ю тво­е́ю бла­го­да́т­но об­но­ви́в­шаяся. Ра́дуй­ся, про́­по­вѣдь Ева́н­гелія въ со­кро́­ви­ще се́рд­ца сво­е­го́ вмѣ­сти́в­шая. Ра́дуй­ся, про́­по­вѣдь Во­скре­се́нія апо́­сто­ломъ воз­вѣ­сти́в­шая. Ра́дуй­ся, а́н­гель­скою бе­сѣ́дою по­чте́н­ная.

Ра́дуй­ся, свята́я рав­ноа­по́­столь­ная Марíе Ма­гда­ли́­но, па́че всѣ́хъ бла́гъ слад­ча́й­ша­го Го́­спо­да Іису́­са воз­лю­би́в­шая.

Кон­да́къ 2

Ви́дящи свята́я Марíя себе́ отъ се­дми́ лю́­тыхъ бѣ­со́въ из­ба́влену, всѣ́мъ се́рд­цемъ По­бѣ­ди́­те­лю а́да Хри­сту́ Бо́гу при­лѣ­пи́ся, вся́ лю́ди нау­ча́­ю­щи не усты́ то́­кмо, но и всѣ́мъ жи­тіе́мъ Бо́гу слу­жи́­ти, во­пі­ю́­щи Тому́: Алли­лу́ія.

Икосъ 2

Ра́зумъ че­ло­вѣ́­че­скій не­доу­мѣ­ва́­етъ, по­мыш­ля́я, изъ ка­ко­вы́я бѣды́ на вы­со­ту́ ан­ге­ло­по­до́б­на­го житія́ бла­го­да́тію Хри­сто́­вою воз­шла́ еси́, до­сто­хва́ль­ная Марíе Ма­гда­ли́­но. Тѣ́м­же и мы́, до́брую тя́ пред­ста́­тель­ни­цу иму́­ще, мо́­лим­ся тебѣ́ те́­плѣ: из­ба́­ви и на́съ отъ бе́з­дны грѣ­хо́в­ныя, да лю­бо́­вію во­піе́мъ ти́ та­ко­ва́я:

Ра́дуй­ся, лю́­та­го де́­мон­ска­го ра́б­ства из­бѣ́г­шая. Ра́дуй­ся, ле́сть лу­ка́­выхъ бѣ­со́въ я́вѣ об­ли­чи́в­шая. Ра́дуй­ся, въ на­па́­сти вра́жіей ко Хри­сту́ Бо́гу при­бѣ­га́­ти всѣ́хъ нау­чи́в­шая. Ра́дуй­ся, ни­кому́­же отчаява́­ти­ся въ ве­ли́­кой грѣ­хо́в­нѣй ско́р­би по­бу­жда́­ю­щая. Ра́дуй­ся, ко свя́­то­сти всѣ́мъ грѣ́ш­ни­комъ пу́ть по­ка­за́в­шая. Ра́дуй­ся, все­мо́щ­ную си́лу бла­го­да́­ти Хри­сто́­вы по­зна́в­шая. Ра́дуй­ся, до­сто́й­на­го Бо́гу бла­го­да­ре́нія до́­брая на­ста́в­ни­це. Ра́дуй­ся, и́стин­на­го бо­го­хва­ле́нія вѣ́р­ная учи́­тель­ни­це. Ра́дуй­ся, въ жи­тіи́ тво­е́мъ пра́­вый пу́ть зем­на́­го те­че́нія на́мъ по­ка­за́в­шая. Ра́дуй­ся, всѣ́мъ грѣ́ш­ни­комъ предъ Бо́­гомъ бла­га́я за­сту́п­ни­це. Ра́дуй­ся, ду́шъ на́­шихъ отъ ле́­сти са­та­ни́н­скія за­щи́т­ни­це. Ра́дуй­ся, во вся́кой ско́р­би те́­плая ко Хри­сту́ на́ша хо­да́­та­и­це.

Ра́дуй­ся, свята́я рав­ноа­по́­столь­ная Марíе Ма­гда­ли́­но, па́че всѣ́хъ бла́гъ слад­ча́й­ша­го Го́­спо­да Іису́­са воз­лю­би́в­шая.

Кон­да́къ 3

Си́лою Бо­же́­ствен­ныя бла­го­да́­ти, ку́п­но же и сво­и́мъ бла­ги́мъ про­из­во­ле́ніемъ без­пе­ча́ль­но оста́­ви­ла еси́ до́мъ отца́ тво­е­го́, я́коже дре́в­ле Авра­а́мъ, и ра́­дост­но по­слѣ́­до­ва­ла еси́ Хри­сту́ Бо́гу. Тѣ́м­же мо́­лимъ тя́, уче­ни́­це Хри­сту́, сла́в­ная Марíе, мо­ли́­тва­ми тво­и́­ми и на́ша серд­ца́ про­свѣ­ти́ лю­бо́­вію къ Бо́гу, да и ны́нѣ и при́­сно взы­ва́­емъ Тому́: Алли­лу́ія.

Икосъ 3

Иму́щи бо­го­да­ро́­ван­ную ти́ пре­му́­дро­сти си́лу, му́­же­ски отве́ргла еси́, Марíе Ма­гда­ли́­но, сего́ мíра кра́с­ная, и, я́ко уче­ни́­ца до́­брая, пре­мно́­гимъ ми­ло­се́р­діемъ об­ни­ща́в­ше­му за ны́ Сло́ву и́стин­но по­слу­жи́­ла еси́. Сего́ ра́ди и мы́ со уми­ле́ніемъ во­піе́мъ ти́:

Ра́дуй­ся, до́­брая Хри­сто́­ва уче­ни́­це. Ра́дуй­ся, и́стин­нѣй люб­ви́ къ Бо́гу на­ста́в­ни­це. Ра́дуй­ся, суету́ мíра сего́ до́­брѣ по­зна́в­шая. Ра́дуй­ся, му́­же­ски его́ ра́­до­сти отве́рг­шая. Ра́дуй­ся, кра́с­ная мíра ни во что́­же вмѣ­ни́в­шая. Ра́дуй­ся, чи́ну и́но­че­ско­му до́­брый пу́ть житія́ пред­по­ка­за́в­шая. Ра́дуй­ся, всѣ́хъ ко Хри­сту́ Бо́гу путе­во́д­ствую­щая. Ра́дуй­ся, для дѣ́лъ ми­ло­се́р­дія изъ до́му зем­на́­го из­ше́д­шая. Ра́дуй­ся, Хри­сто́­во ми­ло­се́р­діе здѣ́ и на не­бе­си́ обрѣ́т­шая. Ра́дуй­ся, я́ко тѣ́мъ бла­же́н­ства вѣ́ч­на­го до­сти́г­шая. Ра́дуй­ся, му́­драя а́гни­це, отъ злы́хъ вол­ко́въ къ до́­бро­му Па́­сты­рю Хри­сту́ при­бѣ́г­шая. Ра́дуй­ся, во дво́ръ сло­ве́с­ныхъ ове́цъ Его́ вше́д­шая.

Ра́дуй­ся, свята́я рав­ноа­по́­столь­ная Марíе Ма­гда­ли́­но, па́че всѣ́хъ бла́гъ слад­ча́й­ша­го Го́­спо­да Іису́­са воз­лю­би́в­шая.

Кон­да́къ 4

Бу́ря бѣ­со́в­скія я́­ро­сти пре­ве­ли́­кою си́­лою устре­ми́­ся на хра́мъ души́ твоея́, свята́я Марíе, но того́ по­ко­ле­ба́­ти до кон­ца́ не воз­мо́­же: обрѣ­ла́ бо еси́ спа­се́ніе на тве́р­дѣмъ вѣ́ры Хри­сто́­вы ка́­ме­ни, на не́м­же ты́, му́­драя же́но, не­дви́­жи­мо стоя́щи, у́чи­ши всѣ́хъ Все­бла­го́­му Бо́гу вос­пѣ­ва́­ти пѣ́снь: Алли­лу́ія.

Икосъ 4

Слы́­ша­ще, бо­го­му́­драя Марíе, я́ко въ по­слѣ́­до­ва­ніи Хри­сту́ обрѣ­ла́ еси́ и́стин­ное ве­се́ліе се́рд­ца, пра́­вду, ми́ръ и ра́­дость о Ду́сѣ Свя́тѣ, тщи́м­ся и мы́ яви́­ти­ся въ ли́цѣ при­ча́ст­никъ сего́ Ца́р­ства Бо́жія. Тебѣ́ же, я́ко при­ча́ст­ни­цѣ того́ су́­щей и пу́ть на́мъ къ нему́ по­ка­за́в­шей, рце́мъ вси́ та­ко­ва́я:

Ра́дуй­ся, не­бе́с­ную Іису́­со­ву сла́­дость воз­лю­би́в­шая. Ра́дуй­ся, жи́знь и́стин­ную во Хри­стѣ́ обрѣ́т­шая. Ра́дуй­ся, тоя́жде о́бразъ и на́мъ вѣ́р­но по­ка­за́в­шая. Ра́дуй­ся, въ ра́­до­сти не­бе́с­нѣй ны́нѣ при́­сно жи­ву́­щая. Ра́дуй­ся, ра́й­скія снѣ́­ди вы́ну вку­ша́­ю­щая. Ра́дуй­ся, о́гнь люб­ве́ къ Бо́гу въ се́рд­цы тво­е́мъ воз­же́г­шая. Ра́дуй­ся, Хри­сто́мъ Бо́­гомъ, я́ко раба́ Ему́ вѣ́р­ная, воз­лю́б­лен­ная. Ра́дуй­ся, при­лѣ́ж­ная о на́съ къ Бо́гу мо­ли́­твен­ни­це. Ра́дуй­ся, въ бѣ­да́хъ на́­шихъ по­мо́щ­ни­це. Ра́дуй­ся, на́ша бла­га́я и кро́т­кая учи́­тель­ни­це. Ра́дуй­ся, Ду́ха Свята́го Пре­чест­но́е жи­ли́­ще.

Ра́дуй­ся, свята́я рав­ноа­по́­столь­ная Марíе Ма­гда­ли́­но, па́че всѣ́хъ бла́гъ слад­ча́й­ша­го Го́­спо­да Іису́­са воз­лю­би́в­шая.

Кон­да́къ 5

Бого­те́ч­ная звѣз­да́, спу́т­ствую­щи Хри­сту́, сла́в­ная Марíе, по­сре­дѣ́ мѵ­ро­но́­сицъ яви́­ла­ся еси́. Съ ни́ми же ны́нѣ вы́ну пред­стоя́щи Святѣ́й Тро́­и­цѣ, и на́съ мо­ли́­тва­ми тво­и́­ми къ свяще́н­но­му тѣ́хъ ли́ку со­во­ку­пи́, пу́ть те́м­ный житія́ на́­ше­го свѣ́­томъ тво­и́мъ озаря́ющи, да ра́­дост­но во­зо­піе́мъ Бо́гу: Алли­лу́ія.

Икосъ 5

Ви́дящи, свята́я Марíе, Хри­ста́ Бо́га на Кре­стѣ́ ви́сяща, ди́в­ное му́­же­ство по­ка­за́­ла еси́: мно́­зи бо отъ уче­ни́къ Учи́­теля сво­е­го́ оста́­вив­ша, ты́ же, не­пре­ста́н­ны­ми бо­же́­ствен­ны­ми уче́нь­ми Того́ ду́шу и мы́сль раз­же́г­ши, не́­мощь есте­ства́ же́н­ска­го пре­воз­мо­гла́ еси́, и та́ко при­ча­сти́­ла­ся еси́ спа­си́­тель­нѣй Хри­сто́­вой стра́­сти. Сего́ ра́ди мы́, си­це­во́е твое́ до́­бле­ствен­ное му́­же­ство зря́ще, во­піе́мъ ти́:

Ра́дуй­ся, му́­дрыхъ же́нъ кра­со­то́ и удо­бре́ніе. Ра́дуй­ся, хри­стіа́нъ всѣ́хъ до́­брое ра́­до­ва­ніе. Ра́дуй­ся, Хри­сту́ Бо́гу, на Кре­стѣ́ ви́сяшу, со­стра­да́в­шая. Ра́дуй­ся, не­по­ко­ле­би́­мѣй люб­ви́ къ Тому́ на́мъ пу́ть по­ка­за́в­шая. Ра́дуй­ся, си­це­во́ю лю­бо́­вію въ пред­ста́­тель­ствѣ о на́съ къ Бо́гу дер­зно­ве́ніе ве́ліе обрѣ́т­шая. Ра́дуй­ся, же­на́мъ до­бро́­то и по­хва­ле́ніе. Ра́дуй­ся, хри­стіа́­номъ крѣ́п­кое при­бѣ́­жи­ще. Ра́дуй­ся, па́че си́ль­ныхъ му­же́й крѣп­ча́й­шая. Ра́дуй­ся, мудрецо́въ мíра сего́ му­дрѣ́й­шая. Ра́дуй­ся, я́ко тебѣ́ та́й­ная пре­му́­дро­сти Своея́ Бо́гъ яви́лъ е́сть. Ра́дуй­ся, я́ко тебе́ и́стин­на­го бо­го­сло́­вія Са́мъ Бо́гъ Сло́­во нау­чи́лъ е́сть. Ра́дуй­ся, Хри­ста́ Бо́га па́че жи́­зни своея́ воз­лю­би́в­шая.

Ра́дуй­ся, свята́я рав­ноа­по́­столь­ная Марíе Ма­гда­ли́­но, па́че всѣ́хъ бла́гъ слад­ча́й­ша­го Го́­спо­да Іису́­са воз­лю­би́в­шая.

Кон­да́къ 6

Бла­го­да́тію Тво­е́ю не­мощ­на́я вра­чу́­е­ши и не­крѣ́п­кія со­су́­ды тве́р­ды со­дѣ́­ло­ва­е­ши, Хри­сте́ Царю́. Мѵ­ро­но́­си­цы бо жены́ у Кре­ста́ Тво­е­го́ му́­же­ски пред­стоя́тъ и бла­го­да́ть кре́ст­ную всѣ́мъ небоя́знен­но воз­вѣ­ща́­ютъ: ли́цы же му́­дрыхъ же́нъ, ли́­камъ а́н­гель­скимъ упо­до́­би­ти­ся тща́­ще­ся, бо́­дрен­но вы́ну взы­ва́­ютъ Тро́­и­цѣ Святѣ́й: Алли­лу́ія.

Икосъ 6

Взы­ску́­ю­ще оза­ри́­ти­ся свѣ́­томъ и́стин­на­го бо­го­разу́­мія, егда́ Бо́га на Кре­стѣ́ ви́сяща ви́­дѣ­ла еси́, гла­го́­ла­ла еси́ слезя́щи, ди́в­ная Марíе: "ка́ко Жи́знь сме́рть во́ль­ную ны́нѣ пріе́м­летъ?" Мы́ же, сла́в­ное про­свѣ­ще́ніе твое́ бла­го­да́тію Свята́го Ду́ха вѣ́ду­ще, во­піе́мъ ти́ си­це­ва́я:

Ра́дуй­ся, Хри­ста́ ра́спята отъ глу­би­ны́ души́ опла́­кав­шая. Ра́дуй­ся, ве­се́ліе вѣ́ч­ное въ се­ле́ніихъ не­бе́с­ныхъ обрѣ́т­шая. Ра́дуй­ся, на́мъ о́бразъ до́­бра­го пла́­ча по­ка­за́в­шая. Ра́дуй­ся, я́ко ты́ еси́ на́ше не­пре­ста́н­ное ра́­до­ва­ніе. Ра́дуй­ся, всѣ́хъ скорбя́щихъ утѣ­ше́ніе не­ло́ж­ное. Ра́дуй­ся, я́ко Хри­сту́, Его́ ра́ди, на зе­мли́ спо­стра­да́­ла еси́. Ра́дуй­ся, я́ко съ Ни́мъ о Не́мъ на не­бе­си́ про­слав­ля́ешися. Ра́дуй­ся, всѣ́хъ вра­го́въ на́­шихъ крѣ́п­кая по­бѣ­ди́­тель­ни­це. Ра́дуй­ся, во всѣ́хъ ско́р­бехъ на́­шихъ ско́­рая по­мо́щ­ни­це. Ра́дуй­ся, я́ко всѣ́мъ хри­стіа́­номъ вос­по­ми­на́ніе твое́ пре­сла́д­ко. Ра́дуй­ся, я́ко все́й Це́р­кви Хри­сто́­вой и́мя твое́ пре­че́ст­но. Ра́дуй­ся, и́стин­ная лозо́ ви­но­гра́­да Хри­сто́­ва.

Ра́дуй­ся, свята́я рав­ноа­по́­столь­ная Марíе Ма­гда­ли́­но, па́че всѣ́хъ бла́гъ слад­ча́й­ша­го Го́­спо­да Іису́­са воз­лю­би́в­шая.

Кон­да́къ 7

Хотя́щи уразу­мѣ́­ти Кре­ста́ все­по­бѣ­ди́­тель­ную си́лу, до кон­ца́ Хри­сто́­вой стра́­сти пред­стоя́ла еси́ у Кре­ста́ Спа́­со­ва со ины́­ми же­на́­ми, пре­сла́в­ная Марíе. Ма́­те­ри же Го­спо́д­ни бо­лѣ́­знен­но со­стра́жду­щи, та́ко не­доу­мѣ́н­но вопія́ла еси́: "что́ сіе́ е́сть стра́н­ное чу́до? Со­дер­жа́й всю́ тва́рь по­стра­да́­ти из­во́­ли". Мы́ же на жи­во­но́с­ный Кре́стъ во́­лею Воз­не́с­ше­муся лю­бо́­вію во­піе́мъ: Алли­лу́ія.

Икосъ 7

Ди́вная жена́ яви́­ла­ся еси́, бла­же́н­ная Марíе, лю­бо́­вію тво­е́ю ко Хри­сту́ Бо́гу: ту́ю бо го́­рест­ны­ми изъявля́я ры­да́нь­ми, ко Сня́тому со Кре­ста́ при­па́­да­ю­щи, сле­за́­ми пре­чи́­стыя я́звы Его́ омы́­ла еси́. Еще́ же бла­го­о­бра́з­но­му Іо́­сифу и правдо­лю­би́­во­му Ни­ко­ди́му по­слѣ́дую­щи, ко гро́бу Спа́­со­ву со ины́­ми святы́ми же­на́­ми те­кла́ еси́, о́во пла́чу­щи, о́во пла́чущую не­у­тѣ́ш­но Ма́­терь Его́ Пре­не­по­ро́ч­ную, Ейже ду́шу лю́­тое ору́жіе про́й­де, утѣ­ша́­ю­щи. Мы́ же, та­ко­ву́ твою́ до́­блесть вѣ́ду­ще, сми­ре́н­но взы­ва́­емъ ти́:

Ра́дуй­ся, пре­чи́­стыя я́звы Хри­сто́­вы сле­за́­ми омы́в­шая. Ра́дуй­ся, Ма́­те­ри Того́ Пре­не­по­ро́ч­нѣй я́вѣ со­стра́­ждав­шая. Ра́дуй­ся, Хри­ста́ да́же до гро́­ба нео­ста́­вив­шая. Ра́дуй­ся, во гро́бъ по­ла­га́в­шую­ся Жи́знь не­доу­мѣ́н­но зрѣ́в­шая. Ра́дуй­ся, сле­за́мъ покая́нія на́ша до́­брая учи́­тель­ни­це. Ра́дуй­ся, тѣ́ми сле­за́­ми грѣ­хо́в­ныя скве́р­ны омы­ва́­ти на́съ на­став­ля́ющая. Ра́дуй­ся, тѣ́ми же се́рд­це на́ше ока­ме­не́н­ное умягча́­ти по­бу­жда́­ю­щая. Ра́дуй­ся, о́бразъ и́стин­ной му́­дро­сти на́мъ по­ка­за́в­шая. Ра́дуй­ся, па́мято­ва­ти вы́ну стра́­сти Хри­сто́­вы на́съ нау­ча́­ю­щая. Ра́дуй­ся, сла́в­ная Марíе, ку́п­но съ Пре­не­по­ро́ч­ною Дѣ́­вою Марíею, на́ша вѣ́р­ная хо­да́­та­и­це. Ра́дуй­ся, до́­брая слу­го́ Хри­сто́­ва. Ра́дуй­ся, Го́­спо­де­ви, а не че­ло­вѣ́­комъ уго­жда́в­шая.

Ра́дуй­ся, свята́я рав­ноа­по́­столь­ная Марíе Ма­гда­ли́­но, па́че всѣ́хъ бла́гъ слад­ча́й­ша­го Го́­спо­да Іису́­са воз­лю­би́в­шая.

Кон­да́къ 8

Стра́н­но, бо­го­му́­драя Марíе, яви́ся тебѣ́ по­гре­бе́ніе всѣ́мъ жи́знь по­да­ю́­ща­го Жи­зно­да́в­ца: Того́ лю­бо́­вію уязвля́ема, еще́ су́­щей тмѣ́, ко гро́бу Его́ при­не­сла́ еси́ мѵ́ро и сле́з­ныя про­ли­ла́ еси́ аро­ма́­ты. Тѣ́м­же и пре­бы­ва́­е­ши ны́нѣ во бла­го­во́н­ныхъ рая́ се­ле́ніихъ со а́н­гель­ски­ми ли́ки взы­ва́­ю­щи вы́ну Бо́гу: Алли­лу́ія.

Икосъ 8

Ве́сь сла́­дость, ве́сь ра́­дость, ве́сь жи́знь тебѣ́ бы́сть Іису́съ, свята́я Марíе: того́ ра́ди, ви́­дѣв­ши ка́­мень взя́тъ отъ гро́­ба, Сего́ же не обрѣ́т­ши, ры­да́­ю­щи те­кла́ еси́ къ жи­во́му вѣ́ры ка́­ме­ни Си́­мону и друго́­му, его́­же любля́ще Іису́съ, уче­нику́, бо­лѣ́­знен­но гла­го́­лю­щи и́ма: "взя́ша Го́­спо­да отъ гро́­ба и не вѣ́мъ, гдѣ́ по­ло­жи́­ша Его́". Ны́нѣ же ты́, сво­бо­ди́в­ши­ся отъ ско́р­би тоя́, со Хри­сто́мъ вѣ́ч­но ра́дуе­ши­ся на не­бе­си́. Мы́ же на зе­мли́ въ та­ко­ву́ю ра́­дость мо­ли́­тва­ми тво­и́­ми вни́­ти ча́­ю­ще, со уми­ле́ніемъ во­піе́мъ ти́ та́ко:

Ра́дуй­ся, сія́ніемъ люб­ве́ твоея́ ко Хри­сту́ тму́ ночну́ю по­бѣ­ди́в­шая. Ра́дуй­ся, нощ­но́­му бдѣ́нію въ мо­ли́­твѣ на́съ нау­чи́в­шая. Ра́дуй­ся, свѣ́­томъ вѣ́ч­нымъ на не­бе­си́ осія́нная. Ра́дуй­ся, ни­ще­то́ю ду­хо́в­ною Ца́р­ство не­бе́с­ное ку­пи́в­шая. Ра́дуй­ся, я́ко по ско́р­би о стра­сте́хъ Хри­сто́­выхъ обрѣ­ла́ еси́ оби́ль­ное утѣ­ше́ніе. Ра́дуй­ся, же́но кро́т­кая, на­слѣ́д­ни­це зе­мли́ не­бе́с­на­го рая́. Ра́дуй­ся, ал­ка́в­шая и жа́­ждав­шая пра́­вды Хри­сто́­вы, я́ко ты́ ны́нѣ на­сы­ща́­е­ши­ся тра­пе́­зы не­бе́с­ныя. Ра́дуй­ся, ми́­ло­сти­вая, ми́­лость Вла­ды́­ки обрѣ́т­шая, и о на́­шемъ по­ми́­ло­ва­ніи Того́ усе́рд­но прося́щая. Ра́дуй­ся, ты́ бо ны́нѣ, я́ко чи́­стая се́рд­цемъ, Бо́га ли­це́мъ къ Лицу́ зри́­ши. Ра́дуй­ся, я́ко спо­до́­би­ла­ся еси́ пе́р­вѣе всѣ́хъ ви́­дѣ­ти Во­скре­се́ніе Хри­ста́, Вѣ́ч­на­го Ми́ра. Ра́дуй­ся, из­гна́н­ная пра́­вды ра́ди Хри­сто́­вы, я́ко твое́ е́сть Ца́р­ство Бо́жіе. Ра́дуй­ся, пріо­брѣ́т­шая вѣ́ч­ное ве­се́ліе и мзду́ мно́­гу на не­бе­сѣ́хъ.

Ра́дуй­ся, свята́я рав­ноа­по́­столь­ная Марíе Ма­гда­ли́­но, па́че всѣ́хъ бла́гъ слад­ча́й­ша­го Го́­спо­да Іису́­са воз­лю­би́в­шая.

Кон­да́къ 9

Вся́къ чи́нъ а́н­гель­скій уди­ви́ся ве­ли́­кой та́й­нѣ сла́в­на­го Во­скре­се́нія Тво­е­го́, Хри­сте́ Царю́, а́дъ же при­тре́­пе­тенъ бы́сть, ви́­дѣвъ, я́ко сниз­ше́лъ еси́ въ пре­и­спо́д­ная зе­мли́ и со­кру­ши́лъ еси́ ве­реи́ вѣ́ч­ныя, со­дер­жа́­щія свя́­зан­ныя, Хри­сте́. Мы́ же ра́­до­сти же́нъ мѵ­ро­но́­сицъ со­ра́ду­ю­ще­ся, съ ве­се́ліемъ во­піе́мъ: Алли­лу́ія.

Икосъ 9

Вѣтíй мно­го­вѣ­ща́н­ныхъ язы́ки не до­влѣ́­ютъ до­сто́й­но из­ре­щи́ ве­ли́кую ско́рбь твою́, сла́в­ная Марíе, егда́ стоя́ла еси́ внѣ́ гро́­ба пла́чу­щи. Кто́ бо воз­мо́­жетъ рещи́ бо­лѣ́знь души́ твоея́, егда́ не обрѣ­ла́ еси́ во гро́­бѣ па́че жи́­зни своея́ воз­лю́б­лен­на­го ти́ Го́­спо­да? При­ско́рб­ное се́рд­це твое́ не воз­мо́­же вни­ма́­ти утѣ­ше́нію а́н­ге­ловъ свѣ́т­лыхъ. Си­це­ву́ю ско́рбь твою́ со уми­ле́ніемъ вос­по­ми­на́­ю­ще, вос­пѣ­ва́­емъ ти́ та­ко­ва́я:

Ра́дуй­ся, ви́­дѣ­ти Хри­ста́ Іису́­са въ пе­ще́­ру при­ни́к­шая. Ра́дуй­ся, ны́нѣ Того́ на пре­сто́­лѣ сла́­вы сѣдя́ща зря́щая. Ра́дуй­ся, свѣ́т­лыхъ не­бо­жи́­те­лей еще́ су́щи на зе­мли́ узрѣ́в­шая. Ра́дуй­ся, отъ тѣ́хъ гла́съ ра́­до­сти Во­скре­се́нія Хри­сто́­ва прі­и́м­шая. Ра́дуй­ся, я́ко ты́ съ ни́ми ны́нѣ при́­сно ра́дуе­ши­ся. Ра́дуй­ся, лю­бо́­вію мѵ́ро Хри­сту́ при­не́с­шая. Ра́дуй­ся, во бла­гоу­ха́­ю­щую мѵ́ра Хри­сто́­ва воню́ сла́д­цѣ при­те́к­шая. Ра́дуй­ся, отве́рг­шая ра́­до­стей мíра грѣ­хо́в­на­го го́­речь. Ра́дуй­ся, воз­лю­би́в­шая не­бе́с­ную Іису́­со­ву сла́­дость. Ра́дуй­ся, до́­брая лѣ́­то­ра­сле са́да Іису́­со­ва. Ра́дуй­ся, бла­го­пло́д­ная лозо́ вер­то­гра́­да Бо́жія. Ра́дуй­ся, преу­кра́­шен­ный хра́мъ Ду́ха Всесвята́го я́вль­шаяся.

Ра́дуй­ся, свята́я рав­ноа­по́­столь­ная Марíе Ма­гда­ли́­но, па́че всѣ́хъ бла́гъ слад­ча́й­ша­го Го́­спо­да Іису́­са воз­лю­би́в­шая.

Кон­да́къ 10

Спа­сти́ хотя́ мíръ, а́ще и во гро́бъ сниз­ше́лъ еси́ Без­сме́рт­не, но а́до­ву раз­ру­ши́лъ еси́ си́лу и во­скре́слъ еси́, я́ко по­бѣ­ди́­тель, Хри­сте́ Бо́же, же­на́мъ мѵ­ро­но́­си­цамъ вѣ­ща́­вый: "ра́дуй­те­ся!" Съ ни́ми же и мы́ ны́нѣ пѣ́снь ра́­до­сти при­но́­симъ Ти́: Алли­лу́ія.

Икосъ 10

Стѣны́ ка́­мен­ныя твер­дѣ́е бы́сть лю­бо́вь твоя́ къ воз­лю́бль­шему тя́ Хри­сту́, мѵ­ро­но́­си­це сла́в­ная Ма­гда­ли́­но Марíе. Тѣ́м­же еди́­на ви́­дѣ­ла еси́ пре́­жде инѣ́хъ Жи­во­та́ на́­ше­го изъ гро́­ба воз­ста́в­ша. Вер­то­гра́­да­ря же Того́ не­пще­ва́­ла еси́ бы́ти и вопія́ла еси́ тому́, за­бы́в­ши есте­ства́ не́­мощь: "а́ще ты́ еси́ взя́лъ Его́, по­вѣ́ждь ми́, гдѣ́ еси́ по­ло­жи́лъ Его́, и а́зъ воз­му́ Его́". Но сла́­дост­ный Того́ гла́съ по­ка­за́ ти́ Учи́­теля, на́съ же гла­ша́­ти нау­чи́ тебѣ́ си́це:

Ра́дуй­ся, и́стин­на­го Вер­то­гра́­да­ря во­скре́с­ша пе́р­вѣе и́нѣхъ узрѣ́в­шая. Ра́дуй­ся, въ вер­то­гра́­дѣ не­бе́с­нѣмъ во­дво­ри́в­шаяся. Ра́дуй­ся, гро́здіемъ Бо́жія бла­го­да́­ти ны́нѣ вы́ну пи­та́­ю­щаяся. Ра́дуй­ся, ви­но́мъ ра́й­скихъ ра́­до­стей веселя́щаяся. Ра́дуй­ся, я́ко твоя́ лю­бо́вь къ Бо́гу есте­ство́ по­бѣ­ди́­ла е́сть. Ра́дуй­ся, я́ко та́я и на́съ ре́­вно­сти Бо́жіей нау­чи́­ла е́сть. Ра́дуй­ся, изъ у́стъ Хри­сто́­выхъ вѣ­ща́ніе Во­скре­се́нія пе́р­вѣе пріе́м­шая. Ра́дуй­ся, апо́­сто­ломъ гла­го́­лы ра́­до­сти пе́р­вѣе воз­вѣ­сти́в­шая. Ра́дуй­ся, вѣ́ч­ную ра́­дость на не­бе­си́ обрѣ́т­шая. Ра́дуй­ся, я́ко ты́ и на́съ къ то́й ра́­до­сти то­бо́ю зо­ве́­ши. Ра́дуй­ся, я́ко о се́мъ о на́съ къ Бо́гу вы́ну хо­да́­тай­ствуе­ши. Ра́дуй­ся, я́ко Тому́ мо­ли́­твы о на́съ те́­плѣ при­но́­си­ши.

Ра́дуй­ся, свята́я рав­ноа­по́­столь­ная Марíе Ма­гда­ли́­но, па́че всѣ́хъ бла́гъ слад­ча́й­ша­го Го́­спо­да Іису́­са воз­лю­би́в­шая.

Кон­да́къ 11

Ни еди́­но же сло́­во до­влѣ́­етъ вос­пѣ́­ти по достоя́нію бо­же́­ствен­ную ра́­дость Во­скре­се́нія Хри­сто́­ва, ю́же со ины́­ми же­на́­ми, сла́в­ная Марíе, апо́­сто­ломъ воз­вѣ­сти́ въ се́й на­рѣче́н­ный и святы́й де́нь, пра́з­дни­ковъ пра́з­дникъ и тор­же­ство́ изъ тор­же́ствъ. Тѣ́м­же, предъ ве­ли́­чіемъ не­из­ре­че́н­ныхъ ще­дро́тъ Тво­и́хъ, Хри­сте́ Царю́, на на́съ бы́в­шихъ, пре­кло­ня́ющеся, со сми­ре́ніемъ и лю­бо́­вію зо­ве́мъ Ти́: Алли­лу́ія.

Икосъ 11

Свѣ­то­за́р­ная звѣз­да́ грѣ­хо́в­но­му мíру яви́­ла­ся еси́, Ма­гда­ли́­но Марíе, егда́ по сла́в­нѣмъ Спа́­со­вѣ Воз­не­се́ніи, гра́­ды и ве́си пре­хо­дя́щи и сло́­во Ева́н­гелія всю́­ду воз­вѣ­ща́­ю­ши, мно́­ги под­кло­ни́­ла еси́ подъ бла­го́е и́го Хри­сто́­во. До­сти́г­ши же да́же до дре́в­няго Ри́ма, му́­же­ски Ти­ве́рію ке́­са­рю пред­ста́­ла еси́ и тому́ о́бра­зомъ кра́с­на­го яйца́ и му́­дры­ми сло­ве­сы́ жи­во­но́с­ную си́лу Хри­ста́ уясни́­ла еси́, лу­ка́­ва­го же Пи­ла́­та и без­бо́ж­на­го ар­хіе­ре́я об­ли­чи́­ла еси́, да по без­за­ко́н­нымъ дѣ­ло́мъ сво­и́мъ до­сто́й­ная пріи́мутъ. Та­ко­во́му по́­дви­гу апо́­столь­ства тво­е­го́ дивя́щеся, ра́­дост­но во­піе́мъ ти́ си́це:

Ра́дуй­ся, Хри­сто́­ва уче́нія сла́в­ная бла­го­вѣ­сти́­тель­ни­це. Ра́дуй­ся, язы́­че­скія тмы́ свѣ­то­за́р­ная про­го­ни́­тель­ни­це. Ра́дуй­ся, грѣ­хо́в­ныя у́зы мно́­гихъ че­ло­вѣ́къ раз­рѣ­ши́в­шая. Ра́дуй­ся, Хри­сто́­вѣй му́­дро­сти всѣ́хъ нау­чи́в­шая. Ра́дуй­ся, мно́­гія лю́ди изъ тмы́ не­вѣ́­дѣнія въ чу́д­ный Хри­ста́ свѣ́тъ при­ве́д­шая. Ра́дуй­ся, о́бразъ тве́р­да­го стоя́нія за пра́­вду Хри­сто́ву на́мъ по­ка­за́в­шая. Ра́дуй­ся, спа­се́ніе ду́шъ грѣ́ш­ни­ковъ па́че своея́ жи́­зни воз­лю­би́в­шая. Ра́дуй­ся, за́­по­вѣ­ди Хри­сто́­вы до́­брѣ уразу­мѣ́в­шая. Ра́дуй­ся, тѣ́мъ вѣ́р­но по­слѣ́­до­вав­шая. Ра́дуй­ся, тму́ язы́­че­скую дер­зно­ве́н­но об­ли­чи́в­шая. Ра́дуй­ся, гнѣ́­ва ке́­са­ре­ва не убоя́вшаяся. Ра́дуй­ся, зло́бу и ко­ва́р­ство вра­го́въ Хри­сто́­выхъ тому́ по­ка­за́в­шая.

Ра́дуй­ся, свята́я рав­ноа­по́­столь­ная Марíе Ма­гда­ли́­но, па́че всѣ́хъ бла́гъ слад­ча́й­ша­го Го́­спо­да Іису́­са воз­лю­би́в­шая.

Кон­да́къ 12

Бла­го­да́­ти отъ Бо́га изо­би́ль­но ис­по́л­нен­ная, мно́­же­ство ду́шъ ко Хри­сту́ при­ве­ла́ еси́, сла́в­ная Марíе. По се́мъ же при­шла́ еси́ во Ефе́съ, идѣ́­же апо́­столь­ски лю­бо́­вію со апо́­сто­ломъ люб­ве́ спа­се́нію че­ло­вѣ́къ по­слу­жи́в­ши, бла­же́н­нымъ успе́ніемъ ко Го́­спо­ду пре­ста́­ви­ла­ся еси́, Ему́­же ны́нѣ съ мно­го­чи́­слен­ны­ми не­бе́с­ны­ми пѣв­цы́ вы́ну по­е́­ши: Алли­лу́ія.

Икосъ 12

Пою́ще твое́ до­сто­хва́ль­ное жи­тіе́ на зе­мли́ и сла́ву, я́же на не­бе­си́, ра́­дост­но сла́­вимъ, по­е́мъ и ве­ли­ча́­емъ ди́в­на­го во святы́хъ Сво­и́хъ Царя́ Не­бе́с­на­го, зане́ не то́­кмо сама́ ты́, свята́я Марíе, Того́ бла­го­да́тію, въ се­ле́ніихъ пра́­вед­ныхъ ны́нѣ ли­ку́­е­ши, но и на́съ ве­се­ли́­ши на зе­мли́, оста́­вив­ши на́мъ мно­го­цѣ́н­ное мѵ́ро мо­ще́й тво­и́хъ, я́же му́­дрый Ле́въ ца́рь, изъ Ефе́­са въ Кон­стан­ти́нъ гра́дъ пре­не­сти́ по­ве­лѣ́. Ты́я и мы́, я́ко исто­ча́­ю­щія бла­го­да́ть не­о­ску́д­ную всѣ́мъ лю­бо́­вію при­те­ка́­ю­щимъ, вѣ́­рою и лю­бо́­вію мы́­слен­но ло­бы­за́­ю­ще, уми́ль­но вос­пѣ­ва́­емъ ти́ та­ко­ва́я:

Ра́дуй­ся, на зе­мли́ лю­бо́­вію ко Хри­сту́ го­рѣ́в­шая. Ра́дуй­ся, на не­бе­си́ въ ра́й­скія оби́­те­ли Того́ все­ли́в­шаяся. Ра́дуй­ся, вѣ́р­нымъ тве́р­дое за­ступле́ніе. Ра́дуй­ся, бла­го­во́н­ное мѵ́ро, Це́р­ковь бла­гоу­ха́­ю­щее. Ра́дуй­ся, ка­ди́ль­ни­це зла­та́я, ѳиміа́мъ мо­ли́­твы о на́съ къ Бо́гу вы́ну при­но­ся́щая. Ра́дуй­ся, исто́ч­никъ ис­цѣ­ле́ній не­о­ску́д­ный. Ра́дуй­ся, со­кро́­ви­ще Бо́жіей бла­го­да́­ти не­и­жди­ва́­е­мое. Ра́дуй­ся, а́н­гель­скихъ ли́­ковъ вѣ́р­ная соу­ча́ст­ни­це. Ра́дуй­ся, не­бе́с­ныхъ чер­то́­говъ сла́в­ная жи́­тель­ни­це. Ра́дуй­ся, я́ко мзда́ твоя́ мно́­га е́сть на не­бе­сѣ́хъ. Ра́дуй­ся, я́ко ра́­дость твоя́ вѣ́ч­на е́сть во оби́­те­лехъ святы́хъ. Ра́дуй­ся, я́ко ты́ и на́мъ прія́ти ра́­дость, бла­го­да́ть же и сла́ву вы́ну хо­да́­тай­ствуе­ши.

Ра́дуй­ся, свята́я рав­ноа­по́­столь­ная Марíе Ма­гда­ли́­но, па́че всѣ́хъ бла́гъ слад­ча́й­ша­го Го́­спо­да Іису́­са воз­лю­би́в­шая.

Кон­да́къ 13

О, пре­чу́д­ное и пре­ди́в­ное же́нъ укра­ше́ніе, всѣ́мъ же хри­стіа́­номъ по­хва­ла́ и ра́­до­ва­ніе, апо́­сто­ломъ ра́в­ная я́вль­шаяся, мѵ­ро­но́­си­це сла́в­ная Ма­гда­ли́­но Марíе! Ны́­нѣш­нее на́ше мо­ле́ніе пріе́м­ши, отъ вся́кихъ на́съ бѣ́дъ и скор­бе́й ду­ше́в­ныхъ и тѣ­ле́с­ныхъ и отъ вра́гъ ви́­ди­мыхъ и не­ви́­ди­мыхъ, на на́съ находя́щихъ, из­ба́­ви и къ Ца́рствію не­бе́с­но­му хо­да́­тай­ствомъ тво­и́мъ на­пра́­ви всѣ́хъ, со уми­ле́ніемъ и лю­бо́­вію по­ю́­щихъ о тебѣ́ Бо́гу: Алли­лу́ія.

Се́й кон­да́къ гла­го́­лет­ся три́­жды. Та́же Икосъ 1-й и Кон­да́къ 1-й

Мо­ли́­тва 1-я ко святѣ́й рав­ноа­по́­столь­нѣй Марíи Ма­гда­ли́­нѣ

О, свята́я мѵ­ро­но́­си­це и все­хва́ль­ная рав­ноа­по́­столь­ная Хри­сто́­ва уче­ни́­це Ма­гда­ли́­но Марíе! Къ тебѣ́, я́ко вѣ́р­нѣй и мо́щ­нѣй о на́съ къ Бо́гу хо­да́­та­и­цѣ, грѣ́ш­ніи и не­до­сто́й­ніи ны́нѣ усе́рд­но при­бѣ­га́­емъ и въ со­кру­ше́ніи сер­де́цъ на́­шихъ мо́­лим­ся. Ты́ въ жи­тіи́ сво­е́мъ стра́ш­ныя ко́з­ни бѣ­со́в­скія ис­пы­та́­ла еси́, но бла­го­да́тію Хри­сто́­вою я́вно тѣ́хъ сво­бо­ди́­ла­ся еси́, и на́съ мо­ли́­тва­ми тво­и́­ми отъ сѣ́ти бѣ­со́в­скія из­ба́­ви, да вы́ну, во все́мъ жи­тіи́ на́­шемъ дѣ́­ломъ, сло́­вомъ, мы́­слію и та́й­ны­ми по­мыш­ле́ніями сер­де́цъ на́­шихъ вѣ́р­но по­слу́­жимъ Еди́­ному Свято́му Влa­ды́­цѣ Бо́гу, я́коже Тому́ обѣ­ща́ли­ся есмы́. Ты́ па́че всѣ́хъ бла́гъ зем­ны́хъ слад­ча́й­ша­го Го́­спо­да Іису́­са воз­лю­би́­ла еси́ и Тому́ чрезъ все́ жи­тіе́ до́­брѣ по­слѣ́­до­ва­ла еси́, Бо­же́­ствен­ны­ми уче́ніи Его́ и бла­го­да́тію не то́­кмо свою́ ду́шу пи­та́­ю­щи, но и мно́­же­ство людíй отъ тмы́ язы́­че­скія ко Хри­ста́ чу́д­но­му свѣ́ту при­во­дя́щи. То́ вѣ́ду­ще про́­симъ тя́: ис­про­си́ на́мъ у Хри­ста́ Бо́га бла­го­да́ть про­свѣ­ща́­ю­щую и освяща́­ю­щую, да е́ю ocѣня́еми преуспѣ­ва́­емъ въ вѣ́рѣ и бла­го­че́­стіи, въ по́­дви­зѣхъ люб­ве́ и са­мо­о­твер­же́нія, да не­лѣ́­ност­но тщи́м­ся слу­жи́­ти бли́ж­нимъ въ и́хъ ну́­ждахъ ду­хо́в­ныхъ и тѣ­ле́с­ныхъ, па́мятующе при­мѣ́ръ тво­е­го́ че­ло­вѣ­ко­лю́­бія. Ты́, свята́я Марíе, бо́­дрен­но бла­го­да́тію Бо́жіею про­те́­кла еси́ жи­тіе́ на зе­мли́ и ми́р­но отош­ла́ еси́ во оби́­те­ли не­бе́с­ныя: моли́ Хри­ста́ Спа́­са, да мо­ли́­тва­ми тво­и́­ми спо­до́­битъ на́съ не­пре­ткно­ве́н­но со­вер­ши́­ти стра́н­ствіе на́ше въ се́й юдо́­ли пла́­ча и въ ми́рѣ и покая́ніи скон­ча́­ти жи­во́тъ на́шъ, да та́ко и въ свя́­то­сти на зе­мли́ по­жи́в­ше, вѣ́ч­ныя бла­же́н­ныя жи́­зни на не­бе­си́ спо­до́­бим­ся и та́мо съ то­бо́ю и всѣ́­ми святы́ми вку́­пѣ вы́ну вос­хва́­лимъ Тро́­и­цу Не­раз­дѣ́ль­ную, вос­по­и́мъ Еди́­но Бо­же­ство́, Отца́ и Сы́на и Ду́ха Всесвята́го во вѣ́ки вѣ­ко́въ. Ами́нь.

Мо­ли́­тва вто­ра́я

О, свята́я мѵ­ро­но́­си­це, рав­ноа­по́­столь­ная Ма­гда­ли́­но Марíе! Ты́ те́­плою лю­бо́­вію сво­е́ю ко Хри­сту́ Бо́гу по­пра́­ла еси́ злы́я ко́з­ни вра́жія и обрѣ­ла́ еси́ без­цѣ́н­ный би́­серъ Хри­ста́ и до­сти́г­ла еси́ Ца́р­ства Не­бе́с­на­го. Сего́ ра́ди къ тебѣ́ при­па́­даю и уми­ле́н­ною ду­ше́ю и со­кру­ше́н­нымъ се́рд­цемъ во­пію́ ти́ а́зъ не­до­сто́й­ный: при́­зри съ вы­со­ты́ не­бе́с­ныя на мя́, бо­ри́­ма­го грѣ­хо́в­ны­ми иску­ше́ніями, ви́ждь, ко́ль мно́­ги­ми грѣ­хи́ и бѣды́ на вся́къ де́нь вра́гъ за­пи­на́­етъ мя́, ища́ моея́ по­ги́­бе­ли. Сла́в­ная и все­хва́ль­ная уче­ни́­це Хри­сто́­ва, Марíе! Умо­ли́ воз­лю́б­лен­на­го то­бо́ю, и воз­лю­би́в­ша­го тя́, Хри­ста́ Бо́га, да по­да́стъ ми́ остав­ле́ніе мно́­гихъ мо­и́хъ пре­грѣ­ше́ній, укрѣ­пи́тъ мя́ бла­го­да́тію Сво­е́ю тре́з­вен­но и бо́­дрен­но ше́­ство­ва­ти путе́мъ святы́хъ за́­по­вѣдій Его́ и да со­дѣ́­ла­етъ мя́ бла­гоу­ха́н­нымъ хра́­момъ Ду́ха Свята́го. Да та́ко въ ми́рѣ не­по­сты́д­но скон­ча́ю мно­го­тру́д­ное жи­тіе́ мое́ на зе­мли́ и все­лю́­ся во свѣ́т­лыя и бла­же́н­ныя оби́­те­ли рая́ не­бе́с­на­го, идѣ́­же ты́ со всѣ́­ми святы́ми вы́ну ра́­дост­но сла­во­сло́­ви­ши Еди­но­су́щ­ную Тро́­и­цу, Отца́, Сы́на и Ду́ха Всесвята́го. Ами́нь.

Тро­па́рь, гла́съ 1

Христу́, на́съ ра́ди отъ Дѣ́вы ро́жд­ше­муся, чест­на́я Ма­гда­ли́­на Марíя, по­слѣ́­до­ва­ла еси́, Того́ оправ­да́нія и за­ко́­ны храня́щи. Тѣ́м­же дне́сь всесвяту́ю твою́ па́мять пра́здну­ю­ще, грѣ­хо́въ раз­рѣ­ше́ніе мо­ли́­тва­ми тво­и́­ми пріе́м­лемъ.

Кон­да́къ, гла́съ 3

Пред­стоя́щи, пре­сла́в­ная, у Кре­ста́ Спа́­со­ва со ины́­ми мно́­ги­ми, и Ма́­те­ри Го­спо́д­ни со­стра́жду­щи, и сле́­зы то­ча́­щи, сіе́ въ по­хва­лу́ при­но­ша́­ше, гла­го́­лю­щи: что́ сіе́ е́сть стра́н­ное чу́до? Со­дер­жа́й всю́ тва́рь, по­стра­да́­ти из­во́­ли. Сла́­ва дер­жа́­вѣ Тво­е́й.